ಜಿಣೆ [ಸುನೇತ್ರಾ ಜೋಗ್]

ಜಿಣೆಂ ಮ್ಹಳ್ಯಾರ್ ಸಭಾರಾಂನಿ ಸಭಾರ್ ರಿತಿಚಿಂ ವ್ಯಾಖ್ಯಾನಾಂ ದಿಲ್ಯಾಂತ್. ತಾಂತ್ಲೊ ಏಕ್ ಅರ್ಥ್ ಜಾವ್ನಾಸಾ ಜಲ್ಮಾ ಥಾವ್ನ್ ಮೊರ್ಣಾ ಪರ್ಯಾಂತ್ಲೊ ಅಂತರ್ ಜಾವ್ನಾಸಾ ಜಿವಿತ್. ಆನಿ ಹ್ಯಾ ಆವ್ದೆಂತ್ ಮನ್ಶಾನ್ ಸಾರ್ಚೆ ದೀಸ್, ಭಗ್ಚೆ ತಳ್ಮಳೆ ಆನಿ ಸುಕ್-ದುಕ್, ಬರೆಂ-ವಾಯ್ಟ್ ಸರ್ವ್ ಎಕಾ ಜಿಣ್ಯೆಕ್ ರುತಾಂ ಕರ್ತಾ. ಪುಣ್ ಹ್ಯಾ ಸಂಸಾರಾಂತ್ ಎಕಾ ಬಾಯ್ಲೆಚೆಂ ಜಿಣೆಂ ಕಸಲೆಂ ಆಸ್ತಾ? ಹ್ಯಾ ಸವಾಲಾಚ್ಯಾ ಬುನ್ಯಾದಿಚೆರ್ ಹಿ ಕವಿತಾ ಉಭಿ ಕೆಲ್ಯಾ.

ಬಾಯ್ ಸುನೇತ್ರಾ ಜೋಗ್ ಗೊಂಯ್ಚಿ ನಾಮ್ಣೆಚಿ ಕವಿ, ಲೇಕಕಿ. 2018 ಇಸ್ವೆಂತ್ ಪಯ್ಣಾರಿ ಆನಿ ವೀಜ್ ಹಾಣಿಂ ಮಾಂಡುನ್ ಹಾಡ್‌ಲ್ಲ್ಯಾ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ರಾಶ್ಟ್ರೀಯ್ ದ್ವಿಲಿಪಿ ಕೊಂಕಣೀ ಸಾಹಿತಿಕ್ ಸ್ಪರ್ಧ್ಯಾಂತ್ ಹುಮೆದಿಚೆಂ ಇನಾಮ್ ಆಪ್ಣಾಯಿಲ್ಲಿ ಹಿ ಕವಿತಾ ವಾಚುಂಕ್ ಆನಿ ತಾಚೊ ಸ್ವಾದ್ ಚಾಕುಂಕ್ ತುಕಾ ಆಪೊವ್ಣೆಂ ದಿತಾಂ.

[ಕವಿತಾ] ಜಿಣೆ [ಸುನೇತ್ರಾ ಜೋಗ್]

ಜಿಣೆ

ಬಾಯ್,

ತುಕಾ ಜಲ್ಮೂಚ್ ನ್ಹಯ್ಕಾರೀತ್ ಆಯ್ಲ್ಯಾತ್,

ಆವ್ಯ್ಚ್ಯಾ ಕುಸ್ವ್ಯಾಂತ್ ಆಸ್ತನಾಚ್.

ಆಯ್ಲೆಂಚ್ ಜಲ್ಮಾಕ್ ತಗ್ ಧರೂನ್,

ಜಾಲ್ಯಾರ್...

ಥಾರಾಯ್ತಲೆ ತುವೆಂ ಕಶೆಂ ಜಗ್ಚೆಂ,

ತುಜೆರ್ ಕಸ್ಲಿಂ ಕಸ್ಲಿಂ ಬಂದ್ನಾಂ ಹೆಂ ಲೆಗೀತ್..

ನ್ಹಯ್ಕಾರತಲೆ ತುಜೆಂ ಸ್ವಾತಂತ್ರ್ಯ್,

ಮುಕ್ತಪಣಾನ್ ಜಗ್ಪಾಚೆಂಯ್..

ಸಮಾಜೂಚ್ ಆಂಖೂನ್ ದಿತ್ಲೊ

ತುಜ್ಯಾ ಜಗ್ಪಾಚಿ ಚವ್ಕಟ್,

ಜಾತೂಂತ್ ತುಜ್ಯಾ ಕುಡೀಚೊಚ್

ಬರೊಚಸೊ ಹಿಸ್ಸೊ ಆಸ್ತಲೊ.

ಬುದ್ಧಿ ಆಸೂನಯ್ ತಿ ವಾಪ್ರಪಾಚಿ

ಸಂದೂಚ್ ನ್ಹಯ್ಕಾರತಲೆ ತುಕಾ.

ಸ್ವತಾ ಭೊಂವ್ತಣೀಂಚ್ ತಯಾರ್ ಕರ್,

ಮಾಗೀರ್ ತುಂ ಎಕ್ ಕೊಶ್.

ತುಜೆಂ ಫುಲ್ಪಾಖರಾ ವರಿ ಮನ್

ಮಾರುನ್ ಜಗ್ತನಾ,

ಫುಡೊ ಕರ್ ಜಿಣೆಕ್

ಸ್ವತಾಚೆ ಭೊಗ್ ಸಮ್ಜೂನ್

ಖಿಣಾ ಖಿಣಾಕ್ ಸದಾಂಚ್

ಮರಣ್ ಭೊಗ್ತನಾ.

ಬಾಯ್,

ತುಂ ಅಶೆಂಯ್.

ಗರುಡಾಚಿಂ ಪಾಖಾಂ ಲಾಬಿಲ್ಲೆಂ,

ಊಂಚ್ ಝೊಂಪಯ್ ಮಾರ್ಪಾಖಾತೀರ್

ಮಳ್ಬಾಂತ್ ಮುಕ್ತಪಣಾನ್.

ಪೂಣ್ ಸಮಾಜೂಚ್ ಕಾತ್ರೂನ್ ಉಡಯ್ತಲೊ,

ತುಜಿಂ ಉಡೂಂಕ್ ಸೊದ್ಪಿ ಪಾಖಾಂ.

ಆನಿ ಮಾಗೀರ್ ಉರ್ತಲೆಂ ಫಾಟ್ಲ್ಯಾನ್,

ಜಗಪ್ ತುಜೆಂ ಕಾಕೂಟವಾಣೆಂ.

ಬಾಯ್,

ಚಲ್ತೂಚ್ ಉರ್ತಲೆಂ,

ಹೆಂ ಅಶೆಂಚ್ ಕಲ್ಪಾಂತಾಮೆರೆನ್.

ಮನ್ ಎಕ್ದಾಂ ಮೆಲೆಂ ಕಾಯ್,

ಸೊಪೆಂ ಜಾತ್ಲೆಂ ತುಜೆಂ ಜಿಣೆಂ..

- ಸುನೇತ್ರಾ ಜೋಗ್ [ಅಗೋಸ್ತ್, 2019]