ಕವಿತಾकविताPoem

'Linching'sthan (- Omey Naik)

[kovita] 'Linching'sthan (- Omey Naik)

Jednam kovitevixim xikun ailam, don sotank patyeun ailam; monis kirkoll, monxak svarthi, motlob, ani sorv thoracheo khotteo souyo asuyeta, punn kovi nitoll ani noitik. Durbhag‌ponnan aichea somajent khotte monis boro mholl'llem mukhottem nesun cholchem mettam mettank polleunko mellta. Monis dhorm' mholl'llea niban ekamekak tuttafott korit punn kovik dhorm' na, kovi mholl'lloch ek dhorm'. Oni to dhorm' pallteleant somajent distat fokot don vorgacho lok; ek - zulum' choloitolo ani dusro - zulum' sostolo. Ani jednam-i eklo kovi hea dhormacho koso dista, mhaka tor‌yi bhovo chodd auddta zal'lean bab omey naik mhaka bhovo auddcho yuvokovi.

Amcho des namvak xantecho des, amchea dexache sorv devo-deutamni dil'le ani dimvche sondhex mayamogache ani xantechech. Punn tech devache pattlavo korche monis matr yemkonddachea lusiferak soit lojer ghalche tosole dekun amchea somajent az noveach ek piddek ami pos korunk dhorlam ani ti pidda zaunasa ’linching’, hangasor monxaponnacho bhongostoll korchech vevegllea vesar vevegllea rupan somajeche chyuran chyure korun asat. Hi kovita hech chintpabhomvari vinnloli bhovo opurbhayechi kovita. Hea kovitechi tank mapchem kam' tujer soddtam.

[kovita] 'Linching'sthan (- Omey Naik)

Linching'sthan'

vichar pottona mhunnon

ovichari gorden

teka dhoddailo.

Kainch vichari nastona...

Ukto korun

gaum-xar,

dex-videx bhounddailo.

Tondd foddun

hat pai moddun

bhor gorden

dorden

teka marun uddoilo.

.

.

He ghottnnen

mhajea monant

vicharanchi gordi kelea.

Nixedacheo mennvati gheun

mhajey vichar atam

svotontr zaunk sodtat.

'azadi... Azadi...'

narem ditat.

Aikona tea kanankodden.

.

.

He vichar

tonddar yeun 'add'ddochea' poilich

hamv tenka

vechun vechun kaddun uddoita.

Monambhituruch

chechun chechun marun uddoita.

.

.

Atam...

Bhinn'nneml ghalun ghalun

bhedd'dde zaleat kan

ani

xim' mer naslelem

mon zalam

'linching'sthan.

- Omey Naik. [Dec, 2019]