ಮಾಯ್ ತೂ ದೊಸ್ತ್ ಕೀ ಮಾಜಿ ದುಶ್ಮನ್! (- ವಸುಧಾ ಪ್ರಭು)

ಸಕಾಳ್ ಜಲ್ಕೀ ಮಾಯ್ ಚೀ ವಟ್ವಟ್ ಸುರು ಜಾತ್ತ

ಮ್ಹಣ್ತ ಸೂರ್ಯು ಉದ್ದೆಲೋ ಊಟ್ರೇ ಪುತ್ತಾ

ನ್ಹಾಣೀಂತ್ ಹುನ್ಹುನ್ ಉದ್ದ ಅಸ್ಸ ಘೋಟ್ ಭರ್

ದಾಂತ್ ಘಾಸುನ್ ನಾವ್ನು ಸ್ಕೂಲಾ ಭಾಯಿರ್ ಸರ್

ತೆದನಾ ಹಾಂವ್ ಲೆಕ್ತ ಹೀ ಮಾಝಿ ಮಾಯಿ ಕೀ ಮಾಜಿ ದುಶ್ಮನ್

ಫಾಟೀ ಮಾಕ್ಷಿ ಬ್ಯಾಗ್ ಜಡ್ ಜಡ ಚಡೈತಾ

ಭೂಕ್ ಲಗ್ಲೆರ್ ಖಾ ಮ್ಹೋಣು ಖಾವೂ ಡಬೋ ದಿತ್ತಾ

ಪೆನ್ಸಿಲ್ ಕಾಣು ತಜೇ ಟೋಕ ಅಸಕೀ ಪಳಯಿತಾ

ರಬ್ಬರ್ ಕಿತ್ಲೇ ಜರ್ಲಾ ಮ್ಹೋಣು ತಪಾಸ್ ಕರತಾ

ತೆದನಾ ಹಾಂವ್ ಲೆಕ್ತಾ ಹೀ ಮಾಜಿ ಮಾಯ್ ಕೀ ದುಶ್ಮನ್

ಶಾಳೇತುನ್ ಪಾಟೀ ಅಯ್ಲ್ಕೀ ಹಿಚೇ ಪ್ರಶ್ನ ಕಿತ್ತುಲೇ

ಶಾಳೆತ್ ಮಾಸ್ತರನ್ ತುಕಾ ಕಿತೆ ಪ್ರಶ್ನ ವಿಚಾರ್ಲೇ

ಕಿತ್ತುಲ್ ಪ್ರಶ್ನಾಂಕ ತೂವೆ ಜಬಾಬು ದಿಲ್ಲೇ

ಪಾಟೋಪಾಟ್ ಪ್ರಶ್ನ ಯೆತನಾ ಮಾಕ್ಕ ರಾಗ್‌ಎತ್ತಾ ಕಿತ್ಲೇ

ತೆದನಾ ಹಾಂವ್ ಲೆಕ್ತಾ ಹೀ ಮಾಜೀ ಮಾಯ್ ಕೀ ದುಶ್ಮನ್

ದೊಸ್ತಾಂ ಬರೋಬರ್ ಸಮ ಖೇಳು ದೀನಾ

ಚುಕ್ ಕೆಲೆ ಮ್ಹೋಣು ದೋಸ್ತಾ ಹಾಂವ್ ಮಾರ್ತನಾ

ತಾನ್ನಿ ಹಾಡಿಲ್ಲೆ ಚಾಕ್ಲೇಟ್ ಚೋರ್ನು ಖಾತ್ತನಾ

ದೋಸ್ತಾಕ್ ಕಳ್ನಾಶಿ ತಾಂಚೇ ಚೆಡ್ಡೀಕ್ ಮಾತ್ತಿ ಲಾಯ್ತನಾ

ತೀ ಮಾಕ್ಕಚ್ ಮಾರ್ತಾ ಅಶಿಲ್ಲಿ,,

ತೆದನಾ ಹಾಂವ್ ಲೆಕ್ತಾಲೋ ಹೀ ಮಾಜೀ ಮಾಯ್ ಕೀ ದುಶ್ಮನ್

ತೋ ದೀಸ್ ಬಾಯೆ ಗೆಲೊ, ಹಾಂವ್ ಅತ್ತಾ ಹೋಡ್ ಜಾಲೋ

ಬರೆ, ವಾಯಿಟ್ ಮಕ್ಕಾ ಕಳೂ ಲಾಗ್ಲಾ

ತೂ ಕಿತೇಕ್ ಮಾರ್ತಾ ಅಶಿಲ್ಲಿ ಅತಾ ಹಾಂವ್ ಜಾಣ್ತಾ

ಮಾಝಿ ಮಾಯ್

ತೂ ಮಾಜೆಚ್ ಬರೆಪಣಾಕ್ ಹೇ ಸಗಳೇ ಕೆಲ್ಲಾ

ಮ್ಹಣೂನಚ್ ಹಾಂವ್ ಬರೋ ಮನುಸ್ ಜಾಲ್ಲಾ

ಅತ್ತ ಕೊಳೂ ಲಾಗ್ಲಾ

ಮಿಟಾ ಬಿಗರ್ ರನ್ಪಾಕ್ ರುಚಿನಾ,, ಆವಯಿ ವಿನಾ ದುಸ್ರೋ ದೇವು ನಾ

- ವಸುಧಾ ಪ್ರಭು. [ಮಾರ್ಚ್, 2023]

ವಸುಧಾ ಪ್ರಭು: ನಾಮ್ಣೆಚಿ ಅಭಿನೇತ್ರಿ, ಬರವ್ಪಿಣ್. ಕಾನಡಿ ಭಾಸೆಂತ್ ಮಾತ್ರ್ ನ್ಹಯ್ ಕೊಂಕ್ಣೆಂತ್ ಸಯ್ತ್ ಕವಿತಾ ಬರಂವ್ಚಿ ಹಿ ಮುಂಬಯಾಂತ್ ನಾಮ್ಣೆಚಿ. ನಾಟಕ್, ಫಿಲ್ಮಾಂನಿ ನಟನ್ ಕೆಲ್ಲಿ ಹಿ ಸಮಾಜಿಕ್ ವಿಡಂಬನಾಂಚೆರ್ ಕವಿತಾ ಬರಯ್ತಾ ದೆಕುನ್ ಕವಿಗೋಶ್ಟಿಂನಿ ಹಿಚ್ಯಾ ಕವಿತೆಂಕ್ ಲೋಕ್ ಖೂಬ್ ಖಾಯ್ಸ್ ಕರ್ತಾ. ಹಿಚೊ ಪಯ್ಲೊ ಕವಿತಾಜಮೊ ’ಬಾಯಿಲ ಬಮ್ಮುಣು’ ಪರ್ಗಟ್ಲಾ.