ದೆವಾ, ಎಕ್‌ಚ್ ದರ್ಶನ್ ದಿ (- ವಿನ್ಸಿ ಕ್ವಾಡ್ರೊಸ್)

ಮ್ಹಜ್ಯಾ ಅಂತಸ್ಕರ್ಣಾಚ್ಯಾ ಮುಖಾಮಳಾರ್

ಫುಲುನ್ ಆಸಾತ್ ಕಿತ್ಲಿಂಚ್ ಸಬಿತ್ ಸುಂದರ್ ಫುಲಾಂ

ತಾಂಚ್ಯಾ ಮುಳಾಂತ್ ಆಸ್ಲಲ್ಯಾ ಕಾಂಟ್ಯಾಂನಿ

ಬರೆಪಣಾಚೆರ್ ಮ್ಹೆಳೆಂ ಉದಕ್ ಘಾಲಾಂ

ತಾಣಿಂ ಮ್ಹಜೆಂ ಖುಶಾಲ್ ಜಿವಿತ್ ಇಬಾಡ್ಲಾಂ

ಕಾಂಟ್ಯಾಂಚೊ ರಂಗ್ ಉಬವಂಕ್ ವಾರೆಂ ಯೆವಂದಿ

ಫುಲಾಂ ಭಗುಂಕ್ ದೆವಾ ಎಕ್‌ಚ್ ದರ್ಶನ್ ದಿ

ದೆವಾ,

ಮ್ಹಜೆಂ ಕಾಳಿಜ್ ಭವ್ ಮಗಾಳ್ ಆನಿ ಭಾವ್ನಿಕ್

ತುಜಿಯೆಚ್ ಕುರ್ಪೆನ್ ಆಸಾ ಉತ್ಸಾಹ್ ಆನಿ ಶುದ್ಧ್ತಾಯ್

ತಾಂಚ್ಯಾ ಭಂವ್ತಣ್ಚ್ಯಾ ಕ್ರುರ್ ವಿಚ್ಯಾರಾಂನಿ

ಕಾಬಾರ್ ಕೆಲಿಯಾ ನಿತಿವಂತ್ ನ್ಹಿದ್ ಆನಿ ಸವಸ್ತ್ಕಾಯ್

ಆಕ್ರಮಣಾಕ್ ಸಾಂಪಡ್ಲಿಯಾ ಮ್ಹಜಿ ಪವಿತ್ರ್ತಾಯ್

ಹಾಂವ್ ಖುಯಂ ಚುಕ್ತಾ ತೆಂ ಮ್ಹಾಕಾ ದಾಖವ್ನ್ ದಿ

ಮೊಗಾನ್ ಜಿಯೆವಂಕ್ ದೆವಾ ಎಕ್‌ಚ್ ದರ್ಶನ್ ದಿ

ದೆವಾ,

ಸಗ್ಳ್ಯಾಂಚ್ಯಾ ಹುಸ್ಕ್ಯಾನ್ ಜಿಯೆವ್ಪಾಚಿ ಸಂವಯ್

ಕಣಾಚಿ ಪಿಡಾ ಮ್ಹಜ್ಯಾನ್ ಜಾಯ್ನಾಂ ಸನ್ಸುಂಕ್

ಕೆದ್ನಾಂ ಕೆದ್ನಾಂ ತಾಂಚ್ಯಾ ದುಖ್ಖಾಂತ್ಲ್ಯಾನ್

ಮ್ಹಜ್ಯಾ ಜಿವಿತಾಚಿಯೊ ಕಂಬ್ರಿಯೊ ಲಾಗ್ತಾತ್ ಫುಲುಂಕ್

ಸಂಜಲೆಂಚ್ ನಾಂ ವಿಕ್ರುತಿ ಲಾಗ್ಲಿ ಪಖ್ರುಂಕ್

ದುಸ್ರ್ಯಾಕ್ ಸಮ್ಜುಂಚೆಂ ಮ್ಹಜ್ಯಾಂತ್ ಗುಣ್ ಯೆವಂ ದಿ

ಹುಸ್ಕ್ಯಾನ್ ಜಿಯೆವಂಕ್ ದೆವಾ ಎಕ್‌ಚ್ ದರ್ಶನ್ ದಿ

ದೆವಾ,

ಮ್ಹಜೊ ಅತ್ಮೊ ಪವಿತ್ರ್ ಕರುಂಕ್ ವಾವ್ರ್ತಾಂ

ಜಿಣೆತ್ಲೆಂ ಎಕುಯ್ ನಾಕಾ ತಾಂತುಂತ್ ವಿದ್ರುಪ್ ಪಾಪ್

ಹಾರ್ಶಾಂತ್ ಕಿರ್ಕಳ್ ನದರ್ ಪಡ್ಟಾ ತೆದ್ನಾಂ

ಸಾವ್ಳಿಯೆಂತ್ಲ್ಯಾನ್ ಉಪ್ಜತಾ ಅಂತರ್ಮನಾಚಿ ಜಾಪ್

ತಾಚಿ ವಾಚ್ಯಾ ದಳ್ಮಳಾಯ್ತಾ ಭವ್ಶಿಕ್ ಮಾಪ್

ಬರಿಯಾ ಕರ್ಣಿಯಾಂನಿ ಹೆಂ ಮಾಪ್ ಅತುಂ ದಿ

ಅತಂಯಾಕ್ ರಾಖುಂಕ್ ದೆವಾ ಎಕ್‌ಚ್ ದರ್ಶನ್ ದಿ

- ವಿನ್ಸಿ ಕ್ವಾಡ್ರೊಸ್. [ದಸೆಂಬ್ರ್, 2019]