ದಾರಾಚೊ ಧರ್ಮ್ [ಉದಯ್ ಮ್ಹಾಂಬ್ರೊ]

ದಾರ್ ಮ್ಹಳ್ಯಾರ್ ಕಿತೆಂ? ಎಕಾ ದಾರಾಚೆಂ ಮುಳಾವೆಂ ಕಾಮ್ ಕಸಲೆಂ? ಹೆಂ ಸಮ್ಜುಂಚಿ ಶ್ಯಾಥಿ ಆಸ್ಚ್ಯಾಂಕ್ ಹಿ ಕವಿತಾ ಸಮ್ಜುಂಕ್ ತ್ರಾಸ್ ನಾಂತ್. ಆತಾಂ ದಾರಾಚ್ಯಾ ಧರ್ಮಾಕ್ ಅಸ್ಕತ್ ಕರ್ಚಿ ಖಿಳ್ ವಾ ಖಿಳಿಕ್ ಹಾತೆರ್ ಕರುನ್ ದಾರಾಕ್ ಅಸ್ಕತ್ ಕರ್ತೆಲ್ಯಾ ಸಮಾಜೆಕ್ ಕಿತೆಂ ಕರಿಜಯ್? ಹಾಂಗಾಸರ್ ವಯ್ಚಾರಿಕ್ ಸವಾಲಾಂ ನ್ಹಯ್, ಸವಾಲಾಂಚೊ ದಾಳೊಚ್ ಆಸಾ.

’ಹಾಂವ್ ಬರೊ’ ಚಿಂತಪ್ ವಾಯ್ಟ್ ನ್ಹಯ್, ಪುಣ್ ’ಹಾಂವ್ ಎಕ್ಲೊಂಚ್ ಬರೊ, ಬಾಕಿಚೆ ಸರ್ವ್ ಖೊಟೆ’ ಮ್ಹಳ್ಳೆಂ ಚಿಂತಪ್ ಮಾರೆಕಾರ್. ಆಯ್ಚೊ ಸಂಸಾರ್ ಚಡ್ ಕರುನ್ ಹೆಚ್ ಚಿಂತ್ಪಾಚೊ ಪಾಟ್ಲಾವ್ ಕರುನ್ ಆಸಾ ದೆಕುನ್ ಹರೇಕ್ ಶೆತಾಂತ್ ಉಟೊನ್ ದಿಸ್ತಾ ಎಕಾ ಥರಾಚೆಂ ದೊಡೆಂಪಣ್. ಜಿವಾಚ್ಯಾಕೀ ವ್ಹಡ್ ಇಗೋ. ಪುಣ್ ಹಾಂಗಾಸರ್ ಏಕ್ ಕವಿ ಮೊನೊ ಜಾವ್ನ್ ತರ್‌ಯೀ ಅಸಲ್ಯಾ ಅನಿಶ್ಟ್ ಕರ್ನೆಂಚೆರ್ ಉತ್ರಾವಿಣೆಂ ವಾರ್ ಕರ್ತಾ.

ಬಾಬ್ ಉದಯ್ ಮ್ಹಾಂಬ್ರೊ ಗೊಂಯ್ಚೊ ನಾಮ್ನೆಚೊ ಕವಿ. ಸಂಯ್ಬನ್ ಭೋವ್ ಸಾದೊ ಆನಿ ಮಾಯಾಮೊಗಾಳ್ ದೆಕುನ್ ತಾಚ್ಯೊ ಕವಿತಾ ಗೊಂಯ್ಚಿ ಮೇರ್ ಉತ್ರೊನ್ ಕೊಂಕಣಿಚ್ಯಾ ಹೆರ್ ರಾಜ್ಯಾಂನಿ ಪಾವ್ಲ್ಯಾತ್. ಮುಂಬಂಯ್ತ್ ಚಲ್‌ಲ್ಲ್ಯಾ ’ಕವಿತಾಪಾಠ್’ ಕಾಮಾಸಾಳಾಚೆರ್ ಸಯ್ತ್ ಹಾಚ್ಯಾ ಕವಿತೆಂಚೆರ್ ಅಧ್ಯಯನ್ ಚಲ್ಲಾಂ. ಕವಿತೆಚ್ಯಾ ಸಕ್ತೆಕ್ ಸಮ್ಜುಂಕ್ ಅತ್ರೆಗ್ತೆಲ್ಯಾಂನಿ ಹಿ ಕವಿತಾ ಆತಾಂಚ್ ವಾಸ್ಚಿ.

[ಕವಿತಾ] ದಾರಾಚೊ ಧರ್ಮ್ [ಉದಯ್ ಮ್ಹಾಂಬ್ರೊ]

ದಾರಾಚೊ ಧರ್ಮ್

ಮೆಲ್ಲ್ಯಾ ಝಾಡಾಚ್ಯಾ ಲಾಕ್ಡಾಪಾಸೂನ್

ಮ್ಹಜೊ ಜಾತಾ ಜಲ್ಮ್ ದೆಖೂನ್

ಹಾಂವ್ ನಿರ್ಜೀವ್ ಅಶೆಂ ಸಮ್ಜೂನ್

ಲೊಕ್ ಮ್ಹಾಕಾ ಆಡ್ ಕರೂನ್

ಜೆಂ ಕಿತೆಂ ಕರ್ತಾತ್

ತೆಂ ಸಗ್ಳೆಂಚ್ ಸಗ್ಳ್ಯಾಂಕ್ ಸಾಂಗ್ಲ್ಯಾರ್

ಅಚ್ಛೆವ್ ಮಾಜ್ತಲೊ

ಆಮ್ಚೊ ದಾರಾಂಚೊ ಧರ್ಮ್ ಪಾಳೂನ್

ಹಾಂವ್ ತೊಂಡಾಕ್ ಖಿಳಿ ಘಾಲ್ತಾ

ತರಿ ಕಾಂಯ್ ಲೊಕ್

ಬುರ್ಕಾಂತ್ಲ್ಯಾನ್ ದೊಳೊ ಘಾಲೂನ್

ಧುಂವ್ರ್ ದಿಸ್ತಾ ತಾಚೆರೂಚ್

ಖಾಂಚೀತ್ಲ್ಯಾನ್ ಫುಂಕ್ ಮಾರೂನ್

ಉಜೊ ಪೆಟಯ್ತಾತ್

ಹಾಂವ್ ನಿರ್ಜೀವ್ ಅಶೆಂ ಸಮ್ಜೂನ್

ಮ್ಹಜೆಲಾಗಿಂ ಮಾತ್

ಕೊಣೂಚ್ ಕಸ್ಲಿ

ರುಜ್ವಾತ್ ಕರೀನಾತ್

- ಉದಯ್ ಮ್ಹಾಂಬ್ರೊ [ಮಾಯ್, 2019]

ಉದಯ್ ಮಾಂಬ್ರೊ: ಗೊಂಯ್ಚೊ ಏಕ್ ನಾಮ್ಣೆಚೊ ಲೇಕಕ್, ಕವಿ, ವಾವ್ರಾಡಿ ತಶೆಂಚ್ ಪದಾಂ ಘಡ್ಣಾರ್. ’ಹಾಯ್ ಸಾಯ್ಭಾ’, ’ಮನ್ಶಾಚ್ಯಾ ಸೋಧಾಂತ್’ ಹಾಚೆ ಎದೊಳ್ ಪರ್ಗಟ್ ಜಾಲ್ಲೆ ಬೂಕ್. ಕವಿತಾ, ಕಥಾ, ಅಣ್ಬವ್ ಸಾಹಿತ್ ಬರಂವ್ಚೊ ಹೊ ಏಕ್ ಕೊಂಕಣಿ ವಾವ್ರಾಡಿ ತಶೆಂಚ್ ಚಿಂತ್ಪಿ ಜಾವ್ನಾಸ್ಚ್ಯಾ ಹಾಚ್ಯಾ ಕವಿತೆಂಚೆರ್ ಮುಂಬಂಯ್ತ್ ’ಕವಿತಾಪಾಠ್’ ಕಾಮಾಸಾಳಾಂತ್ ಅಧ್ಯಯನ್ ಚಲ್ಲಾಂ.