ಜಿಡ್ಡ್ಯಾ ಫುಲಾಂ (- ಪ್ರೇಮ್ ಮೋರಸ್)

[ಕವಿತಾ] ಜಿಡ್ಡ್ಯಾ ಫುಲಾಂ (- ಪ್ರೇಮ್ ಮೋರಸ್)

ಫುಲ್ ಆನಿ ಸೊಭಾಯೆವಿಶಿಂ ಹಿ ಕವಿತಾ ಸಾಂಗ್ತಾ ಮ್ಹಣುನ್ ಲೆಕ್ತಾಯ್ ತರ್ ತುಂ ಚೂಕ್ ಸಮ್ಜಲಾಯ್. ಹಿ ಕವಿತಾ ಸಾಂಕೇತಿಕ್ ರಿತಿನ್ ಖೂಪ್ ಗಜಾಲಿ ಸಾಂಗ್ತಾತ್. ಪಾರಂಪರಿಕ್ ಚಿಂತ್ಪಾಕ್ ಆನಿ ಮನಿಸ್ ಕಸೊ ಅಪ್ಲೆ ಸಕ್ತೆಕ್ ಗಳ್ಸುನ್ ದೆವಾಸಮೊರ್ ಸಯ್ತ್ ಅಪುಣ್ ಮುಕಾರ್, ಅಪುಣ್ ಬುಧ್ವಂತ್, ಅಪುಣ್ ಶಾಣೊ ಮ್ಹಣುನ್ ದಾಕಂವ್ಚ್ಯಾ ಧಾಂವ್ಣೆಂತ್ ಆಸ್ತಾನಾ ಜಿಡ್ಡೆ ಫುಲ್ ಖಾಲ್ತೆಪಣಾನ್ ಅಪ್ಲೆಂ ಕಾಮ್ ಕರುನ್ ವೆತಾ. ಆನಿ ಹ್ಯಾ ಕವಿತೆಚಿ ಸೊಭಾಯ್ ಸಾಂಗತ್ ವೆತಾ.

[ಕವಿತಾ] ಜಿಡ್ಡ್ಯಾ ಫುಲಾಂ (- ಪ್ರೇಮ್ ಮೋರಸ್)

ಜಿಡ್ಡ್ಯಾ ಫುಲಾಂ

ಘರ್‍ಚ್ಯಾ ಪೊರ್‍ಸಾಂತ್

ತಾಂಬ್ಡಿ ಸೊಭಾಯ್

ಮರ್‍ಯೆಚಾ ಕುರೊವಾರ್

ಗುಲೊಬಾಚಿ ಬಡಾಯ್

ಫುಲಾಂತ್ಲೆಂ ರೆ ಫುಲ್

ಜಿಡ್ಡ್ಯಾ ಫುಲ್

ಪಾಚ್ವ್ಯಾ ಗುಡ್ಯಾರ್

ನಾ ತಾಕಾ ಬಡಾಯ್

ಕುರೊವಾರ್ ಸೊಭ್ಚಿ

ಆಶಾ ಥಾಂಬ್ಲ್ಯಾ

ಜಿಡ್ಡ್ಯಾ ಫುಲಾನ್

ಮರ್ಜಿ ಸಾಂಡ್ಲ್ಯಾ

ಫುಲಾಂಚ್ಯಾ ವಾಟ್ಲೆಂತ್

ಅಖ್ರೇಚೆಂ ಸ್ಥಾನ್

ಮರ್‍ಯೆಚಾ ಪಾಂಯಾರ್

ಆಸಾ ತಾಕಾ ಮಾನ್

ಬಾಳ್ಕಾಚ್ಯಾ ಪಾಯಾಂಚೊ

ಉಮೊ ಘೆತಾತ್

ಖಾಲ್ತ್ಯಾ ಮನಾನ್

ಜಿಡ್ಡ್ಯಾಕ್ ಚೊಯ್ತಾತ್

ಖಾಲ್ತೆ ಗೂಣ್

ಜಿಡ್ಡ್ಯಾನ್ ಶಿಕಯ್ಲೆ

ಮರ್‍ಯೆಚ್ಯಾ ಪುತಾನ್

ಲೊಕಾಕ್ ಪಾಚಾರ್‍ಲೆ

ಗುಲೊಬಾಚ್ಯಾ ಮರ್ಜೆಕ್

ಕಾಂಟ್ಯಾಚೊ ದೇಂಟ್

ಜಿಡ್ಡ್ಯಾಂಚ್ಯಾ ಖಾಲ್ತೆಪಣಾಂತ್?

ಫುಲ್‌ರೆ ತೆಂ ಕಾಟ್

- ಪ್ರೇಮ್ ಮೋರಸ್. [ಸಪ್ತೆಂಬ್ರ್, 2020]