ಆಮಿ ಶಿಕೀಲ್ಲಿಂ (- ಉರ್ಜಿತಾ ಭೊಬೆ)

[ಕವಿತಾ]  ಆಮಿ ಶಿಕೀಲ್ಲಿಂ (- ಉರ್ಜಿತಾ ಭೊಬೆ)

ಎಕಾ ಸಮಾಜೆಂತ್ ಜಿಯೆಂವ್ಚೊ ಲೋಕ್ ಏಕ್ ಸಾರ್ಕೊ ಚಿಂತಿನಾ, ಎಕಾ ಕುಟ್ಮಾಂತ್ ಜಲ್ಮಲ್ಲೊ ಸಯ್ತ್ ಎಕಾ ಚಿಂತ್ಪಾಚೊ ಏಕ್ ಸಾರ್ಕೆಂ ಚಿಂತಿನಾ. ಮನ್ಶಾಚೆಂ ಚಿಂತಪ್, ತಾಣೆಂ ಜೊಡ್‌ಲ್ಲ್ಯಾ ಸಿಕ್ಪಾಚೆರ್, ಜಿಣ್ಯೆ ಅನ್ಭೋಗಾಂತ್ ತಶೆಂಚ್ ತಾಚ್ಯಾ ಸಳಾವಳೆರ್ ಆಸ್ಚ್ಯಾಂನಿ ಘಲ್ಲ್ಯಾ ಪರಿಣಾಮಾಚೆರ್ ಹೊಂದ್ವುನ್ ಆಸ್ತಾ. ಚಡ್ತಾವ್ ಮನಿಸ್ ಹೆಂ ಶಿಕಪ್ ಜೋಡ್ತಾ ಇಸ್ಕೊಲಾಂನಿ, ತಶೆಂಚ್ ಆಪ್ಲ್ಯಾಚ್ ಘರಾಂತ್. ಆಮ್ಚೊ ದೇಸ್ ಕಿತ್ಲೊಯ್ ಮುಕಾರ್ ಪಾವ್ಲಾ ಮ್ಹಣುನ್ ಕೊಣ್‌ಯೀ ದಾಂಗ್ರೊ ಮಾರುಂದಿ ಪುಣ್ ಅಜೂನ್ ಆಮಿ ಥಂಯ್ಚ್‌ಚ್ ಆಸಾಂವ್ ಮ್ಹಳ್ಳೆಂ ಅಢೂಕ್ ಸತ್. ದೆಕುನ್‌ಚ್ ಆಜ್ ಸಯ್ತ್ ದೊತಿಕ್ ಲಾಗುನ್ ಚೆಡ್ವಾಂಕ್ ಹುಲ್ಪಾಯ್ತಾತ್, ಚಲಿಯಾಂಚೆರ್ ಅನೀತ್ ಅನ್ನ್ಯಾಯ್ ಅಜೂನ್ ಚಲುನ್ ಆಸಾ.

ಆಯ್ಕುಂಕ್ ಕೊಡು ಲಾಗತ್ ಪುಣ್ ಹಕೀಗತೆಂತ್ ಆಯ್ಚ್ಯಾ ಸಂಸಾರಾಂತ್ ಆಮಿ ಇತ್ಲೆ ಮಾರೆಕಾರ್ ದೀಸ್ ಪಳೆತಾಂವ್ ತರ್ ಹಾಚೆಂ ಮೂಳ್ ಕಾರಣ್ ಶಿಕ್ಪಿ ಅನಿ ’ಆಮಿ ಶಿಕಿಲ್ಲಿಂ’ ವರ್ಗಾಥಾವ್ನ್. ಆಜ್ ಆಮ್ಚ್ಯಾ ಸಮಾಜೆಂತ್ ಇತ್ಲೆಂಯ್ ವೀಕ್ ಭರ್ಲಾಂ ತರ್ ಆಮಿ ತಾಂತುಂ ಸಮಾಸಮ್ ವಾಂಟೆಲಿ ಜಾವ್ನಾಸಾಂವ್ ಮ್ಹಳ್ಳೆಂ ಆಯ್ಕುಂಕ್ ವ ಪಾತ್ಯೆಂವ್ಕ್ ಆಮ್ಕಾಂ ತ್ರಾಸ್ ಜಾತಿತ್. ಪುಣ್ ವೆವೆಗ್ಳ್ಯಾ ವಿಕಾಕ್ (ಜಾಂವ್ ಧಾರ್ಮಿಕ್, ಜಾಂವ್ ರಾಜಕೀಯ್, ಜಾಂವ್ ಸಮಾಜಿಕ್ ವಾ ಹೆರ್ ರಿತಿಚೆಂ) ವಾಂಟ್ಚಾಂತ್ ಆಮಿ ಪಾಟಿಂ ಉರುಂಕ್ ನಾಂವ್. ಆನಿ ದೊಳ್ಯಾಂಕ್ ದೊಳೊ ತತ್ವ್ ಆಯ್ಚ್ಯಾ ಸಮಾಜೆಚೆಂ ರೂಪ್ ಮಾರೆಕಾರ್ ಜಾವ್ನ್ ಬದ್ಲುನ್ ಆಸ್ತಾನಾ ಕಾಯ್ದೆ ಕಾನುನ್ ಏಕ್ ತಮಾಸೊ ಕಸೊ ಜಾಲಾ. ಬಾಯ್ ಉರ್ಜಿತಾ ಭೊಬೆ ನಾಮ್ಣೆಚಿ ಕೊಂಕಣಿ ಕವಿ ಗೊಂಯಾಂತ್ ವಸ್ತಿ ಕರುನ್ ಆಸ್ಚಿ. ಪಯ್ಣಾರಿ-ವೀಜ್ ರಾಶ್ಟ್ರೀಯ್ ಮಟ್ಟಾಚ್ಯಾ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಆಪ್ಣಾಯಿಲ್ಲಿ ಕವಿ. ಹಾಂಗಾಸರ್ ತಿಚ್ಯಾ ಕವಿತೆಚ್ಯಾ ಸೊಂಪ್ಯಾ ಉತ್ರಾಂ ಪಾಟ್ಲ್ಯಾನ್ ತಿಣೆಂ ಸೊಡಯಿಲ್ಲಿಂ ಪಿಂತುರಾಂ ಪಳೆಂವ್ಕ್ ಆನಿ ಫಾರ್ಕುಂಕ್ ತುಕಾ ಉಲೊ ದಿತಾಂ

[ಕವಿತಾ] ಆಮಿ ಶಿಕೀಲ್ಲಿಂ (- ಉರ್ಜಿತಾ ಭೊಬೆ)

ಆಮಿ ಶಿಕೀಲ್ಲಿಂ

ಚಲೊ ಜಾಂವ್ ಚಲಿ

ಆಮ್ಗೆರ್ ಎಕ್ ಸಮಾನ್

ತೆಚ್ ನೆಮಾನ್ ತೆಚ್ ಪ್ರೆಮಾನ್ ಪೊಶಿಲ್ಲಿಂ

ಆಮಿ ಶಿಕೀಲ್ಲಿಂ

ದೊಗಾಂಯ್ಕಯ್ ಸಾರ್ಕೀಂಚ್ ಲೆಖ್ತಾತ್

ಗೂಣ್ ತಾಂಚೆ ಸಾರ್ಕೆಚ್ ದೆಖ್ತಾತ್

ಕಸ್ಲೊಚ್ ಭೆದ್ ಭಾವ್ ನಾಶಿಲ್ಲಿಂ

ಆಮಿ ಶಿಕೀಲ್ಲಿಂ

ಎಕಾಚ್ ಶಾಳೆಂತ್ ಶಿಕಯ್ತಾತ್

ಎಕಾಚ್ ಬಾಂಕಾರ್ ಬಸಯ್ತಾತ್

ದಿನಚ್ರ್ಯಾ ಸಮಾನ್ ಆಖಿಲ್ಲಿ

ಆಮಿ ಶಿಕೀಲ್ಲಿಂ

ಪೂಣ್......

ಪೂಣ್ ಚಲಿ ಆಸ್ತಾ ನಾಜೂಕ್

ಆಪೂರಬಾಯೆಚಿ ಜಶಿ ಬಾವ್ಲಿ

ಪರ್ಕ್ಯಾ ದಾದ್ಲ್ಯಾ ಸಾವ್ಳಿ ನಾಕಾ ಆಶಿಲ್ಲಿ

ಆಮಿ ಶಿಕೀಲ್ಲಿಂ

ಚಲ್ಯಾಂಕ್ ಬರಿ ಶಿಕವ್ಣ್ ದಿವ್ಚಿ

ತಾಂಚೆರ್ ಘಾಲ್ಚೊ ಸಂಸ್ಕಾರಾಂಚೊ ಶೀಂವ್ರ್

ಚಲ್ಯಾಂಕ್ ತಾಜಿ ಗರಜ್ ನಾಶಿಲ್ಲಿ

ಆಮಿ ಶಿಕೀಲ್ಲಿಂ

ಪಾಂಯ್ ವಯ್ರ್ ಕರೂನ್ ಬಸ್ಚೆಂ ನ್ಹಿಂ

ಆವಾಜ್ ಕೆನ್ನಾಚ್ ವಾಡ್ಚೊ ನ್ಹಿಂ

ಚಲಿ ಆಸ್ಚಿ, ತೊಂಡಾರ್ ಹಾತ್ ಧರೂನ್ ಹಾಂಶಿಲ್ಲಿ

ಆಮಿ ಶಿಕೀಲ್ಲಿಂ

ಚಲ್ಯೆನ್ ಸಾತಾಂಕ್ ಘರಾ ಯೆವ್ಪ್

ಕಾಳ್ಖಾಂತ್ ಸದಾಂ ಘರಾಚ್ ರಾವ್ಪ್

ಚಲಿ ಆಸ್ಚಿ, ರಾತಿ ಹೆಡ್ ನಾಶಿಲ್ಲಿ

ಆಮಿ ಶಿಕೀಲ್ಲಿಂ

ಮೊಟ್ವಿ ಸಾಯ್, ಖೊಲ್ ಗಳೊ

"ಬರ್ಯಾ" ಚಲ್ಯಾಂಚಿ ನ್ಹಿಂ ಲಕ್ಷಣಾಂ

ಚಲಿ ಜಾಯ್, ಹಡ್ಡ್ಯಾರ್ ಗಚ್ಚ್ ಪದರ್ ಆಶಿಲ್ಲಿ

ಆಮಿ ಶಿಕೀಲ್ಲಿಂ

ಚರಿತ್ರ್ ತಾಂಜೆಂ ಆಸಾ ನ್ಹೆಸ್ಣಾಂತ್

ಶಿಳೊಣಿ ಘಾಲ್ಪಿ ಚಲೆ ಆಸುಂ

ತೀಚ್ ಶಿಂದಳ್, ತೀಚ್ ಲಜ್ ನಾಶಿಲ್ಲಿ

ಆಮಿ ಶಿಕೀಲ್ಲಿಂ

ಆಂಕ್ವಾರಪಣ್ ತೀಜೆ ಚರಿತ್ರಾಚೊ ಮಾನ್

ಲಗ್ನಾಕಡೆಂ ದಿವ್ಚೆಂ ಪಡ್ಟಾ ಪ್ರಮಾಣ್

ತೆಂ ಶೆಣ್ಲ್ಯಾರ್, ತಿ ನೀತ್ ನಾಶಿಲ್ಲಿ

ಆಮಿ ಶಿಕೀಲ್ಲಿಂ

ದೊಗಾಂಯ್ ಜರಿ ವತಾತ್ ಕಾಮಾರ್

ತೀಜೆರಚ್ ಆಸ್ಚೊ ಘರಾಚೊ ಭಾರ್

ರಾಂದುಂಕ್, ವಾಡುಂಕ್ ಜಾಣಾ ಆಶಿಲ್ಲಿಂ

ಆಮಿ ಶಿಕೀಲ್ಲಿಂ

ಎಕಾಚ್ ನೊಕ್ರೆರ್ ಚಲೊ ಆನಿ ಚಲಿ

"ಸಮಾನತಾಯ್" ಸ್ಪಶ್ಟ್ ಸಮಾಜಾಂತಲಿ

ತಾಜೊ ಪಗಾರ್ ಇಲ್ಲೊ ಚಡ್ ಆಶಿಲ್ಲಿ

ಆಮಿ ಶಿಕೀಲ್ಲಿಂ

ವಾಗ್ಣುಕೆಕ್ ಹ್ಯಾ ಇಲ್ಲೊಯ್ ನಾ ಸುಮಾರ್

ಸಮಾನತಾಯೆ ನಾವಾರ್ ಅತ್ಯಾಚಾರ್

ಚಲತ್ ಆಯ್ಲಾ ಅಪ್ರಂಪಾರ್

ಆತಾಂ ಘಡಯ್ತಲಿಂ ಜೀಣ್

ಆಮ್ಕಾಂ ಜಾಯ್ ಆಶಿಲ್ಲಿ

ಆಮಿ ಶಿಕೀಲ್ಲಿ

- ಉರ್ಜಿತಾ ಭೊಬೆ. [ದಸೆಂಬ್ರ್, 2019]