ಸಬ್ದ್ (- ಲಾರೆನ್ಸ್ ವಿನೋದ್ ಬಾರ್ಬೋಜ್)

ನಾ ಸ್ವಾಸ್, ದೇಶ್ ವಾ ಆಕಾರ್

ಹಾಂವೆಂ ಭಾಂದ್ಲಾಂ, ಹಾಂವೆಂ ಮೊಡ್ಲಾ

ಸಭಾರಾಂಚೊ ಸಂಸಾರ್

ನೆಣಾಂ ಮ್ಹಜೊ ಜಲ್ಮ್ ವಾ ಅಂತ್ಯ್

ದಿಲಾ ಜಲ್ಮ್, ಥೊಡ್ಯಾಂಕ್ ಪುನರ್-ಜನ್ಮ್

ಥೊಡ್ಯಾಂಕ್ ಲಾಸ್ಲಾಂ, ಥೊಡ್ಯಾಂಕ್ ಪುರ್ಲಾಂ

ಅಸ್ತಾನಾ ಜೀವ್.

ಕರ್ತಾತ್ ಪುಜಾ, ಥೊಡ್ಯಾಂಕ್ ವೇಶ್ಯಾ

ಕರ್ತಾ ಮಾನ್, ಘಾಲ್ತಾ ಖೊಟ್

ರುತಾ ಕರ್ತಾಂ ವ್ಯಕ್ತಿತ್ವ್, ಚಡಯ್ತಾ ಮೋಲ್

ಕಿತ್ಯಾಕ್.. ಹಾಂವ್ ಅನ್‌ಮೋಲ್

ಅನ್ಭೋಗ್, ಜಾಣ್ವಾಯ್ ಚಡಯ್ತಾ ಸೊಭಾಯ್

ಜಾತಾ ಎಕ್ವೊಟ್, ಹಿಂಸಾ ಅನಿ ಅನೀತ್

ಹಾಂವ್ ಅಸಾಂ ಮೊಗಾಂತ್, ರಾಗಾಂತ್

ಅಯ್ಕಲ್ಯಾರ್ ಅವಾಜ್, ಥೊಡ್ಯಾಂಕ್ ನಾ ಅವಾಜ್.

ದುಳಿಚೆಂ ವಸ್ತುರ್, ವಿಣ್ಗೊ ಕರ್ತಾಲೊ ವಾರೆಂ-ಪಾವ್ಸ್

ಬದ್ಲಿನಾಕಾ ಸ್ವರೂಪ್, ಘಾಲುನ್ ಲೇಪ್

ಅರ್ಸೊ ಲಜ್ತಾಲೊ, ಪುಸುನ್ ವೆತಾನಾ

ಮ್ಹಜೊ ತಾತ್ಕಾಲಿಕ್ ಶೃಂಗಾರ್.

- ಲಾರೆನ್ಸ್ ವಿನೋದ್ ಬಾರ್ಬೋಜ್. [ಅಕ್ತೋಬ್ರ್, 2020]