ಕವಿತಾकविताPoem

ರೂಪ್ಡಿಂ (- ಸಖಾರಾಮ್ ಶೆಣ್ವಿ ಬೋರ್ಕರ್)

[ಕವಿತಾ] ರೂಪ್ಡಿಂ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಮನಶಾಂಕ್ ನಾಗಡೆಂ ಕರ್ಚಿ ಸಕತ್ ಕವಿತೆಚ್ಯಾ ಥೊಡ್ಯಾಚ್ ಉತರಾಂನಿ ಆಸುಂಕ್ ಸಾಧ್ಯ್ ಆಸಾ? ಹಿ ಕವಿತಾ ಖರಿಚ್ ತಸಲಿ ಕವಿತಾ. ಆಯಚೊ ದರೇಕ್ ಮನೀಸ್ ಅಪಣಾಕ್ ಕಳಿತ್ ಆಸುನ್ ವಾ ನಾಸತಾನಾ ರುಪಡಿಂ ಘಾಲುನ್ ಜಿಯೆತಾ. ಸಮಾಜೆಕ್, ಹೆರಾಂಕ್ ದಾಕವ್ಪಾಕ್. ಆನಿ ಹಿಂ ರುಪಡಿಂ ಘಾಲ್ತಕಚ್ ಕಿತೆಂ ಮನಶಾಚೆಂ ಸೈಮ್ ಬದಲತಾ? ಹೊ ಏಕ್ ಅಧುರೊ ಪ್ರಶ್ನ್.

ಬಾಬ್ ಸಖಾರಾಮ್ ಶೆಣವೀ ಏಕ್ ಅಪುರ್ಭಾಯೆಚೊ ಚಿಂತಪಿ, ಆನಿ ತಾಚಿ ದರೇಕ್ ಕವಿತಾ ಹಾಚಿ ಗವಾಯ್. ಹ್ಯಾ ಕವಿತೆಂತಲಿ ವಯ್ಚಾರಿಕತಾ ಪಾರ್ಕುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ರೂಪ್ಡಿಂ (- ಸಖಾರಾಮ್ ಶೆಣ್ವಿ ಬೋರ್ಕರ್)

ರೂಪ್ಡಿಂ

ಪೈಲಿಂ ಲೊಕ್…

ಫಕತ್ ಶಿಗ್ಮ್ಯಾವೆಳಾರ್,

ಕಾರ್ನಿವಾಲಾಕ್,

ವಾ ದಶಾವ್ತಾರಿ ಕಾಲ್ಯಾಕ್

ರೂಪ್ಡಿಂ ಘಾಲೂನ್ ಮಿರಯ್ತಾಲೆ.

ರೂಪ್ಡಿಂ ಘಾಲೂನ್ ಭೊಂವ್ಪಾಚಿ

ಲೊಕಾಂಮದಿಂ ಸರ್ತಚ್ ಲಾಗ್ಲ್ಯಾ.

ಪಾವ್ಲಾಂ ಕಣ್ಕಣಿಂ

ರೂಪ್ಡಿಂ ಘಾಲೂನ್ ಮಿರೊವ್ಪಿ

ಲೊಕಚ್ ಚಡ್ ದಿಶ್ಟಿ ಪಡ್ಟಾತ್.

ಕೊಣ್ ಸಭ್ಯತಾಯೆಚೆಂ ರೂಪ್ಡೆಂ ಘಾಲ್ತಾ

ಕೊಣ್ ಸಮಾಜಸೆವಕಾಚೆಂ,

ಕೊಣ್ ಪಯ್ಶೆಕಾರಾಚೆಂ,

ಕೊಣ್ ರಾಜ್ಕಿ ಫುಡಾರ್ಯಾಚೆಂ,

ತರ್ ಕೊಣ್

ಸಾಧು, ಸಂತ್, ಮಹಾತ್ಮ್ಯಾಚೆಂ !

ಪೂಣ್..

ಜೆನ್ನಾ ಹಿಂ ಸಗ್ಳಿಂ ರೂಪ್ಡಿಂ

ಗಳೂನ್ ಪಡ್ಟಾತ್

ತೆನ್ನಾ ಉಕ್ತೆಂ ಜಾತಾ

ಕೊಣ್ ಪಯ್ಶೆಕಾರ್,

ಕೊಣ್ ಸಮಾಜಸೆವಕ್

ಕೊಣ್ ಸಾಧು,ಕೊಣ್ ಸಂತ್

ಕೊಣ್ ಫುಡಾರಿ

ಕೊಣ್ ಕಿತೆಂ, ಕಿತೆಂ ತೆಂ!

ಆನಿ ಮಾಗೀರ್

ಸಭೆಮಾಜಾರ್ ಯೆತಾ

ರೂಪ್ಡ್ಯಾಂ ಫಾಟ್ಲ್ಯಾನ್ ಲಿಪಿಲ್ಲೆಂ

ಭಿರಾಂಕೂಳ್ ಸತ್!

- ಸಖಾರಾಮ್ ಶೆಣ್ವಿ ಬೋರ್ಕರ್. [ಫೆಬ್ರೆರ್, 2020]