ಧಾಳ್ಯೊ [ಡೊ. ಝೀಟಾ ಲೋಬೊ]

[ಕವಿತಾ] ಧಾಳ್ಯೊ [ಡೊ. ಝೀಟಾ ಲೋಬೊ]

’ಮ್ಹಜ್ಯಾ ಘರಾ ಬಾರಾ ಜೊತಾಂ, ಪೂಣ್ ಹಾಂವ್ ಮಾತ್ರ್ ಮಾಗೊನ್ ಖಾತಾಂ’ ಹಿ ಮಾಲ್ಘಡ್ಯಾಂಚಿ ಸಾಂಗ್ಣಿ ಫಟ್ಕಿರಿ ನ್ಹಯ್. ಆಯ್ಚ್ಯಾ ಕೊಂಕಣಿ ವರ್ತುಳಾಂತ್ ಹಿ ಜೊಕ್ತಿ. ಭಾರತ್ ದೇಶಾಚ್ಯಾ ಸಂವಿದಾನಾನ್ ಮಾನ್ಯತಾ ದಿಲೆಲ್ಯಾ ಕೊಂಕಣಿ ಭಾಸೆಂತ್ ಆಸುಂಕ್ ಆಮ್ಚೆಲಾಗಿಂ ಸಗ್ಳೆಂ (ವ ಚಡ್ತಿಕ್) ಆಸಾ, ಪಾಂಚ್ ಲಿಪಿಯಾಂನಿ ಕೊಂಕಣಿ ಬರಯ್ತಾತ್, ಚ್ಯಾರ್ ರಾಜ್ಯಾಂನಿ ಲೊಕಾಂನಿ ಉಲಂವ್ಚಿ ಪ್ರಮುಖ್ ಭಾಸ್ ಮ್ಹಣುನ್ ವರ್ಸಾಕ್ ಏಕ್ ಪಾವ್ಟಿಂ ತರ್‌ಯೀ ವೆದಿಚೆರ್ ಚಡ್‌ಲ್ಲೆ ಮುಕ್ಕಾಲ್ (3/4)  ಅಕ್ಕಲಾಚೆ ಮಾನಾಚೆ ಸಯ್ರೆ ಬೊಬಾಟ್ತಾತ್ ಆನಿ ಹರ್ದೆಂ ಪೆಟ್ತಾತ್ ಆನಿ ಸಮೊರ್ ಆಸ್ಚಿಂ ಪಾಂಚ್ ಬೊಡಾಂ ತಾಳಿಯೊ ಪೆಟ್ತಾತ್. ತಿತ್ಲ್ಯಾರ್ ಸಂಪ್ತಾ ಆಮ್ಚೊ ಜಾಗತಿಕ್ ಕೊಂಕಣಿ ಸ್ಪಿರಿತ್. ವೆದಿಥಾವ್ನ್ ಸಕ್ಲಾ ದೆಂವ್ತಚ್ ಸುರು ಜಾತಾ ಚೊರೆ: ಪ್ರಾಂತ್ಯಾಚೆ ನಾರೆ, ಲಿಪಿಚೆ ದೊರೆ ಆನಿ ಬೊಲಿಚೆ ಚ್ಯುರಾರ್ ಚ್ಯುರೆ. ಎಕಾ ಬೊಲಿಂತ್ ಸಯ್ತ್ ತೀನ್-ಚ್ಯಾರ್ ಕಾಜುಲೆ ಅಮಿಂಚ್ ಸುರ್ಯಾ ಮ್ಹಣುನ್ ಗಾಜಯ್ತಾನಾ ಹಾಸ್ಚೆಂಗಿ ವಾ ಸೊಸ್ಚೆಂಗಿ ಸಮ್ಜನಾ.

ಕಾಂಯ್ ತೆಂಪಾದಿಂ ಇಂಗ್ಲಿಶ್ ದೇಶ್ ಬ್ರಿಟನಾಂತ್ ಕೊಂಕಣಿ ಭಾಸೆಂತ್ ಘೋಷಣ್ (Announcement) ಕೆಲೆಂ ಮ್ಹಣುನ್ ಆಮ್ಚ್ಯಾ ಕೊಂಕಣ್ ದೇಶಾಂತ್ ಹ್ಯಾಚ್ ಕಾಜುಲ್ಯಾಂನಿ ಹರ್ದೆಂ ಪೆಟ್ಲೆಂ. ಕೊಂಕಣಿಕ್ ಊಂಚ್ ಉಭಾರ್‌ಲ್ಲ್ಯಾಕ್ ದಾಂಗ್ರೊ ಮಾರ್ಲೊ, ಆನಿ ಮತ್/ಗತ್ ನಾತೆಲ್ಯಾ ಚಮ್ಚಾಂನಿ ಉಡಿ ಮಾರುಂಕ್ ಧರ್ಲೆಂ. ಪುಣ್ ಕೊಣೆಂಯ್ ಎಕ್ಲ್ಯಾ ಪುನೆಗೆಲ್ಲ್ಯಾನ್ ತೆಂ ಘೋಷಣ್ ಕಸಲೆಂ ಮ್ಹಳ್ಳೆಂ ಸಮ್ಜೊಂಚೆಂ ಪ್ರಯತ್ನ್ ಕೆಲೆಂನಾ. ಕಂಯ್ ಗೆಲ್ಯಾ ಆಮ್ಚ್ಯಾ ಜಾಗತಿಕ್ ಭಾಸೆಚಿ ವಯ್ಚಾರಿಕತಾ? ಅರೆ ಬಾಬಾ ಹೆಂ ಘೋಷಣ್ ಜಾವ್ನಾಸ್ಲೆಂ ’ನವೆಂ ವರಸ್ ಯೆಂವ್ಚ್ಯಾರ್ ಆಸಾ ದೆಕುನ್ ಲೊಕಾಂಕ್ ಹೆಂ ಸೂಚಿತ್ ಕರ್ತಾಂವ್, ಕೊಣೆಂಯ್ ಪಿಯೆವ್ನ್ ಡ್ರಾಯ್ವ್ ಕರ್ಚೆಂ ವಾ ಚೊರಿ/ಲೂಟ್ ಅಪ್ರಾದಾಂತ್ ಪಡ್ಚೆಂ ನ್ಹಯ್’. ನಾಕ್ಶೆ ಇಡ್ಯಾಂತ್ ಇಲ್ಲಿ ಲಜ್ ಆಸ್ಚ್ಯಾಂನಿ ಹೆಂ ಸಮುಂಕ್ ಪಯ್ಲೆಂ ಪ್ರೇತನ್ ಕರಿಜೆ, ಅಸಲೆಂ ಘೋಷಣ್ ಕರುಂಕ್ ಜರ್ ಕೊಂಕಣಿ ವ್ಹಾಪಾರ್ಲಿ ತರ್ ಆಮಿ ಉಂಚಾಯೆರ್ ಆಸಾಂವ್ ವಾ ಕೀಳ್ ಮ್ಹಳ್ಳೆಂ ಬೂದ್‌ಜೀವಿ (ಆಸಾತ್ ತರ್) ಚಿಂತುಂದಿತ್.

ಆತಾಂ ಪಾಂಚ್ ಲಿಪಿಂನಿ ಕೊಂಕಣಿ ಬರಯ್ತೆಲ್ಯಾಂಕ್/ವಾಚ್ತೆಲ್ಯಾಂ ಪಯ್ಕಿಚ್ಯಾಂಕ್ ಚ್ಯಾರ್ ಸರ್ಕಾರಿ ಅಕಾಡೆಮಿ ಆಸಾತ್; ನಾಗರಿ/ಮಲಯಾಳಂ ಲಿಪಿಚ್ಯಾ ಕೊಂಕಣಿಕ್ ಕೇರಳಾಂತ್ ಕೊಂಕಣಿ ಅಕಾಡೆಮಿ ಆಸಾ, ಕನ್ನಡ ಲಿಪಿಂತ್ ಕೊಂಕಣಿ ಬರಯ್ತೆಲ್ಯಾಂಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಆಸಾ, ಗೊಂಯಾಂತ್ ರೋಮಿ ಲಿಪಿಂತ್ ಕೊಂಕಣಿ ಬರಯ್ತೆಲ್ಯಾಂಕ್ ದಲ್ಗಾದೊ ಕೊಂಕಣಿ ಅಕಾಡೆಮಿ ಆಸಾ, ನಾಗರಿ ಲಿಪಿಂತ್ ಕೊಂಕಣಿ ಬರಯ್ತೆಲ್ಯಾಂಕ್ ಗೊಂಯ್ ಕೊಂಕಣಿ ಅಕಾಡೆಮಿ ಆಸಾ. ಬರೆಂ ನ್ಹಯ್? ಏಕ್ ಪಾವ್ಟಿಂ ಪರತ್ ಹರ್ದೆಂ ಪೆಟ್ಚ್ಯಾದಿಂ ಪಯ್ಲಿಂ ಮುಳಾವಿಂ ಪ್ರಸ್ನಾಂಚೆರ್ ನಿಯಾಳ್ ಕರ್ಯಾಂ; ಜಾಗತಿಕ್ ಕೊಂಕಣಿಚ್ಯೊ ಬೊಲಿ ಕಿತ್ಲ್ಯೊ ವಾ ಖಂಚ್ಯೊ ಮ್ಹಣುನ್ ಕೊಣೆಂಯ್ ಆಜ್ ಪರ್ಯಾಂತ್ ಕಾಮ್ ಕೆಲಾಂ? ಆತಾಂ ’ತಾಣೆಂ/ಹಾಣೆಂ ಕೆಲಾಂ’ ಮ್ಹಣುನ್ ವಾರ್ಯಾರ್ ಉಲಂವ್ಚೆಂ ನಾಕಾ. ಸತ್ ಒಪುನ್ ಘೆಂವ್ಚೆಂ ಧಯ್ರ್ ತರ್‌ಯೀ ಘೆವ್ಯಾಂ. ಜಾಗತಿಕ್ ಕೊಂಕಣಿ ಸೊಡ್ಯಾಂ, ಆಮ್ಚಿ ನದರ್ ಆಮ್ಚೊ ತಳ್ಹಾತ್ ಉತ್ರೊನ್ ವಚಾನಾ ತರ್ ಜಾಗತಿಕ್ ಕೊಂಕಣಿಕ್ ಕೊಲೊ ವ್ಹರುಂ. ಕಿತ್ಯಾಕ್ ಮ್ಹಳ್ಯಾರ್ ಕೇರಳ ಕೊಂಕಣಿ ಫಕತ್ ಕೇರಳಾಕ್ ಸೀಮಿತ್, ಕರ್ನಾಟಕ ಕೊಂಕಣಿ ಫಕತ್ ಕರ್ನಾಟಕಾಕ್ ಸೀಮಿತ್, ಗೊಂಯ್ಚ್ಯೊ ಅಕಾಡೆಮಿ ಫಕತ್ ತ್ಯಾ ತ್ಯಾ ಲಿಪಿಂಕ್ ಸೀಮಿತ್ ಶಿವಾಯ್ ಸಮಗ್ರ್/ಅಖಿಲ್/ಜಾಗತಿಕ್ ಮ್ಹಳ್ಳೆ ಸಬ್ಧ್ ಫಕತ್ ವರ್ಸಾಕ್ ಏಕ್ ಪಾವ್ಟಿಂ ವ್ಹಾಪ್ರುಂಕ್ ಮೆಳ್ಚೆ ಫಕತ್ ಸಬ್ಧ್ ಜಾಲ್ಯಾತ್.

ಧಾಳ್ಯೊ ಸಬ್ಧ್ ಹ್ಯಾ ಪರಿಗತೆಚೆರ್ ಪರಿಪೂರ್ಣ್ ಅರ್ಥಾಚೊ ಸಬ್ಧ್. ಸುಕಿದಾಡ್ ಆಸಾ, ಚಿಂತ್ಪಾಚಿ ಸುಕಿದಾಡ್, ವಯ್ಚಾರಿಕತೆಚಿ ಸುಕಿದಾಡ್. ಆಮಿ ಮುಕಾರ್ ವೆಚ್ಯಾಕೀ ಪಾಟಿಂ ವಚುನ್ ಆಸಾಂವ್, ಆನಿ ಕೊಣಾಕ್‌ಚ್ ಹೆಂ ಉಗ್ತ್ಯಾನ್ ಸಾಂಗುಂಕ್ ಧಯ್ರ್ ನಾ. ಕಾಂಯ್ ಮೆಳುಂಕ್ ಆಸ್ಚಿ ಬಿಸ್ಕುಟ್ ಚುಕ್ತಾಕಾಯ್ ಮ್ಹಳ್ಳಿ ಭಿರಾಂತ್ ಆಸ್ಯೆತ್. ಮುಕಾರ್ ಕೊಣ್‌ಯೀ ಆಯ್ಲೊ ತರ್ ತಾಂಕಾಂ ಫಾತೊರ್ ಮಾರ್ತಾಂವ್ ಆನಿ ಕಶೆಂ ಪುಣಿಂ ಆವಾಜ್ ಬಂಧ್ ಕರಂವ್ಚಿಂ ಯತ್ನಾಂ ಕರ್ತಾಂವ್. ದೆಕುನ್ ಫಕತ್ ಕಾಗ್ದಾಂನಿ ಆಮಿಂ ಅಮ್ಕಾಂಚ್ ಪಾಟೊಸಾಕ್ ಚಡವ್ನ್ ಭಿತರ್ಲೆ ಭಿತರ್ ಪೊಕೊಳ್ ಜಾತೆಚ್ ಆಸಾಂವ್.

[ಕವಿತಾ] ಧಾಳ್ಯೊ [ಡೊ. ಝೀಟಾ ಲೋಬೊ]

ಧಾಳ್ಯೊ

ಆಮ್ಚಿ ಕೊಂಕಣಿ ಭುಂಯ್ ಸುಪೀಕ್

ಕುಡುಂಬಿ, ಸಿದ್ದಿ, ಖಾರ್ವಿ, ಗಾವ್ಲಿ ಗೊಮಾಂತಕ್

ಖ್ರಿಸ್ತಿ, ಕೊಮಾರ್‌ಪಂತ್, ಆಚಾರಿ, ಗಾಬಿತ್

ಜಮಾಯತೀ, ನವಾಯತೀ, ಪಾಡ್ತೀ ಶಾಬಿತ್

ಆನೀಕೀ ಸೊಧ್ಲ್ಯಾರ್ ಪಾವ್ಸ್ ಶೆಣಯ್ಲ್ಯಾರ್

ಸಂಸ್ಕೃತಿ ಸಾರೆಂ ಭರಾನ್ ಘಾತ್ಲ್ಯಾರ್

ವ್ಹಾಜಾಂತ್ರಿ, ಮೇಸ್ತ್, ದಾಲ್ದಿ, ಚಾಪ್ಡೆಕಾರ್

ಗೊಸಾವ್ಯಾಕ್,ಯತೇಷ್ಟ್ ಪೀಕ್ ಭರಾತ್ ಸಾಸ್ಣಾಕ್

ತಮಣೆ, ಘುಮಟಾಂಚೊ ತರೀ, ಸಾದ್ ಮ್ಹಜೊ

ಕಾಳ್ಜಾಂತ್ಲಿ ಕಾಣಿ ಮ್ಹಜಿಚ್, ಬಾಂಯ್ತ್‌ಲಿಂ ಗಾಣಾಂಯ್ ಮ್ಹಜಿಂ ತರೀ

ಕೊಂಕಣಿ ಮಾಯೆಚ್ಯಾ ಕಾತೀರ್ ಘಾತ್ಲ್ಯಾತ್ ಸ್ವಾರ್ಥಾನ್ ಧಾಳಿಯೊ

ಪಾಳಾಂ ಪಾನಾಂ ಫಾಂಟಿಯೆಕ್, ಅಬ್ಲೆಶಾಚೆ ಘೊಂಟೆರ್

ಸುಕಿದಾಡ್ ಉಗ್ತೆ, ಗೂಂಡ್ ಖಡ್ಡೆ ಕಾಂವ್ಣಿ ಕರೀ ಯೇತ್?

ಭುಂಯ್ ಬಾವ್ಡೇನ್ ಘಾಮಾನ್ ಭಿಜುನ್, ಪಾಲಂವ್ ಪಿಳುನ್

ಪಾವ್ಸಾಚಿ ಕಾಣಿ ವಿಣುನ್ ಚಿಕಟ್ ಮಾತಿ ಎಕ್ಟಾಂವ್ನ್

ಎಕಾಚ್ ವಾರ್‍ಯಾನ್ ಎಕಾಚ್ ಉಭೇನ್ ಎಕಾಚ್ ಝರೀನ್

ಮೆಕ್ಳಾಲ್ಲೆ ಝಡಾ ಮಾಂಡೆ ಉಬೆ ವಾಡೊನ್

ಧಾಳ್ಯಾಂಚ್ಯಾ ವ್ಹಾಳ್‌ವಾಂಟಿ, ಸುಕಿಧಾಡಿನಿಂ

ಕೊಂಕಣ್ ಕಾಣಿ, ಕಿಣಿಕಿಣಿ ನಾಚ್, ಕವಿತಾ ಕಾಗ್ದಾ ಫಾಳ್ಯಾಂನಿ,

ಮ್ಹೊರ್ ನಾಚುನ್, ಕೊಗುಳ್ಯೊ ಗಾವುಂದೀತ್, ಉತ್ರಾಂ ಉಸೊಂವ್‌ದೀತ್

ದಾಲಿಂ ದಾಲಿಂ ಕೊಂಕ್ಣಿ ಫುಲಾಂ, ಪೀಕ್ ಧೊಧೊಲ್ ಭರುನ್ ವೊಮ್ತೊಂದೀತ್

- ಡೊ. ಝೀಟಾ ಲೋಬೊ  [ಫೆಬ್ರೆರ್, 2025]

ಡೊ. ಝೀಟಾ ಲೋಬೊ: ವೃತ್ತೆನ್ ಇಂಗ್ಲಿಶ್ ಪ್ರಾಧ್ಯಾಪಕಿ, ಶಿಕ್ಷಣ್ ಶೆತಾಂತ್ ಹಿಣೆಂ ಖೂಪ್ ವಾವ್ರ್ ಕೆಲಾ. ಇಂಗ್ಲಿಶ್ ಭಾಸೆಂತ್ ಹಿಣೆಂ ಬರಯಿಲ್ಲ್ಯಾ ಮೊಟ್ವ್ಯಾ ಕಾಣಿಯಾಂಕ್ ದೊ.ವಿಲ್ಲಿ ಡಿಸಿಲ್ವಾನ್ ಕೊಂಕಣಿಕ್ ತರ್ಜಣ್ ಕರುನ್ ’ಕಮ್ರಾಬಾಂದ್’ ಮ್ಹಳ್ಳೆಂ ಪುಸ್ತಕ್ ಪರ್ಗಟ್ಲಾಂ. ಕಥಾ, ಕಾದಂಬರಿ, ಲೇಖನಾಂ ತಶೆಂಚ್ ಅಪ್ರೂಪ್ ಕವಿತಾ ಬರಯ್ತಾ.