ಕವಿತಾकविताPoem

Deva, ekuch dorxon di (- Vinsi Quaddros )

[kovita] Deva, ekuch dorxon di (- Vinsi Quaddros )

Somajent kovi zamv, kolakar zamv poilo ek monis zaunasta dekun monxaponnachem chintop, monxaponnachi korni tachethoim aschi bhovo gorjechi. Jednam monxamolank addovo ghalun somsarant dakoupak ’boro kovi’ vo ’boro kolakar’ zal'lean somajent thoddeank fottoun dis kaddyet punn kitlo temp? jednam-i kovitemni monxamolancher attovo ghal'lo asta, tedna ti kovita utramni sozoyil'leo volli zaun matr uronant bogor jinnyepoinnacher ek divtti koxi zata.

Hangasor‌yi bab vinsi kvaddrosan osolench preton kel'lem disun yeta. Ani hi kovita porot porot vachunk mon yeta. Hea kovitecho osvad korunk tukach ulo ditam.

[kovita] Deva, ekuch dorxon di (- Vinsi Quaddros )

Deva, ekuch dorxon di

Deva,

Mhojea ontoskornnachea mukhamollar

Fulun asat kitlinch sobit sundor fulam

Tanchea mullant aslolea kantteamni

Boreponnacher mhellem udok ghalam

Tannim mhojem khuxal jivit ibaddlam

Kantteancho rong ubounk varem yeum-di

Fulam bhogunk Deva ekuch dorxon di

Deva,

Mhojem kalliz bhou mogall ani bhavnik

Tujiech kurpen asa utsah ani xud’dhtai

Tanchea bhonvtonnchea krur vichearamni

Kabar kelia nitivont nhid ani sovostkai

Akromonnak sampoddlia mhoji povitrtai

Hanv khuim chukta tem mhaka dakhoun di

Mogan jiyeunk Deva ekuch dorxon di

Deva,

Soglleanchea huskean jiyevpachi sonvoi

Konnachi pidda mhojean zainam sonsunk

Kednam kednam tanchea dukhkhantlean

Mhojea jivitachio kombrio lagtat fulunk

Somzolench nam vikruti lagli pokhrunk

Dusreak somzuche mhojeant gunn yeum di

Huskean jiyeunk Deva ekuch dorxon di

Deva,

Mhozo otmo povitr korunk vaurtam

Jinnetlem ekui naka tantunt vidrup pap

Harxant kirkoll nodor poddtta tednam

Saullientlean upzota ontormonachi zap

Tachi vachea dollmollaita bhouxik map

Boria kornniamni hem map otum di

Otmeak rakhunk Deva ekuch dorxon di

- Vinsi Quaddros. [Dec, 2019]