ಕೊಲಾಜ್ ಎಕಾ ಮ್ಹಾನಗರಾಚೆಂ (- ಶಯ್ಲೇಂದ್ರ ಮೆಹ್ತಾ)

[ಕವಿತಾ] ಕೊಲಾಜ್ ಎಕಾ ಮ್ಹಾನಗರಾಚೆಂ (- ಶಯ್ಲೇಂದ್ರ ಮೆಹ್ತಾ)

ಹವ್ಯಾಸಿ ಕವಿ ಸಗಳ್ಯಾಂನಿ ಭರುನ್ ಗೆಲ್ಲ್ಯಾ ಆಯ್ಚ್ಯಾ ಕಾಳಾರ್ ಜಿಣ್ಯೆ ಅನ್ಭವಾಕ್ ಗಾಳುನ್, ತಾಂತಲ್ಯಾ ಕೊಡು ಯಾದಿಂಕ್ ಪಿಳುನ್ ಜೆದನಾಂ ಝರಯಿಲ್ಲೆಂ ಆವ್ಕ್ ನಿಯಾಳುನ್ ಜೆಯೆತಾನಾ, ಹ್ಯಾ ಸಂಘರ್ಶಾಂನಿ ಗಳ್ಚ್ಯಾ ಎಕೆಕಾ ಥೆಂಬೆ ದುಕಾಂ ಸಯ್ತ್ ಕವಿತೆಚ್ಯೊ ಝರಿ ಕಶ್ಯೊ ಫುಟಂವ್ಕ್ ಸಕ್ತಿತ್ ಮ್ಹಳ್ಳೆಂ ಸಮ್ಜುಂಕ್ ಹಿ ಕವಿತಾ ಜರೂರ್ ವಾಸ್ಚಿ. ಹಾಂತುಂ ಎಕೇಕ್ ಸಬ್ಧ್ ಆಟೊಮ್ ಬಾಂಬಾಪರಿಂ ಅಪುಟ್ ಸತಾಚಿ ಕುರುಃ ದಿತಾನಾ ಉತ್ರಾಂ ಉತ್ರಾಂನಿ ಇಮಾಜಿ ಎಕೇಕ್ ಕಾಣಿ ಸಾಂಗುನ್ ವೆತಾತ್.

ಬಾಬ್ ಶಯ್ಲೇಂದ್ರ ಮೆಹ್ತಾ ಹ್ಯಾ ಮುಂಬಯ್ ಆನಿ ಮುಂಬಯ್ಚ್ಯಾ ಎಕೆಕಾ ಕೊನ್ಶ್ಯಾರ್ ಜಿಯೆಲ್ಲೊ ಆನಿ ಪಾರ್ಕಿಲ್ಲೊ ಜಾಗೊ ಕವಿ. ಧಾರಾವಿ ಜೋಪಡ್‌ಪಟ್ಟೆಂತ್ ವಸ್ತಿ ಕರ್ತೆಲ್ಯಾ ಗರೀಬ್ ಲೊಕಾಂ ಪಾಸತ್ ಖೂಪ್ ವಾವ್ರ್ ಕರುನ್ ಆಯ್ಲಾ. ಮುಂಬಯ್ ತಸಲ್ಯಾ ಮ್ಹಾ-ಶೆರಾಂತ್ ಮನೀಸ್ ಮ್ಹಳ್ಳ್ಯಾ ಜಿವಿಂಕ್ ಕಶೆಂ ಕಿಡೆ ಕರುನ್ ಅಪ್ಲ್ಯಾಚ್ ಫಾಯ್ದ್ಯಾಕ್ ಘಾಸ್ತಾತ್ ಆನಿ ಪುಸ್ತಾತ್ ಮ್ಹಳ್ಳೆಂ ಲಾಗ್ಸಿಲ್ಯಾನ್ ಪಳೆವ್ನ್, ಪಾರ್ಕುನ್ ಆಯಿಲ್ಲೊ ಸಂವೇದನ್‌ಶೀಳ್ ಕವಿ. ಆನಿ ಹೆಂ ಮನ್ಶಾಕ್ ಕಿಡೆ ಕರ್ಚೊಯ್ ಮನಿಸ್‌ಚ್ ಮ್ಹಳ್ಳೆಂ ಪರತ್ ಸಾಂಗ್ಚಿ ಗರ್ಜ್ ನಾ. ಬಾಕಿಚೆಂ ಸರ್ವ್ ಕವಿತಾಚ್ ಸಾಂಗುನ್ ವೆತಾ. ಕವಿತೆಚಿ ಎಕೇಕ್ ವಳ್ ಕವಿತಾರಸಿಕಾಂಚ್ಯಾ ಆಂಗಾಚಿ ಲೋಂವ್ ಉಭಿ ಕರ್ತಾ. ಆನಿ ಹೊ ಅನ್ಭವ್ ಕರುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಕೊಲಾಜ್ ಎಕಾ ಮ್ಹಾನಗರಾಚೆಂ (- ಶಯ್ಲೇಂದ್ರ ಮೆಹ್ತಾ)

ಕೊಲಾಜ್ ಎಕಾ ಮ್ಹಾನಗರಾಚೆಂ

ಹ್ಯಾ ಮ್ಹಾನಗರಾಂತಲೆ ರಸ್ತೆ

ಭರುನ್ ವ್ಹಾಂವ್ತನಾ ದಿಸ್ರಾತ್

ವಾಹ್ನಾಂಚ್ಯಾ ಲೊಟಾಂತ್

ನಾಗ್ಡ್ಯಾಉಘ್ಡ್ಯಾ ಪೊರಾಂಚ್ಯಾ

ಕುಡೀವ್ಯ್ಲ್ಯಾ ಚಿಖ್ಲಾಚೆ ಥರ್

ವಾಡತ್ ವತಾತ್

ಗಟಾರಾಂತ್ಲ್ಯಾ ಮಾನ್ಸೂನ್ ತಳ್ಯಾಂನಿ

ಜಾತಾಯ್ ವರ್ಸಾನವ್ರ್ಸ್ ವಿಸ್ರ್ಜನ್

ಬ್ಯಾಕ್ಟೆರಿಯಾಂಚಿ ಅದ್ಲಾಬದಲ್ ಕರೀತ್

ಮೊರ್ಯಾ ಮೊರ್ಯಾಚ್ಯಾ ಸುರ್ತಾಲಾರ್

ಭೂಕೆಚೆ ಇಂಡೆಕ್ಸ್ ಛಾಪಿಲ್ಯಾ

ಖಬ್ರೆಪತ್ರಾಂಚಿಂ ಸುಟಾವಿಂ ಪಾನಾಂ

ದುಸ್ರೆವಟೆನ್ ಆಶಿಲ್ಲ್ಯಾ

ನವ್ಯಾ ಪ್ರೆಷಿತಾಚೊ ಫೊಟೊ ಲಿಪೊವ್ನ್

ಗುಠ್ಲಾಯತಾತ್ ಬಾಳ್ಕಾಂಚೆ,

ಪೊಸ್ಕ್ಯಾ ಸುಣ್ಯಾಂಚೆ ‘ಪ್ರಸಾದ್’

ವತಾತ್ ವ್ಹಾವನ್ ವಾದ್ರ್ಯೊ ಜಾಲ್ಯಾ

ಕಾಗ್ದಿ ವಾಫೊರಾಂಚ್ಯಾ ಝೆತಾನ್

ರದ್ದಿ ಕರುನ್ ಭೌಶೀಕ್ ಯಾದೀಂಚಿ

ಚೌಕಾಚೌಕಾಂನಿ ಹೊರ್ಡಿಂಗಾಂಚೆ

ಪಾನಾಂವಿರಯತ್ ಝಾಂಡಾಂಚೆ ಸಾಂಗಾಡೆ

ರಾತೀಚ್ಯಾ ಕಾಳ್ಖಾಂತ್ ಲೆಗೀತ್

ವಿಂಗ್ಡವಿಂಗಡ್ ರುಪ್ಡ್ಯಾಂತಲ್ಯಾ ರಾಖ್ಣದಾರಾಂಚೆರ್

ಊಜ್ವಾಡಾಚಿಂ ಫುಲಾಂ ಫಾಫ್ಡಿತ್

ಊಬೆ ಮಖ್ಖ್ , ಸ್ಥಿತ್ಪ್ರಜ್ಞ್

ಎಕೂಚ್ ಘೊಶ್ಣಾ ರಂಗಯ್ಲ್ಲೆ

‘ಅಪ್ನಾ ಕಾಮ್ ಬನ್ತಾ

ಭಾಡ್ ಮೆಂ ಗಯಿ ಜನ್ತಾ’

ಪ್ರದುಶೀತ್ ಹವೆಚಿ ಕಾಗಾಳ್ ಕರೀತ್

ಎಅರ್ ಕಂಡಿಶ್ನ್ಡ್ ಗಾಡ್ಯಾಂನಿ

ಪೆಟ್ರೊಲಾಚೊ ಫೊಗ್ ಪೆಟಯ್ತ್

ಸಂಸ್ಕೃತಾಯೆಚೆ ಬೊನ್ಸಾಯ್

ಭೊಂವ್ತಾತ್ ಹುಮ್ರೆ ಝರಯ್ತ್

ಹಾರ್ಶೆಮಹಾಲಾಂಚೆ

ಚಂದ್ರಿಮಾವಯ್ಲ್ಯಾ ಭವಿಶ್ಯಾಂತ್ಲ್ಯಾ

ಕೊಲ್ನೀಂಚೆ ಡಿಝಾಯ್ನ್

ತಯಾರ್ ಕರ್ಪಾಚ್ಯಾ ಹಾವೆಸಾನ್

ಊಕ್ತಿಂ ವ್ಹಾಂವ್ತಿಂ ಚವ್ನಾಂ ವಾಡತ್ ರಾವ್ತಾತ್

ಅಸ್ಮಾನ್ ಉದ್ರಗತೀಚ್ಯಾ ನೆಮಾಪ್ರಮಾಣ್

ಜಾಯ್ನಾ ಸಂಸ್ರ್ಗಬಾದಾ ತಾಂಚಿ

ಸನ್ ಸ್ಕ್ರೀನ್ ಕ್ರಿಮ್ ಲೆಪ್ಡಾಯ್ಲ್ಲ್ಯಾ

ದಿಸ್ಭರ್ ಶೊ ಕೆಸೀಂತ್ ಝೆಮತ್ಲ್ಯಾ

ಆನಿ ರಾತೀಕಡೆಂ

ಸೆಕ್ಸ್ ಟೊಯ್ ಜಾಲ್ಲ್ಯಾ ಬಾವ್ಲ್ಯಾಂಕ್

ಕೊರ್ದ್ ಸೊಂಪ್ಸರ್ ನಾಚ್ತನಾ

ಬಡ್ಬಡತ್ ರಾವ್ತಾತ್ ತ್ಯೊ ಎಕೂಚ್ ಮಂತ್ರ್

‘ಜಿತ್ನಿ ಚಾಬಿ ಭರಿ ರಾಮ್ ನೆ

ಊತ್ನಾ ಚಲೆ ಖಿಲೊನಾ’

ಜಂಯ್ ಪಾವ್ನಾ

ರಸ್ತ್ಯಾಂವಯ್ಲ್ಯಾ ಲಾಯ್ಟೀಂಚೊ ಉಜ್ವಾಡ್

ಆನಿ ಮಹಾನಗರಪಾಲಿಕೆಚ್ಯೊ ಕೊಯ್ರಾಚ್ಯೊ ಗಾಡ್ಯೊ

ಅಶಾ ಕಾಳ್ಖ್ಯಾ ಘಾಣೀಚ್ಯಾ ಸಾಮ್ರಾಜ್ಯಾಂತ್

ದರ್ ದಿಸಾ ಜಾತಾತ್ ಬಸ್ಕಾ, ಸಭಾ ಆನಿ ಚರ್ಚಾಸ್ತ್ರಾಂ

ಪಳಯ್ತ್ ಹಾತಾಂತ್ಲ್ಯಾ ಮೊಬಾಯ್ಲಾಂಚೆರ್ ಪೊರ್ನ್ ಚಿತ್ರಫೀತಾಂ

ಧವೆ ಪಾವ್ಡರೀಚ್ಯಾ ಆದಾರಾನ್

ದಾಮೂನ್ ದವ್ರಪ್ ಸೊಪೆಂ ಕಾಯ್ ಕಠೀಣ್

ಆಪ್ಲ್ಯೊ ಬಂಡ್ಖೊರ್ ವಾಸ್ನಾ

ಹಾಚೆರ್ ಮಾತ್ ಜಾಯ್ನಾ ಕಶೆಂಚ್ ಎಕ್ಮತ್

ತ್ಯಾಚ್ ಗುಣ್ಸೂತ್ರಾಂಚ್ಯೊ ತುಟತ್ ವಚ್ಪಿ ಸರಪ್ಳ್ಯೊ

'ಯೆಡಾ ಬನ್ಕೆ ಪೆಡಾ ಖಾಊಂಗಾ' ಚಿಂ ಸಪ್ನಾಂ ಪಳಯ್ತ್

ತಡ್ಫಡೂನ್ ಪಾವ್ತಾತ್

ಶಾರಾಚ್ಯಾ ಶೀಮೆವ್ಯ್ಲ್ಯಾ ಮಸ್ಣಭುಂಯೆರ್

ಮಡ್ಯಾ ಗಾಡ್ಯಾಂನಿ ನಿಮಾಣಿ ಭೊಂವಂಡಿ ಮಾರೂನ್

ಲೊಕ್ಸಂಖ್ಯಾ ನಿಯಂತ್ರಣಾಚ್ಯಾ ನಾಂವಾನ್

ವಜಾ ಜಾಯ್ತ್ ವತಾತ್ ವೆವ್ಸ್ಥೆಂತಲೆ ಕುಸ್ಕೆ ಬಟಾಟೆ

ಬೆರ್ಜೆಚ್ಯಾ ರಾಜ್ಕಾರಣಾಕ್ ಚಡ್ಟಾ ನವೊ ರಂಗ್

ನವಿಂ ಭಜ್ನಾಂ ಗಾಯ್ತ್ ಉಪಾಶಿ ಗರ್ದಿ ಧುಂದ್

ಘುಡ್ಯಾನಿ ಆನಿ ಬನೆರಾಂನಿ ಸಜಯ್ಲ್ಲ್ಯಾ

ಕೊನ್ಶ್ಯಾ - ಕೊನ್ಶ್ಯಾ ವಯ್ಲ್ಯಾ ಘುಮ್ಟ್ಯಾನಿ

ಕಿರವ್ಟೀಕ್ ಲಾವ್ನ್ ಫಂಡ್ ಪೆಟ್ಯಾಂಚ್ಯೊ ಚಾವ್ಯೊ

ಘುಟ್ಮಳಟಾ ಕಾವ್ಳ್ಯಾನದರೆಚಿ ಫೌಜ್ ಪೊರ್ನಿ

ಹಾಂಸ್ಪಾಚೊ ಗಡ್ಗಡ್ ಸೊಂಪ್ತಾಂ ಸೊಂಪ್ತಾಂ

ಧುಂವ್ರಾಚ್ಯಾ ಕುಪಾಫಾಟಲೊ

ಮುಖಾಮಳ್ ಶೆಣಿಲ್ಲೊ

ಸಂವ್ಕಳೀಚೊ ಪ್ರೆಶಿತ್

ಚಿಲೀಮ್ ಫುಕ್ತಾಂ ಫುಕ್ತಾಂ ಸುಸ್ಕಾರತಾ,

'ಅರೆ ಭಾಯ್, ಚುತಿಯೊಂಕಿ ಬಸ್ತಿ ಮೆಂ

ಗಾಂಡು ಸರ್ದಾರ್ ಹೈ!"

- ಶಯ್ಲೇಂದ್ರ ಮೆಹ್ತಾ. [ಎಪ್ರಿಲ್, 2020]

ಶಯ್ಲೇಂದ್ರ ಮೆಹ್ತಾ: ಪೊಲಿಟಿಕಲ್ ಸಾಯನ್ಸಾಚೊ ಅಧ್ಯಾಪಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಅಂಕಣ್‌ಕಾರ್, ಕವಿ, ಸಮೀಕ್ಷಕ್, ತರ್ಜ‌ಕಾರ್ ತಶೆಂಚ್ ಕೊಂಕಣಿ ವಾವ್ರಾಡಿ. ಗೊಂಯ್ ಮುಳಾಚೊ ಸದ್ದ್ಯಾಕ್ ಮುಂಬಂಯ್ತ್ ವಾವ್ರ್ ಕರುನ್ ಆಸಾ. ಚಾಳಿಸ್ ವರಸಾಂ ಥಾವ್ನ್ ಮರಾಠಿ, ಕೊಂಕಣಿಂತ್ ಬರಯ್ತಾ. ’ಸಿಸಿಫಸ್ ತೆಂಗ್‌ಶೆರ್’ ತಾಚ್ಯಾ ಕೊಂಕಣಿ ಕವಿತೆಂಚೊ ಜಮೊ.