ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 18
ಆಯೆರಾಚ್ಯಾ ವೆಳಾರ್ ಆಕಸ್ಮಿಕ್ ಪ್ರವೇಶ್ ಜಾಲ್ಲ್ಯಾ ಗಿಬ್ಬಾಕ್ ಪಳೆವ್ನ್, ನಿಜಾಯ್ಕಿ ರಿಜಾ ಘಡ್ಬಡ್ಲೆಂ. ತೊ ಹ್ಯಾ ಘಡಿಯೆ ಕಿತ್ಯಾಕ್ ಆಯ್ಲಾ? ಆಪ್ಣಾಕ್ ವಾಯ್ಟ್ ಕರುಂಕ್ಗಿ? ದೆವಾ, ಗಿಬ್ಬಾಚ್ಯಾ ತೊಂಡಾರ್ ಕ್ರೂರ್ ಹಾಸೊ ಖೆಳ್ತಾ.... ಆಪ್ಣೆಂ ತಾಕಾ ಘಾತ್ ಕೆಲೊ ಮ್ಹಣ್ ತೊ ರಾಗಾನ್ ಪೆಟ್ಲಾ ಜಾಯ್ಜಾಯ್. ಪುಣ್ ಕರ್ಚೆಂ ಕಿತೆಂ? ಪಾಪ್ಪಾ- ಮಾಮ್ಮಿಚ್ಯಾ ಮುಖಾರ್ ಝುಜೊಂಕ್ ಆಪ್ಣಾಕ್ ವಾಟ್ಚ್ ನಾತ್ಲ್ಲಿ.
ಜೀವನಾಂತ್ ಥೊಡ್ಯಾ ಸಂಗ್ತಿಂನಿ ಆಮಿಂ ಸ್ವತಂತ್ರ್ ಉಪಯೋಗ್ಸಿಯೆತ್. ಮನ್ಶಾನ್, ಆಪ್ಣೆಂ ಬರೆಂಫಾಲೆಂ ಸ್ವಂತ್ ಖುಶೆಚೆರ್ ಮಾಂಡುನ್ ಹಾಡ್ಚೆಂ ಪಡ್ತಾ. ಪುಣ್, ಥೊಡ್ಯೊ ಸಂಗ್ತಿಂ, ಆಪ್ಲ್ಯಾ ತಾಂಕಿ ಭಾಯ್ಲ್ಯೊ ಜಾವ್ನಾಸಾತ್. ತ್ಯಾ ವೆಳಾರ್ ವ್ಹಡಿಲಾಂಚ್ಯಾ ಮಾಂಡ್ಣೆಚೆರ್ ಹೊಂದ್ವೊನ್ ರಾಂವ್ಚೆಂ ಪಡ್ತಾ. ಕಾಜಾರ್ ಜಾತೆಲಿಂ ಆಪುಣ್ ತರೀ, ಕಾಜಾರ್ ಕರ್ನ್ ಧಾಡ್ಚೆಂ ತಾಣಿ. ಗಿಬ್ಬಾಚೊ ಆಪ್ಣಾಕ್ ಮೋಗ್ ಆಸ್ಲ್ಲೊ ಖರೆಂ, ಆನಿಂ ತ್ಯಾ ಮೊಗಾಕ್ ಲಾಗೊನ್ ಆಯಿಲ್ಲಿ ಸೈರಿಕ್ ನಿರಾಕರ್ಸಿಯೆತಿ. ತರಿಪುಣ್, ಪರಿಣಾಮ್ ವಾಯ್ಟ್ ರಾವ್ತೊ. ಶಿಕಾಪ್ ಕಾಬಾರ್ ಜಾವ್ನ್, ಜೊಡಿಕ್ ಪಾವೊನ್ ಆಪ್ಲೆಂ ಮ್ಹಳ್ಳೆಂ ಸ್ವತಂತ್ರ್ ಜೀವನ್ ತೊ ಚಾಲು ಕರುಂಕ್ ಸಬಾರ್ ವರ್ಸಾಂ ವೆತಿತ್. ತ್ಯಾ ವರೇಗ್ ರಾಕೊನ್ ರಾವೊಂಕ್ ಆಪ್ಣಾಕ್ ಸಾಧ್ಯ್ಗಿ? ಕಿತ್ಲೆಶ್ಯಾ ವರ್ಸಾಂ ಪರ್ಯಾಂತ್, ಆಯಿಲ್ಲ್ಯೊ ಸೈರಿಕೊ ನಾಕಾ ಮ್ಹಣೊನ್ ಘರ್ಚಾಂಚೆಂ ಹಂಗ್ಸಾಣೆ ಆನಿಂ ಉಲವ್ಣೆಂ ಆಯ್ಕೊನ್ ದೀಸ್ ಕಾಡುಂಕ್ ಸುಲಭ್ಗಿ? ತ್ಯಾ ಮಾಗಿರ್, ಸರ್ವ್ ಗಿಬ್ಬಾಚೆರ್ ಹೊಂದ್ವೊನ್ ಆಸಾ. ತಾಚಿ ಮತ್ ಕಾಲಕ್ರಮೇಣ್ ಫಿರ್ವಾಲಿ ಜಾಲ್ಯಾರ್, ಆನಿಂ ತೊ ಆಪ್ಣಾ ಕಡೆ ಕಾಜಾರ್ ಜಾಂವ್ಕ್ ಆಯ್ಕಾನಾ ತರ್, ಜೀವನಾಂತ್ ಉದ್ದೇಶ್ ಕಿತೆಂ ಉರ್ಲೊ? ಸಬಾರ್ ಕಾಳ್ ರಾಕ್ಲ್ಲ್ಯಾಕ್, ಕಿತೆಂ ಪ್ರತಿಫಳ್ ಮೆಳ್ತಾಲೊ? ಮೋಗ್.....ಸಬಾರ್ ತೆಂಪಾಚೊ ಮೋಗ್ ತರೀ ಬರೊ ನ್ಹಂಯ್. ಕಿತ್ಯಾಕ್ ಚಲ್ಯಾಕ್ ತೊ ದೋನ್ ದಿಸಾಂಚೊ ಖೆಳ್ ದಿಸ್ತಾನಾಂ, ಚಲಿಯೆಕ್ ದೋನ್ ದಿಸಾಂಚೊ ಸಂಸಾರ್ ತಾಚೆರ್ಚ್ ಹೊಂದ್ವೊನ್ ಆಸ್ತಾ. ದೆಕುನ್ ಚಲೆ ಮೋಗ್ ಕರ್ತಿತ್ ಉಬಿರ್ ಗುಡ್ಡಾಯಿಲ್ಲ್ಯಾಬರಿ, ಆನಿಂ ಚಲಿಯೆಕ್ ಕೊನ್ಶಕ್ ಉಡೈತಿತ್ ಪಾಂತ್ ಧುಲ್ಲ್ಯಾ ಭಾಷೆನ್. ಪುಣ್, ಸ್ತ್ರೀಯೆಕ್ ಮೋಗ್ ಮ್ಹಳ್ಯಾರ್ ಏಕ್ ಪಾವ್ಟಿಂ ಸಮರ್ಪಿಲ್ಲಿ ವಸ್ತ್, ದೆವಾಕ್ ಘಾಲ್ಲ್ಯಾ ಝೆಲ್ಯಾಬರಿ. ಉಪ್ರಾಂತ್ ತಿಂ ಫುಲಾಂ ಪಾಟಿಂ ಘೆಂವ್ಕ್ ಜಾಯ್ನಾಂತ್ತ್.
ಆನಿಂ ರಿಜಾನ್ ತಶೆಂಚ್ ಕೆಲೆಂ, ತಾಚ್ಯಾ ಕಾಳ್ಜಾಂತ್, ಸಬಾರ್ ತುಫಾನ್ ಉಟ್ಲೆಂ ತರೀ, ಆಖ್ರೇಕ್ ಮೋಗ್ ಸಲ್ವಾಲೊ ಆನಿಂ ವ್ಹಡಿಲಾಂನಿ ಹಾಡ್ಲ್ಲ್ಯಾ ಸೈರಿಕೆಕ್ ತೆಂ ಕಬೂಲ್ ಜಾಲೆಂ.
ಆನಿಂ ಆತಾಂ ಗಿಬ್ಬಾ ಆಯ್ಲಾ......ಮತಿಂತ್ ಕಿತೆಂ ಆಲೊಚನ್ ಕರ್ನ್ಗಾಯ್? ತೆಂ ವಿಜ್ಮಿತ್ ಜಾಲ್ಲ್ಯಾ ದೊಳ್ಯಾಂನಿ ತಾಕಾಚ್ ದೆಖ್ತಾಲೆಂ. ಭಂವ್ತಿಂ, ಯೆಂವ್ಚ್ಯಾ - ವೆಚ್ಯಾ ಲೊಕಾಚಿ ರಿಜಾಕ್ ಪರ್ವಾಚ್ ನಾತ್ಲ್ಲಿ. ಭಿಂಯಾನ್ ತಚೆಂ ಕಾಳಿಜ್ ಧಡ್ಧಡ್ತಾಲೆಂ. ಆನಿಂ ಗಿಬ್ಬಾ ಲಾಗಿಂ ಪಾವ್ಲೊ
ರಿಜಾನ್ ದೊಳೆ ಧಾಂಪ್ಲೆಂ. ತೊ ಆಪ್ಣಾ ಸರ್ಶಿಂ ಉಬೊ ರಾವ್ಲ್ಲೆಂ ತೆಂ ತಾಕಾ ಭ್ಹೊಗ್ಲೆಂ. ದುಸ್ರ್ಯಾ ಕ್ಷಣಾ ಗಿಬ್ಬಾಚೊ ತಾಳೊ ಆಯ್ಕಾಲೊ. "ಕೊಂಗ್ರೇಚ್ಯುಲೇಶನ್ಸ್ ರಿಜಾ.." ತೊ ತಾಳೊ ಸೆಮಿತ್ರೆಂತ್ಲ್ಯಾ ಫಾತ್ರಾ ಜಿನ್ಸಾರ್ ಗಂಭೀರ್ ಆನಿಂ ಕಠೋರ್ ಆಯ್ಕಾಲೊ ರಿಜಾಕ್. ತೆಂ ಉಡೊನ್ ಪಡ್ಲೆಂ, ಆನಿಂ ದೊಳೆ ಉಗಡ್ನ್ ತಾಣೆಂ ಗಿಬ್ಬಾಕ್ ದೆಖ್ಲೆಂ. ಗಿಬ್ಬಾಚ್ಯಾ ದೊಳ್ಯಾಂತ್ಲ್ಯಾನ್ ಕಿಟಾಳಾಂ ಉಸಳ್ಚ್ಯಾಬರಿ ದಿಸ್ತಾಲಿಂ. ತಾಚ್ಯಾ ವೊಂಟಾರ್ ಕ್ರೂರ್ ಹಾಸೊ ಅಸ್ಲ್ಲೊ. ಚಡಿತ್ ಘಳಾಯ್ ಕರಿನಾಸ್ತಾಂ, ಗಿಬ್ಬಾನ್ ಬೊಲ್ಸಾಂತ್ಲೆಂ ಏಕ್ ಕವರ್ ಭಾಯ್ರ್ ಕಾಡ್ಲೆಂ. ಆನಿಂ ರಿಜಾಚ್ಯಾ ಹಾತಿಂ ದಿಲೆಂ. ಆನಿಂ ದಿತಾನಾ ಇತ್ಲೆಚ್ ಸಬ್ದ್ ತೊ ಉಲೈಲೊ, "ಮ್ಹಜ್ಯಾ ಶಾಶ್ವಿತ್ ಉಗ್ದಾಸಾಕ್ ರಿಜಾ.. ಕೆದಿಂಚ್ ತುಂ ಮ್ಹಾಕಾ ವಿಸಾರ್ನಾ ಜಾಂವ್ಚಾಕ್" ಇತ್ಲೆಂ ಸಾಂಗೊನ್ ತೊ ಚಲ್ಲೊ. ತಕ್ಷಣ್ ದೆಡಿಯೆನ್ ಎಕ್ಲೆನ್, ತೆಂ ಕವರ್ ರಿಜಾಚ್ಯಾ ಹಾತಾಂತ್ಲೆಂ ಘೆತ್ಲೆಂ ಆನಿಂ ಇನಾಮಾಂಚ್ಯಾ ರಾಶಿಂತ್ ದವರ್ಲೆಂ.
ಗಿಬ್ಬಾನ್ ಬಹುಮಾನ್ ದೀವ್ನ್ ಗೆಲ್ಲಿ ಸಂಗತ್ ಕೊಣಾಚ್ಯಾ ಸಂಶಯಾಕ್ ಆಯ್ಲಿನಾ. ಹೆರಾಂ ಬರಿಚ್ ತೊ ಆಯಿಲ್ಲೊ ಅನಿಂ ಗೆಲ್ಲೊ. ಕಾಜಾರಾಚ್ಯಾ ಮಾಟ್ವಾಂತ್ಲ್ಯಾ ಗಲಾಟ್ಯಾ ಮಧೆಂ, ನಿಜಾಯ್ಕಿ ತಾಕಾ ಆಪವ್ಣೆ ಆಸ್ಲ್ಲೆ ವ ನಾ ತೆ ಪಳೆಂವ್ಕ್ ಕೊಣ್ ಆಸಾ? ಪುಣ್ ರಿಜಾಕ್ ಮಾತ್ರ್ ಗಿಬ್ಬಾಚೆಂ ಇನಾಮ್ ತುಫಾನಾಚ್ಯಾ ಪಾಂವ್ಡ್ಯಾರ್ ನಾಚೊಂವ್ಕ್ಲಾಗ್ಲೆಂ. ತೆಂ ಬಸ್ಲ್ಲ್ಯಾ ಕಡೆಚ್ ಹುಳ್ವುಳ್ಳೆಂ....ಗಿಬ್ಬಾನ್ ಕಿತೆಂ ಇನಾಮ್ ದಿಲಾಂಗಾಯ್? ತಾಂತುಂ ಕಾಂಯ್ ಆಪ್ಣಾಕ್ ಕೆಂಡುನ್ ಕಾಗಾದ್ ಬರೈಲಾಂ ಜಾಲ್ಯಾರ್.... ದುಸ್ರ್ಯಾಂಚ್ಯಾ ಹಾತಾಂತ್ ತೆಂ ಕವರ್ ಪಾವ್ಲೆಂ ತರ್, ಮರ್ಯಾದ್ ಗೆಲಿ. ದೆವಾ, ಅತಾಂ ಕಿತೆಂ ವಾಟ್ ಕರ್ಚಿ? ನಾಂ ಆಯೆರ್ ಜಾತಚ್, ಕಶೆಂಯ್ ತೆಂ ಕವರ್ ಲಿಪೈಜಾಯ್. ದುಸ್ರ್ಯಾಂಚ್ಯಾ ನದ್ರೆಕ್ ಪಡೊನ್ ಕೊಣಾಕ್ಚ್ ಹೊ ಘುಟ್ ಕಳಿತ್ ಜಾಂವ್ಕ್ ನಜೊ. ತೆಂ ಉದ್ವೇಗಾನ್ ಆಯೆರ್ ಸಂಪೊಂಕ್ ರಾಕ್ತಾಲೆಂ.
ಆಖ್ರೇಕ್ ತಾಚ್ಯಾ ನಶಿಬಾನ್ಂಚ್ ತೆಂ ಜಿಕ್ಲೆಂ ಜಾಯ್ಜಾಯ್. ಇನಾಮಾಂ ಧೆಡಿಯೆನ್ ಬಿತರ್ಲ್ಯಾ ಕುಡಾಕ್ ವ್ಹಾವೈಲಿಂ. ವ್ಹೊಕಾಲ್ಯಿ ಪಾಟಾಪಾಟ್ ಉಟೊನ್ ಬಿತರ್ ಚಲ್ಲಿ. ಚಮಾತ್ಕಾರೆನ್, ರಿಜಾನ್ ಗಿಬ್ಬಾಚೆಂ ಕವರ್ ಹಾತಿಂ ಘೆತ್ಲೆಂ ಆನಿಂ ತೆಂ ತೊಂಡ್ ಧುವ್ನ್ ಯೆಂವ್ಚ್ಯಾ ನಿಬಾನ್ ನ್ಹಾಣಿಯೆಕ್ ನಿಕಳ್ಳೆಂ, ಬಾಗಿಲ್ ಬಂಧ್ ಕರ್ನ್, ಕೊಣಾಕ್ಚ್ ಆಪ್ಣಾಚೊ ಸಂಶಯ್ ಯೆಂವ್ಚೊನಾ ಮ್ಹಣ್ ಖಾತ್ರಿ ಕರ್ನ್, ತಾಣೆಂ ಕಾಂಪ್ಚ್ಯಾ ಹಾತಾಂನಿ ತೆಂ ಕವರ್ ಉಗಡ್ಲೆಂ. ಉಗ್ತೆಂ ಕೆಲ್ಲೆಂಚ್, ತಾಚಿ ದೀಷ್ಟ್ ಬಿತರ್ಲ್ಯಾ ವಸ್ತುಂಚೆರ್ ಪಡ್ಲಿ. ಏಕ್ ಲಾಂಬ್ ಕಾಗಾದ್ ಆನಿಂ ಸಾಂಗಾತಾ, ಏಕ್ ರುಪ್ಯಾಂಚೆಂ ಪದಕ್ ತಾಕಾ ದಿಸ್ಲೆಂ. ನ್ಹಂಯ್, ತೆಂ ಪದಕ್ ನ್ಹಂಯ್........ವಿಜ್ಮಿತ್ ಜಾವ್ನ್ ರಿಜಾನ್ ತ್ಯಾ ’ಮೆಡಲಾ’ ಚೆರ್ ದೀಷ್ಟ್ ವರ್ತಾನಾ, ತಾಕಾ ಕಾಳಿಜ್ ಶಿಂದೊನ್ ಬಿತರ್ ಸರ್ಲ್ಲಿ ಏಕ್ ಭಾಲಿ! ದೊಳೆ ವಾಟಾರ್ನ್ ತೆಂ, ತ್ಯಾ ಕಾಳ್ಜಾಕ್ಚ್ ಪಳೆಂವ್ಕ್ ಪಡ್ಲೆಂ.
ರಿಜಾಕ್ ಶೆಳೊ ಘಾಮ್ ಸುಟ್ಲೊ. ಹೊಗ್ಡಾಯಿಲ್ಲೆಂ ಜ್ಞಾನ್ ಪಾಟಿಂ ಯೇಂವ್ಕ್ ಸಬಾರ್ ವೆಳ್ ಗೆಲೊ ತಾಕಾ. ತಾಚೆಂ ಶರೀರ್ ಲಜೆನ್ ಆನಿಂ ಭಿಂಯಾನ್ ಕಾಂಪ್ತಾಲೆಂ. ಭರ್ಮಿದೆನ್ ಆಸ್ಲ್ಲ್ಯಾ ಬರಿಚ್, ತಾಣೆಂ ಕಾಗ್ದಾಚಿ ಘಡಿ ಉಸೈಲಿ ಆನಿಂ ವಾಚುಂಕ್ ಪ್ರಾರಂಭ್ ಕೆಲೆಂ -
"ಕಾಳ್ಜಾಚ್ಯಾ ಗೊಂಡ್ಯಾ ರಿಜಾ,
ಬಹುಶಃ ಹಾಂವೆಂ ದಿಲ್ಲೆಂ ಇನಾಮ್ ತುವೆಂ ದೆಖ್ಲೆಂಯ್ ಆಸ್ತೆಲೆಂಯ್. ಆನಿಂ ತೆಂ ಪಳೆವ್ನ್, ತುಕಾ ಸಂತೊಸ್ಚ್ ಜಾತೊಲೊ. ಕಿತ್ಯಾಕ್ ತುವೆಂಚ್ ಮ್ಹಾಕಾ ದಿಲ್ಲೆಂ ಇನಾಮ್ ತೆಂ. ಭೋವ್ ಕ್ರೂರ್ ಬಾಲಿ ತುವೆಂ ಮ್ಹಜ್ಯಾ ಕಾಳ್ಜಾಕ್ ಮಾರ್ಲ್ಯಾಯ್ ಆನಿಂ ತ್ಯಾ ದುಃಖಿನ್ ಹಾಂವ್ ಕಳ್ವಳ್ಚೆಂ ನಿಯಾಳ್ತಾನಾ ತುಕಾ ಆನಂದ್ಚ್ ಭೊಗ್ತಾ ಆಸ್ತೊಲೊ. ಆನಿಂ ಹ್ಯಾ ವಗ್ತಾ, ತುಕಾ ಕಸಲೆಂ ಫಾವೊತೆಂ ಇನಾಮ್ ಹಾಂವ್ ದೀಂವ್? ಜಾಯ್ತೆಂ ಚಿಂತುನ್, ಆಖ್ರೇಕ್ ಹಾಂವ್ ಹ್ಯಾ ನಿರ್ಧಾರಾಕ್ ಆಯ್ಲಾಂ. ಹ್ಯಾ ನಾಮಾಚ್ಯಾಕೀ ವರ್ತೆಂ ಆನಿಂ ಸಹಜ್ಲ್ಲೆಂ ಇನಾಮ್, ತುಕಾ ದೀಂವ್ಕ್ ಹಾಂವ್ ಸಕಾನಾ.
ಆನಿಂ ಮ್ಹಜ್ಯಾ ವಿಂಚೊವ್ಣೆಂ ಥಂಯ್, ತುಕಾ ಅಭಿಮಾನ್ ಆಸ್ತೊಲೊ ಆನಿಂ ತುಂ ತೆಂ ಪಸಂದ್ ಕರ್ತೆಲೆಂಯ್ ಮ್ಹಣ್ ಪೂರ್ಣ್ ಭರ್ವಸೊ ಆಸಾ ಮ್ಹಾಕಾ.
ರಿಜಾ, ಥೊಡ್ಯಾ ಉತ್ರಾಂ ಬಗಾರ್ ಹೆಂ ಕಾಗದ್ ಅಖೇರ್ ಕರುಂಕ್ ಮ್ಹಾಕಾ ಜಾಯ್ನಾ. ಕಿತ್ಯಾಕ್ ಹಾಂವೆಂ ತುಕಾ ಬರಂವ್ಚಿಂ ನಿಮಣಿ ಉತ್ರಾಂ ಹಿಂ. ಆನಿಂ ತಿಂ ಬರಂವ್ಚೊ ಉದ್ದೇಶ್ ತರೀ, ಕಸಲೆಂಚ್ ನ್ಹಂಯ್. ಬಗಾರ್ ಆಮ್ಚ್ಯಾ ಧರ್ಮಾಂತ್, ಮೆಲ್ಲ್ಯಾಚ್ಯಾ ಪೊಂಡಾಕ್ ಚ್ಯಾರ್ ಮುಟಿ ಮಾತಿ ಘಾಲ್ಚಿ ರಿವಾಜ್ ಆಸ್ತಾ. ಆನಿಂ ತಾಚ್ಯಾ ಅತ್ಮ್ಯಾಕ್ ಮಿಸಾಂ ದಿಂವ್ಚೊ ಕಾಯ್ದೊಯಿ ಬಾಂದ್ತಾ. ತಶೆಂ, ಮ್ಹಜ್ಯಾ ಆನಿಂ ತುಜ್ಯಾ ಸಂಬಂಧಾಕ್ಯಿ, ತುವೆಂ ಪೊಂಡ್ ಕಾಡ್ನ್ ಪುರ್ಲಾಂತ್. ಆನಿಂ ಮಾತಿ ಉಡಂವ್ಚಿ ಜವಬ್ದಾರಿ ಮ್ಹಜಿ, ಆನಿಂ ಮಿಸಾಂ ದಿಂವ್ಚೊ ಹಾರ್-ಭಾರ್ಯಿ ಹಾಂವ್ಚ್ ವಹಿಸುನ್ ಘೆತಾ.
ತುಕಾ ನಿಯಾಳ್ನಾಂಗಿ ರಿಜಾ, ಮನ್ಜಾತಿಂ ಥಾವ್ನ್ ಮನ್ಶಾಕ್ ವಿಂಗಡ್ಸುಂಚೆಂ ತೆಂಚ್ ಗಿನ್ಯಾನ್ ಕಿತ್ಲೆಶ್ಯಾ ಪಾವ್ಟಿಂ ಮನ್ಜಾತಿಂಚ್ಯಾಕೀ ವಾಯ್ಟ್ ಕರ್ತುಬಾಂ ಆಧಾರ್ತಾ ತೆಂ ತುಜೊ ಆನಿಂ ಮ್ಹಜೊ ಮೋಗ್ ಜಾಲ್ಲೊ ಆನಿಂ ಥಂಯ್ ಏಕ್ ಬಾಂಧ್ ಉಬ್ಜಾಲ್ಲೊ. ತೊ ತುಟೊವ್ನ್ ಉಡೊಂವ್ಕ್ ಖರೆಂಚ್ ಸುಲಭಾಯೆಚೆಂ ಕಾಮ್ ತುಕಾ ದಿಸ್ಲೆಂ ಆಸ್ತೆಲೆಂ, ಚೆಡ್ವಾಂ......ಚೆಡ್ವಾಂಕ್ ಹಾಂವ್ ಕಿತ್ಯಾಕ್ ಸರಿ ಕರುಂ? ಕಸಲಿಚ್ ಸರ್ ಮ್ಹಾಕಾ ಮೆಳಾನಾ. ಆಶಾ ದಾಕವ್ನ್, ಗೋಡ್ ಉತ್ರಾಂನಿ ಭುಲವ್ನ್, ಕಾಳ್ಜಾರ್ ಹಾತ್ ದವರ್ನ್ ಭಾಸಾವ್ಣೆಂ ಕರ್ನ್, ಉಪ್ರಾಂತ್ ಖೊಟ್ ಮಾರ್ನ್ ಚೆಡ್ಯಾಕ್ ಪಯ್ಸ್ ಕರ್ಚ್ಯಾ ತಸಲ್ಯಾ ಹ್ಯಾ ಪ್ರಾಣಿಕ್ ಕಿತ್ಯಾಕ್ ಹಾಂವ್ ಸರಿ ಕರುಂ? ಧರ್ಣಿರ್ ಮ್ಹಾಕಾ ತಸಲಿ ಮನ್ಜಾತ್ ಮೆಳಾನಾ, ಉದ್ಕಾಂತ್ ತಿ ಲಿಪೊನ್ ಆಸ್ಚಿನಾ ಆನಿಂ ಅಂತ್ರಳಾರ್ ತಿ ಝಳ್ಕೊಂಚಿನಾ. ಕಿತ್ಯಾಕ್, ರಾನಾಂತ್ಲಿ ವಾಗಿಣ್ ತರೀ, ವೆಳಾರ್ ಆಪ್ಲ್ಯಾ ಪಿಲಾಂಚೊ ಉಗ್ಡಾಸ್ ಕಾಡ್ತಾ. ಅಂತ್ರಳಾರ್ ಉಬ್ಚಿಂ ಸುಕ್ಣಿಂ ಪರ್ಯಾಂತ್, ಕಾಳೊಕ್ ಪಡ್ತಚ್, ಘೊಂಟೆರಾಕ್ ಪಾಟಿಂ ಯೆತಾತ್ ಅನಿಂ ಉದ್ಕಾಂತ್ಲಿ ಮಾಸ್ಳಿ ತರೀ, ಆಪ್ಲ್ಯಾ ತಾಂತಿಯಾಂಕ್ ದಿಸ್ಪೊಡ್ತಿ ಊಬ್ ದಿತಾ. ಆನಿಂ ತಾಂಕಾಂ ಆಪ್ಲ್ಯಾಂಚೊ, ಆಪ್ಣಾಚ್ಯಾ ಭುರ್ಗ್ಯಾಂಚೊ ಆನಿಂ ಮೊಗಾಚ್ಯಾ ಮನ್ಶಾಂಚೊ ಹುಸ್ಕೊ ಅಸಾ.
ಪುಣ್ ಮನಿಸ್, ಮನ್ಜಾತಿಂಚ್ಯಾಕಿ ಶ್ರೇಷ್ಟ್ ಮ್ಹಣ್ ಆಪ್ಣಾಕ್ ಬಿರುದ್ ಲಾಯಿಲ್ಲೊ ಮನಿಸ್ ಕಸೊ ಚಲ್ತಾ? ರಿಜಾ, ಆಮ್ಚಿಂ ರಗ್ತಾ-ಮಾಸಾಚಿಂ ದೋನ್ ಕಾಳ್ಜಾಂ ಲಾಗಿಂ ಯೇವ್ನ್ ಎಕ್ವೊಟ್ಲೆಲಿಂ. ಥಂಯ್ ನಹಿಂಚ್, ರಗ್ತಾಚಿ ವೊಡ್ನಿ ಆಸ್ಲ್ಲಿ. ಬಗಾರ್ ತಾಚ್ಯಾಕೀ ವರ್ತಿಂ ದೈವಿಕ್ ಭೊಗ್ಣಾಂ ಆಸ್ಲ್ಲಿಂ. ತುವೆಂ ನಹಿಂಚ್ ಮ್ಹಜೆಂ ಕಾಳಿಜ್ ಶಿಂದ್ಲೆಂಯ್, ಬಗಾರ್ ಮ್ಹಜ್ಯಾ ಸಿಂತಿಮೆಂತಾಕ್ ಮಸ್ತಿಲೆಂಯ್.
ಜಿಣಿಯೆಂತ್ ಸಬಾರ್ ಚುಕಿ ಘಡ್ತಾತ್. ಮೋಗ್ ಕರ್ಣಾರಾಂ ಮಧೆಂ ಜಾಯ್ತೆ ಪಾವ್ಟಿಂ, ಅಸಮ್ಜೊಣಿ ಜಾವ್ನ್ ತಾತ್ಕಾಲಿಕ್ ವೆಗ್ಳಾಚಾರ್ ಜಾತಾ. ತರಿ ಪುಣ್, ಗಿನ್ಯಾನ್ ಆಸ್ಲ್ಲಿಂ ಪತ್ಯಾನ್ ಎಕ್ವೊಟ್ತಾತ್ ಆನಿಂ ತ್ಯಾ ಎಕ್ವೊಟಾಂತ್ ಅಧಿಕ್ ಸುಖ್ ಆಸ್ತಾ. ಜಾಯ್ತಿಂ ಚಿಲ್ಲರ್ ಕಾರಣಾಕ್ ವಿಂಗಡ್ತಾತ್ ಆನಿಂ ಎಕ್ಲೊ ಎಕ್ವೊಟಾಕ್ ಪೆಚಾಡ್ತಾನಾ, ದುಸ್ರ್ಯಾಚಿ ಜಾಪ್ ಯೆತಾ- ಆಪ್ಣೆಂ ಚಿಂತ್ಲ್ಲ್ಯಾ ಮಾಂಡಾವಳೆ ಪ್ರಕಾರ್, ಆಪ್ಣಾಕ್ ತುಜೆ ಥಂಯ್ ಹೊಂದ್ವೊನ್ ಚಲೊಂಕ್ ಸಾಧ್ಯ್ ನಾ ಮ್ಹಣ್. ತರೀ ತಿ ಗಜಾಲ್ ತಶಿಚ್ ಸಂಪ್ತಾ. ಪುಣ್, ಆಮ್ಚೆಥಂಯ್, ತಸಲೆಂ ಕಿತೆಂಚ್ ಘಡೊಂಕ್ ನಾ. ತುಕಾ ಏಕ್ ಸೈರಿಕ್ ಆಯ್ಲಿ, ಆನಿಂ ತುಜ್ಯಾ ಅವಿಶ್ವಾಸಾನ್ ಮ್ಹಾಕಾ ಸಾಂಡ್ಲೆಂ. ತರ್ ತುಜ್ಯಾ ನಿಚೆವಾಕ್ ಆನಿಂ ಭಾಸಾವ್ಣ್ಯಾಕ್ ಕಿತೆಂ ಭರ್ಮ್ ಉರ್ಲೊ?
ರಿಜಾ, ಆಜ್ ತುಂ ಎಕ್ಲ್ಯಾಚಿ ಪತಿಣ್, ಸಮಾಜೆಂತ್ ತುಂ ಎಕ್ಲಿ ಕಾಜಾರಿ ಸ್ತ್ರೀ. ಶ್ರೀ ಮ್ಹಳ್ಳ್ಯಾ ಎಕ್ಲ್ಯಾಚಿ ಶ್ರೀಮತಿ ತುಂ ರಿಜಾ . ತುಕಾ ಹಾಂವ್ ವಾಯ್ಟ್ ಮಾಗಾನಾ. ತುಜೆಂ ಕಾಜಾರಿ ಜೀವನ್ ಸುಖಿ ಆನಿಂ ಸಂತೊಸಾಚೆಂ ಜಾಂವ್ದಿ. ಕೆದಾಳಾಚ್ ಸ್ತ್ರೀಯೆಚ್ಯಾ ದೊಳ್ಯಾಂನಿ ದುಃಖಾಂ ದೆಂವ್ಚಿಂ ಪಳೆಂವ್ಕ್ ಮ್ಹಾಕಾ ಬರಿಂ ಲಾಗಾನಾಂತ್. ದೆಕುನ್ಂಚ್ ತುಕಾ ಹಾಂವ್ ನಂದನ್ ಮಾಗ್ತಾಂ, ಆನಿಂ ಸಾಂಗಾತಾಚ್, ಇತ್ಲೆಂ ನೀಚ್ ಕರ್ಮಿ ಚೆಡ್ವಾಂಕ್ ಹಾಂವ್ ಕಾಂಟಾಳ್ತಾಂ. ಚೆಡ್ವಾಂಚೆರ್ಚ್ ಹಾಂವ್ ಆವಿಶ್ವಾಸ್ ದವರ್ತಾಂ ಭುಲವ್ನ್, ಪುಸ್ಲಾವ್ನ್ ಎಕಾ ಚೆದ್ಯಾಚೊ ಗೋಳ್ ಕರ್ಚ್ಯಾ ಚೆಡ್ವಾಂಕ್ ಹಾಂವ್ ಕಾಳ್ಜಾಂತ್ ಥಾವ್ನ್ ಕಾಂಟಾಳ್ತಾಂ. ರಿಜಾ, ತುಂ ಬರೆಂ ಜಾ. ಆನಿಂ ಮ್ಹಜೊ ಉಗ್ಡಾಸ್ ವಿಸರ್, ಹಾಂವೆಯಿ ತುಜೊ ಉಗ್ಡಾಸ್ ವಿಸರ್ಲ್ಲ್ಯಾ ಬರಿ. ಆದೇವ್ಸ್ ತುಕಾ...
ಗಿಬ್ಬಾ"
ರಿಜಾಚ್ಯಾ ದೊಳ್ಯಾಂಕ್ ಕಾಳೊಕ್ ಆಯಿಲ್ಲ್ಯಾ ಬರಿ ಜಾಲೊ. ತೆಂ ಸಗ್ಳೆಂಚ್ ಕಂಗಾಲ್ ಜಾಲೆಂ. ಗಿಬ್ಬಾಚ್ಯಾ ಕಾಗ್ದಾಂತ್ಲೊ ಹರ್ಯೇಕ್ ಸಬ್ದ್, ತಾಚ್ಯಾ ಕಾಳ್ಜಾಕ್ ಕ್ರೂರ್ ಭಾಲಿಯೆಬರಿ ರೊಂಬ್ಲ್ಲೊ. ತೆಂ ಸುಸ್ಕಾರ್ಲೆಂ ಆನಿಂ ಘಳ್ಘಳಿತ್ತ್ ರಡ್ಲೆಂ.
"ಗಿಬ್ಬಾ, ಮ್ಹಜಿ ಚೂಕ್ ಜಾಲಿ....ಮ್ಹಾಕಾ ಮಾಫ್ ಕರ್....." ಆಪ್ಲೆ ಸ್ಥಕ್ತಿಂ ಉಚಾರ್ಲೆಂ ತಾಣೆಂ ಸಬ್ದ್, "ಪುಣ್ ಗಿಬ್ಬಾ, ವೇಳ್ ಉತರ್ಲಾ."
ವ್ಹಯ್, ಖಂಡಿತ್ ಜಾವ್ನ್ ವೆಳ್ ಉತರ್ಲ್ಲೊ. ರಿಜಾ ಇಂತ್ರುಲಾಗಿಂ ರೆಸ್ಪೆರಾಚ್ಯಾ ಬಾಂದಾಂತ್ ಎಕ್ವೊಟ್ಲ್ಲೆಂ. ಸಾತ್ವೊ ಸಾಕ್ರಾಮೆಂತ್ ತಾಣೆಂ ಜೊಡ್ಲ್ಲೊ. ಆಯ್ಚ್ಯಾನ್ ತಾಣೆಂ ದುಸ್ರ್ಯಾ ಪುರುಷಾಚ್ಯಾ ವಿಷ್ಯಾಂತ್ ಚಿಂತುಂಕ್ ನಜೊ, ಲೌಕಿಕ್ ಆನಿಂ ಧಾರ್ಮಿಕ್ ದಿಷ್ಟಿನ್ ತೆಂ ಮಹಾಪಾಪ್.
ಗಿಬ್ಬಾಚೆಂ ಕಾಗದ್ ತಾಣೆಂ ವಿಂಚ್ಲೆಂ ಆನಿಂ ಚುರಾನ್ ಚುರೊ ಕರ್ನ್, ರಾಂದ್ಣಿಂತ್ಲ್ಯಾ ಉಜ್ಯಾಂತ್ ಭಸ್ಮಿಲೆಂ. ಆನಿಂ ತ್ಯಾ ಕಾಗ್ದಾಚಿ ಜರೂರತ್ಯಿ ತಾಕಾ ನಾತ್ಲ್ಲಿ. ಕಿತ್ಯಾಕ್ ತಾಂತ್ಲೊ ಏಕ್ ಸಬ್ದ್ ಪರ್ಯಾಂತ್ ಜಿಣಿಭರ್ ತೆಂ ವಿಸ್ರೊಂಚೆನಾ. ತೆಂ ಕಾಗದ್ ಭಸ್ಮುನ್ ಜಾತಚ್ ದೀರ್ಘ್ ಶ್ವಾಸ್ ಸೊಡ್ಲೊ ರಿಜಾನ್. ಉಪ್ರಾಂತ್ ತಾಣೆಂ ತೆಂ ಕಾಳ್ಜಾಚೆಂ ಪದಕ್, ಆಪ್ಲ್ಯಾ ಬ್ಲಾವ್ಜಾಂತ್ ಲಿಪೈಲೆಂ - ಖಂಚ್ಯಾಯಿ ದುಸ್ರ್ಯಾಂ ಸಂದರ್ಭಾರ್ ನಾಸ್ ಕರ್ತೆಲಿಂ ಮ್ಹಳ್ಳ್ಯಾ ಇರಾದ್ಯಾನ್. ಉಪ್ರಾಂತ್ ಆಪ್ಲಿಂ ದುಃಖಾಂ ತಾಣೆಂ ಪುಸ್ಲಿಂ ಆನಿಂ ತೆಂ ಭಾಯ್ರ್ ಆಯ್ಲೆಂ.
ಕಾಜಾರಾಚೊ ದೀಸ್ ಸರ್ಲೊ. ದುಸ್ರ್ಯಾ ದಿಸಾ ಪರ್ತಾಪಣ್ಯಿ ಜಾವ್ನ್ ಗೆಲೆಂ. ದೋನ್ ಜೊಡಿ, ಆಪ್ಲೆಂ ಸ್ವತಂತ್ರ್ ಜೀವನ್ ಸಾರುಂಕ್ ಲಾಗ್ಲಿಂ. ಅಂಕ್ವಾರ್ಪಣಾರ್, ಕಿತೆಂಯ್ ಘಡಿತಾಂ ಘಡೊನ್ ಗೆಲಿಂ ಜಾವ್ಯೆತ್. ಕಸಲಿಂಯ್ ಚಿಂತ್ನಾಂ ಆನಿಂ ಸ್ವಪ್ಣಾಂ ಫಟ್ಕಿರಿಂ ಜಾಲಿಂ ತೆಂ ದುಸ್ರೆಂಚ್ ಜಾವ್ನಾಸ್ಲ್ಲೆಂ. ಆದ್ಲೆಂ ವಿಸ್ರಾಜಾಯ್ ಆನಿಂ ಮುಖ್ಲೆಂ ಸೊಧಿಜಾಯ್. ಸಿಂತಿ....ತಾಚೆಂ ವಿದ್ಯಾರ್ಥಿ ಜೀವನ್ ಎಕಾ ನಮುನ್ಯಾಚೆಂ ಆಸ್ಲ್ಲೆಂ. ಸ್ವತಂತ್ರ್ ಸುಕ್ಣ್ಯಾಬರಿ ವಾರ್ಯಾರ್ ಉಬ್ತಾಲೆಂ. ಆತಾಂ ಎಕ್ಲೊ ಪತಿ ಮೆಳ್ಳಾ, ಆನಿಂ ತಾಚೆಂ ಸುಖ್ಚ್ ಆಪ್ಲೆಂ ಮ್ಹಣ್ ತಾಣೆಂ ಚಿಂತುಂಕ್ ಆಸಾ. ಆಪ್ಲ್ಯಾ ಕರ್ನ್ಯಾಂನಿ, ನಡ್ತ್ಯಾನ್ ಆನಿಂ ಉತ್ರಾಂನಿ ತಾಣೆಂ ಹೆರಿಚೆಂ ಮನ್ ಧಾದೊಶಿ ಕರಿಜಾಯ್. ಆನಿಂ ಖಂಡಿತ್ ಜಾವ್ನ್, ಸಿಂತಿ ಉಲಣ್ಯಾಂತ್ ಬರೆಂಚ್ ಹುಶಾರ್ ಆಸ್ಲ್ಲೆಂ.
ಕಾಜಾರ್ ಜಾವ್ನ್ ಹಪ್ತೊ ಉತರ್ನ್ ಗೆಲ್ಲೊ. ಹೆರಿ ಮಾಂವಾಡ್ಯಾ ಆಯಿಲ್ಲೊ. ಸಾಂಜೆರ್ ವ್ಹೊಕಾಲ್ ಆನಿಂ ನವ್ರೊ ಭೊವೊಂಕ್ ಭಾಯ್ರ್ ಸರ್ಲಿಂ. ಹೆರಿಚ್ಯಾ ಆಪೇಕ್ಷೆ ಪರ್ಮಾಣೆಂ, ದೊಗಾಂ ಬತ್ತೆರಿಚ್ಯಾ ವಾಟೆನ್ ಚಲ್ಲಿಂ. ಸುಲ್ತಾನ್ ಬತ್ತೆರಿರ್ ಬಸೊನ್, ದರ್ಯಾಕ್ ಫುಡ್ ಕರ್ನ್ ಬಸ್ಲಿಂ.
ಚಾಂದ್ನ್ಯಾಚಿ ರಾತ್ ತಿ. ಚಂದ್ರೆಮಾಚಿಂ ಶೀತಳ್ ಕೀರ್ಣಾಂ ಭುಮಿರ್ ಪಸರ್ಲೆಲಿಂ. ನೆಕೆತ್ರಾಂಯಿ ಹಾಸ್ತೆಂ ಮುಖ್ ಘೆವ್ನ್ ಸಂಸಾರಾಕ್ ತಿಳ್ತಾನಾ, ಖುಶಿ ಜಾಲ್ಲೊ ದರ್ಯೊಯಿ ಧಲೊನ್ ನಾಚ್ತಾಲೊ. ಆನಿಂ ಥಂಡಾಯೆಚೆಂ ವಾರೆಂಯ್ ವ್ಹಾಳ್ತಾಲೆಂ. ಮತ್ ಖುಶಾಲ್ ಜಾಂವ್ಚ್ಯಾ ಥರಾನ್. ಮೊಳ್ಬಾರ್ ಧೊವಿಂ ಕುಪಾಂ, ಗಡಿಯೆ ಎಕ್ ಪಾವ್ಟಿಂ, ಚಂದ್ರೆಮಾಕ್ ಲಿಪೈತಾಲಿಂ ಆನಿಂ ಹೊ ಖೆಳ್ ಆಪಾ-ಲಿಪಾ ತಸೊ ದಿಸ್ತಾಲೊ. ತಲ್ಲೀನ್ ಜಾಲ್ಲ್ಯಾ ಮನಾನ್ ಹೆರಿ ಆನಿಂ ಸಿಂತಿ ಭೊಂವಾರಿಂಚ್ಯಾ ಸ್ರಷ್ಟೆಕ್ ಪಳೆತಾಲಿಂ ಆನಿಂ ದೊಗಾಂಚಿ ಕಾಳ್ಜಾಂ ಸಂತೊಸ್ಭರಿತ್ ಜಾಲ್ಲಿಂ.
"ಸಿಂತಿ..." ಹೆರಿ ಉಲ್ಲಾಸಾನ್ ಮ್ಹಣಾಲೊ. "ಆಜ್ ನಿಜಾಯ್ಕಿ ಹಾಂವ್ ಭಾಗಿಚ್ ಸಯ್. ಕಿತ್ಯಾಕ್ ಉರ್ವಾಂತ್ ಹಾಂವ್ ಪಾವಾನ್ ಆನಿಂ ಸುಲ್ತಾನ್ ಬತ್ತೇರಿಚೆರ್ ಆಸಲ್ಯಾ ಎಕಾ ಸಾಂಜೆಚ್ಯಾ ವೆಳಾರ್ ಬಸೊನ್ ಆಸಾನ್ ಮ್ಹಣ್ ಸ್ವಪ್ಣಾಂತ್ಯಿ ಹಾಂವೆಂ ಚಿಂತ್ಲ್ಲೆಂನಾ"
"ಕಿತ್ಯಾಕ್ ಮ್ಹಣಾಂಯ್?" ತೆ ಅಮ್ರುಕೆಂ ಹಾಸ್ಲೆಂ.
"ತುಜೆ ಶಿವಾಯ್, ಹೆಂ ಭಾಗ್ ಮ್ಹಾಕಾ ಫಾವೊ ಜಾತೆಂನಾ. ಸಿಂತಿ ಮ್ಹಳ್ಳೆಂ ಮ್ಹಜ್ಯಾ ಜೀವನಾಂತ್ಲಿ ಸಾಂಗಾತಿಣ್ ಜಾಂವ್ಕ್ನಾತ್ಲ್ಲೆಂ ತರ್, ಹಾಂವ್ ಹಾಂಗಾಸರ್ ಪಾವ್ತೊಂನಾ"
"ಪುಣ್.....ದಾಕ್ತೆರ್ ತುಕಾ, ಮ್ಹಜ್ಯಾಕಿ ಬರೆಂ ಚೆಡುಂ ಮೆಳ್ತೆಂ. ರುಪಾನ್ ಸುಂದರ್, ಶಿಕ್ಪಿ ಆನಿಂ ಗುಣೇಸ್ತ್. ತುಜ್ಯಾ ಘನಾಕ್ ಆನಿಂ ಮಾನಾಕ್ ಸಹಜ್ಲ್ಲೆಂ." ತಮಾಷಾಂನಿ ಸಿಂತಿನ್ ಮ್ಹಳೆಂ.
"ತಶೆಂ ಮ್ಹಣಾನಾಕಾ ಡಾರ್ಲಿಂಗ್. ನಿಜಾಯ್ಕಿ ದೆವಾನ್ ಮ್ಹಾಕಾ ಸುಂದರ್ ಆನಿಂ ಹುಶಾರ್ ಚೆಡುಂ ಫಾವೊ ಕೆಲಾಂ. ತುಜೆ ತಸಲೆಂ ಮಾಣಿಕ್, ಮೆಳ್ಚೆಂ ಸುಲಭ್ ನಹಿಂ"
ಸಿಂತಿ ಪತಿಚ್ಯಾ ಪ್ರಶಂಸೆನ್ ಫುಲ್ಲ್ಲೆಂ. ಹೆರಿಚ್ಯಾ ಭುಜಾಕ್ ಆಪ್ಲಿ ತಕ್ಲಿ ಲಾಗೊವ್ನ್ ತಾಣೆಂ ವಿಚಾರ್ಲೆಂ. "ತುಂ ಭೆಷ್ಟೆಂಚ್ ಮ್ಹಾಕಾ ಹೊಗಳ್ಸಿತಾಯ್. ಹಾಂವ್ ಕಾಂಯ್ ತುವೆಂ ಚಿಂತ್ಚ್ಯಾ ತಿತ್ಲೆಂ ಹುಶಾರ್ ನ್ಹಂಯ್ ಆನಿಂ ಸೊಭಿತ್ಯಿ ನಾ"
"ತೆಂ ತುವೆಂಚ್ ಸಾಂಗಾಜಾಯ್. ಕೊಲೆಜಿಂತ್ ಶಿಕ್ತಾನಾ ತುಜ್ಯಾ ಶೆಗುಣಾಂಚೊ ಅನ್ಭೋಗ್ ತುಕಾ ಮೆಳೊಂಕ್ ನಾ?"
ಸವಾಲಾಂಚೊ ಅರ್ಥ್ ಕಳಾನಾತ್ಲ್ಯಾಬರಿ ಸಿಂತಿನ್ ವಿಚಾರ್ಲೆಂ. "ತಶೆಂ ಮ್ಹಳ್ಯಾರ್..?"
"ಹಾಂವೆಂ ಸಾಂಗ್ಚೆಂ.." ಹೆರಿ ಹಾಸ್ಲೊ, ಸಿಂತಿಚೊ ಹಾತ್ ಆಪ್ಲ್ಯಾಂತ್ ಘೆವ್ನ್, "ಹಾಂವ್ ಜರ್ ತರ್ ಮಂಗ್ಳೂರಾಮ್ತ್ ಆಸ್ಲ್ಲೊಂ, ಸಿಂತಿ ಕೊಲೆಜ್ಕ್ ವೆಚ್ಯಾ ವೆಳಾರ್ ಸಾಯ್ಕಲ್ ಘೆವ್ನ್ ತಾಚ್ಯಾ ಪಾಟ್ಲ್ಯಾನ್ಂಚ್ ವೆತೊಂ"
"ತಶೆಂ ಮ್ಹಜ್ಯಾ ಪಾಟ್ಲ್ಯಾನ್ ಕೊಣಿ ಚೆಡೆ ಯೇನಾತ್ಲ್ಲೆ" ಲಜೆನ್ ತೆಂ ಉಲೈಲೆಂ, "ಆನಿಂ ಯೆತಾಲೆ ತರೀ, ಹಾಂವ್ ನೆಣಾ. ಹಾಂವ್ ಕೊಣೀ ಚೆಡ್ಯಾಲಾಗಿಂ ಉಲೈನಾತ್ಲ್ಲಿಂ"
"ಹಾಂ....." ಹೆರಿ ಧಾದೊಶಿ ಹಾಸ್ಲೊ, "ಬರ್ಯಾ ಚಲಿಯಾಂಚೆ ಲಕ್ಷಣ್ ತೆಂ ಸಿಂತಿ. ಬುದ್ವಂತ್ ಚೆಡ್ವಾಂ, ಚೆಡ್ಯಾಂಕ್ ಚಡಿತ್ ಸಳ್ಗಿ ದೀನಾಂತ್"
ಅತ್ಯಂತ್ ಮನೋಹರ್ ಜಾವ್ನಾಸ್ಲ್ಲಿ ತಿ ರಾತ್. ಪುನ್ವೆಚ್ಯಾ ಚಂದ್ರಾಚಿ ಸೊಭಾಯ್ ವರ್ಣುಂಕ್ ಜಾಂವ್ಚ್ಯಾ ತಸಲಿ. ಆನಿಂ ತಿಂ ದೊಗಾಂಯ್ ನ್ಹಂಯ್ಚ್ಯಾ ತಡಿರ್ ಬಸೊನ್ ಮೊಗಾಚಿಂ, ಅಂಕ್ವಾರ್ಪಣಾಚ್ಯಾ ಕಾಳಾಚಿಂ ಆನಿಂ ಇತರ್ ಉತ್ರಾಂ ಉಲೈತಾಲಿಂ. ಆಖ್ರೇಕ್ ಹೆರಿ ಮ್ಹಣಾಲೊ - "ಸಿಂತಿ, ಆನಿಂ ಎಕಾ ಹಪ್ತ್ಯಾ ಬಿತರ್ ಮ್ಹಜೆಂ ರಿಜಲ್ಟ್ ಯೆತೆಲೆಂ. ಆನಿಂ ಹಾಂವ್ ಪಾಸ್ ಜಾತಾಂ ಮ್ಹಳ್ಳೆಂ ತೆಂ ಖಂಡಿತ್. ಉಪ್ರಾಂತ್ ಹಾಂವೆಂ ಸ್ವಂತ್ ಡಿಸ್ಪೆನ್ಸರಿ ಉಗಡ್ಚಿ ಆಲೋಚನ್ ಪ್ರಯೋಜನ್ ಜಾಂವ್ಚೆಂನಾ ತೆಂ ತುಂ ಜಾಣಾಂಯ್. ತುಜ್ಯಾ ಪಪ್ಪಾನ್ಂಚ್ ಸಾಂಗ್ಲಾಂ. ಆಮಿಂ ಮಂಗ್ಳುರಾಂತ್ ರಾವಾಜಾಯ್, ಮ್ಹಜಿ ಡಿಸ್ಪೆನ್ಸರಿ ಹಾಂಗಾಚ್ ಚಲೈಜಾಯ್ ಮ್ಹಣ್. ಹ್ಯಾ ವಿಷಯಿಂ, ಸರ್ವ್ ಕುಮೊಕ್ ದೀಂವ್ಕ್ ತೊ ಕಬೂಲ್ ಜಾಲಾ. ಆಮ್ಕಾಂ ಏಕ್ ಬರೆಂ ಘರ್, ಏಕ್ ಕಾರ್ ಜಾಯ್ ಸಿಂತಿ..."
ಸಿಂತಿಕ್ ಖರೆಂಚ್ ಸಂತೊಸ್ ಜಾಲ್ಲೊ. ಹೆರಿ ಅನಿಂ ಮಂಗ್ಳೂರ್ಚ್ ರಾವ್ತಾ. ಹುಶಾರ್ ದಾಕ್ತೆರ್....ತಾಚ್ಯಾ ಬುದ್ವಂತ್ಕಾಯೆನ್ ವೆಗಿಂಚ್ ತೊ ಗಾಂವಾರ್ ನಾಂವಾಡ್ತಾಲೊ. ಸಮಾಜೆಂತ್ ತಾಕಾ ವರ್ತೊ ಮಾನ್ ಮೆಳ್ತೊಲೊ. ಧಾ ಜಣಾಂ ಮಹಂತಾಂಚ್ಯಾ ಮಧೆಂ, ಆಪ್ಲ್ಯಾ ಪತಿಚೆಂ ನಾಂವ್ಯ್ ಅಸ್ತೆಲೆಂ ಅನಿಂ ತಾಚಿ ಪತಿಣ್ ಆಪುಣ್....ಆಪ್ಣಾಕ್ಯಿ ಸ್ಥಾನ್ ಆನಿಂ ಮಾನ್ ಲಾಭ್ತೆಲೊ. ಹೆರಿ ಕಾರ್ ಘೆತ್ ಜಾಲ್ಯಾರ್, ಉಪ್ರಾಂತ್ ಸಾಂಗಾತಾ ಭೊವೊಂಕ್ ವಚೊಂಕ್ ಬರೆಮ್. ಸಿಂತಿ ಮತಿಂತ್ ಹಜಾರ್ ಚಿಂತ್ನಾಂ ಆಟೈತಾಲೆಂ. ನೋವ್ ವೊರಾಂ ವ್ಹಾಜ್ತಾನಾ ದೊಗಾಂಯ್ ಘರಾ ಪರ್ತಾಲಿಂ.
ದೀಸ್ ಧಾಂವ್ತಾಲೆ - ಸುಖಾ ಆನಿಂ ದುಃಖಾಚಿ ಪರ್ವಾ ನಾಸ್ತಾನಾ. ಖಂಯ್ ಹಾಸೊ ಖೆಳ್ತಾಲೊ, ಖಂಯ್ ವಿಳಾಪ್ ಆಯ್ಕಾತಾಲೊ. ಜೀವನ್ ತೆಂ ಖಂತಿ - ದುಖಿಚೆಂ ಮಿಶ್ರಣ್. ಸರ್ಲ್ಲೊ ಹರ್ಯೇಕ್ ದೀಸ್, ಫುಡ್ಲ್ಯಾ ದಿಸಾಕ್ ಆಶೆಚಿ ದಿವ್ಟಿ ದಾಕೈತಾಲೊ ಆನಿಂ ಜನವರಿ ಮಹಿನೊ ಅಯಿಲ್ಲೊ.
ಬೊಂಬೈತ್ ಮೆಲ್ವಿನಾಚೆಂ ಜೀವನ್ ಎಕಾ ಥರಾನ್, ಸಲಿಸಾಯೆನ್ ಚಲ್ತಾಲೆಂ. ರಾಜುನ್ ಸಾಂಗ್ಲ್ಲ್ಯಾ ದುಸ್ರ್ಯಾಚ್ ದಿಸಾ ತೊ ಮ್ಯೂಜಿಕ್ ಕ್ಲಾಸಿಕ್ ದಾಖಲ್ ಜಾಲೊ. ಆನಿಂ ತ್ಯಾ ಘಡಿಯೆ ಥಾವ್ನ್ ಅಪ್ಲೆಂ ನವೆಂ ಶಿಕಾಪ್ ಶಿಕೊಂಕ್ ತಾಣೆಂ ಪ್ರಾರಂಭ್ ಕೆಲೆಂ.
ಸಾಂಜೆಚೆಂ ಕಾಮ್ ಸುಟ್ತಚ್, ತೊ ಕ್ಲಾಸಿಕ್ ವೆತಾಲೊ. ಧ್ಯಾನ್ ಅನಿಂ ಮನ್ ದೀವ್ನ್, ಮೆಲ್ವಿನಾನ್ ಸಂಗೀತಾಚಿಂ ನಿಯಮಾಂ ಶಿಕೊಂಕ್ ಪ್ರಾರಂಭ್ ಕೆಲಿಂ. ತಾಣೆಂ ಚಿಂತ್ಲ್ಲ್ಯಾ ತಿತ್ಲೆಂ, ಸುಲಭ್ ನಹಿಂ ಆಸ್ಲ್ಲೆಂ ತೆಂ ಶಿಕಾಪ್. ತಾಳೊ ಎಕಾಚ್ಚಾಣೆಂ ಮೊಡ್ತನಾ ಆನಿಂ ವೊಡ್ತಾನಾ ಕಠಿಣ್ ತ್ರಾಸ್ ಜಾತಾಲೊ. ಅಪ್ಲೊ ತಾಳೊ, ಸಂಗೀತಾಚ್ಯಾ, ರೆಗ್ರೆಂಕ್ ಹೊಂದ್ವೊನ್ ಚಲೈಜಾಯ್ ಜಾಲ್ಯಾರ್ ಮೆಲ್ವಿನಾಕ್ ಸಬಾರ್ ಕಷ್ಟ್ ಜಾಲೆ. ತರೀ ತೊ ಶಿಕ್ಲೊ........ಆಪ್ಲೆಂ ಸಗ್ಳೆಂ ಧ್ಯಾನ್ ದೀವ್ನ್. ಸ್ವಾಭಾವಿಕ್ ಜಾವ್ನ್ ಮೆಲ್ವಿನಾಕ್ ರಂಗೀತ್ ತಾಳೊ ಆಸ್ಲ್ಲೊ. ತಾಂಚೊ ಸಂಗೀತ್ ಮೆಸ್ತ್ರಿ ಕೆದಾಳಾಯ್, ಮೆಲ್ವಿನಾಚಿ ಶಿಫಾರಾಸ್ ಸಾಂಗ್ತಾಲೊ. ಅಶೆಂ, ನಿರಂತರ್ ಪಾಂಚ್ ಮಹಿನ್ಯಾಚೆಂ ಶಿಕಾಪ್ ಜಾಲೆಂ ಅನಿಂ ಸ ಮಹಿನ್ಯಾಂ ಉಪ್ರಾಂತ್ ತಾಕಾ ಪರೀಕ್ಷೆಕ್ ಬಸೊಂಕ್ ಅಸ್ಲ್ಲೆಂ.
ತಾಂಚ್ಯಾ ಕ್ಲಾಸಿಂತ್, ಧಾ ಜಣ್ ವಿದ್ಯಾರ್ಥಿ ಆಸ್ಲ್ಲೆ. ಸಾತ್ ಜಣಾಂ ಚಲಿಯೊ ಆನಿಂ ತೇಗ್ ಚಲೆ. ತಿಂ ಸರ್ವ್ ನಾನಾಂತ್ಲ್ಯಾ ಜಾತಿಂಚಿ. ಮೆಲ್ವಿನ್ ಎಕ್ಲೊಚ್ ಕ್ರಿಸ್ತಾಂವ್ ಜಾವ್ನಾಸ್ಲ್ಲೊ. ಮೆಲ್ವಿನ್ ಎಕ್ಲೊಚ್ ಕ್ರಿಸ್ತಾಂವ್ ಜಾವ್ನಾಸ್ಲ್ಲೊ. ಸಹಜ್ ಜಾವ್ನ್ ಮೆಲ್ವಿನಾಕ್ ಭೊಗ್ತಾಲೆಂ ಶಾಸ್ತ್ರೀಯ್ ಸಂಗೀತಾಂತ್ ಕ್ರಿಸ್ತಾಂವಾಂಕ್ ಉತ್ಸಾಹ್ ನಾ ಮ್ಹಣ್. ಕ್ರಿಸ್ತಾಂವಾಂ ಮಧೆಂ ’ಆಪುಣ್ ಹುಶಾರ್ ಗಾವ್ಪಿ’ ಮ್ಹನ್ ಆಪ್ಣಾಕ್ಚ್ ಬಿರುದ್ ಲಾವ್ನ್ ಘೆತ್ಲ್ಲ್ಯಾ ವ್ಯಕ್ತಿಂಚೊ ಬರ್ಗಾಲ್ ನಾತ್ಲ್ಲೊ. ಕಾಜಾರಾ ಮಟ್ವಾಂತ್ ಚ್ಯಾರ್ ಕಂತಾರಾಂ ಉಡೊವ್ನ್, ಆನಿಂ ನಾಟಕಾಚ್ಯಾ ರಂಗಸ್ಠಳಾರ್ ಕೊಣಾ ಕೊಣಾಕ್ ವೊಪಾರಿ ಮಾರ್ಚಿಂ ಗಾಯನಾಮ್ ಗಾವ್ನ್, ಅಪುಣ್ ಎಕ್ ಸಂಗೀತ್ ಕಲಾಕರ್ ಮ್ಹಣ್ ಹರ್ಧೆಂ ಬಡೈತೆಲ್ಯಾ ಗಾವ್ಪ್ಯಾಂಚೆಂ ಉಣೆಂಪಣ್ಂಚ್ ನಾತ್ಲ್ಲೆಂ. ಪುಣ್ ಸಂಗೀತ್ ಮ್ಹಳ್ಳ್ಯಾಚೊ ಅರ್ಥ್ ಸಮ್ಜಾಲ್ಲ್ಯಾ ವ್ಯಕ್ತಿಂಚೊ ಜಬ್ಬೊರ್ ತತ್ವಾರ್ ಆಸ್ಲ್ಲೊ.
ಮೆಲ್ವಿನ್ ಕಾಮಾಕ್ ಲಾಗೊನ್ ಸಾತ್ವೊ ಮಹಿನೊ ಚಲ್ತಾಲೊ. ತ್ಯಾ ಮಧೆಂ ಘರಾ ಸರಾಗ್ ಕಾಗ್ದಾಂ ತೊ ಬರೈತಾಲೊ ಆನಿಂ ಪಯ್ಶೆಯಿ ಧಾಡ್ತಾಲೊ. ಮೆಲ್ವಿನ್ ಕಾಮಾರ್ ಪಾವ್ಲಾ ಅನಿಂ ಜೀವಂತ್ಚ್ ಅಸಾ ಮ್ಹಣ್ ಸಮ್ಜಾಲ್ಲ್ಯಾ ತಾಚ್ಯಾ ಆವಯ್ ಬಾಪಾಯ್ಕ್ ಖಳ್ಮಿತ್ ನಾತ್ಲ್ಲೊ ಸಂತೊಸ್ ಜಾಲ್ಲೊ. ಆತಾಂ ಪುತಾಚೆ ಸರಾಗ್ ಪಯ್ಶೆ ಯೆತಾತ್ ಜಾಲ್ಲ್ಯಾನ್, ಘರ್ಚಿ ಅರ್ಥಿಕ್ ಸ್ಥಿತಿಯಿ ಸುಧಾರ್ಲ್ಲಿ.
ಎಕಾ ಸೊಮಾರಾ, ಸದಾಂಚ್ಯಾ ಭಾಷೆನ್ ಕ್ಲಾಸಿಕ್ ಗೆಲ್ಲ್ಯಾ ವೆಳಾರ್ ಪಂಡಿತ್ ತಾಂಕಾಂ ಸಾಂಗಾಲಾಗ್ಲೊ ಕಿ, ’ರಿಪಬ್ಲಿಕ್ ಡೇ’ ಕ್ ತಯಾರಾಯ್ ಜಾವ್ನ್ ಮ್ಯೂಜಿಕ್ ಪಂದ್ಯಾಟ್ ದವರ್ತೆಲೆ ಮ್ಹಣ್. ತಾಣೆ, ಸಕ್ದಾಂನಿ ಪಂದ್ಯಾಟಾಂತ್ ಭಗ್ ಘೆಜಯ್ ಮ್ಹಣ್ ವತ್ತಾಯ್ ಕೆಲಿ. ನಹಿಂಚ್ ಮೆಲ್ವಿನಾಚೆಂ ಬೆಜ್, ಬಗಾರ್ ಸಗ್ಳ್ಯಾ ದಿಸಾ ಕ್ಲಾಸಿಕ್ ಹಾಜರ್ ಜಾಂವ್ಚಿಂ ಇತರ್ ಬೆಜಾಂಯೀ ಆಸ್ಲ್ಲಿಂ. ಒಟ್ಟುಕ್ ತಾಂಚ್ಯಾ ಇಸ್ಕೊಲಾಂತ್ ಶಿಕ್ಚ್ಯಾ ೧೦೦ ವಿದ್ಯಾರ್ಥಿ ಮಧೆಂ, ದೊಗಾಂಕ್ ವಿಂಚುನ್ ಕಾಡ್ತೆಲೆ ಅನಿಂ ಆಖ್ಯಾ ಬೊಂಬಯ್ ಪ್ರಾಂತ್ಯಾಚೆಂ ಜಾಂವ್ಚ್ಯಾ ಪಂದ್ಯಾಟಾಂತ್ ಪಾತ್ರ್ ಘೆಂವ್ಕ್ ಧಾಡ್ತೆಲಿ ಮ್ಹಣ್ ಪಂಡಿತಾನ್ ತಿಳ್ಸಿಲೆಂ.
ಮೆಲ್ವಿನಾನ್ ಘರಾ ವೆತಚ್ ಹಿ ಖಬಾರ್ ರಾಜುಕ್ ಕಳೈಲಿ. ತಾಕಾ ಉತ್ತೆಜನ್ ದೀವ್ನ್ ರಾಜುನ್ ಮ್ಹಳೆ - "ಮುಖಾರ್ ಸರ್ ಇಷ್ಟಾ. ತುಂ ಸಗ್ಳ್ಯಾ ಬೊಂಬೈತ್ಚ್ ಪ್ರಥಮ್ ಸ್ಥಾನ್ ಜೊಡ್ತೊಲೊಯ್ ಮ್ಹಣ್ ಮ್ಹಾಕಾ ಭರ್ವಸೊ ಆಸಾ"
ಮೆಲ್ವಿನಾಕ್ ಆಪ್ಣಾಚೆಂ ಅಪಧೈರ್ಚ್ ಆಸ್ಲ್ಲೆಂ. ತ್ಯಾ ಎಕಾ ವೆಳಾರ್ ಕೊಲೆಜಿಂತ್ ಪ್ರಥಮ್ ಸ್ಥಾನ್ ಜೊಡ್ಲೆಂ ಮ್ಹಣ್ ಹಾಂಗಾಸರ್ ಯಿ ಜಾಂವ್ಕ್ ಸುಲಭ್ಗಿ? ತರೀ, ಎಕಾ ಥರಾಚ್ಯಾ ಹಟಾನ್ ತಾಣೆಂ ಪಂದ್ಯಟಾಂತ್ ಪಾತ್ರ್ ಘೆತ್ಲೊ.
ದುಸ್ರ್ಯಾ ಹಪ್ತ್ಯಾಂತ್ಲ್ಯಾ ಸನ್ವಾರಾ ಸಾಂಜೆರ್ ’ಕೊಂಪೆಟಿಶನ್’ ದವರ್ಲೆಲೆಂ. ರಾಜು ಆನಿಂ ಮೆಲ್ವಿನ್ ಸಾಂಗಾತಾ ಗೆಲೆ. ವಿಶಾಲ್ ಸಾಲ್, ಅನಿಮ್ ಸಬಾರ್ ಲೋಕ್ ಥಂಯ್ ಕುಡ್ಸಾಲ್ಲೊ. ಸಂಗೀತಾಂತ್ ಪ್ರವೀಣ್ ಜಾಲ್ಲೆ ವ್ಯಕ್ತಿ ತೀರ್ಪಾಂ ದಿಂವ್ಚ್ಯಾಕ್ ಥಂಯ್ಸರ್ ಅಯಿಲ್ಲೆ. ಮೆಲ್ವಿನಾಚ್ಯಾ ಕಾನಾಂತ್ ವ್ಹಳೂ ರಾಜು ಪುಸ್ಪುಸ್ಲೊ - "ಆಳೆ, ಥಂಯ್ ಮುಖ್ಲ್ಯಾ ಸಾಲಿಂತ್ ಕೊನ್ಶಾಕ್ ಬಸ್ಲಾ. ಶಂಕರ್, ಹಿಂದಿ ಚಲನ್ ಚಿತ್ರಾಂಚೊ ಮ್ಯೂಜಿಕ್ ಡ್ರಾಯೆಕ್ಟರ್. ತೊ ನಿಳ್ಶಾ ಸುಟಾರ್ ಆಯ್ಲಾ ಜೈಕಿಶನ್ ಥಂಯ್ ಶರ್ವಾಂನಿ ಘಾಲ್ನ್ ಬಸ್ಲಾ ರವಿ....."
ಮೆಲ್ವಿನ್ ಸ್ತಬ್ದ್ ಜಾವ್ನ್ ತ್ಯಾ ಮನ್ಶಾಂಕ್ ಪಳೆತಾಲೊ. ತಾಕಾ ಆಪ್ಲ್ಯಾ ವಿದ್ಯಾರ್ಥಿ ಜೀವನಾಚೊ ಉಗ್ಡಾಸ್ ಆಯ್ಲೊ. ತಸಲೆಂಚ್ ವಾತಾವರಣ್ ....ಆಪ್ಣಾಕ್ ಪಯ್ಲೆಂ ಅನಿಂ ಸ್ಂತಿಕ್ ದುಸ್ರೆಂ ಸ್ಥಾನ್ ಮೆಳ್ಲ್ಲೆಂ.
ಸಿಂತಿ ಕಶೆಂ ಅಸಾಗಾಯ್? ತಾಚೆಂ ಕಾಜಾರ್ ಹೆರಿಲಾಗಿಂ ಜಾಲೆಂ ಮ್ಹಣ್ ಮಾಂಯ್ನ್ ಬರೈಲಾಂ. ಆಖ್ರೇಕ್ ತರೀ, ಸಿಂತಿಚಿ ಲಗಾಮ್ ಹೆರಿಚ್ಯಾ ಮುಟಿಂತ್ ಪದ್ಲೆಂ. ಶಿಕ್ಪಿ, ಸುಂದರ್, ಗ್ರೆಸ್ತ್ ನವ್ರೊ ಮೆಳ್ಳಾ ಸಿಂತಿಕ್. ತಾಂಚೆಂ ಜೀವನ್ ಸುಖಿ ಆಸ್ತೆಲೆಂ.
ಮೆಲ್ವಿನ್ ಶಿಕ್ಚ್ಯಾ ಶಾಲಾಂತ್ಲೆಂ ಪಂದ್ರಾ ವಿದ್ಯಾರ್ಥಿ ಪಂದ್ಯಟಾಂತ್ ಪಾತ್ರ್ ಘೆಂವ್ಕ್ ಯೋಗ್ಯ್ ಮ್ಹಣ್ ವಿಂಚುನ್ ಕಾಡ್ಲೆಲೆ. ಮೆಲ್ವಿನಾಚ್ಯಾ ಬೆಜಾಂತ್, ತಾಕಾ ಅನಿಂ ದುಸ್ರ್ಯಾ ಎಕ್ಲ್ಯಾ ಚೆಡ್ವಾಕ್ ವಿಂಚ್ಲೆಲೆ. ಅಶೆಂ ಆಯ್ಚ್ಯಾ ನಿಮಾಣ್ಯಾ ಪರಿಕ್ಶೆಂತ್ ಪಂದ್ರಾ ವಿದ್ಯಾರ್ಥಿಂ ಪಯ್ಕಿ ದೊಗಾಂಕ್ಚ್ ವಿಂಚುನ್ ಕಾಡುಂಕ್ ಆಸ್ಲ್ಲೆಂ.
ಪ್ರಥಮ್ ನಾಂವ್ ಮೆಲ್ವಿನಾಚೆಂಚ್ ಆಯಿಲ್ಲೆಂ. ತ್ಯಾ ದೀಸ್ ಗಿಬ್ಬಾನ್ ಧೈರ್ ದೀವ್ನ್ ಧಾಡ್ಲ್ಲ್ಯಾಬರಿ, ಆಜ್ ರಾಜುನ್ ತಾಕಾ ಧೈರ್ ದೀವ್ನ್ ಧಾಡ್ಲೆಂ. ತೊ ಸ್ಟೇಜಿರ್ ಚಡ್ಲೊ. ಶೊಂಬೊರಾಂ ವಯ್ರ್ ಲೊಕಾಚೆಂ ದೊಳೆ ತಾಚೆರ್ ಆಸ್ಲ್ಲೆ. ತ್ಯಾ ಶಾಂತ್ ಗಂಭೀರ್ ವಾತಾವರಣಾಂತ್ ಅರ್ಧುಕುರೆ ದೊಳೆ ಧಾಂಪುನ್ ಗಾಯನ್ ಪ್ರಾರಂಭ್ ಕೆಲೆಂ. ಪಯ್ಲೆಂಚ್, ಜೆಸ್ಸಿ ವಿಶ್ಯಾಂತ್ ನಿಯಾಳ್ನ್ ತಾಣೆಂಚ್ ಗೀತ್ ಬರೈಲ್ಲೆಂ, ಆನಿಂ ಸಂಗೀತ್ ಮೆಸ್ತ್ರಿನ್ ತೆಂ ಹಿಂದಿಂತ್ ಭಾಷಾಂತರ್ ಕೆಲ್ಲೆಂ. ಜೆಸ್ಸಿಚೆಂ ರುಪ್ಣೆಂ ತಾಚ್ಯಾ ದೊಳ್ಯಾಂ ಮುಖಾರ್ ಅಯ್ಲೆಂ. ಕಾಳ್ಜ್ ಉಮಾಳ್ಯಾಂನಿ ಭರೊನ್ ಯೆತಾನಾ, ದೊಳೆ ದುಃಖಾಂನಿ ಪಾಚಾರ್ಲೆಂ. ತಂಬೂರಿಚೊ ನಾದ್, ಮೆಲ್ವಿನಾಕ್ ಹಿಮ್ಮೇಳ್ ಜಾವ್ನ್ ಅಸ್ತಾನಾ, ಮೆಲ್ವಿನಾನ್, ಕಾಳಿಜ್ ಕಡೊಂವ್ಚೆಂ ತೆಂ ಗೀತ್ ಗಾಂವ್ಕ್ ಸುರು ಕೆಲೆಂ....
"ಹಜಾರ್ ಮಯ್ಲಾಂ ಪಯ್ಸ್ ಹಾಂವ್ ತರೀ,
ರುಪ್ಣೆಂ ತುಜೆಂ ಲಿಪ್ಲೆಂನಾ,
ಕರುಂ ತುಕಾ ಕೊಣಾಕ್ ಸರಿ
ತುಜ್ಯಾ ತಸಲ್ಯಾಕ್ ದೆಖ್ಲೆಂನಾ.
ಮೂಡಣ್ ದೊಂಗ್ರಾರ್ ರವಿ ತಿಳ್ತಾ,
ಆಶೆಚೆಂ ಕಿರಣ್ ಹಾಂವ್ ಸೊಧ್ತಾಂ,
ಸುರ್ಯೊ ಬುಡೊನ್, ಕಾಳೊಕ್ ವ್ಹಾಳ್ತಾಂ,
ನಿರಾಸ್ ಜಾವ್ನ್, ತುಕಾ ನಿಯಾಳ್ತಾಂ,
ಹೆಂ ಜೀವನ್ ನಹಿಂ, ಆಶಾ - ಸಾಗೊರ್
ದೆಖ್ ಹೆಂ ದುಃಖ್ ತುಂ, ವಿಶಾಲ್ ಆಘೋರ್....
ತುಜೆವಿಣೆಂ, ರಿತೊ ಸಂಸಾರ್,
ಮೆಳ್ಶಿಗಿ ತುಂ, ಮ್ಹಾಕಾ ಸರ್ಗಾರ್?"
ಆನಿಂ ನಿಮಾಣೆ....ತಿ ಕಥಾ ತಾಣೆಂ ಗಾವ್ನ್ ಜಾಲ್ಲಿ.
ಕಂತಾರ್ ಆಖೇರ್ ಜಾಲ್ಲೆಂ. ತೊ ಸ್ಟೇಜಿ ವಯ್ಲೊ ಸಕ್ಲಾ ದೆಂವ್ಲೊ. ಲೊಕಾಚಿ ಜಾಗ್ ಮಾಗ್ ನಾತ್ಲ್ಲಿ. ಮೆಲ್ವಿನ್ ರಾಜು ಸಾಂಗಾತಾ ಯೇವ್ನ್ ಬಸಾಜಾಯ್ ಜಾಲ್ಯಾರ್ ಎಕಾಚ್ಚಾಣೆ, ಗರ್ನಾಳ್ ಫುಟ್ಲ್ಲ್ಯಾ ಜಿನ್ಸಾರ್ ಲೊಕಾನ್ ತಾಳಿಯೊ ಪೆಟ್ಲ್ಯೊ.
"ವಂಡರ್ ಫುಲ್ ಮೆಲ್ವಿನ್.......ವಂಡರ್ ಫುಲ್. ತುಜಿ ಬಾಯೊಗ್ರಾಪಿ, ಗಾಯನಾ ರುಪಾರ್ ವಿಚಿತ್ರ್ ಆನಿಂ ಸುಮಧುರ್ ಕರ್ನ್ ಗಾಯ್ಲಿಯ್" ತಡ್ವುಂಕ್ ತಾಂಕಾನಾಸ್ತಾಂ ರಾಜು ಮ್ಹಣಾಲೊ.
ಮೆಲ್ವಿನ್ ತಕ್ಲಿ ಉಕಲ್ತಾನಾ ....ತೊ ಆಜಾಪ್ಲೊ. ರಾಜುಯಿ ಉಡೊನ್ ಪಡ್ಲೊ.
ಸ್ಟೆಜಿರ್ ಅಮ್ರುಕೆಂ ಹಾಸೊನ್ ಸಿಲ್ವಿ ಉಬೆಂ ಆಸ್ಲ್ಲೆಂ.
"ಸಿಲ್ವಿ....?" ಪುಸ್ಪುಸ್ಲೆ ದೊಗೀ ಸಾಂಗಾತಾ. ಮೆಲ್ವಿನಾಕ್ ಕಠಿಣ್ ವಿಜ್ಮಿತ್ಕಾಯ್ ಭೊಗ್ಲಿ. ಸಿಲ್ವಿಯಿ ಆಪುಣ್ ಶಿಕ್ಚ್ಯಾ ಇಸ್ಕಾಲಾಂತ್ಚ್ ಸಂಗೀತ್ ಶಿಕ್ತಾ! ಕಸಲೆಂ ನವಾಲ್.
"ಸಿಲ್ವಿಕ್ ಬರೊ ತಾಳೊ ಆಸಾ ಮ್ಹಣ್ ಹಾಂವೆಂ ಆಯ್ಕಾಲಾಂ" ರಾಜು ಮ್ಹಣಾಲೊ, ತರೀ, ತುಜ್ಯಾಚ್ ಮ್ಯೂಜಿಕ್ ಶಾಲಾಂತ್ ತೆಂ ಶಿಕ್ತಾ ಮ್ಹಣ್ ಹಾಂವ್ ನೆಣಾ ಜಾಲ್ಲೊಂ"
"ಮ್ಹಾಕಾಯ್ ಆತಾಂಚ್ ಕಳ್ಳೆಂ" ಮೆಲ್ವಿನಾನ್ ಜಾಪ್ ದಿಲಿ
ಸಿಲ್ವಿನ್ ಪ್ರಾರಂಬ್ ಕೆಲ್ಲೆಂ. ಗಾಯನ್ಯಿ ದುಃಖೇಸ್ತ್ ಜಾವ್ನಾಸ್ಲ್ಲೆಂ. ಸಿಲ್ವಿಚ್ಯಾ ಕಾಳ್ಜಾಂತ್ಲೆಂ ಆಘೋರ್ ಧುಃಖ್ ದಿಷ್ಟ್ಕ್ ಪಡ್ತಾಲೆಂ. ಖರೆಂಚ್, ಆಯ್ಕಾತೆಲ್ಯಾ ಮೆಲ್ವಿನಾಚೆಂ ಕಾಳಿಜ್ ರಡ್ಲೆಂ. ರಾಜು ಆನಿಂ ತೊ ಕಾನ್ ದೀವ್ನ್, ತೆಂ ಗಾಯನ್ ಆಯ್ಕೊಂಕ್ಲಾಗ್ಲೆಂ. ನಿಮಾಣೆ, ಗಾಯನ್ ಆಖೇರ್ ಜಾತಾನಾ, ಖಂಯ್ಚಾಗಿ ಸಂಸಾರಾ ಥಾವ್ನ್ ಸಕ್ಲಾ ದೆಂವ್ಲ್ಲ್ಯಾಬರಿ ಭೊಗ್ಲೆಂ ಮೆಲ್ವಿನಾಕ್.
ಉಪ್ರಾಂತ್, ಎಕ್ಲ್ಯಾ ಪಾಟಾಪಾಟ್ ದುಸ್ರ್ಯಾಚಿಂ ಕಂತಾರಾಂ ಜಾಲಿಂ. ನಿಮಣೆಂ ಫಲಿತಾಂಶ್.
ಮೆಲ್ವಿನಾಚೆಂ ಕಾಳಿಜ್ ಧಡ್ಧಡ್ತಾಲೆಂ. ಆಪ್ಣಾಕ್ ಸ್ಥಾನ್ ಮೆಳಾತ್ ವ ನಾ? ಕಾಂಪ್ಚೆಂ ಹರ್ದೆಂ ಆನಿಂ ಉದ್ವೇಗಾನ್ ಭರ್ಲ್ಲೆಂ ಮನ್ ಘೆವ್ನ್, ಸ್ಟೆಜಿರ್ ಉಬೊ ರಾವ್ಲ್ಲ್ಯಾ ಪಂಡಿತಾಚೆರ್ ತಾಣೆಂ ದೀಷ್ಟ್ ವ್ಹೆಲಿ. "ಮೆಲ್ವಿನ್ ಫಸ್ಟ್...." ಸ್ವಾಧೀಕ್ ತಿಂ ಉತ್ರಾಂ ತಚ್ಯಾ ಕಾನಾಂಕ್ ಮಾರ್ತಾನಾ, ತೊ ಸಂತೊಸಾನ್ ಫುಗ್ಲೊ. ಅನಂದಾಚೆ ವ್ಹಾಳ್ ತಾಚ್ಯಾ ಶಿರಾಂ ಶಿರಾಂನಿ ಚರ್ಲೆ. ರಾಜುನ್ ಥಂಯ್ಚ್ ತಾಕಾ ಪೊಟ್ಲುನ್ ಧರ್ಲೆಂ. ಮೆಲ್ವಿನ್ ಬೊಂಬೈತ್ಯಿ ನಾಂವಾಡ್ಲೊ.
"ಸಿಲ್ವಿಯಾ ಸೆಕೆಂಡ್..." ಮೆಲ್ವಿನಾನ್ ಚಿಂತ್ಲ್ಲ್ಯಾಬರಿ, ಸಿಲ್ವಿಕ್ಯಿ ಏಕ್ ಸ್ಥಾನ್ ಮೆಳ್ಲ್ಲೆಂ. ತೆಂ ಸನ್ನಿವೇಶ್ ನಿಜಾಕ್ಯಿ, ಕೊಲೆಜಿಚ್ಯಾ ತ್ಯಾ ದಿಸಾಕ್ ಸರಿಜಾವ್ನ್ ಆಸ್ಲ್ಲೆಂ. ’ಮೆಲ್ವಿನ್ ಫಸ್ಟ್ ಆನಿಂ ಸಿಂತಿ ಸೆಕೆಂಡ್..’ ಆನಿಂ ಆಜ್’ ಮೆಲ್ವಿನ್ ಫಸ್ಟ್ ಅನಿಂ ಸಿಲ್ವಿಯಾ ಸೆಕೆಂಡ್....’ ಕಸಲೆಂ ವಿಚಿತ್ರ್ ಘಡಿತಾಂ!
ಮೆಲ್ವಿನ್ ಆನಿಂ ರಾಜು ಸ್ಟೇಜಿ ಕುಶಿಚ್ಯ ಗ್ರೀನ್ ರುಮಾಕ್ ಅಯ್ಲೆ. ಸಂಗೀತ್ ಪಂಡಿತ್ ಆನಿಂ ಮೆಲ್ವಿನಾಚೆ ಸಹ-ವಿದ್ಯಾರ್ಥಿ ಥಂಯ್ ಉಬೆ ಆಸ್ಲ್ಲೆ. ತಾಣಿಂ ಎಕಾಚ್ಚಾಣೆಂ ಮೆಲ್ವಿನಾಕ್ ವೆಡೊ ಮಾರ್ನ್ ಅಭಿನಂದನ್ ಕೆಲೆಂ. ಮೆವ್ಲಿನಾಚಿ ದೀಷ್ಟ್ ಪಡ್ಲಿ ಎಕಾ ಕೊನ್ಶಾಕ್ ಉಬೆಂ ರಾವೊನ್ ಅಮ್ರುಕೆಂ ಹಾಸ್ಚ್ಯಾ ಸಿಲ್ವಿಚೆರ್.
ಸಾಧೆಂ ಏಕ್ ಧೊವೆಂ ಕಾಪಾಡ್ ನ್ಹೆಸ್ಲ್ಲೆಂ ಸಿಲ್ವಿ, ಆನಿಂ ಧೊವೊಚ್ ಸುತಿ ಬ್ಲಾವ್ಜ್. ಕಾನಾಂತ್ ಕುಡ್ಕಾಂ ವಿನಃ ದುಸ್ರೊ ಆಲಂಕಾರ್ ನಾ. ತರೀ ಕಿತ್ಲೆಂ ಸುಂದರ್ ತೆಂ. ತ್ಯಾ ಚಂದ್ರಾ ಸಾರ್ಕ್ಯಾ ಮುಖಮಳಾಚೆರ್ ಖೆಳ್ಚೊ ತೊ ಮನ ಮೋಹಕ್ ಹಾಸೊ, ಬಿಂಡಾ ಸಾರ್ಕ್ಯಾ ವೊಂಟಾಂ ಮುಖಾಂತ್ರ್ ಭಾಯ್ರ್ ಪಸರ್ತಾಲೊ. ಮೆಲ್ವಿನ್, ತಾಕಾ ಪಳೆವ್ನ್ ಆಸ್೬ಲ್ಲ್ಯಾಬರಿಚ್, ತೆಂ ಸವ್ಕಾಸ್ ತಾಚೆ ಸರ್ಶಿಂ ಅಯ್ಲೆಂ.
"ಹಾಂವ್ ಸಿಲ್ವಿಯಾ....." ಸ್ವಾಧೀಕ್ ತಾಳ್ಯಾನ್ ತೆಂ ಮ್ಹಣಾಲೆಮ್, "ತುಕಾ ಧನ್ಯವಾದ್ ಅರ್ಪುಂಕ್ ಆಯ್ಲ್ಯಾಂ" ಸಿಲ್ವಿನ್ ತಾಕಾ ಹಾತ್ ದಿಲೊ. ಮೆಲ್ವಿನಾನ್ ತೊ ಮೋವ್ ನಾಜೂಕ್ ಹಾತ್ ಧರ್ನ್ ಹಾಲೈಲೊ. ದುಸ್ರ್ಯಾ ಕ್ಷಣಾ, ಇಂಗ್ಲಿಷಾಂತ್ಚ್ ಮೆಲ್ವಿನಾನ್ ಮ್ಹಳೆಂ "ಹಾಂವ್ಯಿ ತುಕಾ ಪಳೆವ್ನ್ ಖುಷಿ ಪಾವ್ತಾಂ. ಮ್ಹಜೆ ಅಭಿನಂದನ್ ತುಕಾ"
ತಿತ್ಲ್ಯಾರ್ ತಾಂಚೆಂ ಸಂಭಾಷಣ್ ಆಖೇರ್ ಜಾಲೆಂ. ಪಂಡಿತಾಚಿ ಶಿಫಾರಸ್ ಆಯ್ಕೊನ್, ತಾಚೊಯಿ ಉಪ್ಕಾರ್ ಬಾವುಡ್ನ್ ತೊ ಆನಿಂ ರಾಜು ಹೊಲಾಚಿಂ ಮೆಟಾಂ ದೆಂವೊನ್ ಭಾಯ್ರ್ ರಸ್ತ್ಯಾಕ್ ಆಯ್ಲೆ.
ಮೆಲ್ವಿನಾಕ್ ತ್ಯಾ ರಾತಿಂ ಜೇಂವ್ಕ್ ಜಾಂವ್ಕ್ ನಾ. ತಾಚ್ಯಾ ಮತ್ಕ್, ಖಳ್ಮಿತ್ನಾತ್ಲ್ಲೊ ಸಂತೊಸ್ ಜಾಲ್ಲೊ. ಆನಿಂ ತಾಚ್ಯಾ ಅಮಾಲಾಕ್ ಭುಕ್ ತಾಕಾ ನಾತ್ಲ್ಲಿ. ಹಾಂತುಳ್ಣಾರ್ ನಿದ್ಲ್ಲ್ಯಾಕಡೆ ವೆಗಿಂಚ್ಯಾಕ್ ನೀದ್ಯಿ ಆಯ್ಲಿನಾ. ನಾನಾಂತಿ, ಆದ್ಲಿಂ ಆನಿಂ ಭವಿಷ್ಯಾಚಿಂ ಚಿಂತ್ನಾಮ್ ತಾಚ್ಯಾ ಮತಿಂತ್ ದೊಸ್ತಾನಾ, ನೀದ್ ಧಾ ಮೈಲಾಂ ಪಯ್ಸ್ ಧಾಂವ್ಲ್ಯಾ ತಶೆಂ ಭೊಗ್ಲೆಂ ತಾಕಾ.
ಸಿಲ್ವಿಯಾ.......ತಾಚಿ ಆಜ್ ಮೆಲ್ವಿನಾಕ್ ವಳೊಕ್ ಜಾಲ್ಲಿ. ಸುಮಾರ್ ತೆಂಪಾ ಆದಿಂ, ಸಿಲ್ವಿಚಿ ಸ್ಥಿತಿ ರಾಜು ಮುಖಾಂತ್ರ್ ತೊ ಜಾಣಾ ಜಾಲ್ಲೊ. ಪುಣ್........ಆಜ್ ತಾಚೆಲಾಗಿಂ ಉಲಂವ್ಕ್ ಆಪ್ಣಾಕ್ ಸೆಜಾರಿ....ತರೀ ಆಪ್ಣಾಚಿ ವಳೊಕ್ ತಾಕಾ ಆಸೊಂಕ್ ಕಾರಣ್ಂಚ್ ನಾತ್ಲ್ಲೆಂ. ಕಿತ್ಲ್ಯಾಲಾಗಿಂ.....ಆನಿಂ ಕಿತ್ಲ್ಯಾ ಪಯ್ಸ್......ಹಾಸ್ಲೊ ತೊ.
ದೀಸ್ ದುಸ್ರೊ ಉದೆಲೊ. ಪುಣ್ ತ್ಯಾ ಸಾಂಜೆರ್, ತಾಕಾ ವರ್ತೆಂ ಏಕ್ ಆಜಾಪ್ ರಾಕೊನ್ ಅಸ್ಲ್ಲೆಂ. ಸದಾಂಚೆಬರಿ ಕಾಮ್ ಸಂಪ್ತಚ್, ತೊ ಸಂಗೀತ್ ಕ್ಲಾಸಿಕ್ ವೆತಾನಾ, ಸಿಲ್ವಿಯಿ ಕ್ಲಾಸಿಂತ್ ಆಸ್ಚೆಂ ತಾಣೆಂ ದೆಖ್ಲೆಂ. ಮೆಲ್ವಿನಾಕ್ ಪಳೆವ್ನ್ ಅಪುರ್ಬಾಯೆನ್ ಹಾಸ್ಲೆಂ ತೆಂ. ತುಕಾ ಅನಿಂ ಸಿಲ್ವಿಕ್, ಬೊಂಬಯ್ ಪ್ರಾಂತೀಯ್ ಸಂಗೀತ್ ಪಂದ್ಯಾಟಾಂತ್ ಪಾತ್ರ್ ಘೆಂವ್ಕ್ ಸ್ಥಾನ್ ಮೆಳ್ಳಾಂ. ತ್ಯಾ ದೆಕುನ್, ತುಮಿಂ ಸಾಂಗಾತಾಚ್ ಅಭ್ಯಾಸ್ ಕರ್ಚ್ಯಾ ಇರಾದ್ಯಾನ್, ಸಿಲ್ವಿಕ್ ಸಾಂಜೆಚ್ಯಾ ಕ್ಲಾಸಿಕ್ ಹಾಂವೆಂ ಆಪೈಲ್ಲೆಂ. ಹರ್ಶೆಂ ತಾಕಾ ಸಕಾಳಿಂಚಿ ಕ್ಲಾಸ್ ಆಸ್ಲ್ಲಿ....."
"ಮಜೆವರ್ವಿಂ ತುಕಾ ಮ್ಹಸ್ತ್ ತೊಂದ್ರೆ ಜಾಲೆ..." ಮೆಲ್ವಿನ್ ಸಿಲ್ವಿಲಾಗಿಂ ಸಾಂಗಾಲಾಗ್ಲೊ.
"ನಾ ....ಬಿಲ್ಕುಲ್ ನಾ...." ಸಿಲ್ವಿ ಮ್ಹಣಾಲೆಂ - ಪುಣ್ ಆಪುಟ್ ಕೊಂಕ್ಣಿ ಭಾಷೆನ್ ಮೆಲ್ವಿನ್ ಥಟಾಕ್ಲೊ. ದುಸ್ರ್ಯಾ ಕ್ಷಣಾ, ಸಿಲ್ವಿ ವಿಷ್ಯಾಂತ್ ಕಾಂಯ್ಚ್ ನೆಣಾ ಜಾಲ್ಲ್ಯಾಬರಿ ವಿಚಾರ್ಲೆಂ ತಾಣೆಂ - "ತುಂ ಮಂಗ್ಳೂರ್ಚೆಂಗಿ?"
"ಹಾಂವ್ ಜಲ್ಮಾಲ್ಲಿಂ ಆನಿಂ ವ್ಹಡ್ ಜಾಲ್ಲಿಂ ಬೊಂಬೈತ್ಚ್. ಪಪ್ಪಾ ಮ್ಹಜೊ ಮಂಗ್ಳೂರ್ಗಾರ್"
"ಹಾಂವ್ ಮಂಗ್ಳುರ್ಚೊ ಮ್ಹಣ್ ತುಕಾ ಕಶೆಂ ಕಳ್ಳೆಂ?"
"ಪಳೆ.....ಹಾಚೆರ್ ವಾಚ್ಲೆಂ. ತುಂ ನೆಣಾಂಯ್ಗಿ?" ವಿಜ್ಮಿತ್ ಜಾವ್ನ್, ಸಿಲ್ವಿನ್ ಹೆಂಡ್ ಬೆಗಾಂತ್ಲೆಂ ’ಇಂಡಿಯನ್ ಎಕ್ಸ್ಪ್ರೆಸ್’ ಪತ್ರ್ ಕಾಡ್ನ್ ಮೆಲ್ವಿನಾಕ್ ದಿಲೆಂ. ಬಿತರ್ಲ್ಯಾ ಪಾನಾರ್, ಮೆಲ್ವಿನಾಚಿ ಪೊಟೊ, ನಾಂವ್ ಆನಿಂ ವವರ್ ಸಗ್ಳೊ ಆಸ್ಲ್ಲೊ. ಖರೆಂಚ್ ಆಜ್ಯಪ್ ಜಾವ್ನ್ ಹಾಸೊನ್ ಮ್ಹಳೆ....."ಹುಂ.....ಇತ್ಲೊಯಿ ನಾಂವಾಡ್ಲೊಂ ಹಾಂವ್?"
"ಯೋಗ್ಯ್ ಮನ್ಶಾಂಕ್ ಹೊಗ್ಳಿಕ್ ಆಪ್ಶಿಚ್ ಸೊಧುನ್ ಯೆತಾ, ಶಿವಾಯ್ ತೆ ಹೊಗ್ಳಿಕೆಕ್ ಸೊಧುನ್ ವಚನಾಂತ್ ಅಮ್ಚೆಂ ಮಧೆಂ ಸಬಾರ್ ಜಣ್ ಅಸ್ತಿತ್. ಆಪ್ಣೆಂ ಕೆಲ್ಯಾ ಆನಿಂ ಕರ್ಚ್ಯಾ ಕಾಮಾಂ ವಿಷ್ಯಾಂತ್ ಬಡಾಯ್ ಉಲಂವ್ಚೆ. ಸಮಾಜೆಂತ್ ಆಪುಣ್ ಕ್ರಾಂತಿ ಕರ್ತಾಂ ಮ್ಹಣ್ ಮುಂಗಡ್ ಇಸ್ತಿಹಾರಾಂ ದೀವ್ನ್ ಪ್ರಚಾರ್ ಕರ್ತಿತ್. ಪುಣ್, ಭರ್ಲ್ಲೊ ಕೊಳ್ಸೊ ಕೆದಾಳಾಚ್ ಹಾಲಾನಾ ಮೆಲ್ವ್ನ್.." ಸಿಲ್ವಿನ್ ಸಾಂಗ್ಲೆಂ.
ತಾಚ್ಯಾ ತ್ಯಾ ಚತುರ್ ಉತ್ರಾಂಕ್ ಜಾಪ್ ದೀಂವ್ಕ್ ಮೆಲ್ವಿನಾಕ್ ಜಾಲಿನಾ. ತೊ, ಸಿಲ್ವಿಕ್ ಪಳೆವ್ನ್ ಹಾಸ್ಲೊ.
ತ್ಯಾ ದೀಸ್ ಕ್ಲಾಸಿಂತ್, ಸಂಗೀತ್ ಪಂಡಿತಾನ್ ಸಿಲ್ವಿ ಆನಿಂ ಮೆಲ್ವಿನಾಥಂಯ್ ವಿಶೇಷ್ ಲಕ್ಶಾ ದೀವ್ನ್ ಲಿಸಾಂವ್ ಮುಖಾರ್ಸಿಲೆಂ. ಕ್ಲಾಸ್ ಸಂಪ್ತಚ್, ಹಾಂಕಾಂ ದೊಗಾಂಕ್ ರಾವೊವ್ನ್ ತಾಣೆಂ ಮ್ಹಸ್ತ್ ಅನುಬವ್ ಸಾಂಗ್ಲೊ ಆನಿಮ್ ಮ್ಹಳೆಂ - "ಪಂದ್ಯಾಟಾಂತ್ ಆನಿಂ ಧಾಚ್ ದೀಸ್ ಅಸಾತ್. ಜೀತ್ ಆನಿಂ ಧ್ಯಾನ್ ದೀವ್ನ್ ತುಮಿಂ ಹಾಕಾ ತಯಾರ್ ಜಾಯ್ಜಾಯ್ ಮತಿಂತ್ ಕಸಲಿಂಚ್ ಚಿಂತ್ನಾಂ ಆಟಂವ್ಕ್ ನಜೊ. ಮ್ಹಾಕ ಘಟ್ಟ್ ಧೈರ್ ಆಸಾ, ಆಖ್ಯಾ ಪ್ರಾಂತ್ಯಾಂತ್ ತುಮಿಂ ಪಯ್ಲಿಂ ಸ್ಥಾನಾಂ ಜೊಡ್ತೆಲ್ಯಾತ್ ಮ್ಹಣ್"
ಮೆಲ್ವಿನಾ ಬರಾಬರ್ ಸಿಲ್ವಿಯಿ ಕ್ಲಾಸಿಭಾಯ್ರ್ ಆಯ್ಲೆಂ. ಕಿತೆಂ ಉಲಂವ್ಚೆಂ ಕಳಾನಾಸ್ತಾಂ, ಮೆಲ್ವಿನ್ ಲಜೆ ಭಿಂಯಾನ್ ಸಿಲ್ವಿಕ್ ದೆಖ್ತಾಲೊ. ಉತ್ರಾಂ ಮೆಳಾನಾಸ್ತಾಂ ಲಜೆನ್ ಸಿಲ್ವಿಯಿ ತಾಕಾಚ್ ಪಳೆಂವ್ಕ್ಲಾಗ್ಲೆಂ. ತಾಂಚೆ ಚ್ಯಾರ್ ದೊಳೆ ಏಕ್ ಜಾತಾನಾ, ಮೆಲ್ವಿನಾನ್ ದೀಷ್ಟ್ ಬಲತ್ಕಾರಾನ್ ಧರ್ಣಿಕ್ ಜೊಕ್ಲಿ.
"ತುಕಾ ಖಂಯ್ ವಚೊಂಕ್?" ವ್ಹಳೂ ತೆಂ ಉಲೈಲೆಂ.
"ಮಾಹಿಮ್.." ಗಾಗೆಲೊ ತೊ.
"ಹಾಂ.....ಹಾಂವೀ ಮಾಹಿಮ್ ರಾವ್ತಾಂ. ಮಾಹಿಮ್ ಖಂಯ್ಸರ್?"
"ಕೆಡಲ್ ರೋಡ್...." ಮೆಲ್ವಿನ್ ಮತಿಂತ್ಚ್ ಹಾಸ್ತಾಲೊ.
"ಹಾಂ.....ಕೆಡಲ್ ರೋಡಾರ್? ಹಾಂವೀ ಥಂಯ್ಚ್ ರಾವ್ತಾಂ."
ಮೆಲ್ವಿನಾಕ್ ಆನಿಂ ಲಿಪಂವ್ಕ್ ಜಾಲೆಂನಾ. ತಾಣೆಂ ಆಪ್ಲೆಂ ಠಿಕಾಣೆ ಸಾಂಗ್ಲೆಂ. ಆಯ್ಕೊನ್ ಸಿಲ್ವಿನ್ ಉದ್ಗಾರ್ ಸೊಡ್ಲೊ - "ಮೈ ಗೊಡ್... ಆಮಿಂ ಸೆಜಾರಿ! ಹಾಂವ್ ಎದೊಳ್ ನೆಣಾಸ್ಲ್ಲಿಂ. ಕಿತೆಂ ಹೆಂ ವಿಚಿತ್ರ್.."
ಮೆಲ್ವಿನ್ ಅಮ್ರುಕೊ ಹಾಸ್ಲೊ.
’ತುಕಾ ಜರ್ ಬೆಜಾರ್ ಜಾಯ್ನಾ, ಮ್ಹಜ್ಯಾಚ್ ಕಾರಾಚೆರ್ ಚಲ್ಯಾಂಗಿ ಮೆಲ್ವಿನ್?" ಮಧುರ್ ತಾಳ್ಯಾನ್ ಸಿಲ್ವಿನ್ ವಿಚಾರ್ಲೆಂ.
ಮೆಲ್ವಿನ್ ಘುಸ್ಪುಡ್ಲೊ - ಸಿಲ್ವಿಚ್ಯಾ ಆಪೊವ್ಣ್ಯಾಕ್ ಕಿತೆಂ ಸಾಂಗ್ಚೆಂ ತೆಂ ಕಳಾನಾಸ್ತಾಂ ನಾ......ಆಪ್ಣೆಂ ತಾಚ್ಯಾ ಸಾಂಗಾತಾ ವೆಚೆಂ ಬಎಂ ನಹಿಂ. ಥೊಡ್ಯಾ ವಳ್ಕಿನ್ ಚಡಿತ್ ಸಳಾವಳ್ ಆಧಾರ್ಚಿ ಬರಿ ನ್ಹಹಿಂ.
"ಚಿಂತ್ತಾಯ್ ಕಿತೆಂ? ಯೆಂವ್ಕ್ ಲಜ್ ದಿಸ್ತಾಗಿ ಮೆಲ್ವಿನ್?"
ನಿಜಾಕೀ ಲಜೆನ್ ಹಾಸ್ಲೊ ಮೆಲ್ವಿನ್. ಆಸ್ಥಿರ್ ತಾಳ್ಯಾನ್ ತೊ ಮ್ಹಣಾಲೊ - "ನಾ....ತುಕಾ ಭೆಷ್ಟೆಂಚ್ ತೊಂದ್ರೆ ಜಾತೆಲೆ ಮಿಸೆಸ್.."
ಏಕ್ ಘಡಿ ಸಿಲ್ವಿ ಬಾವ್ಲೆಂ. ಉಪ್ರಾಂತ್ ಅಮ್ರುಕೆಂ ಹಾಸೊನ್ ಮ್ಹಣಾಲೆಂ - "ಹಾಂವ್ ಸಿಲ್ವಿ........ತುವೆಂ ಮ್ಹಾಕಾ ನಾಂವಾನ್ ಆಪೈಲ್ಯಾರ್ ಮ್ಹಾಕಾ ಬೆಜಾರ್ ಜಾಯ್ನಾ. ಮೆಲ್ವಿನ್ ಚಲ್, ಮ್ಹಜ್ಯಾ ಕಾರಾರ್ ಆಯಿಲ್ಲ್ಯಾಂತ್ ಮ್ಹಾಕಾ ಕಾಂಯ್ ಚಡಿತ್ ಖರ್ಚ್ ಜಾಂವ್ಚೊನಾ. ಯಾ, ಚಲ್ಯಾಂ.."
ಆನಿಂ ನಿರಾಕರ್ಸುಂಕ್ ತಾಕಾ ಜಾಲೆಂನಾ. ತೊ ಸಿಲ್ವಿಚ್ಯಾ ಕಾರಾಚೆರ್ ಬಸ್ಲೊ. ಸಿಲ್ವಿನ್ ಕಾರ್ ಸ್ಟಾರ್ಟ್ ಕರ್ನ್ ಮಾಹಿಮ್ ಕುಶಿಕ್ ಧಾಂವ್ಡಾಯ್ಲೆಂ
"ತುಜಿ ವಳೊಕ್ ಜಾಲ್ಲಿ ನಿಜಾಕೀ ಮಹತ್ವಾಚಿ ಗಜಾಲ್ ಮೆಲ್ವಿನ್..." ಉಲೈಲೆಂ ತೆಂ.
"ಹಾಂ....ಕಿತ್ಯಾಕ್ ಹಾಬಾ.....?" ಮೆಲ್ವಿನಾಕ್ ವಿಜ್ಮಿತ್ ಜಾಲೆಂ
"ತುಂ ಹುಶಾರ್ ಗಾವ್ಪಿ ಮೆಲ್ವಿನ್. ದೆವಾನ್ ತುಕಾ ರಂಗೀತ್ ತಾಳೊ ದಿಲಾ. ಆನಿಂ ಹೆರಿ ದೆಣೆಂ ಸಕ್ಡಾಂಕ್ ಆಸಾನಾ"
"ತುಂ ಮ್ಹಾಕಾ ಚಡಿತ್ ಪ್ರಶಂಸಾ ದಿತಾಯ್ ಸಿಲ್ವಿ......." ಭಾರಾಧಿಕ್ ತಾಳ್ಯಾನ್ ತೊ ಉಲೈಲೊ "ಜೆಂ ಕಿತೆಂ ಜೀವನಾಂತ್ ಮ್ಹಾಕಾ ಲಾಭ್ಲಾಂ, ತಾಂತುಂ ಘಡಿಯೆಚೊ ಸಂತೊಸ್ ಮಾತ್ರ್ ಹಾಂವೆಂ ದೆಖ್ಲಾ. ಹಾಂವ್ ಏಕ್ ಕಿರ್ಕೊಳ್ ಮನಿಸ್. ಸಂಗೀತಾಂತ್ ಹಾಂವ್ ಏಕ್ ಬಾಳ್ ಆನಿಂ ತಾಂತುಂ ಪರಿಣತಾ ಹಾಂವೆಂ ಜೊಡಿಜಾಯ್ ಜಾಲ್ಯಾರ್ ಮ್ಹಜೆತಸಲೆ ಧಾ ಜಣ್ ಮೆಲ್ವಿನ್ ಜಲ್ಮೊಂಕ್ಜಾಯ್.."
ಮೆಲ್ವಿನಾಚಿಂ ಉತ್ರಾಂ ಅನಿಂ ತ್ಯಾ ತಾಳ್ಯಾಂತ್ ಝಳ್ಕೊಂಚಿ ನಿರಾಶಾ ಸಿಲ್ವಿಚ್ಯಾ ಗಮನಾಕ್ ವೆತಾನಾ ತೆಂ ವಿಜ್ಮಿತ್ ಜಾಲ್ಲೆಂ. ಮೆಲ್ವಿನಾಕ್, ಕಿತೆಂಗಿ ಸವಾಲ್ ಕರುಂಕ್ ತೆಂ ಚಿಂತ್ತಾಲೆಂ, ತರೀ ತಾಕಾ ಜಾಲೆಂನಾ. ಕಿತ್ಯಾಕ್ ಗಂಭೀರ್ ಮುಖ್ ಘೆವ್ನ್, ಮೆಲ್ವಿನ್ ಭಾಯ್ರ್ ತಿಳ್ತಾಲೊ. ಮತಿಂತ್ ತಾಚ್ಯಾ ಜೆಸ್ಸಿಚಿಂಚ್ ಚಿಂತ್ನಾಂ ಅಸ್ಲ್ಲಿಂ. ತವಳ್ ತವಳ್ ಸೊಡ್ಚೊ ದೀರ್ಘ್ ಶ್ವಾಸ್ ಸೊಡ್ಲ್ಯಾರ್, ದುಸ್ರೊ ಆವಾಜ್ ನಾ. ಕಳ್ವಳ್ಲ್ಲೆಂ ಸಿಲ್ವಿಯಿ ಉಲೈಲೆಂನಾ. ದುಸ್ರ್ಯಾ ಸಂದರ್ಭಾರ್ ಉಲೈತೆಲಿಂ ಮ್ಹಣ್ ಚಿಂತುನ್, ಮೌನ್ಪಣಿ ತೆಂ ಕಾರ್ ಧಾಂವ್ಡಾಂವ್ಕ್ ಲಾಗ್ಲೆಂ.
ಮಾಹಿಮ್ ಅಯ್ಲೆಂ...
"ಹಾಂವ್ ದೆಂವ್ತಾಂ ಸಿಲ್ವಿಯಾ. ತುವೆಂ ದಿಲ್ಲ್ಯಾ ’ಲಿಫ್ಟಿಕ್’ ಥ್ಯಾಂಕ್ಸ್ ತುಕಾ..."
"ಅತಾಂತ್ ತುವೆಂ ಘರಾ ವಚೊಂಕ್ ನಜೊ..." ಹಾಸೊನ್ ತೆಂ ಮ್ಹಣಾಲೆಂ. ಕಾರ್ ಸಿಲ್ವಿಗೆಲ್ಯಾ ಬಂಗ್ಲ್ಯಾಚ್ಯಾ ಗೇಟಿಲಾಗಿಂ.
"ಕಿತೆಂ..?" ತೊ ವಿಜ್ಮಿತ್ ಪಾವ್ಲೊ.
ಸ್ವಷ್ಟ್ ಥರಾನ್ ಸಿಲ್ವಿ ಮ್ಹಣಾಲೆಂ - "ತುವೆಂ ಆತಾಂ ಆಮ್ಗೆರ್ ಯೇಂವ್ಕ್ ಜಾಯ್. ಪಾಪ್ಪಾನ್ ಮ್ಹಜ್ಯಾ ವತ್ತಾಯ್ ಕೆಲ್ಯಾ, ತುಕಾ ಆಜ್ ಆಪವ್ನ್ ಹಾಡುಂಕ್ ಜಾಯ್ ಮ್ಹಣ್. ಆನಿಂ ತುಜ್ಯಾ ಕಬ್ಲಾತೆಚಿ ಗರ್ಜ್ಯಿ ಮ್ಹಾಕಾ ದಿಸಾನಾ" ಆಶೆಂ ಸಾಂಗೊನ್ ಸಿಲ್ವಿನ್ ಕಾರ್ ಶೀದಾ ಗೇಟಿಂತ್ಲ್ಯಾನ್ ಬಿತರ್ ವ್ಹೆಲೆಂ ಆನಿಂ ಪೋರ್ಟಿಕೊಂತ್ ಉಬೆಂ ಕೆಲೆಂ.
ಮೆಲ್ವಿನಾಚಿಂ ತ್ಯಾ ವಗ್ತಾಚಿಂ ಭೊಗ್ಣಾಂ ತಾಕಾ ಆನಿಮ್ ದೆವಾಕ್ ಮಾತ್ರ್ ಕಳಿತ್. ತೊ ಶೆರ್ಮೆಲ್ಲೊ ಆನಿಂ ಸಂಪೂರ್ಣ್ ಮೊನೊ ಜಾಲ್ಲೊ.
(ಸಿಲ್ವಿಗೆರ್ ತಾಕಾ ಕಸಲೊ ಸತ್ಕಾರ್ ಮೆಳ್ಳೊ? ಆನಿಂ ತಾಂಗೆರ್ ತಾಕಾ ಆಪೈಲ್ಲೊ ಮತ್ಲಾಬ್ ತರೀ ಕಸಲೊ? ಸಿಂತಿ...ಜೆಸ್ಸಿ...ಅನಿಂ ಆತಾಂ ಸಿಲ್ವಿ.... ಹಿಂ ತೆಗಾಂ ಮೆಲ್ವಿನಾಚ್ಯಾ ಜೀವನಾಂತ್ ಕಸಲೊ ಪಾತ್ರ್ ಖೆಳ್ತಾತ್....? ಹ್ಯಾ ಸಮಸ್ಯಾಂಕ್ ಮಝೆಚಿ ಜಾಪ್ ಯೆಂವ್ಚ್ಯಾ ಅಂಕ್ಯಾಂತ್ ರಾಕೊನ್ ಆಸಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
