ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 19
ತಿಚ್ ಸಾಂಜ್ ಆನಿಂ ಸ್ಥಾನ್ ಮಂಗ್ಳೂರ್...
ಸಾಂಜೆಚಿಂ ಸಾಡೆ-ಸ ವೊರಾಂ ಆನಿಂ ನಂತೂರ್ ಪದ್ವಾ ವಯ್ಲೆಂ ತೆಂ ಮಜ್ಭೂತ್ ಘರ್. ಸಿಂತಿ ಆನಿಂ ಹೆರಿ ಥೊಡ್ಯಾಚ್ ಮಹಿನ್ಯಾಂ ಆದಿಂ ಥಂಯ್ ವಕಾಲ್ ಜಾಲ್ಲಿಂ. ಕಾಮಿಲ್ ಶೆಣೈನ್, ಪುತಾಕ್ ತೆಂ ಘರ್ ಘೆವ್ನ್ ದಿಲ್ಲೆಂ - ತ್ಯಾ ಕಾಳಾಚ್ಯಾ ಮೊಲಾ ಪ್ರಮಾಣೆ, ಪಂಚ್ವೀಸ್ ಹಜಾರ್ ರುಪಯ್ ತ್ಯಾ ಮಜ್ಭೂತ್ ಬಂಗ್ಲ್ಯಾಕ್ ಪಡ್ಲ್ಲೆ. ಮನ್ವೆಲಾಬಾನ್ ಧುವೆ-ಜಾಂವ್ಯಾಕ್ ನವೆಂಚ್ ಕಾರ್ ಇನಾಮ್ ದಿಲ್ಲೆಂ. ಆನಿಂ ಹೆರಿ, ಹಂಪನ್ಕಟ್ಟಾರ್ ’ಡಿಸ್ಪೆನ್ಸರಿ’ ಉಗಡ್ನ್, ವ್ಯಾಪ್ತ್ ಕರ್ತಾಲೊ. ಘರಾಂತ್ ತಶೆಂ ಡಿಸ್ಪೆನ್ಸರಿಂತ್ ’ಪೋನಾ’ ಆಯಿಲ್ಲಿಂ. ಆನಿಂ ಎಕಾ ಥರಾನ್, ಸಿಂತಿನ್ ಆಶೆಲ್ಲಿಂ ಸರ್ವ್ ಸ್ವಪ್ಣಾಂ ಜಾರ್ಯೆಕ್ ಆಯಿಲ್ಲಿಂ. ಸಂಸಾರಾಂತ್ ಸರ್ಗ್ ತಾಚ್ಯಾ ಮುಟಿ ಬಿತರ್ ಆಯಿಲ್ಲೊ.
ಆಪ್ಲ್ಯಾ ಬೆಡ್-ರುಮಾ ಥಾವ್ನ್ ಭಾಯ್ರ್ ತಿಳ್ತಾಲೆಂ ಸಿಂತಿ. ಸಾಂಜೆಚೊ ಮನಮೋಹಕ್ ವೇಳ್. ಪಯ್ಶಿಲೊ ತೊ ದರ್ಯೊ ದಿಷ್ಟಿಕ್ ಪಡ್ತಾಲೊ. ಮಾಡಾಂ-ಝಡಾಂನಿ ಸೊಭ್ಚಿ ತಿ ಪಾಚ್ವಿ ಸ್ರಷ್ಟಿ. ಸಗ್ಳೆಂ ಮಂಗ್ಳೂರ್ ಶಹರ್ ದಿಷ್ಟಿಕ್ ಪಡ್ತಾ. ಕಿತ್ಲೊ ಸುಂದರ್ ಕೊಂಕಣ್ ಪ್ರದೇಶ್! ಥಂಡಾಯೆಚೆಂ ವಾರೆಂಯೀ ಆತಾಂ ವ್ಹಾಳೊನ್ ಯೆತಾಲೆಂ ಆನಿಂ ಸಿಂತಿಚೆ ಮುದಿಯಾಳೆ ಕೇಸ್ ಅಸ್ತವ್ಯಸ್ತ್ ಉಬ್ತಾಲೆ. ಕುಶಿಚ್ಯಾ ಭಾಗಿಂತ್ ಫುಲ್ಲ್ಯಾಂತ್ ಮಧುರ್ ಫುಲಾಂ! ತಾಂಕಾಂ ಪಳೆವ್ನ್ ಆಸ್ಚೆಂಚ್ ಕಿತ್ಲೆಂ ಸೊಭಿತ್. ತ್ಯಾ ಫುಲಾಂ ವಯ್ರ್ ಬಸೊನ್ ಮ್ಹೊಂವ್ ಚಾಕ್ತಾತ್ ಮೂಸ್ ಸೊಭಿತ್ ಫುಲಾಂ ಮ್ಹಳ್ಯಾರ್ ತಾಂಕಾಯ್ ಆಶಾ. ಅಂತ್ರಳಾರ್ ಕೀರ್ಣಾಂ ಫಾಂಕ್ತಾ. ತಾಕಾಯಿ ಸಗ್ಳ್ಯಾ ದಿಸಾಚ್ಯಾ ಬೆಸೊರಾನ್ ಪುರೊ ಜಾಲಾಂಶೆಂ ದಿಸ್ತಾ. ತೊ ಖಂತಿನ್ಗಿ, ಬೆಜಾರಾಯೆನ್ಗಿ ಸಗ್ಳೊಚ್ ತಾಂಬ್ಡೊ ಜಾಲಾ. ತಾಚೆ ಸಾಂಗಾತಾ ಅಸ್ತಮ್ತಿ ಕುಶಿಚೆಂ ಅಂತ್ರಳ್ಯಿ ತಾಂಬ್ಡೆಂ ರಂಗೈಲಾಂ. ತಿಂ ಕುಪಾಂ, ತೊ ಸುರ್ಯೊ ತಾಂಬ್ಡ್ಯಾ ರಂಗಾಕ್ ಪರ್ತಾತಾನಾ, ದರ್ಯಾಚೆಂ ಉದಾಕ್ಯಿ ಭಾಂಗಾರಾಚ್ಯಾ ವರ್ಣಾಕ್ ಬದಲ್ಲಾಂ. ಪಯ್ಸ್ ಥಾವ್ನ್ ದೆಖ್ತಾನಾ, ತೊ ಭಾಂಗಾರಾಚೊ ಸಾಗೊರ್ ಜಸೊ ದಿಸ್ತಾ. ವಾರೆಂ ಘಡಿಯೆಕ್ ಎಕ್ ಪಾವ್ಟಿಂ ಕೂಸ್ ಬದ್ಲುನ್ ವಾಳ್ತಾ. ಥೊಡೆ ಪಾವ್ಟಿಂ ಹಾಳ್ವಾಯೆನ್. ದುಸ್ರ್ಯಾಕ್ಷಣಾ, ಜ್ಯೋರಾನ್ ತೆಂ ಯೆತಾನಾ, ಉದ್ಯಾನಾಂತ್ಲ್ಯಾ ಫುಲಾಂಚೊ ಸುಗಂಧ್ಯಿ ನಾಕಾಕ್ ಮಾರ್ತಾ. ಆಜ್ ಜೀವ್ ಅಸೊನ್ ಫಾಲ್ಯಾಂ ನಾಸ್ ಜಾಂವ್ಚಿಂ ಹಿಂ ಫುಲಾಂ..... ತರೀ ಕಿತ್ಲೆಂ ಸೊಭಿತ್ ಆನಿಂ ಕಸಲೊ ಸುಗಂಧ್. ಕಿತ್ಲೆಂ ಮಟ್ವೆಂ ತಾಂಚೆಂ ಆವ್ಕ್, ತರೀ ಕೆದಿ ವರ್ತಿ ತಾಂಚಿ ವ್ಹಡ್ವಿಕ್....ಸಂಸಾರಾಂತ್ಲಿ ಹರ್ಯೇಕ್ ವಸ್ತ್ಚ್ ತಶಿ...ಆಜ್ ಆಸ್ತೆಲಿ, ಫಾಲ್ಯಾಂ ನಪೈಂಚ್ ಜಾತೆಲಿ. ತಶೆಂಚ್, ಆತಾಂ ಹೊ ಸಾಂಜೆಚೊ ವೇಳ್ ಕಿತ್ಲೊ ಸೊಭಿತ್ ದಿಸ್ತಾ..... ಪುಣ್ ಘಡಿಯೆನ್ ಹ್ ಪ್ರಶಾಂತ್ ಸೊಭಾಯ್ ನಾ ಜಾತೆಲಿ. ಕಾಳೊಕ್ ಭುಮಿರ್ ಪಡ್ತೊಲೊ - ಸರ್ವ್ ಆಪ್ಲ್ಯಾ ವೆಂಗೆಂತ್ ಲಿಪೊವ್ನ್.
ಸಾಂಜ್ ಸುಂದರ್ ಆಸ್ಲ್ಲಿ ಪುಣ್ ಸಿಂತಿಚ್ಯಾ ಮನಾಕ್ ಶಾಂತಿ ನಾತ್ಲ್ಲಿ. ತೆಂ ನಿರಾಶೆನ್ ಆನಿಂ ರಾಗಾನ್ ಸಗ್ಳೆಂಚ್ ಚಡ್ಪಡ್ತಾಲೆಂ. ಘಡಿಯೆಕ್ ಏಕ್ ಪಾವ್ಟಿಂ, ಹಾತ್ ವೋಚ್ಯಾರ್ ತೆಂ ದೀಷ್ಟ್ ಘಾಲ್ತಾನಾ, ಮಿನುಟಾಚೊ ಕಾಂಟೊ ಚಲ್ತಚ್ ಆಸ್ಲ್ಲೊ. ಆನಿಂ ಸಿಂತಿಚೆಂ ಸೈರಾಣ್ಯಿ ಚುಕೊನ್ಂಚ್ ಯೆತಾಲೆಂ. ವೊರಾಂ ಸಾಡೆ-ಸ ಜಾತಾನಾ ತೆಂ ಪುರ್ತೆಂ ಖುಬಾಳ್ಳೆಂ.
"ಹುಂ... ಪಾಡ್ಪಾಡ್ಲ್ಲೆಂ ಕಾಮ್ ಹಾಚೆಂ....’ ಮತಿಂತ್ಚ್ ಪುರ್ಪುರ್ಲೆಂ ತೆಂ. "ರಜೆಚೊ ದೀಸ್ ಮ್ಹಣ್ ನಾ, ಬರೊ ದೀಸ್ ಮ್ಹಣ್ ನಾ. ಕಾಮ್.....ಕಾಮ್....ಆನಿಂ ಕಾಮ್... ಬಾಯ್ಲೆಚಿ ಪರ್ವಾಚ್ ನಾ. ಸ ವೊರಾರ್ ಘರಾ ಖಂಡಿತ್ ಯೆತಾಂ ಮ್ಹಣ್ತಾಲೊ ಹೆರಿ, ಅರ್ಧೆಂ ವೋರ್ ಮಿಕ್ವೊನ್ ಗೆಲೆಂ....ಖಂಯ್ ಆಸಾ ವ್ಹೊ? ಪಿಡೇಸ್ತ್ ಖಂಯ್...ಹ್ಯಾ ಪಿಡೇಸ್ತಾಂಚಿ ಪಿಡಾ ಖಂಯ್ಚ್ಯಾ ವೆಳಾರ್ ಗಡೀಸ್ ಜಾತಾ ದೇವ್ಚ್ ಜಾಣಾ. ಆನಿಂ ಹೆರಿಕ್ ಪಿಡೇಸ್ತ್ ಮ್ಹಳ್ಯಾರ್, ಆನಿಂ ಜೆವ್ಣಾಚ್ಯಾ ವೆಳಾರ್ ಲೆಗುನ್ ತಾಂಚೆಂ ಫೋನ್ ಆಯ್ಲ್ಯಾರ್, ಜೆಂವ್ಚೆಂ ಸೊಡ್ನ್ ಧಾವೊಂಕ್ ಖುಶಿ...! ನಾ...ವ್ಹೊ ಮ್ಹಜೆಲಾಗಿಂ ಕಾಜಾರ್ ಜಾಂವ್ಕ್ ನಾ. ದಾಕ್ತೆರ್ಗಿಚ್ಯಾ ಶಿಕ್ಪಾಲಾಗಿಂ ಕಾಜಾರ್ ಜಾಲಾ.."
ಸಿಂತಿ ಸಾಲಾಕ್ ಗೆಲೆಂ. ತಿಸ್ರ್ಯಾ ಪಾವ್ಟಿಂ ತಾಣೆಂ ಹೆರಿಚ್ಯಾ ಡಿಸ್ಪೆನ್ಸರಿಕ್ ’ಫೋನ್’ ಕೆಲೆಂ. ಬೆಲ್ಲ್ ವ್ಹಾಜ್ತಾಲಿ ಆಯ್ಕಾಲಿ ತರೀ, ಫೋನ್ ಕೊಣೆಂಯಿ ಕಲ್ಲೆಂನಾ...ರಾಗಾನ್ ಸಿಂತಿನ್, ಫೋನ್ ಸಕ್ಲಾಂ ಘಾಲೆಂ....’ ತರ್ ವ್ಹೊ ಡಿಸ್ಪೆನ್ಸರಿಂತ್ಯಿ ನಾ..’ ಕೊಡ್ಸಾಣೆನ್ ಮ್ಹಣಾಲೆಂ ತೆಂ ಆಪ್ಲೆಸ್ಥಕ್ತಿಂ.
ಹೆಣೆತೆಣೆಂ ಪಾಸಾಯೊ ಮಾರುಂಕ್ಲಾಗ್ಲೆಂ ಸಿಂತಿ. ತಾಚೆಂ ಅಸಮಾಧಾನ್ಂಚ್ ಯೆತಾಲೆಂ. ಚಲೊನ್ ಪುರೊ ಜಾವ್ನ್ ತೆಂ ಕದೆಲಾರ್ ಗಳ್ಳೆಂ....ರಾಗಾನ್ಂಚ್ ಕುಶಿಚೆಂ ದೈನಿಕ್ ಪತ್ರ್ ’ಇಂಡಿಯನ್ ಎಕ್ಸ್ಪ್ರೆಸ್ಸ್’ ತಾಣೆಂ ಹಾತಿಂ ಘೆತ್ಲೆಂ. ತೆಂ ಪಳೆತಾನಾ, ಪರ್ತ್ಯಾನ್ ತಾಕಾ ಪಿಂತೆಗ್ ಆಯ್ಲೊ....
’ಓ....ವ್ಹೊ ಎಕ್ಲೊ ಬೊಂಬಯ್ ವಚೊನ್ ಕಂತಾರಾಂ ಮ್ಹಣೊಂಕ್ ಲಾಗ್ಲಾ..’ ತಾತ್ಸಾರಾಚೊ ಹಾಸೊ ಹಾಸ್ಲೆಂ ತೆಂ, ’ಹೆಂ ಕೋಣ್ ಸಿಲ್ವಿ ಖಂಯ್..... ಹುಂ ಬರೆಂ ಚೆಡುಂ ಮೆಳ್ಳಾಂ ಹಾಕಾ. ತಾಚ್ಯಾ ಮೊಗಾರ್ ಪಡ್ಲಾ ಕೊಣ್ಣಾ ಮೆಲ್ವಿನ್. ಜೆಸ್ಸಿ ಮಾದ್ರಿಂತ್ ಗೆಲೆಂ ಮ್ಹಣ್ ಬೊಂಬಯ್ ಧಾಂವ್ಲೊ ತೊ. ಮ್ಹಾಕಾ ಕಿತೆಂ ಖಬಾರ್ ಮೆಳ್ಚಿನಾ ಮ್ಹಣ್ಗಿ? ಆತಾಂ ಹೆಂ ಎಕ್ಲೆಂ ಸಿವ್ಲಿ....ಪುಣ್ ಮೆಲ್ವಿನ್ ಭಿಂಯಾಚೊ ಪುಕ್ಕ. ಚೆಡ್ವಾಲಾಗಿಂ ಕಶೆಂ ಚಲಾಜಾಯ್ ಮ್ಹಣ್ ತೊ ನೆಣಾ. ಕೊಣೆಂಯ್ ಕುಟ್ಟುನ್ ಉಲೈಲ್ಯಾರೀ, ಉಲೊಂವ್ಕ್ ತೊ ಕಾವ್ಜೆತಾ..’
ಸಿಂತಿಕ್ ಕೊಲೆಜಿಂತ್ ಚಲ್ಲ್ಲ್ಯಾ ಸ್ಪರ್ಧ್ಯಾಚೊ ಉಗ್ಡಾಸ್ ಆಯ್ಲೊ. ಕಂತಾರಾಂತ್ ಆಪುಣ್ ಇತ್ಲಿಂ ಹುಶಾರ್ ಆಸ್ಲ್ಲಿಂ.....ಆಪ್ಣಾಕ್ ರಂಗೀತ್ ತಾಳೊ ಆಸಾ. ತರೀ ಮೆಲ್ವಿನಾನ್ ಆಪ್ಣಾಕ್ ಸಲ್ವೊವ್ನ್ ಪ್ರಥಮ್ ಸ್ಥಾನ್ ಜೊಡ್ಲೆಂ. ತಶೆಂ ಮ್ಹಣ್ತಾನಾ, ತಾಕಾ ಬರೊ ತಾಳೊ ಆಸೊಂಕ್ಜಾಯ್. ಆತಾಂ ಬೊಂಬೈತ್ ತೊ ನಾಂವಾಡ್ಲೊ ಮ್ಹಣ್ತಚ್.... ಬರೆಂ ಭವಿಷ್ಯ್ ತಾಕಾ ರಾಕೊನ್ ಅಸಾ. ಮೆಲ್ವಿನಾ ವಿಷ್ಯಾಂತ್ ಚಿಂತ್ತಾನಾ, ಮೊಸ್ರಾಚೆ ಕರ್ಕರೆ ತಾಕಾ ಭೊಗ್ಲೆ. ತ್ಯಾ ಬರಾಬರ್, ಹೆರಿಚೆರ್ ಸಗ್ಳೆಂಚ್ ಖುಬಾಳ್ಳೆಂ ತೆಂ.
’ಮ್ಹಜೆಲಾಗಿಂ ಕಾಜಾರ್ ಜಾಲಾ ತೊ, ಮ್ಹಾಕಾ ರಾಂದ್ಪಾಕುಡಾಂತ್ಲಿ ರಾಣಿ ಕರುಂಕ್ ಮ್ಹಣ್ ದಿಸ್ತಾ...’ ಉಬೆಂ ರಾವೊನ್ ಘುಣ್ಗುಣ್ಲೆಂ ಸಿಂತಿ. ’ಬರೆಂ, ತೊ ಘರಾ ಯೇಂವ್ದಿ ಆನಿಂ ಮ್ಹಾಕಾ ರಾಕೊನ್ ಸುಕೊಂದಿ.’
ಚಡಿತ್ ವೇಳ್ ತಾಣೆಂ ಕಾಡ್ಲೊನಾ. ತೆಂ ಭಾಯ್ರ್ ವಚೊಂಕ್ ಆಯ್ತೆಂ ಜಾಲೆಂ. "ಸೆಲ್ಲಿ" ತಾಣೆಂ ರಾವೈಲ್ಲ್ಯಾ ಚೆಡ್ವಾಕ್ ಆಪೈಲೆಂ. "ಹಾಂವ್ ಭಾಯ್ರ್ ವೆತಾಂ. ಕಳ್ಳೆಂಗಿ?"
"ಬಾಬ್ ಆಯ್ಲ್ಯಾರ್ ಕಿತೆಂ ಸಾಂಗೊ ಬಾಯೆ?"
"ಬಾಬಾಕ್ ಬಾಯ್ ಸೊಧುಂಕ್ ಗೆಲ್ಯಾ ಮ್ಹಣ್ ಸಾಂಗ್" ದೆಂಕ್ಣೊ ಮಾರ್ಲೊ ಸಿಂತಿನ್.
"ನ್ಹಂಯ್ ತೊ ಮ್ಹಾಕಾ ವಿಚಾರ್ತಾಲೊ.." ಭಿಂಯಾನ್ ಉಲೈಲೆಂ ಸೆಲ್ಲಿ.
"ವಿಚಾರ್ಲ್ಯಾರ್ ಸಾಂಗ್, ಬಾಯೆನ್ ವೆತಾನಾ ಬಾಯೆನ್ ವೆತಾನಾ ಕಾಂಯ್ ಆಪ್ಣಾಕ್ ಸಾಂಗೊಂಕ್ ನಾ. ಪಾಟಿಂ ಯೆತಾನಾ ವೇಳ್ ಜಾತೊಲೊ ಮ್ಹಳಾಂ ಮ್ಹಣ್ ಸಾಂಗ್." ಇತ್ಲಿ ತಾಕಿದ್ ದೀವ್ನ್ ಸಿಂತಿ ಘರಾ ಬಾಯ್ರ್ ಪಡ್ಲೆಂ.
ರಸ್ತ್ಯಾಕ್ ಪಾವ್ತಚ್, ಖಂಯ್ ವೆಚೆಂ ಮ್ಹಳ್ಳೆಂ ಸವಾಲ್ ಉಬ್ಜಾಲೆಂ ತಾಕಾ. ಏಕ್ ಘಡಿ ಆಲೋಚನ್ ಕರ್ತಾನಾ, ಮಿಸ್ಸೆಸ್ ಡಿ’ಲಿಮಾಚೊ ಉಗ್ಡಾಸ್ ಆಯ್ಲೊ. "ವ್ಹಯ್, ತಿಕಾಚ್ ಭೆಟ್ ದಿಂವ್ಚಿ ಬರಿ. ಸಬಾರ್ ದಿಸಾಂ ಥಾವ್ನ್, ಆಮ್ಗೆರ್ ಏಕ್ ಪಾವ್ಟಿಂ ಯೆ ಮ್ಹಣ್ ಪರಾತ್ತಾಲಿ ತಿ?"
ಸಿಂತಿ ಬಸ್ಸ್ಸ್ಟೇಂಡಾರ್, ಬಸ್ಸಾಕ್ ರಾಕೊನ್ ರಾವ್ಲೆಂ. ಥೊಡ್ಯಾಚ್ ವೆಳಾನ್ ಹಂಪನ್ಕಟ್ಟಾ ವೆಚೆಂ ಬಸ್ಸ್ ಆಯ್ಲೆಂ. ತಾಚೆರ್ ಬಸ್ತಚ್, ಬೆಂದೂರ್ ಇಗರ್ಜೆಲಾಗ್ಸಾರ್ ವಚೊಂಕ್ ಟಿಕೆಟ್ ಕಾಡ್ಲಿ ಸಿಂತಿನ್.
ಬೆಂದೂರ್ ಇಗರ್ಜೆ ಲಾಗ್ಸಾರ್ಚ್ ಮಿಸೆಸ್ ಡಿ’ಲಿಮಾಚೆಂ ವ್ಹಡ್ಲೆಂ ಘರ್ ಆಸಾ. ತಿಕಾ ವಳ್ಕಾನಾತ್ಲ್ಲೊ, ಸಗ್ಳ್ಯಾ ಗಾಂವಾರ್ ನಾತ್ಲ್ಲೊ ಮ್ಹಳ್ಯಾರ್ ಫಟ್ ನ್ಹಯ್. ತಿ, ತಿತ್ಲ್ಯಾ ಪ್ರಸಿದ್ಧೆಕ್ ಪಾವೊಂಕ್ ಕಾರಣಾಂಯಿ ಸಬಾರ್ ಆಸ್ಲ್ಲಿಂ. ಆಧುನಿಕ್ ಸ್ತ್ರೀಯೆಚೆಂ ಉದಾಹರಣ್ ಜಾಯ್ ಜಾಲ್ಯಾರ್ ಕೊಣೀ ಶ್ರೀಮತಿ ಡಿ’ಲಿಮಾಕ್ಚ್ ಬೊಟ್ ದಾಕೈತೆ. ಕಿತ್ಯಾಕ್, ಕರ್ನ್ಯಾಂನಿ, ನಡ್ತ್ಯಾಂನಿ ಆನಿಂ ಉತ್ರಾಂನಿ ತಿ ಭಾರಿಚ್ ಆಧುನಿಕ್ ಸ್ತ್ರೀ ಜಾವ್ನಾಸ್ಲ್ಲಿ. ತಿಚಿ ಚಿಂತ್ನಾಂ ನಹಿಂಚ್ ವಿಸಾವ್ಯಾ ಶತಮಾನಾಚಿಂ, ಬಗಾರ್ ಎಕ್ವಿಸಾವ್ಯಾ ಶತಮಾನಾ ವಿಷ್ಯಾಂತೀ ತಿ ವಿಚಾರ್ ಕರ್ತಾಲಿ. ಪ್ರಾಯೆನ್ ಲಾಗಿಂಲಾಗಿಂ ತಿ ಚಾಳಿಸಾಂಕ್ ಪಾವ್ಲ್ಲಿ ತರೀ, ಫೆಶನಾಂ ಕರ್ಚ್ಯಾಂತ್ ಆಟ್ರಾ ವರ್ಸಾಂಚ್ಯಾ ಚಲಿಯೆಕ್ ಸೊಡ್ನ್ ದಿನಾತ್ಲಿ ಮಿಸೆಸ್ ರೋಜ್ ಡಿ’ಲಿಮಾ. ತಿಚ್ಯಾ ಆಟ್-ನೆಟಾಂಕ್ ತರ್ನಾಟಿಂ ಚೆಡ್ವಾಂಯಿ ಲಜ್ತಾಲಿಂ. ಆನಿಂ ತಿಚ್ಯಾ ಜಿಬೆಕ್ ಗಾಂವ್ ಸಗ್ಳೊ ಕಾಂಪ್ತಾಲೊ. ತಶೆಂಚ್ ತಿಚೊ ಘರ್ಕಾರ್ ಶ್ರೀ ಡಿ’ಲಿಮಾಯಿ.
ಕಾಯ್ದ್ಯಾನ್ ಆನಿಂ ಸಂಯ್ಭಾನ್ ಶ್ರೀ ಡಿ’ಲಿಮ ಘರ್ಕಾರ್ ಆನಿಂ ತಿ ಬಾಯ್ಲ್. ಪುಣ್, ಗರಾಂತ್ ಸರೀ ಉಳ್ಟೆಂ ಆಸ್ಲ್ಲೆಂ. ಪತಿಣಿಚ್ಯಾ ಧೆಂಕ್ಣ್ಯಾಕ್ ರೊಕಿ ಡಿ’ಲಿಮಾ ಹರ್ದ್ಯಾಂತ್ಚ್ ಕಾಂಪ್ತಾಲೊ. ಘರಾಂತ್ ಅಧಿಕಾರ್ ಸಗ್ಳೊ ತಿಕಾ. ಆನಿಂ ತಾಂಕಾ ಆಸ್ಚಿ ಎಕ್ಲಿಚ್ ಧುವ್ ಅಗ್ನೆಸ್ಯಿ..... ತೆಂ ಕೊಲೆಜಿಂತ್ ಇಂಟರ್ ಶಿಕ್ತಾಲೆಂ ಆನಿಂ ಆವಯ್ಚ್ಯಾಕೀ ಚ್ಯಾರ್ ಕದಮಾಂ ಮುಖಾರ್ ಸರ್ಲ್ಲೆಂ.
ರೊಜ್ಬಾಯೆಕ್ ಗಾಂವಾರ್ ಬಾರಿಚ್ ಪ್ರಸಿದ್ಧಿ ಆಸ್ಲ್ಲಿ. ಹುದೆದಾರ್, ಗ್ರೆಸ್ತ್ ಮನಿಸ್ ಕೆದಾಳಾಯಿ ತಾಂಗೆರ್ ಯೆತೆಚ್ ಅಸ್ಲ್ಲೆ. ಸಮಾಜೆಂತ್ಲ್ಯಾ, ಹರ್ಯೇಕಾ ಕ್ಶೇತ್ರಾಂನಿ ತಿಕಾ ಕುಮ್ಕೆಚೊ ಹಾತ್ ಆಸ್ಲ್ಲ್ಯಾನ್, ಕೊಣೀ ತಿಚ್ಯಾ ವಿಷ್ಯಾಂತ್ ಉಲೊಂವ್ಕ್ಚ್ ಭಿಂಯೆತಾಲೆ. ಆಯ್ಲೆವಾರ್ ಮಂಗ್ಳೂರಾಂತ್ ರೊಜ್ಬಾಯೆನ್ ಸ್ತ್ರೀಯಾಂಚೊ ಸಮಾಜ್-ಸೇವಕ್ ಸಂಘ್ ಸ್ಥಾಪನ್ ಕೆಲ್ಲೊ ಆನಿಂ ತಿಚ್ ತ್ಯಾ ಸಂಘಾಚಿ ಅಧ್ಯಕ್ಷಿಣ್ ಜಾವ್ನಾಸ್ಲ್ಲಿ. ಸಹಜ್ ಜಾವ್ನ್, ಹ್ಯಾ ಸಂಘಾಂತ್ ಗ್ರೇಸ್ತ್ ಬಾಯ್ಲೊ ಮಾತ್ರ್ ಸಾಂದೆ ಜಾವ್ನಾಸ್ಲ್ಲಿಂ. ಕಿತ್ಯಾಕ್ ದುಬ್ಳ್ಯಾಂ ಸ್ತ್ರೀಯಾಂಕ್, ಸಮಾಜ್ - ಸೆವಾ ಕರ್ಚಿ ತಾಕತ್ ನಾ ಮ್ಹಣ್ ಸರ್ವ್ ಗ್ರೇಸ್ತ್ ಸ್ತ್ರೀಯೊ ಜಾಣಾಂತ್. ಆನಿಂ ಹಾಣಿ ಕರ್ಚಿ ಸಮಾಜ್ ಸೆವಾ ತರೀ ವಿಚಿತ್ರ್ ಆಸ್ಲ್ಲಿ. ಪೊಟ್ಭರ್ ಖಾವ್ನ್, ಕರುಂಕ್ ದುಸ್ರೆಂ ಕಾಮ್ ನಾತ್ಲ್ಲ್ಯೊ ಬಿಯಾತಿಣ್ಯೊ, ಟಪ್ಪಾಲ್ ಖಾತ್ಯಾಂತ್ ಕಾಮಾಕ್ ಸಹಜ್ಲ್ಲೆಂ ಲಕ್ಷಣ್ ಅಸ್ಲ್ಲ್ಯೊ ಖಬ್ರೋ ಉಲಂವ್ಚ್ಯೊ ಸ್ತ್ರೀಯೊ, ಸಂಸಾರಾಂತ್ ಜಲ್ಮಾತಾನಾ ಮಝಾ ಮಾರುಂಕ್ಚ್ ಜಲ್ಮಾಲ್ಯಾಂವ್ ಮ್ಹಣ್ ಚಿಂತ್ಚಿಂ ಜಾಯ್ತಿಂ ಹೆರಾಂ, ತವಳ್ ತವಳ್ ರೊಜ್ಬಾಯೆಗೆರ್ ಮೀಟಿಂಗಾಂ ಕರ್ತಾಲಿಂ. ಥಂಯ್ಸರ್ ಚಲ್ತಾಲೆಂ ಸಂಭಾಷಣ್ ತರೀ, ಆಯ್ಕೊಂಕ್ ಬಾರೀ ಉತ್ಸಾಹಾಚೆಂ. ಖಂಯ್ಚ್ಯಾ ಟಾಕೀಸಾಂತ್ ಕಸಲೆಂ ಪಿಕ್ಚರ್ ಆಯ್ಲಾಂ, ಮುನ್ಸಿಪಾಲಿಟಿ ಚುನಾವಣೆಂತ್ ಕೊಣ್ ಜಿಕಾತ್, ಬಾಯ್ಲಾಂಚೆಂ ರಾಜ್ ಕೆದಾಳಾ ಯೇತ್ ಆನಿಂ ಕೊಣಾಚ್ಯಾ ಧುವೆಕ್ ಕೊಣಾಚ್ಯಾ ಪುತಾಲಾಗಿಂ ಸೈರಿಕ್ ಜಾಯ್ತ್ - ಹ್ಯಾ ವಿಶ್ಯಾಂತ್ಚ್ ತರ್ಕಾಂ ಚಲ್ತಾಲಿಂ. ಹಾಂಚೆ ಪಯ್ಕಿ, ಕೆದಾಳಾಯಿ ತರ್ಕಾಕ್ ಪಡ್ಚೊ ವಿಷಯ್ ಘರ್ಚ್ಯಾ ದಾದ್ಲ್ಯಾಚೊ. ತಾಕಾ ಆಜ್ ಖಂಯ್ಚ್ಯಾ ರಿತಿನ್ ಸಲ್ವಿಲೆಂ ಆನಿಂ ತಾಣೆಂ ಕಶಿ ಆಪ್ಣಾಲಾಗಿಂ ಮಾಫಿ ಮಾಗ್ಲಿ - ಹ್ಯಾ ಸಂಗ್ತಿಚೆರ್ ಕೆದಾಳಾಯಿ ಗಂಭೀರ್ ಉಲೊಣೆ ಚಲ್ತಾಲೆಂ ಆನಿಂ ಹಾಂಚ್ಯಾ ಪ್ರತ್ಯೇಕ್ ಪಂಗ್ಡಾಂತ್ ನವೊಚ್ ಶಿರ್ಕಾಲ್ಲೊ ಬೊಕ್ರೊ - ಸಿಂತಿ.
ಸಿಂತಿ, ರೊಜ್ಬಾಯೆಚ್ಯಾ ಗರಾ ಪಾವ್ತಾನಾ ವೊರಾಂ ಸಾಜ್ ಜಾಲ್ಲಿಂ. ರೊಜ್ಬಾಯ್ ಆನಿಂ ತಿಚೊ ಪತಿ ಮಾತ್ರ್ ಘರಾ ಆಸ್ಲ್ಲಿಂ. ಬಹುಶಃ ಸೈರ್ಯಾಂನಿ ಆಜ್ ರಜಾ ಘೆತ್ಲ್ಲಿ ಜಾಯ್ಜಾಯ್. ಎಕ್ಸುರೆಂ ಆಯಿಲ್ಲ್ಯಾ ಸಿಂತಿಕ್ ಪಳೆವ್ನ್, ರೊಜ್ಬಾಯೆಕ್ ವಿಜ್ಮಿತ್ ಜಾಲೆಂ. ತರೀ ತಿಣೆಂ ಹಾಸೊನ್ ಸಿಂತಿಕ್ ಸ್ವಾಗತ್ಸಿಲೆಂ.
"ಯೆ- ಬಾ ಸಿಂತಿ ..ಕಿತೆಂ ಎಕ್ಲೆಂಚ್ ಪಾವ್ಲೆಂಯ್? ಪತಿರಾಯಾಕ್ ಘರಾಚ್ ಸೊಡ್ಲೆಂಯ್ಗಿ ಕಿತೆಂ?"
ಸಿಂತಿನ್ ತಿಚ್ಯಾ ಸವಾಲಾಕ್ ಜಾಪ್ ದಿಲಿನಾ. ತೆಂ ಸರ್ಶಿಲ್ಯಾ ಕದೆಲಾರ್ ಬಸ್ಲೆಂ.
"ಕಿತೆಂ, ಪುರೊ ಜಾಲೆಂಗಿ ಕಿತೆಂ ಸಿಂತಿ ತುಕಾ? ರಾವ್, ತುಕಾ ತಾನೆಕ್ ಹಾಡ್ತಾಂ" ಆಶೆಂ ಮ್ಹಣೊನ್ ರೊಜ್ಬಾಯೆನ್ ಚಾಕರ್ನಿಕ್ ಆಪೈಲೆಂ.
"ಹೆರಿ ಕಿತೆಂ ಯೇಂವ್ಕ್ ನಾ? ಆಮ್ಚೆರ್ ರಾಗಾರ್ ಜಾಲಾಗಿ ಕಿತೆಂ?"
"ಹುಂ..ತಾಕಾ ಯೇಂವ್ಕ್ ಪುರ್ಸತ್ ಮೆಳ್ತಾ ಖಂಯ್ ಮಿಸೆಸ್ ಡಿ’ಲಿಮಾ?" ಬೆಜಾರಾಯೆನ್ ಮ್ಹಣಾಲೆಂ ಸಿಂತಿ. "ದಾದ್ಲ್ಯಾಂಕ್ ತಾಂಚ್ಯಾ ರಾಟಾವಳೆ ಮುಖಾರ್ ಕಸಲ್ಯಾಚಿಚ್ ಪರ್ವಾನಾ. ಸ ವೊರಾರ್ ಯೆತಾಂ ಮ್ಹಣ್ತಾಲೊ ಗ್ರಾಯ್ಕ್, ಸಾಡೆ - ಸ ಪರ್ಯಾಂತ್ ರಾಕ್ಲ್ಯಾರೀ ಝಳ್ಕಾಲೊನಾ. ತಿತ್ಲ್ಯಾಕ್ ಲಾಗೊನ್ ಎಕ್ಲಿಂಚ್ ಆಯ್ಲಿಂ.
"ತುವೆಂ ಸಾಂಗ್ಚೆಂ ಸಾರ್ಕೆಂ ಬಾಯೆ. ಹ್ಯಾ ದಾದ್ಲ್ಯಾಂಚೆರ್ ಪಾತ್ಯೆಲ್ಯಾರ್ ಚಿಂತ್ಲ್ಲಿಂ ಎಕೀ ಕಾಮಾಂ ಜಾಂವ್ಚಿನಾಂತ್. ತಾಂಚ್ಯಾ ಕಾಮಾ ಮುಖಾರ್ ಸಂಸಾರ್ ವೊಮ್ತೊ ಉದರೊ ಜಾಲ್ಯಾರಿಈ, ತಾಂಕಾಂ ಬೆಜಾರ್ ನಾ" ದಾದ್ಲ್ಯಾಂಚಿ ಠೀಕಾ ಕರ್ನ್ ರೊಜ್ಬಾಯೆನ್ ಮ್ಹ್ಳೆಂ, "ನವೆಂಚ್ ಕಾಜಾರ್ ಜಾಲ್ಲೆಂ ಜೊದೆಂ ತುಮ್ಚೆಂ. ನಾ ವ್ಹೊಕ್ಲೆಕ್, ಖಂಯ್ ಭ್ಹೊವೊಂಕ್ ವ್ಹರ್ಚೆಂ, ಸೈರ್ಯಾಂಗೆರ್ ವ ವಳ್ಕಿಂಚ್ಯಾಗೆರ್ ಭೆಟ್ ದಿಂವ್ಚಿ....ಹೆಂ ಪಡೊನ್ಂಚ್ ವಚೊಂಕ್ನಾ ಹೆರಿಕ್. ಕಾಮ್ ಕಿತೆಂ..... ಏಕ್ ದೀಸ್ ಸುಟಿ ಘೆತ್ಲ್ಯಾರ್, ಸಂಸಾರ್ ಪಾಡ್ ಜಾತಾಗಿ?"
ಪತಿಣಿಚಿಂ ಉತ್ರಾಂ ಆಯ್ಕಾತಾಲೊ ಡಿ’ಲಿಮಾ ಮನಾಂತ್ಚ್ ಹಾಸ್ಲೊ. ಹ್ಯಾ ಬಾಯ್ಲಾಂಚ್ಯಾ ಉಲಣ್ಯಾಂತ್ ಮಧೆಂ ಪ್ರವೇಶ್ ಜಾಂವ್ಕ್ ತಾಕಾ ಅಧಿಕಾರ್ಚ್ ನಾತ್ಲ್ಲೊ. ತರೀ, ದಿಸ್ಪೊಡ್ತೆಂ ಆಯ್ಕೊಂಕ್ ಮೆಳ್ಚ್ಯಾ ಹ್ಯಾ ತರ್ಕಾಂತ್ ತಾಕಾಯಿ ಭಾರಿಚ್ ಉಮ್ಹೇದ್. ಜ್ಯೋರಾನ್ ಸಿಗ್ರೆಟಿಚೆ ಧಮ್ಮ್ ವೋಡ್ನ್, ತೊ ಗಜಾಲಿಂಕ್ ಕಾನ್ ದೀಂವ್ಕ್ಲಾಗ್ಲೊ. ತಿತ್ಲ್ಯಾರ್ ಚಾಕರ್ನಿನ್, ಸಿಂತಿಕ್ ಥಂಡ್ ಪೀವನ್ ಹಾಡ್ನ್ ದಿಲೆಂ.
"ಶರ್ಬತ್ ಪಿಯೆ ಸಿಂತಿ. ಮಾಗಿರ್ ಉಲಯೆತ್" ರೊಜ್ಬಾಯೆನ್ ಮ್ಹಳೆಂ. ಸಿಂತಿನ್ ಪೀವನ್ ಆಖೆರ್ ಕೆಲೆಂ.
"ಮ್ಹಾಕಾ ಘರಾಂತ್ ಎಕ್ಲ್ಯಾಕ್ ರಾವೊನ್ ಉಬ್ಗೊಣ್ ಯೆತಾ ಮಿಸೆಸ್ ಡಿ’ಲಿಮಾ" ಸಿಂತಿನ್ ಸುಖ್-ದುಃಖಾಕ್ ಬುನ್ಯಾದ್ ಘಾಲಿ, "ತೆಂ ಘರ್ ಮ್ಹಾಕಾ ಗ್ರಾಸುಂಕ್ ಆಯಿಲ್ಲ್ಯಾ ಬರಿ ಜಾತಾ. ಆನಿಂ ವೆಳಾರ್ ಹೆರಿ ಘರಾ ಯೇನಾ ಮ್ಹಣ್ತಾನಾ...."
"ತುಜೆ ಕಷ್ಟ್ ಮ್ಹಾಕಾಯ್ ಸಮ್ಜಾತಾತ್ ಸಿಂತಿ" ಚುರ್ಚುರ್ಯಾಂನಿ ರೊಜ್ಬಾಯೆನ್ ಮುಖಾರ್ಸಿಲೆಂ, "ಹೆ ದಾದ್ಲೆ ತಶೆಚ್. ವ್ಹೊ ದಾದ್ಲ್ಯಾಂಚೊ ಸಂಸಾರ್, ಹಾಂಗಾಸರ್ ಆಮ್ಚೆಂ ಚಲ್ತಾಂ ಕಿತೆಂ ಸಾಂಗ್? ದಾದ್ಲ್ಯಾನ್ ಚೂಕ್ ಕೆಲ್ಯಾರ್, ತೆ ಮ್ಹಣ್ತಾತ್, ’ಹಾ, ಕಸಲೊ ಪಿಸೊ ತೊ!’ ಪುಣ್ ಎಕ್ಲ್ಯಾ ಬಾಯ್ಲೆನ್ ಚೂಕ್ ಕೆಲ್ಯಾರ್, ತೆ ದಾದ್ಲೆ ಕಿತೆಂ ಮ್ಹಣ್ತಾತ್ ಜಾಣಾಂಯ್ಗಿ, ’ವ್ಹಾ! ಕಸಲಿಂ ಪಿಶಿಂ ಹಿಂ ಬಾಯ್ಲಾಂ!’ ಹಂಗಾಚ್ ಕಳಾನಾಂವೇ ಸಿಂತಿ ತುಕಾ, ಹೆ ದಾದ್ಲೆ ಆಮ್ಕಾಂ ಕಸಲಿ ಶಿಫಾರಾಸ್ ದಿತಾತ್ ತಿ?"
ಬಾಯ್ಲೆಚಿಂ ಉತ್ರಾಂ ಆಯ್ಕಾತೆಲ್ಯಾ ಶ್ರಿ ಡಿ’ಲಿಮಾಕ್ ಹಾಸೊ ತಡ್ವುಂಕ್ ಜಾಲೊನಾ. ತೊ ವೊಡ್ಲ್ಯಾನ್ ಹಾಸ್ಲೊ.
"ಪಳೆ, ವ್ಹೊ ಹಾಸೊಂಕ್ಲಾಗ್ಲೊ" ಕೆಂವ್ಚಾಲಿ ತಿ, "ಮ್ಹಜೊ ಘರ್ಕಾರ್ ಮ್ಹಣ್ ಲಿಪೈನಾ ಹಾಂವ್. ಹಾಣೆಂಯಿ ಮ್ಹಾಕಾ ಮೊಲ್ ಬಾಂದ್ಲಾಂ ಇತ್ಲೆಂಚ್. ಹಾಂವೆಂ ಕರ್ಚಿಂ ಸಮಾಜ್ ಸೆವಾ ಹಾಚ್ಯಾ ದೊಳ್ಯಾಂಕ್ ತೊಪ್ತಾ."
"ಮ್ಹಾಕಾ ಕಿತ್ಯಾಕ್ ತುಜೊ ಮೊಸೊರ್ ಬಾಯೆ? ತುಜ್ಯಾ ವೊಡ್ವಿಕಾಯೆ ವರ್ವಿಂ ಮ್ಹಾಕಾಯಿ ಸಂತೊಸ್ಚ್. ತುಕಾ ಕಸಲಿಂಯಿ ಕಾಮಾಂ
ಕ.ರುಂಕ್ ಹಾಂವ್ ಕಾಂಯ್ ಆಡಾಯ್ನಾ. ಆನಿಂ ಮ್ಹಜೆಲಾಗಿಂ ಸಾಂಗೊನ್ ಕಾಂಯ್ ತುಂ ತುಜಿಂ ಕಾಮಾ ಪ್ರಾರಂಭ್ ಕರಿನಾಂಯ್" ಹಾಸೊನ್ಂಚ್ ಮ್ಹಣಾಲೊ ಡಿ’ಲಿಮಾ, "ತುಮಿಂ ತುಮ್ಚೆಂ ಉಲೊವ್ಣೆ ಮುಖಾರ್ಸಿಯಾ ಬಾಯಾಂನೊ. ಹಾಂವ್ ತುಮ್ಚೆಂ ಥಂಯ್ ಮೆತೆರ್ ಜಾಯ್ನಾ. ಮ್ಹಾಕಾ ಹಾಸ್ಲ್ಲ್ಯಾಕ್ ಮಾಫ್ ಕರಾ. ಕಿತ್ಯಾಕ್ ಹಾಸೊಂಕ್ಯಿ ಮ್ಹಾಕಾ ಅಧಿಕಾರ್ ನಾ ಮ್ಹಣ್ ಚಿಂತ್ತಾಯ್ ಕೊಣ್ಣಾ ತುಂ."
"ಪಳೆ, ಕಶ್ಯೊ ವೊಪಾರಿ ಉಲೈತಾ ಪಳೆ" ಪತಿಚೆರ್ ಜಳೊನ್ ಉಲೈಲಿ ರೋಜ್ಬಾಯ್, "ಆಮಿಂ ಹಾಂಗಾ ಬಸ್ಚೆಂ ನಾಕಾ ಸಿಂತಿ. ತುಂ ಮ್ಹಜ್ಯಾ ಕುಡಾಕ್ ಯೆ. ಆಮಿಂ ಉಲೈಲ್ಲೆಂ ಹಾಚ್ಯಾ ಕಾನಾಕ್ ತೊಪ್ತಾ ಜಾಯ್ಜಾಯ್"
ದೊಗಾಂಯ್ ಉಟೊನ್ ಬಿತರ್ಲ್ಯಾ ಕುಡಾಕ್ ಚಲ್ಲಿಂ. ತಾಂಚ್ಯಾ ಪಾಟಿಕ್ ಪಳೆವ್ನ್, ಡಿ’ಲಿಮಾ ಅಮ್ರುಕೊ ಹಾಸ್ಲೊ. ಪತಿಣಿಚೆ ದೆಂಕ್ಣೆ ಜಾಂವ್, ವೊಪಾರಿ ಜಾಂವ್ ವ ಬೆಷ್ಟಾವ್ಣೆಂ ಜಾಂವ್, ಕಿತೆಂಯ್ ಆಯ್ಕಾಲ್ಯಾರೀ ತಾಕಾ ಆತಾಂ ರಾಗ್ಚ್ ಯೇನಾತ್ಲೊ. ಕಿತ್ಯಾಕ್, ತಸಲಿಂ ಉತ್ರಾಂ ಸದಾಂಚಿಂ. ಆನಿಂ ಕಾಂಯ್ ಕೊಣಾ ಮುಖಾರ್ ಬಾಯ್ಲ್ ಉಲೈಲಿ ಆನಿಂ ಆಪ್ಣಾಕ್ ಆಕ್ಮಾನ್ ಜಾಲೊ ಮ್ಹಣ್ ಶಿಣಾ ನಾತ್ಲ್ಲೊ ತೊ. ಸದಾಂಚ್ ಆಯ್ಕೊನ್, ಆಯ್ಕೊನ್ ಸವಯ್ ಜಾಲ್ಲಿ ತಾಕಾ. ಮನ್ಶಾಚೆಂ ಸೈರಾಣ್ ಚುಕ್ಚ್ಯಾ ತಸಲೆಮ್ ಕಿತೆಂಯ್ ಸದಾಂಚ್ ಘಡ್ತಾ ಜಾಲ್ಯಾರ್, ಉಪ್ರಾಂತ್ ತಾಕಾ ತಿ ಸದಾಂಚಿ ಸವಯ್ಚ್ ಜಾತಾ. ಏಕ್ ದೋನ್ ಪಾವ್ಟ್ಂ ರಾಗ್ ಕರ್ಯೆತಾ, ತರೀ ಉಪ್ಕಾರ್ನಾ, ಆತಾಂ ಡಿ’ಲಿಮಾಚಿ ಸ್ಥಿತಿ ಹಿಮಾಲಯಾರ್ ಬಸೊನ್ ತಪಸ್ಸ್ ಪರ್ತೆಲ್ಯಾಚಿ ತಸಲಿ... ಹಿಂವಾಚೆಂ ಭ್ಯೆಂ ನಾ. ಪಾವ್ಸಾಚಿ ಪರ್ವಾನಾ....ಖಾಣಾಚಿ ಖಂತ್ ನಾ. ತೊ ಮನಿಸ್ ಸದಾಂಚ್ ಶಾಂತಿ ಆನಿಂ ಸೈರಾಣ್ ಸಾಂಬಾಳ್ನ್ ಆಸಾ. ಪುಣ್ ತವಳ್ ತವಳ್ ಡಿ’ಲಿಮಾ ಮತಿಂತ್ಚ್ ಮಾಗ್ತಾಲೊ - ’ಮ್ಹಜ್ಯಾ ಯೆಜ್ಮಾನಿಕ್ ಬೂದ್ ಕೆದಾಳಾ ಯೇತ್ಗಿ ದೆವಾ? ಆಪುಣ್ ಕಿತೆಂ ಉಲೈತಾಂ ಆನಿಂ ಕಿತೆಂ ಕರ್ತಾಂ ತೆಂ ತಿಚ್ ನೆಣಾ"
ತಾಚಿಂ ತಿಂ ತತ್ವಜ್ಞಾನಾಚಿಂ ಉತ್ರಾಂ ತರಿ, ಬಾಯ್ಲೆಕ್ ವೆಗಿಂಚ್ಯಾಕ್ ಬೂದ್ ಯೆಂವ್ಚಿ ವಾಟ್ ತಾಕಾಯಿ ದಿಸಾನಾತ್ಲ್ಲಿ. ಕಿತ್ಯಾಕ್ ನವ್ಯಾರ್ ಎಕ್ಲೊ ಬಾಯ್ಲೆಕ್, ವ್ಹೊಕಾಲ್ ಮ್ಹಣ್ತಾ, ಉಪ್ರಾಂತ್ ಘರ್ಕಾರ್ನ್ ಮ್ಹಣ್ ಆಪೈತಾ. ಆಖ್ರೇಕ್ ಉತರ್ ಪ್ರಾಯೆರ್, ಆಪ್ಣಾಚಿ ಯೆಜ್ಮಾನ್ ಮ್ಹಣ್ತಾ - ಅನಿಂ ಖರಿಚ್ ಚಾಳೀಸ್ ವರ್ಸಾಂ ಉತರ್ಲ್ಲಿ ರೋಜ್ಬಾಯ್ ಅತಾಂ ಯೆಜ್ಮಾನ್ಂಚ್ ಜಾಲ್ಲಿ.
ರೋಜ್ಬಾಯೆಚ್ಯಾ ಕುಡಾಂತ್ ಪರ್ತುನ್ ಸಂಭಾಷಣ್ ಪ್ರಾರಂಭ್ ಜಾಲ್ಲೆಂ. ದಾದ್ಲ್ಯಾ ವಿಷ್ಯಾಂತ್ಲಿ ಆಪ್ಲಿ ಜಾಣ್ವಾಯ್ ಪ್ರದರ್ಸುನ್ ತಿ ಮ್ಹಣಾಲಿ - "ತುಂ ಅಜುನ್ಯಿ ತರ್ನೆಂ ಸಿಂತಿ. ಸಂಸಾರ್ ಕಿತೆಂ ತುಕಾ ಪರಿಪೂರ್ಣ್ ಮಾಹೆತ್ ನಾ. ದಾದ್ಲ್ಯಾಂ ವಿಷ್ಯಾಂತ್, ತುಜಿ ಜಾಣ್ವಾಯ್ ಉಣಿಂಚ್. ದಾದ್ಲೆ ಜಾಂವ್ದಿತ್ ತಿ ಅಂಕ್ವಾರ್ ವ ಕಾಜಾರಿ, ತಾಂಚೆಂ ಸೈಂಭ್ಚ್ ದುಬಾವಿ. ಹಾಂವೆಂ ಎಕಾ ಪತ್ರಾರ್ ವಾಚ್ಲ್ಲೆಂ, ಅಂಕ್ವಾರ್ ಪುರುಷ್, ಜರಿ ತರಿ ತಾಂಕಾಂ ಕೊಣೆಂಯ್ ಚೆಡ್ವಾನ್ ಹೊಗಳ್ಸಿಲೆಂ ತರ್, ತೆ ರಾಕೊನ್ ಅಸಾಗಿ ಮ್ಹಣ್. ಜರಿ ತರಿ, ಕೊಣ್ಂಚ್ ಚೆಡುಂ ತಾಕಾ ಗುಮಾನ್ ಕರಿನಾ, ಅಪ್ಣಾ ತಿತ್ಲೊ ನಿರ್ಭಾಗಿ ಕೊಣ್ಂಚ್ ನಾ ಮ್ಹಣ್ ತೆ ರಡ್ತಾತ್ ಖಂಯ್"
ಸಿಂತಿ ಹಾಸ್ಲೆಂ ಧಾಂತ್ ಸೊಡ್ನ್, ಸಿಂತಿಕ್ ಸಂತೊಸ್ ಜಾಲಾ ಮ್ಹಣ್ ಸಮ್ಜಾಲ್ಲ್ಯಾ ರೋಜ್ಬಾಯೆನ್ ವರ್ತ್ಯಾ ಉಮ್ಹೆದಿನ್ ಆಪ್ಲಿ ಠೀಕಾ ಮುಖಾರ್ಸಿಲಿ. "ಆನಿಂ ಕಾಜಾರಿ ದಾದ್ಲ್ಯಾಂ ವಿಷ್ಯಾಂತ್ ಕಿತೆಂ ಸಾಂಗ್ಚೆಂ ಬಾಯೆ? ಬಾಯ್ಲೆಕ್ ಭೊಂವ್ಡಾಂವ್ಕ್ ವರ್ತಾನಾ, ಬಾಯ್ಲೆನ್ ಸೊಭಿತ್ ವಸ್ತುರ್ ನ್ಹೆಸೊಂಕ್ ತೆ ಅಡ್ವಾರ್ತಾತ್ - ಕಿತ್ಯಾಕ್ ದುಸ್ರೆ ಕೊಣೀ ಅಪ್ಲ್ಯಾ ಬಾಯ್ಲೆಕ್ ಪಳೆತಿತ್ ಮ್ಹಳ್ಳ್ಯಾ ಭಿಂಯಾನ್, ಆನಿಂ ಬಾಯ್ಲ್ ತರ್, ಸಾಧೆಂ ಕಾಪಾಡ್ ನ್ಹೆಸೊನ್ ಸಾಂಗಾತಾ ಯೇತ್. ಸಗ್ಳ್ಯಾ ಭೊಂವ್ದೆಚೆರ್ ಹ್ಯಾ ದಾದ್ಲ್ಯಾಂಚೆ ದೊಳೆ ಖಂಯ್ಗಿ ಘುಂವ್ತಾತ್ - ಕೊಣ್ ದುಸ್ರಿ ಸೊಭಿತ್ ವಸ್ತುರಾಂ ನ್ಹೆಸ್ಲ್ಲಿ ಸುಂದರ್ ಸ್ತ್ರೀ ದಿಸ್ತಾಗಿ ಮ್ಹಣ್"
ಸಿಂತಿಕ್ ಹಾಸೊ ತಡ್ವುಂಕ್ ಜಾಲೊನಾ. ರೊಜ್ಬಾಯೆಚ್ಯಾ ಉತ್ರಾಂನಿ ಎಕಾ ಥರಾಚೊ ಆನಂದ್ಚ್ ತಾಕಾ ಜಾಲೊ. ದಾದ್ಲ್ಯಾ ವಿಶ್ಯಾಂತ್, ಕುಲ್ಪಾಂ ಅಯ್ಕೊಮ್ಚಿಂ ಮ್ಹಳ್ಯಾರ್ ಕಸಲಿ ಮಝಾ ಬೊಗ್ತಾ.
"ಹುಂ.....ಏಕ್ ದೀಸ್ ಯೆತೊಲೊ ಸಿಂತಿ..." ಭವಿಷ್ಯಾ ವಿಶ್ಯಾಂತ್ ನಿಯಾಳ್ನ್ ರೋಜ್ಬಾಯ್ ಮ್ಹಣಾಲಿ. "ತ್ಯಾ ವೆಳಾರ್, ದಾದ್ಲ್ಯಾಂಚ್ಯಾ ಗುಲಾಮ್ಪಣಾಂತ್ಲೆ ಅಮಿಂ ಸುಟ್ತೆಲ್ಯಾಂಚ್. ತೆದಾಳಾ, ಆಮಿಂ ಕೆಲ್ಲಿಂ ಕಾನೂನಾಂ, ಆಮಿಂ ಉಲೈಲ್ಲೆಚ್ ಕಾಯ್ದೆ ಜಾತೆಲೆ. ತೆದಾಳಾ ಹ್ಯಾ ಪುರುಷಾಂಚೆ ದೊಳೆ ಉಗದ್ತೆಲೆ. ಸ್ತ್ರಿಯೊ ಅಬಲ್ ಮ್ಹಣ್ ಚಿಂತ್ತಾತ್ ತೆ. ಪುಣ್ ಏಕ್ ದೀಸ್ ಆಮ್ಚಿಂ ಶಾಥಿ ತಾಂಕಾಂ ಕಳ್ತೆಲಿ"
ತೊ ದೀಸ್ ಕೆದಾಳಾ ಯೆತ್ ಕೊಣ್ಣಾ.... ಅವ್ಜಿತ್ ಜಾವ್ನ್ ಚಿಂತ್ತಾಲೆಂ ಸಿಂತಿ. ತರೀ ತೊ ದೀಸ್, ಸ್ತ್ರೀಯಾಂಕ್ ಮಹತ್ವಾಚೊ ಜಾತೊಲೊ. ತಾಂಚ್ಯಾ ಜೈತಾಚೊ ಬಾವ್ಟ್ಯೊ ಊಂಚ್ ಉಬ್ತೊಲೊ ಆನಿಂ ಸಂಸಾರಾರ್ ತಿಂ ನಾಂವಾಡ್ತೆಲಿಂ.
"ಹಾಂ, ಆಶೆಂಚ್ ಉಲೈಲ್ಯಾರ್, ಉಲೊಣ್ಯಾಕ್ ಅಂತ್ಯ್ಚ್ ಅಸ್ಚೆಂನಾ. ತುಕ ಹಾಂವ್ ಸ್ಪೆಶಲ್ ಡ್ರಿಂಕ್ಸ್ ತಯಾರ್ ಕರ್ತಾಂ......ಡೊಲ್ಫಿ.." ರೊಜ್ಬಾಯೆನ್ ಘರ್-ಚಾಕ್ರಾಕ್ ಅಪೈಲೆಂ.
ಸ್ಪೆಶಲ್ ಡ್ರಿಂಕ್ಸ್ ಕಿತೆಂಗಾಯ್...ಸಿಂತಿಕ್ ವಿಜ್ಮಿತ್ಚ್ ಜಾಲ್ಲೆಂ.
"ಏ ಡೊಲ್ಫಿ..." ಪರ್ತ್ಯಾನ್ ಉಲೊ ಕೆಲೆಂ ಶ್ರೀಮತಿ ಡಿ’ಲೀಮಾನ್ ಡೊಲ್ಫಿಚಿ ಜಾಪ್ ಆಯ್ಲಿನಾ.
"ಹುಂ...ಮಾತ್ತಿ ಖಾಂವ್ಕ್ ಗೆಲಾ ಚೆಡೊ. ಹ್ಯಾ ಘರಾಂತ್ ಏಕ್ ಸೊಡಾ ಹಾಡ್ತೆಲ್ಯಾಚಿ ಗತ್ಯಿ ನಾ...ಪುರ್ಪುರ್ಲಿ ತಿ.
ಸೊಡಾ ಮ್ಹಣ್ತಾನಾ ಸಿಂತಿಕ್ ದುಬಾವ್ ಜಾಲೊ. ತೆಂ ಭಿಂಯಾನ್ ಮ್ಹಣಾಲೆಂ.
"ಸೊಡಾಚಿ ಗರ್ಜ್ ಆತಾಂ ಕಿತೆಂ ರೋಜ್ ಬಾಯೆ?" ತುಜೆಂ ’ಡ್ರಿಂಕ್ಸ್’ ಮ್ಹಳ್ಯಾರ್ ಸೊರೊ ಪುಣಿ ನಹಿಂಮೂ?"
"ತುಂ ಚಿಕ್ಕೆ ಥಂಡ್ ರಾವ್ ಸಿಂತಿ. ಸೊರೊ ಪಿಯೆಂವ್ಚೊ ಆಮ್ಚ್ಯಾ ರೆಂಕಾಚ್ಯಾಂನಿ ನ್ಹಂಯ್. ಹಾಂವೆ, ಸ್ಪೆಶಲ್ ಬ್ರಾಂಡಿ ಗೊಯಾಂ ಥಾವ್ನ್ ಹಾಡೈಲ್ಯಾ. ಹೇಯ್..ತುಂ ಪುಣಿ ಹೆವ್ಶಿನ್ ಯೇನಾಂಯ್...." ತಿಣೆಂ ಘೊವಾಕ್ ಉದ್ದೇಶುನ್ ಮ್ಹಳೆಂ.
ಬಾಯ್ಲ್ ಆಪ್ಣಾಕ್ಚ್ ಅಪೈತಾ ಮ್ಹಣ್ ಸಮ್ಜಾಲ್ಲೊ ಡಿ’ಲಿಮಾ ಧಾಂವೊನ್ಂಚ್ ಆಯ್ಲೊ.
"ತುಂ ಕುಶಿಚ್ಯಾ ಅಂಗ್ಡಿಕ್ ವಚೊನ್ ದೋನ್ ಸೊಡಾ ಹಾಡ್ನ್ ಯೆ. ಚೆಡೊ ದಿಸಾನಾ" ತಿಣೆ ಘೊವಾಕ್ ತಾಕಿದ್ ದಿಲಿ. ಆನಿಂ ತೊ ಬಾಯ್ಲೆಚೊ ಸೆವಕ್, ಖಾಲ್ತಿಮಾನ್ ಘಾಲ್ನ್ ಉಟಾಂ ಉಟಿಂ ದೋನ್ ಸೊಡಾ ಹಾಡ್ನ್ ಆಯ್ಲೊ. ಘರ್ಕಾರಾನ್ ಭಾಯ್ರ್ ವಚೊಂಕ್, ರೊಜ್ಬಾಯೆನ್ ಬ್ರಾಂಡಿಚಿ ಬೋತ್ಲ್ ಉಗ್ತಿ ಕೆಲಿ.
"ರೊಜ್ಬಾಯೇ, ಮ್ಹಾಕಾ ಹಾಚಿ ಸವಯ್ ನಾ...." ಕಾವ್ಜೆಣೆನ್ ಸಿಂತಿ ಮ್ಹಣಾಲೆಂ..
"ಸ್ವಯ್ ನಾ.." ಹಾಸ್ಲಿ ತಿ. "ಕೆಲ್ಯಾರ್, ಸಗ್ಳಿ ಸವಯ್ ಜಾತಾ. ಅಪ್ರೂಪ್ ಪಿಯೆಲ್ಲ್ಯಾಂತ್ ಬಾಧಕ್ ನಾ. ಬ್ರಾಂಡಿ ಜೆವಾಕ್ ಬರಿ.."
"ಮ್ಹಾಕಾ ನಾಕಾ.." ಪರಾತ್ತುಂಚ್ಯಾ ಸ್ವರಾನ್ ಸಿಂತಿ ಮ್ಹಣಾಲೆಂ. "ಹೆರಿಕ್ ಕಳ್ಳ್ಯಾರ್ ತೊ ಖುಬಾಳ್ತೊಲೊ."
"ತುಂ ಎಕ್ಲೆಂ ಘರ್ಕಾರಾಕ್ ಬಿಯೆಂವ್ಚೆಂ ಬಾಯ್ಲ್. ಹೆರಿ ಕಿತೆಂ ಮನಿಸ್ ನ್ಹಂಯ್ವೆ ಹುಂ, ಘೆ ತುಂ,,,,ಹಾಂತುಂ ಕಾಂಯ್ ಜಾಯ್ನಾ" ರೊಜ್ಬಾಯೆನ್ ಗ್ಲಾಸ್ ಸಿಂತಿ ಕುಶಿನ್ ವೊಡ್ಡಾಯ್ಲೊ.
ಭಿಯಾನ್ಂಚ್ ಸಿಂತಿನ್ ಗ್ಲಾಸ್ ಹಾತಿಂ ಘೆತ್ಲೊ, ಆಮಾಲ್- ಪೀವನ್ ಪಿಯೆಂವ್ಚ್ ಕೆದಾಳಾಚ್ ಸವಯ್ ನಾತ್ಲ್ಲಿ ತಾಕಾ. ಪಯ್ಲ್ಯಾ ಪಾವ್ಟಿಂ, ಬ್ರಾಂಡಿಚೊ ಗ್ಲಾಸ್ ಹಾತಿಂ ಧರ್ಲಾ...... ಆಪ್ಣಾಕ್ ತಕ್ಲೆಕ್ ಅಮಾಲ್ ಚಡಾತ್ ಜಾಲ್ಯಾರ್? ಉಪ್ರಾಂತ್ ಘರಾ ಕಶೆಂ ಪಾಂವ್ಚೆಂ? ಹೆರಿ ಖಂಡಿತ್ ಆಪ್ಣಚೆರ್ ರಾಗಾರ್ ಜಾತೊಲೊ. ಪಯ್ಲೆಂಚ್ ತಾಕಾ ಕಳೈನಾಸ್ತಾಂ, ರೊಜ್ಬಾಯೆಗೆರ್ ಆಪುಣ್ ಆಯ್ಲ್ಯಾಂ. ಹೆರಿ, ರಾಕೊನ್ ಬಸ್ಲಾ ಅಸ್ತೊಲೊ, ಕೆದಾಳಾ ಪಾಟಿಂ ಯೇನ್ಗಾಯ್ ಮ್ಹಣ್. ತಾಕಾ ಯೆದೊಳ್ಚ್ ಕಿತ್ಲೊ ರಾಗ್ ಆಯ್ಲಾಗಿ ದೇವ್ ಜಾಣಾ..
ತರೀ, ರೊಜ್ಬಾಯ್ ವತ್ತಾಯ್ ಕರ್ತಾ. ಬ್ರಾಂಡಿ ಪಿಯೆಂವ್ಕ್. ಜರಿತರಿ, ಆಫುಣ್ ನಿರಾಕರ್ಸಿನ್, ತಿಕಾ ರಾಗ್ ಯೆತೊಲೊ. ಹಾಯ್ ದೆವಾ....ಪಿಯೆಂವ್ಚೆಗಿ ನಾಕಾ...ಮುಖಾ ವಯ್ಲೊ ಗ್ಲಾಸ್, ಮತಿಂತ್ ಕಸಲಿಂಗಿ ಚಿಂತ್ನಾಂ ಉಟೈತಾ. ಪಿಯೆ ಮ್ಹಣ್ಚ್ಯಾ ಬರಿ ಆಶಾ ದಾಕವ್ನ್ ಉಲೈತಾ. ವ್ಹಯ್, ಆಪ್ರೂಪ್ ಪಿಯೆಲ್ಯಾರ್ ಕಿತೆಂ ಜಾತಾ? ಹ್ಯಾ ಪೀವನಾಂತ್ ಕಿತೆಂಗಿ ಸ್ವಾಧಿಕ್ ಮಝಾ ಆಸೊಂಕ್ಜಾಯ್. ನ್ಹಂಯ್ ತರ್, ಇತ್ಲೆ ಜಣ್ ದಾದ್ಲೆ ಹ್ಯಾ ಪಿಯೊಣ್ಯಾಚೆ ಗುಲಾಮ್ ಜಾಲ್ಯಾತ್ ಕಿತ್ಯಾಕ್? ಬಾಯ್ಲೆಚಿಂ ಕುಡ್ಕಾಂ ಆಪಹರ್ಸುನ್, ವಿಕುನ್ ಸೊರೊ ಪಿಯೆತೆಲ್ಯಾ ದಾದ್ಲ್ಯಾಂಚ್ಯೊ ಕಾಣಿಯೊಯಿ ಆಪ್ಣೆ ಆಯ್ಕಾಲ್ಯಾತ್.
ಸಿಂತಿ ಚಡ್ ವೇಳ್ ಚಿಂತುಂಕ್ ಗೆಲೆಂನಾ. ದೊಳೆ ದಾಂಪುನ್ ತಾಣೆಂ ತೆಂ ಪೀವನ್ ಘೊಟ್ಲೆಂ. ಏಕ್ ಪಾವ್ಟಿಂಚ್ಯಾಕ್ ವೊಂಕಾರೊ ಆಯಿಲ್ಲ್ಯಾ ವರಿ ಬೊಗ್ಲೆಂ ತಾಕಾ. ತಾಳ್ಯಾಂತ್ ಆನಿಂ ಹರ್ದ್ಯಾಂತ್ ಹುಲ್ಪಾಲ್ಲ್ಯಾಬರಿ ಅನ್ಭೋಗ್. ಆನಿಂ ಸಾಸ್ಣಾಕ್ ಹೆಂ ನಾಕಾ ಮ್ಹಣ್ ಮತಿಂತ್ಚ್ ನಿಚೆವ್ ಕೆಲೊ ಸಿಂತಿನ್.
ಸೆಕುಂಡಾ, ಮಿನುಟಾಂ ಪಾಶಾರ್ ಜಾತಾನಾ, ಸಿಂತಿಕ್ ಅಮಾಲ್ ಚಡೊನ್ ಯೆತಾಲೆಂ. ರೊಜ್ಬಾಯೆನ್ ಚಡಿತ್ ತಾಕಾ ವೊತುಂಕ್ ನಾತ್ಲ್ಲೊ ತರೀ, ಪಯ್ಲೆ ಪಾವ್ಟಿಂ ಪಿಯೆಂವ್ಚೆಂ ಜಾಲ್ಲ್ಯಾನ್ , ಸಿಂತಿಕ್ ಅಮಾಲ್ ಜಾಲ್ಲೆಂ. ರೊಜ್ಬಾಯ್ ಸವ್ಕಾಸ್ ಆಪ್ಲೊ ಗ್ಲಾಸ್ ಖಾಲಿ ಕರುಂಕ್ ಪಡ್ಲಿ. ಮಧೆಂ ಮಧೆಂ, ತಿಂ ಕಿತೆಂಗಿ ಉಲೈತಾಲಿಂ. ಸಿಂತಿಕ್ ಕಿತೆಂ ಉಲೈತಾಂ ಮ್ಹಳ್ಳೆಂ ಜ್ಞಾನ್ ನಾತ್ಲ್ಲೆಂ. ಆಖ್ರೇಕ್ ಘಡ್ಯಾಳಾಚೆರ್ ವೊರಾಂ ಆಟ್ ಮಾರ್ತಾನಾ, ರೊಜ್ಬಾಯೆನ್ ತಾಕಾ ಜಾಗ್ವವ್ನ್ ಮ್ಹಳೆಂ.
"ವೊರಾಂ ಆಟ್ ಜಾಲಿಂ ಸಿಂತಿ. ತುಂ ಆತಾಂ ಘರಾ ವೊಚ್. ಹೆರಿ ತುಕಾ ರಾಕೊನ್ ರಾವ್ಲಾ ಅಸ್ತೊಲೊ. ಹಾಂವೆಂ ಪಾಂವ್ಕ್ ಯೆಜಾಯ್ಗಿ ತುಕಾ?"
"ನಾಕಾ ಮಿಸೆಸ್ ಡಿ’ಲಿಮಾ. ಮ್ಹಾಕಾ ಕಾಂಯ್ ಜಾಯ್ನಾ" ಜೀಬ್ ತಾಚಿ ಆಡ್ಚ್ ಪಡ್ತಾಲಿ. ಚುಕ್ಚಿಂ ಮೆಟಾಂ ಕಾಡ್ನ್ ತೆಂ ರೊಜಾಬಾಯೆ ಸಾಂಗಾತಾ ಭಾಯ್ರ್ ರಸ್ತ್ಯಾಕ್ ಆಯ್ಲೆಂ.
"ಘರಾ ಕಶೆಂ ವೆತಾಯ್? ಬಸ್ಸಾರ್....."
"ಟ್ಯಾಕ್ಸಿ ಮೆಳ್ಳ್ಯಾರ್, ಟ್ಯಾಕ್ಸೆರ್ ವೆತಾಂ... ತುಂ ವಚ್ ರೊಜ್ಬಾಯೆ. ತುಕಾ ಮ್ಹಸ್ತ್ ದೇವ್ ಬರೆಂ ಕರುಂ" ತೆಂ ಮ್ಹಣಾಲೆಂ.
"ಬರೆಂ ಸಿಂತಿ. ಗುಡ್ನಾಯ್ಟ್.."
ಸಿಂತಿ ಚ್ಯಾರ್ ಮೆಟಾಂ ಮುಖಾರ್ ವೆತಾನಾ, ತಾಕಾ ಖಾಲಿ ಏಕ್ ಆಟೊ ರಿಕ್ಷಾ ಮೆಳ್ಳಿ. ತಿ ರಾವೊವ್ನ್ ತೆಂ ಬಸ್ಲೆಂ ಆನಿಂ ನಂತೂರ್ ವರೊಂಕ್ ಫರ್ಮಾಯ್ಲೆಂ.
ಥಂಯ್ ಘರಾ ಹೆರಿ ಸಗ್ಳೊಚ್ ಬೆಜಾರಾಯೆನ್ ಆಸ್ಲ್ಲೊ. ಸಾತ್ ವೊರಾಂಚೆರ್ ತೊ ಘರಾ ಆಯಿಲ್ಲೊ ಸಿಂತಿಚೊ ಪಾತ್ತೊ ನಾತ್ಲ್ಲೊ. ಘರ್ಚ್ಯಾ ಚಾಕ್ರಾಲಾಗಿಂ ವಿಚಾರ್ಲ್ಯಾರೀ, ಫಾವೊತಿ ಜಾಪ್ ಮೆಳೊಂಕ್ ನಾ. ಕೆದಾಳಾಚ್ ಎಕ್ಸುರೆಂ ಭಾಯ್ರ್ ವಚಾನಾತ್ಲ್ಲೆಂ ಸಿಂತಿ, ಆಜ್ ಕಶೆಂ ಗೆಲೆಂ? ಆಪ್ಣಾ ವಯ್ಲ್ಯಾ ರಾಗಾನ್ಗಿ?
ರಾಗ್ ಕಿತ್ಯಾಚೊ?? ಸಿಂತ್ ನೆಣಾಂಗಿ ಆಪುಣ್ ಏಕ್ ದಾಕ್ತೆರ್ ಮ್ಹಣ್. ಪಿಡೆಸ್ತಾಂಚಿ ಸೆವಾ ಚಾಕ್ರಿ ಕರ್ಚೆಂ ಆಪ್ಣಾಚೆಂ ಕರ್ತವ್ಯ್. ತಾಣಿ ಆಪವ್ನ್ ಧಾಡ್ಲ್ಲ್ಯಾ ವೆಳಾರ್ ಧಾಂವಾಜಾಯ್. ಘರಾ ಸ ವೊರಾಂ ಆದಿಂ ಪಾಟಿಂ ಯೆತಾಂ ಮ್ಹಣ್ ಸಾಂಗ್ಲ್ಲೆಂ ಖರೆಂ. ಯೆತಾನಾ ವೇಳ್ಚ್ ಜಾಲೊ....ಪುಣ್ ಸಿಂತಿನ್ ಸುಧಾರ್ಸುನ್ ವರ್ಯೆತೆಂ.
ವೊರಾಂ ಆಟಾಂಕ್ ಲಾಗಿಂ ಜಾತಾನಾ ತಾಕಾ ಖರೊಚ್ ರಾಗ್ ಆಯಿಲ್ಲೊ. ’ಹುಂ.....ಘರಾ ಯೇಂವ್ದಿ. ತಾಕಾ ಆಜ್ ಚ್ಯಾರ್ ಉತ್ರಾಂ ಕಾಡ್ಲ್ಯಾ ಶಿವಾಯ್ ರಾಂವ್ಚೊಂನಾ..’ ಹೆರಿ ಅಸಮಾಧಾನೆನ್ ಹೆಣೆ ತೆಣೆಂ ಪಾಸಾಯೊ ಮಾರಿತ್ತ್ ಸಿಂತಿಚ್ಯಾ ಯೆಣ್ಯಾಕ್ ರಾಕೊನ್ ರವ್ಲೊ.
ಆಖ್ರೇಕ್, ಘರಾ ಮುಖಾರ್ ರಿಕ್ಷಾ ಉಬಿ ಜಾಲ್ಲಿ, ಸಿಂತಿ ತಾಚೆ ವಯ್ಲೆಂ ದೆಂವ್ಚೆಂ ತಾಣೆ ಪಳೆಲೆಂ. ಕುಶಿಚೆಂ ಪೇಪರ್ ಕಾಡ್ನ್, ವಾಚ್ಲ್ಲ್ಯಾಬರಿ ನಟನ್ ಕರುಂಕ್ಲಾಗ್ಲೊ ಹೆರಿ.
ಘರ್ಚಿಂ ಮೆಟಾಂ ಚಡ್ತಾನಾ, ಸಿಂತ್ಚೆ ಪಾಂಯ್ ಧಂಡಳ್ಳೆಂ. ಲಕ್ಚೆಂ ತೆಂ ಸಾಂಬಾಳುನ್ ವಯ್ರ್ ಚಡ್ಲೆಂ. ಹುಂ....ಹೆರ್ ಘರಾಚ್ ಆಸಾ.... ಆತಾಂ ಕಶೆಂ ತಾಕಾ ಸಮಾಧಾನ್ ಕರ್ಚೆಂ? ಆಪ್ಣಾಚೊ ರಾಗ್ ಆಯ್ಲಾ ಮ್ಹಳ್ಳೆಂ ತೆಂ ಖಂಡಿತ್.
"ಗುಡ್ ಇವ್ನಿಂಗ್ ಹೆರಿ..." ಜಾತಾತಿತ್ಲೊ ತಾಳೊ ಸಾರ್ಕೊ ಕರ್ನ್ ತೆಂ ಉಲೈಲೆಂ.
ಹೆರಿನ್ ಜಾಪ್ ಕಾಡ್ಲಿನಾ. ಪತ್ರ್ ವಾಚ್ಚ್ಯಾಂತ್ ತಲ್ಲೀನ್ ಜಾಲಾಂ ತಶೆಂ, ಥಂಡ್ ರಾವ್ಲೊ ತೊ.
"ಮ್ಹಜೊ ರಾಗ್ ಆಯ್ಲಾಗಿ ಬಾ..?" ತೆಂ ಲಾಗಿಂ ಸರೊನ್, ಹೆರಿಚ್ಯಾ ಭುಜಾಕ್ ತೆಂಕ್ಲೆಂ. ಹೆರಿಕ್, ಸಟ್ಟ್ ಕರ್ನ್ ಫರ್ಮಳ್ ನಾಕಾನ್ ಮಾರ್ಲೊ.
"ಸಿಂತಿ.." ವಿಜ್ಮಿತ್ ಜಾಲ್ಲ್ಯಾ ಸ್ವರಾನ್ ತೊ ಉಲೈಲೊ, "ಹೆಂ ಕಿತೆಂ, ತುಜ್ಯಾ ನಾಕಾಕ್ ವಾಸ್?"
ಅಮ್ರುಕೆ ಹಾಸ್ಲೆಂ ಸಿಂತಿ. ತಾಣೆಂ ಜಾಪ್ ದಿಲಿನಾ.
"ಹಾಸ್ತಾಯ್ ಕಿತ್ಯಾಕ್, ಹಾಂವೆಂ ವಿಚಾರ್ಲ್ಲ್ಯಾ ಸವಾಲಾಕ್ ಜಾಪ್ ದೀಂವ್ಕ್ ಜಾಯ್ನಾ?" ಚಿಕ್ಕೆ ಗರಾಮ್ ಜಾವ್ನ್ ಹೆರಿನ್ ಸವಾಲ್ ಕೆಲೆಂ, "ತುಂ ಸೊರೊ ಪಿಯೆಲಾಂಯ್!"
"ಸೊರೊ ನ್ಹಂಯ್, ಬ್ರಾಂಡಿ.." ಆನಿಕೀ ಹಾಸ್ಲೆಂ ತೆಂ.
"ಸಿಂತಿ.." ಹೆರಿನ್ ಉಲೊಣೆ ರಾವೈಲೆಂ. "ಬ್ರಾಂಡಿ ಪಿಯೆಲಾಂಯ್ ತುಂ! ಸಾಂಗೊಂಕ್ ತುಕಾ ಲಜ್ ದಿಸಾನಾ? ಕೊಣೆ ದಿಲಿ ತುಕಾ ಬ್ರಾಂಡಿ?"
"ಹಾಂವ್ ಮಿಸೆಸ್ ಡಿ’ಲಿಮಗೆರ್ ಗೆಲ್ಲಿಂ.... ತಿಣೆಂ ದಿಲಿ" ಸಿಂತಿಚೊ ಹಾಸೊ ನಪೈಂಚ್ ಜಾಲ್ಲೊ.
"ಸ್ತ್ರೀಯೆಕ್ ಅಮಾಲಾಚಿ ವಸ್ತ್ ಸಜಾನಾ ಸಿಂತಿ" ಗೊರೊಜ್ ಮಾರ್ಲಿ ಹೆರಿನ್. ’ಮ್ಹಜ್ಯಾ ದೊಳ್ಯಾಂ ಭಾಯ್ ಆಸಲಿ ಭುರ್ಶಿಂ ಕಾಮಾಂ ತುಂ ಕರ್ತಾಯ್!"
"ವ್ಹಡ್ಲ್ಯಾನ್ ತಾಳೊ ಪಿಂಜ್ತಾಯ್ ಕಿತ್ಯಾಕ್? ಮ್ಹಜ್ ಕಾನ್ ಕೆಪ್ಪೆ ಜಾಂವ್ಕ್ ನಾಂತ್" ಸಿಂತಿ ಸಣ್ಸಣ್ಲೆಂ. "ಹಾಂವೆ ತುಜ್ಯಾ ದೊಳ್ಯಾಂ ಮುಖಾರ್ ರಾವಾಜಾಯ್ ಮ್ಹಣ್ಚೊ ತುಂ, ಆಟ್ ವಾಜ್ತಾಂ ಪರ್ಯಾಂತ್ ಕೊಣಾ ಸಾಂಗಾತಾ ಆಸ್ಲ್ಲೊಯ್?"
"ಸಿಂತಿ..." ಸ್ತಬ್ದ್ ರಾವೊ ಹೆರಿ. ತಕ್ಲೆಕ್ ಚಡ್ಲ್ಲೊ ಕ್ರೋಧ್ ಬಲತ್ಕಾರಾನ್ ಸಾಂಬಾಳ್ಳೊ ತಾಣೆಂ. "ಹಿಂ ಉತ್ರಾಂ ಎಕಾ ಬಾಯ್ಲೆಚ್ಯಾ ತೊಂಡಾ ಥಾವ್ನ್ ಭಾಯ್ರ್ ಸರ್ಚಿಂ ನ್ಹಂಯ್. ತುಂ ಮ್ಹಾಕಾ ಅಕ್ಮಾನ್ ಕರ್ತಾಯ್"
"ಮ್ಹಜೊ ತಿತ್ಲೊ ಮೋಗ್ ಕರ್ಚೊ ತುಂ, ಮ್ಹಾಕಾ ಘರಾಂತ್ ರಾಕೊಂಕ್ ಕರ್ನ್, ವೇಳ್ ಕರ್ನ್ ಯೆತೊನಾಂಯ್" ತಳ್ಮಾಟ್ಯಾಕ್ ಮಾರ್ಚಾ ಜಿನ್ಸಾರ್, ಸಿಂತಿ ಖಡಕ್ಕ್ ಉಲೊವ್ನ್ ಆಪ್ಲ್ಯಾ ರುಮಾಕ್ ಗೆಲೆಂ. ಬ್ರಾಂಡಿಚ್ಯಾ ಪೊರ್ಸಾನ್ಗಿ, ಘರ್ಕಾರಾನ್ ಆಪ್ಣಾಕ್ ವಿಚಾರ್ ಕೆಲೊ ಮ್ಹಳ್ಳ್ಯಾ ರಾಗಾನ್ಗಿ, ಉತಾರ್ ಉತ್ರಕ್ ಪಾಟಿಂ ದಿಲ್ಲೆಂ ತಾಣೆಂ. ಆಪ್ಲ್ಯಾ ಕುಡಾಕ್ ವಚೊನ್ ದಾರ್ ಬಂಧ್ ಕೆಲೆಂ ಸಿಂತಿನ್.
ಹೆರಿಚಿ ಜೀಬ್ ಮೊನಿ ಜಾಲ್ಲಿ. ಸಿಂತಿ ಥಾವ್ನ್ ತಸಲೆಂ ನಡ್ತೆಂ ತಾಣೆಂ ಆಪೇಕ್ಸುಂಕ್ ನಾತ್ಲ್ಲೆಂ. ಸೊರ್ಯಾಚ್ಯಾ ಆಮಾಲಾರ್, ಅಸಲಿಂ ಉತ್ರಾಂ ಸಿಂತಿಚ್ಯಾ ತೊಂಡಾತ್ಲಿಂ ಭಾಯ್ರ್ ಪಡ್ಲಿಂ......ನಾ, ತಾಕಾ ಅಶೆಂಚ್ ಸೊಡುಂಕ್ ನಜೊ. ಆಯ್ಚಿ ರಾತ್ ಸರೊಂದಿ. ಫಾಲ್ಯಾಂ ಸಕಾಳಿಂ, ತಾಕಾ ನೀಯ್ಟ್ ವಾಟೆಕ್ ಹಾಡ್ತೊಲೊಂ.
ತರೀ ಸಿಂತಿಚ್ಯಾ ಗರ್ವಾನ್, ಹೆರಿಚ್ಯಾ ಕಾಳ್ಜಾಕ್ ಘಾಯ್ ಕೆಲ್ಲೊ. ತಾಚೆಂ ಕಾಳಿಜ್ ದುಕ್ಲ್ಲೆಂ. ತೊ ಜಾಲಾಂತ್ ಪಾಸಾಯೊ ಮಾರುಂಕ್ಲಾಗ್ಲೊ. ಶೀತಳ್ ವಾರೆಂ ವ್ಹಾಳ್ತಾಲೆಂ ತರೀ, ಹೆರಿಚೆಂ ಶರೀರ್ ಆಕ್ಮಾನಾನ್ ಜಳ್ತಾಲೆಂ. ಪೊಟಾಕ್ ಭುಕ್ ಲಾಗ್ಲ್ಲಿ ತರೀ, ಜೇಂವ್ಕ್ ತಾಕಾ ಮನ್ ನಾತ್ಲ್ಲೆಂ. ಸಬಾರ್ ವೆಳಾ ಉಪ್ರಾಂತ್ ತೊ ಬಿತರ್ ಆಯ್ಲೊ. ಸಿಂತಿಚ್ಯಾ ಕುಡಾಚೆಂ ದಾರ್ ದಾಂಪೊನ್ಂಚ್ ಆಸ್ಲ್ಲೆಂ.
"ಸಿಂತಿ......" ಹಾಳ್ವಾಯೆನ್ ಆಪೈಲೆಂ ತಾಣೆಂ.
ಸಿಂತಿನ್ ಜಾಪ್ ದಿಲ್ನಾ. ತಿತ್ಲ್ಯಾ ಬಿತರ್ ತೆಂ ನಿದ್ರಾದೀನ್ ಜಾಲ್ಲೆಂ....ಸಿಂತಿಚ್ಯಾ ಜಾಪಿಕ್ ರಾಕೊನ್ ನಿರಾಶಿ ಜಾಲ್ಲೊ ಹೆರಿ, ಆಪ್ಲ್ಯಾ ಖಟ್ಲ್ಯಾರ್ ಆಡ್ ಪಡ್ಲೊ.
ಘೊವ್ - ಬಾಯ್ಲೆಚ್ಯಾ ಸೊಭಿತ್ ಸಂಸಾರಾಂತ್, ಪಯ್ಲ್ಯಾ ದಿಸಾ ವಿಕಾಳ್ ಏಕ್ ಘಡಿತ್ ಉದೆತಾನಾ, ಬೊಂಬೈತ್ ಮೆಲ್ವಿನಾಚ್ಯಾ ಜಿಣಿಯೆಂತ್ಯಿ ನವೆಂಚ್ ಏಕ್ ಘಡಿತ್ ಘಡ್ಲ್ಲೆಂ. ತೊ ರಾತಿ ಖಟ್ಲ್ಯಾರ್ ನಿದ್ಲ್ಲ್ಯಾ ಕಡೆ ರಾಜುಲಾಗಿಂ ತ್ಯಾ ದಿಸಾ ಆಪ್ಣಾಕ್ ಘಡ್ಲ್ಲಿ ಸಂಗತ್ ವರ್ಣಿತಾಲೊ.
ಸಿಲ್ವಿ ತಾಕಾ ಆಪ್ಲ್ಯಾ ಘರಾ ಆಪೊವ್ನ್ ವರ್ನ್ ಗೆಲ್ಲೆಂ. ಪಯ್ಲೆಂ ತಾಕಾ ಘರಾ ಮೆಳ್ಳೊ ಜೊನ್ ಪ್ರಭು - ಸಿಲಿಚೊ ಪಪ್ಪಾ. ತಾಚೆಂ ತೊಮ್ಡ್ ಪಳೆತಾನಾ ಮೆಲ್ವಿನ್ ಆಜ್ಯಾಪ್ ಜಾಲ್ಲೊ. ಕಸಲೆಂ ಗಂಭೀರ್ ಆನಿಂ ಪರ್ಜಳಿಕ್ ಮುಖ್ ತಾಚೆಂ! ಸ ಫುಟಿಂಲಾಗಿಂ ಲಾಂಬಾಯೆಚೊ ದಡಂಗ್ ಜಾಪ್ ಜೀವ್. ಪ್ರಾಯ್ ಕಾಂಯ್ ಪನ್ನಾಸಾಂಕ್ ಲಾಗಿಂ ಜಾಯ್ತ್. ವೊಂಟಾರ್ ಆಸ್ಲ್ಲ್ಯೊ ಮಿಶಿಯೊ ಆನಿಂ ಮಾತ್ಯಾಚೆ ಕೇಸ್ ಚಿಕ್ಕೆ ದೊವೆ ಜಾಲ್ಲೆ ನಹಿಂ ತರ್, ತಾಕಾ ತರ್ನಾಟೊಚ್ ಮ್ಹಣ್ತೆ ಕೊಣೀ.
"ಗುಡ್ ಈವ್ನಿಂಗ್ ಸರ್..." ಕಾವ್ಜೆಣೆನ್ಂಚ್ ಮ್ಹಳೆಂ ಮೆಲ್ವಿನಾನ್.
"ಗುಡ್ ಈವ್ನಿಂಗ್ ಜಂಟಲ್ಮೆನ್... ತುಕಾ ಆಮ್ಗೆರ್ ಸ್ವಾಗತ್.... ತುಜಿ ಸಂಗತ್ ಸಿಲ್ವಿನ್ ಮ್ಹಾಕಾ ಕಾಲ್ ಸಾಂಗ್ಲ್ಲಿಂ. ಹಾಂವ್ ಚಿಂತ್ತಾಲೊಂ ಮ್ಹಜ್ಯಾ ಸಿಲ್ವಿಕ್ ಕ್ಂತಾರಾಂತ್ ಸಲ್ವಿತೊಲೊ ಕೊಣೀ ನಾ ಮ್ಹಣ್, ತರೀ, ತ್ಯಾ ಮ್ಹಜ್ಯಾ ಗರ್ವಾಚ್ಯಾ ಪಾತ್ಕಾಕ್, ದೆವಾನ್ ಶಿಕ್ಷಾ ದಿಲಿ. ತುವೆಂ ತಾಕಾ ಸಲ್ವಿಲೆಂಯ್ " ಹಾಸೊನ್ ಮ್ಹಣಾಲೊ ಪ್ರಭು. ಮೆಲ್ವಿನ್ಯಿ ಹಾಸ್ಲೊ.
"ಸಾಂಗ್ ತರ್ನಾಟ್ಯಾ, ಕಿತೆಂ ತುಜಿ ಗಜಾಲ್. ಹಾಂವ್ ಆಯ್ಕಾತಾಂ" ಮ್ಹಣಾಲೊ ತೊ ಮೆಲ್ವಿನಾಕ್ ಉಲೊಂವ್ಕ್ ಉತ್ತೇಜನ್ ದೀವ್ನ್.
ಮೆಲ್ವಿನಾನ್ ತಾಕಾ ಆಪ್ಣಾಚ್ಯಾ ಕಾಮಾಚಿ ಸಂಗತ್. ಆನಿಂ ಠಿಕಾಣೆ ಸಾಂಗ್ಲೆಂ. ಪ್ರಭು ಆಜ್ಯಾಪ್ ಜಾವ್ನ್ ಮ್ಹಣಾಲೊ.
"ಓ... ತುಂ ಹಾಂಗಾಚ್ ರಾವ್ತಾಯ್. ಪಳೆ ತುಜ್ಯಾ ಕುಡಾಚೆಂ ಜನೆಲ್ ಹಾಂಗಾ ಥಾವ್ನ್ ದಿಸ್ತಾ."
ಮೆಲ್ವಿನಾನ್ ಪಳೆಲೆಂ. ತಾಂಚ್ಯಾ ಕುಡಾಚೆಂ ಜನೆಲ್ ಸಾರ್ಕೆಂ ದಿಸ್ತಾಲೆಂ. ಬಹುಶಃ ರಾಜು ಯೇಂವ್ಕ್ ನಾ ದಿಸ್ತಾ. ನ್ಹಂಯ್ ತರ್, ಜನೆಲ್ ಉಗ್ತೆಂ ಆಸ್ತೆಂ.
ಚಾಕರ್ನಿನ್, ತಿತ್ಲ್ಯಾರ್ ಥಂಡ್ ಪೀವನ್ ಆನಿಂ ಕ್ರೀಮ್ ಬಿಸ್ಕುತ್ಯೊ ಹಾಡ್ನ್ ಮೆಲ್ವಿನಾ ಮುಖಾರ್ ದವರ್ಲ್ಯೊ. ಬಿತರ್ ಗೆಲ್ಲೆಂ ಸಿಲ್ವಿಯಿ ಮುಸ್ತಾಯ್ಕ್ ಬದ್ಲುನ್ ಭಾಯ್ರ್ ಆಯ್ಲೆಂ.
"ಖಾ ಮೆಲ್ವಿನ್..... ದಾಕ್ಷೆಣ್ ಕರಿನಾಕಾ" ತಾಣೆಂ ಮ್ಹಳೆಂ.
ಮೆಲ್ವಿನಾನ್. ದಾಕ್ಷೆಣೆನ್ಂಚ್ ಬಿಸ್ಕುತ್ ಏಕ್ ಹಾತಿಂ ಘೆತ್ಲಿ ಆನಿಂ ಕೋಲ್ಡ್ ತೊಂಡಾಕ್ ತೆಂಕ್ಲೆಂ.
"ತುಂ ಕಿತ್ಲೆಂ ಶಿಕ್ಲಾಯ್ ಮೆಲ್ವಿನ್?" ಪ್ರಭುನ್ ವಿಚಾರ್ಲೆಂ.
"ಇಂಟರ್ ಪಯ್ಲ್ಯಾ ವರ್ಸಾಂ ಮ್ಹಣಾಸರ್...." ನಾರ್ಗೊನ್ ತೊ ಮ್ಹಣಾಲೊ.
"ಹಾಂ.... ತರ್ ಕೊಲೆಜ್ ಕಿತ್ಯಾಕ್ ಆಖೇರ್ ಕರುಂಕ್ ನಾಂಯ್?" ಆಜ್ಯಾಪ್ ಜಾವ್ನ್ ಪ್ರಭುನ್ ವಿಚಾರ್ಲೆಂ.
ಮೆಲ್ವಿನಾನ್ ಕಾರಣ್ ಸಾಂಗ್ಲೆಂನಾ. ಜೆಸ್ಸಿ ಖಾತ್ರ್ ಆಪುಣ್ ಗಾಂವ್ ಸೊಡ್ನ್ ಅಯ್ಲಾಂ ಮ್ಹಣ್ ತಾಣೆಂ ಸಾಂಗ್ಯೆತೆಂಗಿ? ತೊ ತಕ್ಲಿ ಪಂದಾ ಘಾಲ್ನ್ ಮೊನೊ ರಾವ್ಲೊ.
"ಹುಂ, ದುಬ್ಳಿಕಾಯ್ ಮ್ಹಣ್ ದಿಸ್ತಾ. ಛೆ ಬಿರ್ಮೊತ್, ದುಬ್ಳಿಕಾಯೆಕ್ ಲಾಗೊನ್ ಕಿತ್ಲೆಶ್ಯಾ ಹುಶಾರ್ ಭುರ್ಗ್ಯಾಂಕ್ ಉಂಚ್ಲೆಂ ಶಿಕಾಪ್ ಶಿಕೊಂಕ್ ಸಂದರ್ಭ್ ಮೆಳಾನಾ. ಇತರ್ ಜಾತಿಂಚೊ ಲೋಕ್, ಭುರ್ಗ್ಯಾಂಕ್ ಶಿಕ್ಪಾಕ್ ಕಿತ್ಲಿ ಕುಮಕ್ ಕರ್ತಾ ಪಳೆ. ತಾಂಕಾಂ ಸ್ಕೊಲರ್ಶಿಪ್, ದುಡ್ವಾ ಸಹಾಯ್ ಸಗ್ಳಿ ಆಸಾ. ಕ್ರಿಸ್ತಾಂವ್ ಲೊಕಾಕ್, ಶಿಕ್ಪಾಕ್ ಕೊಣಾಯ್ಕಿ ಸಹಾಯ್ ಕರುಂಕ್ ಹಾತ್ ಪಾಟಿಂ" ತೊ ಕೊಡ್ಸಾಣೆನ್ ಮ್ಹಣಾಲೊ.
"ವ್ಹೊಯ್, ಮೆಲ್ವಿನ್ ಶಿಕ್ಪಾಕ್ ವೆತಾನಾ, ’ಲೋನ್’ ಕಾಡುಂಕ್ ಶೀನಾಚ್ಯಾ ಬಾಪಾಯ್ನ್, ಕುಮಕ್ ಕೆಲ್ಲಿ. ಆಜ್ ಕ್ರಿಸ್ತಾಂವಾಂನಿ ಹುಶಾರ್ ಭುರ್ಗ್ಯಾಂಕ್ ಊಂಚ್ ಶಿಕ್ಪಾಕ್ ಸಹಾಯ್ ದಿಲ್ಲಿ ಜಾಲ್ಯಾರ್ ಆಮ್ಚಿ ಸಮಾಜ್ ಕಿತ್ಲ್ಯಾ ಊರ್ಜಿತಾಕ್ ಯೆತಿ!
ಮೆಲ್ವಿನ್ ಉಟ್ಲೊ. "ತುಮ್ಕಾಂ ಮ್ಹಸ್ತ್ ದೇವ್ ಬರೆಂ ಕರುಂ" ತಾಣೆಂ ಸಾಂಗ್ಲೆಂ. "ಮ್ಹಾಕಾ ಆತಾಂ ವೇಳ್ ಜಾಲೊ
"ಬರೆಂ ಮೆಲ್ವಿನ್, ತುಕಾ ಚಡ್ ವೇಳ್ ಹಾಂವ್ ರಾವೈನಾ" ಮೆಲ್ವಿನಾಚಿ ಪಾಟ್ ಥಾಪುಡ್ನ್ ಪ್ರಭು ಉಲೈಲೊ, "ಕೆದಾಳಾಯ್ ಆಮ್ಗೆರ್ ಯೇವ್ನ್ ವೊಚ್ ಹಾಂ! ಕಾಂಯ್ ಚಡ್ ಪಯ್ಸ್ ನಾಂಯ್ ತುಂ. ತುಕಾ ಆಮ್ಚ್ಯಾ ಘರಾ ಸ್ವಗತ್ ಕೆದಾಳಾಯ್...."
"ಹಾಂಗಾ ಥಾವ್ನ್ ಉಲೊ ಕೆಲ್ಯಾರಿ, ತುಕಾ ಆಯ್ಕಾತಾ ಮೆಲ್ವಿನ್." ಸಿಲ್ವಿ ಮ್ಹಣಾಲೆಂ, "ಆಳೆ ಬೇಬಿ ತುಕಾ ಪಳೆವ್ನ್ ಹಾಸ್ತಾ"
ಸಿಲ್ವಿಚೆಂ ತೆಂ ವರ್ಸಾಂ ಬಿತರ್ಲೆಂ ಬಾಳ್ಶೆಂ ಮೆಲ್ವಿನಾಕ್ ಪಳೆವ್ನ್ ಹಾಸ್ತಾಲೆಂ. ಮೆಲ್ವಿನಾನ್ ಸಿಲ್ವಿಲಾಗ್ಚೆಂ ಭುರ್ಗೆಂ ಆಪ್ಲ್ಯಾ ಹಾತಾಂತ್ ಘೆತ್ಲೆಂ. ತಾಕಾ ಏಕ್ ಉಮೊ ದೀವ್ನ್ ಮೆಲ್ವಿನಾನ್ ಮ್ಹಳೆಂ - "ತುಜೆಂ ನಾಂವ್ ಕಿತೆಂ ಬೇಬಿ?"
ತಾಚೆಂ ಸವಾಲ್ ಸಮ್ಜಾಲೆಂ ಮ್ಹಳ್ಳ್ಯಾಬರಿ ಬೇಬಿ ಹಾಸೊಂಕ್ ಲಾಗ್ಲೆಂ. ಕಸಲೊ ಆಂಜ್ಯಾಳ್ ಹಾಸೊ!
’ತಾಚೆಂ ನಾಂವ್ ಸೊಫಿಯಾ" ಸಿಲ್ವಿನ್ ಜಾಪ್ ದಿಲಿ. ತ್ಯಾ ಘಡಿಯೆ, ಮೆಲ್ವಿನಾನ್ ಸಿಲ್ವಿಚ್ಯಾ ತೊಂಡಾರ್ ದೀಷ್ಟ್ ವ್ಹೆಲಿ. ಸಿಲ್ವಿಚೆ ದೊಳೆ ದುಃಖಾನಿಂ ಭರ್ಲ್ಲೆ. ಮೆಲ್ವಿನಾಚೆಂ ಕಾಳಿಜ್ ಕಸ್ಸ್ ಜಾಲೆಂ. ಎಕಾಚ್ಚಾಣೆಂ ಹಜಾರ್ ಚಿಂತ್ನಾಂ ತಾಚ್ಯಾ ಮೆನಾಕ್ ಆಯ್ಲಿಂ.
(ಸಿಲ್ವಿ ರಡ್ತಾಲೆಂ...... ತೆಂ ರಡ್ಣೆಂ ಎಕಾ ಭುರ್ಗ್ಯಾ ಥಂಯ್ ಆವೈಚ್ಯಾ ಅಪರಿಮಿತ್ ಪ್ರೇಮಾಚೊ ಸಂಕೇತ್ ಜಾವ್ನಾಸ್ಲ್ಲೊ. ತೆಂ ರಡ್ಣೆ, ಎಕಾ ವಿಧ್ವಿನ್ ಸಮಾಜೆಕ್ ವಿಚಾರ್ಚೆಂ ಏಕ್ ವ್ಹಡ್ ಸವಾಲ್ ಜಾವ್ನಾಸ್ಲ್ಲೆಂ. ಆನಿಂ ಸವಾಲ್ ಆನಿಂ ಮೆಲ್ವಿನಾಚಿಂ ಚಿಂತ್ನಾಂ..... ಯೆಂವ್ಚ್ಯ ಅಂಕ್ಯಾಂತ್ ವಾಚಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
