Ghorach asta hamv, zob khoim kortam? [Urjita Bhobe]

Ghoddiallak tor‌yi ek kam' punn eka ghorchye osturechea kamak mit na. Eka fantear uttun ratichea modheane poreant tichea kamak mit na. Dekun ghorchea osturek ’ghoracho divo’ mhonntat zannte. Itlem sorv korchi ek osturi kednam-i kosolinch xorth ghalina, ghorant jieteleank, ghorant yeteleank sodanch mog oni moipasan ti polleta ani oplim sogollim sopnnam tim lipoun dourta. Bhouxa somsarant hi sokot fokot eka osturek matr asunk sadhy.

Kovita jednam jivitachem kap zata, tednam ti kovita fokot kanank mat nhoi, kallzak apoddta. Punn hi kovita kasappeachem kalliz soit koddoita, ek auy, ek bhoinn, ek bail, oxem vevegollea rupamni seva korchea osturechem ruponnem dolleamsomor ubhem kortona khorench roddoita. Ek kovita moneank tallo dita tor tea kovitechi sokot tor‌yi kosoli asot mholl'llem tuminch parkia.

Urjita bhobe gõychi ailevar kovita boromvchi kouyotri punn tichea ekeka kovitemni dischi somvedon‌xil chintop, umalle, yadi, soponnam khonddit kovitarosikank pixear ghalta mhonncheak hi kovita opurbhayen govai dita.

[Kovita] Ghorach asta hamv, zob khoim kortam?  [Urjita Bhobe]

Ghorach asta hamv, zob khoim kortam?

sokallochi chea donparochem jeunn

tem tor sodchench tantunt koslem gogon

ratche nove nove ponvar kortam

ghorach asta hamv, zob khoim kortam?

bhurgeanchem khann tanchem jeunn

tancho obheas tanchem xikxonn

osainomentt, homourk, begam tanchim bhortam

ghorach astam hamv, zob khoim kortam?

maimavachi bholaiki tanchi zotnai

pothyuy pallop, yadin haddop vokhdam-i

deullamni, dotorager haddttam vhortam

ghorach asta hamv, zob khoim kortam?

voxing moxin laitam

kopddeank ferr martam

zageavelem sogllem zagear dourotam

ghorach asta hamv zob khoim kortam?

laittichim, fonachim bilam bhorop

bazar, nustem-i hamvench korpobhorun

man'neachi, ghorachi limpezuy kortam

ghorach asta hamv zob khoim kortam?

bhurgeanchim duyesam tanchim dukhnnim

tanchi zhogddim, rusnni, fugnnim

soglleancheo gorzo motin dhortam

ghorach asta hamv zob khoim kortam?

bonken vochop, poixe guntoup

ghorant novem saman gheup

moddil'lem tuttil'lem sarkem kortam

ghorach asta hamv, zob khoim kortam?

bhurgyonche tor klas kitlexe

ken'nai dista tanka bhomvchenxem

gaddi gheun firunk vhortam

ghorach asta hamv, zob khoim kortam?

thondduch jeunn jeutam

thondduch udok nhatam

fattik konn lagil'leuri ghai ogich kortam

ghorach asta hamv, zob khoim kortam?

koriyr hamvem ken'na soddun dilem

ghorachem, bhurgeanchem mon laun kelem

tantunt kidem konnacher upkar vhoi kortam?

ghorach asta hamv zob khoim kortam?

sodanch mhoji nosti taktik

vell sarko akhunk xik

vell mellna mhonn rodd kideak korta?

ghorach asta hamv zob khoim kortam?

mhaka kideak suxeg zai?

mudas mhollear kidem kai?

ghora bosun disbhor kidem mhonnun kortam?

ghorach astam hamv zob khoim kortam?

mhojim ani sopnam koslim

mhaka kideak nhidunk zai?

itleaxa kamachem gogon kideak korta?

ghorach asta hamv zob khoim kortam?

ken'nai dista mhaka khomyuy vochunk zai

pustok vachunk, ponda aikunk xant bosunk zai

sogllim mhaka yad korta

oxem pusun hamv kidem kortam?

ghorach astam hamv zob khoim kortam?

ghorach asta hamv zob khoim kortam?

- Urjita Bhobe [Janer, 2019]

Urjita Bhobe: Sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’Urzasrot’ porgott zala. Konkonni kovitemni novi sokot bhorche dixen bai urjita vaur korun asa.