'ಲಿಂಚಿಂಗ್'ಸ್ಥಾನ್ (- ಅಮೇಯ್ ನಾಯ್ಕ್)

[ಕವಿತಾ] 'ಲಿಂಚಿಂಗ್'ಸ್ಥಾನ್  (- ಅಮೇಯ್ ನಾಯ್ಕ್)

ಜೆದ್ನಾಂ ಕವಿತೆವಿಶಿಂ ಶಿಕುನ್ ಆಯ್ಲಾಂ, ದೋನ್ ಸತಾಂಕ್ ಪಾತ್ಯೆವ್ನ್ ಆಯ್ಲಾಂ; ಮನಿಸ್ ಕಿರ್ಕೊಳ್, ಮನ್ಶಾಕ್ ಸ್ವಾರ್ಥಿ, ಮತ್ಲಬ್, ಆನಿ ಸರ್ವ್ ಥರಾಚ್ಯೊ ಖೊಟ್ಯೊ ಸವಯೊ ಆಸುಯೆತಾ, ಪುಣ್ ಕವಿ ನಿತಳ್ ಆನಿ ನಯ್ತಿಕ್. ದುರ್ಭಾಗ್‌ಪಣಾನ್ ಆಯ್ಚ್ಯಾ ಸಮಾಜೆಂತ್ ಖೊಟೆ ಮನಿಸ್ ಬರೊ ಮ್ಹಳ್ಳೆಂ ಮುಖೊಟೆಂ ನೆಸುನ್ ಚಲ್ಚೆಂ ಮೆಟಾಂ ಮೆಟಾಂಕ್ ಪಳೆಂವ್ಕ್ ಮೆಳ್ತಾ. ಮನಿಸ್ ಧರ್ಮ್ ಮ್ಹಳ್ಳ್ಯಾ ನಿಬಾನ್ ಎಕಾಮೆಕಾಕ್ ತುಟಾಫಟ್ ಕರಿತ್ ಪುಣ್ ಕವಿಕ್ ಧರ್ಮ್ ನಾ, ಕವಿ ಮ್ಹಳ್ಳೊಚ್ ಏಕ್ ಧರ್ಮ್. ಅನಿ ತೊ ಧರ್ಮ್ ಪಾಳ್ತೆಲ್ಯಾಂತ್ ಸಮಾಜೆಂತ್ ದಿಸ್ತಾತ್ ಫಕತ್ ದೋನ್ ವರ್ಗಾಚೊ ಲೋಕ್; ಏಕ್ - ಜುಲುಮ್ ಚಲಯ್ತಲೊ ಆನಿ ದುಸ್ರೊ - ಜುಲುಮ್ ಸೊಸ್ತಲೊ. ಆನಿ ಜೆದ್ನಾಂಯ್ ಎಕ್ಲೊ ಕವಿ ಹ್ಯಾ ಧರ್ಮಾಚೊ ಕಸೊ ದಿಸ್ತಾ, ಮ್ಹಾಕಾ ತರ್‌ಯೀ ಭೋವ್ ಚಡ್ ಆವಡ್ತಾ ಜಾಲ್ಲ್ಯಾನ್ ಬಾಬ್ ಅಮೇಯ್ ನಾಯ್ಕ್ ಮ್ಹಾಕಾ ಭೋವ್ ಆವಡ್ಚೊ ಯುವಕವಿ.

ಆಮ್ಚೊ ದೇಸ್ ನಾಂವಾಕ್ ಶಾಂತೆಚೊ ದೇಸ್, ಆಮ್ಚ್ಯಾ ದೇಶಾಚೆ ಸರ್ವ್ ದೇವ್-ದೇವ್ತಾಂನಿ ದಿಲ್ಲೆ ಆನಿ ದಿಂವ್ಚೆ ಸಂಧೇಶ್ ಮಾಯಾಮೊಗಾಚೆ ಆನಿ ಶಾಂತೆಚೆಚ್. ಪುಣ್ ತೆಚ್ ದೆವಾಚೆ ಪಾಟ್ಲಾವ್ ಕರ್ಚೆ ಮನಿಸ್ ಮಾತ್ರ್ ಯೆಮ್ಕೊಂಡಾಚ್ಯಾ ಲುಸಿಫೆರಾಕ್ ಸಯ್ತ್ ಲಜೆರ್ ಘಾಲ್ಚೆ ತಸಲೆ ದೆಕುನ್ ಆಮ್ಚ್ಯಾ ಸಮಾಜೆಂತ್ ಆಜ್ ನವ್ಯಾಚ್ ಏಕ್ ಪಿಡೆಕ್ ಆಮಿ ಪೋಸ್ ಕರುಂಕ್ ಧರ್ಲಾಂ ಆನಿ ತಿ ಪಿಡಾ ಜಾವ್ನಾಸಾ ’ಲಿಂಚಿಂಗ್’, ಹಾಂಗಾಸರ್ ಮನ್ಶಾಪಣಾಚೊ ಭೊಂಗೊಸ್ತೊಳ್ ಕರ್ಚೆಚ್ ವೆವೆಗ್ಳ್ಯಾ ವೆಸಾರ್ ವೆವೆಗ್ಳ್ಯಾ ರುಪಾನ್ ಸಮಾಜೆಚೆ ಚ್ಯುರಾನ್ ಚ್ಯುರೆ ಕರುನ್ ಆಸಾತ್. ಹಿ ಕವಿತಾ ಹೆಚ್ ಚಿಂತ್ಪಾಭಂವಾರಿ ವಿಣ್ಲಲಿ ಭೋವ್ ಅಪುರ್ಭಾಯೆಚಿ ಕವಿತಾ. ಹ್ಯಾ ಕವಿತೆಚಿ ತಾಂಕ್ ಮಾಪ್ಚೆಂ ಕಾಮ್ ತುಜೆರ್ ಸೊಡ್ತಾಂ.

[ಕವಿತಾ] 'ಲಿಂಚಿಂಗ್'ಸ್ಥಾನ್  (- ಅಮೇಯ್ ನಾಯ್ಕ್)

ಲಿಂಚಿಂಗ್'ಸ್ಥಾನ್'

ವಿಚಾರ್ ಪಟೊನಾ ಮ್ಹೂಣೊನ್

ಅವಿಚಾರಿ ಗರ್ದೆನ್

ತೆಕಾ ಧೊಡಾಯ್ಲೊ.

ಕಾಂಯ್ಚ್ ವಿಚಾರಿ ನಾಸ್ತನಾ...

ಉಕ್ತೊ ಕೊರೂನ್

ಗಾವಂ-ಶಾರ್,

ದೆಶ್-ವಿದೆಶ್ ಭೊವಂಡಾಯಲೊ.

ತೊಂಡ್ ಫೊಡೂನ್

ಹಾತ್ ಪಾಯ್ ಮೊಡೂನ್

ಭರ್ ಗರ್ದೆನ್

ದರ್ದೆನ್

ತೆಕಾ ಮಾರೂನ್ ಉಡಯ್ಲೊ.

.

.

ಹೆ ಘಟ್ಣೆನ್

ಮ್ಹಾಜ್ಯಾ ಮನಾಂತ್

ವಿಚಾರಾಂಚಿ ಗರ್ದಿ ಕೆಲ್ಯಾ.

ನಿಶೆದಾಚ್ಯೊ ಮೆಣ್ವಾತಿ ಘೆವ್ನ್

ಮ್ಹಾಜೆಯ್ ವಿಚಾರ್ ಆತಾಂ

ಸ್ವತಂತ್ರ್ ಜಾವಂಕ್ ಸೊದ್ತಾತ್.

'ಆಜಾದಿ... ಆಜಾದಿ...'

ನಾರೆಂ ದಿತಾತ್.

ಆಯ್ಕನಾ ತ್ಯಾ ಕಾನಾಂಕಡೆನ್.

.

.

ಹೆ ವಿಚಾರ್

ತೊಂಡಾರ್ ಯೆವ್ನ್ 'ಆಡ್ಡಚ್ಯಾ' ಪಯ್ಲೀಚ್

ಹಾಂವ್ ತೆಂಕಾ

ವೆಚೂನ್ ವೆಚೂನ್ ಕಾಡೂನ್ ಉಡಯ್ತಾ.

ಮನಾಂಭೀತೂರೂಚ್

ಚೆಚೂನ್ ಚೆಚೂನ್ ಮಾರೂನ್ ಉಡಯ್ತಾ.

.

.

ಭಿಣ್ಣೆಂಲ್ ಘಾಲೂನ್ ಘಾಲೂನ್

ಭೆಡ್ಡೆ ಜಾಲ್ಯಾತ್ ಕಾನ್

ಆನಿ

ಶಿಮ್ ಮೆರ್ ನಾಸ್ಲೆಲೆಂ

ಮನ್ ಜಾಲಾಂ

'ಲಿಂಚಿಂಗ್'ಸ್ಥಾನ್.

- ಅಮೇಯ್ ನಾಯ್ಕ್. [ದಸೆಂಬ್ರ್, 2019]