ಕವಿತಾकविताPoem

ನೀದ್ ಭಂಗಂವ್ಚೊ ಆವಾಜ್! [ಆಂಡ್ರು ಎಲ್. ಡಿ’ಕುನ್ಹಾ]

[ಕವಿತಾ] ನೀದ್ ಭಂಗಂವ್ಚೊ ಆವಾಜ್! [ಆಂಡ್ರು ಎಲ್. ಡಿ’ಕುನ್ಹಾ]

’ಮನಿಸ್ ಏಕ್ ವಿಚಾರ್‌ವಂತ್ ಜಾನ್ವಾರ್’ - ಅರಿಸ್ಟಾಟಲಾಚ್ಯಾ ಉತ್ರಾಂನಿ ಮನಿನ್ ಆನಿ ರಾನ್-ಜಾನ್ವಾರ್ ಹಾಂಚೆಮಧೆಂ ತಫಾವತ್ ಸೊಧ್ತಾನಾ. ವ್ಹಾಡಾವಳ್, ಸಂವೇದನ್, ಹಾಲ್-ಚಾಲ್ ಆನಿ ಆಪ್ಲ್ಯಾ ಮುಳಾವ್ಯಾ ಗರ್ಜಾಂಚೆರ್ ಕಾರಣ್, ಅಮೂರ್ತ್ ವಿಚಾರ್, ಆತ್ಮ್-ಚಿಂತನ್, ಆನಿ ಹೇತುಪೂರ್ವಕ್ ವಿಂಚವ್ಣ್ ಕರುಂಕ್ ಸಕ್ತಾ. ಪುಣ್ ಹಾಂತುಂ ಅಭಿವ್ಯಕ್ತಿ ಏಕ್ ಭಳ್ವಂತ್ ಮಾಧ್ಯಮ್ ವಾ ಹಾತೆರ್ ಮನಿಸ್ ಪರಿಣಾಮ್‌ಕಾರಿ ರಿತಿನ್ ಕರುಂಕ್ ಸಕ್ತಾ ದೆಕುನ್ ಅಪ್ಣಾಕ್ ಅಪುಣ್ ಬುಧ್ವಂತ್ ಆನಿ ಸಭ್ಯ್ ಮ್ಹಣುನ್ ಲೆಕ್ತಾ. ಪುಣ್ ಖೊಲಾಯೆನ್ ಹ್ಯಾ ಚಿಂತ್ಪಾಚೆರ್ ಪರಿಶೀಲನ್ ಕರುಂಕ್ ಗೆಲ್ಯಾರ್ ಗಮ್ತಾ ಮನಿಸ್ ಸಂಯ್ಬಾನ್ ಏಕ್ ಸ್ವಾರ್ಥಿ/ಮತ್ಲಬಿ ಜಾನ್ವಾರ್. ಕಿತ್ಯಾಕ್ ಮ್ಹಳ್ಯಾರ್ ರಾನಾಂತ್ ಜಿಯೆಂವ್ಚ್ಯೊ ಜೀವಿ ಫಕತ್ ಏಕ್ ಜಿವಿತ್ ಜಿಯೆತಾ ತರ್ ಮನಿಸ್ ಮ್ಹಳ್ಳಿ ಜೀವಿ ದೋನ್ ಜಿವಿತ್ (ಏಕ್ ದಾಕವ್ಪಾಚೆಂ ಅನ್ಯೇಕ್ ಪಾಳ್ಚೆಂ) ಜಿಯೆತಾ, ಆನಿ ಸ್ವ-ಕೇಂದ್ರಿತ್ ಜಿವಿತಾಚ್ಯಾ ಫಾಯ್ದ್ಯಾಕ್ ಲಾಗುನ್ ಹೆರಾಂಕ್ (ಕೊಣ್‌ಯೀ ಜಾಂವ್) ಗಳ್ಸಿತಾ/ವ್ಹಾಪಾರ್ತಾ.

ಹಿ ಕವಿತಾ ಎಕಾ ಶಾಂತ್ ವ ನಯ್ತಿಕ್ ಸಂಸಾರಾಚೆರ್ ಪಡ್ಲಲ್ಯಾ ವಾ ಪಡ್ಚ್ಯಾ ಅಸಲ್ಯಾ ಮನ್ಶಾಂಚ್ಯಾ ಕ್ರೂರ್/ಅಪ್ರಾದಿ/ಅನಯ್ತಿಕ್ ಕರ್ನೆಂಚ್ಯಾ ಸಾವ್ಳೆಚೆರ್ ಪ್ರತಿರೋಧ್ ದಾಕಯ್ತಾ. ಸಾವ್ಳಿ ಜರ್ ರುಪಾಚೆಂ ಸಂಕೇತ್ ತರ್, ಗಾಜ್/ಆವಾಜ್ ಸಬ್ಧ್ ಚಡ್ ಜೊಕ್ತೊ ಜಾಯ್ತ್ ಕೊಣ್ಣಾ. ಕಿತ್ಯಾಕ್ ಮ್ಹಳ್ಯಾರ್ ಜೊ ಕಾನಾಂತ್ ರಿಗೊನ್ ಅತ್ಮ್ಯಾಕ್ ಚಿರ್ತಾ ಆನಿ ಅಕ್ರಮಿ ಕರ್ನಿ ಕರ್ತೆಲ್ಯಾ, ಮನ್ಶಾಪಣಾಚೆರ್ ವಿಸರ್ ಘಾಲುನ್, ನೀತ್-ಸತಾಚೆರ್ ಬೆಸೊರ್ ಘಾಲುನ್ ಮಿರಯ್ತೆಲ್ಯಾಂಕ್ ಏಕ್ ಪಾವ್ಟಿಂ ತರ್‌ಯೀ ತಾಂಚ್ಯಾ ದಾಕವ್ಪಾಚೆರ್ ಆನಿ ಸ್ವತಾ ಪಾಳುನ್ ಯೆಂವ್ಚಾ ಸಿದ್ದಾಂತಾಚೆರ್ ಆತ್ಮ್-ಚಿಂತನಾಕ್ ಉಲೊ ದಿತಾನಾ ಎಕಾ ರಿತಿಚಿ ಸಾಮಾಜಿಕ್ ಕ್ರಾಂತಿ ಜಾವ್ಪಾಕ್ ಉಲೊ ದಿತಾ. ಹ್ಯಾ ಕವಿತೆಚಿ ತಾಂಕ್ ಆನಿ ಗುಂಡಾಯ್ ಮಾಪ್ಚೆಂ ಕಾಮ್ ತುಕಾಚ್ ದಿತಾಂ.

[ಕವಿತಾ] ನೀದ್ ಭಂಗಂವ್ಚೊ ಆವಾಜ್! [ಆಂಡ್ರು ಎಲ್. ಡಿ’ಕುನ್ಹಾ]

ನೀದ್ ಭಂಗಂವ್ಚೊ ಆವಾಜ್!

ಪಯ್ಲೆಂ; ತೊ ಆವಾಜ್ ತುಕಾ ಹಾಲಯ್ತಾ

ಮಾಗಿರ್ ತೊ ತುಜೆ ಭಿತರ್ ಸರ್‍ತಾ

ಆನಿ ತುಕಾ ಸವ್ಕಾಸ್ ಅಪ್ಣಾಯ್ತಾ!

ತುವೆಂ ತಾಚೆ ಸಂಗಿಂಚ್ ಖಾಂವ್ಚೆಂ

ತಾಚೆ ಸಂಗಿಂಚ್ ಶಾಂತ್ ನಿದ್ಚೆಂ

ತಾಚೆ ಸಂಗಿಂಚ್ ಸುಖಾನ್ ಧಲ್ಚೆಂ

ತುಕಾ ಹಾಲವ್ನ್ ಭೆಶ್ಟಾಯ್ಲೆಲೆಂ

ತೆಂ ಸಗ್ಳೆಂ ವಿಸ್ರೊನ್!

ತುಜ್ಯಾ ಶಿರಾಂಕ್ ಕಾಂಪಯ್ಲೆಲೊ ಆವಾಜ್

ಅತಾಂ ತುಜ್ಯಾ ಹಾಡಾಂ ಹಾಡಾಂನಿ ಜಿರ್‍ಲಾ!

ಅಕ್ಮಾನ್ ಸನ್ಮಾನಾಂತ್ ಬದಲ್ತಾ

ವೊಗ್ಯಾಪಣಾಚಿ ದುಸ್ರಿ ಕಾತ್ ಮಾಂಡ್ತಾ

ಧಾರುಣ್ ಆನಿ ದಾಟ್!

ಪುಣ್ ವೇಳ್ ಉತ್ರೊಂಕ್ ನಾ!

ತಿ ನಿಶ್ಟುರ್ ಕಾತ್ ವೋಡ್ನ್ ಕಾಡುಂಕ್.

ತಾಳೊ ಉಬಾರ್‍ನ್ ನಾಂವಾಂ ಸಾಂಗುಂಕ್!

ಅಪ್ರಾಧ್, ವ್ಹಡ್ ಅಪ್ರಾಧ್, ಬೊವ್ ವ್ಹಡ್ ಅಪ್ರಾಧ್!

ಉಚಾರ್‍ನ್ ಸಾಂಗ್ ಅಕ್ರಮಿ ನಾಂವಾಂ -

ಮೆಜಾ ಪಂದ್ಲ್ಯಾನ್ ಲೊಕಾಟೊ ಘೆಂವ್ಚ್ಯಾ ಭೃಶ್ಟಾಚಾರಿಂಚಿಂ

(ತುಜೆ ಹಾತ್ ನಿತಳ್ ಆಸುಂ)

ಚಲಿಯೆಕ್ ಫಸಂವ್ಕ್ ಪಾಸ್ ಮಾಂಡ್ಚ್ಯಾ ಅತ್ತ್ಯಾಚಾರಿಂಚಿಂ

(ತುಜೆಂ ಮನ್ ನಿತಳ್ ಆಸುಂ)

ಶೆತ್ಕಾರಾಚ್ಯಾ ಕಾಳ್ಜಾಕ್ ಘಾಸ್ ಮಾರ್‍ಚ್ಯಾ ರಾಕ್ಕೊಸಾಂಚಿಂ

(ತುಜೆ ಕಾಳಿಜ್ ನಿತಳ್ ಆಸುಂ)

ಹಾಡಾಂಕ್ ಉಜೊ ಪೆಟ್ತಾನಾ-

ತುಜಿ ಬೊಬಾಟ್, ಬಳ್ವಂತ್ ಉತರ್

ಕಾನಾಂಚ್ಯೊ ವಣ್ಟಿ ಫುಟಂವ್ದಿ

ವೊಗೆಪಣಾಚಿಂ ಮುಕ್ಡಿಂ ಫಾಡುಂದಿ

ಉಟೊಂದಿ ಏಕ್ ಬಳ್ವಂತ್ ಕ್ರಾಂತಿ

ಗಾಂವಾಚಿ ನೀದ್ ಭಂಗಂವ್ದಿ ಅಶಾಂತಿ!

ತುಜ್ಯಾ ತಾಳ್ಯಾಂತ್ ಉಟ್‌ಲ್ಲಿಂ ಅತ್ಮ್ಯಾಚಿಂ ಲ್ಹಾರಾಂ

ವಯ್ರ್ ಉಂಚಾಯೆಕ್ ಪಾವೊನ್

ಕಾಂಪ್ಚ್ಯಾ ಧ್ವಜಾಕ್ ಧಯ್ರ್ ಫುಂಕುನ್ ಹಾಲಯ್ತಾನಾ

ತ್ಯಾ ವಾರ್‍ಯಾಂತ್ ವಯ್ರ್ ಉಕಲ್ ತುಜೊ ಹಾತ್,

ಭರ್ಮಾನ್ ದಿ ಖರೆಂ ವಂದನ್ ತ್ರಿವರ್ಣ ಮಾನಾಕ್!

ಧ್ವಜಾಂತ್ಲೆ ತೀನ್ ರಂಗ್ ಸಾಂಗಾತಾ ಏಕ್ ಸ್ವಾಸ್ ಘೆತಾನಾ

ತುಜ್ಯಾ ಕಾಳ್ಜಾಚಿ ಉಡಿ, ದೇಶಾಚ್ಯಾ ತಾಳಾ ಸಂಗಿಂ ಜೊಡ್ತಾನಾ,

ಸರ್ವ್ ಬಳ್ ಎಕ್ಟಾಂಯ್ ಕರ್‍ನ್ ಆತಾಂ ಸಾಂಗ್,

ಜೈ ಹಿಂದ್!

- ಆಂಡ್ರು ಎಲ್. ಡಿ’ಕುನ್ಹಾ [ಎಪ್ರಿಲ್, 2025]

Author

ಆಂಡ್ರ್ಯೂ ಎಲ್. ಡಿಕುನ್ಹಾ

1984 (ಪಾಟ್ಲ್ಯಾ 42 ವರ್ಸಾಂ) ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚೊ ಆಂಡ್ರ್ಯೂ ಎಲ್. ಡಿಕುನ್ಹಾ ಏಕ್ ಲೊಕಾಮೊಗಾಳ್ ಕವಿ. ಗಾಂವಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ ತೊ ಅತಾಂ ಇಜಯ್ ವಸ್ತಿ ಕರ್ನ್ ಆಸಾ. ದೆವಾಧೀನ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಹಾಂಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ತೊ ನಿಮಾಣೊ. ತಾಣೆಂ 1000 ವಯ್ರ್ ಕವಿತಾಂ, 150 ಕ್ ಮಿಕ್ವೊನ್ ಲೇಖನಾಂ ಆನಿ 30 ಮಟ್ವ್ಯೊ ಕಾಣಿಯೊ ಬರಯ್ಲ್ಯಾತ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004 - ಆಶಾವಾದಿ ಪ್ರಕಾಶನ್), ’ಅಂಜುರಾಚೆಂ ಪಾನ್’ (2013 - ಕವಿತಾ ಟ್ರಸ್ಟ್) ಆನಿ ’ಆಯೆರಾಚೊ ಬೂಕ್’ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ತಾಚೆ ಪ್ರಕಟಿತ್ ಕವಿತಾ ಪುಂಜೆ. ತಾಚ್ಯಾ "ಅಂಜುರಾಚೆಂ ಪಾನ್" ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, AIKWO (ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್), ವಿಮಲಾ ವಿ. ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಆನಿ ಡಾ. ಟಿ. ಎಮ್. ಎ. ಪೈ ಪುಸ್ತಕ್ ಪುರಸ್ಕಾರ್ ತಾಕಾ ಲಾಬ್ಲ್ಯಾತ್. ಆಯ್ಲೆವಾರ್ ತಾಚ್ಯಾ "ಉಜ್ವಾಡಾಚ್ಯೆ ವೆಂಗೆಂತ್" ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ ಪ್ರಶಸ್ತಿ ಲಾಬ್ಲ್ಯಾ. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ.

ಮಂಗ್ಳುರ್ ಆಕಾಶ್‍ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್‍ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ಸುಮಾರ್ 38 ವರ್ಸಾಂ ಆದಿಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ವಿಭಾಗ್ ತಾಣೆಂ ಚಲವ್ನ್ ವ್ಹೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. "ಇಜಯ್ಚೊ ಕಳೊ" ಪತ್ರಾಚೊ ಸಂಪಾದಕ್ ಜಾವ್ನ್ ವಾವುರ್‍ಲಾ. ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಚೊ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. ಮಾಯ್‍ಭಾಸ್.ಕೊಮ್ ಜಾಳಿ ಜಾಗ್ಯಾರ್, ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂನಿ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ. ರಾಕ್ಣ್ಯಾರ್ ತಾಚೊ "ಕಾಸ್ ಸಂಸಾರ್" ಅಂಕಣ್, ನಮಾನ್ ಜೆಜು ಬಾಳೊಕ್ ಪತ್ರಾರ್ "ಖಾಸ್ ಸಂಸಾರ್" ಅಂಕಣ್ ಅನಿ ಆಮ್ಚೊ ಸಂದೇಶ್ ಪತ್ರಾರ್ ಸಕಾಳಿಕ್ ಲೇಖನಾಂ ಸರಾಗ್ ಪ್ರಕಟ್ ಜಾವ್ನ್ ಆಸಾತ್. ತಾಣೆಂ ಆಟ್ ಪುಸ್ತಕಾಂಕ್ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾ ಸ್ಪರ್ದ್ಯಾಂಚೊ, ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ. ಗಾಂವಾಂತ್ ಆನಿ ಪರ್ಗಾಂವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆಂ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಆನಿ ಉಪನ್ಯಾಸ್ ದಿಲ್ಯಾತ್. “ಕವಿತಾ ಟ್ರಸ್ಟ್” ಚೊ ತೊ ಟ್ರಸ್ಟಿ ಜಾವ್ನ್ ಆಸಾ. ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಸಂಪಾದಕೀಯಾಂ ತೊ ಬರಯ್ತಾ.

All 14 pages by this writer