ಕವಿತಾकविताPoem

ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ (- ಪೂಜಾ ನಾಯ್ಕ್ ಗಾಂವ್ಕರ್)

[ಕವಿತಾ] ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ (- ಪೂಜಾ ನಾಯ್ಕ್ ಗಾಂವ್ಕರ್)

ಶಿಕುಂಕ್ ಮನ್ ಆಸ್ಚ್ಯಾ ಮನಶಾಂಕ್ ರುಕಾ-ಝಡಾಂ ಥಾವ್ನ್ ಶಿಕುಂಕ್ ಜಾತಾ, ದೊಂಗೊರ್-ನ್ಹಂಯ್ ಥಾವ್ನ್ ಶಿಕುಂಕ್ ಜಾತಾ, ಪುಣ್ ಶಿಕುಂಕ್ ನಾಕಾಸ್ಚ್ಯಾಂಕ್ ಸಮ್ಜಾಂವ್ಕ್ ಕಿತೆಂಚ್ ಸಕಾನಾ. ಅಖ್ಖ್ಯಾ ಸಂಸಾರಾಕ್ ಹಿ ಮಾರೆಕಾರ್ ಪಿಡಾ ಜಾಯ್ತಿಂ ಲಿಸಾಂವಾಂ ಶಿಕುನ್ ಆಸಾತ್ ಮ್ಹಳ್ಳೆಂ ಚಿಂತಪ್ ಹ್ಯಾ ಕವಿತೆಂತ್ ಆಸಾ.

[ಕವಿತಾ] ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ (- ಪೂಜಾ ನಾಯ್ಕ್ ಗಾಂವ್ಕರ್)

ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ

ಫಟೀಂಗಪಣಾಚಿಂ ರುಪ್ಡಿಂ ಮಿರಯ್ತ್ಲ್ಯಾಂಕ್

ಖರೆಂ ಮಾಸ್ಕ್ ಘಾಲ್ಪಾಂಕ್ ಶಿಕಯ್ಲೆಂ

ಚೊರಿ ಕರ್ಪಿಂ ಹಾತಾಂಚೆಂ ಪಾಪ್

ಸೆನಿಟಾಯಝರ್ ಲಾಂವ್ನ್ ಪವಿತ್ರ್ ಕೆಲೆಂ

ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ

ಫುಡಾರ್ಯಾಂಚ್ಯಾ ನಮ್ಸ್ಕಾರಾತಲೆಂ

ಅಜಾಪಾಚೆಂ ಚಮ್ತ್ಕಾರ್ ದಾಖಯ್ಲೆಂ

ಪಯ್ಶಾಂಚ್ಯಾ ಭಕೀಂಕ್ ರಡ್ಪಿಂ

ಸ್ವಾರ್ಥಾಚೆಂ ಪ್ರೆತ್ ಜಳಯ್ಲೆಂ

ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ

ಜಾಣ್ಟ್ಯಾಂ ಆವ್ಯ್ ಬಾಪಾಯ್ಚೆಂ ಮೊಲ್

ಆದಾರಾಚ್ಯಾ ಕುಡೀಂತ್ ತಿಗೊವ್ಪಾಂಕ್ ಶಿಕಯ್ಲೆಂ

ಫ್ಲೆಟಾತ್ಲ್ಯಾಂ ಬಂದಿಸ್ತ್ ಘರಾಬ್ಯಾಂಕ್

ಗಾವಾತ್ಲ್ಯಾಂ ರಾಜಾಂಗಣಾಂತ್ ಹಾಸ್ಪಾಂಕ್ ಶಿಕಯ್ಲೆಂ

ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ

ಗಾವಾಕಡಲಿಂ ವಾಟ್, ಜೀವಾಚೆಂ ವಜೆಂ ಉಬಾರೂನ್

ಅನ್ವಾಣಿ ಪಾಯಾಂನಿ ಚಲೂನ್ ಮೆಜ್ಲೆಂ

‘ಭಾರತ್ ಭಾಗ್ಯ್ ವಿಧಾತಾಚೆಂ’ ಸಪನ್

ಗರೀಬಾಂಚ್ಯಾ ದೊಳ್ಯಾಂತ್ಲ್ಯಾಂನ್ ರಡ್ಟನಾಂ ದೆಖ್ಲೆಂ

ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ

ಅಧರ್ಮಾಚ್ಯಾ ಮಾಂಡಿಲ್ಯಾಂ ಗರ್ಭಕುಡೀಂತ್

ದೆವಾಚೆಂ ‘ದೆವತ್ವ್’ ಕಾಳ್ಜಾಂತ್ ಜಾಗಯ್ಲೆಂ

ಮನೀಸಪಣಾಚ್ಯಾ ರೂಖಾಂರ್ ಫುಲ್ಲೆಲೆಂ

ಆಸ್ಥೆಚೆಂ ಫುಲ್, ಮನ್ಶಾಂತ್ಲ್ಯಾಂ ದೆವಾಂತ್ ಪರ್ಮಳಲೆಂ

ಕೊರೊನಾ… ತುವೆಂ ಖೂಬ್ ಕಿತೆಂ ಶಿಕಯ್ಲೆಂ

- ಪೂಜಾ ನಾಯ್ಕ್ ಗಾಂವ್ಕರ್. [ಜುಲಾಯ್, 2020]