Inside a Box (- ಶೈಲೆಂದ್ರ್ ಮೆಹ್ತಾ)

[ಕವಿತಾ] Inside a Box (- ಶೈಲೆಂದ್ರ್ ಮೆಹ್ತಾ)

ಹಿ ಕವಿತಾ ವಯ್ಲೆಭಾರ್ ವಾಚ್ತಾನಾ ಕಾಂಯ್ ಎಕಾ ಸಂಕೀರ್ಣ್ ವಿಶ್ಯಾಚೆರ್ ಬರಯಿಲ್ಲಿ ಕವಿತಾ ಮ್ಹಳ್ಳೆಪರಿಂ ಭಗತ್ ಪುಣ್ ಪರತ್ ಪರತ್ ವಾಚ್ತಾನಾ ಕವಿತೆಂತಲ್ಯೊ ಎಕೇಕ್ ಇಮಾಜ್ಯೊ ಕಾಂಯ್ ಎಕೆಕ್ ಕಾಣಿ ಸಾಂಗುನ್ ವೆತಾತ್‌ಶೆಂ ಭಗ್ತಾ. Inside a box ಮಾತಾಳೆಂ ಸಾಂಗ್ಚೆಪರಿಂ ಹೊ ಬೋಕ್ಸ್ ಇತಿಹಾಸಾಚೊ. ಆನಿ ಆಜ್ ಇತಿಹಾಸ್‌ಚ್ ಏಕ್ ಬಜಾರ್‌ಸೊ ಜಾಲಾ. ಸತ್ ಕಿತೆಂಯ್ ಆಸುಂ ಪುಣ್ ಫಟಿಂ ವೆಗಿಂ ವಿಖುನ್ ವೆತಾತ್ ಆನಿ ಫಟಿಂಕ್ ಚಡಿತ್ ಖಾಯ್ಸ್ ಆಸಾ ಜಾಲ್ಲ್ಯಾನ್ ಆಜ್ ಸತಾಕ್ ಅಪ್ಣಾಚಿ ಅಸ್ಮಿತಾಯ್ ರುಜು ಕರುಂಕ್ ಪಡ್ಲಾಂ. ಆಜ್ ಸಮಾಜೆಂತ್ ಹ್ಯೊ ವೀದ್ ವಾವ್ಳ್ಯೊ ದಿಸುಂಕ್ ಮೆಳ್ತಾತ್ ಆನಿ ಎಕಾ ನಾ ಎಕಾ ರಿತಿನ್ ಆಮಿಂ ಸಯ್ತ್ ಹಾಂತುಂ ಭಾಗಿದಾರ್ ಮ್ಹಳ್ಳೆಂ ಗುನ್ಯಾಂವ್ಕಾರಿ ಚಿಂತಪ್ ಅಂತರಾತ್ಮ್ ಆಸ್ಚ್ಯಾಂಕ್ ಕಾಂಯ್ ಧೊಸಿನಾಸ್ತಾನಾ ವಚಾನಾ.

ಬಾಬ್ ಶಯ್ಲೇಂದ್ರ ಮೆಹ್ತಾ ಕೊಂಕಣಿ ಕವಿ ಸದ್ದ್ಯಾಕ್ ಮುಂಬಂಯ್ತ್ ಆಸಾ. ಕೊಂಕಣಿಚ್ಯಾಕೀ ತೊ ಮರಾಠಿ ಸಾಹಿತ್ಯಾಂತ್ ಚಡಿತ್ ವ್ಹಳ್ಕಿಚೊ. ಹ್ಯಾ ಕವಿತೆಚೊ ಅಸ್ವಾದ್ ಭಗುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] Inside a Box (- ಶೈಲೆಂದ್ರ್ ಮೆಹ್ತಾ)

Inside a Box

ಪ್ರಚಾರಿತ್ ರಾವ್ತಾಂ ಹಾಂವ್

ದುಖೆಸ್ತ್ ಯಾದೀಂಚೆ ರಾತೀಂಕ್

ಪರಿವರ್ತನಾಂಚ್ಯೊ ಇತಿಹಾಸೀಕ್ ಕಾಣ್ಯೊ

ಆನಿ ಮಾಗೀರ್

ವೆಗ್ಳ್ಯೊ ವ್ಯಾಖ್ಯಾ ದಾಖಯ್ತ್

ಸಂದ್ರ್ಭ್ ಬದ್ಲತ್ ರಾವ್ತಾತ್

ದಿಸಪ್ಟ್ಟ್ಯಾ ವೆವ್ಹಾರಾಂಚೆ

ಭೌಶೀಕ್ ಮಳಾವ್ಯ್ಲ್ಯಾ ವೈಲ್ಯಾಚಾರಾಚೆ

ಮೌಖಿಕ್, ಬರಯ್ಲ್ಲೆ, ಛಾಪಿಲ್ಲೆ,

ಆಯ್ಕ್ಲ್ಲೆ ಆನಿ ಆಯ್ಕೂಂನಾಶಿಲ್ಲೆ ಲೆಗೀತ್

ಇತಿಹಾಸಾಚ್ಯಾ ಕಾಣ್ಯಾಂಚಿ

ಆನಿ ದಂತ್ಕಥಾಂಚಿ ಚಿಕಿತ್ಸಾ

ಹಯ್ನ್ಹಯಶಿ

ವಿಸ್ಮರಣಾಚ್ಯಾ ಆನಿ ಭಿರಾಂತೀಚ್ಯಾ ಸಾವ್ಳೆಪೊಂದಾ

ಮಂದ್ ಆವಾಜಾಂತ್

ಖರ್ಶೆತ್ ಖರ್ಶೆತ್ ಫುತ್ಫುತ್ತಾ

ಆಲ್ ಇಜ್ ವೆಲ್ ರೆ ಪಾಪ್ಯಾ

ನ್ಹಿದ್ ಆತಾಂ ಬೆಗೀನ್

ತೊಡೂನ್ ಪಾಂದ್ರೆ ಕಾಳ್ಖಾಚೆ

ವಯ್ರ್ ಸರ್ತಾತ್ ಕೆನ್ನಾಕೆನ್ನಾಯ್

ರಗ್ತಾನ್ ಭರಿಲ್ಲ್ಯೊ ಮುಠಿ

ಘೊಶ್ಣಾಯ್ ದಿತಾತ್ ಅದೀಂಮದಿಂ

ಉದ್ಕಾ ಘೊಟಾಕ್ ಆಶೆಲ್ಲೆ ತಾಳೆ

ಪೂಣ್ ಕಾಳ್ಜಾಂಚ್ಯೊ ಬಾಂಯೊ

ಸುಕೂನ್ ತರಿ ಗೆಲ್ಯಾತ್

ವಾ ಜಾವ್ನ್ ಗೆಲ್ಯಾತ್ ಸೆಪ್ಟಿಕ್ ಟೆಂಕ್

ಖುದ್ದ್ ಕಾಸಾದೊರಾಂನಿ

ಕೊನ್ಶಾಕೊನಶಾರ್ ಉಕ್ತಿಂ ಕೆಲ್ಯಾತ್

ಲಾಯ್ಸನಾ ದಿವ್ಪಾಚಿ ಕಾರ್ಯಾಲಯಾಂ

ರಿತ್ಯಾ ಮಳ್ಬಾಂತ್ ಉಡ್ಡಾಣಾಂ ಮಾರ್ಚೆಪಾಸತ್

ಅಶೆ ಎಕಾ ಪರಿಪ್ತ್ರಕಾವರವಿಂ

ಆಯ್ಜೂಚ್ ಕಳೀತ್ ಕೆಲಾಂ

- ಶೈಲೆಂದ್ರ್ ಮೆಹ್ತಾ. [ದಸೆಂಬ್ರ್, 2019]