ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 15
ಪೂನಾ ಸ್ಟೇಶನಾ ಥಾವ್ನ್ ಸುಟ್ಲ್ಲೆಂ ರೈಲ್ ಬೊಂಬೈಚಿ ವಾಟ್ ಧರ್ನ್, ಚಾಳೀಸ್ ಮೈಲಾಂಚ್ಯಾ ವೇಗಾನ್, ಸಬಾರ್ ಪಯ್ಣಾರ್ಯಾಂಕ್ ಘೆವ್ನ್ ವೆತಾಲೆಂ. ’ಆಪ್ಣಾಂ ತಸಲೆ ನಿರ್ಭಾಗಿ ಕಿತ್ಲೆ ಹ್ಯಾ ರೈಲಾರ್ ಅಸೊನ್ ಅಸಾತ್ಗಿ!’, ಚಿಂತ್ತಾಲೊ ಮೆಲ್ವಿನ್ ಹಾಸೊ ಆನಿಂ ದುಃಖ್.....ಎಕಾಚ್ ನಾಣ್ಯಾಚಿಂ ದೋನ್ ಮುಖಾಂ....ಶೀನಾನ್ ಸಾಂಗ್ಲ್ಲಿಂ ಉತಾಂ ತಾಚ್ಯಾ ಮತಿಕ್ ಯೆತಾಲಿಂ. ಆಪ್ಶಿಂಚ್ ದೊಳ್ಯಾಂತ್ಲ್ಯಾನ್ ಪಾಚಾರ್ಲ್ಲಿಂ ದುಃಖಾಂ ತಾಣೆಂ ತುವಾಲ್ಯಾನ್ ಪುಸ್ಲಿ.
ಶೀನಾ ಆನಿಂ ಮೆಲ್ವಿನ್ ಬಸ್ಲ್ಲ್ಯಾ ಕಂಪಾರ್ಟ್ ಮೆಂಟಾಂತ್ ಜಾಯ್ತೊ ಲೋಕ್ ಭರ್ಲ್ಲೊ. ಗ್ರೇಸ್ತ್, ದುಬ್ಳೆ, ತಶೆ ಬಿಕಾರಿ; ದಾದ್ಲೆ, ಸ್ತ್ರೀಯೊ ಅನಿಂ ಭುರ್ಗಿಂ, ಸಕ್ಡಾಂ ಆಸ್ಲ್ಲಿಂ. ಥೊಡಿಂ ಬೊಂಬೈಕ್ ನವಿಂಚ್ ಜಾಯ್ಜಾಯ್. ಕಿತ್ಲೆ ಜಣ್ ಕಾಮ್ ಸೊಧುನ್ ಆಯ್ಲ್ಯಾತ್ಗಿ? ತಾಂಚ್ಯಾ ತೊಂಡಾರ್ ಎಕಾ ಥರಾಚಿ ಆತುರಾಯ್, ಪಳೆಂವ್ಕ್ ಆಸ್ಚ್ಯಾ ನವ್ಯಾ ಶಹರಾ ವಿಷ್ಯಾಂತ್ಲಿಂ ಚಿಂತ್ನಾಂ. ಶಹರ್ ಆನಿಂ ಸ್ವಪಾಣ್..... ವ್ಹಯ್, ತೆಂಚ್ ಬೊಂಬಯ್ ಶಹರ್ ಆನಿಂ ಲೋಕ್ ವಿವಿಧ್ ಸ್ವಪ್ಣಾಂ ಘೆವ್ನ್ ಥಂಯ್ ಭಾಯ್ರ್ ಸರ್ಲ್ಲೊ. ಥೊಡೆ ಬರೆಂ ಕಾಮ್ ಜೊಡ್ಚ್ಯಾ ಇರಾದ್ಯಾನ್, ಹೆರ್ ವ್ಯಾಪಾರ್ ಕರ್ನ್ ಪಯ್ಶೆ ಖಮಾಂವ್ಚ್ಯಾ ಆಶೆನ್, ಆನಿಂ ಥೊಡೆ ಗಾವಾಂತ್ಲ್ಯಾ ಆಪ್ಲ್ಯಾ ಗರೀಬ್ ಕುಟ್ಮಾಕ್ ಆಧಾರ್ ದಿಂವ್ಚ್ಯಾ ಇಚ್ಛೆನ್, ಬೊಂಬಯಾ ವೆತಾಲೆ. ಥೊಡ್ಯಾಂಕ್ ತಾಂಚ್ಯಾ ಕುಟ್ಮಾಚ್ಯಾಂಗೆರ್ ವ ವಳ್ಕಿಚಾಂಗೆರ್ ರಾವೊಂಕ್ ಆಸ್ರೊ ಆಸ್ಲ್ಲೊ. ದುಸ್ರ್ಯಾಂನಿ ಖಂಯ್ ಕ್ಲಬ್ಬಾಂನಿ ನಾಂವ್ ದಾಖಲ್ ಕರಿಜಾಯ್ ಆಸ್ಲ್ಲೆಂ. ಗರೀಬ್ ಅನಿಂ ಭಿಕಾರಿ ಕಸಲ್ಯಾಚಿಚ್ ಪರ್ವಾ ನಾ ತಶೆಂ ಫುಟ್ಪಾತಿರ್ ನಿದೊನ್ ಅಂತ್ರಳಾಕ್ ಪಳೆವ್ನ್ ಸ್ವಪ್ಣೆಂವ್ಕ್ ಅಯಿಲ್ಲೆ. ಹಿ ದುಬ್ಳಿಕಾಯ್... ಹೆ ಕಷ್ಟ್ ಏಕ್ ದೀಸ್ ಪರಿಹಾರ್ ಜಾತೆಲೆ. ಕಠಿಣ್ ಉಬ್ದೇಸ್ , ರಾಜಕೀಯ್ ತಶೆಂ ಅರ್ಥಿಕ್ ಸಮಸ್ಯಾಂನಿ ಭರೊನ್ ಮುಖಾರ್ ಸರೊಂಕ್ ಪೆಚಾಡ್ಚೆಂ ಭಾರತ್......ಏಕ್ ದೀಸ್...ಹಿಂ ಸರ್ವ್ ಸಮಸ್ಯಾಂ ಪರಿಹಾರ್ ಜಾತೆಲಿ...ಲೊಕಾಕ್ ಖಾಣ್ - ಜೆವಾಣ್, ನ್ಹೆಸಾಣ್ ಆನಿಂ ಆಸ್ರೊ ಕಷ್ಟಾಂವಿಣೆ ಲಾಬ್ತೊಲೊ. ಭಾರತ್ ದೇಶ್ ಸಮ್ರದ್ಧೆಕ್ ಪಾವ್ತೊಲೊ. ಪ್ರಯಾಣಿಕ್ ಸ್ವಪ್ಣೆತಾಲೆ.......ತೆಂ ಬೊಂಬಯ್ ಆನಿಂ ಮತಿಂತ್ಲೆಂ ಅಶೆಚೆಂ ಸ್ವಪಾಣ್......
ಪುಣ್ ಮೆಲ್ವಿನ್ ಆಪ್ಲೆಂ ಸ್ವಪಾಣ್ ವಿಸ್ರೊಂಕ್ ಬೊಂಬಯ್ ಭಾಯ್ರ್ ಸರ್ಲ್ಲೊ. ಸ್ವಪ್ಣಾಂ ಬರಿ ಜಿಣಿಯೆಂತ್ ಉದೆವ್ನ್ ನಪೈಂಚ್ ಜಾಲ್ಲ್ಯಾ ಜೆಸ್ಸಿಕ್ ವಿಸ್ರೊಂಕ್ ತೊ ಆಯಿಲ್ಲೊ. ತೆಂ ದುಃಖ್ ವಿಸ್ರೊಂಕ್ ಖಂಡಿತ್ ಸಾಧ್ಯ್ ಗಿ? ಕಾಲಕ್ರಮೇಣ್, ಕುಡಿಕ್ ಜಾಲ್ಲೊ ಘಾಯ್ ತರೀ ಥಾಂಬ್ತಾ, ಪುಣ್ ದುಃಖ್ಲ್ಲೆಂ ಕಾಳಿಜ್ ಸಮಾ ಜಾಂವ್ಕ್ ಸಾಧ್ಯ್ ಆಸಾಗಿ?
"ಮೆಲ್ವಿನ್, ಆಮ್ಕಾಂ ದಾದರ್ ಸ್ಟೇಶನಾಂತ್ ದೆವೊಂಕ್. ಥಂಯ್ ಥಾವ್ನ್ ಮಾಹಿಮ್ ಆಮ್ಕಾಂ ವಚೊಂಕ್ ಆಸಾ. ರಾಜು ಕೆಡಲ್ ರೋಡಾಚೆರ್ ರಾವ್ತಾ. ತಾಣೆಂ ವಸ್ತಿ ಕರ್ನ್ ಆಸ್ಚೆಂ ಬಿಲ್ಡಿಂಗ್ ದರ್ಯಾ ದೆಗೆರ್ಚ್ ಆಸಾ. ಉಲೈಲೊ ಶೀನಾ.
"ದರ್ಯಾ ದೆಗೆರ್...!" ಸಟ್ಟ್ ಕರ್ನ್ ಮೆಲ್ವಿನಾಚೆಂ ಕಾಳಿಜ್ ಮುಡ್ಡೊನ್ ಆಯಿಲ್ಲ್ಯಾಬರಿ ಜಾಲೆಂ. ತಿ ತಂಡ್ರಬೈಲ್ಚಿ ದರ್ಯಾ ವೇಳ್.... ಜೆಸ್ಸಿ ಸಂಗಿಂ ಥಂಯ್ಸರ್ ಬಸೊನ್ ಆಸ್ಲ್ಲೊ ಉಗ್ಡಾಸ್ ತಾಚ್ಯಾ ಮತಿಕ್ ಆಯ್ಲೊ. ಕಶೆಂ ಮಂಗ್ಳೂರಾಂತ್ ತಶೆಂ ಬೊಂಬಯ್ ಆನಿಂ ಅಖ್ಯಾ ಸಂಸಾರರ್ ವ್ಹೊ ದರ್ಯೊ ವಿಸ್ತಾರೊನ್ ಅಸಾ. ಆನಿಂ ಜೆಸ್ಸಿಚೊ ಉಗ್ಡಾಸ್ ಆನಿಂ ಆಪ್ಲೆಂ ದುಃಖ್ಯಿ ವಿಶಾಲ್ ಜಾವ್ನ್ ಆಸಾ. ಕಸಲೆಂ ವಿಕಾಳ್ ನಶಿಬ್..ಚಿಂತ್ತಾನಾ, ಮೆಲ್ವಿನಾನ್ ತಕ್ಲಿ ಬಾಗಯ್ಲಿ.
"ಆರೆ, ಬಾವ್ಲೊಯ್ ಕಿತ್ಯಾಕ್? ದರ್ಯೊ ಮ್ಹಣ್ತಾನಾ ಕಿತ್ಯಾಕ್ ಬಿಂಯೆಲೊಯ್?" ಶೀನಾನ್ ವಿಚಾರ್ಲೆಂ.
"ನಾ....ನಾ...ದರ್ಯೊ ಮ್ಹಳ್ಯಾರ್ ಮ್ಹಾಕಾಯ್ ಸಂತೊಸ್" ಆಪ್ಲಿಂ ಭೊಗ್ಣಾಂ ಲಿಪವ್ನ್ ತೊ ಸಾಂಗಾಲಾಗ್ಲೊ.
ಖಟ್.....ಖಟ್....ಖಟ್.....ಖಟ್...
ಧಾಂವ್ತಾಲೆಂ ರೈಲ್ ಪುಣ್ ತೆಂ ರೈಲ್ ತಾಕ "ನಿರ್ಭಾಗಿ ತುಂ.....ನಿರ್ಭಾಗಿ ತುಂ..." ಮ್ಹಣೊನ್ ಹೆಡಾಯ್ತಾಶೆಂ ದಿಸ್ತಾಲೆಂ. ಘರ್ದಾರ್, ಆವಯ್-ಬಾಪುಯ್, ಈಷ್ಟ್-ಮಂತ್ರ್, ಸಕ್ಡಾಂಕ್ ಸಾಂಡುನ್ ತೊ ವೆತಾಲೊ. ಹ್ಯಾ ಬೊಂಬೈತ್ ಆಪ್ಲೆಂ ಜೀವನ್ ಸುಖಿ ಜಾತೆಲೆಂ’ ಜೆಸ್ಸಿಚಿಂ ಉತ್ರಾಂ ತಾಚ್ಯಾ ಕಾಳ್ಜಾಚ್ಯಾ ದಾರಾರ್ ಮಾರ್ತಾಲೆಂ.
"ವ್ಹಯ್ ಜೆಸ್ಸಿ, ಕೆದಿಂಚ್ ತುಕಾ ವಿಸ್ರೊಂಕ್ ಮ್ಹಾಕಾಯ್ ಜಾಂವ್ಚೆಂನಾ....."
ವೊರಾಂ ಸಾಡೆ-ಸ ಉತರ್ಲ್ಲಿಂ. ರೈಲ್ ಬೊಂಬಯ್ಲಾಗಿಂ ಪಾವ್ಲ್ಲೆಂ. ತಿ ಖಾಲಿ ಸುವಾತ್, ಗುಡೆ ದೊಂಗೊರ್ ಉತ್ರೊನ್, ರೈಲ್ ಜನಭರಿತ್ ಬೊಂಬಯ್ ಶಹರಾ ಕುಶಿಂ ಧಾಂವ್ತಾಲೆಂ. ಭಾರತಾಂತ್ಲೆಂ ಪ್ರಮುಖ್ ಶಹರ್ ಬೊಂಬಯ್, ಸಂಸಾರಾರ್ಚ್ ನಾಂವಾಡ್ಲೆಲೆಂ. ಖಂಯ್ಚ್ಯಾ ಪಯ್ಶಿಲ್ಯಾ ಗಾಂವಾ ಥಾವ್ನ್ ಲೋಕ್ ಹಾಂಗಾಸರ್ ಯೇವ್ನ್ ವಸ್ತಿ ಕರ್ತಾಲೊ. ರೈಲ್ ಮಾರ್ಗಾಚ್ಯಾ ದೊನೀ ಕುಶಿಂನಿ ತಿಂ ಉಬಾರ್ ಬಾಂದ್ಪಾಂ, ಲೊಕಾಚಿ ಖೆಟ್, ಮೆಲ್ವಿನಾಕ್ ದಿಸ್ತಾಲಿ.
ರೈಲ್ ಥಾನಾ ಸ್ಟೇಶನಾಂತ್ ರಾವೊನ್ ಸುಟ್ಲೆಂ. ಆತಾಂ ವಿವಿಧ್ ಕೈಗಾರಿಕಾಂಚಿ ಕೇಂದ್ರಾಂ, ಲಾಖೊಂ ಲೊಕಾಕ್ ದಿಸ್ಪೊಡ್ತೊ ಗ್ರಾಸ್ ದಿಂವ್ಚೆಂ ತೆ ಉದ್ಯಮಿಕ್ ಕಾರ್ಖಾನೆ ದಿಷ್ಟಿಕ್ ಪಡ್ಲೆ. ನಿಮಾಣೆ, ಸಾಂಜೆಚಿಂ ಸಾತ್ ವ್ಹಾಜ್ತಾಂ, ರೈಲ್ ದಾದರ್ ಸ್ಟೇಶನಾಂತ್ ಉಬೆಂ ಜಾಲೆಂ.
ಎಕಾಚ್ಚಾಣೆಂ ಕೂಲಿಂಚಿ ಬೋಬ್ ಆಯ್ಕಾಲಿ. ಪ್ರಾಯಾಣಿಕ್ ದೆಂವ್ಚೊ ಗಲಾಟೊ. ವ್ಹಡ್ ಏಕ್ ಸಾಂತ್ ಕುಡ್ಸೊಂಚ್ಯಾಬರಿ, ಜಾಂವ್ಚೆಂ ತೆಂ ಉಲವ್ಣೆಂ ಅನಿಂ ಬೋಬ್....
ಶೀನಾ ಆನಿಂ ಮೆಲ್ವಿನ್, ಸಾಮಾನ್ ಘೆವ್ನ್ ರೈಲಾ ಥಾವ್ನ್ ದೆಂವ್ಲೆ. ತಕ್ಷಣ್ಂಚ್, ಕೂಲಿ ಎಕ್ಲೊ ಹಾಂಚ್ಯಾ ಬಗ್ಲೆಕ್ ಉಬೊ ಜಾಲೊ. ತಾಕಾ ನಿರಾಕರ್ಸುನ್ ಶೀನಾನ್ ಮ್ಹಳೆಂ "ಮೆಲ್ವಿನ್ ಏಕ್ ಘಡಿಬರ್ ತುಂ ಹಾಂಗಾಚ್ ರಾವ್. ಹಾಂವ್ ರಾಜು ಖಂಯ್ ಆಸಾ ಪಳೆವ್ನ್ ಯೆತಾಂ. ಮ್ಹಜೆಂ ಟೆಲಿಗ್ರಾಮ್ ತಾಕಾ ಪಾವ್ಲಾಂ ಜಾಲ್ಯಾರ್ ಖಂಡಿತ್ ಹಾಂಗಾ ಯೆತೊಲೊ
ಆಶೆಂ ಸಾಂಗೊನ್ ಶೀನಾ ಚಲ್ಲೊ. ಮೆಲ್ವಿನ್ ಎಕ್ಲೊಚ್ ಫ್ಲೆಟ್ಪೊರ್ಮಾರ್ ರಾವ್ಲೊ. ಕುಲ್ಕಾರ್ ಏಕೆಕ್ಲೊಚ್ ತಾಚೆ ಸರ್ಶಿಂ ಯೆತಲೆ. ಹಿಂದಿ ಭಾಸ್ ನೆಣಾಸ್ಲ್ಲ್ಯಾ ತಾಣೆಂ ಕಷ್ಟಾಂನಿ ತಾಂಕಾಂ ಪಾಟಿಂ ಧಾಡ್ಚೆಂ ಪಡ್ಲೆಂ. ಥೊಡೊ ವೇಳ್ ಪಾಶಾರ್ ಜಾಲೊ. ಉಪ್ರಾಂತ್ ಶೀನಾ ಆನಿಂ ತಾಚ್ಯಾ ಸಾಂಗಾತಾ ದುಸ್ರೊ ತರ್ನಾಟೊ ಆಪ್ಣಾಕುಶಿಂ ಯೆಂವ್ಚೆಂ ತಾಕಾ ದಿಸ್ಲೆಂ. ದೊಗಾಂಚ್ಯಾ ತೊಂಡಾರ್ ಅಮ್ರುಕೊ ಹಾಸೊ ಖೆಳ್ತಾಲೊ. ಲಾಗಿಂ ಪಾವ್ತಚ್, ಶೀನಾ ಮ್ಹಣಾಲೊ, "ಅಳೆ ಮೆಲ್ವಿನ್, ಹೊಚ್ ರಾಜು, ಎಕಾಮೆಕಾಕ್ ವಳೊಕ್ ಕರ್ನ್ ದಿಲಿ ರಾಜುನ್ ಮೆಲ್ವಿನಾಕ್ ಶೇಕ್ ಹ್ಯಾಂಡ್ ಕೆಲೆಂ.
ರಾಜು ಲಾಗಿಂ ಲಾಗಿಂ ಪಂಚ್ವೀಸ್ ವರ್ಸಾಂಚೊ ಯುವಕ್. ಜೀವಾನ್ ಧಡಂಗ್ ಆನಿಂ ರುಪಾನ್ ಸುಂದರ್ ಆಸ್ಲ್ಲೊ. ತಾಚೆಂ ಮುಖ್, ಸದಾಂ ಹಾಸ್ತೆಂ ತಶೆಂ ದಿಸ್ತಾಲೆಂ. ಆನಿಂ ದಯಾಳಾಯ್ ಆನಿಂ ಖುಶಾಲಿ ಸ್ವಭಾವ್ ತೊಂಡಾರ್ ದಿಷ್ಟಿಕ್ ಪಡ್ತಾಲೊ. ಫೆಶನ್ ಅಧಾರ್ಚ್ಯಾಂತ್ ಖುಶಿ ಆಸ್ಚ್ಯಾಬರಿ. ವಿಶಿಷ್ಟ್ ರಿತಿನ್ ಕಾತರ್ಲೆಲೆ ಕೇಸ್, ತ್ಯೊ ನಾಜೂಕ್ ಕಾತರ್ಲೆಲ್ಯೊ ಮಿಶ್ಯೊ, ಟೆರಿಲಿನ್ ಶರ್ಟ್ ಆನಿಂ ಉಲ್ಲನಾಚೆಂ ಕಲ್ಸಾಂಚ್ ದೆಖ್ತಾನಾ ಮೆಲ್ವಿನಾಕ್ ಖಚಿತ್ ಜಾಲೆಂ - ರಾಜು ಸುಖಾನ್ ವಾಡ್ಲ್ಲೊ ಭುರ್ಗೊ ಮ್ಹಣ್.
"ಹಲ್ಲೋ ಮೆಲ್ವಿನ್, ಬೊಂಬೈಕ್ ಸ್ವಾಗತ್ ತುಕಾ" ರಾಜು ಹಾಸೊನ್ ಮ್ಹಣಾಲೊ.
"ಥ್ಯಾಂಕ್ಸ್ ತುಕಾ ರಾಜು." ಉಪ್ಕಾರಿ ಮನಾನ್ ಮೆಲ್ವಿನಾನ್ ಸಾಂಗ್ಲೆಂ.
ಶೀನಾ ಭಾಷೆನ್, ರಾಜುಯಿ ಕೊಂಕ್ಣಿ ಸುಡಾಳ್ ಉಲೈತಾಲೊ "ಆಮಿಂ ಆತಾಂ ಘರ್ಚಿ ವಾಟ್ ಪಳೆಯಾ"
ತಾಣಿ ತೆಗಾನಿಂಚ್ ಟ್ರಂಕಾಂ ಆನಿಂ ಇತರ್ ಸಾಮಾನ್ ಭಾಯ್ರ್ ಹಾಡ್ಲೊ. ರಾಜುನ್, ಸ್ಟೇಶನಾಭಾಯ್ರ್ ಆಸ್ಲ್ಲಿ ಟ್ಯಾಕ್ಸಿ ಆಪೈಲಿ. ತೆಗೀ ಬಸ್ತಚ್ ರಾಜುನ್ ಡ್ರಾಯ್ವರಾಕ್ ಕೆಡಲ್ ರೋಡಾಕ್ ಗಾಡಿ ವ್ಹೊರೊಂಕ್ ಫರ್ಮಾಯ್ಲೆಂ.
ಟ್ಯಾಕ್ಸಿ ವೇಗಾನ್, ಮಾಹಿಮ್ ಕುಶಿಂ ಧಾಂವ್ತಾಲಿ. ಮೆಲ್ವಿನ್ ವಿಜ್ಮಿತ್ ಜಾವ್ನ್ ಬೊಂವಾರಿ ತಿಳ್ತಾಲೊ. ತತ್ಕಾಲಾಕ್ ಆಪ್ಲೆಂ ದುಃಖ್ ತೊ ವಿಸರ್ಲ್ಲೊ. ಸಾಂಜೆಚೊ ವೇಳ್..... ಆನಿಂ ರಸ್ತ್ಯಾ ವಯ್ಲೆ ಅಸಂಖ್ಯಾತ್ ವೀಜ್ ದಿವೆ ಪೆಟೊನ್, ತ್ಯಾ ಉಜ್ವಾಡಾಕ್ ವಿಚಿತ್ರ್ ದಿಸ್ತಾಲೆಂ ಬೊಂಬಯ್. ಮಂಗ್ಳೂರಾಕ್ ಆನಿಂ ಬೊಂಬೈಕ್ ಕಸಲೊ ಬೇಧ್! ಥಂಯ್ ಕಾಳೊಕ್ ಪಡ್ತಚ್ ಲೊಕಾಚೊ ಸಂಚಾರ್ಯಿ ಉಣೊ ಆನಿಂ ರಸ್ತ್ಯಾರ್ ಉಜ್ವಾಡ್ಯಿ ಕ್ಷೀಣ್. ಹಾಂಗಾಸರ್ ಖಂಯ್ ದೀಶ್ಟ್ ವರ್ತಾನಾಂಯಿ ಚಿಕಾರ್ ಭರ್ಲ್ಲೊ ಲೋಕ್ ಆನಿಂ ತೆ ದಿವೆ. ತಿಂ ದೊನೀ ಕುಶಿಂನಿ ಉಬಿಂ ಆಸ್ಚಿಂ ಉಬಾರ್ ಬಾಂದ್ಪಾಂ. ಆನಿಂ ತೆಂ ಬಿಲ್ಡಿಂಗಾಂ ಥಾವ್ನ್ ದೀಷ್ಟಿಕ್ ಪಡ್ಚೆ ಜಾಹೀರಾತ್ ಕರ್ಚೆ ಬೋರ್ಡ್ ವಿವಿಧ್ ರಂಗಾಚ್ಯಾ ವಿಜ್ ಉಜ್ವಾಡಾನ್ ಸೊಭ್ತಾಲೆ. ಆತಾಂ ಶಿವಾಜಿ ಪಾರ್ಕ್ ಜಾವ್ನ್, ಮಾಟುಂಗಾ ಉತ್ರೊನ್ ಕೆಡಲ್ ರೋಡಾರ್ ಗಾಡಿ ಚಲ್ತಾಲಿ.
ತುಜೆಂ ಟೆಲಿಗ್ರಾಮ್ ಆಜ್ ಸಕಾಳಿಂ ಮೆಳ್ಳೆಂ. ಕಶೆಂ ವೇಳ್ ಜಾಲೊ ದೇವ್ ಜಾಣಾ" ಉಲೈಲೊ ರಾಜು, "ಒರ್ಡಿನರಿ ಟೆಲಿಗ್ರಾಮಾಂ ವೇಳ್ ಕರ್ನ್ಂಚ್ ಪಾವಿತ್ ಕರ್ತಾತ್"
"ಒರ್ಡಿನರಿಗಿ, ಎಕ್ಸ್ಪ್ರೆಸ್ಗಿ...ಮ್ಹಾಕಾ ಏಕ್ ಪಾವ್ಟಿಂ ಗಾಂವ್ ಸೊಡ್ತಾಂ ಮ್ಹಣಾಸರ್ ಜೀವಾಂತ್ ಜೀವ್ ನಾತ್ಲ್ಲೊ" ಶೀನಾ ಮ್ಹಣಾಲೊ.
ದರ್ಯಾ ಕುಶಿ ಥಾವ್ನ್ ವ್ಹಾಳೊನ್ ಯೆಂವ್ಚೆಂ ಶೀತಳ್ ವಾರೆಂ ತಾಂಚ್ಯಾ ನಾಕಾಕ್ ಮಾರ್ತಲೆಂ. ಶೀನಾಚ್ಯಾ ವಾಂಟ್ಯಾಕ್ ತಿ ಥಂಡಾಯ್ ಸ್ವಾಗತಾಚಿ ಜಾವ್ನಾಸ್ಲ್ಲಿ ಜಾಲ್ಯಾರ್, ಮೆಲ್ವಿನ್ ತ್ಯಾ ವಗ್ತಾ, ಜೆಸ್ಸಿಕ್ ನಿಯಾಳ್ತಾಲೊ.
ತಾಚೆಂ ಮೌನ್ ದೆಖೊನ್ ರಾಜುನ್ ವಿಚಾರ್ಲೆಂ "ಕಿತೆಂ ಚಿಂತ್ತಾಯ್ ಮೆಲ್ವಿನ್? ಜೆಸ್ಸಿಕ್ ನಿಯಾಳ್ತಾಯ್ಗಿ?"
"ಹಾಂ.." ಮೆಲ್ವಿನ್ ಉಡೊನ್ ಪಡ್ಲೊ. ಜೆಸ್ಸಿಚಿ ಖಬಾರ್ ರಾಜುಕ್ ಕಶಿ ಕಳ್ಳಿ ಮ್ಹಣ್ ಘಾಬರ್ಲೊ ತೊ.
"ಹಾಂವೆಂ ಜೆಸ್ಸಿ ವಿಷ್ಯಾಂತ್ ಪ್ರಸ್ತಾಪ್ ಕಾಡ್ಲೊ ಮ್ಹಣ್ ಬೆಜಾರ್ ಪಾವನಾಕಾ ಮೆಲ್ವಿನ್. ತುಜಿ ಸಂಕ್ಷಿಪ್ತ್ ಚರಿತ್ರಾ, ಶೀನಾನ್ ದಾದರ್ ಸ್ಟೇಶನಾಂತ್ ಮ್ಹಾಕಾ ಕಳೈಲಿ. ಹಾಂವ್ ನಿಜಾಯ್ಕಿ ಭೋವ್ ಬೆಜಾರ್ ಪಾವ್ತಾಂ. ತುಂ ಕಸೊ ಶೀನಾಚೊ ಮಿತ್ರ್, ತಸೊ ಮ್ಹಜೊಯಿ ಮ್ಹಣ್ ಸಮಜ್. ಆತಾಂ ಸಾಂಗ್ ಮೆಲ್ವಿನ್, ತುಂ ಬೊಂಬೈಕ್ ಆಯ್ಲಾಯ್ ಖರೆಂ. ಪುಣ್ ಬೊಂಬೈತ್ ಕಿತೆಂ ಕರುಂಕ್ ಆಪೇಕ್ಶಿತಾಯ್?"
ಮೆಲ್ವಿನ್ ಜಾಪ್ ದೀಂವ್ಕ್ ಸಕ್ಲೊನಾ. ರಾಜುಚ್ಯಾ ತೊಂಡಾಕ್ಚ್ ಪಳೆವ್ನ್ ತೊ ಚಿಂತುಂಕ್ ಪಡ್ಲೊ.
ರಾಜು ಸವ್ಕಾಸ್ ಹಾಸೊನ್ ಮುಖಾರ್ಸುಂಕ್ ಲಾಗ್ಲೊ. "ಹಾಂವೆಂ ವಿಚಾರ್ಲೆಲೆಂ ಸವಾಲ್ ತುಕಾ ಸಮ್ಜೊಂಕ್ ನಾ ಆಸ್ತೆಲೆಂ. ಮೆಲ್ವಿನ್ ಪಳೆ, ತುಂ ಆನಿಂ ಶೀನ ಘರ್ಚ್ಯಾಂಕ್ ಕಳಿತ್ ನಾಸ್ತಾಂ ಬೊಂಬೈಕ್ ಆಯ್ಲ್ಯಾತ್. ತುಕಾ ತುಜೆಂಚ್ ಮ್ಹಳ್ಳೆಂ ಕಾರಣ್ ಆಸ್ತಾನಾ, ಶೀನಾಚೊ ಮತ್ಲಾಬ್ ಹಾಂವ್ ನೆಣಾಂ. ತರೀ, ತುಮ್ಕಾಂ ಮ್ಹಜ್ಯಾ ಘರಾ ಆಸ್ರೊ ದೀಂವ್ಕ್ ಹಾಂವ್ ಸದಾಂ ತಯಾರ್. ಕಿತ್ಯಾಕ್ ಹಾಂವ್ ಬೊಂಬೈತ್ ಎಕ್ಸುರೊಂ. ಮ್ಹಜಿಂ ಆವಯ್ ಬಾಪುಯ್ ಕೊಡಿಯಾಳ್ ಆಸಾತ್. ದಾಕ್ಟೊ ಭಾವ್ ಮಂಗ್ಳೂರ್ಚ್ ಕೊಲೆಜ್ ಶಿಕ್ತಾ. ತೊ ಬೊಂಬಯ್ ಯೇಂವ್ಕ್ ಆನಿಕೀ ದೋನ್ ವರ್ಸಾಂ ಆಸ್ತೆಲಿಂ. ಆನಿಂ ಆತಾಂ ಮ್ಹಾಕಾ ಆಸ್ಚ್ಯಾ ವ್ಹಡ್ಲ್ಯಾ ಬಿಡಾರಾಂತ್ ತುಮ್ಕಾಂ ಆಸ್ರೊ ದೀವ್ನ್ ಸುಧಾರ್ಸುಂಕ್ ಮ್ಹಜಿ ಕಸಲಿಚ್ ಹರ್ಕತ್ ನಾ. ಪುಣ್ ಏಕ್ ಸವಾಲ್ ತುಕಾ ವಿಚಾರ್ತಾಂ ಮೆಲ್ವಿನ್, ಶಿಕ್ಪಿ ಆನಿಂ ಸುಡ್ಸುಡಿತ್ ಆಸ್ಚೊ ತುಂ ಹಾಂಗ ರಾವೊನ್ ಕಿತೆಂ ಕರ್ಶಿ? ಹಾಂವೆಂ ಅಶೆಂ ವಿಚಾರ್ಲೆಂ ಮ್ಹಣ್ ಬೆಜಾರ್ ಕರಿನಾಕಾ"
ಏಕ್ ಘಡಿ ರಾವೊನ್ ಮೆಲ್ವಿನಾನ್ ಮ್ಹಳೆಂ. "ರಾಜು.....ಆತಾಂ ತುಕಾ ಕಸಲಿಯ್ ಜಾಪ್ ದಿಂವ್ಚ್ಯಾ ಸ್ಥಿತೆರ್ ಹಾಂವ್ ನಾ. ಥೊಡ್ಯಾ ದಿಸಾಂನಿ ತುಕಾ ಸಾಂಗ್ತಾಂ"
"ಭೋವ್ ಬರೆಂ, ತಶೆಂಚ್ ಕರ್...." ರಾಜು ಮ್ಹಣಾಲೊ.
ಟ್ಯಾಕ್ಸಿ ಎಕಾ ಬಿಲ್ಡಿಂಗಾ ಮುಖಾರ್ ಉಬಿ ಜಾಲಿ. ಮುಖಾರ್ಚ್ ಅಸ್ಲ್ಲೊ ದರ್ಯೊ. ವೀಜ್ ದಿವ್ಯಾಂಚ್ಯಾ ಉಜ್ವಾಡಾಕ್ ತಾಂತ್ಲೆಂ ಉದಾಕ್ ಥಂಯ್ ಹಾಂಗಾ ಪರ್ಜೆಳ್ತೆಲೆ. ಭುಮಿರ್ ಕಾಳೊಕ್ ಪಡ್ಲ್ಲೊ ತರೀ, ಭೊಂವಾರಿಂ ಪಸಾರ್ಲೆಲ್ಯಾ ಉಜ್ವಾಡಾಂತ್, ಮೆಲ್ವಿನಾನ್ ದೆಖ್ಲೆಂ ಚ್ಯಾರ್ ಮಾಳಿಯಾಂಚೆಂ ಮಜ್ಭೂತ್ ಬಿಲ್ಡಿಂಗ್, ಜೆಂ ದರ್ಯಾಕ್ ಪುಡ್ ಕರ್ನ್ ಉಬೆಂ ಅಸ್ಲ್ಲೆಂ.
ರಾಜುನ್ ಟ್ಯಾಕ್ಸಿಚೆಂ ಬಾಡೆಂ ದಿಲೆಂ. ಉಪ್ರಾಂತ್ ಟ್ರಂಕಾ ಘೆವ್ನ್, ತಿಂ ಮೆಟಾಂ ಚಡೊನ್ ಪಯ್ಲ್ಯಾ ಮಾಳಿಯೆಕ್ ಆಯ್ಲೆ. ಉಜ್ವ್ಯಾ ಕುಶಿಕ್ ನಿಮಾಣಿ ಕೊಟ್ರಿ ರಾಜುಚಿ ಅಸ್ಲ್ಲಿ. ತಾಣೆಂ ಬೀಗ್ ಉಗಡ್ಲೆಂ ಆನಿಂ ಕುಡಾಚೊ ಸ್ವಿಚ್ ಘಾಲೊ. ಕೂಡ್ ಉಜ್ವಾಡಾಂತ್ ಭರ್ಲೆಂ.
"ಹೆಂಚ್ ಪಳೆಯಾ, ಮ್ಹಜೆಂ ತೀನ್ ಕುಡಾಂಚೆಂ ರಾವ್ಳೆರ್ ಆನಿಂ ಹ್ಯಾ ವಿಶಾಲ್ ಸುವಾತೆಕ್ ಅಧಿಕಾರಿ ಹಾಂವ್ ಎಕ್ಲೊಚ್" ಹಾಸೊನ್ ರಾಜುನ್ ಸಾಂಗ್ಲೆಂ.
ಘರ್ ಬರೆಂಚ್ ಆಸ್ಲ್ಲೆಂ. ಏಕ್ ಸಾಲ್, ಬಿತರ್ಲೆಂ ಕೂಡ್ ರಾಂದ್ಪಾಚೆಂ ಕೂಡ್. ಕಾಕುಸ್ ಆನಿಂ ನ್ಹಾಣಿ ಬಿತರ್ಚ್ ಆಸ್ಲ್ಲಿ. ದಿಸಾಂಚ್ಯಾ ಚೊವೀಸ್ ವೊರಾಂಯಿ ನಳಾಚೆಂ ಉದಾಕ್ ಯೆತಾಲೆಂ. ಧಾ ಜಣಾಂಕ್ ವಸ್ತ್ ಕರುಂಕ್ ಪುರೊ ಆಸ್ಲ್ಲಿ ತಿ ಸುವಾತ್. ಬಿಲ್ಡಿಂಗಾ ಆಯ್ಲೆವಾರ್ ನವೆಂಚ್ ಬಾಂದ್ಲ್ಲ್ಯಾನ್, ಮಜ್ಭೂತ್ ಆಸ್ಲ್ಲೆಂ. ಸಾಲಾಂತ್ ಮದ್ಗಚ್ ಟೀಪಾಯ್ ಆನಿಂ ತಾಚೆರ್ ವಾಜಾಂತ್ ಜಿವಿಂ ಫುಲಾಂ ಸೊಭ್ತಾಲಿಂ. ಭೊಂವಾರಿಂ ತೀನ್ ಸೋಫಾ ಆಸ್ಲ್ಲೆ ಕುಶಿನ್ ಆಸ್ಲ್ಲೊ ಗೊಡ್ರೆಜ್ ಬ್ಯೂರೊ. ತಾಚೆರ್ ಟೆಲಿಫಂಕೆನ್ ರೇಡಿಯೊ. ವೊಣ್ತಿಂಕ್ ನಿಳ್ಸೊ ರಂಗ್ ಕಾದ್ಲ್ಲ್ಯಾನ್, ಉಜ್ವಾಡಾಕ್ ಬರೆಂಚ್ ಸೊಭ್ತಾಲೆಂ. ಚ್ಯಾರ್ ತಸ್ವೀರೆಂ ಶಿವಾಯ್ ಹೆರ್ ಕಾಂಯ್ ವೊಣ್ತಿಂಚೆರ್ ನಾತ್ಲ್ಲೆಂ.
ಶೀನಾನ್ ಆನಿಂ ಮೆಲ್ವಿನಾನ್ ಟ್ರಂಕಾಂ ಬಿತರ್ಲ್ಯಾ ಕುಡಾಂತ್ ದವರ್ಲಿಂ. ಆನಿಂ ಭಾಯ್ರ್ ಯೇವ್ನ್ ಸೊಫಾರ್ ಬಸ್ಲೆಂ. ರೇಡಿಯೊ ಚಾಲು ಕರ್ನ್, ರಾಜುಯಿ ತಾಂಚಾ ಸಾಂಗಾತಾ ಬಸ್ಲೊ. ದೊಗಾಂಯ್ಕಿ ಸಿಗ್ರೆಟ್ ದೀವ್ನ್, ರಾಜುನ್ ಏಕ್ ಪೆಟೈಲಿ. ಆನಿಂ ಧುಂವೊರ್ ಸೊಡ್ನ್ ತೊ ಮ್ಹಣಾಲೊ, - "ಪಳೆ ಮೆಲ್ವಿನ್, ಎಕಾ ಲೆಕಾನ್ ಎಕ್ಸುರೆಂ ತರೀ ಖುಶಾಲಯೆಚೆಂ ಜೀವನ್ ಹಾಂವ್ ಸಾರ್ತಾಂ. ಮನ್ಶಾಕ್ ಬರೆಂ ಕಾಮ್, ಹಾತ್ ಭರ್ ಪಾಗ್, ಏಕ್ ಬಿಡಾರ್. ಖರೆಂ ಮಿತ್ರ್ ಆಸ್ಲ್ಯಾರ್ ದುಸ್ರೆಂ ಕಿತೆಂ ಜಾಯ್? ಆತಾಂ ತುಮಿಂ ದೋಗ್ ಗಾಂವ್ವಾಲೆ ಮಿತ್ರ್ ಮ್ಹಾಕಾ ಮೆಳ್ಳ್ಯಾತ್. ಆಜ್ ಥಾವ್ನ್ ಎಕ್ಸುರೆಂ ಜೀವನ್ಯಿ ಅಖೇರ್ ಜಾಲೆಂ."
ದೊಗಿ ವೊಗೆಚ್ ರಾವ್ಲ್ಲೆ. ರಾಜುಚೆಂ ಸ್ವತಂತ್ರ್ ಆನಿಂ ಸುಖಿ ಜೀವನ್ ನಿಯಾಳ್ತಾನಾ, ಮೆಲ್ವಿನಾಕ್ ಆಪ್ಲೆಂ ಜೀವನ್ ದೊಳ್ಯಾಂ ಮುಖಾರ್ ಆಲೆಂ. ಅಪ್ರಾಧ್ಯಾಬರಿ ಘರಾ ಥವ್ನ್ ಘೆತ್ಲ್ಲಿ ಪೊಳಾಪೊಳ್... ಆನಿಂ ಹಾಂಗಾ ಯೇವ್ನ್ ರಾಜುಚ್ಯಾ ಹಂಗರ್ ಜೀವನ್ ಸಾರಿಜಾಯ್ಗಿ? ನಾ......ಖಂಯ್ಚೆಂ ಪುಣಿ ಕಾಮ್ ಪಳೆಂವ್ಚೆಂ ಅವಶ್ಯ್. ರಾಜುಚ್ಯಾ ಖುಸ್ತಾರ್ ಕಿತ್ಲೊ ತೇಂಪ್ ಜಿಯೆವ್ಯೆತ್.?
"ತುಮ್ಚ್ಯಾ ಮತಿಕ್ ರೇಡಿಯೊಚೆಂ ಗಾಯನ್ಂಚ್ ಸಮಾಧಾನ್ ದಿಂವ್ಚೆಂನಾ. ಪಯ್ಲೆಂ ಪೊಟಾಚಿ ಭುಕ್ ಪಳೆಂವ್ಚಿ ಗರ್ಜ್. ತುಮಿಂ ದೊಗಿ ನ್ಹಾವ್ನ್ ಯೆಯಾ. ಉಪ್ರಾಂತ್ ಸಕ್ಲಾ ಹೊಟೆಲಾಂತ್ ಆಮಿಂ ಜೆವಾಣ್ ಕರ್ಯಾಂ. ಘರಾಂತ್ ಬಟ್ಲೆರ್ ನಾ ಆನಿಂ ರಾಂದುಕ್ ಮ್ಹಾಕಾ ಕಳಾನಾ"
ಶೀನಾ ಆನಿಂ ಮೆಲ್ವಿನ್, ಎಕ್ಲ್ಯಾ ಪಾಟ್ಲ್ಯಾನ್ ಎಕ್ಲೊ ನ್ಹಾವ್ನ್ ಆಯ್ಲೆ. ಉಪ್ರಾಂತ್ ತೆಗೀ, ಸಕ್ಲಾ ಆಸ್ಚ್ಯಾ ಹಿಂದು ಹೊಟೆಲಾಂತ್ ಜೇವ್ನ್ ಆಯ್ಲೆ. ಪಾಟಿಂ ಯೇವ್ನ್ ಹಾಂತುಳ್ಣಾಕ್ ಪಾಟ್ ತೆಂಕ್ಲ್ಲಿಂಚ್ ಶೀನಾಕ್ ಆನಿಂ ಮೆಲ್ವಿನಾಕ್ ನಿದ್ರಾ ದೇವಿನ್ ವೆಂಗೊವ್ನ್ ಘೆತ್ಲೆಂ. ಪಯ್ಣಾಚ್ಯಾ ಪುರಾಸಾಣೆನ್, ತಾಂಕಾಂ ಸ್ವಸ್ಥ್ ನೀದ್ ಆಯ್ಲಿ.
ಸಕಾಳಿಂ ತೆ ಉಟ್ತಾನಾ ವೊರಾಂ ಸಾಡೆ - ಆಟ್ ಜಾಲ್ಲಿಂ. ರಾಜು ಆಫಿಸಾಕ್ ಭಾಯ್ರ್ ಸರ್ತಾಲೊ. ತಾಂಕಾಂ ಪಳೆಲ್ಲೆಂಚ್ ಹಾಸೊನ್ ಮ್ಹಣಾಲೊ.
"ಓ......ದೊಗೀ ಉಟ್ಲ್ಯಾತ್ಗಿ? ಆಜ್ ತುಮ್ಕಾಂ ಉಟಂವ್ಚೊಂನಾ ಮ್ಹಣ್ ಚಿಂತ್ಲ್ಲೆಂ ಹಾಂವೆಂ. ತೊಂಡ್ ಧುವ್ನ್ ಯೇವ್ನ್, ಹೊಟೆಲಾಂತ್ಚ್ ಚಾ - ನಷ್ಟೊ ತಿರ್ಸಿಯಾ. ಹಾಂವ್ ಆತಾಂ ಆಫಿಸಾಕ್ ಚಲ್ತಾಂ. ಸಾಂಜೆರ್ ಪಾಟಿಂ ಯೆತೊಲೊಂ. ತುಮ್ಕಾಂ ಏಕ್ ಚತ್ರಾಯ್ ದಿತಾಂ. ಖಂಯ್ ಭಾಯ್ರ್ ಭೊವೊಂಕ್ ಪುಣಿ ವೊಚಾನಾಕಾತ್. ವಾಟ್ ಚುಕಾತ್ ಜಾಲ್ಯಾರ್ ವಾಂದೆ ಜಾತಿತ್. ಹಾಂವ್ ಯೆತ್ಚ್, ತೆಗೀ ಭೊವೊಂಕ್ ಚಲ್ಯಾಂ" ಆಶೆಂ ತಾಂಕಂ ಚತ್ರಾಯ್ ಸಾಂಗೊನ್, ರಾಜು ಆಫೀಸಾಕ್ ಚಲ್ಲೊ.
ಶೀನಾ ಆನಿಂ ಮೆಲ್ವಿನಾನ್ ಬೊಂಬೈತ್ಲೊ ಪಯ್ಲೊ ದೀಸ್ ಪ್ರಾರಂಭ್ ಕೆಲೊ. ಕರುಂಕ್ ಕಾಂಯ್ ಕಾಮ್ ನಾ, ಉಲಂವ್ಕ್ ಕೊಣೀ ವಳ್ಕಿಚೆನಾಂತ್. ದೊಗೀ ಚಾ ಪಿಯೆವ್ನ್ ಯೇವ್ನ್ ಕುಡಾಂತ್ ಬಸ್ಲೆ ಆನಿಂ ಜನೆಂತ್ಲ್ಯಾನ್ ರಸ್ತ್ಯಾಕ್ ದಿಷ್ಟ್ ಲಾವ್ನ್ ಬಸ್ಲೆ. ಪಾಶಾರ್ ಜಾಂವ್ಚ್ಯಾ ಅಸಂಖ್ಯಾತ್ ವಾಹನಾಂಕ್ ಮೆಚ್ಚೆಂ ಸೊಡ್ನ್ ದುಸ್ರೆಂ ತಾಂಕಾಂ ಕಾಮ್ ಕಸಲೆಂಚ್ ನಾತ್ಲ್ಲೆಂ.
ತೊ ದೀಸ್ ತಸೊ ಪ್ರಾರಂಭ್ ಜಾತಾನಾ, ಮಂಗ್ಳೂರಾಂತ್ ದುಸ್ರಿಚ್ ಗಜಾಲ್ ಘಡ್ಲ್ಲಿ. ಬಂದ್ರಾರ್ ಪೊಲಿಸ್ ಸ್ಟೇಶನಾಂತ್ ಸಬ್-ಇನ್ಸ್ಪೆಕ್ಟರ್ ವೆಂಕಟ, ಇಂಡಿಯಾಂತ್ಲ್ಯಾ ಮುಖ್ಯ ಶಹರಾಂತ್ಲ್ಯಾ ಪೊಲಿಸ್ ಸ್ಟೇಶನಾಂಕ್ ಪಾಟಂವ್ಕ್ ಏಕ್ ವರ್ದಿ ತಯಾರ್ ಕರ್ತಾಲೊ. ಶೀನಾನ್ ಚೊರಿ ಕೆಲ್ಯಾ ಮ್ಹಳ್ಯಾಕ್ ಸಾಕ್ಸ್ ಘಟ್ಟ್ ಮೆಳ್ಲ್ಲಿ.
ತೆ ದೋನ್ ದೀಸ್ ರಂಗಣ್ಣಾಚ್ಯಾ ವಾಂಟ್ಯಾಕ್ ಯೆಮ್ಕೊಂಡಾಬರಿ ದಿಸ್ಲ್ಲೆ. ಪೊಲಿಸ್ ಸ್ಟೇಶನಾಕ್ ತೊ ಕಾಂಯ್ ಉಣೆಂ ಮ್ಹಳ್ಯಾರ್ ಪಂಚ್ವೀಸ್ ಪಾವ್ಟಿಂ ಧಾಂವೊನ್ ಆಯಿಲ್ಲೊ. ಪೊಲಿಸಾಂಚ್ಯಾ ತ್ಯಾ ಆಡ್ ಸವಾಲಾಂಕ್, ವಿಚಾರ್ಲ್ಯಾಕ್ ಜಾಪಿ ದೀವ್ನ್ ದೀವ್ನ್ ತಾಚಿ ತಕ್ಲಿ ಪಿಶಿ ಜಾಲ್ಲಿ. ತಾಂಚೆಂ ಏಕ್ಚ್ ಸವಾಲ್ ಜಾವ್ನಾಸ್ಲ್ಲೆಂ ಶೀನಾ ಖಂಯ್ ಆಸಾಗಿ ಮ್ಹಣ್. ತ್ಯಾ ಸವಲಾಕ್ ರಂಗಣ್ಣಾ ಕಶಿ ಜಾಪ್ ದಿತೊಲೊ. ತಾಣೆಂ ಪ್ರಮಾಣ್ ಕರ್ನ್ ಸಾಂಗ್ಲೆಂ ಕಿ, ಆಪುಣ್ ಕಾಂಯ್ಚ್ ನೆಣಾ ಮ್ಹಣ್. ತರೀ, ಪೊಲಿಸ್ ಪಾತ್ಯೆಲೆನಾಂತ್. ವಳ್ಕಿಚೊ ಅಬ್-ಇನ್ಸ್ಪೆಕ್ಟರ್ ವೆಂಕಟ ನಾತ್ಲ್ಲೊ ತರ್ ರಂಗಣ್ಣಾನ್ ಪೊಲಿಸಾಂಚೆ ಮಾರ್ಯಿ ಖಾಂವ್ಚೆ ಪಡ್ತಾ ಕೊಣ್ಣಾ.
ಪೊಲಿಸಾಂಕ್ ಶಿನಾನ್ಂಚ್ ಚೊರಿ ಕೆಲ್ಯಾ ಮ್ಹಳ್ಳ್ಯಾಕ್ ರುಜ್ವಾತ್ ಮೆಳೊಂಕ್ ನಾತ್ಲ್ಲಿ. ತಾಂಕಾಂ ಮುಖ್ಯ ಜಾವ್ನ್ ಏಕ್ ರುಜ್ವಾತ್ ಜಾಯ್ ಆಸ್ಲ್ಲಿ. ಸಾವ್ಕಾರ್ ಪಾವ್ಲ್ ಶೆಟಿಚ್ಯಾ ಉತ್ರಾ ಬಗಾರ್ ದುಸ್ರೊ ಕಸಲೊಚ್ ಹಿಶಾರೊ ತಾಂಕಾಂ ನಾತ್ಲ್ಲೊ ಪಾವ್ಲ್ ಶೆಟಿಕ್ ಉರ್ವಾಂತ್, ಭಿಯಾಂಚೊ ಕಾರ್ಖಾನೊ ಆಸ್ಲ್ಲೊ. ಆಫಿಸ್ಯಿ ಥಂಯ್ಚ್. ತ್ಯಾ ದಿಸಾ ತಾಣೆ ವಸೂಲಿಚೆ ಪಾಂಚ್ ಹಜಾರ್ ರುಪಯ್ ಆಫಿಸಾಕ್ ಹಡ್ಲ್ಲೆ. ತೊ ರಾವ್ತಾಲೊ ಹಂಪನ್ಕಟ್ಟಾರ್ ಜಾಲ್ಲ್ಯಾನ್ ಸಾಂಜೆಚ್ಯಾ ವೆಳಾರ್ ಪಯ್ಶೆ ಘರಾ ವೊರ್ಚೆ ಬರೆ ನ್ಹಂಯ್ ಮ್ಹಣ್ ಆಫಿಸಾಂತ್ಚ್ ತಿಜೋರಿಂತ್ ದವರ್ಲ್ಲೆ. ದುಸ್ರ್ಯಾ ಸಕಾಳಿಂ ಬೆಂಕಾಂತ್ ತೆ ಭರ್ಯೆತ್. ರಾತಿಂ ಕಾಂಯ್ ಭೆಂನಾ. ಕಿತ್ಯಾಕ್ ದೀಸ್ ರಾತ್ ಎಕ್ಲೊ ಪಾರೊ ಆಸಾ.
ಶೀನಾ ಸಗ್ಳ್ಯಾ ವಾಡ್ಯಾಂತ್ಚ್ ನಾಂವಾಡ್ಲೊಲೊ ಕೇಡಿ ಧಾಕ್ಟ್ಯಾ ಭುರ್ಗ್ಯಾ ಥಾವ್ನ್ ಪೊಂಡಾ ದೆಗೆಕ್ ಪಾವ್ಲ್ಲೆ ಮ್ಹಾತಾರೆ ಸರ್ವ್ ಜಾಣಾಂತ್ ಶೀನಾಕ್ ತ್ಯಾ ರಾತಿಂ ವೇಳ್ ಕರ್ನ್ ಆಫೀಸಾಥಾವ್ನ್ ಘರಾ ಭಾಯ್ರ್ ಸರ್ಲ್ಲ್ಯಾ ಶೆಟಿಕ್ ಕಾರ್ಖಾನ್ಯಾಚ್ಯಾ ಭೊವಾರಿಂ ಶೀನಾ ಭೊಂವ್ಚೊ ದಿಷ್ಟಿಕ್ ಪಡ್ಲ್ಲೊ. ತಾಣೆಂ ತಿತ್ಲೆಂ ಗಣ್ಣೆ ದಿಲೆಂನಾ ತಾಚ್ಯಾ ಚಾಲಿಕ್. ಕಿತ್ಯಾಕ್ ಲಾಗ್ಸಾರ್ಚ್ ಶೀನಾಚೆಂ ಘರ್. ಸಾಂಜೆವೆಳಾರ್ ಶೀನಾಕ್ ಥಂಯ್ - ಹಾಂಗಾ ಭೊಂವ್ಚಿಂ ಸವಯ್, ಸಕ್ಕಡ್ಯಿ ಜಾಣಾಂ. ಪಾವ್ಲ್ ಶೆಟ್, ಮತಿಂತ್ ಕಾಂಯ್ ಸಂಶಯ್ ಕರಿನಾಸ್ತಾಂ ಘರಾ ಚಲ್ಲೊ.
ಪುಣ್ ಘರಾ ಪಾವ್ಲ್ಯಾ ನಂತರ್, ತಾಚ್ಯಾ ಕಾಳ್ಜಾಂತ್ ಕಿತೆಂ ಕಿತೆಂ ಭೊಗ್ಣಾಂ ಉದೆಲಿಂ. ಶೀನಾಚೆಂಚ್ ರುಪ್ಣೆಂ ದೊಳ್ಯಾಂ ಮುಖಾರ್ ನಾಚೊಂಕ್ಲಾಗ್ಲೆಂ. ಪಾಂಚ್ ಹಜಾರ್ ರುಪಯ್..... ಲ್ಹಾನ್ ಐವಜ್ ಕಾಂಯ್ ನ್ಹಂಯ್. ಆಪ್ಣೆಂ ಪಿಶೆಂಪಣ್ ಕೆಲೆಂ ಪಯ್ಶೆ ಆಫಿಸಾಂತ್ ಸೊಡ್ನ್. ಕೆದಾಳಾಚ್ ತಶೆಂ ಆಪ್ಣೆಂ ಕೆಲ್ಲೆಂ ನಾ. ಆತಾಂ ಹಿ ಖಬಾರ್ ಶೀನಾ ವ ದುಸ್ರ್ಯಾ ಚೊರಾಂಕ್ ಕಳೊನ್.......
ಛೆ, ತಶೆಂ ಕಶೆಂ ಜಾಂವ್ಚೆಂ? ಆಪ್ಣೆ ಪಯ್ಶೆ ಹಾಡ್ಲ್ಲಿ ಖಬಾರ್ ಕೊಣ್ಂಚ್ ನೆಣಾ. ಆನಿಂ ಎಕಾ ವೆಳಾರ್ ಕೊಣೀ ಜಾಣಾಂಚ್ ಜಾಲೊ ತರ್, ಪಯ್ಶೆ ಆಪಹರ್ಸುಂಚೆಂ ಸುಲಭಾಯೆಚೆಂ ಕಾಮ್ ನ್ಹಂಯ್. ತಿಜೋರಿ ಪೊರ್ನಿ ತರೀ ಭದ್ರ್ ಆಸಾ. ತ್ಯಾ ಶಿವಾಯ್, ಪಾರೊ ಆಸಾ.....ಆಪ್ಣಾಚಿಂ ಭೆಷ್ಟಿಂ ಚಿಂತ್ನಾಂ.
ತರೀ ಮತಿಕ್ ಸಮಾಧಾನ್ ಮೆಳ್ಳೆಂನಾ. ಶೆಟಿಕ್ ರಾತಿಂ ದೊಳ್ಯಾಂಕ್ ದೊಳೊ ಆಡ್ ಜಾಲೊನಾ. ಫಾಂತ್ಯಾರ್ ಪಾಂಚ್ ಜಾತಾನ್ಂಚ್ ಉಟ್ಲೊ. ವೆವೆಗಿಂ ತೊಂಡ್ ಧುಲೆಂ ಆನಿಂ ಕಾಫಿ ಪಿಯೆವ್ನ್, ಆಫಿಸಾಕ್ ಧಾಂವ್ಲೊ. ಪುಣ್ ಥಂಯ್ ಪಾವೊನ್ ಬಾಗಿಲ್ ಉಗಡ್ತಾನಾ ಕಿತೆಂ ಪಳೆತೆಲೊ? ಪಳೆತಾಲೊ? ತಿಜೋರಿ ಪೊಡ್ನ್ ಆಸ್ಲ್ಲಿ. ದುಡು ನಪೈಂಚ್ ಜಾಲ್ಲೊ. ಶೆಟಿಚೆಂ ಕಾಳಿಜ್ ರಾವಾನಾತ್ಲ್ಲೆಂ ಆಜ್ಯಾಪ್ಚ್ ಸಯ್! ಪುಣ್ ಬಾಂದ್ಲ್ಲೊ ಉಸ್ವಾಸ್ ಪರ್ತ್ಯಾನ್ ಸೊಡುಂಕ್ ತಾಕಾ ದೋನ್ ಮಿನುಟಾಂ ಲಾಗ್ಲಿಂ.
ಆಕ್ಲಾಸಾಚಿ ಬೋಬ್ ದಿಲಿ ತಾಣೆಂ. ಪಾರ್ಯಾಗಾರಾಕ್ ಆಪೊವ್ನ್ ವಿಚಾರ್ಲೆಂ......ಕಾಂಯ್ಚ್ ಕಳ್ಳೆಂನಾ. ಪಾರ್ಯಾಗಾರಾನ್ ಪರ್ಮಾಣ್ ಸಯ್ತ್ ಕೆಲೆಂ - ರಾತಿಂ ಮೆಲ್ಲೆಂ ಲೆಗುನ್ ಕಾರ್ಖಾನ್ಯಾಚ್ಯಾ ಭೊಂವ್ತಿಂ ಆಯಿಲ್ಲೆಂ ನಾ ಮ್ಹಣ್. ಶೆಟಿಕ್, ಕಿತೆಂ ಕರ್ಚೆಂ ಕಳ್ಳೆಂನಾ. ಉಟಾಂ ಉಟಿಂ ಪೊಲಿಸ್ ಸ್ಟೇಶನಾಕ್ ಧಾಂವ್ಲೊ ತೊ.
ಗಾಂವಾರ್ ನಾಂವಾಡ್ಲೊಲೊ ವ್ಯಾಪಾರಿಸ್ತ್. ಇನ್ಸ್ಪೆಕ್ಟರಾನ್, ಮರ್ಯಾದಿನ್ ಶೆಟಿಕ್ ಬಸವ್ನ್, ಹುನಾರ್ ಹುನ್ ವ್ಯಾಜ್ ಹಾತಿಂ ಘೆತ್ಲೊ. ಪಾವ್ಲಾಬಾನ್ ಆಪ್ಣಾಕ್ ಆಸ್ಲ್ಲೊ ಏಕ್ಚ್ ಸಂಶಯ್, ಶೀನಾಚೆಂ ನಾಂವ್ ಸಾಂಗ್ಲೆಂ. ತ್ಯಾ ಪರಿಂ, ಪೊಲಿಸ್ ಸಕಾಳಿಂಚ್ ಶೀನಾಚ್ಯಾ ಸೊಧ್ನೆಕ್ ಆಯಿಲ್ಲೆ. ಪುಣ್ ತೊ ಗಾಂವ್ ಸೊಡ್ನ್ ಧಾಂವ್ಲಾ ಮ್ಹಣ್ ಕಳೊನ್ ಆಯ್ಲೆಂ. ಚೊರಿ ಶೀನಾನ್ಂಚ್ ಕೆಲ್ಯಾ ಮ್ಹಣ್ ತಾಂಕಾಂ ಖಚಿತ್ ಜಾಲೆಂ. ಪುಣ್ ಏಕ್ಯಿ ಸಾಕ್ಸ್ ನಾ. ಶೀನಾಂಚ್ ಮೆಳ್ಲ್ಲೊ ಜಾಲ್ಯಾರ್ ಸಗ್ಳಿ ಖಬಾರ್ಚ್ ಉಜ್ವಾಡಾಕ್ ಯೆತಿ... ಪುಣ್ ತಾಕಾ ಖಂಯ್ ಸೊಧ್ಚೆಂ?
"ಪಾವ್ಲ್ ಶೆಟಿಚೆ ಪಯ್ಶೆ ಶೀನಾ ಚೋರ್ನ್ ಧಾಂವ್ಲಾಂ.." ಖಬಾರ್ಚ್ ಖಬಾರ್ ಜಾಲಿ ಗಾಂವಾರ್. ಸಾಂಗಾತಾ ನಶಿಬಾನ್, ಮೆಲ್ವಿನಾಚೆಂ ನಾಂವ್ ಆಯ್ಲೆಂನಾ. ವಿತೊರಾಬಚ್ಯಾ ಸಾಂಗ್ಣೆಂ ಪ್ರಕಾರ್ ರಂಗಣ್ಣಾನ್ ಪೊಲಿಸಾಂಕ್ ಮೆಲ್ವಿನಾಚೆಂ ನಾಂವ್ ಕಳೈಲೆಂನಾ. ತ್ಯಾ ಶಿವಾಯ್, ಮೆಲ್ವಿನ್ ಆನಿಂ ಶೀನಾ ಏಕ್ಚ್ ಪಾವ್ಟಿಂ ನಾ ಜಾಲ್ಯಾತ್ ತೆಂ ಖರೆಂ. ಪುಣ್, ತೆ ಸಾಂಗಾತಾಚ್ ಗೆಲ್ಯಾತ್ ಮ್ಹಣ್ ಕಶೆಂ ಸಾಂಗ್ಚೆಂ? ಅನಿಂ ಮೆಲ್ವಿನ್ ಖಂಡಿತ್ ಜಾವ್ನ್ ಕಸಲ್ಯಾಯಿ ಚೊರಿಯೆಚ್ಯಾ ಲಫ್ಡ್ಯಾಂತ್ ಭರ್ಸೊಂಚೊ ನಾ ಮ್ಹಣ್ ದೊಗಾಂಯ್ಕಿ ಕಳಿತ್ ಆಸ್ಲ್ಲಿ ಗಜಾಲ್. ದೆಕುನ್ ಜಾಯ್ ಮ್ಹಣ್ ತಾಣಿಂ ಮೆಲ್ವಿನಾಚೆಂ ನಾಂವ್ ಉಜ್ವಾಡಾಕ್ ಹಾಡ್ಲೆಂನಾ. ವಿತೊರಾಬಾನ್ ಆನಿಂ ಜಿಲ್ಲಿಬಾಯೆನ್, ಕೊಣೀ ಮೆಲ್ವಿನ್ ನಾಂಗಿ ಮ್ಹಣ್ ವಿಚಾರ್ಲ್ಲ್ಯಾಕ್ ತೊ ಬೆಂಗ್ಳೂರ್ ಗೆಲಾ ಮ್ಹಣ್ ಜಾಪ್ ದಿಲಿ.
ಪೊಲಿಸ್ ಸಾಧನ್ ಕರ್ತಾಲೆ ಏಕ್ ಅಧಾರ್ ಮೆಳೊಂಕ್. ಆನಿಂ ತಿ ರುಜ್ವಾತ್ ಮೆಳೊಂಕ್, ತಾಕಾ ಚಡ್ ದೀಸ್ ಗೆಲೆನಾಂತ್. ಪರ್ತ್ಯಾನ್ ಅನಿಂ ಪರ್ತ್ಯಾನ್ ಪ್ರಯತ್ನ್ ಕರ್ಚ್ಯಾ ಪೊಲಿಸಾಂಕ್, ಆಖ್ರೇಕ್ ಪಾರ್ಯಾಗಾರಾಚೊ ಸಂಶಯ್ ಮಾರ್ಲೊ. ತಾಕಾ ಧಮ್ಕಿ ದೀವ್ನ್, ಆಡ್ಡಾ ದಿಡ್ಡಿ ಸವಾಲಾಂ ವಿಚಾರ್ಲ್ಯಾ ಉಪ್ರಾಂತ್ ಸತ್ ಉಜ್ವಾಡಾಕ್ ಆಲೆಂ ಶೀನಾನ್ ಚೊರಿ ಕೆಲ್ಯಾ ತಿ ಖರಿ, ಆನಿಂ ತ್ಯಾ ಚೊರಿಯೆಂತ್ ಸಹಾಯ್ ಜಾವ್ನ್ ಆಪುಣ್ಯಿ ಮೆಳ್ಳಾಂ ಮ್ಹಣ್ ಪಾರ್ಯಾಗಾರಾನ್ ತೊಂಡ್ ಸೊದ್ಲೆಂ. ಆನಿಂ ಶೀನಾನ್ ಹ್ಯಾ ಬಾಬ್ತಿನ್ ಪಾಂಯ್ಶಿಂ ರುಪಯ್ ತಾಕಾ ದಿಲ್ಯಾತ್ ಮ್ಹಣೊನ್ಯಿ ಕಳೊನ್ ಆಯ್ಲೆ. ಉಪ್ರಾಂತ್ ಪೊಲಿಸಾಂನಿ ಘಳಾಯ್ ಕೆಲಿನಾ. ಉಟಾಉಟಿಂ ಶೀನಾಚ್ಯೊ ತಸ್ವೀರ್ಯೊ ಆನಿಂ ವಿವರಣ್ ಬೊಂಬಯ್, ಮದ್ರಾಸ್, ಕಲ್ಕತ್ತಾ, ಡೆಲ್ಹಿ, ಬೆಂಗ್ಳೂರ್ ಇತ್ಯಾದಿ ಶಹರಾಂತ್ಲ್ಯಾ ಪೊಲಿಸ್ ಸ್ಟೇಶನಾಕ್ ಗೆಲೆಂ. ಖುದ್ದ್ ಸಬ್-ಇನ್ಸ್ಪೆಕ್ಟರ್ ವೆಂಕಟಾನ್ ವಿವಿಧ್ ಪೊಲಿಸ್ ಸ್ಟೇಶನಾಂಕ್ ಪರ್ತಾಂ ಲಿಖ್ಲಿಂ ಆನಿಂ ಶೀನಾ ಖಂಯ್ ಅಸ್ಲ್ಯಾರಿ ಸೊಧುನ್ ಕಾಡ್ನ್ ಉಟಾಉಟಿಂ ಮಂಗ್ಳೂರಕ್ ಪಾಟೈಜಾಯ್ ಮ್ಹಣ್ ವಿನಂತಿ ಕೆಲಿ.
ಮಂಗ್ಳೂರಾಂತ್ ವ್ಹಡ್ಲಿ ಖಬಾರ್ ಜಾಂವ್ಕ್ ಪಾವ್ಲಿ ಹಿ. ಸಕ್ಡಾಂಚ್ಯಾ ತೊಂಡಾಂತ್ಯಿ ಹೆಂಚ್ ಉಲವ್ಣೆ. ರಂಗಣ್ಣ ಮಾತ್ರ್, ತಕ್ಲೆರ್ ಮುಡೊ ವ್ಹಾವವ್ನ್ ಘೆತ್ಲ್ಲ್ಯಾ ಜಿನ್ಸಾರ್ ಕಳ್ವಳ್ಳೊ. ಸಗ್ಳೊಚ್ ಪಿಸಾಂತುರ್ ಜಾಲ್ಲ್ಯಾ ಬರಿ ಜಾಲೊ ತೊ. ಖಂಯ್ ಗೆಲ್ಯಾರಿ ಲೋಕ್ ಉಲೈತಾ. ವೊಪಾರಿಂನಿ ಸವಾಲಾಂ ಘಾಲ್ತಾ. ಹಾಸ್ತಾ...ಪುತಾಚ್ಯಾ ಕರ್ಮಾನ್ ಬಿರ್ಮೊತ್ ತ್ಯಾ ಸತ್ತು ಮನ್ಶಾಚೆರ್ಯಿ ಆಸಲೆಂ ಖತ್ ಆಯ್ಲೆಂ.
ಆನಿಂ ಮೆಲ್ವಿನಾಚ್ಯಾ ನಿರ್ಗಮನಾನ್ ತೊ ಬಾಪುಯ್ ಆನಿಂ ಆವಯಿ ಪುರ್ತಿಂ ನಿರಾಶೆಚ್ಯಾ ಗದಿಕ್ ಪಾವ್ಲ್ಲಿಂ. ಎಕಾಮೆಕಾಕ್ ಸಮಾಧಾನ್ ಕರ್ಚೆಂ ಕೊಣೆಂ? ವಿತೊರಾಬ್ ರಂಗಣ್ಣಾಕ್ ಧೈರ್ ದಿತಾಲೊ. ರಂಗಣ್ಣಾ ವಿತೊರಾಬಾಕ್ ಸಮಾಧಾನ್ ಸಾಂಗ್ತಾಲೊ. ಪುಣ್ ಕಾಳ್ಜಾಂತ್ಲೆಂ ದುಃಖ್ ಆನಿಂ ನಿರಾಶಾ ತೆಚ್ ಜಾಣಾಸ್ಲ್ಲೆ.
"ಭಿಯೆನಾಕಾ ರಂಗಣ್ಣಾ ನಶಿಬಾಂತ್ ಆಸ್ಲ್ಲೆಂ ಭೊಗುಂಕ್ ಮೆಳ್ಳೆಂ ಆಮ್ಕಾಂ. ರಡೊನ್ ಕಿತೆಂ ಪ್ರಯೋಜನ್ ಆತಾಂ?" ವಿತೊರಾಬ್ ಮ್ಹಣಾಲೊ.
"ರಡೊನ್ಯಿ ಪ್ರಯೋಜನ್ ನಾ, ವಾಂಚೊನ್ಯಿ ಪ್ರಯೋಜನ್ ನಾ. ಹಾಂವೆಂ ದೊಳೆ ದಾಂಪಿಜಾಯ್, ಉಪ್ರಾಂತ್ ಮ್ಹಜೆ ಕಷ್ಟ್ ಪರಿಹಾರ್ ಜಾತೆಲೆ" ರಂಗಣ್ಣಾನ್ ಜಾಪ್ ದಿಲಿ.
"ಆತಾಂ ಪೊಲಿಸಾಂಕ್ ಖಚಿತ್ ಜಾಲಾಂ ಶೀನಾನ್ಂಚ್ ಚೊರಿ ಕೆಲ್ಯಾ ಮ್ಹಣ್. ಸಂಸಾರಾಚ್ಯಾ ಖಂಯ್ಚ್ಯಾ ಕೊನ್ಶಾಂತ್ ಆಸ್ಲ್ಯಾರೀ ಪೊಲಿಸ್ ತಾಕಾ ಧರ್ತೆಲೆಚ್. ಉಪ್ರಾಂತ್ ಜೈಲಾಚೆಂ ಶಿತ್ ಶೀನಾಕ್ ಚುಕ್ಲ್ಲೆಂನಾ"
"ಜೈಲ್ಚ್ ನ್ಹಂಯ್ ಪರ್ಬೊ, ಫಾಶೆಚ್ಯಾ ಖಾಂಬ್ಯಾಕ್ ತರೀ ಚಡೊಂದಿ ತೊ. ತಸಲೊ ಪೂತ್ ಮ್ಹಾಕಾ ಜಲ್ಮೊಂಕ್ಚ್ ನಾ ಮ್ಹಣ್ ಸಾಂಗ್ತಾಂ ಹಾಂವ್" ಆಶೆಂ ಮ್ಹಣೊನ್ ರಂಗಣ್ಣಾ ಆಪ್ಲಿ ವಾಟ್ ಧರ್ನ್ ಗೆಲೊ. ವಿತೊರಾಬಾನ್ ದೀರ್ಘ್ ಶ್ವಾಸ್ ಸೊಡ್ಲೊ.
ತ್ಯಾ ಸಕಾಳಿಂ ವಿತೊರಾಬ್ ಆಫಿಸಾಕ್ ಭಾಯ್ರ್ ಸರೊನ್ ಗೆಲ್ಲೊ. ಜಿಲ್ಲಿಬಾಯ್, ಜಾಯ್ಗಿ ನಾಕಾ ಮ್ಹಳ್ಳ್ಯಾಬರಿ ರಾಂದ್ಪಾಚ್ಯಾ ಕಾಮಾರ್ ಪಡ್ಲಿ. ತಿಕಾ ಆತಾಂ ಕಾಮಾರ್ಯಿ ಮನ್ ನಾತ್ಲ್ಲೆಂ, ಖಾಣಾ ಜೆವ್ಣಾಂತ್ಯಿ ರೂಚ್ ನಾತ್ಲ್ಲಿ. ಆವ್ಚಿತ್, ಜನೆಂತ್ಲ್ಯಾನ್ ತಿಚಿ ದೀಷ್ಟ್ ಘರಾಂ ಕುಶಿಂ ಯೆಂವ್ಚ್ಯಾ ಎಕ್ಲ್ಯಾ ತರ್ನಾಟ್ಯಾಚೆರ್ ಪಡ್ಲಿ. ತಿ ಕುತೂಹಲಾನ್ ಭಾಯ್ರ್ ಆಯ್ಲಿ, ತಿತ್ಲ್ಯಾರ್ ತೊ ತರ್ಣಾಟೊಯಿ ಜಾಲಾಂತ್ ಯೇವ್ನ್ ಪಾವ್ಲೊ.
"ಮೆಲ್ವಿನಾಚೆಂ ಘರ್ ಹೆಂಚ್ ನ್ಹಂಯ್ಗಿ....?" ತಾಣೆಂ ಸವಾಲ್ ಕೆಲೆಂ.
"ವ್ಹಯ್..." ಜಪ್ ದಿಲಿ ಜಿಲ್ಲಿಬಾಯೆನ್ ’ಯೆ, ವಯ್ರ್ ಯೆ.... ತುಜಿ ವಳೊಕ್ ಮ್ಹಾಕಾ ಮೆಳ್ಳಿನಾ."
"ಹಾಂವ್ ಗಿಬ್ಬಾ...ಮೆಲ್ವಿನ್ ಆನಿಂ ಹಾಂವ್ ಎಕಚ್ ಕ್ಲಾಸಿಂತ್ ಶಿಕ್ತಾಂವ್" ಗಿಬ್ಬಾನ್ ಜಾಪ್ ದಿಲಿ.
"ಹಾಂ....ಹಾಂ....ಆತಾಂ ಕಳ್ಳೆಂ ಪುತಾ. ಮೆಲ್ವಿನ್ ಕೆದಾಳಾಯ್, ತುಜೆ ವಿಷ್ಯಾಂತ್ ಉಲೈತಾಲೊ ಬಸ್, ತುಕಾ ಹಾಂವ್ ಕಾಫಿ ಹಾಡ್ನ್ ಯೆತಾಂ" ಆಶೆಂ ಸಾಂಗ್ನ್ ಜಿಲ್ಲಿಬಾಯ್ ಬಿತರ್ ಗೆಲಿ.
ಪಯ್ಲ್ಯಾ ಪಾವ್ಟಿಂ ಮೆಲ್ವಿನಾಗೆರ್ ಆಯಿಲ್ಲೊ ಗಿಬ್ಬಾ. ಹಾಚ್ಯಾದಿಂ ಘರ್ ಪಳೆಂವ್ಕ್ ನಾ ತರೀ, ಘರ್ ಸೊಧುನ್ ಕಾಡುಂಕ್ ಕಷ್ಟ್ ಮಾರ್ಲೆನಾಂತ್ ತುಕಾ. ಮೆಲ್ವಿನ್ ಆಜ್ ಘರಾಚ್ ಆಸ್ತೊಲೊ ಮ್ಹಣ್ ಚಿಂತುಂನ್ ತೊ ಸಕಾಳಿಂಚ್ ಭಾಯ್ರ್ ಸರೊನ್ ಆಯಿಲ್ಲೊ. ಕದೆಲಾರ್ ಬಸೊನ್ ಆಸ್ಲ್ಲ್ಯಾ ಗಿಬ್ಬಾನ್ ಘರಾ ಭಿತರ್ ಭಾಯ್ರ್ ಎಕೊಡಿ ದೀಷ್ಟ್ ಘುಂವ್ಡಾಯ್ಲಿ. ಮೆಲ್ವಿನಾಚಿ ಝಳಕ್ ನಾತ್ಲ್ಲಿ.
ಜಿಲ್ಲಿಬಾಯ್ ಕಾಫಿ ಹಾಡ್ನ್ ಆಯ್ಲಿ. ಗಿಬ್ಬಾ ಕಾಫಿ ಪಿಯೆತಾನಾ ವಿಚಾರಿಲಾಗ್ಲೊ - "ಮೆಲ್ವಿನ್ ಖಂಯ್ ಭಾಯ್ರ್ ಗೆಲಾಗಿ ಮಾವ್ಶೆ?"
ಜಿಲ್ಲಿಬಾಯೆಕ್ ಕಿತೆಂ ಜಾಪ್ ದಿಂವ್ಚಿ ಕಳ್ಳಿನಾ. ದೊಳ್ಯಾಂನಿ ಉದೆಲ್ಲಿಂ ದುಃಖಾಂ ತಿಣೆಂ ಗಿಬ್ಬಾಕ್ ಕಳಾನಾಶೆಂ ಪುಸ್ಲಿಂ. ತಿ ವೊಗಿಚ್ ರಾವ್ಲಿ.
ಗಿಬ್ಬಾಕ್ ಮಿಸ್ತೆರ್ಸೊ ಜಾಲೊ. ಜಿಲ್ಲಿಬಾಯೆಚೆಂ ಬಾವ್ಲ್ಲೆಂ ತೊಂಡ್ ಪಳೆತಾನಾ, ತಾಕಾ ಕಿತೆಂಗ್ ವಾಯ್ಟ್ ಘಡ್ಲಾಂ ಮ್ಹಣ್ ಸುಸ್ತಾಲೆ. ಪುಣ್ ವಿಚಾರ್ಲ್ಲ್ಯಾ ಸವಾಲಾಕ್, ಜಾಪ್ ದೀನಾ ತಸಲೆಂ ದುಃಖಾಚೆಂ ಕಸಲೆಂ ಘಡಿತ್ ಸಂಭವ್ಲಾಂ ತೆಂ ತಾಚ್ಯಾ ಝಳ್ಕೆಕ್ ಆಯಿಲ್ನಾ.
"ಹಾಂವ್ ಮೆಲ್ವಿನಾಕ್ ಪಳೆಂವ್ಕ್ ಆಯಿಲ್ಲೊಂ ಮಾವ್ಶೆ. ತಾಣೆಂ ರಜೆಚ್ಯಾ ದಿಸಾ ಏಕ್ ಪಾವ್ಟಿಂ ಆಮ್ಗೆರ್ ಯೆ ಮ್ಹಣ್ ಮ್ಹಾಕಾ ಪರಾತಿಲ್ಲೆಂ. ತೊ ಖಂಯ್ ಪಯ್ಸ್ ಪಾವ್ಲಾ ಮ್ಹಣ್ ಚಿಂತ್ತಾಂ ಹಾಂವ್...."
"ವ್ಹಯ್ ಪುತಾ...... ಭಾರಿ ಪಯ್ಸ್ ತೊ ಪಾವ್ಲಾ....ಆಮ್ಕಾಂ ಖಬಾರ್ ನಾತ್ಲ್ಲ್ಯಾ ತಸಲ್ಯಾ ಪಯ್ಶಿಲ್ಯಾ ಗಾಂವಾಕ್ ಗೆಲಾ ಮ್ಹಜೊ ಪೂತ್...." ಉಲೈತಾನಾ ತಿಒ ತಾಳೊ ಫುಮಾರ್ಲೊ.
"ಪಯ್ಸ್ ಮ್ಹಳ್ಯಾರ್.....? ತುಮ್ಕಾಂ ಖಬಾರ್ ನಾ...! ಹಾಂಕ್ರೆಲೊ ಗಿಬ್ಬಾ.
"ತುಂ ವೇಳ್ ಕರ್ನ್ ಅಯ್ಲಾಯ್ ಗಿಬ್ಬಾ. ತುಜೊ ಈಷ್ಟ್ ಮಂಗ್ಳೂರಾಂತ್ ಅತಾಂ ನಾ. ತೊ ಆಮ್ಕಾಂ ಖಬಾರ್ ನಾಸ್ತಾಂ ಖಂಯ್ಚ್ಯಾ ಗಾಂವಾಕ್ ಧಾಂವ್ಲಾ ತೆಂ ದೆವಾಕ್ ಕಳಿತ್......" ತಿ ರಡ್ಲಿ.
"ಮೆಲ್ವಿನ್ ಧಾಂವ್ಲಾ! ಕಿತ್ಯಾಕ್?" ಗಿಬ್ಬಾನ್ ಬೋಬ್ ಮಾರ್ಲಿ.
"ತೆಂಚ್ ಸವಾಲ್ ಆಮಿಂ ಕೊಣೀ ನೆಣಾಂವ್. ಉಕಾ ತೊ ವೆಚ್ಯಾ ಆದಿಂ ಮೆಳ್ಲ್ಲೊಗಿ ಗಿಬ್ಬಾ? ತಾಣೆಂ ಕಾಂಯ್ ಹ್ಯಾ ವಿಶ್ಯಾಂತ್ ತುಕಾ ಹಿಶಾರೊ ದಿಲ್ಲೊಗಿ?"
"ನಾ ಬಿಲ್ಕುಲ್ ನಾ. ತೊ ಮ್ಹಾಕಾ ಮೆಳ್ಲ್ಲೊಯ್ ನಾ ಆನಿಂ ಧಾಂವೊಂಕ್ ತಾಕಾ ಕಸಲೆಂಚ್ ಕಾರಣ್ ಅಸ್ಚೆಂ ಹಾಂವ್ ನೆಣಾ. ವಿಚಿತ್ರ್ ಗಜಾಲ್ ಹಿ..." ತಾಕಾ ಆಜಾಪ್ಚ್ ಜಾಲೆಂ.
"ರಾವ್, ತೊ ವೆಚ್ಯಾ ಆದಿಂ ತಾಣೆಂ ಬರವ್ನ್ ದವರ್ಲ್ಲೆಂ ಕಾಗದ್ ತುಕಾ ದಾಕೈತಾಂ ಆಶೆಂ ಸಾಂಗೊನ್ ಜಿಲ್ಲಿಬಾಯೆನ್ ಬಿತರ್ ದವರ್ಲ್ಲೆಂ ಮೆಲ್ವಿನಾಚೆಂ ಕಾಗದ್ ಹಾಡ್ನ್ ಗಿಬ್ಬಾಕ್ ದಿಲೆಂ. ಗಿಬ್ಬಾನ್ ತೆಂ ಏಕ್ ಪಾವ್ಟಿಂ ವಾಚ್ಲೆಂ, ದುಸ್ರ್ಯಾ ಪಾವ್ಟಿಂ ವಾಚ್ಲೆಂ....
’ತುಮ್ಕಾಂ ಕಳೊಂವ್ಕ್ ಜಾಯ್ನಾ ಆಸ್ಚ್ಯಾ ಎಕಾ ಅನ್ವಾರಾಂತ್ ಸಾಂಪ್ಡೊನ್, ಆಜ್ ಘರ್ ಸೊಡ್ನ್ ಹಾಂವ್ ಚಲ್ತಾಂ.... ತರೀ ಅವ್ಮರ್ಯಾದ್ ಹಾಡ್ಚೆಂ ಕಸಲೆಂಚ್ ಕಾಮ್ ಹಾಂವೆಂ ಕರುಂಕ್ ನಾ..’ ಗಿಬ್ಬಾ ವಿಚಾರ್ ಕರುಂಕ್ ಪಡ್ಲೊ. ಕಸಲೆಂ ಅನ್ವಾರ್ ಹಾಬಾ ತೆಂ.... ?ಮೆಲ್ವಿನಾಚ್ಯಾ ಜಿಣಿಯೆಂತ್ ಕಸಲೆಂಚ್ ಅನ್ವಾರ್ ಯೇಂವ್ಕ್ ಕಾರಣ್ ನಾತ್ಲ್ಲೆಂ. ಬಹುಶಃ ಜೆಸ್ಸಿಚಿಚ್ ಗಜಾಲ್ಗಾಯ್..? ಹೆರಿಲಾಗಿಂ ಜೆಸ್ಸಿಚೆಂ ಕಾಜಾರ್ ಥಿರ್ ಜಾಲೆಂ ಕೊಣ್ಣಾಂ.
ಚಿಂತ್ತಾಂ ಚಿಂತ್ತಾಂ ತೆಂಚ್ ಕಾರಣ್ ವಾಜ್ಬಿ ದಿಸ್ಲೆಂ ಗಿಬ್ಬಾಕ್. ವ್ಹಯ್, ಖಂಡಿತ್ ಜಾವ್ನ್, ಮೆಲ್ವಿನ್ ಮೊಗಾಂತ್ ಸಲ್ವಾಲಾ, ಜ್ಸ್ಸಿಕ್ ಹೆರಿಲಾಗಿಂಚ್ ಕಾಜಾರ್ ಜಾಂವ್ಕ್ ಘರ್ಚ್ಯಾಂನಿ ವತ್ತಾಯ್ ಕೆಲ್ಯಾ ಆಸ್ತೆಲಿ. ದೆಕುನ್ ಮೆಲ್ವಿನ್ ನಿರಾಶಿ ಜಾವ್ನ್ ಪೊಳ್ನ್ ಎಲಾ. ಪಿಸೊ ಖಂಚೊ. ...ಖಂಯ್ ಜೀವ್ಘಾತ್ ಕರ್ನ್ ಘೆಂವ್ಕ್ ನಾಮೂ......ಗಿಬ್ಬಾಚೆಂ ತೊಂಡ್ ಗಂಭೀರ್ ಜಾಲೆಂ. ಕಪಲಾರ್ ಮಿರಿಯೊ ಉದೆಲ್ಯೊ,
"ತುಕಾ ಕಾಂಯ್ ಪುಣಿ ಕಳ್ಳೆಂಗಿ ಪುಣಿ ಕಳ್ಳೆಂಗಿ ಗಿಬ್ಬಾ?" ತಾಚ್ಯಾಚ್ ತೊಂಡಾಕ್ ದೆಖ್ತೆಲ್ಯಾ ಜಿಲ್ಲಿಬಾಯೆನ್ ಅತುರಾಯೆನ್ ವಿಚಾರ್ಲೆಂ.
ಪುಣ್ ಗಿಬ್ಬಾನ್ ಕಾಂಯ್ಚ್ ಘುಟ್ ಸಾಂಗ್ಲೊನಾ. ಆಪ್ಲಿಂ ಚಿಂತ್ನಾಂ ಲಿಪವ್ನ್ ತೊ ಮ್ಹಣಾಲೊ. "ಹಾಂವ್ ಕಾಂಯ್ ಸಾಂಗೊಂಕ್ ಸಕಾನಾ ಮಾವ್ಶೆ. ಹ್ಯಾ ಕಾಗ್ದಾಂತ್ ಕಸಲೊಚ್ ಹಿಶಾರೊ ಮೆಳಾನಾ"
"ತೊ ಖಂಯ್ ಧಾಂವ್ಲಾ ಮ್ಹಣ್ ಕೊಣ್ ಜಾಣಾ ಗಿಬ್ಬಾ? ನಿರಾಶೆನ್ ತಿ ಸುಸ್ಕಾರ್ಲಿ. :ಮ್ಹಾಕಾ ಘರಾಂತ್, ಪಿಶ್ಯಾಂಬರಿ ಜಾತಾ. ಹಾಂವೆಂ ಕಿತೆಂ ಕರ್ಚೆಂ ಸಾಂಗ್?"
"ಖಂತ್ ಕರಿನಾಕಾ ಮಾವ್ಶೇ. ಹಾಂವ್ ತಾಂಕ್ತಾಂ ತಿತ್ಲೆಂ ಪ್ರಯತ್ನ್ ಕರ್ತಾಂ. ಕಶೆಂ ಪುಣಿ ಕರ್ನ್, ಮೆಲ್ವಿನಾಚಿ ಖಬಾರ್ ಘೆಂವ್ಕ್ ಪಳೆತಾಂ. ತುಮಿಂ ಕಾಂಯ್ ಚಿಂತ್ತಾ ಕರಿನಾಕಾತ್. ದೆವಾಚಿ ಖುಶಿ ಮ್ಹಣ್ ಸಮ್ಜೊನ್, ಧೈರ್ ಘೆಯಾ." ಗಿಬ್ಬಾನ್ ಮ್ಹಳೆಂ.
"ವ್ಹಯ್....ಪುತಾ...ದುಸ್ರೆಂ ಕಿತೆಂ ಕರ್ಚೆಂ ಸಾಂಗ್... ಹಾಂವ್ ಮೆಲ್ವಿನಾ ಖಾತಿರ್ ಮಾಗ್ತಾಂ, ಖಂಯ್ ಆಸ್ಲ್ಯಾರಿ ತೊ ಬರ್ಯಾ ಥರಾನ್ ಆಸೊಂದಿ, ತಾಚೆಂ ಏಕ್ ಪುಣಿ ಬರ್ಯಾಪಣಾಚೆಂ ಕಾಗದ್ ಆಮ್ಕಾಂ ಯೇಂವ್ದಿ ಆನಿಂ ತೊ ವೆಗಿಂಚ್ ಗಾಂವಾಕ್ ಪಾಟಿಂ ಯೇಂವ್ದಿ ಮ್ಹಣ್"
"ತಸೆಂಚ್ ಜಾಂವ್ದಿ ಮಾವ್ಶೇ. ತುಜೆಂ ಮಾಗ್ಣೆಂ ದೇವ್ ಆಯ್ಕಾತಾಲೊ, ಬರೆಂ ಮಾವ್ಶೇ ಹಾಂವ್ ತರ್ ಚಲ್ತಾಂ: ಗಿಬ್ಬಾನ್ ಸಾಂಗ್ಲೆಂ.
’ನಾ...ನಾ, ತುವೆಂ ಆತಾಂ ವಚೊಂಕ್ ನಜೊ. ದನ್ಪರಾಂ ಜೆವಾಣ್ ಕರ್ನ್ ಸಾಂಜೆರ್ ವಚ್ಯೆತ್" ಜಿಲ್ಲಿಬಾಯೆನ್ ಮ್ಹಳೆಂ.
"ರಾವೊಂಕ್ ಆತಾಂ ಜಾಯ್ನಾ ಮಾವ್ಶೇ. ಹಾಂವ್ ಹಂಪನ್ಕಟ್ಟಾ ಎಕಾ ತುರ್ತಾಚ್ಯಾ ಕಾಮಾರ್ ಆಇಲ್ಲೊಂ. ತೊ ಹಾಂಗಾಂ ಪಾವ್ಲೊಂ. ವಯ್ಲ್ಯಾ ಆಯ್ತಾರ ಹಾಂವ್ ತುಮ್ಗೆರ್ ಖಂಡಿತ್ ಯೆತಾಂ. ತ್ಯ ದಿಸಾ ಸಕಾಳಿಂ ಆಯಿಲ್ಲೊಂ ಸಾಂಜೆರ್ಚ್ ವೆತಾಂ
"ಬರೆಂ ತರ್, ಖಂಡಿತ್ ಯೆ ಆಯ್ತಾರಾ ದೀಸ್. ಆಜ್ ಆಯಿಲ್ಲ್ಯಾಂಕ್ ತುಕಾ ಮ್ಹಸ್ತ್ ದೇವ್ ಬರೆಂ ಕರುಂ. ಮೆಲ್ವಿನಾ ವಿಶ್ಯಾಂತ್ ಖಬರ್ ಕಾಡುಂಕ್ ಪಳೆ.." ತಿಣೆಂ ಸಾಂಗ್ಲೆಂ.
"ಜರೂರ್ ಮಾವ್ಶೇ, ಬರೆಂ ತರ್..." ಆಶೆಂ ಸಾಂಗೊನ್ ಗಿಬ್ಬಾ ಚಲ್ಲೊ. ಲೇಡಿಹಿಲ್ ಥಾವ್ನ್ ಹಂಪನ್ಕಟ್ಟಾ ವೆಚ್ಯಾ ಬಸ್ಸಾರ್ ತೊ ಮತಿಂತ್ ಯೆತಾಲಿಂ. ಮೆಲ್ವಿನ್ ಖಂಡಿತ್ ಜಾವ್ನ್ ಬೊಂಬೈಕ್ ಪೊಳ್ಳಾ ಮ್ಹಣ್ ದಿಸ್ತಾ. ಬೊಂಬಯ್ ತಸಲ್ಯಾ ಗಾಂವಾಂತ್ ತಾಕಾ ಸೊಧುನ್ ಕಾಡ್ಚೆಂಯಿ ಭಾರಿ ಕಷ್ಟ್. ಆಪ್ಣಾಚೊ ಮಿತ್ರ್ ಜೊನಿ, ಬೊಂಬಯ್ ಆಸಾ. ತಾಕಾ ಮೆಲ್ವಿನಾಚಿ ಖಬಾರ್ ಬರವ್ನ್, ಕಂಯ್ ಪತ್ತೊ ಮೆಳ್ತಾಗಿ ಪಳೆಂವ್ಕ್ಜಾಯ್. ಮೆಲ್ವಿನಾನ್ ಆಶೆಂ ಕಿತ್ಯಾಕ್ ಕೆಲೆಂ......ಮೊಗಾಂತ್ ನಿರಾಶಿ ಜಾಲೊ ವ್ಹಯ್, ಪುಣ್ ಗಾಂವ್ ಸೊಡ್ನ್ ಪೊಳಾಪೊಳ್ ಘೆಂವ್ಚಿಂ ತ್ಸಲಿ ಗರ್ಜ್ ಕಿತೆಂ? ಆಪ್ಣಾಕ್ ಏಕ್ ಉತಾರ್ ನಿಮಾಣೆ ಸಾಂಗೊಂಕ್ ತಾಕಾ ವೇಳ್ ಮೆಳ್ಳೊನಾ?
ತೊ ಹಂಪನ್ಕಟ್ಟಾ ಯೇವ್ನ್ ಪಾವ್ಲೊ. ಥಂಯ್ಚಾ ಎಕಾ ಮೆಡಿಕಲ್ ಶೊಪಾಂತ್, ಥೊಡಿಂ ವಕ್ತಾಂ ಘೆತ್ಲಿಂ ಆನಿಂ ಘರಾ ಚಲ್ಲೊ.
ತೊ ದೀಸ್ ಸುಕ್ರಾರ್ ಜಾಲ್ಲ್ಯಾ ನಿಮ್ತಿಂ, ಮಂಗ್ಳೂರ್ಚ್ಯಾ ಸಿನೆಮಾ ಮಂದಿರಾನಿಂ ನವಿಂ ಪಿಂತುರಾಂ ಪ್ರಾರಂಭ್ ಜಾಲ್ಲಿಂ. ಬ್ರೆಸ್ತಾರಾ ದೀಸ್ ಆವ್ಚಿತ್ತ್ ಘಾಟಾಕ್ ಗೆಲ್ಲೆಂ ಸಿಂತಿ ಘಾಟಾಚೊ ಹವೊ, ಶಹರಾಂತ್ಲ್ಯಾ ಪಿಸೊಳ್ಯಾಕ್ ಬರೊ ಲಾಗ್ಲೊನಾ ಜಾಯ್ಜಾಯ್. ಸುಕ್ರಾರಾ ದನ್ಪರಾಂ ಸಿಂತಿ ಪಿಕ್ಚರಾಕ್ ಭಾಯ್ರ್ ಸರ್ನ್ ಗೆಲ್ಲೆಂ. ಸುಂದರ್ ಚೆಡ್ವಾಂಕ್ ಧರ್ಮಾರ್ಥ್ ಸಿನೆಮಾಕ್ ಆಪವ್ನ್ ವರ್ನ್, ಸ್ಮಾಜ್ ಸೆವಾ ಆದಾರ್ಚೆ ತರ್ನಾಟೆ ಗಾವಾಂತ್ ಮ್ಹಸ್ತ್ ಅಸ್ಲ್ಲೆ ಜಾಲ್ಲ್ಯಾನ್, ಸಿನೆಮಾ ಘರಾಂಕ್ಯಿ ಬರೊಚ್ ಆದಾಯ್ ಜಾತಾಲೊ. ಹ್ಯಾ ಪಾವ್ಟಿಂ ಸಿಂತಿಕ್, ಮೋಟರ್ ಸರ್ವಿಸ್ ಕಂಪೆನಿಚ್ಯಾ ಮ್ಹಾಲಕಾಚೊ ಪೂತ್ ಶೇಖರ್ ದೆಡೊ ಜವ್ನ್ ಭೆಟ್ಲ್ಲೊ. ತೊ ಗವರ್ನ್ಮೆಂಟ್ ಕೊಲೆಜಿಂತ್ ಇಂಟರಾಂಕ್ತ್ ಶಿಕ್ತಾಲೊ. ಬಾಪಾಯ್ಚೆ ದರಬಸ್ತ್ ಪಯ್ಶೆ ಮೆಳ್ತಾಲೆ ಜಾಲ್ಲ್ಯನ್ ಶೇಕರ್ ಖುಶಿ ಆಸ್ಲ್ಲ್ಯಾಬರಿ ಚೆಡ್ವಾಂ ಆನಿಂ ಸೊರ್ಯಾ ಪಾಟ್ಲ್ಯಾನ್ ಪಯ್ಶೆ ವೊತ್ತಾಲೊ.
ತ್ಯಾಚ್ ದಿಸಾ ಸಾಂಜೆರ್ ಮನೆಲಾಬ್ ಹಂಪನ್ಕಟ್ಟಾ ಎಕಾ ಗರ್ಜೆಚ್ಯಾ ಕಾಮಾನ್ ಪಾವ್ಲ್ಲೊ. ಥಂಯ್ ತಾಕಾ ಶೆಜಾರಿ ಇಂತ್ರಾಮ್ ಬೆಟ್ಲೊ. ಇಂತ್ರಾಮ್ ಉರ್ವಾ ಇಗರ್ಜೆಚ್ಯಾ ಪಾಟ್ಲ್ಯಾನ್ಂಚ್ ವಸ್ತಿ ಕರ್ತಾಲೊ. ತಾಕಾ ಲಾಂಕ್ಡಾಚೆಂ ಡಿಪೊ ಆಸ್ಲ್ಲೊ ಆನಿಂ ತಾಚೆಂ ಬಿಜ್ನೆಸ್ ಬರ್ಯಾ ಥರಾನ್ ಚಲ್ತಾಲೆಂ.
"ಹೋ, ಆಪ್ರೂಬ್ ಇಂತ್ರಾಮ್! ಭಾರಿ ತೆಂಪಾ ಉಪ್ರಾಂತ್ ಪಳೆಲೆಂ ತುಕಾ" ಸಾಂಗಾ ಲಾಗ್ಲೊ ಮನ್ವೆಲಾಬ್.
’ಕಿತೆಂ ಕರ್ಚೆಂ ಮನ್ವೆಲಾಬಾ. ಹ್ಯಾ ಕಾಮಾಂತ್ ಘಡಿಯೆಚಿ ಪುರ್ಸತ್ ಮೆಳಾನಾ. ಥಂಯ್ ಧಾಂವ್ ಹಾಂಗಾ ಧಾಂವ್ ಮ್ಹಣ್ ಮಿನುಟಾಚೊ ವೇಳ್ ನಾ ಮ್ಹಣ್ತಾಂ. ಹೆಂ.. ವಿತೊರಾಬಾಚೊ ಪೂತ್ ಮೆಲ್ವಿನ್ ಕಿತೆಂ ಬೊಂಬಯ್ ಗೆಲಾ ಖಂಯ್? ಕೊಲೆಜಿಚೆಂ ಶಿಕಾಪ್ ಕಾಬಾರ್ ಕೆಲೆಂವೇ ತಾಣೆಂ?"
"ಕೊಣ್ ಮ್ಹ್ಣ್ತಾ ತೊ ಬೊಂಬಯ್ ಗೆಲಾ ಮ್ಹಣ್. ದುಸ್ರೆ ಸಾಂಗ್ತಾತ್ ಬೆಂಗ್ಳೂರ್ ಏರ್ಪೋರ್ಸಾಂತ್ ಭರ್ತಿಂ ಜಾಲಾ ಮ್ಹಣ್ ಹಾಂವೆಂ ವಿತೊರಾಬಾಲಾಗಿಂ ವಿಚಾರ್ಲ್ಲ್ಯಾಕ್ ತೊ ಮ್ಹಣ್ತಾಂ ಕಾಮಾ ನಿಮ್ತಿಂ ಮದ್ರಾಸ್ ಪಾವ್ಲಾ ಮ್ಹಣ್. ಖರಿ ಗಜಾಲ್ ಹಾಂವ್ ಜಾಣಾಂ, ಸಾಂಗ್ತಾಂ ತುಕಾ. ಏಕ್ ವರ್ಸ್ ಕೊಲೆಜಿಕ್ ಧಾಡಿಜಾಯ್ ಜಾಲ್ಯಾರ್ ಜಿವಾರ್ ಆಯ್ಲೆಂ. ತಾಂಕಾಂ ಪಯ್ಲೆಂಚ್ ಜಾಗ್ವಣಿ ದಿಲ್ಲಿ ಹಾಂವೆಂ ಹಾಂಕಾಂ ಉಂದ್ರಾಂಕ್ ಲೊಂಕ್ಡಾಚೊ ವ್ಯಾರ್ ನಾಕಾ ಮ್ಹಣ್. ಮ್ಹಾಕಾ ಖಂಡಿತ್ ಜಾಲಾಂ, ಚೆಡೊ ಕೊಲೆಜ್ ಸೊಡ್ನ್ ನೇವಿಂತ್ ಭರ್ತಿ ಜಾಲಾ. ತೊ ಕೊಚ್ಚಿ ಗೆಲಾ ಇಂತ್ರಾಮಾ".
"ಕೊಣ್ ಉಡ್ತಾಗಿ ತೊ ಪಡ್ತಾ ಮನ್ವೆಲಾಬಾ. ಮಾಂದ್ರೆ ತೆಕಿತ್ ಕೊಣೆಂಯ್ ಪಾಂಯ್ ಸೊಡಿಜಾಯ್. ಉಡ್ಚ್ಯಾ ಪಯ್ಲೆಂ ಚಿಂತುನ್ ಪಳೆಂವ್ಕ್ಜಾಯ್.....ಹುಂ, ಮೊರೊಂದಿ ತಿ ಖಬಾರ್. ವೊರಾಂ ಜಾಲಿಂ ಸ......ಆಮಿಂ ಹ್ಯಾ ಹೊಟೆಲಾಂತ್ ಕಾಫಿ ಮಾರ್ಯಾಂ...."
ತೆ ಸರ್ಶಿಲ್ಯಾ ಹೊಟೆಲಾಕ್ ರಿಗ್ಲೆ. ಇಂತ್ರಾಮಾನ್ ದೋನ್ ಸ್ಪೆಶಲ್ ಕಾಫ್ಯೆಕ್ ಒರ್ಡರ್ ದಿಲೆಂ. ತಶೆಂ, ಸವ್ಕಾಸಾಯೆನ್ ತೆ ಕಾಫಿ ಪಿಯೆವ್ನ್ ಗಜಾಲಿ ಮಾರ್ನ್ ಆಸ್ತಾನಾ ಎಕಾಚ್ಚಾಣೆಂ ಇಂತ್ರಾಮ್ ಮ್ಹಣಾಲೊ - "ಆರೆ, ಹೆಂ ಕೊಣ್ ಸಿಂತಿ ನ್ಹಂಯ್ವೆ? ಸಾಂಗಾತಾ ಕೊಣ್ ತಾಚ್ಯಾ........ ಕಿತೆಂ ಮಾನ್ವೆಲಾಬಾ ಎದೊಳ್ಚ್ ಸೊಧುನ್ ದವರ್ಲಾಯ್ಗಿ ಕಿತೆಂ?"
ತಾಚ್ಯಾ ಸವಾಲಾಕ್ ಜಾಪ್ ದೀಂವ್ಕ್ ಮನ್ವೆಲಾಬಾಕ್ ತಾಳೊ ಸುಟ್ಲೊನಾ. ತೊ ಶೆರ್ಮೆವ್ನ್ ಹೊಟೆಲಾಂತ್ಲ್ಯಾ ಫೆಮಿಲಿ ರೂಮಾ ಥಾವ್ನ್ ಭಾಯ್ರ್ ಯೆತೆಲ್ಯಾ ಸಿಂತಿಕ್ ಆನಿಂ ಸಾಂಗಾತಾಚ್ಯಾ ತರ್ನಾಟ್ಯಾ(ಶೇಖರಾ)ಕ್ ಶೆರ್ಮೆವ್ನ್ ದೆಖ್ತಾಲೊ. ಸಿಂತಿನ್ ಲೆಕಿನ್, ಬಾಪಾಯ್ಕ್ ಪಳೆಲೆಂನಾ.
ಆಪ್ಶೆಂಚ್ ಮನ್ವೆಲಾಬಾಚೆಂ ರಗಾತ್ ಸಳ್ಸಳ್ಳೆಂ ’ಚೆಡ್ಯಾಂ ಸಾಂಗಾತಾ ಬೊವೊಂಕ್ ಆಶಾ ಆಯ್ಲ್ಯಾಗೊ ತುಕಾ..? ತುಕಾ ಶಿಕೈತಾಂ ಬೂಧ್! ಚರಾಬ್ ಮಾಂಡ್ಲ್ಯಾ ತರ್, ತುಕಾ ಕರ್ತಾಂ ಕಾಜಾರ್. ಖಂಯ್ಚಾಕೀ ಘರಾ ಯೆತಾಂ ಹಾಂವ್’ - ಆಶೆಂ ಮತಿಂತ್ಚ್ ಮ್ಹಣೊನ್ ತಾಣೆಂ ದಾಂತ್ ಚಾಬ್ಲೆ,.
(ಉಪ್ರಾಂತ್ ಮನ್ವೆಲಾಬಾನ್ ಕಿತೆಂ ಕೆಲೆಂ? ಸಿಂತಿಚಿ ಸ್ಥಿತಿ ಕಶಿ ರಾವ್ಲಿ? ಬೊಂಬೈತ್ ಮೆಲ್ವಿನಾಚೆಂ ಜೀವನ್ ಖಂಯ್ಚ್ಯಾ ವಾಟೆನ್ ವೆತಾ....? ಶೀನಾ ಪೊಲಿಸಾಂಕ್ ಸಾಂಪಾಡ್ಲೊಗಿ? ಇತ್ಯಾದಿ ಮುಖ್ಲ್ಯಾ ಅಂಕ್ಯಾಂತ್ ಪಳೆಯಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12, 13, 14
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
