ಅಶೆಂ ಕಿತೆಂ ಕೆಲೆಂ ಗೊ.. (- ಕಲ್ಪೇಶ್ ವೆರೆಂಕಾರ್)

[ಕವಿತಾ] ಅಶೆಂ ಕಿತೆಂ ಕೆಲೆಂ ಗೊ.. (- ಕಲ್ಪೇಶ್ ವೆರೆಂಕಾರ್)

ಕವಿತೆಚ್ಯಾ ’ಮೋಗ್, ಹಾಸ್ಯ್, ಕರುಣಾ, ರಾಗ್, ವೀರ, ಭಯಾನಕ್, ಭೀಭತ್ಸ, ಅಧ್ಭುತ್, ಶಾಂತ’ ಮ್ಹಳ್ಳ್ಯಾ ನವ್ ರಸಾಂ ಪಯ್ಕಿಂತ್ ’ವಿರಹ್’ ಮ್ಹಳ್ಳೊ ರಸ್ ನಾ. ಪುಣ್ ಮನಶಾಚ್ಯಾ ಸಿಂತಿಮೆಂತಾಂನಿ, ಭಾವನಾಂನಿ, ಭಗಣಾಂನಿ ತೊ ಜರೂರ್ ಆಸಾ. ಮನಿಸ್ ಏಕ್ ಅಸಲಿ ಜೀವಿ, ಜಿ ಆಸ್ಚಿ ವಸ್ತ್, ವ ಸಂಗತ್ ವಾ ನಾತೆಂ - ಹ್ಯೇವಿಶಿಂ ಚಡಿತ್ ಚಿಂತುಂಕ್ ವಚಾನಾಂ ಪುಣ್ ಜೆದನಾ ತೊ ನಾ, ತೆದನಾಂ ತೊ ತ್ಯಾ ಸಾಂಡುನ್ ಗೆಲ್ಲ್ಯಾ ವಸ್ತ್/ಸಂಗತ್ ವಾ ನಾತ್ಯಾಚೆಂ ಮೋಲ್ ಸಮ್ಜುಂಕ್ ಸಕ್ತಾ ಮ್ಹಳ್ಳೆಂಚ್ ಹ್ಯಾ ಕವಿತೆಚೆಂ ಮೂಳ್ ಚಿಂತಪ್.

[ಕವಿತಾ] ಅಶೆಂ ಕಿತೆಂ ಕೆಲೆಂ ಗೊ.. (- ಕಲ್ಪೇಶ್ ವೆರೆಂಕಾರ್)

ಅಶೆಂ ಕಿತೆಂ ಕೆಲೆಂ ಗೊ...

ಅಶೆಂ ಕಿತೆಂ ಕೆಲೆಂ ಗೊ ಹಾಂವೆಂ

ಜೆ ತುಕಾ ಲಾಗ್ಲೆಂ

ಮ್ಹಾಕಾ ಜಾಣೀವ್ ದಿನಾಸತನಾ

ಸಂವ್ಸಾರ್ ಸೊಡೂನ್ ತುಂ ಗೆಲೆ..

ಆಜೂನ್ ಯಾದ್ ಆಸಾ ಮ್ಹಾಕಾ ತೊ ದೀಸ್

ಜೆನ್ನಾ ಹಾಂವೆಂ ತುಕಾ ಪಳಯ್ಲೆಂ

ಮ್ಹಾಕಾ ಕಾಂಯ್ ಕಳ್ಚೆಂಪಯಲಿಂ

ಕಾಳ್ಜಾಂತ್ ತುಂ ಮ್ಹಜ್ಯಾ ಬಸ್ಲೆಂ.

ಆಪ್ಣಾಯಲೊ ಜೆನ್ನಾ ತುವೆಂ ಮ್ಹಾಕಾ

ಸಾಮ್ಕೊ ಜಾಲೊ ಹಾಂವ್ ಪಿಸೊ ಕಸೊ

ಮನಾಂತ್ ಫಕತ್ ತುಜೆಂಚ್ ವಿಚಾರ್

ವ್ಹಾವ್ಪಾಕ್ ಲಾಗ್ಲೆಂ ವಾರೆಂ ಕಶೆಂ.

ರಂಗೊವ್ಪಾಕ್ ಲಾಗ್ಲೊ ಹಾಂವ್ ಸಪ್ನಾ

ತುಜ್ಯಾವಾಂಗಡಾ ಜೀಣ್ ಸಾರ್ಪಾಚಿ

ತುಜ್ಯಾಚ್ ತ್ಯಾ ತರೆಕವಾರ್ ಸಪ್ನಾಂನಿ

ಉಗ್ಡಪಾಕ್ ಲಾಗ್ಲಿ ದಾರಾಂ ಆಯುಷಯಾಚಿ

ಜಶೆಂ ಜಶೆಂ ತುಂ ಚಡ್ ಮೊಗ್ ಕರೂಂಕ್ ಲಾಗ್ಲೆಂ

ತಶೆಂ ತಶೆಂ ಮ್ಹಜೆ ಜಿವೀತ್ ಫುಲೂಂಕ್ ಲಾಗ್ಲೆ

ಸಂವ್ಸಾರಾಚ್ಯಾ ಚಾರೂಯ್ ದಿಕಾನಿ ಮ್ಹಾಕಾ

ತೂಚ್ ದೊಳ್ಯಾಮುಖಾರ್ ಯೆವ್ಪಾಕ್ ಲಾಗ್ಲೆಂ..

ಅಶೆಂ ಕಿತೆಂ ಚುಕ್ಲೆಂ ಗೊ ಮ್ಹಜೆಂ

ತೆಂ ತುಕಾ ಇತ್ಲೆಂ ಲಾಗ್ಲೆಂ

ಮ್ಹಾಕಾ ಜಾಣೀವ್ ದಿನಾಸತನಾ

ಸಂವ್ಸಾರ್ ಸೊಡೂನ್ ತುಂ ಗೆಲೆ

ಆತಾ ಮ್ಹಜ್ಯಾ ಹ್ಯಾ ಸಂವ್ಸಾರಾನ್ ಕಾಂಯ್ ಉರುಕನಾ

ಉರ್ಲ್ಯಾ ತ್ಯೊ ತುಜ್ಯೊ ಯಾದಿಂ

ತೊ ದೀಸ್ ಬಿ ಪಯ್ಸ್ ನಾ

ಜೆನ್ನಾ ಹಾಂವ್ ಯೆತ್ಲೊ ತುಜ್ಯಾ ಲಾಗಿಂ..

- ಕಲ್ಪೇಶ್ ವೆರೆಂಕಾರ್. [ಅಗೊಸ್ತ್, 2020]