[ಗಲ್ಫ್ ಕೊಣಾಕ್ ಸರ್ಗ್]

ಗಲ್ಫ್ ಕೊಣಾಕ್ ಸರ್ಗ್ ತರ್ ಕೊಣಾಕ್ ಖರ್ಗ್, ನಿತಳ್ ಕೆಲ್ಲ್ಯಾ ಮಿಟಾ ಉದ್ಕಾಕ್ ವ್ಹಾಪಾರ್ನ್ ಎಕೇಕ್ ರುವಿ ಸಯ್ತ್ ಉರಂವ್ಚ್ಯಾಕ್ ಮಿನತ್ ಕರ್ಚ್ಯಾ ಮನ್ಶ್ಯಾನ್ ಖರ್ಕಟ್ಯಾ ವೊತಾಂತ್ ವ್ಹಾಳಯಿಲ್ಲ್ಯಾ ಘಾಮಾನಿಮ್ತಿಂಚ್ ಚಡ್ತಾವ್ ಜಾವ್ನ್ ಗಾಂವಾಂತ್ ಬಂಗ್ಲೆ ಉಭೆ ಜಾಲ್ಯಾತ್, ವೊಡ್ತಾಂನಿ ರಂಗಾಳ್ ಫುಲಾಂಚಿಂ ಝಡಾಂ ಪಾಲೆತಾತ್. ಇತ್ಲೆಂಚ್ ನ್ಹಯ್, ಗಲ್ಫಾಂತ್ ದುಡು ಪಿಕ್ಚೆ ರೂಕ್ ಆಸಾತ್ ಆನಿ ಭಾಂಗಾರ್ ಖೊಂಡ್ಚ್ಯೊ ಬಾಂಯೊ ಆಸಾತ್ ಮ್ಹಣುನ್ ಆಯಿಲ್ಲ್ಯಾಂನಿ ವೆಳಾಕಾಳಾಉಪ್ರಾಂತ್ ರಗ್ತಾಳ್ ದುಖಾಂಯ್ ಗಳಯಿಲ್ಲಿಂ ಆಸಾತ್.

ಹಿ ಕವಿತಾ ಕಾಂಯ್ ಹೆಚ್ಚ್ ಚಿಂತ್ಪಾಚಿ, ಜೊಕ್ತೆಂ ಶಿಕಪ್ ಆಸೊನ್‌ಯೀ ಜೆದ್ನಾಂ ಭಳ್ವಂತ್ ಮಾಲಿಕಾಂಚ್ಯಾ ಹಾತಾಖಾಲ್ ಏಕ್ ’ಗಾಡಾಂವ್’ ಜಾವ್ನ್ ದೀಸ್ ಕಾಡುನ್ ಆಸ್ತಾನಾ ಖರೆಂಚ್ ಜಾವ್ನ್ ಅಪುಣ್ ಮನಿಸ್ ನ್ಹಯ್ ಬಗಾರ್ ಗಾಡಾಂವ್ ಮ್ಹಳ್ಳಿಂ ಚಿಂತ್ನಾಂ ಮತಿಂತ್ ಯೆಂವ್ಚೆಂ ಸಹಜ್. ಹೆಚ್ಚ್ ಚಿಂತ್ಪಾಚಿ ಹಿ ಕವಿತಾ ಕಾಂಯ್ ತುಕಾ ಆಂವಡ್ತೆಲಿ ಮ್ಹಣ್ ಪಾತ್ಯೆತಾಂ.

ಗಲ್ಫಾ ಗಾಡಾಂವ್..

ಹಾಂವ್ ಜಲ್ಮಲ್ಲ್ಯಾ ಕಾಳಾ

ಭೋವ್ ಖುಶ್ ಮ್ಹಜೊ ಜನಕ್

ಮ್ಹಜ್ಯಾ ನಂತರ್ ಆಯಿಲ್ಲ್ಯಾ

ಪಿಲಾಂಚೊ ಸಂಖೊ ವಾಡ್‌ಲ್ಲ್ಯಾ ವೆಳಾ

ದುಕೊಳ್ ಪಡ್ಲೊ ತಾಂದ್ಳಾ ಮುಡ್ಯಾಕ್

ಮೂಟ್‌ಭರ್ ಶಿತಾಕ್

ಸಾತ್ ವಾಂಟೆ

ದುಬ್ಳಿಕಾಯೆ ರುಕಾಕ್

ಜಾಯ್ತೆ ಆಸ್ಕತ್ ಫಾಂಟೆ...

ಲ್ಹಾನ್ ಆಸ್ತಾನಾ

ಆನ್ ಗಳೊ ಹಾಡ್ತಾಲೊ

ಭುಕೆಚಿ ಸಾವ್ಳಿ ಸಾಸ್ಲಿ

ಮಾಂಯ್ ಆಪ್ಲ್ಯಾ ಹಾತಾಂನಿ ಲಾಯ್ತಾನಾ

ಪೊಟಾ ಮಾಲ್ತಿ ಭರೊನ್ ವೊಮ್ತೊತೆಲಿ..

ದೀಸ್ ಧಾಂವ್ಲೆ ವರ್ಸಾಂ ಧಾಂವ್ಲಿಂ

ಕುಟ್ಮಾ ಪಾಳಾಂಕ್

ಪ್ರಾಯೆಚಿ ವಾಳಯ್ ಲಾಗ್ಲಿ

ಜಲ್ಮ್ ದಾತಾರಾಂ ಪಿಂತುರಾಂ

ವೊಣ್ತಿ ಖಿಳ್ಯಾಂಕ್ ಮಾರ್‌ಲ್ಲ್ಯಾ ದಿಸಾ

ಪಾಂಚ್ ಬೊಟಾಂ ಪಯ್ಕಿ

ಮಾಂಡ್ಯಾ ಬೊಟಾಕ್ ಮ್ಹಾಕಾ

ರೆಂವೆರ್ ಜಳ್ಚಿ ಲಾಭ್ಲಿ ವಿಜಾ..

ಸಾತ್ ದರ್ಯೊ ಉತ್ರೊನ್

ಸುರ್ಯಾಕ್ ಸುಕೊಂಕ್ ಆಯ್ಲೊಂ

ತಾಪ್ಚ್ಯಾ ರೆಂವೆರ್

ತೊಪ್ಚ್ಯಾ ವೊತಾಕ್

ಪಯ್ಶೆ ಜೊಡ್ಚಿ ಖೊರೊಜ್

ಸಪ್ಣಾ ಭುರುಜ್ ಘೆವುನ್ ಗಲ್ಫಾಕ್ ಪಾವ್ಲೊಂ..

ಕಾಂಟ್ಯಾ ಸಾರ್ಕಿ ತೊಪ್ಚಿ ರೇಂವ್

ದೋನ್ ದಿಸಾಂನಿ ಉಡಾಸ್ ಆಯ್ಲೊ ಗಾಂವ್

ಅಸ್ಕತ್ ಹ್ಯಾ ಗಾಡ್ವಾ ಪಾಟಿರ್ ಕುಟ್ಮಾಭಾರ್

ಕಶೆಂ ತರೀ ವಾರಾ ಶಿಖರ್ ಚಡುಂ ಹಾಂವ್...?

ಕಾಮಾಕ್ ವೆತಾನಾ ದೋನ್ ಪಾಂಯಾಂನಿ

ಗುಡಾಕ್ ಪಾಟಿಂ ಯೆತಾನಾ ಚಾರ್ ಪಾಂಯಾಂನಿ

ಕೊಣೆಂಗಾಯ್ ವೊಂಪ್ಲ್ಯಾತ್ ಕಶ್ಟ್ ಅನ್ವಾರಾಂ

ಮ್ಹಜ್ಯಾ ಹರ್ಯೆಕ್ ಮೆಟಾಂನಿ..?

ಕುಟ್ಮಾ ಉಡಾಸ್ ರೆವ್ಡಾಲ್ಲಿಂ ಸಪ್ಣಾಂ

ಖಂಯ್ ಯೆತಾ ನೀದ್?

ಮಾಣ್ಕುಲ್ಯಾ ಕುಡಾಂತ್?

ಪೊರ್ಸಾನ್ ಚೆಪ್‌ಲ್ಲ್ಯಾ?

ರಾಸ್ ಜೀವಂತ್ ಮೊಡ್ಯಾಂಚೊ

ನಿದೆಂತ್ ಚಲ್ತಾನಾ ವಾದ್

ಸುಶೆಗಾಚ್ಯಾ ನಿದೆಕ್ ಮಾಂಡ್ಲಾ ಬೀದ್..

ಶಿರಂಧರಿಚೊ ಪಾವ್ಸ್ ಹಾಂಗಾಯ್ ಯೆತಾ

ಪಾವ್ಸ್ ದುಖಾಂಚೊ

ಗಾಂವ್ಚೆಂ ಫೋನ್ ಯೆತಾನಾ

ಆವ್ರ್ ಹಾಂಗಾಸರ್ ಸದಾಂನಿತ್ ಜಾತಾ

ವಾವ್ರಾಚ್ಯಾ ಭಾರಾಕ್ ಘಾಮ್ ದೆಂವ್ತಾನಾ

ಅಜ್ಯಾಪಾಂಚೊ ಗಾಂವ್ ಹೊ ಖರೊ

ದೆಕುನ್‌ಚ್ಚ್ ಕಿತ್ಲೊ ಪಾವ್ಸ್ ವೊತ್ಲ್ಯಾರೀ

ಹ್ಯಾ ಯೆಮ್ಕುಳ್ಯಾ ರೆಂವೆಚಿ ತಾನ್ ಥಾಂಬಾನಾ..

ಅರ್ಧೆಂ ಭಿಕುಣಾಂನಿ

ಪುರ್ತೆಂ ಮಾಲಿಕಾಂನಿ

ರಗತ್ ಮ್ಹಜೆಂ ಚಿಂವುನ್ ಜಾಲಾಂ

ಪರ್ಕಿ ಗಾಂವಾಂತ್ ಪರ್ದೆಶಿ

ಗಲ್ಫಾ ಗಾಡಾಂವ್ ಹಾಂವ್

ಸುಟ್ಕೆಚ್ಯಾ ದಿಸಾಕ್ ರಾಕುನ್ ರಾವ್ಲಾಂ..!

- ಚಿಕ್ಕ ಪಾಂಗ್ಳಾ [ಸಪ್ತೆಂಬರ್, 2016]

ಚಿಕ್ಕ ಪಾಂಗ್ಳಾ: ಲಿಖ್ಣೆ ನಾಂವಾರ್ ಕವಿತಾ ಬರಂವ್ಚೊ ’ಹರ್ಮನ್ ರಾಯನ್ ಮೆಂಡೊನ್ಸಾ’, ಆಯ್ಲೆವಾರ್ ಕೊಂಕ್ಣಿ ಸಾಹಿತಾಂತ್ ಭರ್ವಸೊ ಉಟಯಿಲ್ಲ್ಯಾಂತ್ ಹಾಕಾಯ್ ಹಾಂವ್ ಲೆಖ್ತಾಂ. ಎದೊಳ್‌ಚ್ಚ್ ಆಪ್ಲ್ಯಾ ಕವಿತೆಚ್ಯಾ ಪ್ರತಿಭೆಧ್ವಾರಿಂ ಕೊಂಕ್ಣಿ ಕವಿತಾಶೆತಾಂತ್ ಅಪ್ಲೆಂಚ್ ಸ್ಥಾನ್ ಥಿರ್ ಕೆಲ್ಲೊ ’ಚಿಕ್ಕ’ ಸದ್ದ್ಯಾಕ್ ಕುವೇಯ್ಟಾಂತ್ ವಾವ್ರ್ ಕರುನ್ ಆಸಾ. ಕೊಂಕ್ಣೆಂತ್ಲೊ ಭಳ್ವಂತ್ ಕವಿ ಜಾಂವ್ಚಿ ಖುಣಾಂ ಹಾಚೆಥಂಯ್ ಮ್ಹಾಕಾ ದಿಶ್ಟಿಕ್ ಪಡ್ತಾನಾ ಮ್ಹಜೊ ಆಶಾವಾದ್ ಇತ್ಲೊಚ್ಚ್ - ತಶೆಂಚ್ ಜಾಂವ್.