ಕವಿತಾकविताPoem

Megele Ghoro (- Vosudha Probhu)

[kovita] Megele Ghoro (- Vosudha Probhu)

Eka tempar kolvachea pakeant jieun aslim nolleachim pakim korunk paulim. Nolleachim pakim matr nhoi, tea kallar zodd-kuttmam soit eka ghorant suk-xanten jiemvcho kall. Ek ghor mhonntoch fokot monxam mat nhoi, sunnim-majram, gairam-kunkddam soit jietalim ani eka moddkent xiz‌l'li pez tea sorvank pautali. Punn vellakallachea bodlaunnen nolleachim pakim konkrettichea pakeamni bodlilim. Bouxa bodlaunn it'tun‌ch pauti tor porva natli, punn tim vhodd ghoram, bongle soddun xeramni flettamni vosti korunk laglim. Zodd kuttom' aslem moddkor kuttom' zalem. Adim ’ami/amchem’ aslem chintop bodlun ’hamv/mhojem’ zalem. Ani hea bodlaunnent suxeg nastam dhamvnni suru zali; choddit ani choddit zoddunk, punzaunko ani dallunk. Hangasor oplo-pelo mholl'lle bhand zamv, amchi mullavi osmitai mholl'llim bhognnam zamv maig zalim. Amchem jivit‌ch dakoupachem zalem dekun amchem jivit jiemvchear nhoi bogar dakomvchear simit zalem. Hi vastovik kanni mukar veta.....

bai vosudha probhu somajik viddombonank opurbhayen orso dhorchi kovi. Hangasor soit osolich ek sompi punn kallzak nattvunchi kovita gheun ti oylea. Hea kovitecho bhorpur anond zoddunk tukach ulo ditam.

[kovita] Megele Ghoro (- Vosudha Probhu)

Megele Ghoro

ddolle bhornu oyile

gollo godgod zal'lo

mono megele dukle

hordentu kosolki vedona

te ghor polloitona

hamv zonmu ghet'tile

hamvo hodd zal'lele

tech ongonnant khell'llolo

dhaunu vot'tona hamv poll'llolo

tenchi he nolleche ghor

om'mono ranpa kudda gholl'llele

huni peaz mokka voll'llele

megele pott bhornu

ti nid'dotoli ud'dak piunu

tenchi he ghor

bhavangele loddayentu he

onatho zaunu poll'lle

kortto kocheri mhonnu dhaule,

kidde, divvoddu vinduru

hangele vasosthano zal'le

onni paddari poll'lle he ghor

ot'to gholltoli om'mo na

koddkentoxili gorvo na

bamytu ud'dako ott'ttun gel'la

madda nolle pura bhet'tun poll'lla

henchi te megele mhalgoddel ghor

pollon zal'lo bezaru

bit'tor vochchek payu na toyaru

mot'te mullo ghalnu chonkolo

bossa vatto polloito rablo

dur podo songtochi

vot'to osilo eklo pisso

"ongele jiva khatri na

kali oxili aji na

hea maya proponchantu sukh na

- Vosudha Probhu. [Zoner, 2020]

Vosudha Probhu: Namnnechi obhinetri, boroupinn. Kanoddi bhasent matr nhoi konknnent soit kovita boromvchi hi mumboyant namnnechi. Nattok, filmamni notton kel'li hi somajik viddombonancher kovita boroita dekun kovigoxttimni hichea kovitenk lok khub khais korta. Hicho poilo kovitazomo ’bayilo bom'munnu’ porgottla.