ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್: ಏಕ್ ಸಾಮಾಜಿಕ್ ಕಾದಂಬರಿ, ಕಾಳ್ ಬದಲ್ಲೆಲ್ಯಾ, ಸಂಸಾರ್ ಬದಲ್ಲೆಲ್ಯಾ ಹ್ಯಾ ಕಾಳಾರ್ ಸಯ್ತ್ ಕೆದಿಂಚ್ ಬದ್ಲೊಂಕ್ ಸಾಧ್ಯ್ ನಾಸ್ಚಾಚಿ ಖರಿ ರುಜ್ವಾತ್ ದಿಂವ್ಚಿ ಕಾದಂಬರಿ.
ಜಲ್ಮಾಲ್ಲಿ ತಾರಿಕ್: 14 ದಸೆಂಬರ್ 1941.
ಪತಿಣ್: ಬರ್ನಾಡೆಟ್ ಡಿ’ಕೋಸ್ತಾ.
ಆವಯ್ ಬಾಪಾಯ್ಚೆಂ ನಾಂವ್: ದೆ|ಆಲಿಸ್ ಡಿ’ಕೋಸ್ತಾ ಆನಿ ದೆ|ಬೆಂಜಮಿನ್ ಡಿ’ಕೋಸ್ತಾ.
ದೋಗ್ ಪೂತ್: ಅಶ್ವಿನ್ ಆನಿ ರೋಹಿತ್.
ಇಸ್ಕೊಲ್ ಆನಿ ಕೊಲೆಜ್: ಸಾಂ. ಲುವಿಸ್ ಕೊಲೆಜ್ ಮಂಗ್ಳುರ್ (1962 ಇಸ್ವೆಂತ್ ಬಿ.ಕಾಮ್ ಸಂಪಯ್ಲೆಂ).
ಸಾಹಿತಿಕ್ ಸುರ್ವಾತ್ ಆನಿ ವಾವ್ರ್: 1954 ಇಸ್ವೆಂತ್ ಪಯ್ಲಿ ಮಟ್ವಿ ಕಾಣಿ ’ಮಿತ್ರ್’ ಪತ್ರಾರ್ ಪರ್ಗಟ್ ಜಾಲಿ. ಝೆಲೊ, ಪಯ್ಣಾರಿಚೆರ್ ಸುಮಾರ್ 150 ವಯ್ರ್ ಲೇಖನಾಂ, ಕಾಣ್ಯೊ, ವಿಡಂಬನಾಂ ಬರಯ್ಲ್ಯಾಂತ್.
ಕಾದಂಬರಿ: 4 (ಝೆಲೊ ಆನಿ ಪಯ್ಣಾರಿ ಪತ್ರಾರ್ ಪರ್ಗಟ್ ಜಾಲ್ಯಾತ್).
ನಾಟಕ್: 3.
ನಾಟಕ್ ನಿರ್ದೇಶನ್: 8.
ಪದಾಂ: 100 (ಫಕತ್ತ್ ನಾಟಕಾಂಕ್ ಆನಿ ರೇಡಿಯೊಚೆರ್).
ರೇಡಿಯೊಚೆರ್ ಗಾಯ್ಲೆಲಿಂ ಪದಾಂ: 12.
ಪಯ್ಣಾರಿ ಪತ್ರಾಚಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್: 1965 - 1970.
ಪಯ್ಣಾರಿ ಪತ್ರಾಚೊ ಗೌರವ್ ಸಂಪಾದಕ್ ಜಾವ್ನ್: 1966 - 1970.
ಸುರ್ವಿಲಿಂ ದೋನ್ ಉತ್ರಾಂ
ಎಕಾಚ್ ಕಾದಂಬರೆಕ್ ದೋನ್ ಪಾವ್ಟಿಂ ಸುರ್ವಿಲಿಂ ಉತ್ರಾಂ ಬರಂವ್ಚೊ ಸಂದರ್ಭ್ ಯೆಂವ್ಚೊ ಭೋವ್ ಅಪ್ರೂಪ್. ಪುಣ್ ಹ್ಯಾ ದೋನ್ ಸುರ್ವಿಲ್ಲ್ಯಾ ಉತ್ರಾಂ ಮಧೆಂ ಅಂತರ್ ಆಸಾ, 45 ವರ್ಸಾಂಚೊ ಅಂತರ್.
ಸುಮಾರ್ 33 ವರ್ಸಾಂ ಉಪ್ರಾಂತ್ ಪರತ್ ಏಕ್ ಪಾವ್ಟಿಂ ಮ್ಹಜ್ಯಾ ಮೊಗಾಚ್ಯಾ ಕೊಂಕ್ಣಿ ವಾಚ್ಪ್ಯಾಂ ಲಾಗಿಂ ಸಂವಾದ್ ಕರ್ಚೊ ಸುಯೋಗ್ ಮ್ಹಾಕಾ ಲಾಭ್ಲ್ಲೊ 2003 ಇಸ್ವೆಂತ್, ಜೆದ್ನಾಂ ಮ್ಹಜಿ ಕಾದಂಬರಿ ’ನಿಮಾಣಿಂ ದುಖಾಂ’ ದಿವೊ ಪತ್ರಾಚೆರ್ ಪರ್ಗಟ್ ಜಾಂವ್ಚೆ ವೆಳಾರ್. ತಿ ಕಾದಂಬರಿ 1969 ಇಸ್ವೆಂತ್ ಬರಯಿಲ್ಲಿ ಜಾವ್ನಾಸಾ. ಆತಾಂ ಪರತ್ ಏಕ್ ಪಾವ್ಟಿಂ ಮ್ಹಜ್ಯಾ ’ನಿರ್ಭಾಗ್ಯಾಚೆಂ ಸ್ವಪಾಣ್’ ಕಾದಂಬರೆಕ್ ದೋನ್ ಉತ್ರಾಂ ಬರಂವ್ಚೊ ಸುಯೋಗ್. ಪುಣ್ ಹ್ಯಾ ದೊನ್ಯೀ ಸುಯೋಗಾಕ್ ಮೂಳ್ ಕಾರಣ್ ಜಾಲ್ಲೊ ವೆಕ್ತಿ ಎಕ್ಲೊಚ್; ಕೊಂಕ್ಣೆಂತ್ಲೊ ಫಾಮಾದ್ ಸಿಂತಿಮೆಂತಾಳ್ ಬರವ್ಪಿ ಜೆರೋಮ್ ಪಿರೇರಾ (ಜೆಮ್ಮಾ ಪಡೀಲ್). ದೇವ್ ಬರೆಂ ಕರುಂ ತುಕಾ ಜೆಮ್ಮಾ ಪಡೀಲ್. ಚಡ್ತಿಕ್ ಹಾಂವ್ ತುಜೆವಿಶಿಂ ಉಲಂವ್ಕ್ ಧರಿನ್ ತರ್ ಮ್ಹಜ್ಯಾ ದೊಳ್ಯಾಂನಿ ದುಖಾಂ ಝರಿ ಉದೆತಿತ್. ಜೆಮ್ಮಾನ್ ಮ್ಹಾಕಾ ವಲ್ಲಿಚಿ ವಳೊಕ್ ಕರುನ್ ದಿಲಿ ಆನಿ ಹಾಚೆಂ ಫಳಿತಾಂಶ್ ತುಮ್ಚೆಸಮೊರ್ ಆಸಾ.
ಆತಾಂ ಲಗ್ಬಗ್ 45 ವರ್ಸಾಂ ಉಪ್ರಾಂತ್ ಹ್ಯಾ ಕಾದಂಬರೆವಿಶಿಂ ದೋನ್ ಉತ್ರಾಂ ಬರಯ್ತಾನಾ, ತವಳ್ಚೊ ಕಾಳ್, ಜಿಣಿ, ಲೋಕ್ ಆತಾಂ ಬದಲ್ಲಾ. ಕೆದ್ನಾಂಯ್ ಹಾಂವ್ 1960 ಚೆಂ ಫಿಲ್ಮ್ ಪಳೆತಾನಾ ಮ್ಹಾಕಾಚ್ ಥೊಡೆಪಾವ್ಟಿಂ ತ್ಯಾ ವೆಳಾಚಿ ತಾಂತ್ರಿಕತಾ, ವಾ ಹೆರ್ ಸವ್ಲತಾಯೊ ಆಯ್ಚಾ ಕಾಳಾಸವೆಂ ತುಲನ್ ಕರ್ತಾನಾ ಹಾಸೊಂಕ್ ಯೆತಾ. ಅಸಲೆಂಚ್ ಚಿಂತಾಪ್ ಸಾಹಿತ್ಯಾಂತ್ಯೀ ಪಳೆಂವ್ಕ್ ಮೆಳ್ತಾ. ಆಯ್ಚೆ ವಾಚ್ಪಿಯೀ ಅಸಲೆಂಚ್ ಚಿಂತಾಪ್ ಚಿಂತಿತ್ ತರ್ ತಾಂತುಂ ಕಿತೆಂಚ್ ನವಾಲ್ ನಾ. ಇತ್ಲೆಂ ಸರ್ವ್ ಬದಲ್ಲಾಂ ತರ್ಯೀ ಸತ್ ಸಾಂಗ್ಚೆಂ ತರ್ ಸಂಸಾರಾಂತ್ ಜಾಯ್ತೆಂ ಅಜೂನ್ ಬದ್ಲೊಂಕ್ ನಾ ಆನಿ ಕೆದಿಂಚ್ ಬದಲ್ಚೆಂಯೀ ನಾ. ಏಕ್ ಬರವ್ಪಿ ಜಾವ್ನ್ ಹಾಂವ್ ಜಾಯ್ತೆಂ ಸ್ವಪ್ಣೆಲ್ಲೊಂ. ಜಶೆಂ ಆಯ್ಚಾ ಬರವ್ಪ್ಯಾಂನಿ ಸ್ವಪ್ಣೆಂವ್ಚೆಪರಿಂ. ಆಮ್ಚಿಂ ಸ್ವಪ್ಣಾಂ, ಆಮ್ಚಿಂ ಕಲ್ಪನಾಂ, ಆಮ್ಚ್ಯೊ ಭೃಮಿದೊ ಸಂಸಾರಾ ಹುಜಿರ್ ಲೊಕಾಂನಿ ಪಾತ್ಯೆಶೆಂ ಕರ್ಚೆರಿತಿರ್ ಅಭಿವ್ಯಕ್ತ್ ಕರ್ತಾಂವ್. ಆಮ್ಚೊ ಅನ್ಭೋಗ್, ಆಮ್ಚೆ ಅತ್ರೆಗ್, ಆಮ್ಚೆಂ ದೂಕ್, ಆಮ್ಚೊ ಸಂತೊಸ್ - ಹರ್ಯೆಕ್ ಆಮ್ಚಾ ಕಾಣ್ಯಾಂನಿ ಸಭಾರ್ ವಿಧಾನಾಂನಿ ವಾಚ್ಪ್ಯಾಂಕ್ ಪಿಂತ್ರಾಯ್ತಾಂವ್. ಹಿ ಪ್ರಾಮಾಣಿಕ್ ಅಭಿವ್ಯಕ್ತಿ, ಮ್ಹಜ್ಯಾ ಹ್ಯಾ ಕಾದಂಬರೆಂತ್ಯೀ ಅಸಲೆಂಚ್ ಸಭಾರ್ ಆಸಾ, ಥೊಡೆಂ ಮ್ಹಜ್ಯಾ ಜಿಣ್ಯೆಂತ್ ಘಡ್ಲ್ಲೆಂ. ಥೊಡೆಂ ಹಾವೆಂ ಸ್ವಪ್ಣೆಲ್ಲೆಂ. ಮನ್ಶಾಕುಳಾಚಾ ಚರಿತ್ರೆಂತ್ ಬರವ್ಪ್ಯಾಂನಿ ಬರಿ ವಾಟ್ ಧಾಖಯ್ಲ್ಯಾ, ವಾಚ್ಪ್ಯಾಚ್ಯಾ ಮತಿಚೆರ್ ಬರೊ ಪ್ರಭಾವ್ ಘಾಲಾ. ಸಾಮಾಜಿಕ್ ಪರಿವರ್ತನ್/ಬದ್ಲಾವಣೆಕ್ ಪ್ರೇರಣ್ ದಿಲಾಂ. ನ್ಯಾಯ್ ನಿತಿಖತಿರ್ ಝುಜ್ ಮಾಂಡ್ಲಾಂ, ಭ್ರಷ್ಟಾಚಾರಾವಿರೋದ್ ಆವಾಜ್ ಉಟಯ್ಲಾ. ಅಸಲ್ಯಾ ಚಡ್ತಾವ್ ಬರವ್ಪ್ಯಾಂನಿ ಆಮ್ಕಾಂ ಅಪುಟ್ ಸಂತೊಸ್ ದಿಲಾ. ಎಕಾ ಬರ್ಯಾ ಕಾಣ್ಯೆಕ್ ಹ್ಯಾ ಸಂಸಾರಾಂತ್ ಸರಿ ನಾ. ಕೊಣ್ಯೀ ಸಂಸಾರಾಂತ್ ಆಸ್ತ್ ಬದಿಕ್ ಹೊಗ್ಡಾವ್ನ್, ಸಂಸಾರಿ ಧನ್ ದಿರ್ವೆಂ ಹೊಗ್ಡಾಯ್ತ್ ಪುಣ್ ಜೊ ಕೊಣ್ ಖರೊ ಕಾಣ್ಯೆಗಾರ್, ತೊ ಕೆದಿಂಚ್ ಅಪ್ಲಿ ಸಾಹಿತಿಕ್ ಆಸ್ತ್ ಹೊಗ್ಡಾಂವ್ಕ್ ಸಕ್ಚೊನಾ. ಕಿತ್ಯಾಕ್ ತೊ ತ್ಯಾ ಆಸ್ತಿಸವೆಂ ಜಲ್ಮತಾ ಆನಿ ತೆಚ್ಚ್ ಆಸ್ತೆಸವೆಂ ಮೊರ್ತಲೊ.
ದುರಾದೃಷ್ಟೆನ್, ಮ್ಹಾಕಾ ಭುರ್ಗ್ಯಾಪಣಾರ್ ಥಾವ್ನ್ ಏಕ್ ಬರವ್ಪಿ ಜಾಯ್ಜಯ್ ಮ್ಹಳ್ಳಿ ಖತ್ಕತಿ ಆಶಾ ಆನಿ ಹಟ್, 1970 ಇಸ್ವೆ ಉಪ್ರಾಂತ್ ಉರ್ಲಿನಾ. ಹಾಕಾ ಸಭಾರ್ ಕಾರಣಾಂ ಆಸಾತ್. ಮ್ಹಜ್ಯಾ ದೀಸ್ಪೊಡ್ತ್ಯಾ ಗ್ರಾಸಾಕ್ ಸೊಧುನ್ ಹಾಂವ್ ಪರ್ಗಾಂವ್ ಧರ್ಲೊ ಆನಿ ಉಪ್ರಾಂತ್ ಭುರ್ಗ್ಯಾಂಕ್ ಬರೆಂ ಶಿಕಾಪ್, ಬರೊ ಫುಡಾರ್ ದಿಂವ್ಚೆ ಪಾಸತ್ ಮ್ಹಾಕಾಚ್ ಕೊಂಕ್ಣೆ ಥಾವ್ನ್ ಭೋವ್ ಪಯ್ಸ್ ರಾವೊಂಕ್ ಪಡ್ಲೆಂ. ಪುಣ್ ಮ್ಹಜ್ಯಾಕೀ, ಮಾಲ್ಘಡ್ಯಾ ಮಹಾನ್ ಕೊಂಕ್ಣಿ ಸಾಹಿತಿಂ ಸಮೊರ್ ಹಾಂವ್ ಫಕತ್ತ್ ಏಕ್ ಲ್ಹಾನ್ ಕಣ್. ತಾಣಿಂ ಕೊಂಕ್ಣೆಕ್ ದಿಲ್ಲ್ಯಾ ಅಮೊಲಿಕ್ ವಾವ್ರಾಮುಖಾರ್ ಹಾಂವ್ ಕಿತೆಂಚ್ ನ್ಹಂಯ್. ಮ್ಹಜ್ಯಾ ಭುರ್ಗ್ಯಾಪಣಾರ್ ಥಾವ್ನ್ ಅಸಲ್ಯಾ ಮಹಾನ್ ಸಾಹಿತಿಂನಿ ದಿಲ್ಲೊ ಸಂತೊಸ್ ಆನಿ ಸಮಧಾನ್, ಹಾಂವ್ ತರ್ನಾಟೊ ಜಾತಾನಾ ಸಯ್ತ್ ಭಗ್ತಾಲೊಂ. ತಾಣಿಂ ತಾಂಚ್ಯಾ ಸಾಹಿತ್ಯಾಧ್ವಾರಿಂ ಮ್ಹಜೆಂ ಅಪ್ಲೆಂ ದೂಕ್ ವಿಸ್ರಾಶೆಂ ಕೆಲ್ಲೆಂ. ಭಿಲ್ಕುಲ್ ಆಮ್ಚಾ ಆಯ್ಚಾ ಲೇಖಕಾಂನಿ ಕರ್ಚೆಪರಿಂ. ಆನಿ ಖರೋಖರ್ ಜಾವ್ನ್ ಏಕ್ ಬರವ್ಪಿ ಬರಯ್ತಾ ವಾಚ್ಪ್ಯಾಂ ಖಾತಿರ್ ಮ್ಹಣ್ತಚ್, ತಸಲ್ಯಾಂಚ್ಯಾ ಸಹಾಕಾರಾ ಶಿವಾಯ್, ಪಾಟಿಂಬ್ಯಾ ಶಿವಾಯ್ ಬರವ್ಪಿ ಉರಾನಾ. ಬರವ್ಪಿ ಮಾತ್ರ್ ನ್ಹಂಯ್, ಕೊಂಕ್ಣಿ ಭಾಸ್ಯೀ ವಲ್ಲಿ ತಸಲೆ ಪ್ರಕಾಶಕ್ಯೀ ಉರಾನಾಂತ್.
ಚರಿತ್ರೆಚಾ ಪಾನಾಂನಿ, ಕೊಂಕ್ಣೆಕ್ ಭೋವ್ ಪರ್ನೆಂ ಆನಿ ಉಂಚ್ಲೆಂ ಇತಿಹಾಸ್ ಆಸಾ. ಭಿಲ್ಕುಲ್ ವೆಗ್ಳೆಂ ಸ್ಥಾನ್. ಹಿ ಏಕ್ ಗ್ರೇಸ್ತ್ ತಶಿಚ್ ಗೋಡ್ ಭಾಸ್. ಆಮ್ಚಾ ಸಂಸ್ಕೃತೆಚಿ ಅಭಿವ್ಯಕ್ತ್. ಆಮ್ಚೊ ಫುಡಾರ್, ಆಮ್ಚೊ ಭರ್ವಸೊ ಜಾವ್ನಾಸಾ ಕೊಂಕಣಿ. ಕೊಂಕ್ಣಿ ಭಾಸೆಚೊ ಮೋಗ್ ಕರ್ಜಾಯ್, ಕೊಂಕ್ಣಿ ಪ್ರಚಾರ್ ಚಡಂವ್ಕ್ ಜಾಯ್, ಜತ್ನೆನ್ ಹ್ಯಾ ಭಾಸೆಚೊ ಪೋಸ್ ಕರುಂಕ್ ಜಾಯ್. ಹ್ಯಾ ಖಾತಿರ್ ಸರ್ವ್ ಬರವ್ಪ್ಯಾಂನಿ, ಪ್ರಕಾಶಕಾಂನಿ ತಶೆಂ ವಾಚ್ಪ್ಯಾಂನಿ ಎಕ್ವಟಿತ್ ರಿತಿಚೊ ವಾವ್ರ್ ಕರುಂಕ್ ಜಾಯ್.
ಆಮ್ಚಾ ಕಾಲ್ಚಾ ಬರವ್ಪ್ಯಾಂನಿ ತಾಂಚ್ಯಾ ತಾಂಕಿಚೊ ವಾವ್ರ್ ಕೆಲಾ ಆನಿ ಆಮ್ಕಾಂ ಏಕ್ ದೇಕ್ ದಿಲ್ಯಾಸ್ತಾಂ, ತೊ ವಾವ್ರ್ ಮುಖಾರುನ್ ವ್ಹರ್ಚಿ ಜವಾಭ್ದಾರಿ ಆಮ್ಚಿ ಸರ್ವಾಂಚಿ. ದೆಕುನ್ ಆಮಿ (ತುಂ ಆನಿ ಹಾಂವ್) ಹ್ಯಾ ದಿಶೆನ್ ಆಯ್ಚಾ ದಿಸಾ ಕಿತೆಂ ತರ್ಯೀ ಕೊಂಕ್ಣೆಖಾತಿರ್ ಬರೆಂ ಕರ್ಯಾಂ ಆನಿ ಆಮ್ಚಾ ಅಸ್ಥಿತ್ವಾಚೆರ್ ಭರ್ಮ್ ಪಾವ್ಯಾಂ.
ದೇವ್ ಬರೆಂ ಕರುಂ ವಾಚ್ಪ್ಯಾ, ದೇವ್ ಬರೆಂ ಕರುಂ ತುಕಾಂ ಜೆಮ್ಮಾ ಆನಿ ವಲ್ಲಿ. ತುಮಿಂ ಕೊಂಕ್ಣೆಖಾತಿರ್ ಜಿಯೆತಾನಾ ಖರೆಂಚ್ ಜಾವ್ನ್ ಕೊಂಕ್ಣೆಸವೆಂ ತುಮ್ಚೆಂಯ್ ನಂದನ್ ಜಾಂವ್ದಿ ಆನಿ ತುಮ್ಚಿ ತಕ್ಲಿ ಸದಾಂಚ್ ಉಭಾರೊನ್ ಉರೊಂದಿ.
ಮಾಯಾಮೊಗಾನ್,
- ಆಲ್ಫೊನ್ಸೊ ಡಿ’ಕೋಸ್ತಾ, ದೆರೆಬೈಲ್. (ಆತಾಂ ಆಸ್ಟ್ರೇಲಿಯಾ)[
20 ಮಾಯ್ 2007]
ನಿರ್ಭಾಗ್ಯಾಚೆಂ ಸ್ವಪಾಣ್
ಸಾಂಕಳ್ ಕಾಣಿಯೆಚ್ಯಾ ಪ್ರಾರಂಭಾರ್ ಸುರ್ವಿಲ್ಯಾ ಉತ್ರಾಂಚೆಂ ಮಹತ್ವ್ ಕಿತೆಂ ತೆಂ ಹಾಂವ್ ನೆಣಾಂ. ಪುಣ್ ಏಕ್ ಘರ್ ಭಾಂದ್ತಾನಾ, ಘರಾ ಮುಖಾರ್ ಮೆಟಾಂ ಕರಿನಾತ್ಲ್ಯಾರ್ ಕಶೆಂಗಿ, ತಶೆಂಚ್ ದೋನ್ ಉತ್ರಾಂ ಬಗಾರ್ ಕಾಣಿ ಆರಂಭ್ ಕರಿನಾಯೆ ಮ್ಹಣ್ ಕೊಣ್ಗಿ ಮ್ಹಣ್ತಾ. ಹೆಂ ಕಿತ್ಲೆಂ ಸತ್ ವ ಪೊಟ್ ಮ್ಹಳ್ಳೆಂ ಜಾಣ್ತೆ ಸಾಂಗೊಂಕ್ ಸಕ್ತಿತ್.
ಆನಿಂ ಹಾಂಗಾಸರ್ ಮ್ಹಾಕಾ ಚಡ್ತಿಕ್ ಕಾಂಯ್ ಬರಂವ್ಕ್ ನಾ. ಮ್ಹಜ್ಯಾಚ್ ಹ್ಯಾ ಕಾಣಿಯೆ ವಿಶ್ಯಾಂತ್ ಹಾಂವೆಂಚ್ ಕಾಂಯ್ ಸಾಂಗ್ಚೆಂ ಸಮಾ ನ್ಹಂಯ್. ಕಿತ್ಯಾಕ್ ತಾಂತ್ಲೆಂ ಗೂಣ್ - ಅವ್ಗುಣ್ ವಾಚ್ಪಿಚ್ ಠೀಕಾ ಕರುಂಕ್ ಸಹಜ್ಲ್ಲೆಂ. ತರೀ ದೋನ್ ಉತ್ರಾಂ ಮ್ಹಾಕಾ ಸಾಂಗ್ಯಾಂ ಮ್ಹಣ್ ದಿಸ್ತಾ. ಹಿ ಕಾಣಿ ಕಾಂಯ್ ನವೀನ್ ಥರಾಚಿ ನ್ಹಂಯ್. ಕೊಲೆಜ್ ವಿದ್ಯಾರ್ಥಿಂಚಿ ಆಶಾ-ನಿರಾಶಾ, ಮುಖ್ಲ್ಯಾ ಜಿಣಿಯೆ ವಿಶ್ಯಾಂತ್ ತಾಣಿ ಮಾಂಡುನ್ ಹಾಡ್ಚಿಂ ಸ್ವಪ್ಣಾಂ, ತರ್ನಾಟ್ಯಾ ಕಾಳ್ಜಾಂತ್ ಉಭ್ಜೊಂಚೊ ತೊ ಮೋಗ್, ಆಸಲ್ಯಾ ಘಡಿತಾಂಚೆರ್ ವಿಣ್ಲೆಲ್ಯಾ ಹ್ಯಾ ಕಾಣಿಯೆಂತ್ ಕಸಲಿಂ ಲಿಸಾಂವಾಂ ಆಟಾಪ್ಲ್ಯಾಂತ್ ಮ್ಹಳ್ಳೆಂ ಫುಡೆಂ ತುಮಿಂಚ್ ಪಳೆತೆಲ್ಯಾತ್.
ಸಾಂ. ಲುವಿಸ್ ಕೊಲೆಜಿಂತ್ ಹಾಂವ್ ವಿದ್ಯಾರ್ಥಿ ಜಾವ್ನ್ ಆಸ್ತಾಂ, ಸುಮಾರ್ ಚಾರ್ ವರ್ಸಾಂ ಆಧಿಂ ಹಿ ಕಾಣಿ ಬರವ್ನ್ ಸಂಪ್ಲೆಲಿ. ಜಾಯ್ತ್ಯಾ ಕಾರಣಾಂಕ್ ಲಾಗೊನ್ ವೆಗಿಂಚ್ಯಾಕ್ ತಿ ಪಾಯ್ಸ್ ಜಾಲಿನಾ. ಆಖ್ರೇಕ್ ತರೀ, ’ಪಯ್ಣಾರಿ’ ರ್ ಫಾಯ್ಸ್ ಕರ್ತಾಂ ಮ್ಹಣ್ ಸಂಪಾದಕ್ ಶ್ರೀ ಮಾರ್ಕ್ ಡಿ’ಸೋಜಾನ್ ಸಾಂಗ್ತಾನಾ ಸಮಾಧಾನೆಚೊ ಲಾಂಬ್ ಉಸ್ವಾಸ್ ಹಾಂವೆಂ ಸೊಡ್ಲ್ಲೊ.
ಕೊಲೆಜಿಂತ್ ಮ್ಹಜ್ಯಾ ಸಾಹಿತ್ಯಾಕ್ ಬುನ್ಯಾದ್ ಪಡ್ಲ್ಲಿ. ಥಂಯ್ ಕ್ಲಾಸಿಂತ್ ಬಸೊನ್ ಭಾಯ್ರ್ ದೀಷ್ಟ್ ವರ್ತಾನಾ ದಿಸ್ಚೊ ತೊ ಆರಬಿ ದರ್ಯೊ, ಮಡಾಂ - ಝಡಾಂನಿ ಸೊಭ್ಚಿ ತಿ ಪಾಚ್ವಿ ಸೃಷ್ಟಿ ದೆಖ್ತಾನಾ, ಕಾಳ್ಜಾಂತ್ ಮ್ಹಜ್ಯಾ ಸಾಹಿತ್ಯಾಚೆಂ ಭಿಂ ಉಭ್ಜಾಲ್ಲೆಂ. ಮತಿಂತ್ಲಿಂ ಕಲ್ಪನಾಂ ಸೊಸುಂಕ್ ಜಾಯ್ನಾತ್ಲ್ಲ್ಯಾ ವೆಳಾರ್, ಘಳಾಯ್ ಕರಿನಾಸ್ತಾಂ ಕ್ಲಾಸಿಂತ್ಚ್ ಹ್ಯಾ ಕಾದಂಬರಿಚೆಂ ರಚನ್ ಜಾಲ್ಲೆಂ. ಆನಿಂ ಅಂತ್ಯ್ಯಿ ಕ್ಲಾಸಿಂತ್ಚ್ ಜಾಲ್ಲೆಂ.
ಆತಾಂ ಸುಮಾರ್ ಚಾರ್ ವರ್ಸಾಂ ಉಪ್ರಾಂತ್ ಪರ್ತ್ಯಾನ್ ತಿ ವಾಚ್ತಾನಾ, ತಿದ್ವಿಲ್ಲೆ ಥೊಡೆ ವಿಶಯ್ ಶಿವಾಯ್, ಕಾಣಿ ಬದ್ಲುಂಕ್ ನಾ. ಕಿತ್ಯಾಕ್ ಹಾಂತ್ಲಿಂ ಘಟನಾಂ ಆನಿಂ ಕಾಲ್ಪನಿಕ್ ಸನ್ನಿವೇಶನಾಂ ಮ್ಹಾಕಾ ಅಧಿಕ್ ಮೊಗಾಚಿಂ. ಕಿತ್ಯಾಕ್ ಹಿ ಕಾಣಿ ತ್ಯಾ ಸರೊನ್ ಗೆಲ್ಲ್ಯಾ ವಿದ್ಯಾರ್ಥಿ ಜೀವನಾಚೊ ಉಡಾಸ್ ಮ್ಹಾಕಾ ಹಾಡ್ತಾ. ತೆ ಈಷ್ಟ್, ಕ್ಲಾಸಿಂತ್ಲಿ ತೊ ಖುಶಾಲಾಯ್, ಬೇಜವಾಭ್ದಾರೆಚೆ ತೆ ದೀಸ್ ನಿಯಾಳ್ತಾನಾ ಪರ್ತ್ಯಾನ್ ವಿದ್ಯಾರ್ಥಿ ಜಾವ್ಯಾಂಶೆಂ ಮ್ಹಾಕಾ ಭಗ್ತಾ. ತ್ಯಾ ವೆಳಾಚ್ಯಾ ಸಾಂಗಾತ್ಯಾಂ ಸಂಗಿಂ ಉಲೈಲ್ಲೆಂ ಉಲವ್ಣೆಂ, ನಿಯಾಳ್ಲ್ಲೆ ವಿಷಯ್ ಆನಿಂ ಚಿಂತ್ಲ್ಲಿಂ ಕಲ್ಪನಾಂ - ಹಾಂಚೆರ್ಚ್ ಮಾಂಡುನ್ ತಿ ಕಾಣಿಂ ಘಡ್ಲ್ಯಾ ತರೀ, ಮ್ಹಜ್ಯಾ ವ ಕೊಣೀ ಸಾಂಗಾತ್ಯಾಚ್ಯಾ ಖಾಸ್ಗಿ ಜೀವನಾಕ್, ವ ಜಿವಂತ್ ಆಸ್ಚ್ಯಾ ವ ಮೆಲ್ಲ್ಯಾ ಕೊಣಾಕಿ ಹಿ ಕಾಣಿ ಲಾಗು ಜಾಯ್ನಾ. ಹಾಂತ್ಲಿಂ ಸನ್ನಿವೇಶನಾಂ, ನಾಂವಾಂ ಆನಿಂ ಘಡಿತಾಂ ಸರ್ವ್ ಕಾಲ್ಪನಿಕ್.
ನಿಮಾಣೆ, ಹಿ ಕಾಣಿ ಫಾಯ್ಸ್ ಕರುಂಕ್ ಕುಮೊಕ್ ಕೆಲ್ಲ್ಯಾ ’ಪಯ್ಣಾರಿ’ ಶಿಬಂದೆಕ್ ಮ್ಹಜಿ ಕೃತಜ್ಞತಾ ಆರ್ಪುನ್, ಸಂಗಿಂ ಘಡ್ಲ್ಲ್ಯಾ ಚುಕಿಂಕ್ ಮ್ಹಾಕಾ ಸುಧಾರ್ಸುನ್ ವ್ಹರ್ತೆಲ್ಯಾತ್ ಮ್ಹಣ್ ವಾಚ್ಪ್ಯಾಂಚೆರ್ ಭರ್ವಸೊ ದವರ್ನ್, ಹಿಂ ಪಯ್ಲಿಂ ಉತ್ರಾಂ ಆಖೇರ್ ಕರ್ತಾನಾ, ವ್ಹಡ್ಲೆಂ ವೊಜೆಂ ಖಾಂದ್ಯಾ ವಯ್ಲೆಂ ದೆಂವಯಿಲ್ಲ್ಯಾ ಬರಿ ಜಾತಾ ಮ್ಹಾಕಾ.
ತುಮ್ಚೊ ವಿಶ್ವಾಸಿ,
ಆಲ್ಫೊನ್ಸ್ ಡಿ’ಕೊಸ್ತಾ, ದೆರೆಬೈಲ್
[1962 ಇಸ್ವಿ]
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
