ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 14
ಆಜ್ ಥಾವ್ನ್ ಜೆಸ್ಸಿ ಆಪ್ಣಾಕ್ ಚುಕ್ಲೆಂ.....
ಕಸಲೆಂ ಕಠೋರ್ ನಶಿಬ್! ಮುಖಾರ್ ಕಿತೆಂ ವಾಟ್? ಮೊಳ್ಬಾರ್ ಮಿಣ್ಮಿಣ್ಚ್ಯಾ ನೆಕೆತ್ರಾಂನಿ ತಾಕಾ ಕಸಲಿಯ್ ಜಾಪ್ ದಿಲಿನಾ. ವ್ಹಾಳ್ಚ್ಯಾ ಕ್ಷೀಣ್ ವಾರ್ಯಾನ್ ತಾಕಾ ಕಸಲೆಂಯ್ ಸಮಾಧಾನ್ ಹಾಡ್ಲೆಂನಾ. ಆನಿಂ ತ್ಯಾ ರಸ್ತ್ಯಾಚ್ಯಾ ದೊನೀ ಕುಶಿಂನಿ ಮೌನ್ ಉಬೆ ರಾವೊನ್ ಆಸ್ಚ್ಯಾ ರುಕಾಂ ವಯ್ರ್ ಏಕ್ ಖೊಲಿಯಿ ಹಾಲ್ಲಿನಾ.
’ಚಲ್.......ವ್ಹೊ ಗಾಂವ್ ಸೊಡ್ನ್ ಖಂಯ್ ತರೀ ಪೋಳ್ನ್ ಧಾಂವ್.....’ ತಾಚೆಂ ಅಂತಸ್ಕರ್ನ್ ಬೋಬ್ ಮಾರ್ನ್ ಸಾಂಗ್ತಾಲೆಂ. ಆವಯ್ ಬಾಪಾಯ್ಕ್, ಭಾವಾಕ್, ಇಷ್ಟಾಂಕ್ ಕೊಲೆಜಿಕ್ ಆನಿಂ ಸಕ್ಕಡ್ ಸಾಂಡುನ್ ಖಂಯ್ ಪುಣಿ ಧಾಂವಾಜಾಯ್. ಪುಣ್ ಖಂಯ್ಸರ್?
’ಜೆಸ್ಸಿ ತುಜ್ಯಾ ಜೀವನಾಂತ್ ಲಿಪ್ಲಾಂ ಮೆಲ್ವಿನ್. ಆನಿಂ ಕಿತೆಂ ಉರ್ಲಾಂ? ತುಜೆಂ ಜೀವನ್ ವ್ಯರ್ಥ್ ಆತಾಂ. ತುಂ ವಾಂಚೊನ್ ಪ್ರಯೋಜನ್ ನಾ. ವ್ಯರ್ಥ್ ಜೀವನ್ ಸಾರ್ನ್, ತುಜೆಂ ಮುಖ್ ಘೆವ್ನ್ ಹಾಂಗಾಸರ್ ವಾಂಚ್ಚ್ಯಾಕೀ, ದೊಳ್ಯಾಂ ಭಾಯ್ಲ್ಯಾ ಗಾವಾಂತ್ ಭಿಕ್ ಮಾಗೊನ್ ತರೀ ದೀಸ್ ಕಾಡ್. ಚಲ್........ ಚಲ್ ಹಾಂಗಾಚೊ..’
’ಖಂಯ್ ವೆಚೆಂ? ಮ್ಹಜ್ಯಾ ಮಾಂಯ್ಕ್ ಆನಿಂ ಬಾಬಾಕ್ ಕಷ್ಟಾಂತ್ ಸಾಂಪ್ಡಾವ್ನ್, ತಾಂಕಾಂ ನಿರ್ಗತಿಕ್ ಕರ್ನ್ ಹಾಂವ್ ಧಾಂವೊಗಿ?’
’ನಿರ್ಗತಿಕ್ ತಿಂ ನ್ಹಂಯ್, ಬಗಾರ್ ತುಂ..... ಜೆಸ್ಸಿ ನಾತ್ಲ್ಲೆಂ ಜೀವನ್ ತುಜೆಂ ಸೆಮಿತ್ರೆಂತ್ಲ್ಯಾ ಫಾತ್ರಾಚ್ಯಾಕೀ ಪಾಸ್ಟ್. ಆನಿಂ ಏಕ್ ಘಡಿ ತುಕಾ ಹ್ಯಾ ಗಾಂವಾಂತ್ ರಾವೊಂಕ್ ಸಾಧ್ಯ್ ಜಾಯ್ತ್ ಗಿ?
"ವ್ಹಯ್......ಕಿತೆಂ ಹಾಂವ್ ಕರುಂ?....’ ಚಿಂತ್ನಾಂನಿ ಭರ್ಲ್ಲಿ ಮತ್ ಘೆವ್ನ್ ದೊಳ್ಯಾಂತ್ಲಿಂ ದುಃಖಾಂ ಪುಸಿತ್ತ್ ತೊ ಘರ್ಚಿ ವಾಟ್ ಧರ್ನ್ ಚಲ್ತಾಲೊ. ರಸ್ತ್ಯಾಚೆ ವೀಜ್ ದಿವೆಯಿ ಪಾಲ್ವೊನ್, ಮೆಲ್ವಿನಾಚ್ಯಾ ಅಂಧ್ಕಾರಿ ಜಿಣಿಯೆಕ್ ತಾಳ್ ದಿತಾಲೆ. ತೊ ಕಷ್ಟಾಂನಿ ಆಪ್ಲ್ಯಾ ಘರಾಲಾಗಿಂ ಪಾವ್ಲೊ. ತ್ಯಾ ಕ್ಷಣಾ......ಕೊಣೆಂಗಿ ಎಕಾಚ್ಚಾಣೆ ತಾಚ್ಯಾ ಹಾತಾಕ್ ಧರ್ನ್ ವ್ಹೊಡ್ಲೆಂ. ಮೆಲ್ವಿನ್ ಕಾಂಪ್ಲೊ ಆನಿಂ ಆಂಗ್ ಕಾಡುಂಕ್ಲಾಗ್ಲೊ. ವ್ಹೊಡ್ಲ್ಯಾನ್ ಬೊಬ್ ಮಾರುಂಕ್ ತಾಣೆಂ ಚಿಂತ್ಲೆಂ.......ಪುಣ್, "ಮೆಲ್ವಿನ್" ಮ್ಹಣ್ ಶೀನಾಚೊ ಕ್ಷೀಣ್ ತಾಳೊ ಆಯ್ಕಾತಾನಾ ತಾಚಿ ಜೀಬ್ ಬಂಧ್ ಪಡ್ಲಿ. ತೆವ್ಶಿಲ್ಯಾನ್ ಸಿಂತಿಗೆಲ್ಯಾ ಘರಾಂತ್ ಘಡಿಯಾಳ್ ಇಕ್ರಾ ವೊರಾಂ ಜಾಲಿಂ ಮ್ಹಣ್ ಪಾಚಾರ್ತಾಲೆಂ.
"ಕೋಣ್, ಶೀನಾ?"
"ಹುಶ್......ವ್ಹಳೂ ಉಲಯ್. ತುಕಾ ತೀನ್ ವೊರಾಂಥಾವ್ನ್ ಹಾಂವ್ ರಾಕ್ತಾಂ. ಸಬಾರ್ ಪಾವ್ಟಿಂ ಶಿಲೊಣ್ಯೊ ಘಾಲ್ಯೊ ತರೀ, ತುಜೊ ಪತ್ತೊ ನಾ. ಅಖ್ರೇಕ್, ಇಕ್ರಾ ಜಾತಾನಾ ತರೀ ಆಯ್ಲೊಯ್ ನ್ಹಂಯ್ವೇ?" ಆಪ್ಣಾಚಿಂ ಉತ್ರಾಂ ಕೊಣೀ ಆಯ್ಕಾತಿತ್ ಮ್ಹಳ್ಳ್ಯಾ ಭಿಂಯಾನ್ ವ್ಹಳೂ ಉಲೈತಾಲೊ ತೊ.
"ಹ್ಯಾ ರಾತಿಂ ಮ್ಹಾಕಾ ಸೊದ್ಚಿ ತಸಲಿ ವ್ಹೊಡ್ ಗರ್ಜ್ ಕಸಲಿ ಶೀನಾ?" ಬಾರಿಕ್ ತಾಳ್ಯಾನ್ ಉಲೈಲೊ ಮೆಲ್ವಿನ್.
"ಯೆ, ಸಾಂಗ್ತಾಂ. ಆಮಿಂ ಸೆಮಿತ್ರೆಂತ್ ಚಲ್ಯಾಂ" ಆಶೆಂ ಸಾಂಗೊನ್ ಶೀನಾನ್ ಮೆಟಾಂ ಕಾಡ್ಲಿಂ. ಮೆಲ್ವಿನಾಕ್, ಶೀನಾಚಿಂ ಹಿಂ ಉತ್ರಾಂ ಆಯ್ಕೊನ್ ಕಲ್ಲ್ ಜಾಲೆಂ. ಶೀನ ಸಾಂಗೊಂಕ್ ಸೊದ್ತಾ ಜಾಲ್ಯಾರೀ ಕಿತೆಂ? ಖಂಯ್ಚಾಚ್ ಸಂದರ್ಭಾರ್ ಪುಣಿ ರಾತಿಂ ಯೇವ್ನ್ ಆಪ್ಣಾಕ್ ತೊ ಮೆಳ್ಲ್ಲೊನಾ. ಆನಿಂ ಆತಾಂ ಸೆಮಿತ್ರೆಂತ್ ಬಸೊನ್ ಉಲಂವ್ಕ್ ಕಿತೆಂ ಆಸಾ? ತರಿಕ್ಯಿ ಸಬ್ದ್ ಕಾಡಿನಾಸ್ತಾಂ ಶೀನಾಚೊ ತಾಣೆಂ ಪಾಟ್ಲಾವ್ ಕೆಲೊ.
ಮೊಳ್ಬಾರ್ ಲ್ಹಾನ್ ನೆಕೆತ್ರಾಂ ಮಿಣ್ಮಿಣೊನ್ ಪ್ರಥ್ವೆಕ್ ಪಳೆವ್ನ್ ಹಾಸ್ತಾಲಿಂ, ಶಿವಾಯ್ ಚಂದ್ರೆಮಾಚಿ ಝಳಕ್ ನಾತ್ಲ್ಲಿ. ನೆಕೆತ್ರಾಂಚ್ಯಾ ಬಾರಿಕ್ ಉಜ್ವಾಡಾಕ್ ವಸ್ತು ಅಸ್ವಷ್ಟ್ ದಿಸ್ತಾಲ್ಯೊ. ಪ್ರಥ್ವಿರ್ ಕೊಣಾಚಿಚ್ ಜಾಗ್ಮಾಗ್ ನಾತ್ಲ್ಲಿ. ಪಯ್ಸ್ ಪೆಟೆ ಘೊಂಕ್ಚೊ ಸಬ್ದ್ ಮಾತ್ರ್ ತವಳ್ ತವಳ್ ಆಯ್ಕಾತಾಲೊ. ತ್ಯಾ ಭಿರಾಂಕುಳ್ ಥಂಡಾಯೆಕ್ ಕಿಡಿ ಮುಯಾಂಚೊ ಸಬ್ದ್ - ’ಆಮಿಂ ಮಾತ್ರ್ ಹ್ಯಾ ಸಂಸಾರಾಂತ್ ಜಾಗಿಂ ಆಸಾಂವ್’ - ಆಶೆಂ ಸಾಂಗ್ತಾಸೊ ದಿಸ್ತಾಲೊ. ಆಸಲ್ಯಾ ವೆಳರ್ ಸೆಮಿತ್ರೆಂತ್ ವಚೊಂಕ್ ಚಿಲ್ಲರ್ ಧೈರ್ ಪಾವಾನಾತ್ಲ್ಲೆಂ. ಪುಣ್ ಶೀನ ಜಿವ್ಯಾಂಕ್ ತಶೆಂ ಮೆಲ್ಲ್ಯಾಂಕ್ಯಿ ಭಿಯೆಂವ್ಚೊ ಮನಿಸ್ ನ್ಹಂಯ್. ಆನಿಂ ಮೆಲ್ವಿನ್.......ಜೆಸ್ಸಿಕ್ ಹೊಗ್ಡಾಯಿಲ್ಲ್ಯಾ ತಾಕಾ ಜಿವಾಚಿಚ್ ಪರ್ವಾ ನಾತ್ಲ್ಲೊ.
ಸೆಮಿತ್ರೆಂತ್ ಪಾವ್ತಚ್ ಶೀನ ಕಾಳೊಕಾಚ್ಯಾ ಕೊನ್ಶಾಂತ್ ಆಸ್ಚ್ಯಾ ಪೊಂಡಾ ವಯ್ರ್ ಬಸ್ಲೊ. ಮೆಲ್ವಿನ್ಯಿ ಆವಾಜ್ ನಾಸ್ತಾಂ ತಾಚ್ಯಾ ಕುಶಿನ್ ಬಸ್ಲೊ.
"ಮೆಲ್ವಿನ್.." ತಗ್ಸಾಲ್ಲ್ಯಾ ಸ್ವರಾನ್ ಶೀನಾನ್ ಸಾಂಗ್ಲೆಂ" ಹಾಂವೆಂ ಫಾಲ್ಯಾಂ ಬೊಂಬಯ್ ವೆಚಿ ಆಲೋಚನ್ ಕೆಲ್ಯಾ"
"ಕಿತ್ಯಾಕ್...ಕಿತೆಂ ಜಾಲೆಂ?" ವಿಜ್ಮಿತ್ ಜಾವ್ನ್ ಮೆಲ್ವಿನಾನ್ ವಿಚಾರ್ಲೆಂ.
ತೊ ಹಾಸ್ಲೊ. ತಶೆಂ ಬೊಲ್ಸಾಂತ್ಲಿ ಏಕ್ ಸಿಗ್ರೆಟ್ ಕಾಡ್ನ್ ತಾಣೆಂ ಪೆಟೈಲಿ ಆನಿಂ ಏಕ್ ಮೆಲ್ವಿನಾಕ್ ದಿಲಿ.
"ಮ್ಹಾಕಾ ನಾಕಾ....ಆಯ್ಚ್ಯಾ ದಿಸಾ ಸಿಗ್ರೆಟ್ ಹಾಂವ್ ವೊಡಿನಾ. ’ವ್ಹಳೂ ಉಲಯ್, ಕೊಣೀ ಪಳೆತಿತ್’ ಮ್ಹಣ್ ಮ್ಹಾಕಾ ಸಾಂಗ್ಚ್ಯಾ ತುಕಾ ಸೆಮಿತ್ರೆಂತ್ ಸಿಗ್ರೆಟ್ ಪೆಟಂವ್ಕ್..."
"ಓ.......ಕೊಣಿ ಪಳೆತಿತ್ ಮ್ಹಣ್ತಾಯ್ಗಿ? ಸೆಮಿತ್ರೆಂತ್ ಕಾಂಯ್ ಭ್ಯೆಂ ನಾ. ಮೆಲ್ಲ್ಯಾಂಚಿ ಚೂಡ್ ಮ್ಹಣ್ ಚಿಂತ್ತೆಲೆ. ಮೆಲ್ವಿನ್..." ಏಕ್ ಮಿನುಟ್ ತೊ ನಿಶ್ಶಬ್ದ್ ರಾವ್ಲೊ. ಸವ್ಕಾಸ್ ಬೊಲ್ಸಾಂತ್ಲೆಂ ಕಿತೆಂಗಿ ಭಾಯ್ರ್ ಕಾಡ್ಲೆಂ ಶೀನಾನ್ - "ಪಳೆ ಮೆಲ್ವಿನ್...."
"ಕಿತೆಂ? ಮ್ಹಾಕಾ ದಿಸಾನಾ...."
ತಾಣೆಂ ಕಾಡಿ ಪೆಟಯ್ಲಿ ಆನಿಂ ತ್ಯಾ ಉಜ್ವಾಡಾಂತ್ ಮೆಲ್ವಿನಾನ್ ದೆಖ್ಲೆಂ ಆನಿಂ ತಾಚೆ ದೊಳೆ ಸ್ತಬ್ದ್ ರಾವ್ಲೆ. ತೊಂಡಾಂತ್ಲ್ಯಾನ್ ’ಹಾಂ!’ ಮ್ಹಳ್ಳೊ ಉದ್ಗಾರ್ ಭಾಯ್ರ್ ಪಡ್ಲೊ. ಧಾ ರುಪಿಯಾಂಚ್ಯೊ ಸಬಾರ್ ಆಟ್ಟ್ಯೊ ತಾಕಾ ದಿಸ್ಲ್ಯೊ...ಶೀನಾಲಾಗಿಂ ಇತ್ಲೆ ಪೈಸೆ!
’ಪಾಂಚ್ ಹಜಾರ್ ಮೆಲ್ವಿನ್" ಮ್ಹಣಾಲೊ ಶೀನಾ ಹಾಸೊನ್, "ಸವ್ಕಾರ್ ಪಾವ್ಲ್ ಶೆಟಿಚಾ ಖಜಾನಾಕ್ ಧಾಡ್ ಘಾಲ್ನ್ ನಿಕ್ಳಾಯ್ಲೊ ಹಾಂವೆಂ.
"ಚೊರ್ಲೆಂಯ್...! ದೆವಾ ಮ್ಹಜ್ಯಾ!!" ಹಾಂಕ್ರೆಲೊ ಮೆಲ್ವಿನ್.
ಆತಾಂ ದೆವಾಕ್ ಉಲೊ ಕರಿನಾಕಾ. ಹಿ ಖಬಾರ್ ಸಗ್ಳ್ಯಾನ್ ಆತಾಂ ವಿಸ್ತಾರ್ತೆಲಿ. ಪೊಲಿಸ್ ಸೊಧ್ನೆಕ್ ಯೆತಾನಾ ಹಾಂವ್ ಸಾಂಪಾಡ್ಚೊ ಸಂಭವ್ ಆಸ್ತೊಲೊ. ದೆಕುನ್ಂಚ್ ತುಕಾ ಹಾಂವ್ ಸಾಂಗೊಂಕ್ ಆಯಿಲ್ಲೊಂ. ಫಾಲ್ಯಾಂ ಸಕಾಳಿಂ ಬೊಂಬಯ್ ಧಾಂವ್ತಾಂ ಹಾಂವ್"
ಮೆಲ್ವಿನಾಕ್ ಕಿತೆಂ ಉಲಂವ್ಚೆಂ ಕಳ್ಳೆಂನಾ.
"ಮೆಲ್ವಿನ್, ಉಲೈನಾಂಯ್ ಕಿತ್ಯಾಕ್? ಧರ್, ಹಾಂತ್ಲೆ ಪಾಂಯ್ಶಿಂ ರುಪಯ್ ತುಂ ಘೆ. ಚತ್ರಾಯೆನ್ ಸಾಂಬಾಳ್" ಶೀನಾನ್ ನೊಟಾಂಚ್ಯಾ ಆಟ್ಟೆಕ್ ಹಾತ್ ವ್ಹೆಲೊ. ತಕ್ಷಣ್ ಮೆಲ್ವಿನಾನ್ ತಾಕಾ ಆಡಾಯ್ಲೆಂ.
"ಮೆಲ್ವಿನ್ .....ಪಿಶ್ಯಾಂಬರಿ ಕಿತೆಂ ಕರ್ತಾಯ್ ತುಕಾ ಪಯ್ಶೆ ನಾಕಾ ಮ್ಹಣ್ತಾಯ್? ಉಲಯ್ ಮ್ಹಳ್ಯಾರ್ ಉಲೈನಾಂಯ್! ತುಕಾ ಆಜ್ ಜಾಲಾಂ ಕಿತೆಂ? ತಾಚ್ಯಾ ಮತಿಂತ್ ಕಸಲೊ ವಿಚಾರ್ ಲಾಗ್ಲಾ?"
"ಶೀನಾ...." ನಿಮಾಣೆಂ ಮೆಲ್ವಿನ್ ಉಲೈಲೊ, "ಮ್ಹಜಿ ಸ್ಥಿತಿ ತುಂ ಜಾಣಾಸ್ಲ್ಲೊಯ್ ತರ್, ತುಂ ಆಶೆಂ ವಿಚಾರ್ತೊನಾಂಯ್!" ಏಕ್ ಕ್ಷಣ್ ರಾವ್ತಾನಾ ಮೆಲ್ವಿನಾಚ್ಯಾ ಮತಿಂತ್ ಕಿತೆಂಗಿ ಆಲೋಚನ್ ಆಯ್ಲಿ. "ತುವೆಂ ಬೊಂಬಯ್ ವೆಚೆಂ ಖಂಡಿತ್ಗಿ ಶೀನಾ?"
"ವ್ಹಯ್...... ಕಿತ್ಯಾಕ್?" ವಿಜ್ಮಿತ್ ಜಾಲೊ ಶೀನಾ, "ಥಂಯ್ ಜಾಲ್ಯಾರ್ ಪೊಲಿಸಾಂಚ್ಯಾ ಹಾತಾಂತ್ಲೆಂ ಹಾಂವೆಂ ಚುಕಾರಿ ಮಾರ್ಯೆತ್. ಹಾಂಗಾ ರಾವ್ಲ್ಯಾರ್ ಶೀದಾ ಜಯ್ಲಾಚೆಂ ದಾರ್ ಪಳೆಂವ್ಚೆಂ ಪಡ್ತೆಲೆಂ."
"ಥಂಯ್ಸರ್ ಕೊಣಾ ಸರ್ಶಿಂ ರಾವ್ತಾಯ್?"
"ರಾಜು ಮ್ಹಳ್ಳೊ ಮ್ಹಜೊ ಮಿತ್ರ್ ಬೊಂಬಯ್ ಆಸಾ. ವ್ಹೊಡ್ಲ್ಯಾ ಕಂಪೆನಿಂತ್ ಬರ್ಯಾ ಹುದ್ದ್ಯಾರ್ ತೊ ಆಸಾ"
"ಶೀನಾ ತುಜೊ ಈಷ್ಟ್ ಥೊಡ್ಯಾ ತೆಂಪಾಕ್ ಮ್ಹಾಕಾಯಿ ತಾಚೆ ಸರ್ಶಿಂ ಆಸ್ರೊ ದೀತ್ಗಿ?" ಧರ್ಣಿಕ್ ದೀಷ್ಟ್ ಜೊಕುನ್ ಮೆಲ್ವಿನಾನ್ ವಿಚಾರ್ಲೆಂ.
"ರಾಮಾ!! ತುಕಾ ಜಾಲಾಂ ಕಿತೆಂ? ಘರ್ ಸೊಡ್ನ್ ಧಾಂವ್ಚೊ ಪ್ರಸಂಗ್ ಕಿತೆಂ ಆಯ್ಲಾ ತುಕಾ. ನಾ, ತುಂ ಆಜ್ ಹುಶಾರ್ನಾಂಯ್. ಹಾಂವೆಂ ತವಳ್ಚ್ ತುಕಾ ಪಾರ್ಕಿಲಾಂ" ಶೀನಾನ್ ಮ್ಹಳೆಂ.
ಮೆಲ್ವಿನ್ ರಡ್ಲೊ. ಪಯ್ಲೆಂಚ್ ರಡೊನ್ ರಡೊನ್ ತಾಚೆ ದೊಳೆ ಸುಜ್ಲ್ಲೆ. ಆತಾಂ ಪರ್ತ್ಯಾನ್ ಖಳ್ಮಿತ್ ನಾಸ್ತಾಂ ದುಃಖಾಂ ತಾಚ್ಯಾ ದೊಳ್ಯಾಂತ್ಲ್ಯಾನ್ ವ್ಹಾಳ್ಳಿಂ.
"ಮೆಲ್ವಿನ್, ರಡ್ತಾಯ್ ಕಿತ್ಯಾಕ್? ರಡಾನಾಕಾ ಇಷ್ಟಾ. ಸಾಂಗ್ ಕಿತೆಂ ಜಾಲೆಂ?" ಶೀನಾನ್ ಮೆಲ್ವಿನಾಚ್ಯಾ ಭುಜಾರ್ ಹಾತ್ ದವರ್ಲೊ.
ಕುಡ್ಕ್ಯಾ ಉತ್ರಾಂನಿ ಮೆಲ್ವಿನಾನ್ ಸಗ್ಳಿ ಗಜಾಲ್ ಸಾಂಗ್ಲಿ. ತಾಚಿ ಕಾಣಿ ಆಖೇರ್ ಜಾತಾ ವರೇಗ್ ಥಂಡ್ ರಾವ್ಲ್ಲೊ ಶೀನಾ ಉಪ್ರಾಂತ್ ಚುರ್ಚುರೊನ್ ಮ್ಹಣಾಲೊ - "ಛೆ, ನಿಜಾಯ್ಕಿ ಹಾಂವ್ ಬಿರ್ಮೊತ್ ಪಾವ್ತಾಂ ತುಜೆಥಂಯ್. ಮುಖಾರ್ ಕಿತೆಂ ಕರ್ತಾಯ್ ಮೆಲ್ವಿನ್?"
"ಕಿತೆಂಯ್ ನಿರ್ಣಯ್ ಕರ್ಚ್ಯಾ ಸ್ಥಿತೆರ್ ಹಾಂವ್ ನಾ ಶೀನಾ ಪಳೆ ಮ್ಹಜೆಂ ಕಾಳಿಜ್ ಶಿಂದೊನ್ ಗೆಲಾಂ. ಮ್ಹಜೊ ಫುಡಾರ್ ನಿರ್ಣಾಮ್ ಜಾಲಾ. ಹಾಂವೆಂ ವಾಂಚ್ಚೆಂ ತರೀ ಕಿತ್ಯಾಕ್ ಶೀನಾ? ಸಗ್ಳೆಂ ಮ್ಹಜೆಂ ಜೀವನ್ ರಡೊಂಕ್ಗಿ? ವ್ಹಯ್, ಚಡ್ ಕಾಳ್ ಹಾಂವ್ಯಿ ವಾಂಚಾಸೊನಾ"
"ಪಿಶ್ಯಾ, ತಶೆಂ ಉಲೈನಾಕಾ" ಹಳ್ತಾಚೊ ಧೆಂಕ್ಣೊ ಮಾರ್ಲೊ ಶೀನಾನ್, "ಜೀವನ್ ಮ್ಹಳ್ಯಾರ್ ಕಿತೆಂ ಸುಖಾ ಸಂತೊಸಾಚೆಂ ಸದನ್ ಮ್ಹಣ್ ಚಿಂತ್ತಾಯ್ಗಿ? ತುವೆಂ ಚಿಂತ್ಲ್ಲೆಂಯ್, ತುಜೆಂ ಭವಿಷ್ಯ್ ಸಂತೊಸಾಚೆಂ ಜಾತೆಲೆಂ ಮ್ಹಣ್. ಪುಣ್ ಆತಾಂ ತಿಂ ಚಿಂತ್ನಾಂ ಫಟ್ಕಿರಿಂ ಮ್ಹಣ್ ತುಕಾ ಕಳ್ಳ್ಯಾಂತ್. ವೊತೊನ್ ಗೆಲ್ಲ್ಯಾ ದೂದಾಕ್ ರಡೊನ್ ಕಿತೆಂ ಫಾಯ್ದೊ? ತುವೆಂ ತುಜೆಂ ದುಃಖ್ ಸಾಂಡಿಜಾಯ್...
"ಸಾಂಡ್ಚೆಂ ಕಶೆಂ ಶೀನಾ? ಕುಡ್ಡೆಪಣ್ ಕಿತೆಂ ತೆಂ ಕಳಾಜಾಯ್ ತುವೆಂ. ಮ್ಹಜೆ ದುಃಖ್ ವಿಸ್ತಾರ್ ಸಾಗೊರಾಬರಿ. ಆನಿಂ ಹಾಂವ್ ಸಾಂಪಡ್ಲೊಲೊ ನಿರ್ಗತಿಕ್ ಯಾತ್ರಿಕ್. ಖಂಯ್ಚ್ಯಾ ವೆಳಾರ್ ಹಾಂವ್ ಬುಡಾನ್ ಮ್ಹಣ್ ಹಾಂವ್ಚ್ ನೆಣಾ. ಪುಣ್ ಮ್ಹಾಕಾ ಬುಡೊಂಕ್ ಚಡ್ ವೇಳ್ ಲಾಗ್ಚೊನಾ" ಸುಸ್ಕಾರ್ಚೊ ಮೆಲ್ವಿನ್.
ಹೆಂ ತತ್ವಜ್ಞಾನ್ ಆಜ್ ತುಕಾ ಆಯಿಲ್ಲ್ಯಾಂತ್ ಮ್ಹಾಕಾ ನವಾಲ್ ದಿಸಾನಾ" ಸಿಗ್ರೆಟಿಚೆಂ ಮುಳ್ಖಾಟ್ ಮಸ್ತುನ್ ಶೀನ ಮ್ಹಣಾಲೊ. "ಪುಣ್, ತುಜೆಸ್ಥಕಿಂ ಇತ್ಲೆಂ ಚಿಂತುನ್ ಪಳೆ. ಏಕ್ ನಾಣೆಂ ಜರ್ ತರ್ ತುಂ ವಯ್ರ್ ಉಡೈತಾಯ್, ತಾಚೆಂ ಖಂಯ್ಚೆಂ ಮುಖ್ ವಯ್ರ್ ಜಾವ್ನ್ ಪಡ್ತಾ ತೆಂ ತುಂ ಸಾಂಗೊಂಕ್ ಸಕ್ಶಿಗಿ?"
"ನಾ..." ಫಿಂರ್ಗಾಲೊ ತೊ.
"ಬಾವಾ, ತಶಿಚ್ ಆಮ್ಚಿ ಜೀಣ್. ಕಷ್ಟಾಂಚ್ಯಾ ಅಂತಿಮ್ ಪಾಂವ್ಡ್ಯಾಕ್ ಪಾವ್ತಾನಾ, ಸಂತೊಸ್ ಚಡ್ ಪಯ್ಸ್ ನಾ ಮ್ಹಣ್ ಸಮಜ್. ಮುಖಾಚ್ಯಾ ಸಾವ್ಳೆಂತ್ ಆಸ್ಲ್ಲ್ಯಾ ತವಳ್ ದುಃಖ್ ಚಡ್ ಪಯ್ಸ್ ನಾ ತೆಂ ಉಗ್ಡಾಸ್ ದವರ್. ಏಕ್ ಮನಿಸ್ ಉದ್ಕಾಂತ್ ದೆಂವ್ಲಾ ತರ್, ಉಪ್ಯೆಂವ್ಕ್ ಕಿತ್ಯಾಕ್ ತಾಣೆಂ ಬಿಂಯೆಜಾಯ್? ಜೀವನಾಕ್ ಭಿಯೆಂವ್ಚೆಂ ಅಸ್ಕತ್ಯಾಂನಿ, ರಡ್ಕುರ್ಯಾಂನಿ ನ್ಹಂಯ್ ತುಜೆ ತಸಲ್ಯಾ ತರ್ನಾಟ್ಯಾನ್. ಶಿಕ್ಪಿ ಭುರ್ಗ್ಯಾನ್ " ಶೀನಾ ಧಮ್ಕುನ್ ಉಲೈಲೊ.
ತಾಚ್ಯಾ ಸವಾಲಾಕ್ ಕಿತೆಂ ಜಾಪ್ ದಿಂವ್ಚಿ ಕಳ್ಳೆಂನಾ ಮೆಲ್ವಿನಾಕ್. ಗಾಗೆವ್ನ್ ತೊ ಇತ್ಲೆಂ ಮ್ಹಣಾಲೊ. "ಶೀನಾ...ತುವೆಂ ಸಾಂಗ್ಚೆಂ ಸಾರ್ಕೆಂ ಜಾವ್ಯೆತ್. ಪುಣ್, ಮ್ಹಜೆಂ ದುಃಖ್ ಸದ್ದ್ಯಾಕ್ ಥಾಂಬ್ಚೆಂ ನ್ಹಂಯ್. ದೆಕುನ್ ಥೊಡ್ಯಾ ತೆಂಫಾಕ್ ಪುಣಿ ಹಾಂವೆಂ ಹೊ ಗಾಂವ್ ಸೊಡ್ನ್ ಚಲಾಜಾಯ್. ಹಾಂವ್ಯಿ ತುಜೆ ಸಾಂಗಾತಾ ಬೊಂಬಯ್ ಯೆತಾಂ"
ಶೀನಾ ಚಿಂತುಂಕ್ ಪಡ್ಲೊ. ಉಪ್ರಾಂತ್ ತಕ್ಲಿ ಹಾಲವ್ನ್ ಮ್ಹಣಾಲೊ - "ವ್ಹಯ್, ಆತಾಂ ಸದ್ದ್ಯಾಕ್ ತೆಂಚ್ ಬರೆಂ ದಿಸ್ತಾ ಮ್ಹಾಕಾ. ನ್ಹಂಯ್ ತರ್, ಜೀವ್ಘಾತ್ ಕರುಂಕ್ ತರಿ ತುಂ ಪಾಟಿಂ ಸರ್ಚೊನಾಂಯ್. ಬರೆಂ, ತುಂಯ್ ಯೆ ಮ್ಹಜ್ಯಾ ಸಾಂಗಾತ್"
ಮೆಲ್ವಿನಾನ್ ದೀರ್ಘ್ ಶ್ವಾಸ್ ಸೊಡ್ಲೊ.
"ಪಾಲ್ಯಾಂ ಫಾಂತ್ಯಾರ್ ಚ್ಯಾರ್ ವ್ಹಾಜ್ತಾನಾ ಲೇಡೀಹಿಲ್ಲ್ ಬಸ್ಸ್ಟೆಂಡಾಂತ್ ಮ್ಹಾಕಾ ಮೇಳ್. ಪಾಂಚ್ ವೊರಾಂಚ್ಯಾ ಕಡೂರ್ ವೆಚ್ಯಾ ಬಸ್ಸಾರ್ ಆಮಿಂ ಬಸೊಂಕ್ ಜಾಯ್. ತುಜಿ ಮುಸ್ತಾಯ್ಕಿ, ವಸ್ತುರ್ ಸಗ್ಳೆಂ ಪೆಕ್ ಕರ್."
"ಮೆಲ್ವಿನಾನ್ ತಕ್ಲಿ ಹಾಲೈಲಿ. ಶೀನಾಕ್ ಆದೇವ್ಸ್ ಮಾಗೊನ್ ಘರಾ ಚಲ್ಲೊ ತೊ.
ಘರಾ ಪಾವ್ತಾನಾ, ಕೊಣಾಚಿಚ್ ಜಾಗ್ ಮಾಗ್ ನಾತ್ಲ್ಲಿ. ವಿತೊರಾಬ್, ಜಿಲ್ಲಿಬಾಯ್ ಆನಿಂ ಲೆನ್ಸಿ ನಿದ್ರೇಸ್ತ್ ಜಾಲ್ಲಿಂ. ಅವಯ್ಕ್ ಉಟೈಲ್ಯಾರ್ ಆತಾಂ ಆಪ್ಣಾಚಿ ತನ್ಖಿ ಜಾತೆಲಿ ಮ್ಹಣ್ ತಾಕಾ ಸುಸ್ತಾಲ್ಲೆಂ. ತಾಕಾ ಭುಕ್ಯಿ ನಾತ್ಲ್ಲಿ. ತಾಣೆಂ ಸೊಪ್ಯಾಕ್ ಲಾಗೊನ್ ಆಸ್ಚ್ಯಾ ಆಪ್ಲ್ಯಾ ಕುಡಾಚೆಂ ಬಾಗಿಲ್ ಉಗಡ್ಲೆಂ. ತ್ಯಾ ಕಾಳೊಕಾಂತ್ ಸಾಸ್ಪೊನ್ ಚಿಮ್ಣಿ ಸೊದ್ಲಿ ಆನಿಂ ಪೆಟೈಲಿ. ಆಪುಣ್ ಆಯ್ಲಾಂ ಮ್ಹಣ್ ಘರ್ಚ್ಯಾಂಕ್ ಕಳಾತ್ ಮ್ಹಳ್ಳ್ಯಾ ಭಿಂಯಾನ್ ದಿವೊ ಲ್ಹಾನ್ ಕೆಲೊ ಆನಿಂ ಬಾಗ್ಲಾಚಿ ಖಿಳ್ ಘಾಲಿ. ಆನಿಂ ಹಾಂತುಳ್ನಾರ್ ಪಡೊನ್ ತೊ ನಿಯಾಳ್ನ್ ರಡೊಂಕ್ ಲಾಗ್ಲೊ.
ಆಜ್ ಸಾಂಗಾನಾಸ್ತಾನಾ ಘರ್ ಸಾಂಡುನ್ ವೆಚಿ ಆಲೋಚನ್ ಕೆಲ್ಯಾ ಆಪ್ಲೆ. ಪುಣ್ ಆಪ್ಲ್ಯಾ ಮೊಗಾಳ್ ಆವಯ್ಕ್ ಆನಿಂ ಬಾಪಾಯ್ಕ್ ಕಿತೆಂ ಬೊಗಾತ್? ಲ್ಹಾನ್-ವ್ಹಡ್ ಕರ್ನ್ ಆಜ್ ಹ್ಯಾ ಸ್ಥಿತೆಕ್ ಆಪ್ಣಾಕ್ ಪಾವಯಿಲ್ಲ್ಯಾ, ಕಷ್ಟಾಂನಿ ತರೀ ಕೊಲೆಜಿಚೆಂ ಶಿಕಾಪ್ ಆಪ್ಣಾಕ್ ದಿಂವ್ಚ್ಯಾ ತಾಂಕಾಂ ಸೊಡ್ನ್ ವೆಚೊ ಕೆದೊ ವ್ಹಡ್ಲೊ ಗುನ್ಯಾಂವ್! ಪುತಾನ್ ಬರ್ಯಾ ವಾಟೆಕ್ ಪಾವಾಜಾಯ್ ಮ್ಹಣ್ ಆಪ್ಲಿಂ ಹಾಡಾಂ ಝರಂವ್ಚೊ ತೊ ಬಾಪುಯ್...... ಆತಾಂ ತಾಚ್ಯಾ ತೊಂಡಾರ್ ಮಿರಿಯೊ ಪಡ್ಲ್ಯಾತ್., ಕೇಸ್ ಧೊವ್ಶೆ ಜಾಲ್ಯಾತ್, ಅಂಗಾಂತ್ ಅಸ್ಕತ್ಕಾಯ್ ಭರೊನ್ ಆಯ್ಲ್ಯಾ. ಆನಿಂ ತಿ ಆವಯ್......ಕಿತ್ಲೆಶ್ಯಾ ಪಾವ್ಟಿಂ ಆಪುಣ್ ಪೊಟಾಕ್ ಖಾಯ್ನಾಸ್ತಾಂ ಆಪ್ಣಾಕ್ ತಿಣೆ ವಾಡ್ಲಾಂ. ಆಪ್ಲೊ ಪೂತ್ ಮ್ಹಳ್ಯಾರ್, ಜಿಣಿಯೆಂತ್ ಆಪ್ಣಾಕ್ ಲಾಭ್ಲೆಲೆಂ ಮಹಾ ದಿರ್ವೆಂ ಮ್ಹಣ್ ತಿ ಪಾತ್ಯೆವ್ನ್ ಆಸಾ. ದೊಗಾಂಯ್ ಭರ್ವಶ್ಯಾಚೆ ದೊಳೆ ಆಪ್ಣಾಚೆರ್ ಫಾಂಕೊವ್ನ್, ಆಶೆನ್ ರಾವ್ಲ್ಯಾಂತ್. ’ಏಕ್ ದೀಸ್ ಆಪ್ಲಿ ದುಬ್ಳಿಕಾಯ್ ಪಯ್ಸ್ ಸರ್ತೆಲಿ, ಹೆ ಸದಾಂಚೆ ಕಷ್ಟ್ ನಿವಾರ್ತೆಲೆ. ಪೂತ್ ಕಾಮಾಕ್ ಪಾವ್ತೊಲೊ, ಉಪ್ರಾಂತ್ ಕಸಲಿಚ್ ಖಂತ್ ನಾ....’ ಹಾ, ಕಸಲಿ ತಾಂಚಿ ಆಶಾ ಆನಿಂ ಆಜ್ ಆಪುಣ್..? ಕೊಲೆಜಿಚೆಂ ದಾರ್ ಚಡ್ತಾನಾ ’ಮ್ಹಜ್ಯಾ ಆವಯ್ ಬಾಪಾಯ್ಕ್ ಎಕಾ ದಿಸಾ ಸುಖಾ ಸಂತೊಸಾಚ್ಯಾ ಪಾಂವ್ಡ್ಯಾರ್ ವರ್ತೊಲೊಂ’ ಮ್ಹಣ್ ನಿಚೆವ್ ಕೆಲ್ಲ್ಯಾ ಆಪ್ಣೆ, ಆಜ್ ಮೊಗಾಂತ್ ನಿರಾಶಿ ಜಾವ್ನ್, ಶಿಕಾಪ್ ಆನಿಂ ಘರ್ ಸೊಡ್ನ್ ಧಾಂವ್ಚೆಂ ಪಡ್ಲಾಂ. ಕಸಲೊ ಕ್ರೂರಿ ಹಾಂವ್...?’ ನಿಯಾಳ್ತಾನಾ ಮೆಲ್ವಿನಾಕ್ ದುಃಖ್ ಉಮಾಳೊನ್ ಆಯ್ಲೆಂ. ತಾಚಿಂ ಖತ್ಕತಿಂ ದುಃಖಾಂ ಉಶ್ಯಾರ್ ಜಿರೊನ್ ಗೆಲಿಂ.
’ತರೀ ಘರಾ ಹಾಂವೆಂ ಜಿಯೆಂವ್ಕ್ ಸಾಧ್ಯ್ ನಾ. ಜೆಸ್ಸಿ ನಾತ್ಲ್ಲ್ಯಾ ಹ್ಯಾ ಗಾಂವಾಂತ್ ಜಿಯೆಲೊಂ ತರ್ ಹಾಂವ್ ಪಿಸೊ ಜಾತೊಲೊಂ. ಮ್ಹಜೆಂ ಶಿಕಾಪ್ ವಾಯ್ಟ್ ಜಾತೆಲೆಂ. ಹರ್ಯೇಕಾಂತ್ ನಿರುತ್ಸಾಹ್ ಬೊಗ್ತೊಲೊ. ಮ್ಹಜ್ಯಾ ಮಾಂಯ್ ಬಾಬಾ ಮುಖಾರ್ ಹಾಂವೆಂ ಆಶೆಂ ಜೀವಂತ್ ಕರ್ಗೊನ್ ತಾಂಕಾಂ ಆನಿಕೀ ವ್ಹಡ್ ಬೆಜಾರಾಯೆಕ್ ಘಾಲ್ಚೆಂ ನಾಕಾ. ತಾಂಚ್ಯಾ ದೊಳ್ಯಾಂ ಭಾಯ್ರ್ ಖಂಯ್ ಜಾಲ್ಯಾರೀ ದೆದೆಸ್ಫಾರ್ ಜಾವ್ನ್ ಹಾಂವ್ ಭಂವ್ಲ್ಯಾರೀ ಪರ್ವಾನಾ..’ ಮೆಲ್ವಿನ್ ಆಫ್ಣಾ ಇತ್ಲ್ಯಾಕ್ಚ್ ಮ್ಹಣಾಲೊ.
ಆತಾಂ ತೊ ಉಟ್ಲೊ. ಲ್ಹಾನ್ಶ್ಯಾ ಎಕಾ ಪೆಟೆಂತ್ ಆಪ್ಲಿ ಮುಸ್ತಾಯ್ಕಿ ಸಗ್ಳಿ ಭರ್ಲಿ ಆನಿಂ ಗರ್ಜೆಚ್ಯೊ ವಸ್ತುಯಿ ಘೆತ್ಲ್ಯೊ. ಬಾರಾ ವೊರಾಂ ವ್ಹಾಜ್ತಾನಾ ತಾಚೆಂ ಪೆಕಿಂಗ್ ತಿರ್ಸಾಲ್ಲೆಂ.
ಫಾಲ್ಯಾಂ ಸಕಾಳಿಂ ಆಪುಣ್ ನಾತ್ಲ್ಲೆಂ ಕಳೊನ್ ಘರ್ಚಿಂ ಘಡ್ಬಡ್ತೆಲಿಂ. ಉಪ್ರಾಂತ್ ತಿಂ ಸೊಧ್ನೆಕ್ ಲಾಗ್ತೆಲಿಂ. ತಾಂಕಾಂ ಆನಾವಶ್ಯೆ ಕಷ್ಟ್ ದೀಂವ್ಕ್ ನಜೊ.......ತಾಣೆಂ ಎಕ್ ಕಾಗದ್ ಘೆತ್ಲೆಂ ಆನಿಂ ಆಶೆಂ ಬರಂವ್ಕ್ ಪ್ರಾರಂಭ್ ಕೆಲೆಂ.
"ಮ್ಹಜ್ಯಾ ಪ್ರೀತಿವಂತ್ ಮಾಂಯ್ ಆನಿಂ ಬಾಬಾಕ್,
ದಯಾ ಕರ್ನ್ ಹ್ಯಾ ನಿರ್ಭಾಗಿ, ಕ್ರೂರಿ ಪುತಾಕ್ ಭೊಗ್ಶಿಯಾ. ಆಜ್ ಹಾಂವ್ ತುಮ್ಕಾಂ ಕಳೊಂವ್ಕ್ ಸಾಧ್ಯ್ ನಾ ಆಸ್ಚ್ಯಾ ಎಕಾ ಕಾರಣಾಕ್ ಲಾಗೊನ್ ಘರ್ ಸೊಡ್ನ್ ಚಲ್ತಾಂ. ಮ್ಹಜ್ಯಾ ಹ್ಯಾ ಕರ್ನೆ ವರ್ವಿಂ ತುಮ್ಕಾಂ ದುಃಖ್ ಜಾತೆಲೆಂ, ತೆಂ ಹಾಂವ್ ಜಾಣಾ. ಪುಣ್, ಮ್ಹಜೆರ್ ಆಯಿಲ್ಲೆಂ ಅನ್ವಾರ್ ತುಮಿಂ ನೆಣಾಂತ್. ತೆಂ ಜರ್ ಸಾಂಗ್ಲ್ಯಾರ್, ತುಮಿಂ ಮ್ಹಾಕಾ ಕಾಂಟಾಳ್ತೆಲ್ಯಾತ್. ತರೀ, ತುಮ್ಕಾಂ ಆವ್ಮರ್ಯಾದ್ ಹಾಡ್ಚೆಂ ಕಸಲೆಂಯ್ ಕಾಮ್ ಹಾಂವೆಂ ಕರುಂಕ್ ನಾ. ಹಾಂವ್ ಸಂಪೂರ್ಣ್ ನಿರಾಪ್ರಾಧಿ. ಪುಣ್, ನಶಿಬಾಚ್ಯಾ ಕ್ರೂರ್ ಹಾತಾಂತ್ ಮ್ಹಜೆಂ ಜೀವನ್ ಪಿಡ್ಡ್ಯಾರ್ ಜಾಲಾಂ.
ತುಮಿಂ ಮ್ಹಾಕಾ ಸೊಧುಂಕ್ ಪ್ರಯತ್ನ್ ಕರಿನಾಕಾತ್. ಮ್ಹಜೆ ಖಾತಿರ್ ಮಾಗಾ. ತುಮ್ಚ್ಯಾ ಮಾಗ್ಣ್ಯಾನ್, ಖಂಯ್ ಆಸ್ಲ್ಯಾರೀ ಹಾಂವ್ ಬರೊ ಜಾವ್ನ್ ಆಸ್ತೊಲೊಂ. ಆನಿಂ ಮಜ್ಯಾ ಮತಿಕ್ ಜರ್ ಸಮಾಧಾನ್ ಮೆಳ್ಳೆಂ, ಹಾಂವ್ ತುಮ್ಕಾಂ ಕಾಗದ್ ಬರೈತೊಲೊಂ ಆನಿಂ ಗಾಂವಾಕ್ ಪಾಟಿಂ ಯೆತೊಲೊಂ.
ಆದೇವ್ಸ್ ತುಮ್ಕಾಂ. ಲೆನ್ಸಿಕ್ ಮ್ಹಜೊ ಮೋಗ್ ಆನಿಂ ಭೆಸಾಂವ್. ತುಮ್ಚೆಂ ಬೆಸಾಂವ್ ಮ್ಹಾಕಾ ದಿಯಾ.
ನಿರ್ಭಾಗಿ ತುಮ್ಚೊ ಪೂತ್,
ಮೆಲ್ವಿನ್"
ರಡೊನ್ಂಚ್ ತಾಣೆಂ ತೆಂ ಕಾಗದ್ ಮೆಜಾರ್ ದಿಸಾ ಸಾರ್ಕ್ಯಾ ಜಾಗ್ಯಾರ್ ದವರ್ಲೆಂ.
ತಾಕಾ ಗಿಬ್ಬಾಚೊ ಉಗ್ಡಾಸ್ ಆಯ್ಲೊ. ಭಾವಾ ಸಾರ್ಕ್ಯಾ ತ್ಯಾ ಇಷ್ಟಾಕ್ ಸಾಂಡೂನ್ ವಚಾಜಾಯ್. ತಾಕಾಯಿ ಏಕ್ ಸಬ್ದ್ ಸಾಂಗೊಂಕ್ ಆಪ್ಣಾಕ್ ಅಸಾಧ್ಯ್ ಜಾಲಾಂ. ಗಿಬ್ಬಾ ಖಂಡಿತ್ ಜಾವ್ನ್ ಖಂತ್ ಪಾವ್ತೊಲೊ...
ಆನಿಂ ಆತಾಂ ವೇಳ್ ಪಾಶಾರ್ ಜಾಲೊ. ಮೆಲ್ವಿನ್ ಬಸ್ಲ್ಲ್ಯಾ ಕಡೆಚ್ ಪಾಕ್ಯಾಕ್ ದೀಷ್ಟ್ ಲಾವ್ನ್ ಚಿಂತ್ತಾಲೊ. ನಿಮಾಣೆ ವೊರಾಂ ಚ್ಯಾರ್ ವ್ಹಾಜ್ಲಿಂ. ಲಾಂಬ್ ಏಕ್ ಶ್ವಾಸ್ ತಾಣೆಂ ಸೊಡ್ಲೊ ಆನಿಂ ಟ್ರಂಕ್ ಹಾತಿಂ ಘೆತ್ಲೆಂ. ಕುಡಾಚೆಂ ಬಾಗಿಲ್ ಹಾಳ್ವಾಯೆನ್ ಉಗ್ತೆಂ ಕರ್ನ್ ತೊ ಭಾಯ್ರ್ ಆಯ್ಲೊ.
ಜ್ಯಾಲಾಂತ್ ರಾವೊನ್ ಘರಾಚೆರ್ ದೀಷ್ಟ್ ವರ್ತಾನಾ ಭುರ್ಗ್ಯಾಪರಿಂ ರಡ್ಲೊ ತೊ. "ಥೂ......ಆಪ್ರಾಧಿ ತುಂ. ಬಿರ್ಮೊತ್ ಆವಯ್ - ಬಾಪಾಯ್ಚೆಂ ರುಪ್ಣೆಂ ತಾಚ್ಯಾ ದೊಳ್ಯಾಂ ಮುಖಾರ್ ಆಯ್ಲೆಂ. ತಾಂಕಾಂ ಮುಖಾರ್ ಭೊಗುಂಕ್ ಆಸ್ಚೆ ಕಷ್ಟ್ ತಾಚ್ಯಾ ನಿಯಾಳಾಕ್ ಆಯ್ಲೆ. ವೆಚೆಂ ವ ನಾಕಾ..? ಹ್ಯಾ ಚಿಂತ್ನಾಂಚ್ಯ ಭಾರಾಕ್ ಕಳ್ವಳ್ಳೊ ತೊ. ಆಖ್ರೇಕ್, ಆನಿಂ ರಾವ್ಲ್ಯಾರ್ ಮನ್ ಬದ್ಲಾತ್ ಮ್ಹಳ್ಳ್ಯಾ ಭಿಂಯಾನ್ ತಾಣೆಂ ವೆ-ವೆಗಿಂ ಮೆಟಾಂ ಕಾಡ್ಲಿಂ. ಆನಿಂ ಘರಾ ವಯ್ರ್ ನಿಮಾಣೆಂ ದೀಷ್ಟ್ ಲಾವ್ನ್ ತೊ ಚಲ್ಲೊ. ಭಾರಾಧಿಕ್ ಜಾಲ್ಲ್ಯಾ ಪಾಯಾಂನಿ.
"ಮೆಲ್ವಿನ್..." ಲೇಡಿ ಹಿಲ್ಲ್ ಬಸ್ಸ್ ಸ್ಟೆಂಡಾಲಾಗಿಂ ಪಾವ್ತಾನಾ ಶೀನಾನ್ ತಾಕಾ ಉಲೊ ಕೆಲೆಂ.
"ಆಯ್ಲೊಂ ಶೀನಾ" ಜಾಪ್ ದಿಲಿ ಮೆಲ್ವಿನಾನ್.
"ಆಮಿಂ ಸರಾರಾಂ ಚಲ್ಯಾಂ. ನಾ ತರ್, ಬಸ್ಸಾಕ್ ತಡವ್ ಜಾಯ್ತ್"
ದೊಗೀ ಸರಾರಾಂ ಮೆಟಾಂ ಕಾಡುಂಕ್ ಲಾಗ್ಲೆಂ. ಮೆಲ್ವಿನಾಕ್ ಟ್ರಂಕಾಚಿ ಜಡಾಯ್ ಲಾಗ್ತಾಲಿ. ತಾಚೆ ಸಾಂಗಾತಾ ರಾತ್ ಸಗ್ಳಿ ನೀದ್ ನಾಸ್ತಾಂ ಆನಿಂ ದುಃಖಾಚ್ಯಾ ಭರಾನ್, ತಾಚೆ ಪಾಂಯ್ ಸಮಾ ಪರ್ತಾನಾತ್ಲ್ಲೆ.
ಕಶೆಂಯ್, ವೆಳಾರ್ ಹಂಪನ್ಕಟ್ಟಾ ದೊಗೀ ಪಾವ್ಲೆ. ಶೀನಾನ್ ಬಸ್ಸಾಚಿ ಟಿಕೆಟ್ ಘೆತ್ಲಿ. ದೊಗೀ ಬಸ್ಸಾರ್ ಚಡ್ಲೆ...... ಮೆಲ್ವಿನಾನ್ ಆದೇವ್ಸ್ ಮಾಗ್ಲೊ ಜಲ್ಮಾಲ್ಲ್ಯಾ ಮಾಂಯ್ ಗಾಂವಾಕ್.
ಫಟ್ ಜಾಲ್ಲೆಂ ಸ್ವಪಾಣ್.....ಆನಿಂ ಜಾಲ್ಲಿಂ ಘಡಿತಾಂ ವಿಸ್ರೊಂಕ್ ತಾಣೆಂ ಗಾಂವ್ ಸೊಡ್ಲ್ಲೊ. ತಾಣೆಂ ವಿಸ್ರೊಂಕ್ ಆಸ್ಲ್ಲೆಂ ತೆಂ ನಿರ್ಭಾಗ್ಯಾಚೆಂ ಸ್ವಪಾಣ್......ಪುಣ್, ಮೆಲ್ವಿನ್ ಬಸ್ಸಾರ್ ಚಡೊನ್ ಬಸ್ತಾನಾ, ತ್ಯಾಚ್ ಪಾಂಚ್ ವೊರಾಂಚೆರ್ ಜಿಲ್ಲಿಬಾಯೆನ್ ದೆಖ್ಲೆಂ ಏಕ್ ಬಿರಾಂಕುಳ್ ಸ್ವಪಾಣ್...
ನಿದೆಂತ್ಲೆಂ ಮಾರ್ನ್ ಉಟೈಲ್ಲ್ಯಾಬರಿ ತಿ ಜಾಗಿ ಜಾಲಿ. ತಿಚೆಂ ಶರೀರ್ ಸಗ್ಳೆಂ ಕಾಂಪ್ತಾಲೆಂ. ಭಿಂಯಾನ್ ತಿಕಾ ಘಾಮ್ ಸುಟ್ಲ್ಲೊ. ತ್ಯಾ ಕಾಳೊಕಾಂತ್ ಏಕ್ ಘಡಿ ಪಾಕ್ಯಾಕ್ ದೀಷ್ಟ್ ಲಾವ್ನ್, ಸುಧಾರೊಂಕ್ ತಿಣೆಂ ಪಳೆಲೆಂ. ವ್ಹಡ್ಲ್ಯಾನ್ ಬೋಬ್ ಮಾರ್ನ್, ಘರ್ಕಾರಾಕ್ ಉಟೊಂವ್ಕ್ಯೊ ತಿಕಾ ಧೈರ್ ಆಯ್ಲೆಂನಾ. ಹಾ....! ಕಸಲೆಂ ಕ್ರೂರ್ ಸ್ವಪಾಣ್.......
ನಿದೆಂತ್ಲೆಂ ಮಾರ್ನ್ ಉಟೈಲ್ಲ್ಯಾಬರಿ ತಿ ಜಾಗಿ ಜಾಲಿ. ತಿಚೆ ಶರೀರ್ ಸಗ್ಳೆಂ ಕಾಂಪ್ತಾಲೆಂ. ಭಿಂಯಾನ್ ತಿಕಾ ಘಾಮ್ ಸುಟ್ಲ್ಲೊ. ತ್ಯಾ ಕಾಳೊಕಾಂತ್ ಏಕ್ ಘಡೀ ಪಾಕ್ಯಾಕ್ ದೀಷ್ಟ್ ಲಾವ್ನ್, ಸುಧಾರೊಂಕ್ ತಿಣೆಂ ಪಳೆಲೆಂ. ವ್ಹಡ್ಲ್ಯಾನ್ ಬೋಬ್ ಮಾರ್ನ್, ಘರ್ಕಾರಾಕ್ ಉಟೊಂವ್ಕ್ಯಿ ತಿಕಾ ಧೈರ್ ಆಯ್ಲೆಂನಾ. ಹಾ....! ಕಸಲೆಂ ಕ್ರೂರ್ ಸ್ವಪಾಣ್.
ತೊ ಏಕ್ ದೀಸ್ ಆಯ್ತಾರ್. ದನ್ಫಾರಾಂಚೆಂ ಜೆವಾಣ್ ಜಾತಚ್ ಸಕ್ಡಾಂ ಭಾಯ್ರ್ ಸೊಪ್ಯಾರ್ ಬಸೊನ್ ಆಸ್ಲ್ಲಿಂ. ಭಾರಿ ತೆಂಪಾ ಉಪ್ರಾಂತ್ ದೋನ್ ಥರಾಂಚೆಂ ಮಾಸ್ ತಾಂಗೆರ್ ಹಾಡ್ಲ್ಲೆಂ, ಆನಿಂ ಪೊಳಿಯಿ ಕೆಲ್ಲಿ. ವಿತೊರಾಬ್ ಆದ್ಲ್ಯಾ ದಿಸಾ ಬೋನಸ್ ಮೆಳ್ಲ್ಲೊ. ಆನಿಂ ತೊ ಆಯ್ತಾರ್ ತಾಂಕಾಂ ಸಂತೊಸಾಚೊ ಜಾಲ್ಲೊ.
"ಸಾಂಜೆರ್ ಖಂಯ್ ಭೊವೊಂಕ್ ವೆಚೆಂ ಜಿಲ್ಲಿ? ಆಜ್ ಸಕ್ಡಾಂ ಆಮಿಂ ಭಾಯ್ರ್ ಚಲ್ಯಾಂ. ಸಿನೆಮಾಕ್ ಯಾಗಿ? ವಿಚಾರ್ಲೆಂ ವಿತೊರಾಬಾನ್.
"ಸಿನೆಮಾ.....ಕಿತೆಂಗಿ, ಸಿನೆಮಾ ಮ್ಹಳ್ಯಾರ್ ಮ್ಹಾಕಾ ಬರೊಚ್ ಲಾಗಾನಾ. ದುಸ್ರೆ ಖಂಯ್ ತರೀ ಯಾ" ಜಿಲ್ಲಿಬಾಯೆನ್ ಮ್ಹಳೆಂ.
"ಮಾಂಯ್, ಸಿನೆಮಾಕ್ ಯಾ, ಸಿನೆಮಾ ಪಳೆಯಾಂ ಮಾಂಯ್" ಧಾಕ್ಟೊ ಲೆನ್ಸಿ ಬೋಬ್ ಮಾರುಂಕ್ ಲಾಗ್ಲೊ.
"ಕಹಲೊ ಸಿನೆಮಾರೆ? ಸಿನೆಮಾ ಮ್ಹಳ್ಯಾರ್ ತುಕಾ ಕಿತೆಂ ಗೊತ್ತುಂ? ದೆಂಕ್ಣೊಂ ಘಾಲೊ ಆವಯ್ನ್.
ಇತ್ಲೊ ವೇಳ್ ವೊಗೊಚ್ ಆಸ್ಲ್ಲ್ಯಾ ಮೆಲ್ವಿನಾನ್ ಆತಾಂ ಮ್ಹಳೆಂ - "ಸಿನೆಮಾಯಿ ನಾಕಾ, ಕಾಂಯ್ ನಾಕಾ. ಆಮಿಂ ತಂಡ್ರಬೈಲ್ ದರ್ಯಾ ತಡಿಕ್ ಚಲ್ಯಾಂ ಬಾಬಾ"
ತಾಚ್ಯಾ ಸೂಚನಾಚೆರ್ ಸಕ್ಡಾಂಚೆಂ ಪರ್ತ್ಯಾನ್ ತರ್ಕ್ ಜಾಲೆಂ. ಉಪ್ರಾಂತ್ ವಿತೊರಾಬ್ ದರ್ಯಾ ತಡಿಕ್ ವೆಚ್ಯಾಕ್ ಒಪ್ಲೊ.
ಸಾಂಜೆರ್ ಚೊವ್ಗಾಂಯಿ ದರ್ಯಾ ತಡಿಕ್ ಗೆಲಿಂ. ತಡಿರ್ ಜಮ್ಲ್ಲ್ಯಾ ಲೊಕಾ ಸಂಗಿಂ ಬಸೊನ್ ತಾಣಿಂ ಸಾಂಜೆಚೆಂ ಶೀತಳ್ ವಾರೆಂ ಸೆವ್ಲೆ. ಬುಡ್ಚ್ಯಾ ಸುರ್ಯಾಕ್ಯಿ ಪಳೆವ್ನ್ ಸಂತೊಸ್ ಪಾವ್ಲಿಂ.
ಥೊಡೆ ತರ್ನಾಟೆ ದರ್ಯಾಂತ್ ನ್ಹಾತಾಲೆ. ಮೆಲ್ವಿನಾಕ್ಯಿ ನ್ಹಾಂವ್ಕ್ ಮನ್ ಆಯ್ಲೆಂ. "ಹಾಂವ್ಯಿ ನಾತಾಂ ಬಾಬಾ" ತಾಣೆಂ ಬಾಪಾಯ್ಲಾಗಿಂ ಪರಾತ್ಲೆಂ.
"ಥಂಡ್ ಬಸ್ ಥಂಯ್...... ತುಜ್ಯಾ ಚರ್ಬೇ!" ಆವಯ್ನ್ ತಾಕಾ ಧಮ್ಕಿಲೆಂ.
"ದರ್ಯಾಂತ್ ಚಡ್ ಪಯ್ಸ್ ವೊಚಾನಾ ಮಾಂಯ್. ಖಾಲಿ, ತಡಿರ್ಚ್ ರಾವ್ತಾಂ: ತೊ ಆಶೆನ್ ಆವಯ್ಕ್ ಪರಾತ್ತುಂಕ್ ಲಾಗ್ಲೊ.
"ನಾಕಾರೆ ಮೆಲ್ವಿನ್..... ಬೆಷ್ಟೆಂಚ್ ಹಟ್ ಕರ್ಚೆಂ ಬರೆಂ ನ್ಹಂಯ್. ದರ್ಯಾಲಾಗಿಂ ಕೆದಾಳಾಯ್ ಖೆಳ್ ಖೆಳ್ಚೊ ನ್ಹಂಯ್" ಬಾಪಾಯ್ನ್ ಬೂದ್ ಬಾಳ್ ಸಾಂಗ್ಲಿಂ.
"ತೆ ಇತ್ಲೆ ಜಣ್ ಥಂಯ್ ನ್ಹಾತಾತ್. ಹಾಂವ್ ಕಾಂಯ್ ಎಕ್ಸುರೊ ನಾ. ಪಾಂಚ್ ಮಿನುಟಾಂ ಬಿತರ್ ಪಾಟಿಂ ಯೆತಾಂ" ತಾಣೆಂ ಆಶಾ ಸಾಂಡ್ಲಿನಾ.
ಆಖ್ರೇಕ್, ತಾಣಿ ಕಬ್ಲಾತ್ ದಿಲಿ. ಸಂತೊಸಾನ್ ಉಡೊನ್, ತೊ ಮುಸ್ತಾಯ್ಕಿ ಕಾಡ್ನ್, ಬಿತರ್ಲ್ಯಾ ಇಜಾರಾಚೆರ್ ನ್ಹಾಂವ್ಕ್ ಗೆಲೊ. ತ್ಯಾ ತರ್ನಾಟ್ಯಾಂ ಸಂಗಿಂ ಆಪುಣ್ಯಿ ಭರ್ಸೊನ್, ತಡಿರ್ ಪುಟ್ಚ್ಯಾ ಲಾರಾಂಕ್ ತಕ್ಲಿ ದೀಂವ್ಕ್ ಲಾಗ್ಲೊ. ಉದ್ಕಾಂತ್ ವಯ್ರ್ ಪಂದಾ ವಚೊನ್ ಖೆಳೊಂಕ್ ಪ್ರಾರಂಭ್ ಕೆಲೆಂ ಮೆಲ್ವಿನಾನ್.
ವೇಳ್ ಆಸೊಚ್ ಪಾಶಾರ್ ಜಾಲೊ. ಮೆಲ್ವಿನ್ ಆಫುಣ್ ನೆಣಾಸ್ಲ್ಲ್ಯಾ ಬರಿಚ್ ದರ್ಯಾಂತ್ ಮುಖಾರ್ ಮುಖಾರ್ ವೆತಾಲೊ. ತಾಚೆ ಸಾಂಗಾತಿ ಬೋವ್ ಪಾಟಿಂ ಉರ್ಲ್ಲೆ. ಪಳೆತಾಲ್ಯಾ ಆವಯ್ ಬಾಪಾಯ್ಕ್ ಭಿರಾಂತ್ ಉಟ್ಲಿ. ತಾಣಿ "ಮೆಲ್ವಿನ್!" ಮ್ಹಣ್ ವ್ಹಡ್ಲ್ಯಾನ್ ಆಪೊವ್ನ್, ಹಾತ್ ಭಾಸ್ ಕರ್ನ್ ತಾಕಾ ಪಾಟಿಂ ಆಪೈಲೆಂ. ಪುಣ್ ತಾಂಚ್ಯಾ ನಿಶ್ಯಾನ್ಯಾಂಕ್ ಗುಮಾನ್ ಕೆಲೆಂನಾ ಮೆಲ್ವಿನಾನ್ ತೊ ಅನಿಕಿಯಿ ಮುಖಾರ್ ವೆತಾಲೊ. ಆಖ್ರೇಕ್ .......ಸಕ್ಡಾಂ ಪಳೆವ್ನ್ ಆಸ್ಚ್ಯಾಬರಿಚ್, ಪಯ್ಸ್ ಥಾವ್ನ್ ಉಬ್ಜಾಲ್ಲೆಂ ಏಕ್ ಮಹಾ-ಲಾರ್, ವಾರ್ಯಾ ವೇಗಾನ್ ಯೇವ್ನ್ ಫುಟ್ಲಿಂ. ತಾಚ್ಯಾ ರಭಸಾನ್, ಉದಾಕ್ ವಯ್ರ್ ಉಡೊನ್ ಧೊವೊ ಪೆಂಡ್ ಯೆತಾನಾ ಮೆಲ್ವಿನ್ ಏಕ್ ಘಡಿ ಕೊಣಾಚ್ಯಾಚ್ ದೊಳ್ಯಾಂಕ್ ದಿಸ್ಲೊನಾ. ಉಪ್ರಾಂತ್ ಏಕ್ಚ್ ಕ್ಷಣ್, ತಾಚಿ ತಕ್ಲಿ ಝಳ್ಕಾಲಿ..ಉಪ್ರಾಂತ್....ತೊ ನಾಂಚ್ ಜಾಲೊ.
"ಹಾಯ್..ಮೆಲ್ವಿನ್...!" ಜಿಲ್ಲಿಬಾಯ್ ಅಕಾಂತಾನ್ ನಿದೆಂತ್ಲಿ ಉಟ್ಲ್ಲಿ. ತೆಂ ಭಿರಾಂಕುಳ್ ಸ್ವಪಣ್ ನಿಯಾಳ್ತಾನಾ, ತಿಚೆ ಧಡ್ದಡೆ ಅನಿಕೀ ಚಡೊನ್ ಯೆತಾಲೆ.
ಘರ್ಕಾರಾಕ್ ತಿಣೆಂ ಉಟಯ್ಲೆಂನಾ. ತಶೆಂಚ್ ದಿವೊ ವ್ಹೊಡ್ ಕರ್ನ್ ತಿ ಭಾಯ್ರ್ ಸೊಪ್ಯಾರ್ ಆಯ್ಲಿ. ಮೆಲ್ವಿನಾಚ್ಯಾ ಕುಡಾಚೆಂ ಬಗಿಲ್ ತಿಣೆಂ ಬಡೈಲೆಂ. ಬಾಗ್ಲಾಚಿ ಖಿಳ್ ಕಾಡ್ನ್ ಆಸ್ಲ್ಲ್ಯಾನ್, ತಿಣೆಂ ಲೊಟ್ಲ್ಲ್ಯಾ ಕ್ಷಣಾ ಉಗ್ತೆಂ ಜಾಲೆಂ. ತಿ ಬಿತರ್ ಸರ್ಲಿ, ತಶೆಂ ಮೆಲ್ವಿನಾಚ್ಯಾ ಖಟ್ಲ್ಯಾರ್ ದೀಷ್ಟ್ ವರ್ತಾನಾ ಮೆಲ್ವಿನ್ ದಿಸ್ಲೊ ನಾ. ತಿಕಾ ಕಾವ್ಜೆಣಿ ಭೊಗ್ಲಿ.
"ಜಿಲ್ಲಿ.....ಕಿತೆಂ ಜಾಲೆಂ?" ವಿತೊರಾಬಾಕ್ ಜಾಗ್ ಜಾಲ್ಲ್ಯಾನ್, ತೊಯಿ ಮೆಲ್ವಿನಾಚ್ಯಾ ಕುಡಾಕ್ ಆಯಿಲ್ಲೊ.
"ಮೆಲ್ವಿನ್ ದಿಸಾನಾ......" ತಿಚೊ ತಳೊ ರಡ್ಕುರೊ ಜಾಲ್ಲೊ.
"ಹುಂ.....ರಾತಿಂ ಯೇಂವ್ಕ್ಚ್ ನಾ ಮ್ಹಣ್ ದಿಸ್ತಾ. ಚೆಡ್ಯಾಕ್ ಬರಿ ಚರಾಬ್ ಮಾಂಡ್ಲ್ಯಾ. ಖಂಯ್ ವೆತೊಲೊ ತೊ? ಖಂಯ್ಚ್ಯಾಕೀ ಆಜ್ ಘರಾ ಯೇಂವ್ದಿ." ರಾಗಾನ್ ತೊ ಮ್ಹಣಾಲೊ.
"ಏಕ್ ದೀಸ್ ಪುಣಿ ಘರಾ ಭಾಯ್ರ್ ರಾವ್ಲ್ಲೊ ಭುರ್ಗೊ ನ್ಹಂಯ್ ತೊ. ದೆವಾ ಮ್ಹಜ್ಯಾ, ತಾಕಾ ಕಾಂಯ್ಪುಣಿ ಅವ್ಘಡ್...." ತಿಚ್ಯಾ ದೊಳ್ಯಾಂತ್ಲ್ಯಾನ್ ದುಃಖಾಂ ವ್ಹಾಳ್ಳಿಂ.
"ತುಂ ಏಕ್ ಕಿತ್ಯಾಕ್ ರಡ್ತಾಯ್ ಸಾಯ್ಬಿಣಿ? ಅವ್ಘಡ್......! ಅವ್ಘಡ್ ಕಿತ್ಯಾಚೆಂ? ಆತಾಂಚ್ಯಾ ತರ್ನಾಟ್ಯಾಂಕ್ ಬರಿ ಸಳ್ಗಿ ಮೆಳ್ಳ್ಯಾ. ಕೊಲೆಜಿಚೆಂ ದಾರ್ ಪಳೆಲ್ಯಾ ಉಪ್ರಾಂತ್ ಸಂಸಾರ್ಚ್ ಜಿಕ್ಲೊಂ ಮ್ಹಣ್ ಹಂಕಾರ್ ಯೆತಾ ಭುರ್ಗ್ಯಾಂಕ್. ಈಷ್ಟ್, ಸಿನೆಮಾ, ಭೊಂವ್ಡಿ ಮ್ಹಣ್ತಾನಾ ಘರ್ಚೊ ಉಗ್ಡಾಸ್ ತರೀ ಕಿತ್ಯಾಕ್ ಯೆತೊಲೊ? ಆವಯ್-ಬಾಪಾಯ್ಚಿ ಕಶಿಯ್ ಪರ್ವಾನಾ, ದೆವಾಚಿ ಭಿರಾಂತ್ ತ್ಯಾ ಫುಡೆಂನಾ"
ತುಂ ಏಕ್ ತಾಕಾ ಕಿತ್ಯಾಕ್ ದುರ್ಸಾತಾಯ್? ತಶೆಂ ಏಕ್ ದೀಸ್ ಪುಣಿ, ಘರ್-ದಾರ್ ಸಾಂಡುನ್ ತೊ ರಾವ್ಲ್ಲೊನಾ. ಆಜ್ ಚೆಡ್ಯಾಕ್ ಕಿತೆಂ ಜಾಲಾಂ ಕಳಾನಾಂಮೂ. ಹಾಯ್, ಹಾಂವ್ ಎಕ್ಲಿಂ ರಾತಿಂ ನಿದೊನ್ ಸಾಂಪಡ್ಲಿಂಮೂ ದೆವಾ!"
"ನಾ ತರ್ ಕಿತೆಂ, ಪುತಾಕ್ ಸೊಧುಂಕ್ ಭೊಂವೊಂಕ್ ವೆತೆಂಯ್ಗಿ ತುಂ? ಪಳೆ, ಹೆಂ ಅತಾಂ ಪ್ರಾರಂಭ್ ಮಾತ್ರ್. ಆನಿಂ ಕಿತೆಂ ಯೆಂವ್ಕ್ ಅಸಾ ಪಳೆ ತುಂ. ಆತಂಚೊ ಸಂಸಾರ್ ತುಂ ನೆಣಾಂಯ್ ಜಿಲ್ಲಿ"
ಜಿಲ್ಲಿಬಾಯೆಕ್ ಕಾಂಯ್ಚ್ ಸುಸ್ತಾಲೆಂನಾ. ಮುಖಾರ್ ಕಿತೆಂ ವಾಟ್ ಧರ್ಚಿ, ಪುತಕ್ ಸೊಧುನ್ ಖಂಯ್ ವೆಚೆಂ ತೆಂ ತಿಕಾ ಕಳ್ಳೆಂನಾ. ತಿ ಸಗ್ಳಿಚ್ ಕಂಗಾಲ್ ಜಾಲ್ಲಿ. ಘರ್ಕಾರಾಚಿಂ, ಸಮಾಧಾನೆಚಿಂ ಉತ್ರಾಂ ತಿಚೆಥಂಯ್ ಕಸಲಿಚ್ ಶಾಂತಿ ಹಾಡುಂಕ್ ಸಕ್ಲಿಂನಾಂತ್.
ಎಕಾಚ್ಚಾಣೆ, ವಿತೊರಾಬಾಚಿ ದೀಷ್ಟ್ ಮೆಜಾರ್ ಗೆಲಿ. ಉಗ್ತೆಂ ದಿಸಾ ಸಾರ್ಕೆಂ , ಮೆಲ್ವಿನಾನ್ ಬರವ್ನ್ ದವರ್ಲೆಲೆಂ ಕಾಗದ್ ದಿವ್ಯಾಚ್ಯಾ ಉಜ್ವಾಡಾಕ್ ತಾಚ್ಯಾ ನದ್ರೆಕ್ ಗೆಲೆಂ. ಕಪಾಲಾರ್ ಮಿರಿಯೊ ಘಾಲ್ನ್ ತೊ ಲಾಗಿಂ ಸರ್ಲೊ ಆನಿಂ ತೆಂ ಕಾಗದ್ ಕಾಂಪ್ಚ್ಯಾ ಹಾತಾಂನಿ ತಾಣೆಂ ವಿಂಚ್ಲೆಂ. ವಾಚ್ತಾನಾ, ತಾಚೆಂ ತೊಂಡ್ ವರ್ಣಾಂತರ್ ಜಾಲೆಂ ಆನಿಂ ಸಂಪೂರ್ಣ್ ವಾಚುನ್ ಜಾತಚ್, ತಕ್ಲೆಕ್ ಹಾತ್ ದೀವ್ನ್ ತೊ ಸರ್ಶಿಲ್ಯಾ ಕದೆಲಾರ್ ಗಳ್ಳೊ.
ಜಿಲ್ಲಿಬಾಯೆಕ್ ನಿಜಾಯ್ಕಿ ಸುಸ್ತಾಲ್ಲೆಂ, ಕಿತೆಂಗಿ ಘಡ್ಲಾಂ ಮ್ಹಣ್. ಘರ್ಕಾರಾಚ್ಯಾ ತೊಂಡಾರ್ ಆಶೆಚಿ ದೀಷ್ಟ್ ತಿಣೆ ಫಾಂಕ್ಲಿ. ತರೀ, ಮಿನುಟಾಂ ಪಾಶಾರ್ ಜಾಲಿಂ ಜಾಲ್ಯಾರೀ, ತಾಚೆ ಥಾವ್ನ್ ಜಾಪ್ ನಾತ್ಲ್ಲಿ ಪಳೆವ್ನ್, ತಿಚಿಂ ಅಂತರ್ಮಳಾಂ ಉಡ್ಲಿಂ.
"ಕಿತೆಂ ಜಾಲೆಂ? ಉಲೈನಾಂಯ್ ಕಿತ್ಯಾಕ್?" ಉಲೈತೆಲ್ಯಾ ತಿಚೊ ತಾಳೊ ತಿಕಾಚ್ ಆಯ್ಕಾಲೊ ನಾ ತಸೊ ಕ್ಷೀಣ್ ಜಾವ್ನ್ ಭಾಯ್ರ್ ಸರ್ಲೊ.
"ಮೆಲ್ವಿನ್ ರಾತಿ ಆಯಿಲ್ಲೊ...." ಬಾರಾಧಿಕ್ ತಳ್ಯಾನ್ ವಿತೊರಾಬಾನ್ ಮ್ಹಳೆಂ.
"ಹಾಂ....ಅಯಿಲ್ಲೊ? ಆತಾಂ ಕಂಯ್ ಗೆಲೊ?" ಹಾಂಕ್ರೆಲಿ ತಿ.
"ಹಾಂವ್ ನೆಣಾ ಜಿಲ್ಲಿ. ಪಳೆ, ತಾಣೆಂಚ್ ಬರೈಲಾಂ ಕಾಗದ್. ತುಂ ವಾಚುನ್ ಪಳೆ"
"ತುಂಚ್ ಸಾಂಗ್.." ತಿ ರಡೊನ್ ಮ್ಹಣಾಲಿ.
ವಿತೊರಾಬಾನ್ ದುಸ್ರ್ಯಾ ಪಾವ್ಟಿಂ ವ್ಹಡ್ಲ್ಯಾನ್ ತೆಂ ಕಾಗದ್ ವಾಚ್ಲೆಂ. ವಾಚುನ್ ಅಖೇರ್ ಕರ್ತಾನಾ, ಜಿಲ್ಲಿಬಾಯೆಚ್ಯಾ ದೊಳ್ಯಾಂಕ್ ಕಾಳೊಕ್ ಆಯಿಲ್ಲ್ಯಾಬರಿ ಜಾಲೊ.
"ದೆವಾ...!" ತಿಚೊ ತಾಳೊ ಕಾಂಪ್ಲೊ. "ಚೆಡ್ವಾಕ್ ಕಸಲೆಂ ಅನ್ವಾರ್ ಆಯ್ಲೆಂ? ಆಮ್ಕಾಂ ಏಕ್ ಉತಾರ್ ಸಾಂಗಾನಾಸ್ತಾಂ ಧಾಂವೊಂಕ್ ತಾಕಾ ಕಿತೆಂ ಅನಾಹುತ್ ಘಡ್ಲೆಂ? ಹಾಂವ್ ಆತಾಂ ಕಿತೆಂ ಕರುಂ? ಹರ್ದ್ಯಾಕ್ ಹಾತ್ ಮಾರ್ನ್ ತಿ ರಡೊಂಕ್ಲಾಗ್ಲಿ.
"ಜಿಲ್ಲಿ......" ನಾಕ್ ಪೀಳ್ನ್ ತೊ ಮ್ಹಣಾಲೊ. "ರಡೊನ್ ಕಿತೆಂ ಫಾಯ್ದೊ ಆತಾಂ?" ಖಂಯ್ ವೆತಾಂ ಮ್ಹಣ್ ಬರವ್ನ್ ತೊ ವೊಚೊಂಕ್ನಾ. ಆವಯ್-ಬಾಪಾಯ್ನ್ ಆನಿಕ್ಯಿ ಕಷ್ಟಾಜಾಯ್, ಧಣ್ಸಾಜಾಯ್ ಮ್ಹಣ್ ಆಮ್ಕಾಂ ಸೊಡ್ನ್ ಗೆಲಾ ತೊ. ಹೆಂ, ಮ್ಹಾತಾರ್ಯಾ ಪ್ರಾಯೆರ್ ಆಮ್ಕಾಂ ಭೊಗುಂಕ್ ನಿರ್ಮಿಲ್ಲೆಂ"
"ಪುಣ್ ಆಮಿಂ ಆತಾಂ ವೊಗೆಚ್ ರಾಂವ್ಚೆಂ ಕಶೆಂ? ತೊ ಖಂಯ್ ಆಸ್ಲ್ಯಾರೀ, ತಾಕಾ ತುವೆಂ ಸೊಧುನ್ ಕಾಡುಂಕ್ಜಾಯ್" ಪರಾತ್ತಿಲೆಂ ತಿಣೆಂ.
"ಖಂಯ್ ಸೊಧುಂಕ್ ವೊಚೊಂ ಜಿಲ್ಲಿ? ಮ್ಹಜ್ಯಾ ತಕ್ಲೆಕ್ ಏಕೀ ಆಲೋಚನ್ ಯೇನಾ" ಪಿಸಾಂತುರ್ ಜಾಲ್ಲ್ಯಾಬರಿ ಉಲೈಲೊ ವಿತೊರಾಬ್, "ಗಾಂವಾಂತ್ ತೊ ಆಸ್ಚೊನಾ. ಬಹುಶಃ ಬೊಂಬಯ್ ಗೆಲಾ ಕೊಣ್ಣಾ. ತುಜ್ಯಾ ಭಯ್ಣಿಕ್ ಕಾಗದ್ ಬರಂವ್ಕ್ ಜಾಯ್. ಆನಿಂ ಆತಾಂ ಮ್ಹಾಕಾ ರಂಗಣ್ಣಾಕ್ ವೊಚೊನ್ ಮೆಳೊಂಕ್ ಜಾಯ್. ತೊ ಕಿತೆಂ ಸಾಂಗ್ತಾಂ ಪಳೆತಾಂ. ಖಂಯ್ಚ್ಯಾಕೀ ದೀಸ್ ಉಜ್ವಾಡೊಂದಿ.
"ಹಾಂವ್..ಖಂಯ್ಚಾ ಪಾತ್ಕಾಕ್ ತುವೆಂ ಹಿ ಶಿಕ್ಷಾ ದಿಲಿಯ್ ದೆವಾ!" ಸುಸ್ಕಾರಿತ್ತ್ ಜಿಲ್ಲಿಬಾಯ್ ರಾಂದ್ಚ್ಯಾ ಕುಡಾಕ್ ಗೆಲಿ.
ವಿತೊರಾಬ್ ಹೆಣೆತೆಣೆಂ ಪಾಸಾಯೊ ಮಾರುಂಕ್ಲಾಗ್ಲೊ. ತಾಕಾ ಖಂಯ್ಚಿ ವಾಟ್ ಧರ್ಚಿ , ಕಿತೆಂ ಕರ್ಚೆಂ ಮ್ಹಣ್ ಏಕೀ ಕಳಾನಾತ್ಲ್ಲೆಂ. ’ಅತಾಂ ಮೆಲ್ವಿನ್ ನಾತ್ಲ್ಲಿ ಖಬಾರ್ ಸಗ್ಳ್ಯಾ ವಾಡ್ಯಾಕ್ ಕಳ್ತೆಲಿ. ವಳ್ಕಾತೆಲ್ಯಾ ಲೊಕಾಚ್ಯೊ ಜಿಬೋ ನ್ಹಂಯ್ ನಾತ್ಲ್ಲ್ಯೊ ಖಬ್ರೊ ಉಲೈತೆಲ್ಯೊ. ತಾಂಚೊ ವೊಪಾರಿಂ, ನಿಂದಾ, ಸಕ್ಕಡ್ ಆಪ್ಣಾಕ್ ಆಯ್ಕೊಂಕ್ ಆಸ್ತೆಲೆಂ. ಪಯ್ಲೆಂಚ್, ಮೆಲ್ವಿನ್ ಕೊಲೆಜಿಕ್ ವೆತಾ ಮ್ಹಣೊನ್ ಮೊಸ್ರಾನ್ ಭರ್ಲ್ಲೊ ಲೋಕ್ ಜಾಯ್ತೊ ಆಸಾ. ಮೀಟ್ ಆನಿಂ ಕೊಲೊ ಘೆವ್ನ್ ರಾಕ್ತೆಲ್ಯಾ ತಾಂಕಂ ಹಿ ಖಬಾರ್ ಧಾದೊಸ್ಕಾಯೆ ಜಾಂವ್ಕ್ ಪಾವ್ತೆಲಿ. ಹೆಂ ಸರ್ವ್ ಭೊಗುಂಕ್ ಕಿತ್ಯಾಕ್ ನಿರ್ಮಿಲ್ಲೆಂಯ್ ದೆವಾ? ದುಬ್ಳಿಕಾಯ್ ಪುತಾಚ್ಯಾ ಖುಸ್ತಾರ್ ಪುಣಿ ಪರಿಹಾರ್ ಜಾತೆಲಿ ಕೊನ್ಶಾಂಯ್ ಆಸ್ಲ್ಲ್ಯಾಂವ್ ತಿಂ, ಮನ್ಶಾಂತ್ ಯೆತೆಲ್ಯಾಂವ್ ಮ್ಹಣ್ ಆಶೆಚಿ ರಾವ್ಳೆರಾಂ ಬಾಂದುನ್ ದವರ್ಲ್ಲಿಂ ತಿಂ, ಕಿತ್ಯಾಕ್ ನಾಸ್ ಕೆಲಿಂಯ್?’
ದೀಸ್ ಉಜ್ವಾಡ್ಲೊ, ಪುಣ್ ವಿತೊರಾಬಾಚ್ಯಾ ಮತಿಕ್ ಉಜ್ವಾಡ್ ನತ್ಲ್ಲೊ. ತೊ ಆತಾಂ ಕಾಫಿ ಪಿಯೆಂವ್ನ್, ರಂಗಾಣ್ಣಾಗೆರ್ ವೊಚೊಂಕ್ ಆಲೋಚನ್ ಕರ್ತಾಲೊ. ಪುಣ್ ಭಾಯ್ರ್ ಜ್ಯಾಲಾಂತ್ ತಾಚಿ ದೀಷ್ಟ್ ಪಡ್ತಾನಾ, ರಂಗಣ್ಣಾಚ್ ಖರ್ಶೆಂವ್ಕ್ ಧಾಂವೊನ್ ಯೆಂವ್ಚೊ ತಾಣೆಂ ದೆಖ್ಲೆಂ. ವಿತೊರಾಬ್ ಥಟಾಕ್ಕ್ ಜಾಲೊ. ಉಲಂವ್ಕ್ ತಾಕಾ ಜೀಬ್ ಘುಂವಾನಾತ್ಲ್ಲ್ಯಾನ್, ರಂಗಣ್ಣಾಕ್ ಸ್ವಾಗತ್ ಕರುಂಕ್ಯಿ ಜಾಲೆಂನಾ ತಾಕಾ.
"ವಿತೊರಿ, ವ್ಹಡ್ಲಿ ಫಜಿಂತ್ ಜಾಲಿಮೂ! ಮ್ಹಜೆಂ ಸತ್ತ್ಯಾನಾಸ್ ಜಾವ್ನ್ ಗೆಲೆಂ" ಸೊಪ್ಯಾಚಿ ಮೆಟಾಂ ಚಡ್ತಾನಾ ಉದ್ಗಾರ್ ಸೊಡ್ಲೊ ರಂಗಣ್ಣಾನ್.
"ಕಿ-ಕಿತೆಂ ಜಾಲೆಂ ರಂಗಣ್ಣಾ? ಇತ್ಲ್ಯಾ ಸಕಾಳಿಂ ಕಿತೆಂ ಧಾಂವೊನ್ ಆಯ್ಲೊಯ್?" ವಿತೊರಾಬಾನ್ ಅಜ್ಯಾಪ್ ಪಾವೊನ್ ಸವಾಲ್ ಕೆಲೆಂ.
"ಧಾಂವ್ಚೆಂ ಕಿತೆಂ, ಸಾಂಗ್ಚೆಂ ಕಿತೆಂ?" ತಕ್ಲೆಕ್ ಹಾತ್ ಮಾರ್ನ್ ರಂಗಣ್ಣಾ ಸೊಪ್ಯಾ ವಯ್ಲ್ಯಾ ಕದೆಲಾರ್ ಬಸ್ಲೊ, "ಮ್ಹಾಕಾ ಪಾಡ್ ಜಾಂವ್ಕ್ ತೀನ್ ದೀಸ್ ಉರ್ಲೆ ವಿತೊರಿ. ಹ್ಯಾ ಚೆಡ್ಯಾನ್ ಮ್ಹಾಕಾ ಗಂಗಾ-ಉದಾಕ್ ದೀವ್ನ್ ವ್ಹಡ್ ನಾಮ್ ಲಾಯ್ಲೊ"
"ತುಂ ಕೊಣಾಚಿ ಖಬಾರ್ ಉಲೈತಾ? ಶೀನಾಚಿಗಿ?" ವಿತೊರಾಬಾನ್ ಸವಾಲ್ ಕರ್ತಾನಾ ಬಿತರ್ ಥಾವ್ನ್ ಜಿಲ್ಲಿಬಾಯ್ ಭಾಯ್ರ್ ಆಯ್ಲಿ.
"ಆನಿಂ ಕೊಣಾಚಿ ಮ್ಹಣ್ತಾಯ್ ತುಂ? ಹ್ಯಾ ಪಡ್ಫಾಶ್ಯಾನ್ ಮ್ಹಾಕಾ ಪುರ್ತೆಂ ವಾಟೆಕ್ ಲಾವ್ನ್ ಸೊಡ್ಲೆಂ. ಕಾಲ್ ರಾತಿಂ ತೊ ಘರ್ ಸೊಡ್ನ್ ಧಾಂವ್ಲಾ" ರಂಗಣ್ಣಾ ಧೆದೆಸ್ಪಾರ್ ಜಾಲ್ಲ್ಯಾ ಭಾಷೆನ್ ಉಲೈಲೊ.
"ಘರ್ ಸೊಡ್ನ್ ಧಾಂವ್ಲಾ?! ಆನಿಂ ಮೆಲ್ವಿನ್ಯಿ ಧಾಂವ್ಲಾ....ಹೆಂ ಕಿತೆಂ? ಜಿಲ್ಲಿಬಾಯೆ ಹಾಂಕ್ರೆಲಿ
"ಮೆಲ್ವಿನ್ಯಿ ಧಾಂವ್ಲಾ?! ರಾಮ ರಾಮ.......ವ್ಹೊ ಕಿತೆಂ ಮಿಸ್ತೆರ್?" ರಂಗಣ್ಣಾ ಶಿರಿಂ ಸುಕೊನ್ ದೊಗಾಂಯ್ಚ್ಯಾ ತೊಂಡಕ್ಚ್ ಪಳೆಂವ್ಕ್ ಪದ್ಲೊ.
"ವ್ಹಯ್ ರಂಗಣ್ಣಾ.....ಮೆಲ್ವಿನ್ ಕಲ್ ರಾತಿಂ ಪೊಳ್ಳಾ. ಅನಿಂ ವೆತಾನಾ ಕಾಗದ್ ಬರವ್ನ್ಯಿ ದವರ್ಲಾಂ ತಾಣೆಂ" ವಿತೊರಾಬಾನ್ ಸಗ್ಳಿ ಗಜಾಲ್ ತಾಕಾ ಸಾಂಗ್ಲಿಂ.
"ಹುಂ......ದೊಗೀ ತರ್ ಸಾಂಗಾತಾ ಪೊಳ್ಳ್ಯಾತ್ ಮ್ಹಣ್ಚ್ಯಾಕ್ ಸಂಶಯ್ಚ್ ನಾ. ಮ್ಹಜೊ ಪೂತ್ ಮೊವಾಲಿ, ಕೇಡಿ, ತೆಂ ಸಂಸಾರ್ ಜಾಣಾಂ. ಪುಣ್, ಮೆಲ್ವಿನಾಕ್ ಹಿ ಬೂದ್ ಕಶಿ ಆಯ್ಲಿ? ವೆತಾನಾ ಕಿತ್ಲೆಂ ಪಯ್ಶೆ ವೊರ್ನ್ ಗೆಲಾ?"
"ಪಯ್ಶೆ....ಪಶೆ ಖಂಯ್ಚ್ಯೆ? ಏಕ್ ರುವಿಯಿ ವರೊಂಕ್ ನಾ ತಾಣೆಂ. ಕಿತ್ಯಾಕ್, ರಾತಿಂ ತೊ ಬಿತರ್ ಆಯಿಲ್ಲೊಚ್ ನಾ" ಉಲೈಲಿ ಜಿಲ್ಲಿಬಾಯ್.
"ತರ್, ತಾಣೆಂ ರುವಿ ವರೊಂಕ್ ನಾ. ಮ್ಹಜ್ಯಾ ಪುತಾನ್ ಮಾತ್ರ್, ಮ್ಹಜಿ ಪೆಟ್ ಪೊಡ್ನ್ ಬಾಂಗಾರಾಚಿ ಏಕ್ ಮುದಿ ಅನಿಂ ದೊನ್ಶಿಂ ರುಪಯ್ ನಿಕ್ಳಾಯ್ಲ್ಯಾತ್. ದೆವಾ ಕಸಲಿ ಬೂದ್ ಅಯ್ಲಿ ಹ್ಯಾ ಚೆಡ್ಯಾಕ್..." ರಡೊಂಕ್ ತಯಾರ್ ಜಾಲ್ಲೊ ರಂಗಣ್ಣ.
ಥೊಡೊ ವೇಳ್ ತೆಗಾಂಯ್ ಉಲೈಲಿನಾಂತ್. ಆಖ್ರೇಕ್ ಲಾಂಬ್ ಶ್ವಾಸ್ ಸೊಡ್ನ್, ರಂಗಣ್ಣಾ ಮ್ಹಣಾಲೊ -"ಅತಾಂ ಕಿತೆಂ ಕರ್ಚೆಂ ವಿತೊರಿ? ಮ್ಹಾಕಾ ಎಕ್ಚ್ ವಾಟ್ ದಿಸ್ತಾ.
"ಕಸಲಿ ತಿ....?" ವಿತೊರಾಬಾಚ್ಯಾ ತಾಳ್ಯಾಂತ್ ದುಃಖಾಚಿ ನಿಶಾನಿ ಝಳ್ಕಾತಾಲಿ.
"ಆಮಿಂ ಪೊಲಿಸ್ ಸ್ಟೇಶನಾಕ್ ವಚೊನ್, ರಿಪೊರ್ಟ್ ಕರ್ಯಾಂ.. ತ್ಯಾ ಬಗಾರ್ ದುಸ್ರೆಂ ಕಸಲೆಂಚ್ ಕರುಂಕ್ ಸಾಧ್ಯ್ ನಾ."
"ಪೊಲಿಸ್ ಸ್ಟೆಶನ್...." ಕಪಾಲರ್ ಮಿರಿಯೊ ಘಾಲ್ನ್ ವಿತೊರಾಬ್ ಸಾಂಗಾಲಾಗ್ಲೊ. "ಥಂಯ್ಸರ್ ಗೆಲ್ಯಾರ್, ಹಿ ಖಬಾರ್ ಸಗ್ಳ್ಯಾ ಗಾಂವಾಕ್ ವಿಸ್ತಾರ್ತೆಲಿ ರಂಗಣ್ಣಾ. ಉಪ್ರಾಂತ್ ಲೊಕಾಕ್ ತೊಂಡ್ ದಾಕಾಂವ್ಕ್ ಆಸ್ಚೆಂನಾ ಆಮ್ಕಾಂ"
"ಉದ್ಕಾಂತ್ ಬಿಜ್ಲ್ಯಾಂಕ್ ಹಿಂವಾಚೆಂ ಭ್ಯೆಂ ಕಸಲೆಂ ವಿತೊರಿ? ಆಜ್ ತಾಂಕಾಂ ಸಮಾ ವಾಟೆಕ್ ಹಾಡುಂಕ್ ಆಮಿಂ ಅಸಮರ್ಥ್ ಜಾಲ್ಯಾರ್, ಉಪ್ರಾಂತ್ ಅಮಿಂ ಜಿಕ್ಚೆನಾಂವ್. ಸಂಸಾರ್.......ಸಂಸಾರ್ ಹಾಸ್ತೊಲೊ ಹಿ ಖಬಾರ್ ಅಯ್ಕೊನ್. ನಶಿಬಾಂತ್ ಬೊಗೆಲ್ಲೆಂ ಸರ್ವ್ ಬೊಗಿಜಾಯ್ ಜೀವನಾಂತ್, ನೀಸಾಸಂಗಿಂ ವೀಕ್ಯಿ ಥೊಡೆ ಪಾವ್ಟಿಂ ಪಿಯೆಂವ್ಕ್ ನಿರ್ಮಿಲಾಂ ಆಮ್ಚೆಂ ತಸಲ್ಯಾಂಕ್" ರಂಗಣ್ಣಾ ಮ್ಹಣಾಲೊ.
"ಹೂಂ.....ಚಲ್ಯಾಂ ತರ್.....’ ಸಾರ್ ನಾತ್ಲ್ಲ್ಯಾ ಸ್ವರಾನ್ ಉಲೈಲೊ ವಿತೊರಾಬ್.
"ರಾವಾ ...ಹಾಂವ್ ಕಾಫಿ ಹಾಡ್ನ್ ಯೆತಾಂ ತುಮ್ಕಾಂ" ಜಿಲ್ಲಿಬಾಯ್ ಬಿತರ್ ಗೆಲಿ. ವಿತೊರಾಬ್ ನೆಸೊನ್ ತಯಾರ್ ಜಾತಾನಾ ತಿಚಿ ಕಾಫಿಯಿ ಆಯ್ಲಿ. ದೊಗೀ ಕಾಫಿ ಪಿಯೆಲೆ ಆನಿಂ ಪೊಲಿಸ್ ಸ್ಟೇಶನಾಕ್ ವಚೊಂಕ್ ಭಾಯ್ರ್ ಸರ್ಲೆಂ.
ತಶೆಂ ತೆಂ ಚಲೊನ್ ಲೇಡಿ ಹಿಲ್ಲ್ ಲಾಗಿಂ ಪಾವ್ತಾನಾ, ತಾಂಕಾಂ ಆಜ್ಯಾಪ್ಚ್ ರಾಕೊನ್ ಆಸ್ಲ್ಲೆಂ. ರಂಗಣ್ಣಾಗೆರ್ಚ್ ವಚೊಂಕ್ ಭಾಯ್ರ್ ಸರ್ಲೆಲ್ಯಾ ಎಕಾ ಪೊಲಿಸ್ ಆಫೀಸರಾಚಿ ಆನಿಂ ತೆಗಾಂ ಪೊಲಿಸಾಂಚಿ ದೀಷ್ಟ್ ತಾಂಚೆರ್ ಪಡ್ಲಿ. ಸಬ್-ಇನ್ಸ್ಪೆಕ್ಟರ್ ರಂಗಣ್ಣಾಚ್ಯಾ ವಳ್ಕಿಚೊಚ್ ಜಾವ್ನ್ ಆಸ್ಲ್ಲೊ. ಬಸ್ಸಾಕ್ ರಕ್ಚ್ಯಾ ಹ್ಯಾ ದೊಗಾಂ ಸರ್ಶಿಂ ತೊ ಆಯ್ಲೊ ಆನಿಂ ಬೊಲ್ಸಾಂತ್ಲೆಂ ವಾರಂಟ್ ಘೆವ್ನ್ ತಾಣೆಂ ರಂಗಣ್ಣಾಕ್ ದಾಕೈಲೆಂ ಆನಿ ವಿಚಾರ್ಲೆಂ, "ಶೀನ ಖಂಯ್ ಆಸಾ?
ದೊಗೀ ಥಟಾಕ್ಲೆ. ರಂಗಣ್ಣಾಕ್ ಕಸಲಿ ಜಾಪ್ ದಿಂವ್ಚಿ ಕಳ್ಳಿನಾ. ಸಾವ್ಕಾರ್ ಪಾವ್ಲ್ ಶೆಟಿಚ್ಯಾ ಫಿರ್ಯಾದೆಚೆರ್ ಪೊಲಿಸ್ ಶೀನಾಚ್ಯಾ ಸೊಧ್ನೆಕ್ ಭಾಯ್ರ್ ಸರ್ಲ್ಲೆಂ ಮ್ಹಣ್ ರಂಗಣ್ಣಕ್ ಕಳೊಂಕ್ ಕಾರಣ್ಂಚ್ ನಾತ್ಲ್ಲೆಂ.
(ಉಪ್ರಾಂತ್...ಪೊಲಿಸಾಂಚಿ ಸೊಧ್ನಾಂ ಕಿತುನ್ ಫಳಾಬರಿತ್ ಜಾಲಿಂ? ಶೀನ ಸಾಂಪಡ್ಲೊಗಿ? ಮೆಲ್ವಿನಾಕ್ ಕಿತೆಂ ಜಾಲೆಂ? ವಿತೊರಾಬ್ ಆನಿಂ ಜಿಲ್ಲಿಬಾಯೆಚೆಂ ದುಃಖ್ ಇತ್ಯಾದಿ ಯೆಂವ್ಚ್ಯಾ ಅಂಕ್ಯಾಂಕ್ ಪಳೆಯಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12, 13
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
