ಕವಿತಾकविताPoem

ಗೊಂಯ್ ಜಾಲಾಂ ಬೆಜಾರ್ (- ಎಚ್. ಮನೋಜ್ ಜೆ)

[ಕವಿತಾ] ಗೊಂಯ್ ಜಾಲಾಂ ಬೆಜಾರ್ (- ಎಚ್. ಮನೋಜ್ ಜೆ)

ಕವಿತಾ ಮ್ಹಳ್ಯಾರ್ ಕಾಣಿ ನ್ಹಯ್, ಕವಿತಾ ಮ್ಹಳ್ಯಾರ್ ಖಬ್ರೆ ಪತ್ರಾಂಕ್ ಧಾಡ್ಚಿ ಭಾತ್ಮಿ ನ್ಹಯ್. ಕವಿತಾ ಥೊಡ್ಯಾಚ್ ಉತ್ರಾಂನಿ ಖೂಪ್ ಸಾಂಗ್ಚಿ ಏಕ್ ಕಲಾ. ಹಿ ಕವಿತಾ ವಯ್ಲೆಭಾರ್ ವಾಚ್ತಾನಾ ಕಾಂಯ್ ಅಶೆಂ ದಿಸುಂಕ್ ಪುರೊ ಪುಣ್ ಹ್ಯಾ ಕವಿತೆಂತ್ಲೆ ವಿಚಾರ್ ಹಕೀಗತ್ ಆನಿ ಮಾರ್ಮಿಕ್. ಎಕಾ ತೆಂಪಾಧ್ಲೆಂ ಭಾಂಗ್ರಾಳೆಂ ಗೊಂಯ್ ಆತಾಂ ಆಮ್ಚೆ ಪಯ್ಕಿಂತ್ಲೆಚ್ ಲುಟುಂಕ್ ಸುರು ಕರ್ತಾನಾ ಖರೆಂಚ್ ಜಾವ್ನ್ ಗೊಂಯ್ ಬೆಜಾರ್ ಪಾವ್ತಾಚ್.

[ಕವಿತಾ] ಗೊಂಯ್ ಜಾಲಾಂ ಬೆಜಾರ್ (- ಎಚ್. ಮನೋಜ್ ಜೆ)

ಗೊಂಯ್ ಜಾಲಾಂ ಬೆಜಾರ್

ಸೊಬೀತ್ ಅಶೆಂ ಗೊಂಯ್ ಮ್ಹಜೆಂ

ಜಾಲಾಂ ತೆಂ ಬೆಜಾರ್

ಸಗ್ಲ್ಯಾಂತ್ ಸಾನ್ ರಾಜ್ಯ್ ತೆಂ

ಪೂಣ್ ಸಂವ್ಸಾರ್ ಭರ್ಚೊ ತಾಚೆರ್ ಭಾರ್

ಸಾಂಬಾಳೂಕ್ ತೆಂ ಜಾಲಾಂ ಲಾಚಾರ್

ದಿಸಾನ್ ದೀಸ್ ಜಾತಾ ಅತ್ಯಾಚಾರ್

ಕೊಣ್ ದೊಂಗರ್ ಕಾಪ್ತಾ

ತರ್ ಕೊಣ್ ವಾಗಾಕ್ ಮಾರ್ತಾ,

ಸೈಮಾಚೊ ತಾಚ್ಯಾ ಜಾಲಾಂ ಇಬಾಡ್

ದೆಖೂನ್ ಜಾಲಾಂ ತೆಂ ಬೆಜಾರ್

ತಾಚ್ಯೊ ನ್ಹಂಯೊ ಝರಿ ವ್ಹಾಳ್

ಹಾಂಚೆರ್ ಹಾಡ್ಲ್ಯಾ ಹಾವ್ಳ್

ಸೊಬೀತ್ ತಾಚೆ ರುಪ್

ಜಾವಂಕ್ ಪಾವ್ಲಾಂ ಕುರೂಪ್

ದೆಖೂನ್ ಜಾಲಾಂ ತೆಂ ಬೆಜಾರ್

ನವೆಂ ಪಿಳ್ಗೆಚೊ ಚಿಂತೂನ್ ಫುಡಾರ್

ತಾಚೊ ಜೀವ್ ಜಾತಾ ಫುಗಾರ್

ಕಶೆ ಕರಪ್ ತಾಂಕಾ ಸಾಲ್ವಾರ್

ಹೊ ಪ್ರಸ್ನ್ ತಾಚ್ಯಾ ಮುಖಾರ್

ದೆಖೂನ್ ಜಾಲಾಂ ತೆಂ ಬೆಜಾರ್

ಭೆಸ್ ಗೊಂಯ್ಕಾರಾಂಚೊ ಸಗ್ಳೊಚ್ ಬದ್ಲ್ಲಾ

ಪಳೊವ್ನ್ ತಾಚೆಂ ಮನ್ ಉಬ್ಗೆಲಾಂ

ಮುಳಾವೊ ಮನೀಸ್ ದಿಸುಂಕ್ ಕುಸ್ತಾರ್

ದಿಸ್ತಾ ವಚತ್ ಥಂಯ್ ಎಕುಚ್ ಬಾಜಾರ್

ದೆಖೂನ್ ಜಾಲಾಂ ತೆಂ ಬೆಜಾರ್

ಕೊಂಕ್ಣಿ ತಾಚಿ ಮ್ಹೊಂವಾಳ್ ಭಾಸ್

ತೀಕಾ ಜಾಯ್ ಸಗ್ಲ್ಯಾಂನಿ ಉಲೊವ್ಚಿ ಖಾಸ್

ಪೂಣ್ ಕಾಂಯ್ ಜಾಣಾಂಕ್ ಉಲೊವಂಕ್

ಪರ್ಕಿ ಭಾಶೆಚಿ ಜಾಯ್ ಮಿರಾಸ್

ದೆಖೂನ್ ಜಾಲಾಂ ತೆಂ ಬೆಜಾರ್

- ಎಚ್. ಮನೋಜ್ ಜೆ. [ಜುಲಾಯ್, 2020]