ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 20
ಸಿಲ್ವಿಚ್ಯಾ ದೊಳ್ಯಾಂನಿ ಭರ್ಲ್ಲಿಂ ದುಃಖಾಂ, ಮೆಲ್ವಿನಾಕ್ ಕಳ್ವಳ್ಯಾಂಕ್ ಕಾರಣ್ ಜಾಲ್ಲಿಂ. ತ್ಯಾ ತರ್ನ್ಯಾ ವಿಧ್ವಿಚಿಂ ದುಃಖಾಂ, ಸಂಸಾರಾಕ್ಚ್ ಸವಾಲ್ ಉಡೈತಾಲಿಂ - ಅಪ್ಲ್ಯಾ ಕರಾಳ್ ಭವಿಷ್ಯಾಚೆಂ ರುಪ್ಣೆಂ ದಾಕವ್ನ್, ಆಪ್ಣಾಚೊ ಫುಡಾರ್ ಕಸೊ ಜಾಯ್ತ್? ಹ್ಯಾ ತರ್ನ್ಯಾ ಬಾಳಾಚಿ ಗತ್ ಕಿತೆಂ ಜಾಂವ್ಕ್ ಪಾವಾತ್? ಹಿ ಸಮಾಜ್, ವಿಧ್ವಿಕ್ ಎಕ್ಲೆಕ್ ಕಸಲೆಂ ಸ್ಥಾನ್ ದೀತ್? ಮೆಲ್ವಿನಾನ್ ಸಬಾರ್ ಚಿಂತ್ಲೆಂ - ಆನಿಂ ಸಿಲ್ವಿ ವಿಷ್ಯಾಂತ್ ನಿಯಾಳ್ನ್ ಕಳ್ವಳ್ಳೊ ತೊ.
ಸೊಫಿಕ್ ಏಕ್ ಉಮೊ ದೀವ್ನ್ ತಾಣೆ ಸಿಲ್ವಿಲಾಗಿಂ ದಿಲೆಂ. "ಹಾಂವ್ ತರ್ ಚಲ್ತಾಂ ಸಿಲ್ವಿಯಾ. ಆನಿಂ ಕೆದಾಳಾಯಿ ವೇಳ್ ಮೆಳ್ಳ್ಯಾರ್ ಯೆತಾಂ" ಅಶೆಂ ಸಾಂಗೊನ್, ತೊ ಘರ್ಚಿಂ ಮೆಟಾಂ ದೆಂವೊನ್ ಆಯ್ಲೊ.
ಮನ್ಶಾನ್ ಸಂಸಾರಾಂತ್ ಅಶೆಂವ್ಚೆಂ ಕಸಲೆಂ ಸುಂದರ್ ಸ್ವಪಾಣ್....ತರೀ, ಹ್ಯಾ ದುಃಖಿ ಸಂಸಾರಾಂತ್ ಘಡ್ಚೆಂ ಕಿತ್ಲೆಂ ಕಠಿಣ್ ಆನಿಂ ಕೊಡು. ಆಪ್ಣಾಚೆಂ ಏಕ್ ಸ್ವಪಾಣ್ ಆಸ್ಲ್ಲೆಂ. ಸುಂದರ್ ಏಕ್ ಮಂದಿರ್ ತ್ಯಾ ರಾಜಾಂತ್ ಆಪ್ಣೆ ಬಾಂದ್ಲ್ಲೆಂ. ಜೆಸ್ಸಿ ಸಂಗಿಂ, ಏಕ್ ಸೊಭಿತ್ ಸಂಸಾರ್ ಬಾಂದ್ತೊಲೊಂ, ತ್ಯಾ ಬಾಂಧಾತ್ ಸದಾಂ ಸುಖಿ ಉರ್ತೊಲೊಂ.....ಆಶೆಂ ಏಕ್ ಸ್ವಪಾಣ್ ಆಪುಣ್ ಸ್ವಪ್ಣೆಲ್ಲೊಂ ಉಪ್ರಾಂತ್ ತೆಂ ಏಕ್ ನಿರ್ಭಾಗ್ಯಾಚೆಂ ಸ್ವಪಾಣ್ ಜಾಂವ್ಕ್ ಪಾವ್ಲ್ಲೆಂ. ಆನಿಂ ತರ್ನಟ್ಪಣಾರ್ ಪತಿ ಸಾಂಗಾತ, ಸುಖಾ-ಸಂತೊಸಾನ್ ಆಸ್ಚೆಂ ಸ್ವಪಾಣ್ಯಿ ಜಾಂವ್ಕ್ ಪಾವ್ಲ್ಲೆಂ ನಿರ್ಭಾಗ್ಯಾಚೆಂ ಸ್ವಪಾಣ್.
ತಿಂಚ್ ಚಿಂತ್ನಾಂ ಮನಾಂತ್ ಆಟವ್ನ್ ಘರಾ ತೊ ಆಯಿಲ್ಲೊ. ರಾತಿ ಹಾಂತುಳ್ಣಾರ್ ಘಡ್ಲ್ಲ್ಯಾ ಕಡೆ, ಸವ್ಕಾಸ್ ಸಾಂಜೆಚಿ ಸಂಗತ್ ರಾಜುಕ್ ಸಾಂಗೊಂಕ್ ಸುರು ಕೆಲ್ಲಿ ತಾಣೆ.
ರಾಜುಕ್ ಖರೆಂಚ್ ಆಜ್ಯಾಪ್ ಜಾಲೆಂ. "ಹಾಂ....ಸಿಲ್ವಿಚಿ ವಳೊಕ್ ಜಾಲ್ಲೆ ಬರಿಚ್ ಖಬಾರ್, ಏಕ್ ಜಾತಿಚಿಂ ಸುಕ್ಣಿಂ ಸಾಂಗಾತಾ ಮೆಳ್ತಾತ್"
ತಾಚ್ಯಾ ಉತ್ರಾಂಚೊ ಅರ್ಥ್ ಜಾವ್ನ್ ನಿರಾಶೆನ್ ಹಾಸ್ಲೊ ಮೆಲ್ವಿನ್.
"ಮೆಲ್ವಿನ್, ಹಾಂವ್ ಸಾಂಗ್ತಾಂ ತೆಂ ಆಯ್ಕ್.." ಮುಖಾರ್ಸಿಲೆಂ ರಾಜುನ್. ಮನ್ಶಾಕ್ ಕಸಲಿಯ್ ಬೆಜಾರಾಯ್ ಅನಿಂ ದುಃಖ್ ಆಸ್ಲ್ಯಾರ್, ಕೊಣಾಚ್ಯಾಯ್ ಸಾಂಗಾತಾಂತ್ ತೆಂ ಪರಿಹಾರ್ ಕರ್ಯೆತ್. ಎಕಾಮೆಕಾ ಭುಜಾವಣ್ ಆನಿಂ ಧೈರ್ ದಿಲ್ಯಾರ್, ಕಸಲ್ಯಾ ಕಂಟಾಕಾಚೆರ್ಯಿ ಆಮಿಂ ಜೈತ್ ವರ್ಯೆತಾ. ಸಿಲ್ವಿ ದುಃಖಿ ಚೆಡುಂ, ಆನಿಂ ಚಡುಣೆಂ ತುಜ್ ಸ್ಥಿತಿಯಿ ತಶಿಚ್. ತುಂ ತಾಕಾ ತವಳ್ ತವಳ್ ಮೆಳ್ಲ್ಲ್ಯಾನ್ ಸಿಲ್ವಿಕ್ಯಿ ಎಕಾ ಥರಾಚೆಂ ಸಮಾಧಾನ್ ಭೊಗೊಕ್ ಪುರೊ. ತಶೆಂಚ್ ತುಕಾಯಿ"
ಮೆಲ್ವಿನ್ ಉಲೈಲೊನಾ. ಸಿಲ್ವಿಚಿ ವಳೊಕ್ ಜಾಲ್ಲಿ ತಿ ವಿಚಿತ್ರ್ ಘಡಿ...ಆನಿಂ ಎದೊಳ್ ಸಂಭವ್ಲೆಲ್ಯೊ ಸಂಗ್ತಿ ತೊ ಚಿಂತ್ತಾಲೊ. ಪುಣ್ ಸಿಲ್ವಿಚಿ ವಳೊಕ್ ಜಾಲ್ಲ್ಯಾನ್ ಆಪ್ಲೆಂ ದುಃಖ್ ವಿಸ್ರೊಂಕ್ ಸಾಧ್ಯ್ಗಿ?
ತಾಚೆ ಉಪ್ರಾಂತ್ ಸದಾಂ ಸಾಂಜೆರ್ ಕ್ಲಾಸಿಂತ್ ಸಿಲ್ವಿ ತಾಕಾ ಮೆಳ್ತಾಲೆಂ. ತಾಚ್ಯಾಚ್ ಕಾರಾರ್ ತೊ ಘರಾ ಯೆತಾಲೊ. ಚಡುಣೆಂ ಸದಾಂಚ್ ಸಿಲ್ವಿಗೆರ್ ಭೆಟ್ಯಿ ದಿತಾಲೊ ಮೆಲ್ವಿನ್. ಪ್ರಭುಲಾಗಿಂ ತಾಚಿ ಸಳಾವಳಾಯಿ ವಾಡ್ಲ್ಲಿ ಆನಿಂ ತೊ, ಪ್ರಭುಚ್ಯಾ ಕುಟ್ಮಾಚ್ಯಾ ಸಾಂದ್ಯಾಬರಿ ಜಾಲ್ಲೊ.
ಸಿಲ್ವಿ ಆನಿಂ ಮೆಲ್ವಿನ್ ತ್ಯಾ ಯೇಂವ್ಕ್ ಆಸ್ಚ್ಯಾ ಮಹಾ ಸಂಗೀತ್ ಸ್ಪರ್ದ್ಯಾಕ್ ತಯಾರಾಯ್ ಕರ್ನ್ ಆಸ್ಲ್ಲ್ಯಾಬರಿಚ್, ನಿಮಾಣೆಂ ತೊ ದೀಸ್ಯಿ ಉದೆಲೊ. ತಾಣಿಂ ದೊಗಾಂಯ್ನಿ, ಆದ್ಲ್ಯಾ ಸ್ಪರ್ದ್ಯಾಕ್ ಮ್ಹಳ್ಳೆಲಿಂಚ್ ಗಾಯನಾಂ ಮ್ಹಣೊಂಕ್ ನಿಶ್ಚಯಿಲ್ಲೆಂ. ’ಇಂಡಿಯಾ ಭವನಾಂತ್ ಸಾಂಜೆಚ್ಯಾ ಚ್ಯಾರ್ ವೊರಾಂಚೆರ್ ಭರ್ಲ್ಲ್ಯಾ ಲೊಕಾ ಮುಖಾರ್ ಸ್ಪರ್ದೊ ಪ್ರರಂಭ್ ಜಾಲೊ. ಜನವರಿ ೨೬ ತಾರಿಕ್ ತಿ. ಪ್ರಜಾ ಪ್ರಭುತ್ವ್ಯಾಚೊ ದೀಸ್, ಸಾಲಾಂತ್ ಸುವಿ ಘಾಲುಂಕ್ ಇಡೆಂ ನಾ ತಶೆಂ ಲೋಕ್ ಭರ್ಲ್ಲೊ.
ಮೆಲ್ವಿನಾಕ್ ಹ್ಯಾ ಪಾವ್ಟಿಂ ಕಾಂಯ್ಚ್ ಭ್ಯೆಂ ದಿಸಾನಾತ್ಲ್ಲೆಂ. ಬೊಂಬೈಚ್ಯಾ ಸ್ಟೇಜಿರ್ ಪಯ್ಲ್ಯಾ ಪಾವ್ಟಿಂ ತೊ ಚಡ್ಲ್ಲೊ ಆನಿಂ ಪಂದ್ಯಾಟಾಂತ್ ಜಿಕ್ಲ್ಲೊ. ತ್ಯಾ ಶಿವಾಯ್, ರಾಜುಚಿಂ, ಸಿಲ್ವಿಚಿಂ ಆನಿಂ ಪ್ರಭುಚಿಂ ಧೈರಾಧಿಕ್ ಉತ್ರಾಂ, ತಾಂಚೊ ಸಂದೇಶ್ ತಾಚ್ಯಾ ಮನಾಕ್ ಧೈರ್ ದಿತಾಲೊ. ಆಪುಣ್ ಆಜ್ ಜಿಕಾನ್ ತರ್....... ತಸಲೆಂ ಭಾಗ್ ನಿಜಾಕ್ಯಿ ಆಪ್ಣಾಕ್ ಮೆಳಾತ್ಗಿ? ನಹಿಂಚ್ ಬೊಂಬೈಂತ್ಲೆಂ, ಬಗಾರ್ ಹೆರಾ ಪ್ರಾಂತಾಂತ್ಲೆ ಲೆಗುನ್ ಹುಶಾರ್ ಗಾಯಕ್ ಹ್ಯಾ ಸ್ಪರ್ದ್ಯಾಂತ್ ಪಾತ್ರ್ ಘೆತಾತ್. ತಾಂಕಾಮ್ ಸಕ್ದಾಂಕ್ ಸಲ್ವೊವ್ನ್ ಪ್ರಥಮ್ ಸ್ಥಾನ್ ಜೊಡ್ಚೆಂ ಆಪ್ಲ್ಯಾ ತಾಂಕಿ ಬಿತರ್ಲೆಂ ಸವಾಲ್ಗಿ?
ಮೆಲ್ವಿನಾಚಿ ಸರ್ತಿ ಆಯ್ಲಿ. ಸರ್ವ್ ಧೈರ್ ಎಕ್ಟಾಂಯ್ ಕರ್ನ್ ತೊ ಸ್ಟೆಜಿ ಕುಶಿಂ ಗೆಲೊಂ. ಆಪ್ಣಾಚ್ಯಾ ಶಾಥಿಯೆಚಿ ಆನಿಂ ಕಲೆಚಿ ಪರೀಕ್ಶಾ ಆಜ್...ಜಿಕಾನ್ ತರ್, ಸಂಸಾರಾಂತ್ ವರ್ತೆಂ ದಾಯ್ಜ್ ಜೊಡ್ಲ್ಲ್ಯಾಬರಿ.
ಇತ್ಲ್ಯಾ ದಿಸಾಂಚೆಂ ಖಳಾನಾತ್ಲ್ಲೆಂ ಆಭ್ಯಾಸ್, ತೆಂ ಧ್ಯಾನ್ ಅನಿಂ ಮನ್ ತಿಂ ಕಾಳ್ಜಾಚಿಂ ಖರಿಂ ಬೊಗ್ಣಾಂ ಖತ್ನಾಸ್ತಾಂ, ತಾಚ್ಯಾ ಮಧುರ್ ತಾಳ್ಯಾಂತ್ಲ್ಯಾನ್ ವ್ಹಾಳ್ಳಿಂ. ಬಸ್ಲ್ಲೊ ಲೋಕ್ ಮೊನೊ ಜಾಲ್ಲೊ. ವ್ಹಾಳ್ಚ್ಯಾ ತ್ಯಾ ಮಧುರ್ ಗಾನಲಹರಿಕ್ ಆಯ್ಕೊನ್. ಸಗ್ಳ್ಯಾನ್ಯಿ ನಿಸ್ಶಬ್ದ್...ಸಕ್ಕಡ್ಯಿ ವಿಜ್ಮಿತ್ ಜಾಲ್ಲೆ. ತ್ಯಾ ಪ್ರಶಾಂತ್ ವಾತವರಣಾಂತ್, ಮೆಲ್ವಿನಾಚೊ ತಾಳೊ, ಸುಪ್ರಭಾತವೆಳಿಂ ಕೊಗುಳೆನ್ ಗಾಂವ್ಚ್ಯಾ ಗೀತಾಬರಿ ಆಯ್ಕಾಲೊ. ದೆವಳಾಂತ್ ದೆವಾಕ್ ಹೊಗುಳ್ಸುಂಚ್ಯಾ ಮಧುರ್ ಗಾಯನಾಬರಿ ಪಸರ್ಲೊ.
ತೆಂ ಗೀತ್ ಆಖೇರ್ ಜಾಲೆಂ. ಕಪಾಲಾವಯ್ಲೊ ಘಾಮ್ ಪುಸುನ್ ತೊ ಆಪ್ಲ್ಯಾ ಬೊಸ್ಕೆಕ್ ಪಾಟಿಂ ಆಯ್ಲೊ. ಪ್ರಚಂಡ್ ತಾಳಿಯೊ ಪೆಟ್ಚ್ಯಾ ಆವಾಜಾಕ್ ತ್ಯಾ ಸಾಲಾಂತ್ ಬಸ್ಲ್ಲ್ಯಾಂಚಿ ಕಾನ್ ಕೆಪ್ಪೆ ಜಾತಾತ್ಶೆ ಭೊಗ್ಲೆಂ.
ಸಿಲ್ವಿಚಿ ಸರ್ತಿ ಆಯ್ಲಿ....ತಾಣೆಂಯಿ ಗಾಯನ್ ಬರ್ಯಾಚ್ ಥರಾನ್ ಗಾಯ್ಲೆಂ. ತೆಂ ಆಪ್ಲ್ಯಾ ಸ್ಥಾನಾಕ್ ಪಾಟಿಂ ಯೆತಾನಾ ’ಪ್ರಭು ಮೆಲ್ವಿನಾ ಲಾಗಿಂ ಮ್ಹಣಾಲೊ-
"ಮೆಲ್ವಿನ್..ಹಾಂವ್ ಖಂಡಿತ್ ಚಿಂತ್ತಾಂ, ತುಂ ಆಜ್ ಪ್ರಥಮ್ ಸ್ಥಾನ್ ಜೊಡ್ತೊಲೊಯ್ ಮ್ಹಣ್. ಸಿಲ್ವಿಚೆಂ ಧೈರ್ ದಿಸಾನಾ"
"ಕಿತ್ಯಾಕ್ ಪಾಪ್ಪಾ?" ಹಾಸೊನ್ ಸಿಲ್ವಿನ್ ವಿಚಾರ್ಲೆಂ.
"ನ್ಹಂಯ್ ಪುತಾ....ಮ್ಹಾಕಾ, ಮೆಲ್ವಿನಾ ಥಂಯ್ ಕಸಲಿಗಿ ದುಸ್ರಿಚ್ ಸಕ್ತ್ ಆಸ್ಲ್ಲ್ಯಾ ಬರಿ ದಿಸ್ಲಿ ಆಜ್. ಆಜ್ ಎಕ್ಲೊ ಮೆಲ್ವಿನ್ ನ್ಹಂಯ್, ದೊಗ್ ತೆಂ ಗಾಯನ್ ಕರ್ಚ್ಯಾಬರಿ ಆಯ್ಕಾಲೆಂ. ಮೆಲ್ವಿನ್ ಖರೆಂಚ್ ಜಾವ್ನ್ ಸಾಂಗ್ತಾಂ, ತುಕಾ ಜರಿತರಿ ಪಯ್ಲೆಂ ಸ್ಥಾನ್ ಮೆಳಾನಾ, ತುವೆಂ ವಿಚಾರ್ಲ್ಲೆಂ ದಿತಾಂ"
"ಮೆಲ್ವಿನ್ ಮ್ಹಜೆಯಿ ಶುಭ್ - ಸಂದೇಶ್ ತುಕಾ...." ಕುಡ್ಸಿಲೆಂ ಸಿಲ್ವಿನ್.
ಗಾಗೆವ್ನ್ ಮೆಲ್ವಿನಾನ್ ಜಾಪ್ ದಿಲಿ - "ತಶೆಂ ಜಾಯ್ತ್ ಜಾಲ್ಯಾರ್, ಹಾಂವ್ ಭಾಗಿ....ತುಮ್ಕಾಂ ಥ್ಯಾಂಕ್ಸ್..."
ಸಿಲ್ವಿಚೆ ಸಂದೇಶ್ ಆನಿಂ ಪ್ರಭುಚೆಂ ಭವಿಷ್ಯ್ ಫಟ್ ಜಾಲೆಂ ನಾ. ಸ್ಪೀಕರಾಚೆರ್, ಅಧ್ಯಕ್ಷಾನ್ "ಮೆಲ್ವಿನ್ ಫಸ್ಟ್" ಮ್ಹಣ್ ಉಲೊ ಕರ್ತಾನಾ, ಮೆಲ್ವಿನಾಕ್ ಕಾಳಿಜ್ ರಾವನಾತ್ಲ್ಲೆಂ ವ್ಹಡ್. ತಾಕಾ, ಹಾಸ್ಚೆಂಗಿ, ರಡ್ಚೆಂಗಿ ಕಳ್ಳೆಂನಾ. ತೊ ಥಟಾಕ್ಲೊ... ಆನಿಂ ಹ್ಯಾ ಸಂಸಾರಾಂತ್ ನಾತ್ಲ್ಲ್ಯಾಬರಿ ಜಾಲಿ ತಾಚಿ ಸ್ಥಿತಿ. ಪ್ರಭು ಆನಿಂ ಸಿಲ್ವಿ ವಯ್ರ್ ವಯ್ರ್ ತಾಕಾ ಜಾಗ್ವವ್ನ್ ಸಂದೇಶ್ ದಿತಾಲಿಂ ತರೀ, ತೊ ಶಿರಿಂ ಸುಕೊನ್ ರಾವ್ಲ್ಲೊ.
ಸಿವ್ಲಿಕ್ ದುಸ್ರೆಂ ಸ್ಥಾನ್ಯಿ ಮೆಳ್ಳೆಂನಾ. ತರೀ, ತೆಂ ನಿರಾಶಿ ಜಾಲೆಂನಾ. ಮೆಲ್ವಿನ್ ಪ್ರಥಮ್ ಆಯಿಲ್ಲೊ ತಾಕಾ ಖಂಡಿತ್ ಖುಶಿ ಜಾಲ್ಲಿ. ಮಿನಿಸ್ಟಾರಾಚ್ಯಾ ಹಾತಾಂತ್ಲೆಂ ಪದಕ್ ಆನಿಂ ಕಪ್ಪ್ ಘೆವ್ನ್ ಮೆಲ್ವಿನ್ ಪಾಟಿಂ ಯೆತಾನಾ, ಉಲ್ಲಾಸ್ಭರಿತ್ ಜಾವ್ನ್ ಸಿಲ್ವಿ ಮ್ಹಣಾಲೆಂ - "ಹಾಂವ್ ನಿಜಾಕ್ಯಿ ಅಧಿಕ್ ಖುಶಾಲಿ ಜಾಲ್ಯಾಂ ಮೆಲ್ವಿನ್. ಕೆದೊ ವರ್ತೊ ಮನಿಸ್ ತುಂ..."
ಸಿಲ್ವಿನ್ ಆಪ್ಣಾಕ್ ಚಡಿತ್ ಪ್ರಶಂಸಾ ದಿಲಿ ಚಿಂತಿಲಾಗ್ಲೊ ಮೆಲ್ವಿನ್. ಆಪುಣ್ ತ್ಯಾ ಹೊಗ್ಳಿಕೆಕ್ ಪಾತ್ರ್ ನ್ಹಂಯ್. ಸಿಲ್ವಿ....ತಾಚೆ ತಸಲೆಂ ರುಪೇಸ್ತ್ ಚೆಡುಂ ಆಖ್ಯಾ ಬೊಂಬೈಂತ್ ನಾ ಮ್ಹಳ್ಯಾರೀ ಫಟ್ ಜಾಯ್ಶಿನಾ. ಕಿತ್ಲೆಮ್ ಗುಣೇಸ್ತ್ ಆನಿಂ ಮಾಣ್ಸುಗೆಚೆಂ.....ತಾಕಾ ಜಾಲ್ಯಾರ್ ಸ್ಥುತಿ ಫಾವೊ. ಆಪುಣ್ ಎಕ್ಲೊ ನಿರ್ಭಾಗಿ, ಕಿರ್ಕೊಳ್ ಮನಿಸ್.
"ಮೆಲ್ವಿನ್....ಆಜ್ ಜೆವ್ಣಾಕ್ ತುವೆಂ ಆಮ್ಗೆರ್ ಯೇಂವ್ಕ್ಜಾಯ್." ಪ್ರಭುನ್ ವತ್ತಾಯ್ ಕೆಲಿ.
ಮೆಲ್ವಿನಾಕ್ ವಚೊಂಕ್ ಕಾಂಯ್ ಆಡ್ಕಳ್ ನಾತ್ಲ್ಲಿ. ತರೀ ರಾಜುಚೆಂ ಮನ್ ದುಃಖಾತ್ ಮ್ಹಳ್ಳ್ಯಾ ಭಿಂಯಾನ್, ತೊ ಮ್ಹಣಾಲೊ "ಆನಿಂ ಕೆದಾಳಾಯ್ ಯೆತಾಂ ಅಂಕಲ್. ಪಾಟ್ಲ್ಯಾನ್ ಮ್ಹಜೊ ಮಿತ್ರ್ ರಾಜು ಆಸಾ. ತಾಕಾ ಸೊಡ್ನ್, ಖಂಯ್ಚ್ ವಚೊಂಕ್ ಮ್ಹಾಕಾ ಜಾಯ್ಶೆನಾ"
ತಿಂ ಒಪ್ಲಿಂ....ಸಿಲ್ವಿ ಆನಿಂ ಪ್ರಭು ಕಾರಾರ್ ಘರಾ ವೆತಾಚ್, ಮೆಲ್ವಿನ್ ಹೊಲಾ ಭಾಯ್ರ್ ಪಡ್ಲೊ. ಭಾಯ್ರ್ ವಚೊಂಕ್ಚ್ ಅರ್ಧೊ ಘಂಟೊ ಲಾಗ್ಲೊ ತಾಕಾ. ಮೆಲ್ವಿನಾಕ್ ಹಾತ್ ಮೆಳೊಂವ್ಕ್ ಆಯಿಲ್ಲ್ಯಾ ಜಣಾಂಕ್ ಲೇಕ್ಚ್ ನಾ..ಥೊಡೆ ತಾಚಿ ಫೊಟೊ ಕಾಡುಂಕ್ ಲಾಗ್ಲೆ....ಆಶೆಂ ತಾಚ್ಯಾ ಭೊಂವಾರಿಂ, ಕುಡ್ಸಾಲ್ಲ್ಯಾ ಲೊಕಾಕ್ ಕಶೆಂಯ್ ಪಯ್ಸ್ ಕರ್ನ್ ರಾಜು ಸರ್ಶಿಂ ತೊ ಪಾವ್ತಾನಾ ಘಾಮಾನ್ ಮುದೊ ಜಾಲ್ಲೊ.
ಆನಿಂ ರಾಜು ,.......ತೊಂಡಾರ್ ಪ್ರಜಳ್ ಘೆವ್ನ್ ಭಾಯ್ರ್ ಎಕಾ ಕೊನ್ಶಾಕ್ ಉಬೊ ರಾವ್ಲ್ಲೊ. ಮೆಲ್ವಿನ್ ಲಾಗಿಂ ಪಾವ್ತಾನಾ ತೊ ಉಲೈಲೊನಾ.....ವಿಸ್ತಾರ್ಲೊಲೊ ಹಾತ್ ತಾಣೆಂ ಮುಖಾರ್ ದಿಲೊ. ಮೆಲ್ವಿನಾನ್ ಆಪ್ಲೊ ಹಾತ್ ಮೆಳೈತಾನಾ, ದೊಗಾಂಚಿ ತೊಂಡಾಂ ಬಂದ್ ಪಡ್ಲ್ಲಿಂ ಆನಿಂ ದೊಳ್ಯಾಂನಿ ಸಂತೊಸಾಚಿಂ ದುಃಖಾಂ ಉದೆಲ್ಲಿಂ.
ಮೌನ್ ಜಾವ್ನ್ ದೊಗೀ ಸರ್ಶಿಲ್ಯಾ ವ್ಹಡ್ಲ್ಯಾ ’ಏರ್ ಕಂಡಿಶನ್ಡ್’ ಹೊಟೆಲಾಕ್ ಗೆಲೆ. ರಾಜುನ್ ಜೆವ್ಣಾಕ್ ’ಒರ್ಡರ್’ ದಿಲೆಂ.
"ಉಲಯ್ ರಾಜು....ಕಿತೆಂ ಜಾಲಾಂ ತುಕಾ? ಕಳ್ವಳ್ಳೊ ಮೆಲ್ವಿನ್.
"ಹಾಂವ್ ಉತ್ರಾಂಕ್ ಸೊಧ್ತಾಂ ಮೆಲ್ವಿನ್ ..... ಉತ್ರಾಂ ಮೆಳಾನಾಂತ್ ಮ್ಹಾಕಾ.." ರಾಜುಚೊ ತಾಳೊ ಕಾಂಪ್ತಾಲೊ, "ವೊ ದೀಸ್ ಖಂಯ್ಚ್ಯಾ ಥರಾನ್ ಆಚರ್ಸುಂಚೊ ಮ್ಹಾಕಾ ಕಳಾನಾ. ಆಯ್ಚೆಂ ಹೆಂ ’ಡಿನ್ನರ್ಚ್....ಹಾಂವೆಂ ತುಕಾ ಕರ್ಚೊ ಸನ್ಮಾನ್...."
"ರಾಜು..ತುಂ ಉಲೈತಾಯ್ ಕಿತೆಂ ಮ್ಹಾಕಾ ಸಮ್ಜಾನಾ..."
"ನಾ ಮೆಲ್ವಿನ್...ತುಜ್ಯಾ ಆನಿಂ ಮ್ಹಜ್ಯಾ ಜಿಣಿಯೆಂತ್ ಆಯ್ಚೊ ಏಕ್ ವರ್ತೊ ದೀಸ್. ಮ್ಹಜ್ಯಾ ವಾಂಟ್ಯಾಕ್ ವ್ಹೊ ವ್ಹಡ್ ದೀಸ್ ಕಿತ್ಯಾಕ್, ಶ್ರೇಷ್ಟ್ ಎಕ್ಲ್ಯಾ ಗಾಯಕಾಚಿ ಇಷ್ಟಾಗತ್ ಲಾಭ್ಲ್ಲಿ ಏಕ್ ಮಹಾ ದಿರ್ವೆಂ ಮ್ಹಾಕಾ"
"ರಾಜು...... ತುಂ ಆಶೆಂ ಕಿತ್ಯಾಕ್ ಉಲೈತಾಯ್?"
’ಹಾಂವ್ ಜಾಣಾ ಮೆಲ್ವಿನ್, ಹಾಂವ್ ಕಿತೆಂ ಉಲೈತಾಂಗಿ ಮ್ಹಣ್. ತುಂ ಆಜ್ ಸಗ್ಳ್ಯಾ ಬೊಂಬೈತ್ಚ್ ನ್ಹಂಯ್, ಆಖ್ಯಾ ಇಂಡಿಯಾಂತ್ಚ್ ನಾಂವಾಡ್ಲೊಯ್. ಫಾಲ್ಯಾಂ ಸಕಾಳಿಂ, ತುಜಿ ತಸ್ವೀರ್ ಆನಿಂ ಪರ್ಚಯ್ ಘೆವ್ನ್, ವರ್ತಮಾನ್ ಪತ್ರಾಂ ಗಾಂವಾರ್ ಪಸರ್ತೆಲಿಂ ಆನಿಂ ತುಜಿ ಇಷ್ಟಾಗತ್, ಜೊಡುಂಕ್ ಸಕ್ಡಾಂಯೀ ಮುಖಾರ್ ಯೆತೆಲಿಂ. ಆನಿಂ ತಾಂಚೆ ಮಧೆಂ ಸೊಭಿತ್ ಚೆಡ್ವಾಂ ಲೆಗುನ್....." ಹಾಸ್ಲೊ ರಾಜು,
"ರಾಜು.....ತುಂ ಮ್ಹಾಕಾ, ಫಾವೊ ನಾತ್ಲ್ಲಿ ಶಿಫಾರಸ್ ದಿತಾಯ್" ಕಳ್ವಳ್ಯಾಂನಿ ಮೆಲ್ವಿನಾನ್ ಮ್ಹಳೆಂ, "ನೆಣಾಂಯ್ಗಿ ತುಂ, ಜರಿತರಿ ತುವೆಂ ಮ್ಹಾಕಾ ತುಜ್ಯಾ ಘರಾಂತ್ ಆಸ್ರೊ ದೀವ್ನ್ ಸಾಂಬಾಳುಂಕ್ ನಾತ್ಲ್ಲೆಂ ತರ್, ಹಾಂವೆಂ ಭಿಕ್ ಮಾಗ್ಚೆಂ ಪಡ್ತೆಂ. ತುಂ ಮ್ಹಾಕಾ ಬೆಷ್ಟೆಂಚ್ ದುಕೈತಾಯ್"
"ನಾ ಇಷ್ಟಾ, ಹಾಂವ್ ತುಕಾ ದುಕೈನಾ. ಆನಿಂ ಹಾಂವ್ ಜಾಣಾ ತುಂ ಕೆದಾಳಾಯ್ ಮ್ಹಜೆ ಥಂಯ್ ಆದ್ಲೊ ಮೆಲ್ವಿನ್ಂಚ್ ಜಾವ್ನ್ ಉರ್ತೊಲೊಯ್ ಮ್ಹಣ್" ದೊಗೀ ಉಟ್ಲೆ. ರಾಜುನ್ ಬಿಲ್ಲ್ ಫಾರಿಕ್ ಕರ್ತಚ್ ಗರ್ಚ್ಯಾ ವಾಟೆಕ್ ಲಾಗ್ಲೆ.
ಮೆಲ್ವಿನ್ ಬೊಂಬಯ್ ಯೇವ್ನ್ ಸ ಮಹಿನೆ ಉತರ್ಲ್ಲೆ ತರೀ, ತಾಚ್ಯಾ ಅಂಕಲಾಗೆರ್ ತೊ ಎದೊಳ್ ವಚೊಂಕ್ನಾತ್ಲ್ಲೊ. ಪಯ್ಲೆಂ, ಅಂಕಲಾಚ್ಯಾ ಭಿಂಯಾನ್, ಉಪ್ರಾಂತ್ ವೆಳಾಚ್ಯಾ ಅಭಾವಾನ್. ಎಕಾನೆಕಿ ಕೊಲೆಜ್ ಸೊಡ್ನ್ ಖಬಾರ್ ದೀನಾಸ್ತಾಂ ಬೊಂಬಯ್ ಆಯಿಲ್ಲ್ಯಾ ಅಪ್ಣಾಚೊ ತಿಂ ವಿಚಾರ್ ಕರ್ತೆಲಿಂ ಮ್ಹಣ್ ಮೆಲ್ವಿನಾಕ್ ಸುಸ್ತಾಲ್ಲೆಂ ತವಳ್ ತವಳ್ ತಾಂಚೊ ಉಗ್ಡಾಸ್ ತಾಕಾ ಯೆತಾಲೊ, ತಾಂಗೆರ್ ಭೆಟ್ ದೀಜಾಯ್ ಮ್ಹಣ್ ಕೆದಾಳಾಯ್ ಮೆಲ್ವಿನ್ ಚಿಂತ್ತಾಲೊ.
ಫೆಡ್ಡಿಯಾಬಾಕ್ ಆನಿಂ ಮಿಲ್ಲಿಬಾಯೆಕ್, ಮೆಲ್ವಿನ್ ಬೊಂಬಯ್ ಆಯಿಲ್ಲಿ ಖಬಾರ್ ಆಸ್ಲ್ಲಿ. ಬೊಂಬಯ್ ಆಜ್ಯಾಪ್ಚ್ ಜಾಲ್ಲೆಂ - ಮೆಲ್ವಿನ್ ಬೊಂಬಯ್ ಕಿತ್ಯಾಕ್ ಆಯ್ಲಾಗಿ ಮ್ಹಣ್ ತ್ಯಾಪರಿಂ ಉಟಾಉಟಿಂ ತಾಣೆಂ ಗಾಂವಾಕ್ ಕಾಗದ್ ಬರೈಲ್ಲೆಂ. ಪುಣ್, ಪೂತ್ ಕಿತ್ಯಾಕ್ ಬೊಂಬಯ್ ಗೆಲಾ ಮ್ಹಳ್ಳ್ಯಾಚೆಂ ಕಾರಣ್ ಆವೈ ಬಾಪಾಯ್ಕ್ಚ್ ಗೊತ್ತು ನಾತ್ಲ್ಲ್ಯಾ ವೆಳಾರ್, ತಿಂ ಕಸಲೆಂ ಸಮಾಧಾನ್ ದಿತೆಲಿಂ?
ಮೆಲ್ವಿನ್ ಘರಾ ಯೆತೊಲೊ- ಆಶೆಂ ಚಿಂತ್ತಾಲಿಂ ತಾಚಿಂ ಅಂಕಲ್ ಆನಿಂ ಆಂಟಿ. ದಿಸಾ ಪಾಟ್ಲ್ಯಾನ್ ದಿಸ್ ಧಾಂವೊನ್, ಮಹಿನೆ ಉತರ್ಲ್ಯಾರೀ ತಾಚೊ ಪಾತ್ತೊ ನಾತ್ಲ್ಲೊ ಪಳೆವ್ನ್, ಖರೆಂಚ್ ರಾಗ್ ತಾಂಕಾಂ ಆಯಿಲ್ಲೊ.
ತರೀ ಸೈಂಭಿಕ್ ವೊಡ್ನೆನ್ ಮಿಲ್ಲಿಬಾಯ್ ಪತಿಲಾಗಿಂ ಸಾಂಗ್ತಾಲಿ - "ಮೆಲ್ವಿನ್ ಕಾಂಯ್ ಅಮ್ಚೊ ವಿಳಾಸ್ ನೆಣಾ ಕೊಣ್ಣಾ. ತುಂಚ್ ತೊ ಖಂಯ್ ರಾವ್ತಾ, ಕಿತೆಂ ಪಳೆವ್ನ್ ತಾಕಾ ಘರಾ ಏಕ್ ದೀಸ್ ಆಪೊವ್ನ್ ಹಾಡ್ನಾಂಯ್?"
"ಬರೆಂ ಸಾಂಗ್ತಾಂಯ್ ತುಂ.... ಚಿಕ್ಕೆ ವೊಗೆಂ ರಾವ್ ಮಿಲ್ಲಿ ತುಂ. ಮನ್ ಆಸ್ಲ್ಯಾರ್ ಘರಾ ಯೆತೊಲೊ. ತಾಕಾ ಯೇಂವ್ಕ್ ವ್ಹೊಡ್ಪಣಾನ್ ಪುಟ್ವಾನಾ ತರ್ ಚ್ಯಾರ್ ಮಯ್ಲಾಂ ಪಯ್ಸ್ ವಚೊಂದಿ" ಫೆಡ್ಡಿಯಾಬಾನ್ ಸಾಂಗ್ಲೆಂ.
"ತಶೆಂ ಸಾಂಗ್ಲ್ಯಾರ್ ಜಾತಾವೇ ಫೆಡ್ಡಿ. ಕಿತೆಂ ಮ್ಹಳ್ಯಾರೀ ಆಮ್ಚೊಚ್ ಭುರ್ಗೊ ನಹಿಂವೆ? ತುಂ ಏಕ್ ದೀಸ್ ಸಾಧನ್ ಕರ್ನ್ ತಾಕಾ ಸೊಧ್" ತಿಣೆಂ ಪರಾತ್ಲೆಂ.
"ಹುಂ...ಏಕ್ ದೀಸ್ ನ್ಹಂಯ್ವೆ...ತ್ಯಾ ದಿಸಾ ಪಳೆಯೆತ್"
ಆನಿಂ ಸ ಮಹಿನೆ ಗೆಲೆ ತರೀ ಮೆಲ್ವಿನ್ ತಾಂಗೆರ್ ಪಾವ್ಲೊನಾ ಆನಿಂ ಫೆಡ್ಡಿಯಾಬ್ ತಾಚ್ಯಾ ಸೊಧ್ನೆಕ್ ಗೆಲೊನಾ. ಪುಣ್ ತ್ಯಾ ದೀಸ್ ಸಕಾಳಿಂಚೆಂ ಪತ್ರ್ ವಾಚ್ತಾನಾ ಮಿಲ್ಲಿಬಾಯ್ ಹಾಂಕ್ತೆವ್ನ್ ಮ್ಹಣಾಲಿ, "ಹಾಂ......ಹೆಂ ಕಿತೆಂ, ಆಮ್ಚೊ ಮೆಲ್ವಿನ್!"
"ಹುಂ .....ಆಮ್ಚೊಚ್ ಮೆಲ್ವಿನ್...ಹಾಂವೆಂ ಪಯ್ಲೆಂಚ್ ಪಳೆಲಾಂ" ಹಾಸ್ಲೊ ಫೆಡ್ಡಿಯಾಬ್.
"ತರ್ ಮ್ಹಾಕಾ ಕಿತೆಂ ಸಾಂಗ್ಲೆನಾಂಯ್?"
"ತುವೆಂ ಆತಾಂ ಪೇಪರ್ ವಾಚ್ಲೆಂ ನ್ಹಂಯ್ವೆ ಸಾಯ್ಬಿಣಿ? ತುಜೊ ಭಾಚೊ ಬೊಂಬೈತ್ ಆಜ್ ನಾಂವಾಡ್ದಿಕ್ ಮನಿಸ್ ಜಾಲಾ. ಆಜ್ಚ್ ನ್ಹಂಯ್, ಆದ್ಲ್ಯಾ ಸ್ಪರ್ದ್ಯಾಂತ್ ಪಯ್ಲೆಂ ಸ್ಥಾನ್ ತಾಣೆಂ ಜೊಡ್ಲ್ಲೆಂ.
’ತುಂ ಮ್ಹಾಕಾ ಎಕೀ ಖಬಾರ್ಚ್ ಸಾಂಗಾನಾಂಯ್ಮೂ? ಅಮ್ಚ್ಯಾ ಭುರ್ಗ್ಯಾಚಿ ಬರ್ಯಾಪಣಾಚಿ ಖಬಾರ್ ಸಯ್ತ್ ತುಂ ಮ್ಹಜೆಥವ್ನ್ ಲಿಪೈತಾಯ್" ಶಿಣೊನ್ ಸಾಂಗ್ಲೆಂ ಮಿಲ್ಲಿಬಾಯೆನ್.
"ಇತ್ಲೆಂಚ್ ನ್ಹಂಯ್ ಬಾಯೆ" ಹಾಸ್ಲೊ ತೊ, "ಕಲ್ ತಾಚ್ಯಾ ಸ್ಪರ್ದ್ಯಾಕ್ ಹಾಂವ್ಯಿ ಪ್ರೇಕ್ಷಕ್ ಜಾವ್ನ್ ಗೆಲ್ಲೊಂ. ಮೆಲ್ವಿನಾಚೆಂ ಗಾಯನ್ಯಿ ಆಯ್ಕಾಲೆಂ ಆನಿಂ ತಾಕಾ ರೂಪ್ ರೂಪ್ ಪಳೆಲೆಂ. ತಾಚ್ಯಾ ಸರ್ಶಿಂ ವಚೊನ್ ಅಭಿನಂದನ್ ದೀಂವ್ಕ್ ಮತ್ರ್ ಸಂದ್ರಾಪ್ ಮ್ಹಾಕಾ ಮೆಳ್ಳೊನಾ. ಮೆಲ್ವಿನಾಚ್ಯಾ ಭೊಂವ್ವಾರಿಂ ಶೆಂಬರ್ ಜಣ್ ಕುಡ್ಸಾಲ್ಲೆ. ತುಂ ಕಿತೆಂ ಚಿಂತ್ತಾಯ್ ಮ್ಹಾಕಾ ಸಂತೊಸ್ ನಾ ಮ್ಹಣೊನ್ಗಿ?"
"ಹುಂ.....ತಿತ್ಲೊ ಮೋಗ್ ಆಸ್ಲ್ಲೊ ತುಂ, ತಾಕಾ ಏಕ್ ಘಡಿ ಆಮ್ಗೆರ್ ಆಪೊವ್ನ್ ಹಾಡ್ ಮ್ಹಳ್ಳೆಲ್ಯಾಕ್ ತಕ್ಲಿ ಹಾಲೈನಾಂಯ್"
"ಚೂಕ್ ಜಾಲಿ ಸಾಯ್ಬಿಣಿ, ಮ್ಹಾಕಾ ಮಾಫ್ ಕರ್. ಹಾಂವೆಂ ಆಜ್ಚ್ ಸಕಾಳಿಂ ಚಿಂತ್ಲಾಂ, ಮೆಲ್ವಿನಾಚ್ಯಾ ಆಫಿಸಾಕ್ ಫೋನ್ ಕರುಂಕ್. ಕಿತ್ಯಾಕ್ ಆತಾಂ ಹಾಂವೆಂಚ್ ತಾಚ್ಯಾ ಪಾಂಯಾಲಾಗಿಂ ವಚೊಂಕ್ಜಾಯ್. ಕಿತ್ಯಾಕ್ ಮ್ಹಜ್ಯಾಕೀ ವ್ಹಡ್ ಮ್ಹನಿಸ್ ಜಾಲಾ ತೊ" ಫೆಡ್ಡಿಯಬಾನ್ ಹಾಸೊನ್ ಸಾಂಗ್ತಾನಾ, ಮಿಲ್ಲಿಬಾಯೆಕ್ ಖರೆಂಚ್ ಸಂತೊಸ್ ಜಾಲ್ಲೊ.
ಸಾಮ್ಗ್ಲ್ಯಾ ಪ್ರಾಅರ್, ಸಕಾಳಿಮ್ ಆಪ್ಲ್ಯಾ ಆಫಿಸಾಕ್ ಪಾವ್ಲ್ಲೊಚ್, ಫೆಡ್ಡಿಯಾಬಾನ್ ಮೆಲ್ವಿನಾಕ್ ಫೊನ್ ಕೆಲೆಂ. ಪೆಪರಾಚೆರ್ ಮೆಲ್ವಿನ್ ಕಾಮ್ ಕರ್ಚ್ಯಾ ಕಂಪೆನಿಚೆಂ ನಾಂವ್ ಆಯಿಲ್ಯಾನ್ ’ನಂಬರ್’ ಸೊಧುಂಕ್ ಕಷ್ಟ್ ಲಾಗ್ಲೆನಾಂತ್ ತಾಕ್ತಾ. ಮೆಲ್ವಿನಾಕ್ ಫೊನ್ ಆಯ್ಲೆಂ ಮ್ಹಣ್ತಾನಾ ಆಜ್ಯಾಪ್ಚ್ ಜಾಲೆಂ. ಕಿತ್ಯಾಕ್, ತಾಕಾ ಕೊಣಾಚಿಂಚ್ ಫೋನಾಂ ಯೇನಾತ್ಲಿಂ.
"ಹಾಂವ್ ಮೆಲ್ವಿನ್..."
"ಮ್ಹಾಕಾ ವಳ್ಕಾನಾಂಯ್ವೆ ತುಂ...?"
"ನಾ, ವಳೊಕ್ ಮೆಳ್ಳಿನಾ.......ಕೋಣ್ ಉಲೈತಾ? ಘಾಬರ್ಲೊ ತೊ.
"ತುಜೊ ಅಂಕಲ್ ಫೆಡ್ಡಿ. ಕೊಂಗ್ರೆಚ್ಯುಲೇಶನ್ಸ್ ತುಕಾ ಮೆಲ್ವಿನ್.."
ಮೆಲ್ವಿನ್ ಶೆರ್ಮೆಲೊ. ತಾಕಾ ಕಿತೆಂ ಜಾಪ್ ದಿಂವ್ಚಿ ಕಳ್ಳಿನಾ. ಲಜೆನ್ ತೊ ಸಗ್ಳೊಚ್ ದೊಡ್ಲೊ ಆನಿಂ ಗಾಗೆಲೊ. "ಅಂಕಲ್ .....ಅಂಕಲ್ ಥ್ಯಾಂಕ್ಸ್.."
"ತುಂ ಆತಾಂ ವ್ಹಡ್ ಮನಿಸ್ ಜಾಲಾಯ್ ಮೆಲ್ವಿನ್. ಆಮ್ಕಾಂ ತುಜೊ ಉಡಾಸ್ ಆಸಾ ತರೀ, ತುಕಾ ಆಮ್ಚೊ ಉಡಾಸ್ಚ್ ನಾ ಪಳೆ. ದೆಕುನ್ ಹಾಂವೆಚ್ ತುಕಾ ’ಪೋನ್’ ಕರ್ಚೆಂ ಪಡ್ಲೆಂ."
"ಹಾಂ ಏಕ್ದಮ್ ಸೊರ್ರಿ ಅಂಕಲ್......ಮ್ಹಕಾ ಯೆಂವ್ಕ್ ಸಂದರ್ಭ್ಚ್ ಮೆಳ್ಳೊನಾ. ಆಂಟಿ ಕಶಿ ಅಸಾ ಆಂಕಲ್?"
"ಫೊನಾರ್ ಮ್ಹಾಕಾ ಸಾಂಗೊಂಕ್ ಜಾಯ್ನಾ, ತಿ ಕಶಿ ಅಸಾಗಿ ಮ್ಹಣ್. ವ್ಹಡ್ ಮನ್ಶಾಕ್ ಅಮ್ಗೆರ್ ಯೇಂವ್ಕ್ ಇನ್ವಿಟೇಶನ್ಸ್ ಛಾಪುನ್ ದಾಡಿಜಾಯ್ಗಿ ಹಾಂವೆಂ?"
"ನಾ.......ಹಾಂವ್ ಖಂಡಿತ್ ಯೆತಾಂ.....ಖಂಡಿತ್ ತುಮ್ಗೆರ್ ಯೆತಾಂ ಅಂಕಲ್"
"ದೀಸ್ ಆನಿಂ ವೇಳ್ ಕಳೈಲ್ಲೊ ತರ್, ನಾಂವಾಡ್ದಿಕ್ ಮ್ಹಜ್ಯಾ ಬಾಚ್ಯಾಕ್ ಫಾವೊತೊ ಸನ್ಮಾನ್ ಕರುಂಕ್ ಅವ್ಕಾಸ್ ಲಾಭ್ತೊ."
ಲಜೆನ್ ಮೆಲ್ವಿನಾನ್ ಸಾಂಗ್ಲೆಂ, "ಹ್ಯಾಚ್ ಆಯ್ತಾರಾ ಖಂಡಿತ್ ಯೆತಾಂ ಅಂಕಲ್. ಅಜ್ ಬುಧ್ವಾರ್ .....ಯೆಂವ್ಚ್ಯಾ ಆಯ್ತಾರಾ ಸಕಾಳಿಂ ಧಾ ವೊರಾಂಚೆರ್ ಖಂಡಿತ್ ತುಮ್ಗೆರ್ ಪಾವ್ತಾ.
"ಬರೆಂ ವಿಳಾಸ್ ಸಾರ್ಕೊ ಜಾಣಾಂಯ್ಮೂ?"
"ವ್ಹಯ್......ಘರ್ ಸೊಧುಂಕ್ ಕಷ್ಟ್ ಪಡ್ಚೆನಾಂತ್ .....ಅಂಟಿಕ್ ಮ್ಹಜೆ ರೆಕಾದ್ ತಿಳ್ಶಿ"
"ಜರೂರ್..ಬರೆಂ ತರ್, ಹಾಂ.....ಗರ್ಚೆಂ ಕಾಗಾದ್ ಆಯ್ಲಾಂಗಿ? ಮಾಂಯ್-ಬಾಬ್, ಲೆನ್ಸಿ ಕಶಿಂ ಆಸಾ ಖಂಯ್?"
"ಸಕ್ದಾಂ ಬರಿಂ ಅಸಾತ್"
"ಕಾಗದ್ ಬರೈತಾನಾ, ಹಾಂವೆಂ ರೆಕಾದ್ ದಿಲ್ಯಾತ್ ಮ್ಹಣ್ ಸಾಂಗ್. ಬರೆಂ ತರ್, ಆಯ್ತಾರಾ ದೀಸ್....ಖಂಡಿತ್ ಮೆಳ್. ಬಾಯ್ ಬಾಯ್..."
"ಬಾಯ್ ಅಂಕಲ್..."
ಮೆಲ್ವಿನಾಕ್ ಲಜ್ಯಿ ಜಾಲ್ಲಿ. ಸಾಂಗಾತಾಚ್ ಸಂತೊಸ್ಯಿ ಭೊಗ್ಲೊ. ಎದೊಳ್ ತಾಕಾ ಚಿಕ್ಕೆ ಭ್ಯೆಂ ಭೊಗ್ತಾಲೆಂ. ಆತಾಂ ತಾಣೆಂ ಜಾವ್ನ್ಂಚ್ ಆಪೊವ್ಣೆಂ ದಿಲಾಂ.
ತ್ಯಾ ದಿಸಾಚೆಂ ಕಾಮ್ ಸಂಪ್ಲೆಂ. ಸದಾಂಚ್ಯೆ ಬರಿ ಸ ವೊರಾಂಚೆರ್ ತೊ ಮ್ಯೂಜಿಕ್ ಕ್ಲಾಸಿಕ್ ಗೆಲೊ. ಅಜ್ ತಾಕಾ ಥಂಯ್ ವಚೊನ್ ಕರುಂಕ್ ಕಾಮ್ ನಾತ್ಲ್ಲೆಂ. ಪುಣ್, ಸಕ್ಕಡ್ ಸಹ - ವಿದ್ಯಾರ್ಥಿ ಅನಿಂ ಸಂಗೀತ್ ಪಂಡಿತ್ ಮೆಳ್ತೊಲೊ. ತೆ ಆಪ್ಣಾಕ್ ಖಂಡಿತ್ ಜಾವ್ನ್ ವೆಡೊ ಮಾರ್ನ್, ಅಭಿನಂದನ್ ಕರ್ತೆಲೆ.
ನಿಜಾಕ್ಯಿ ಚಿಂತಿನಾತ್ಲ್ಲೊ ಸನ್ಮಾನ್ ತಾಕಾ ಕ್ಲಾಸಿಂತ್ ಮೆಳ್ಳೊ. ಸಕ್ಕಡ್ಯಿ ಮೆಲ್ವಿನಾ ವಿಷ್ಯಾಂತ್ ವರ್ತಿ ಶಿಫಾರಸ್ ಉಲೈತಾಲಿ. ತಾಕಾ ಉಜ್ವಲ್ ಭವಿಷ್ಯ್ ಆಸಾ ಮ್ಹಣ್ ಸಾಂಗ್ತಾಲೆ. ಸಂಗೀತ್ ಪಂಡಿತ್ ಮೆಲ್ವಿನಾಕ್ ಪೊಟ್ಲುನ್ ಧರ್ನ್ಂಚ್ ಮ್ಹಣಾಲೊ - "ತುಂ ನಿಜಾಕ್ಯಿ ಆಮ್ಚ್ಯಾ ಶಾಲಾಕ್ ಏಕ್ ಭೂಷಣ್ ಮೆಲ್ವಿನ್ ಆನಿಂ ದೇಶಾಕ್ ಏಕ್ ಮಾಣಿಕ್. ತುಜೆ ತಸಲಿಂ ರತ್ನಾಂ, ಹ್ಯಾ ದೇಶಾಂತ್ ಜಲ್ಮೊಂಚಿಂ ಆಪ್ರೂಬ್. ಧನ್ಯ್ ತಿ ಅವಯ್ ತುಕಾ ವ್ಹಾವೈಲ್ಲಿ. ಆನಿಂ ತೊ ಬಾಪುಯ್ ತುಕಾ ವಾಗೈಲ್ಲೊ. ಧನ್ಯ್ ಹೊ ದೇಶ್, ಕಿತ್ಯಾಕ್ ಹ್ಯಾ ಮಾತಿಯೆಕ್ ಉಬ್ಜಾಲ್ಲೆಂ ವಜ್ರ್ ತುಂ. ಆನಿಂ ಭಾಗಿ ಹಾಂವ್, ಕಿತ್ಯಾಕ್ ಮ್ಹಜ್ಯಾ ಹಾತಾ ಖಾಲ್ ತುಂ ಕೀರ್ತಿಚೊ ಬಾವ್ಟೊ ಉಬಾರುಂಕ್ ಪಾವ್ಲೊಯ್"
ಸಟ್ಟ್ ಕರ್ನ್ ಮೆಲ್ವಿನಾಚ್ಯಾ ದೊಳ್ಯಾಂನಿ ದುಃಖಾಂ ವ್ಹಾಳ್ಳಿಂ. ಪಂಡಿತಾಚಿ ಉತ್ರಾಂ ಆಯ್ಕಾತಾನಾ ಕಾಳಿಜ್ ತಾಚೆಂ ಉಮಾಳ್ಳೆಂ. ಉತ್ರಾಂ ತಾಚ್ಯಾ ಜಿಬೆರ್ ಆಯ್ಲಿನಾಂತ್. ತ್ಯಾಚ್ ಕ್ಷಣಾ ಪಾಟ್ಲ್ಯಾನ್ ಏಕ್ ತಾಳೊ ಆಯ್ಕಾಲೊ ಆನಿಂ ಮೆಲ್ವಿನ್ ವಿಜ್ಮಿತ್ ಜಾಲೊ.
"ಆನಿಂ ಆಮಿಂಯಿ ಭಾಗಿ ಸರ್, ಕಿತ್ಯಾಕ್ ಮೆಲ್ವಿನಾಚ್ಯಾ ಸಾಂಗಾತಾ ಶಿಕೊಂಕ್ ಅಮ್ಕಾಂಯಿ ಋಣ್ ಆಸ್ಲ್ಲೆಂ" ಸಿಲ್ವಿನ್ ಹಾಸೊನ್ ಮ್ಹಳೆಂ. ಮೆಲ್ವಿನ್ ಘುವೊಂನ್ ಪಾಟಿಂ ದೆಖ್ತಾನಾ ಸಿಲ್ವಿ ಅಮ್ರುಕೆಂ ಹಾಸ್ತಾಲೆಂ. ಸಿಲ್ವಿ....ತೆಂ ಆಜ್ ಕಿತ್ಯಾಕ್ ಆಯ್ಲಾಂ..... ಹರ್ಶೆಂ ಸ್ಪರ್ಧ್ಯಾಂತ್ ಪಾತ್ರ್ ಘೆಂವ್ಚ್ಯಾ ಉದ್ದೇಶಿಂ ಸಾಂಜೆಚಿ ಕ್ಲಾಸ್ ಅಸ್ತೆಲಿ ಪುಣ್....
"ಹಲ್ಲೋ ಸಿಲ್ವಿ...." ಹಾಸ್ಲೊ ಮೆಲ್ವಿನ್.
"ಹಲ್ಲೊ ಮೆಲ್ವಿನ್..... ತುಕಾ ಮೆಳ್ಚ್ಯಾ ಉದ್ದೇಶಾನ್ ಆಜ್ ಹಾಂವ್ ಸಾಂಜೆಚ್ಯಾ ಕ್ಲಾಸಿಕ್ ಆಯಿಲಿಂ. ತುಂ ಘಾಬರ್ಲೊಯ್ ದಿಸ್ತಾ. ಮಹಾ ವ್ಯಕ್ತಿಂಕ್ ಮೆಳ್ಚೆಂ ನಿಜಕೀ ವ್ಹಡ್ ಭಾಗ್ ನ್ಹಂಯ್ಗಿ ಸರ್?"
"ಖಂದಿತ್ ಸಿಲ್ವಿಯಾ.... ತೆಂ ಭಾಗ್ ಸಕ್ಡಾಂಕ್ ಮೆಳಾನಾ" ಪಂಡಿತ್ ಅಮ್ರುಕೊ ಹಾಸೊನ್ ಸಾಂಗಾಲಾಗ್ಲೊ.
"ಸರ್....ತುವೆಂ ಆಜ್ ಆಮ್ಕಾಂ ಕ್ಲಾಸಿಕ್ ರಜಾ ದೀಜಾಯ್. ಹಾಂವ್ ಮೆಲ್ವಿನಾಕ್ ಅಪೊವ್ನ್ ವರೊಂಕ್ ಅಯ್ಲ್ಯಾ" ಸಿಲ್ವಿನ್ ಮ್ಹಳೆಂ.
"ಖಂಯ್ ವಚೊಂಕ್?" ಮೆಲ್ವಿನ್ ಅಜ್ಯಾಪ್ ಜಾವ್ನ್ ಮ್ಹಣಾಲೊ.
"ತೆಂ ಮಾಗಿರ್ ಸಾಂಗ್ತಾಂ.....ಆಮಿಂ ವಚೊಂಗಿ ಸರ್?"
"ಮ್ಹಜಿ ಅಡ್ಕಳ್ ನಾ..." ಧಾದೊಶಿ ಹಾಸ್ಲೊ ಪಂಡಿತ್.
"ಸಿಲ್ವಿ....!" ಮೆಲ್ವಿನ್ ಅನಿಕೀ ಘುಸ್ಪುಡ್ಲೊ.
"ಸಿಲ್ವಿಕ್ ರಾಕೈನಾಕಾ ಮೆಲ್ವಿನ್...... ಚೆಡ್ವಾಂಕ್ ರಾಕೊಂಕ್ ಕರ್ಚೆಮ್ ವ್ಹಡ್ ಪಾತಾಕ್ ಚಲ್, ಕ್ಲಾಸಿಕ್ ತುಕಾ ರಜಾ ಅಜ್.." ಮ್ಹಳೆಂ ಪಂಡಿತಾನ್.
ನಿರ್ವೊಗ್ ನಾಸ್ತಾಂ, ಮೆಲ್ವಿನ್ ಸಿಲ್ವಿ ಸಾಂಗಾತಾ ಭಾಯ್ರ್ ಪಡ್ಲೊ. ಕ್ಲಾಸಿಂತ್ಲೆ ವಿದ್ಯಾರ್ಥಿ, ವೆಚ್ಯಾ ತಾಂಕಾಂ ದೊಗಾಂಗಿ ಪಳೆವ್ನ್ ಮನಾಂತ್ಚ್ ಮುರ್ಗಟ್ಲೆ.
"ಮೆಲ್ವಿನ್......ತುಕಾ ಆಜ್ ತೊಂದ್ರೆ ದಿಲ್ಲ್ಯಾಕ್ ಮಾಫ್ ಕರ್...ಯೆ ಬಸ್ ಕಾರಾರ್" ತಾಣೆಂ ಬಾಗಿಲ್ ಉಗಡ್ಲೆಂ. ಮೆಲ್ವಿನ್ ಮುಖ್ಲ್ಯಾ ಸಿಟಿರ್ ಬಸ್ಲೊ.
"ಸಿಲ್ವಿ ಮ್ಹಾಕಾ ಖಂಯ್ ಆಪೊವ್ನ್ ವ್ಹರ್ತಾಯ್? ಮ್ಹಾಕಾ ಏಕೀ ಸಾಂಗಾನಾಂಯ್ ತುಂ...." ಗಾಗೆವ್ನ್ ತಾಣೆಂ ವಿಚಾರ್ಲೆಂ.
"ತುಂಚ್ ಪಳೆತೊಲೊಯ್.....ಥೊಡೊ ವೇಳ್ ರಾವ್’
ಸಿಲ್ವಿನ್ ಕಾರ್ ಚರ್ಚ್ ಗೇಟ್ ಹಾಡ್ನ್, ಮೆರಿನ್ ಡ್ರಾಯ್ವ್ ಹಾಡ್ಲೆಂ. ಥೊಡ್ಯಾ ವೆಳಾನ್ ಕಾರ್ ಚೌಪಾಟಿ ಉತರ್ನ್, ಮಲಬಾರ್ ಹಿಲ್ಲ್ ಕುಶಿಕ್ ಧಾಂವ್ಲೆಂ. ಹೆಂಗಿಂಗ್ ಗಾರ್ದನ್, ಧಾಚ್ ಮಿನುಟಾಂ ಬಿತರ್ ಕಾರ್ ಪಾವ್ತಾನಾ, ಸಿಲ್ವಿ ಮ್ಹಣಾಲೆಂ - "ಪಳೆ, ಹಾಂಗಾಚ್ ಆಮಿಂ ಆಯ್ಲ್ಯಾಂವ್. ಆತಾಂ ಉತರ್"
ದೊಗಾಂಯ್ ಕಾರಾ ವಯ್ಲಿಂ ದೆಂವ್ಲಿಂ. ಹೆಂಗಿಂಗ್ ಗಾರ್ಡನಾಚ್ಯಾ ಲಾಗ್ಸಾರ್ ಆಸಾ ತೆಂ ಮಜ್ಭೂತ್ ಆಧುನಿಕ್ ಹೊಟೆಲ್. ಸಿಲ್ವಿ ಸಾಂಗಾತಾ ಮೆಲ್ವಿನ್ ಭಿತರ್ ಮ್ಹಳೆಂ.
ಸಿಲ್ವಿಕ್ ವಳ್ಕೊಂಚೊ ತೊ ವೇಯ್ಟರ್, ಗಾರ್ಡನಾಂತ್ಲ್ಯಾ ಎಕಾ ಕೊನ್ಶಾಚ್ಯಾ ಟೇಬಲಾರ್ ತಾಂಕಾಂ ವ್ಹರ್ನ್ ಗೆಲೊ. ಭೊಂವಾರಿಂ ಥಂಯ್ ಥಂಯ್ ತರ್ನಾಟ್ಯಾಂಚಿಂ ಜೊಡಿಂ ಬಸೊನ್ ಆಸ್ಲ್ಲಿಂ.
"ಕಿತೆಂ ಹಾಡುಂ ಮೆಮ್ ಸಾಬ್?" ತಕ್ಲಿ ಬಾಗಾವ್ನ್ ವೇಯ್ಟರ್ ವಿಚಾರುಂಕ್ ಲಾಗ್ಲೊ.
"ಮೆಲ್ವಿನ್, ಕಿತೆಂ ಘೆತಾಯ್....ಡ್ರಿಂಕ್ಸ್ ....ಮ್ಹಾಕಾ ವಾಯ್ನ್.....ಮೆಲ್ವಿನ್ ಸಾಂಗ್...."
ತ್ಯಾ ವಿದೇಶಿ ಸೊರ್ಯಾಂಚ್ಯಾ ಪಟ್ಟೆಕ್ ಪಳೆಲ್ಲೊ ಮೆಲ್ವಿನ್ ಭಿಂಯಾನ್ಂಚ್ ಮ್ಹಣಾಲೊ. "ಮ್ಹಾಕಾ ಬೀರ್ ಪುರೊ ಸಿಲ್ವಿ..... ದುಸ್ರೆಂ ಕಾಂಯ್ ನಾಕಾ"
ಸಿಲ್ವಿನ್ ಖಾಣಾಕ್ ಒರ್ಡರ್ ದಿಲೆಂ, ವೇಯ್ಟರ್ ಚಲ್ಲೊ. ಮೆಲ್ವಿನಾಕ್ ತೆಂ ವಾತಾವರಣ್ ಅನಿರೀಕ್ಷಿತ್ ಜಾಲ್ಲೆಂ. ತಸಲ್ಯಾ ಹೊಟೆಲಾಕ್ ತೊ ಎದೊಳ್ ವಚೊಂಕ್ ನಾತ್ಲ್ಲೊ. ಕಸಲೊ ವೈಭವ್ ಆನಿಂ ಸೊಭಾಯ್ ಸಗ್ಳ್ಯಾಂನಿ ದಿಸ್ತಾ.
ಭಂವ್ತಣಿ, ಖಂಯ್ ದೀಷ್ಟ್ಯ್ ವ್ಹರ್ತಾನಾಂಯಿ ದಿಸ್ತಾತ್ ವಿವಿಧ್ ಫುಲಾಂ. ಸುರ್ಯೊ ಆತಾಂ ಬುಡ್ಲಾ ಆನಿಂ ಸಂಸಾರ್ ತಾಂಬ್ಡ್ಯಾ ರಂಗಾನ್ ಪ್ರಜಳ್ತಾ. ಹೊಟೆಲಾ ಭಿತರ್ ಥಾವ್ನ್ ಸುಮಧುರ್ ಗಾಯನಾಚೊ ನಾದ್ ವ್ಹಾಳೊನ್ ಯೆತಾ. ಮುಖ್ಲ್ಯಾ ಮೆಜಾರ್ಯಿ ವಾಜಾಂತ್ ಸುಂದರ್ ಫುಲಾಮ್ ನೆಟವ್ನ್ ದವರ್ಲ್ಯಾಂತ್.
"ಸಿಲ್ವಿ, ಬಹುಶಃ ತುಕಾ ಗಾರ್ಡನ್ ಆನಿಂ ಫುಲಾಂ ಪಳೆಂವ್ಚಿ ಆಶಾ ಆಯಿಲ್ಲಿ ದಿಸ್ತಾ. ನ್ಹಂಯ್ ತರ್, ಪಯ್ಲೆಂಚ್ ಮ್ಹಾಕಾ ಸಾಂಗ್ಲ್ಲೆಂಯ್ ತರ್, ಹಾಂವ್ ಕಾಂಯ್ ನಾ ಮ್ಹಣ್ತೊನಾ. ಫುಲಾ ಮ್ಹಳ್ಯಾರ್ ಮ್ಹಾಕಾಯ್ ಪಿಸಾಯ್..." ಹಾಸೊನ್ ಮ್ಹಣಾಲೊ ಮೆಲ್ವಿನ್.
"ಮ್ಹಜಿ ಜಲ್ಮಾ ಥಾವ್ನ್ ಅಯಿಲ್ಲಿ ಸವಯ್. ಪುಲಾಂ ಮ್ಹಳ್ಯಾರ್ ಮ್ಹಾಕಾ ಜೀವ್" ಅಮ್ರುಕೆಂ ಹಾಸೊನ್ ಸಿಲ್ವಿನ್ ಜಾಪ್ ದಿಲಿ. "ದೆಕುನ್ ತುಕಾಯಿ ಫುಲಾಂ ಪಳೆಂವ್ಕ್ ಆಪೈಲೆಂ.
"ಆಯ್ಚ್ಯಾ ದಿಸಾ ವಿಶೇಷ್ ಆಪವ್ಣ್ಯಾಚೊ ಇರಾದೊ ಮ್ಹಾಕಾ ಸಮ್ಜೊಲೊನಾ."
"ಇರಾದೊ ಸರಳ್... ಶ್ರೆಷ್ಟ್ ಗಾಯಕಾಕ್ ಮಾನ್ ಕರುಂಕ್" ತಿರ್ಕಾಸ್ ದೀಷ್ಟ್ ಮೆಲ್ವಿನಾಚೆರ್ ಫಾಂಕೊವ್ನ್ ತೆಂ ಮ್ಹಣಾಲೆಂ. ಸಿಲ್ವಿಚೆಂ ಮುಖಮಳ್ ಪ್ರಜಳ್ತಾಲೆಂ. ತೆ ಕಾಜುಲ್ಯಾ ತಸಲೆ ದೊಳೆ ಹಾಸ್ತಾತ್ಶೆ ದಿಸ್ಲೆ. ಸ್ವಾಭಾವಿಕ್ ತಾಂಬ್ಡ್ಯಾ ವೊಂಟಾರ್ ಖೆಳ್ಚೊ ತೊ ಮಧುರ್ ಹಾಸೊ...... ವ್ಹಾಳ್ಚ್ಯಾ ವಾರ್ಯಾಕ್ ಧಲ್ಚೆ ಮುಖ್ಲೆ ಕೇಸ್... ಕಸಲಿ ಸುಂದರ್ ದೇವಿ ಹೆಂ ಸಿಲ್ವಿ........ಬಲಾತ್ಕಾರಾನ್ ಸಿಲ್ವಿ ವಯ್ಲಿ ದೀಷ್ಟ್ ಕಾಡ್ನ್ ತಾಣೆಂ ಧರ್ಣಿರ್ ಜೊಕ್ಲಿ.
"ಮೆಲ್ವಿನ್, ಕಲ್ ತುಕಾ ಫಾವೊತ್ಯಾ ಪರಿಂ ಸಾಂಗೊಂಕ್ ಮ್ಹಾಕಾ ಸಂದರ್ಭ್ ಮೆಳ್ಳೊನಾ. ತ್ಯಾಚ್ ಇರಾದ್ಯಾನ್ ಆಜ್ ತುಕಾ ಹಾಂವೆಂ ಹಾಂಗಾಂ ಆಪೈಲೆಂ. ಕಿತ್ಯಾಕ್, ತುಜಿ ವಳೊಕ್ ಜಾಲ್ಲಿ, ಮ್ಹಜ್ಯಾ ಜೀವನಾಂತ್ ಏಕ್ ವರ್ತೆಂ ಭಾಗ್..."
"ರಾವ್ ಸಿಲ್ವಿ......" ಮಧೆಂಚ್ ತೊ ಉಲೈಲೊ. "ತುಂ ಕಿತೆಂ ಉಲೈತಾಯ್ ಮ್ಹಾಕಾಚ್ ಸಮ್ಜಾನಾ. ಥೊಡ್ಯಾ ದಿಸಾಂ ಆದಿಂ, ಆಮ್ಚಿಂ ವಳೊಕ್ ಜಾಲಿ - ಎಕಾ ವಿಚಿತ್ರ್ ಸಂದರ್ಭಾರ್. ತ್ಯಾ ಘಡಿಯೆಥಾವ್ನ್ ಹಾಂವೆಂ ಚಿಂತ್ಲಾಂ, ಎಕಾ ಶ್ರೀಮಂತ್ ಬ್ಯಾರಿಸ್ಟರಾಚ್ಯಾ ಧುವೆನ್ ಎಕ್ಲ್ಯಾ ಗರಿಬಾಚಿ ಇಷ್ಟಾಗತ್ ಕರ್ಚಿ ಕಸಲೆಂ ನವಾಲ್ಗಿ ಮ್ಹಣ್..."
ಸಿಲ್ವಿಚೆಂ ತೊಂಡ್ ವರ್ಣಾಂತರ್ ಜಾಲ್ಲೆಂ. ತೆಂ ಜಾಪ್ ದೀಂವ್ಕ್ ಚಿಂತ್ತಾನಾಂಚ್ ವೇಯ್ಟರ್ ಪ್ರವೇಶ್ ಜಾಲೊ. ವಾಯ್ನ್, ಬೀರ್ ಆನಿಂ ಖಾಣ್ ಮೆಜಾರ್ ಮಾಂಡುನ್ ದವರ್ತಚ್ ತೊ ಚಲ್ಲೊ.
"ಘೆ ಮೆಲ್ವಿನ್..." ಭಾರಾಧಿಕ್ ತಾಳ್ಯಾನ್ ಸಿಲ್ವಿನ್ ಗ್ಲಾಸ್ ಉಕಲ್ನ್ ಮ್ಹಳೆಮ್. "ತುಜ್ಯಾ ಮಾನಾಕ್...."
ಸಿಲ್ವಿಚ್ಯಾ ತಾಳ್ಯಾಂತ್ಲೆಂ ಶೆಳೆಪಣ್ ಮೆಲ್ವಿನಾಚ್ಯಾ ಗಮನಾಕ್ ಆಯ್ಲೆಮ್. ಆಪ್ಣೆ ಉಲೈಲ್ಲಿಂ ಉತ್ರಾಂ ಸಿಲ್ವಿಕ್ ದುಕ್ಲಿಂ ಮ್ಹಣ್ ಕಳ್ಳೆಂ ತಾಕ್ತಾ. ಆಪ್ಲೊಯಿ ಗ್ಲಾಸ್ ಉಕಲ್ನ್, ಏಕ್ ಘೊಟ್ ತಾಣೆಂ ಘೊಟ್ಲೊ.
"ಮೆಲ್ವಿನ್ ..." ವಾಜಾಂತ್ಲ್ಯಾ ಫುಲಾಂಕ್ ಪಳೆವ್ನ್ ಸಿಲ್ವಿ ಉಲೈಲೆಂ. ತಾಚ್ಯಾ ದೊಳ್ಯಾಂನಿ ದುಃಖಾಂ ಭರ್ಲ್ಲಿಂ. "ಹಿಂ ಫುಲಾಂ ಪಳೆ... ಕಿತ್ಲಿಂ ಸೊನ್ಹಿತ್ ಆನಿಂ ಕಿತ್ಲಿ ಉಣಿ ತಾಂಚಿ ಬಾಳ್ವಿ. ಹಾಂವ್ ಬ್ಯಾರಿಸ್ಟರಾಚಿ ಧುವ್ ವ್ಹಯ್..... ಪುಣ್ ಪಪ್ಪಾನ್ ಮ್ಹಾಕಾ ಗ್ರೇಸ್ತ್ಕಾಯೆಚೊ ಮೋಗ್ ಶಿಕಂವ್ಕ್ ನಾ.....ಹಿಂ ಫುಲಾಂ ಕಿತ್ಲಿಂ ನಶ್ವರ್ ಮ್ಹಣ್ ಲೆಕ್ತಾಂಗಿ ಹಾಂವ್, ತಶಿಚ್ ಹಿ ಗ್ರೇಸ್ತ್ಕಾಯ್ ಮ್ಹಣ್ ಸಮ್ಜಾಲ್ಯಾ"
"ಹಾಂವೆಂ ತ್ಯಾ ಅರ್ಥಾನ್ ಮ್ಹಣೊಂಕ್ ನಾ ಸಿಲ್ವಿ....." ಕಂಗಾಲ್ ಜಾವ್ನ್ ಮೆಲ್ವಿನಾನ್ ಮ್ಹಳೆಂ. "ಹಿಂ ಉತ್ರಾಂ ಉಲಂವ್ಕ್ ಕಾರಣ್ ಕಿತೆಂಗಿ ಮ್ಹಳ್ಯಾರ್, ಮ್ಹಜೆ ಸಾಂಗಾತಾ ತುಂ ಆಸ್ಚೆಂ ಪಳೆವ್ನ್ ಲೋಕ್ ತುಕಾ ಉಲೈತೊಲೊ. ತುಜಿ ನಿಂದಾ ಕರ್ತಾಲೊ"
"ಓ..... ಲೊಕಾಕ್ ಭಿಯೆಲೊಯ್ಗಿ ಮೆಲ್ವಿನ್? ಹಾಂವ್ ಜಾಣಾ ವ್ಹೊ ಲೋಕ್ ಎದೊಳ್ಚ್ ಮ್ಹಜೆ ವಿಷ್ಯಾಂತ್ ಕಿತೆಂ ಉಲೈತಾ ಆನಿಂ ಕಿತೆಂ ಉಲೈತಾಗಿ ಮ್ಹಣ್..."
"ತಿ ಸಂಗತ್ ಹಾಂವ್ಯಿ ಜಾಣಾ...." ರಾಜುಚಿಂ ಉತ್ರಾಂ ನಿಯಾಳ್ನ್ ತೊ ಮ್ಹಣಾಲೊ.
"ಕಿತೆಂ ಜಾಣಾಂಯ್..?" ವಿಜ್ಮಿತ್ ಜಾಲ್ಯಾ ತಾಳ್ಯಾನ್, ಸಿಲ್ವಿನ್ ವಿಚಾರ್ಲೆಂ.
"ತುಜ್ಯಾ ಜೀವನಾಚಿ ದುಃಖಿ ಕಥಾ ಹಾಂವೆಂ ಆಯ್ಕಾಲ್ಯಾ ಸಿಲ್ವಿ. . ತ್ಯಾ ಶಿವಾಯ್ ಲೊಕಾನ್......"
ಮೆಲ್ವಿನಾನ್ ವಾಕ್ಯೆಂ ಪೂರ್ಣ್ ಕೆಲೆಂನಾ.
ಸಿಲ್ವಿಚೆಂ ಮುಖ್ ಬಾವೊನ್ ಗೆಲೆಂ. ದೊಳ್ಯಾಂತ್ಲ್ಯಾನ್ ಖಳನಾಸ್ತಾಂ ದುಃಖಾಂ ವ್ಹಾಳ್ಳಿಂ. ಸುಸ್ಕಾರೊನ್ ರಡ್ಚ್ಯಾ ಸಿಲ್ವಿಚ್ಯಾ ತೊಂಡಾಂತ್ಲ್ಯಾನ್ ಅಸ್ವಷ್ಟ್ ಉತ್ರಾಂ ಭಾಯ್ರ್ ಪಡ್ಲಿಂ....."ಸಾಂಗ್ ಮೆಲ್ವಿನ್..... ಕಿತ್ಯಾಕ್ ಬಂಧ್ ಕೆಲಿಂಯ್ ತುಜಿ ಉತ್ರಾಂ....? ಹೆಂಚ್ ತುಂ ಸಾಂಗೊಂಕ್ ಚಿಂತ್ತಾಲೊಯ್-ಮೂ, ಕಿ ವ್ಹೊ ಲೋಕ್ ಉಲೈತಾ, ಹಾಂವ್ ತರ್ನಾಟ್ಯಾಂ ಸಂಗಿಂ ಭೊಂವೊನ್ ಮಝಾ ಮಾರ್ತಾಂ ಮ್ಹಣ್? ಏಕ್ ವಿಧವ್ .......ಜಿಕಾ ನ್ಹಂಯ್ ಎಕಾ ಮನ್ಶಾಚೆಂ ಸ್ಥಾನ್, ಬಗಾರ್ ಎಕಾ ನೀಚ್ ಮನ್ಜಾತಿಚ್ಯಾಕೀ ಪಾಸ್ಟ್ ಸ್ಥಾನ್ ಆಸಾಜಾಯ್ ಮ್ಹಣ್ ಚಿಂತ್ಚಿ ಹಿ ಸಮಾಜ್, ಹ್ಯಾ ಸಿಲ್ವಿನ್ ಕರ್ಚ್ಯಾ ಗುಪಿತ್ ಪಾತ್ಕಾಂಚೆಂ ಲೆಕ್ ದೀಂವ್ಕ್ ಭಾಯ್ರ್ ಸರ್ಲ್ಯಾ? ಹಾಯ್..... ನಾ, ಹ್ಯಾ ಸಂಸಾರಾಂತ್ ಎಕಾ ವಿಧ್ವಿನ್ ಜಿಯೆಂವ್ಕ್ ನಜೊ. ವಾಂಚ್ಲ್ಯಾರೀ ಘರಾ ಭಾಯ್ರ್ ಪಾಂಯ್ ದವರುಂಕ್ ನಜೊ. ಆನಿಂ ಮ್ಹಜೊ ಪಾಪ್ಪಾ ಸಾಂಗ್ತಾಲೊ ಕೆದಾಳಾಯ್ ಉಲೈತಾಲೊ.....’ಸಿಲ್ವಿ......ಕಾವ್ಳ್ಯಾಂಚ್ಯಾ ರಾಜಾಂತ್, ಕೊಗುಳೆನ್ ಜಿಯೆಂವ್ಕ್ ನಜೊ ಜಿಯೆಲ್ಯಾರೀ ಪುತಾ, ಕೊಗುಳೆಬರಿ ಗಾಯನ್ ಕರುಂಕ್ ನಜೊ....’ ನಾ...ನಾ ..ಪಪ್ಪಾ....ಹಾಂವ್ ಕೊಗುಳ್ ನ್ಹಂಯ್.... ಏಕ್ ನೀಜ್...ಮರ್ಯಾದ್ ಹೊಗ್ಡಾಯಿಲ್ಲೆಂ ಕಸಾಪ್ಪಿ..." ಆನಿಂ ತೆಂ ತಕ್ಲಿ ಬಾಗಾವ್ನ್ ರಡೊಂಕ್ ಲಾಗ್ಲೆಂ.
(ಭಂವಾರಿಂಚ್ಯಾ ಫುಲಾಂನಿ ಕಾಂತಿ ಲಿಪೈಲ್ಲಿಗಿ? ವ, ಸಾಂಜೆಚೆಂ ಶೀತಳ್ ವಾತಾವರಣ್, ತ್ಯಾ ಫುಲಾಂಚೊ ಸ್ವಾದ್.....ತೆಂ ಮಧುರ್ ಮಿಲನ್ ಆಶೆವ್ನ್ ಆಯಿಲ್ಲೆಂ ಸಿಲ್ವಿ..... ಪುಣ್ ಆತಾಂ.....ಆತಾಂ ಮೆಲ್ವಿನ್ ಮೊಳಾಬ್ ತಕ್ಲೆರ್ ಕೊಸಾಳ್ಲ್ಲ್ಯಾ ಜಿನ್ಸಾರ್ ಬಸ್ಲ್ಲೊ...ತಾಚಿಂ ಚಿಂತ್ನಾಂ ಯೆಂವ್ಚ್ಯಾ ಅಂಕ್ಯಾಂತ್ ವಾಚಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
