ಆಂಕ್ಡೊ - 18. ಪಾಂದ್ರ್ಯಾಂತಲೆಂ ಸುಕ್ಣೆಂ ಗಾಯ್ತಾ

ವಾರ್ಯಾಚೆ ಫಾಟೀರ್

ಉಫೆತಾ ಸಕಯ್ಲ್ ವ್ಹಾಂವ್ಪಿ ಉದ್ಕಾಂತ್

ಪ್ರವಾಹ್ ಸೊಂಪ್ತಾ ಥಂಯ್

ಆನಿ ಬುಡಯ್ತಾ ಆಪ್ಲಿಂ ಪಾಖಾಂ

ಸೂರ್ಯಾಚ್ಯಾ ಕೆಸ್ರಿ ಕಿರ್ಣಾಂನಿಂ

ಆನಿ ಕರ್ತಾ ಮಾಗೀರ್ ಧೀಟಾಯ್

ಮಳ್ಬಾಚೆರ್ ಮಾಲ್ಕಿ ಸಾಂಗ್ಪಾಚಿ.

ಪೂಣ್ ಆಪ್ಲ್ಯಾ ಅಶೀರ್ ಪಾಂದ್ರ್ಯಾಂತ್

ಭೊಂವ್ಪಿ ಸುಕ್ಣೆಂ

ಪಳೊವಂಕ್ ಶಕ್ನಾ

ಆಪ್ಲ್ಯಾ ರಾಗಾಚ್ಯಾ ಸರ್ಯಾಂಮದ್ಲ್ಯಾನ್

ಕಾಪ್ಲ್ಯಾಂತ್ ತಾಚಿಂ ಪಾಖಾಂ

ಆನಿ ಬಾಂದ್ಲ್ಯಾತ್ ತಾಚೆ ಪಾಂಯ್

ದೆಖೂನ್ ಕರ್ತಾ ಉಕ್ತೊ ಗಾವ್ಚೆಪಾಸತ್ ತಾಳೊ.

ಪಾಂದ್ರ್ಯಾಂತಲೆಂ ಸುಕ್ಣೆಂ ಗಾಯ್ತಾ

ಭಯಾನ್ ಥರ್ಥರತ್

ಅನವ್ಳಖಿ ಗಜಾಲೀಂವಿಶಿಂ

ಪೂಣ್ ಜಾಂಚಿ ಬಾಳ್ಗಿಲ್ಲಿ ಆಸ್ಕ್ತಿ

ಆನಿ ತಾಚೊ ಸೂರ್ ಯೆತಾ ಆಯ್ಕೂಂಕ್

ಪಯ್ಸುಲ್ಲ್ಯಾ ದೊಂಗ್ರಾರ್

ಕಾರಣ್ ಪಾಂದ್ರ್ಯಾಂತಲೆಂ ಸುಕ್ಣೆಂ

ಗಾಯ್ತಾ ಸ್ವತಂತ್ರತಾಯೆಖಾತೀರ್

ಮುಕ್ತ್ ಸುಕ್ಣೆಂ ಸೊದಾಂತ್

ಸದಾಂಚ್ ನವ್ಯಾ ವಾರ್ಯಾಚ್ಯಾ

ಗಾವ್ಪಿ ಝಾಡಾಂತ್ಲ್ಯಾನ್ ವ್ಹಾಂವ್ಪಿ

ಮಂದ್ಮಧುರ್ ವೆಪಾರಿ ವಾರ್ಯಾವಾಂಗಡಾ

ಮೊಟೆ ಕಿಡೆ ಚೊಯ್ತನಾ ವಾಟ್

ಫಾಂತೊಡೆಚ್ಯಾ ಚಕ್ಚಯಾಳ್ ತಣಾಚೆರ್

ಆನಿ ಕರ್ತಾ ಮಳಬ್ ಸ್ವತಾಚ್ಯಾ ನಾಂವಾರ್.

ಪೂಣ್ ಪಾಂದ್ರ್ಯಾಂತಲೆಂ ಸುಕ್ಣೆ ರಾವ್ತಾ ಉಬೆಂ

ಸಪ್ನಾಂಚ್ಯಾ ಥಡ್ಯಾರ್

ತಾಚಿ ಸಾಂವ್ಳಿ ಆಡ್ಡತಾ

ಭಯ್ಸಪನಾಚಿ ಕಿಳಾಂಚ್

ಕಾಪ್ಲ್ಯಾಂತ್ ತಾಚಿಂ ಪಾಖಾಂ

ಆನಿ ಬಾಂದ್ಲ್ಯಾತ್ ತಾಚೆ ಪಾಂಯ್

ದೆಖೂನ್ ಕರ್ತಾ ಉಕ್ತೊ ಗಾವ್ಚೆಪಾಸತ್ ತಾಳೊ.

ಪಾಂದ್ರ್ಯಾಂತಲೆಂ ಸುಕ್ಣೆಂ ಗಾಯ್ತಾ

ಭಯಾನ್ ಥರ್ಥರತ್

ಅನವ್ಳಖಿ ಗಜಾಲೀಂವಿಶಿಂ

ಪೂಣ್ ಜಾಂಚಿ ಬಾಳ್ಗಿಲ್ಲಿ ಆಸ್ಕ್ತಿ

ಆನಿ ತಾಚೊ ಸೂರ್ ಯೆತಾ ಆಯ್ಕೂಂಕ್

ಪಯ್ಸುಲ್ಲ್ಯಾ ದೊಂಗ್ರಾರ್

ಕಾರಣ್ ಪಾಂದ್ರ್ಯಾಂತಲೆಂ ಸುಕ್ಣೆಂ

ಗಾಯ್ತಾ ಸ್ವತಂತ್ರತಾಯೆಖಾತೀರ್

***

[ಮೂಳ್: ಮಾಯಾ ಅಂಜೆಲು, ಕೊಂಕಣಿಕ್: ಶೈಲೆಂದ್ರ್ ಮೆಹ್ತಾ ]

ಶಯ್ಲೇಂದ್ರ ಮೆಹ್ತಾ: ಪೊಲಿಟಿಕಲ್ ಸಾಯನ್ಸಾಚೊ ಅಧ್ಯಾಪಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಅಂಕಣ್‌ಕಾರ್, ಕವಿ, ಸಮೀಕ್ಷಕ್, ತರ್ಜ‌ಕಾರ್ ತಶೆಂಚ್ ಕೊಂಕಣಿ ವಾವ್ರಾಡಿ. ಗೊಂಯ್ ಮುಳಾಚೊ ಸದ್ದ್ಯಾಕ್ ಮುಂಬಂಯ್ತ್ ವಾವ್ರ್ ಕರುನ್ ಆಸಾ. ಚಾಳಿಸ್ ವರಸಾಂ ಥಾವ್ನ್ ಮರಾಠಿ, ಕೊಂಕಣಿಂತ್ ಬರಯ್ತಾ. ’ಸಿಸಿಫಸ್ ತೆಂಗ್‌ಶೆರ್’ ತಾಚ್ಯಾ ಕೊಂಕಣಿ ಕವಿತೆಂಚೊ ಜಮೊ.