ಕವಿತಾ [ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧ್ಯಾಂತ್ ದುಸ್ರೆಂ ಇನಾಮ್ ಲಾಭ್‌ಲ್ಲಿ ಕವಿತಾ]

ಕವಿತಾ [ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧ್ಯಾಂತ್ ದುಸ್ರೆಂ ಇನಾಮ್ ಲಾಭ್‌ಲ್ಲಿ ಕವಿತಾ]

ಮನ್ಶಾಚೆಂ ಜಿವಿತ್‌ಚ್ ಹೆಂ; ಆಸ್ಚ್ಯಾಕ್ ಮಾನ್ ದೀಂವ್ಕ್ ಕಳಿತ್ ನಾ ದೆಕುನ್ ನಾಸ್ಚ್ಯಾಕ್ ಚಿಂತುನ್ ಕರ್ಗೊಂಚೆಂ. ವೆಳಾಚಿಂ ರೊದಾಂ ಜಶೆಂ ದರ್ಯಾಚಿಂ ಲ್ಹಾರಾಂ ಕೊಣಾಕ್‌ಚ್ ರಾಕುನ್ ಬಸಾನಾಂತ್ ಬಗರ್ ಮುಕಾರ್ ವೆತಾತ್. ಆನಿ ಮನಿಸ್ ಸಯ್ತ್ ವೆಳಾಕಾಳಾಚ್ಯಾ ಧೀಸ್ ಮುಕಾರ್ ಗೆಲ್ಲೆಪರಿಂಚ್ ತಾಣೆಂ ಸಾಂಡುನ್ ಆಯಿಲ್ಲೆಂ ಭುರ್ಗ್ಯಾಪಣ್, ಭಾಂದ್, ತಶೆಂಚ್ ವೆವೆಗ್ಳೆ ಯಾದಿ ಸರ್ವ್ ಉಡಾಸಾಕ್ ಹಾಡ್ಚೆಂ ವಾಜ್ಬಿಚ್. ಹೆಂಚ್ ಚಿಂತಪ್ ಹ್ಯಾ ಕವಿತೆಚೆಂ ಪಾಠ್‌ಥಳ್.

ಬಾಯ್ ಉರ್ಜಿತಾ ಭೊಬೆ ಗೊಂಯ್ಚಿ ಕವಿ, ತಿಚ್ಯಾ ಕವಿತೆಂನಿ ಯೆದೊಳ್‌ಚ್ ಗೊಂಯ್ಚ್ಯೊ ಮೆರೊ ಉತ್ರೊನ್ ಹೆರ್ ಪ್ರಾಂತ್ಯಾಕ್ ಪಾವೊನ್ ಜಾಲಾಂ. 2018 ಇಸ್ವೆಂತ್ ಪಯ್ಣಾರಿ ಆನಿ ವೀಜ್ ಹಾಣಿಂ ಮಾಂಡುನ್ ಹಾಡ್‌ಲ್ಲ್ಯಾ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ರಾಶ್ಟ್ರೀಯ್ ದ್ವಿಲಿಪಿ ಕೊಂಕಣಿ ಸಾಹಿತಿಕ್ ಸ್ಪರ್ಧ್ಯಾಂತ್ ದುಸ್ರೆಂ ಇನಾಮ್ ಆಪ್ಣಾಯಿಲ್ಲಿ ಹಿ ಕವಿತಾ ಸಯ್ತ್ ವಾಚುನ್ ಗೆಲ್ಲೆಪರಿಂಚ್ ಎಕಾಥರಾಚೆಂ ಕಾವ್ಯಾಳ್ ಆಮಾಲ್ ಆಸ್ಚೆಂ ಆಮಿ ಪಾರ್ಕುವ್ಯೆತ್. ಆನಿ ಹೆಂ ಪಾರ್ಕುಂಕ್ ಆತಾಂ ತುಕಾಚ್ ಸೊಡ್ತಾಂ.

[ಕವಿತಾ] ಆಯ್ತಾರ್ ಭುರ್ಗ್ಯಾಪಣಾಲೊ [ಉರ್ಜಿತಾ ಭೊಬೆ]

ಆಯ್ತಾರ್ ಭುರ್ಗ್ಯಾಪಣಾಲೊ

ತಿ ಫಾಂತೊಡ್ ಖಂಯ್ ಗೆಲಿ

ಆವ್ಯ್ ಕುಶೀಂತಲಿ

ಖಂಯ್ ಗೆಲೊ ಧಾಕ್

ಬಾಪಾಯ್ಚ್ಯಾ ದೊಳ್ಯಾಂತಲೊ

ತೊ ಸುಸೆಗ್ ಖಂಯ್ ಗೆಲೊ

ಖೀಣಾ ಖೀಣಾಂತಲೊ

ಖಂಯ್ ಗೆಲೊ ತೊ ಆಯ್ತಾರ್

ಮ್ಹಜೆ ಭುರ್ಗೆಪಣಾಂತಲೊ

ಶೆನ್ವಾರ್ಚ್ಯಾನ್ ಲಾಗಿಲ್ಲಿ

ತಿ ಆಸ್ ಫಾಲ್ಯಾಂಚಿ

ತೀಶ್ಟೂನ್ ವಾಟ್ ಪಳೊವ್ಪ್

ಇಶ್ಟಾಂಚ್ಯಾ ಉಲ್ಯಾಂಚಿ

ಆಯ್ತಾರಚೊ ಧುಡ್ಗೂಸ್

ತೀಟ್ಯಾವಯಲೊ ಮೊಡ್ಣಾಂತಲೊ

ಖಂಯ್ ಗೆಲೊ ತೊ ಆಯ್ತಾರ್

ಮ್ಹಜೆ ಭುರ್ಗೆಪಣಾಂತಲೊ

ಖಂಯ್ ಗೆಲೆಂ ರೆಡ್ಯೊವೆಲೆಂ

ಖಳಾರ್ ಆನಿ ಮಳಾರ್

ಟೀವೀವೆಲಿ ರಂಗೊಲಿ

ಮಹಾಭಾರತಾತಲೆ ಅವ್ತಾರ್

ರಾಮ್ ರಾವ್ಣ್ ಖಂಯ್ ಗೆಲೊ

ರಾಮಾಯ್ಣಾತಲೊ

ಖಂಯ್ ಗೆಲೊ ಆಯ್ತಾರ್

ಮ್ಹಜೆ ಭುರ್ಗೆಪಣಾತಲೊ

ಖಂಯ್ ಗೆಲೊ ಡಾವ್

ಗಡ್ಡ್ಯಾಂಚೊ ಘುಲಾಂಚೊ

ಖಂಯ್ ಗೆಲೊ ಖೆಳ್

ಕೊಯ್ಣೆ ಬಾಲಾಂಚೊ

ಲಂಗ್ಡೆಚೊ, ಖಾಂಬ್ಯಾಂಚೊ

ಶೆಣಾ ಆಂಗ್ಣಾಂತಲೊ

ಖಂಯ್ ಗೆಲೊ ಆಯ್ತಾರ್

ಮ್ಹಜೆ ಭುರ್ಗೆಪಣಾಂತಲೊ

ಆಯ್ತಾರಚೊ ಗರ್ಮಗರಮ್

ಚ್ಯಾವೆಚೊ ಚುರ್ಕೊ

ತಾಂಬ್ಡ್ಯಾ ತಾಂದ್ಳಾ ಪೆಜೆಚೊ

ನಿವಾಂತ್ ತೊ ಭುರ್ಕೊ

ಸುವಾದ್ ಖಂಯ್ ಗೆಲೊ

ಕುಳ್ಣ್ಯಾತಲ್ಯಾ ಹುಮ್ಣಾಂತಲೊ

ಖಂಯ್ ಗೆಲೊ ತೊ ಆಯ್ತಾರ್

ಮ್ಹಜೆ ಭುರ್ಗೆಪಣಾತಲೊ

ಪೊರ್ಸಾಂತಲಿ ದೂರ್ವಾ , ಫುಲಾಂ

ಪುಂಜಾವ್ಪಾಚಿ ಸರ್ತ್

ವೆಳೆವೆಲ್ಯಾ ಶಿಂಪ್ಲ್ಯಾಂಚಿ

ಆಮ್ಕಾಂ ಕೊಣ್ ಅರ್ಥ್

ಖಂಯ್ ಗೆಲೊ ಲೀಪಯ್ಲ್ಲೊ ತೊ

ಶಂಖ್ ಮೆಜಾ ಖಣಾಂತಲೊ

ಖಂಯ್ ಗೆಲೊ ತೊ ಆಯ್ತಾರ್

ಮ್ಹಜೆ ಭುರ್ಗೆಪಣಾತಲೊ

ಭಾವಾ ಭಯ್ಣಿಂ ವಾಂಗ್ಡಾ

ಪಾಸಯ್ ವೆಳೆವೆಲಿ

ಖೀಣಾನ್ ಕೆಲಿಂ ಝಗ್ಡಿಂ

ಖೀಣಾನ್ ಎಕ್ಠಾಂಯ್ ಜಾಲಿಂ

ವೆಳೆವೆಲ್ಯಾ ರೆಂವೆಂಚ್ಯಾ ಕಣಾಕಣಾತಲೊ

ಸಾಂಜ್ವೆಳ್ಚ್ಯಾ ಸೊಬೀತ್ ಭಾಂಗ್ರಾ ಕಿರ್ಣಾಂತಲೊ

ಖಂಯ್ ಗೆಲೊ ತೊ ಆಯ್ತಾರ್

ಮ್ಹಜೆ ಭುರ್ಗೆಪಣಾತಲೊ

ಆಯ್ಜುಯ್ ಯೆತಾ ಆಯ್ತಾರ್

ಆಯ್ಜುಯ್ ಮೆಳ್ಟಾ ಫೆರ್ಯಾದ್

ಭುರ್ಗೆಪಣಾತ್ಲ್ಯಾ ಆಯ್ತಾರಾಚಿ

ವಚ್ನಾ ಪುಣೂನ್ ಯಾದ್

ಶೆಣೂನ್ ಗೆಲೊ ಸುವಾದ್

ಕಸೊ ಖೀಣಾ ಖೀಣಾತಲೊ

ಖಂಯ್ ಗೆಲೊ ತೊ ಆಯ್ತಾರ್

ಮ್ಹಜೆ ಭುರ್ಗೆಪಣಾತಲೊ

ಖಂಯ್ ಗೆಲೊ ತೊ ಆಯ್ತಾರ್

ಮ್ಹಜೆ ಭುರ್ಗೆಪಣಾತಲೊ

- ಉರ್ಜಿತಾ ಭೊಬೆ [ಅಗೋಸ್ತ್, 2019]

ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್’ ಪರ್ಗಟ್ ಜಾಲಾ. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ.