आंबो न्हय कुंबो (- प्रेम मोरास)

[कविता] आंबो न्हय कुंबो (- प्रेम मोरास)

पयसिल्या रुकार कितेंय पिकुंदी तो आंबो कसो दिसता. जांव तो काट फळ आसुयेता. पूण बगलेच्या आंब्यारुकाचेर जाल्ल्या आंब्याची वळोक सयत नात‌ल्ले विध्वान आमचे समाजेंत दिसताना कितें सांगाजय? विपर‍्यास म्हळ्यार ’गू’ न्हय तो, ’भोट माम हाग‌ल्लो’ म्हळ्ळे चिंत्पाच्या समाजेन सयत गाणां गांवचीं हांचिंच म्हणताना खरेंच आंबो जांवच्याकी कुंबो जाल्लेंच बरें वा भेरें?

[कविता] आंबो न्हय कुंबो (- प्रेम मोरास)

आंबो न्हय कुंबो

पोल्तोडिच्या रुकामुळ्यांत

भांग्राळो आंबो झडताना

सोभीत रुपण्याक मन भुल्लें

काळीज म्हजें ताचेर पिकलें

आल्तोडिचो दोरो उडोन

पोल्तोडिचेर पांय तेंक्ताना

पांयांक आयली कांप

शिर्शीर‍यांनी पाटलो उगडास चर‍ताना

तेंच रूप तीच काप

जिब्येक रूच लायताना

आंब्या तसली सोभाय

कुंब्याच्या कोडसाणेची खराय

रुका मधलो रूक

पाचव्या रंगान फुल्ला

पोल्तोडिच्या मात्येंत

भांग्राळो कुंबो पडला

पोल्तोडिच्या कुंब्याक पळवन

आल्तोडिच्या आंब्याक सांडलें

भांगऱ्या सार्क्या कुंब्याक भुलोन

आंब्या तुका गांवांत सोडलें

-  प्रेम मोरास. [अगोसत, २०२०]