ನೊಸಾಯ್ [ಮಾ|ಪ್ರತಾಪ್ ನಾಯ್ಕ್ ಎಸ್.ಜೆ.]

ಏಕ್ ಹಸ್ತ್ ಜರ್ ದೀಶ್ಟ್ ಆಸ್ಚ್ಯಾ ಮನ್ಶಾಂ ಸಮೊರ್ ರಾವೊನ್ ಕೆದಾಂತ್ ರೊಂಬ್‌ಲ್ಲ್ಯಾ ಮನ್ಶಾಚ್ಯಾ ಗಾಡಿಯೆಕ್ ವಯ್ರ್ ವೊಡ್ತಾನಾ ಮನಿಸ್ ಪಳೆವ್ನ್ ರಾವ್ತಾ, ಏಕ್ ಗಾಡಾಂವ್ ಜರ್ ದೀಶ್ಟ್ ಆಸ್ಚ್ಯಾ ಮನ್ಶಾಚೆಂ ವೊಜೆಂ ವೊತಾಂತ್ ವ್ಹಾವವ್ನ್ ವರ್ತಾನಾ ಮನಿಸ್ ಸಾವ್ಳೆಂತ್ ಉಭೊ ರಾವೊನ್ ಪಳೆವ್ನ್ ರಾವ್ತಾನಾ, ಮುಯಾಂಚೊ ವ್ಹೊರ್ ದೀಶ್ಟ್ ನಾತ್‌ಲ್ಲ್ಯಾ ಕುಡ್ಡ್ಯಾಂಚ್ಯಾ ಆಂಗಾವಯ್ಲ್ಯಾನ್ ಚರೊನ್ ಪಾಶಾರ್ ಜಾತಾಸ್ತಾನಾ, ದೀಶ್ಟ್ ನಾತ್‌ಲ್ಲೊ ಕುಡ್ಡೊ ಜರ್ ಆಪ್ಲೆಂ ಕಾಮ್ ಮುಖಾರುನ್ ವ್ಹರ್ತಾ ತರ್, ಹಾಂಗಾಸರ್ ತಾತ್ವಿಕ್ ನದ್ರೆನ್ ತುಕುನ್ ಪಳೆಲೆಂ ತರ್; ’ಖರಿ ದೀಶ್ಟ್’ ಆಸ್ಚೊ ತೊ ಕುಡ್ಡೊ ಶಿವಾಯ್, ದೊಳೆ ಆಸೊನ್ ಪಳೆಂವ್ಕ್ ಸಕ್ಚೊ ಮನಿಸ್ ನ್ಹಯ್. ಕಿತ್ಯಾಕ್ ಮ್ಹಳ್ಯಾರ್, ಮನಿಸ್ ದೊಳೆ ಆಸೊನ್ ಪಳೆಂವ್ಕ್, ಪಾರ್ಕುಂಕ್ ಸಕ್ತಾ ಪುಣ್ ಚಿಂತುಂಕ್ ಆನಿ ಲಿಸಾಂವ್ ಶಿಕೊಂಕ್ ಸಕಾನಾ, ಜರ್ ದೊಳೆ ಆಸೊನ್‌ಯೀ ತ್ಯೇ ಹಸ್ತಿ ಥಾವುನ್, ವ ತ್ಯೇ ಗಾಡ್ವಾಥಾವ್ನ್ ಲಿಸಾಂವಾಂ ಶಿಕ್ಚಿ ಶ್ಯಾಥಿ ನಾಸ್ಚೊ ಮನಿಸ್, ತೆ ದೊಳೆ ನಾಸ್ತಾನಾ ಸಯ್ತ್ ಮುಯೆ ಥಾವ್ನ್ ಲಿಸಾಂವಾ ಶಿಕ್ತಾನಾ ತುಮಿಂಚ್ ಸಾಂಗಾ ಕೋಣ್ ದೀಶ್ಟ್ ಆಸ್ಚೊ ಆನಿ ಕೊಣ್ ದೀಶ್ಟ್ ನಾತ್‌ಲ್ಲೊ.

ಮಾ|ಪ್ರತಾಪ್ ನಾಯ್ಕ್ ಹಾಂಗಾಸರ್ ಅಸಲಿಚ್ ಏಕ್ ಅಪುರ್ಭಾಯೆಚ್ಯಾ ಚಿಂತ್ಪಾಚಿ ಕವಿತಾ ಘೆವ್ನ್ ಆಯ್ಲಾ. ಹ್ಯಾ ಕವಿತೆಚ್ಯಾ ಸಕ್ತೆಕ್ ಸಮ್ಜುಂಕ್ ತಶೆಂಚ್ ಪಾರ್ಕುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ನೊಸಾಯ್ [ಮಾ|ಪ್ರತಾಪ್ ನಾಯ್ಕ್ ಎಸ್.ಜೆ.]

ನೊಸಾಯ್

’ಕಾವ್ಳೊ ಕಿರಾಚಿ ಸೊಭಾಯ್ ಪಳೆನಾ,

ಕಿರಾಚಿ ನೊಸಾಯ್* ಕರಿನಾ.

ಮೂಯ್ ಹಸ್ತೆಕ್ ಪಳೆವ್ನ್

ಅಪ್ಲೊ ವಾವ್ರ್ ಥಾಂಬಯ್ನಾ.

ದೆಕುನ್ ತಿ ಸದಾಂ ಫುಡೆಂ ವೆತಾ.

ಮನಿಸ್, ಮನ್ಶ್ಯಾಚಿ ನೊಸಾಯ್ ಕರ್ತಾ

ಆನಿ ಅಪ್ಲೊಚ್ ಫೊಂಡ್ ಖೊಂಡ್ತಾ.’

[*ನೊಸಾಯ್ ಮ್ಹಳ್ಯಾರ್ ಮೊಸೊರ್]

- ಪ್ರತಾಪ್ ನಾಯ್ಕ್ ಎಸ್.ಜೆ., ಗೊಯಾಂ [ಎಪ್ರಿಲ್ 2018]

ಪ್ರತಾಪ್ ನಾಯ್ಕ್ ಎಸ್.ಜೆ.: ಭಾಸೆಚೊ ಗಿನ್ಯಾನಿ, ಗೂಂಡ್ ಚಿಂತ್ಪಿ, ವೈಚಾರಿಕ್, ತಾತ್ವಿಕ್ ನಿಯಾಳಾಚ್ಯೊ ತಾಚ್ಯೊ ಕವಿತಾ ಕಾಂಯ್ ವೆಕ್ತಿತ್ವಾಕ್ ನಿರ್ಮಿತ್ ಕರ್ಚೆ ತಸಲ್ಯೊ, ತಿತ್ಲೊಚ್ಚ್ ಸಾದೊ ಆನಿ ಮೊವಾಳ್ ವೆಕ್ತಿತ್ವಾಚೊ. ಗೊಂಯ್ಚಾ ಸಾಂ|ಸ್ಟೀಫನ್ಸ್ ಕೊಂಕಣಿ ಸಂಸ್ಥೊ ಹಾಂಗಾಸರ್ ಜಾಯ್ತಿಂ ವರ್ಸಾಂ ಸೆವಾ ದಿಲ್ಲೊ ಹೊ ಪ್ರಸ್ತುತ್ ಪಣ್ಜಿಚ್ಯಾ ಜೆಜ್ವಿಸ್ ಘರಾಂತ್ ವಸ್ತಿ ಕರುನ್ ಆಸಾ ತರ್‌ಯೀ, ಕೊಂಕಣಿ ಭಾಸೆಕ್ ಹಾಣಿಂ ದೀವ್ನ್ ಆಯಿಲ್ಲಿ ದೇಣ್ಗಿ ಭೋವ್ ವರ್ತಿ ತಶೆಂಚ್ ಕೊಣೆಂಯ್ ಅಭಿಮಾನ್ ಪಾವುಂಕ್ ಜಾಯ್ ತಸಲಿ.