ಇನ್ ಮಿನ್ ತೀನ್ (- ಉದಯ್ ಮಾಂಬ್ರೊ)

[ಕವಿತಾ]  ಇನ್ ಮಿನ್ ತೀನ್  (- ಉದಯ್ ಮಾಂಬ್ರೊ)

ಖಂಚ್ಯಾಯ್ ಭಾಸೆಂತ್ಲ್ಯಾ ಸಾಹಿತ್ಯಾಂತ್ ಥೊಡ್ಯಾಚ್ ಸಬ್ದಾಂನಿ ಎಕಾ ಕಾಣಿಯೆಕ್ ವಾ ವಾಸ್ತವಾಕ್ ದಾಕಂವ್ಚೆಂ ಪಿಂತುರ್ ಉಭ್ಜಾಂವ್ಚಿ ಶ್ಯಾಥಿ ಆಸಾ ತರ್ ತಿ ಕವಿತೆಕ್ ಮಾತ್ರ್. ಆನಿ ಹಿ ಕವಿತಾ ಅಪುರ್ಭಾಯೆಚಿ ಗವಾಯ್ ದಿತಾ. ಆಯ್ಚೊ ತಾಂತ್ರಿಕ್ ಕಾಳ್, ಆಯ್ಚಿ ಮೊಬಾಯ್ಲ್ ಜಿಣಿ ಆನಿ ಮನ್ಶಾಚಿ ಧಾಂವ್ಣಿ ಕಾಂಯ್ ಮನ್ಶಾ ನಾತ್ಯಾಂಚಿಂ ಖೆಳ್ಕುಳಾಂ ಕರ್ತಾಕಾಯ್ ಮ್ಹಳ್ಳೆಂ ಮಾರ್ಮಿಕ್ ಚಿಂತಪ್ ಆಟಾಪ್ಚಿ ಭೋವ್ ಸೊಭಿತ್ ಕವಿತಾ ಹಿ.

ಬಾಬ್ ಉದಯ್ ಮ್ಹಾಂಬ್ರೊ ಗೊಂಯಾಂತ್ ವಸ್ತಿ ಕರುನ್ ಆಸ್ಚೊ ಕೊಂಕಣಿ ಕವಿ. ತಾಚೆಂ ಚಿಂತಪ್, ತಾಚೊ ಸ್ವಭಾವ್ ತಶೆಂಚ್ ತಾಚೆಂ ವೆಕ್ತಿತ್ವ್ ಮನ್ಶಾಪಣಾಚೆಂ ದೆಕುನ್ ತಾಚ್ಯಾ ಕವಿತೆಂನಿ ಸಯ್ತ್ ಹ್ಯಾ ಮನ್ಶಾಮೊಲಾಂಚೆರ್ ಜಾಂವ್ಚ್ಯಾ ಬೊಂಗೊಸ್ತೊಳಾವಿಶಿಂ ಏಕ್ ಆಟೊವ್ ಆಸ್ತಾಚ್. ಆನಿ ಹಾಂಗಾಸರ್‌ಯೀ ತಾಣೆಂ ಕೆಲ್ಲೆಂ ಪ್ರೇತನ್ ತೆಂಚ್. ಕವಿತೆವಿಶಿಂ ಚಡ್ತಿಕ್ ಬರವ್ನ್ ತಾಚೊ ಅಸ್ವಾದ್ ಉಣೊ ಕರುಂಕ್ ವೆಚ್ಯಾದಿಂ ತೊ ಅಸ್ವಾದ್ ಭಗುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಇನ್ ಮಿನ್ ತೀನ್  (- ಉದಯ್ ಮಾಂಬ್ರೊ)

ಇನ್ ಮಿನ್ ತೀನ್

ಇನ್ ಮಿನ್ ತೀನ್ ಮನ್ಶಾಂ

ತಿಗಾಂ ತೀನ್ ಕೊನ್ಶ್ಯಾಂಕ್

ತಿಗಾಂಚೆ ತೀನ್ ಬೆಡ್ರುಮ್

ತೀನ್ ಗಾಡ್ಯೊ

ತೀನ್ ಮೊಬಾಯ್ಲ್

ತಿ ರಾಂದ್ತಾ

ಜೆವ್ಣ್ ಮೆಜಾರ್ ಮಾಂಡ್ಟಾ

ಮೊಬಾಯ್ಲಾಚೆರ್ ಫೊಟೆ ಕಾಡ್ಟಾ

ಪಯ್ಲ್ಯಾನ್ ಪಯ್ಲಿಂ

ಶ್ರಾದ್ಧಾಕ್ ಕಾಕವ್ಳ್ ದವ್ರತಾತ್

ತಶೆ ತೆ ಜೆವ್ಣಾಚೆ ಫೊಟೆ

ಫೆಸ್ಬುಕ್ ಗ್ರುಪಾನ್ ಪೊಸ್ಟ್ ಕರ್ತಾ

ಆನಿ ಕಾವ್ ಕಾವ್ ಕರುನ್

ಕಾವ್ಳ್ಯಾಂಕ್ ಆಪಯ್ಲ್ಲೆವರಿ

ಬರಯ್ತಾ

"ಕೊಣಾಕ್ ಜಾಯ್?"

ತೊ ಎಫಿಸಾಂತ್ಲ್ಯಾ ಇಶ್ಟಾವಾಂಗಡಾ

ತರೆಕವಾರ್ ಹೊಟೆಲಾಂನಿ ವತಾ

ನವಿ ನವಿ ಡಿಶ್ ಮಾಗಯ್ತಾ

ಜೆವ್ಣಾಚೆ, ಇಶ್ಟಾಂಚೆ ಬರೆ ಫೊಟೆ ಕಾಡ್ಟಾ

ಹೊಟೆಲಾಕ್ ಟೆಗ್ ಕರ್ತಾ

ನಿಯಾಳ್ ಬರಯ್ತಾ

ಆನಿ ಗಾಂವ್ಜೆವಣ್ ಘಾಲ್ತಾ ತ್ಯಾ ಥಾಟಾನ್

ಫೆಸ್ಬುಕಾರ್ ಗ್ರುಪಾನ್ ಘಾಲ್ತಾ

ಲೊಕ್ ಜಿಬ್ಲ್ಯೊ ಚಾಟೀತ್

ತಾಚೆ ಜೆವ್ಣಾವಳೀಕ್ ತೊಖೆತಾತ್

ಬಾಯ್ಕ್ ಕೊಲೆಜ್ ಜಾತ್ಕೂಚ್ ಕ್ಲಾಸ್

ಕ್ಲಾಸ್ ಜಾತ್ಕೂಚ್ ಡಾನ್ಸಕ್ಲಾಸ್

ಮಾಗೀರ್ ಜಿಮ್, ಯೊಗಾ

ಜೆವ್ಪಾಕ್ ವೆಳ್ ನಾ

ಬಾಯ್ ಬರ್ಗರ್ ನಾತರ್ ಪಿಝ್ಝಾ ಖಾವ್ನ್ ದಿಸ್ ಧುಕ್ಳಟಾ

ರಾತೀಕಡೆ ಘರಾ ಪಾವ್ತಕೀರ್

ಇನ್ ಮಿನ್ ತೀನ್ ಮನ್ಶಾಂ

ತಿಗಾಂಯ್ ಜಾಮ್

ತೊ ಸೊಫಾರ್ ಲವಂಡತಾ

ಬಾಯ್ ಬಾಜ್ಜೆರ್ ವಣ್ಕತಾ

ತರ್ ತಿ ಬಾಬ್ಡಿ ಉಬ್ಯಾಂನೀಚ್ ರಾಂದ್ಚೀಕುಡೀನ್

ಪುಣ್ ತಿಗಾಂಯ್ ಉಲಯ್ತಾತ್ ತಿಗಾಂಯ್ಕಡೆನ್

ಮೊಬಾಯ್ಲಾಚೆರ್ ಮೆಸೆಜ್ ಟಾಯ್ಪ್ ಕರುನ್

ತಿ ಮೆಜಾರ್ ಜೆವ್ಣ್ ಮಾಂಡ್ಟಾ

ತಾಣೆ ಆನಿ ಬಾಯ್ನ್ ಕಾನಾಂತ್ ಗುಡ್ಡಯೊ ಘಾಲ್ಯಾತ್

ತಿ ಮೆಸೆಜ್ ಘಾಲ್ತಾ

"ಜೆವ್ಯಾ ನ್ಹಯ್?"

ಬಾಯ್ ವಾಚ್ತಾ

ಪುಣ್ ಬಾಯ್ ಯೆತ್ನಾ ಭಾಯ್ರ್ ಖಾವ್ನ್ ಆಯ್ಲಾಂ

ಬಾಯ್ ಪರ್ತೊ ಮೆಸೆಜ್ ಧಾಡ್ಟಾ

"ಪೊಟ್ ಭಲ್ಲಾಂ"

ತಾಣೆ ಅಜೂನ್ ಮೆಸೆಜ್ ವಾಚೂಂಕೂಚ್ ನಾ

ತೊ ಸಾಂಜೆ ಚ್ಯಾಕ್ ಖಾಲ್ಲ್ಯಾ ಚಾಟ್ ಮಸಾಲಾಚೆ ವರ್ಣನ್

ಇಶ್ಟಾಂಕಡೆನ್ ಚಾಟ್ಮೆಸೆಜೀನ್ ಕರ್ತಾ

ತಿ ಆನಿ ಎಕ್ ಮೆಸೆಜ್ ಧಾಡ್ಟಾ

ತೊ ಕಾನಾಮನಾರ್ ಘೆನಾ

ತಿ ಆಪುಣ್ ಜೆವ್ತಾ

ಮೆಜ್ ಕಾಡ್ಟಾ

ನ್ಹಿದೂಂಕ್ ವತಾ

ಬರೆ ರಾತೀರ್ ತಾಕಾ

ಭೂಕ್ ಲಾಗ್ತಾ

ತೊ ಮೊಬಾಯ್ಲ್ ಬಂದ್ ಕರ್ತಾ

ಕಿಚ್ನಾಂತ್ ವತಾ

ದನ್ಪರಾಂ ತಿಣೆ ಫೆಸ್ಬುಕ್ ಗ್ರುಪಾರ್ ಬರೆಂ ಸಜಯ್ಲ್ಲೆ ಜೆವ್ಣ್

ತೊ ತಾಟಾನ್ ವೊತ್ತಾ

ಭಕಾಭಕ್ ಪೊಟಾನ್ ಧುಕ್ಳಟಾ

ಆನಿ ಫೆಸ್ಬುಕ್ ವೊಟ್ಸೆಪ್ ಇಶ್ಟಾಂಕ್

ತಾಂಬ್ಡಿ ಕಾಳ್ಜಾಂ ಧಾಡೂನ್

ಗುಡ್ ನಾಯ್ಟ್ ಕರೀತ್

ಗುಪ್ಪ್ ಕಾಳ್ಖಾನ್ ಬಾಜ್ಜೆರ್ ಘಾಲೂನ್ ಘೆತಾ

ಇನ್ ಮಿನ್ ತೀನ್ ಮನ್ಶಾಂ

ತಿಗಾಂ ತೀನ್ ಕೊನ್ಶ್ಯಾಂಕ್

- ಉದಯ್ ಮಾಂಬ್ರೊ. [ದಸೆಂಬ್ರ್, 2019]