ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ? [ಉರ್ಜಿತಾ ಭೊಬೆ]

ಘಡಿಯಾಳಾಕ್ ತರ್‌ಯೀ ಏಕ್ ಕಾಮ್ ಪುಣ್ ಎಕಾ ಘರ್ಚ್ಯೆ ಅಸ್ತುರೆಚ್ಯಾ ಕಾಮಾಕ್ ಮೀತ್ ನಾ. ಎಕಾ ಫಾಂತ್ಯಾರ್ ಉಟುನ್ ರಾತಿಚ್ಯಾ ಮಧ್ಯಾನೆ ಪರ್ಯಾಂತ್ ತಿಚ್ಯಾ ಕಾಮಾಕ್ ಮೀತ್ ನಾ. ದೆಕುನ್ ಘರ್ಚ್ಯಾ ಅಸ್ತುರೆಕ್ ’ಘರಾಚೊ ದಿವೊ’ ಮ್ಹಣ್ತಾತ್ ಜಾಣ್ತೆ. ಇತ್ಲೆಂ ಸರ್ವ್ ಕರ್ಚಿ ಏಕ್ ಅಸ್ತುರಿ ಕೆದ್ನಾಂಯ್ ಕಸಲಿಂಚ್ ಶರ್ಥ್ ಘಾಲಿನಾ, ಘರಾಂತ್ ಜಿಯೆತೆಲ್ಯಾಂಕ್, ಘರಾಂತ್ ಯೆತೆಲ್ಯಾಂಕ್ ಸದಾಂಚ್ ಮೋಗ್ ಅನಿ ಮಯ್ಪಾಸಾನ್ ತಿ ಪಳೆತಾ ಆನಿ ಅಪ್ಲಿಂ ಸಗಳಿಂ ಸಪ್ಣಾಂ ತಿಂ ಲಿಪವ್ನ್ ದವರ್ತಾ. ಭೋವ್ಶಾ ಸಂಸಾರಾಂತ್ ಹಿ ಸಕತ್ ಫಕತ್ ಎಕಾ ಅಸ್ತುರೆಕ್ ಮಾತ್ರ್ ಆಸುಂಕ್ ಸಾಧ್ಯ್.

ಕವಿತಾ ಜೆದ್ನಾಂ ಜಿವಿತಾಚೆಂ ಕಾಪ್ ಜಾತಾ, ತೆದ್ನಾಂ ತಿ ಕವಿತಾ ಫಕತ್ ಕಾನಾಂಕ್ ಮಾತ್ ನ್ಹಯ್, ಕಾಳ್ಜಾಕ್ ಆಪಡ್ತಾ. ಪುಣ್ ಹಿ ಕವಿತಾ ಕಾಸಾಪ್ಪ್ಯಾಚೆಂ ಕಾಳಿಜ್ ಸಯ್ತ್ ಕಡಯ್ತಾ, ಏಕ್ ಆವಯ್, ಏಕ್ ಭಯ್ಣ್, ಏಕ್ ಬಾಯ್ಲ್, ಅಶೆಂ ವೆವೆಗಳ್ಯಾ ರುಪಾಂನಿ ಸೆವಾ ಕರ್ಚ್ಯಾ ಅಸ್ತುರೆಚೆಂ ರುಪಣೆಂ ದೊಳ್ಯಾಂಸಮೊರ್ ಉಭೆಂ ಕರ್ತನಾ ಖರೆಂಚ್ ರಡಯ್ತಾ. ಏಕ್ ಕವಿತಾ ಮೊನ್ಯಾಂಕ್ ತಾಳೊ ದಿತಾ ತರ್ ತ್ಯಾ ಕವಿತೆಚಿ ಸಕತ್ ತರ್‌ಯೀ ಕಸಲಿ ಆಸತ್ ಮ್ಹಳ್ಳೆಂ ತುಮಿಂಚ್ ಪಾರ್ಕಿಯಾ.

ಉರ್ಜಿತಾ ಭೊಬೆ ಗೊಂಯ್ಚಿ ಆಯ್ಲೆವಾರ್ ಕವಿತಾ ಬರಂವ್ಚಿ ಕವಯತ್ರಿ ಪುಣ್ ತಿಚ್ಯಾ ಎಕೆಕಾ ಕವಿತೆಂನಿ ದಿಸ್ಚಿ ಸಂವೇದನ್‌ಶೀಲ್ ಚಿಂತಪ್, ಉಮಾಳೆ, ಯಾದಿ, ಸಪಣಾಂ ಖಂಡಿತ್ ಕವಿತಾರಸಿಕಾಂಕ್ ಪಿಶ್ಯಾರ್ ಘಾಲ್ತಾ ಮ್ಹಣ್ಚ್ಯಾಕ್ ಹಿ ಕವಿತಾ ಅಪುರ್ಭಾಯೆನ್ ಗವಾಯ್ ದಿತಾ.

[ಕವಿತಾ] ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ? [ಉರ್ಜಿತಾ ಭೊಬೆ]

ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ?

ಸಕಾಳಚಿ ಚ್ಯಾ ದನ್ಪಾರಚೆಂ ಜ್ಹೆವಣ್

ತೆಂ ತರ್ ಸದ್ಚೆಂಚ್ ತಾಂತುಂತ್ ಕಸ್ಲೆಂ ಗಗನ್

ರಾತ್ಚೆ ನವೆ ನವೆ ಪನ್ವಾರ್ ಕರ್ತಾಂ

ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ?

ಭುರ್ಗ್ಯಾಂಚೆಂ ಖಾಣ್ ತಾಂಚೆಂ ಜ್ಹೆವಣ್

ತಾಂಚೊ ಅಭ್ಯಾಸ್ ತಾಂಚೆಂ ಶಿಕ್ಷಣ್

ಅಸಾಯ್ನಮೆಂಟ್, ಹೊಮವ್ರ್ಕ್, ಬೆಗಾಂ ತಾಂಚಿಂ ಭರ್ತಾಂ

ಘರಾಚ್ ಆಸ್ತಾಂ ಹಾಂವ್, ಜೊಬ್ ಖಂಯ್ ಕರ್ತಾಂ?

ಮಾಯ್ಮಾವಾಚಿ ಭಲಾಯ್ಕಿ ತಾಂಚಿ ಜತ್ನಾಯ್

ಪಥ್ಯೂಯ್ ಪಾಳಪ್, ಯಾದಿನ್ ಹಾಡಪ್ ವಖ್ದಾಂಯ್

ದೆವ್ಳಾಂನಿ, ದೊತೊರಾಗೆರ್ ಹಾಡ್ಟಾಂ ವ್ಹರ್ತಾಂ

ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ?

ವೊಶೀಂಗ್ ಮಶೀನ್ ಲಾಯ್ತಾಂ

ಕಪ್ಡ್ಯಾಂಕ್ ಫೆರ್ರ್ ಮಾರ್ತಾಂ

ಜಾಗ್ಯಾವೆಲೆಂ ಸಗ್ಳೆಂ ಜಾಗ್ಯಾರ್ ದವ್ರತಾಂ

ಘರಾಚ್ ಆಸ್ತಾ ಹಾಂವ್ ಜೊಬ್ ಖಂಯ್ ಕರ್ತಾಂ?

ಲಾಯ್ಟೀಚಿಂ, ಫೊನಾಚಿಂ ಬೀಲಾಂ ಭರಪ್

ಬಾಜಾರ್, ನುಸ್ತೆಂಯ್ ಹಾಂವೆಂಚ್ ಕರ್ಪಭರೂನ್

ಮಾನ್ನ್ಯಾಚಿ, ಘರಾಚಿ ಲೀಂಪೆಜೂಯ್ ಕರ್ತಾಂ

ಘರಾಚ್ ಆಸ್ತಾ ಹಾಂವ್ ಜೊಬ್ ಖಂಯ್ ಕರ್ತಾಂ?

ಭುರ್ಗ್ಯಾಂಚಿಂ ದುಯೆಸಾಂ ತಾಂಚಿಂ ದುಖ್ಣಿಂ

ತಾಂಚಿ ಝಗ್ಡಿಂ, ರುಸ್ಣಿ, ಫುಗ್ಣಿಂ

ಸಗ್ಳ್ಯಾಂಚ್ಯೊ ಗರ್ಜೊ ಮತೀನ್ ಧರ್ತಾಂ

ಘರಾಚ್ ಆಸ್ತಾ ಹಾಂವ್ ಜೊಬ್ ಖಂಯ್ ಕರ್ತಾಂ?

ಬಂಕೆನ್ ವಚಪ್, ಪೈಶೆ ಗುಂತವ್ಪ್

ಘರಾಂತ್ ನವೆಂ ಸಾಮಾನ್ ಘೆವ್ಪ್

ಮೊಡಿಲ್ಲೆಂ ತುಟಿಲ್ಲೆಂ ಸಾರ್ಕೆಂ ಕರ್ತಾಂ

ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ?

ಭುರ್ಗ್ಯಂಚೆ ತರ್ ಕ್ಲಾಸ್ ಕಿತ್ಲೆಶೆ

ಕೆನ್ನಾಯ್ ದಿಸ್ತಾ ತಾಂಕಾ ಭೊಂವ್ಚೆಂಶೆಂ

ಗಾಡಿ ಘೆವ್ನ್ ಫಿರೂಂಕ್ ವ್ಹರ್ತಾಂ

ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ?

ಥಂಡೂಚ್ ಜೆವ್ಣ್ ಜೆವ್ತಾಂ

ಥಂಡೂಚ್ ಉದಕ್ ನ್ಹಾತಾಂ

ಫಾಟೀಕ್ ಕೊಣ್ ಲಾಗೀಲ್ಲೆವರಿ ಘಾಇ ಒಗೀಚ್ ಕರ್ತಾಂ

ಘರಾಚ್ ಆಸ್ತಾ ಹಾಂವ್, ಜೊಬ್ ಖಂಯ್ ಕರ್ತಾಂ?

ಕರೀಯ್ರ್ ಹಾಂವೆಂ ಕೆನ್ನಾ ಸೊಡೂನ್ ದಿಲೆಂ

ಘರಾಚೆಂ, ಭುರ್ಗ್ಯಾಂಚೆಂ ಮನ್ ಲಾವ್ನ್ ಕೆಲೆಂ

ತಾಂತುಂತ್ ಕಿದೆಂ ಕೊಣಾಚೆರ್ ಉಪ್ಕಾರ್ ವ್ಹಯ್ ಕರ್ತಾಂ?

ಘರಾಚ್ ಆಸ್ತಾ ಹಾಂವ್ ಜೊಬ್ ಖಂಯ್ ಕರ್ತಾಂ?

ಸದಾಂಚ್ ಮ್ಹಜಿ ನಸ್ತಿ ತಾಕ್ತೀಕ್

ವೆಳ್ ಸಾರ್ಕೊ ಆಖೂಂಕ್ ಶೀಕ್

ವೆಳ್ ಮೆಳ್ನಾ ಮ್ಹಣ್ ರಡ್ ಕಿದ್ಯಾಕ್ ಕರ್ತಾ?

ಘರಾಚ್ ಆಸ್ತಾ ಹಾಂವ್ ಜೊಬ್ ಖಂಯ್ ಕರ್ತಾಂ?

ಮ್ಹಾಕಾ ಕಿದ್ಯಾಕ್ ಸುಶೆಗ್ ಜಾಯ್?

ಮುದಾಸ್ ಮ್ಹಳ್ಯಾರ್ ಕಿದೆಂ ಕಾಯ್?

ಘರಾ ಬಸೂನ್ ದಿಸ್ಭರ್ ಕಿದೆಂ ಮ್ಹಣೂನ್ ಕರ್ತಾಂ?

ಘರಾಚ್ ಆಸ್ತಾಂ ಹಾಂವ್ ಜೊಬ್ ಖಂಯ್ ಕರ್ತಾಂ?

ಮ್ಹಜಿಂ ಆನಿ ಸಪ್ನಾಂ ಕಸ್ಲಿಂ

ಮ್ಹಾಕಾ ಕಿದ್ಯಾಕ್ ನ್ಹಿದುಂಕ್ ಜಾಯ್?

ಇತ್ಲ್ಯಾಶಾ ಕಾಮಾಚೆಂ ಗಗನ್ ಕಿದ್ಯಾಕ್ ಕರ್ತಾ?

ಘರಾಚ್ ಆಸ್ತಾ ಹಾಂವ್ ಜೊಬ್ ಖಂಯ್ ಕರ್ತಾಂ?

ಕೆನ್ನಾಯ್ ದಿಸ್ತಾ ಮ್ಹಾಕಾ ಖಂಯೂಯ್ ವಚೂಂಕ್ ಜಾಯ್

ಪುಸ್ತಕ್ ವಾಚೂಂಕ್, ಪಂದಾ ಆಯ್ಕೂಂಕ್ ಶಾಂತ್ ಬಸುಂಕ್ ಜಾಯ್

ಸಗ್ಳಿಂ ಮ್ಹಾಕಾ ಯಾದ್ ಕರ್ತಾ

ಅಶೆಂ ಪುಸೂನ್ ಹಾಂವ್ ಕಿದೆಂ ಕರ್ತಾಂ?

ಘರಾಚ್ ಆಸ್ತಾಂ ಹಾಂವ್ ಜೊಬ್ ಖಂಯ್ ಕರ್ತಾಂ?

ಘರಾಚ್ ಆಸ್ತಾ ಹಾಂವ್ ಜೊಬ್ ಖಂಯ್ ಕರ್ತಾಂ?

- ಉರ್ಜಿತಾ ಭೊಬೆ [ಜನೆರ್, 2019]

ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್’ ಪರ್ಗಟ್ ಜಾಲಾ. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ.