ಮಿನಾಖಣಿ (- ಕಲ್ಪೇಶ್ ವೆರೆಂಕಾರ್)

[ಕವಿತಾ] ಮಿನಾಖಣಿ (- ಕಲ್ಪೇಶ್ ವೆರೆಂಕಾರ್)

ಮನಿಸ್ ಸ್ವಾರ್ಥಾಕ್ ಲಾಗುನ್ ಹೆರಾಂಚೆಂ ಪಿಡ್ಡ್ಯಾರ್ ಕರುನ್ ಗೆಲೊ. ಹಾಂತುಂ ನಾತಿಂ, ಅಪ್ಲಿಂ, ಭಾಂದ್ ಮ್ಹಣುನ್ ಸಯ್ತ್ ಲೆಕ್ಲೆಂ ನಾ. ಇತ್ಲೆಂಚ್ ನ್ಹಯ್. ಧರ್ತೆಚೆರ್ ಸಯ್ತ್ ಹಲ್ಲೊ ಕರುನ್ ಗೆಲೊ ಪುಣ್ ಹಿ ಧರ್ತಿ ಸಯ್ತ್ ಅನುಪ್ಕಾರಿ ಮನಶಾಚ್ಯಾ ಹ್ಯಾ ಸವಯೆಕ್ ಸೊಸುನ್ ಆಸ್ತಾನಾ ಮಧೆಂ ಮಧೆಂ ಹಿಂ ಅನ್ವಾರಾಂ ಮನಶಾಕ್ ಅಪ್ಲ್ಯಾ ಕಿರ್ಕೊಳ್ ಕರ್ನೆಂಚೆರ್ ನಿಯಾಳುಂಕ್ ಏಕ್ ಆವ್ಕಾಸ್ ಕರುನ್ ಯೆತಾ.

[ಕವಿತಾ] ಮಿನಾಖಣಿ (- ಕಲ್ಪೇಶ್ ವೆರೆಂಕಾರ್)

ಮಿನಾಖಣಿ

ಪೈಶಾಚ್ಯಾ ಹಾವೆಸಾನ್ ಪೆಟೂನ್

ಧರ್ತರೆಚ್ಯಾ ಕಾಳ್ಜಾಕ್ ಘಾತ್ಲೊ ಹಾತ್

ಖಣ್ ಖಣ್ ಖಣೂನ್

ತಾಣೆಂ ಸೈಮಾಚೊ ಕೆಲೊ ಘಾತ್

ಮನ್ಶಾನ್ ಆಪ್ಲ್ಯಾಚ್ ಪಾಯಾಂರ್ ಘಾಲೊ ಫಾತರ್

ಪಡ್ಲೊ ತಾಕಾ ಸೈಮಾಚೊ ವಿಸರ್

ಮಿನೈರ್ ಜಾವ್ನ್ ಪೈಸೊ ಕೆಲೊ

ಭುಂಯೆಕ್ ಸಾಮ್ಕೊ ಪೊಕ್ರೀತ್ ಗೆಲೊ

ಮಿನಾಂಚ್ಯಾ ಟ್ರಕಾನಿ ಘೆತ್ಲೆ ಬಳಿ

ಪ್ರದುಶಣ್ ಪಾತ್ಳ್ಳೆ ಜಳಿ-ಮಳಿ

ಧಾಪ್ಲಿ ಧುಲ್ಲಾನ್ ಘರಾಂ-ದಾರಾಂ

ಘುಸ್ಮಟಲಿ ಬಾಬ್ಡಿ ಝಾಡಾಂ-ಪೆಡಾಂ

ಮನೀಸಪಣಾಚೊ ಜಾಲೊ ಅಭಾವ್

ಮಿನಾಕ್ ಆಯ್ಲೊ ಸಗ್ಳೊ ಭಾವ್

ಮೆಳ್ಟಾ ಥಂಯ್ ತೊ ಖಣೂಂಕ್ ಲಾಗ್ಲೊ

ಭುಂಯೆಕ್ ಸಾಮ್ಕೊ ಪೊಖ್ರುಂಕ್ ಲಾಗ್ಲೊ

ದುಡ್ವಾಂನಿ ಜಾಲೊ ತೊ ಸಾಮ್ಕೊ ಸುಪೀಕ್

ಶೆತಾಂ ಭಾಟಾ ಕೆಲಿ ನಾಪೀಕ್

ಪಾದಿಶೆರ್ ಜಾಲೊ ನಿತಳ್ ಉದ್ಕಾಕ್

ಪಿಡೆನಿ ಘಾತ್ಲೊ ವೆಡೊ ಜಿವಾಕ್

ಕೆನ್ನಾ ಹೊ ಮನೀಸ್ ಸುಧಾರತಲೊ

ಸೈಮಾಚೆರ್ ಅತ್ಯಾಚಾರ್ ಥಾಂಬಯ್ತಲೊ

ಮನೀಸಪಣಾಚಿ ಗುಡಿ ಉಬಾರುನ್

ಸಂವ್ಸಾರಾಂತ್ ಸುಖಿ ತೊ ಜಿಯೆತಲೊ

- ಕಲ್ಪೇಶ್ ವೆರೆಂಕಾರ್. [ಸಪ್ತೆಂಬ್ರ್, 2020]