ಆಂಬೊ ನ್ಹಯ್ ಕುಂಬೊ (- ಪ್ರೇಮ್ ಮೋರಸ್)

[ಕವಿತಾ] ಆಂಬೊ ನ್ಹಯ್ ಕುಂಬೊ (- ಪ್ರೇಮ್ ಮೋರಸ್)

ಪಯ್ಸಿಲ್ಯಾ ರುಕಾರ್ ಕಿತೆಂಯ್ ಪಿಕುಂದಿ ತೊ ಆಂಬೊ ಕಸೊ ದಿಸ್ತಾ. ಜಾಂವ್ ತೊ ಕಾಟ್ ಫಳ್ ಆಸುಯೆತಾ. ಪುಣ್ ಬಗ್ಲೆಚ್ಯಾ ಆಂಬ್ಯಾರುಕಾಚೆರ್ ಜಾಲ್ಲ್ಯಾ ಆಂಬ್ಯಾಚಿ ವಳೊಕ್ ಸಯ್ತ್ ನಾತ್‌ಲ್ಲೆ ವಿಧ್ವಾನ್ ಆಮ್ಚೆ ಸಮಾಜೆಂತ್ ದಿಸ್ತಾನಾ ಕಿತೆಂ ಸಾಂಗಾಜಯ್? ವಿಪರ‍್ಯಾಸ್ ಮ್ಹಳ್ಯಾರ್ ’ಗೂ’ ನ್ಹಯ್ ತೊ, ’ಭೊಟ್ ಮಾಮ್ ಹಾಗ್‌ಲ್ಲೊ’ ಮ್ಹಳ್ಳೆ ಚಿಂತ್ಪಾಚ್ಯಾ ಸಮಾಜೆನ್ ಸಯ್ತ್ ಗಾಣಾಂ ಗಾಂವ್ಚಿಂ ಹಾಂಚಿಂಚ್ ಮ್ಹಣ್ತಾನಾ ಖರೆಂಚ್ ಆಂಬೊ ಜಾಂವ್ಚ್ಯಾಕೀ ಕುಂಬೊ ಜಾಲ್ಲೆಂಚ್ ಬರೆಂ ವಾ ಭೆರೆಂ?

[ಕವಿತಾ] ಆಂಬೊ ನ್ಹಯ್ ಕುಂಬೊ (- ಪ್ರೇಮ್ ಮೋರಸ್)

ಆಂಬೊ ನ್ಹಯ್ ಕುಂಬೊ

ಪೊಲ್ತೊಡಿಚ್ಯಾ ರುಕಾಮುಳಾಂತ್

ಭಾಂಗ್ರಾಳೊ ಆಂಬೊ ಝಡ್ತಾನಾ

ಸೊಭಿತ್ ರುಪ್ಣ್ಯಾಕ್ ಮನ್ ಭುಲ್ಲೆಂ

ಕಾಳಿಜ್ ಮ್ಹಜೆಂ ತಾಚೆರ್ ಪಿಕ್ಲೆಂ

ಆಲ್ತೊಡಿಚೊ ದೊರೊ ಉಡೊನ್

ಪೊಲ್ತೊಡಿಚೆರ್ ಪಾಂಯ್ ತೆಂಕ್ತಾನಾ

ಪಾಂಯಾಂಕ್ ಆಯ್ಲಿ ಕಾಂಪ್

ಶಿರ್ಶಿರ್‍ಯಾಂನಿ ಪಾಟ್ಲೊ ಉಗ್ಡಾಸ್ ಚರ್‍ತಾನಾ

ತೆಂಚ್ ರೂಪ್ ತಿಚ್ ಕಾಪ್

ಜಿಬ್ಯೆಕ್ ರೂಚ್ ಲಾಯ್ತಾನಾ

ಆಂಬ್ಯಾ ತಸ್ಲಿ ಸೊಭಾಯ್

ಕುಂಬ್ಯಾಚ್ಯಾ ಕೊಡ್ಸಾಣೆಚಿ ಖರಾಯ್

ರುಕಾ ಮಧ್ಲೊ ರೂಕ್

ಪಾಚ್ವ್ಯಾ ರಂಗಾನ್ ಫುಲ್ಲಾ

ಪೊಲ್ತೊಡಿಚ್ಯಾ ಮಾತ್ಯೆಂತ್

ಭಾಂಗ್ರಾಳೊ ಕುಂಬೊ ಪಡ್ಲಾ

ಪೊಲ್ತೊಡಿಚ್ಯಾ ಕುಂಬ್ಯಾಕ್ ಪಳವ್ನ್

ಆಲ್ತೊಡಿಚ್ಯಾ ಆಂಬ್ಯಾಕ್ ಸಾಂಡ್ಲೆಂ

ಭಾಂಗ್ರ್ಯಾ ಸಾರ್ಕ್ಯಾ ಕುಂಬ್ಯಾಕ್ ಭುಲೊನ್

ಆಂಬ್ಯಾ ತುಕಾ ಗಾಂವಾಂತ್ ಸೊಡ್ಲೆಂ

- ಪ್ರೇಮ್ ಮೋರಸ್. [ಅಗೋಸ್ತ್, 2020]