ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 13
ಮೆಲ್ವಿನಾಚ್ಯಾ ಉತ್ರಾಂಚೊ ಪರಿಣಾಮ್ ಕಠೋರ್ ಥರಾನ್ ತಾಂಚೆರ್ ದೊಗಾಂಯ್ಚೆರ್ ಜಾಂವ್ಚೊ ತಾಣೆಂ ದೆಖ್ಲೆಂ. ಬೊಂಬ್ಯಾಬರಿ ದೊಳೆ ವಾಟಾರ್ನ್ ಏಕ್ ಘಡಿ ತಾಕಾಚ್ ಪಳೆವ್ನ್ ದೊಗಾಂಯ್ ಸ್ತಬ್ದ್ ತಾವ್ಲಿಂ. ದುಸ್ರ್ಯಾ ಕ್ಷಣಾ ಮಾಗ್ಗಿಬಾಯ್ ಬೋಬ್ ಮಾರ್ನ್ ಮ್ಹಣಾಲಿ - "ಥೂ ಆನ್ನಾಡ್ಯಾ. ತುವೆಂ ಮ್ಹಾಕಾ ಅಸಲೊ ಘಾತ್ ಕೆಲೊಯ್!" ತಿ ರಡೊಂಕ್ ಲಾಗ್ಲಿ, "ವ್ಹಯ್, ಆತಾಂ, ಆಮಿಂ ಕೆಲ್ಲೊ ದುಬಾವ್ ಖರೊ ಜಾಲೊ. ಇಷ್ಟಾಗತೆಚ್ಯಾ ನಿಬಾನ್ ಯೇವ್ನ್ ತುವೆಂ ಮ್ಹಜ್ಯಾ ಜೆಸ್ಸಿಕ್ ನಾಗೈಲೆಂಯ್ಗಿ ಚೊರಾ? ಹಾ.....ದೆವಾ.... ಮ್ಹಜಿ ಗತ್ ಕಿತೆಂ ಆತಾಂ? ಹಾಯ್....... ಹ್ಯಾ ಥರಾನ್ ತುವೆಂ ಮ್ಹಾಕಾ ದಖೊ ದೀಂವ್ಕ್ ಹಾಂವೆಂ ತುಕಾ ಕಿತೆಂ ವಾಯ್ಟ್ ಕೆಲ್ಲೆಂ. ಸಾಂಗ್! ಆಜ್, ನೆಣಾರಿ ಚೆಡ್ವಾಕ್ ತುಜ್ಯಾ ಶಿಂತ್ರ್ಯಾಂಚ್ಯಾ ಪಾಸಾಂತ್ ಸಾಂಪ್ಡಾಯಿಲ್ಲಿ ಖಬಾರ್ ಸಾಂಗೊಂಕ್ ಆಯ್ಲಾಯ್ಗಿ ಲಜ್ಮಾಂಡ್ಯಾ? ಚಲ್..... ನಿಕಳ್ ಮ್ಹಜ್ಯಾ ದೊಳ್ಯಾಂ ಮುಖ್ಲೊ"
ಮೆಲ್ವಿನಾಕ್ ತ್ಯಾ ಕ್ಷಣಾ ಕಿತೆಂ ಕರ್ಚೆಂ ಕಳ್ಳೆಂನಾ. ತೊ ಬಿರಾಂಕುಳ್ ಅಕ್ಮಾನ್ ಸೊಸುಂಕ್ ತಾಂಕಾನಾಸ್ತಾಂ ಅನಿಕೀ ರಡ್ಲೊ ತೊ. ಪಾಟಾಪಾಟ್ ರೊಫಿನ್ಭಾಯ್ ಉಲೈಲಿ "ವ್ಹಯ್ ಮಾಗ್ಗಿಬಾಯೆ, ಆಮಿಂ ಚಿಂತ್ಲ್ಲಿಂ ಸರ್ವ್ ಚಿಂತ್ನಾಂ ಸತ್ಚ್ ಜಾಲಿಂ ಪಳೆಲೆಂಯ್ಮೂ? ಹಾಂವೆಂ ತುಕಾ ಸಾಂಗ್ಲ್ಲೆಂ ಕಿತೆಂ ವ್ಹಯ್, ಖಂಡಿತ್ ಜಾವ್ನ್ ಹಾಣೆಂ ಜೆಸ್ಸಿಕ್ ಭುಲೊವ್ನ್ ಫಿರ್ವಾಯ್ಲಾಂ"
"ಮಾವ್ಶೇ...." ದುಃಖೇಸ್ತ್ ತಾಳ್ಯಾನ್ ಮೆಲ್ವಿನಾನ್ ಬೋಬ್ ಮಾರ್ಲಿ, "ಮೋಗ್ ಮ್ಹಳ್ಳ್ಯಾ ಅಮರ್ ಬಾಂಧಾಕ್ ಫಿರ್ವಾಂವ್ಚಿ ಗರ್ಜ್ ನಾ. ತುಂ ಹ್ಯಾ ಪರಿಂ ಕಿತ್ಯಾಕ್ ಉಲೈತಾಯ್ ? ತುಜೊ ಪೂತ್ ಹೆರಿ ಸಯ್ತ್ ಮ್ಹಜಿ ಗಜಾಲ್ ಆಯ್ಕೊನ್ ಬಿರ್ಮೊತ್ ಪಾವ್ಲೊ"
"ಓಹೋ! ತಾಕಾಯಿ ವಚೊನ್ ಭೆಟ್ಲೊಯ್ಗಿ?" ನಂಜ್ಯಾಂನಿ ಮ್ಹಣಾಲಿ ರೊಫಿನ್ಬಾಯ್. ’ತರ್ ಕಾರ್ಕಳಾಕ್ಯಿ ವಚೊನ್ ಆಯ್ಲೊಯ್! ತುವೆಂ ಕರುಂಕ್ ಆಸ್ಚಿಂ ಏಕೀ ಕಾಮಾಂ ಬಾಕಿ ನಾಂತ್. ಉಗ್ಡಾಸ್ ದವರ್ ಆನಿಂ ಚತ್ರಾಯ್ ಸಾಂಬಾಳ್ ಮೆಲ್ವಿನ್. ಮ್ಹಜೊ ಜೀವ್ ಗೆಲ್ಯಾರಿ ಪರ್ವಾನಾ. ಜೆಸ್ಸಿಕ್ ಮ್ಹಜಿ ಸುನ್ ಕೆಲ್ಯಾಬಗಾರ್ ಹಾಂವ್ ರಾಂವ್ಚಿಂನಾ. ತುವೆಂ ಜೆಸ್ಸಿಕ್ ಶಿಂತ್ರ್ಯಾನಿಂ ಶಿರ್ಕಾಯಿಲ್ಲ್ಯಾಕ್ ರಡಾಶೆಂ ಕರ್ತಾಂಗಿ ನಾ ಪಳೆ!"
"ಮ್ಹಾಕಾ ಕೊಣೆಂಯಿ ಶಿಂತ್ರ್ಯಾಂತ್ ಘಾಲುಂಕ್ ನಾ ಮಾವ್ಶೇ" ಆಸೊ ಆಯ್ಕಾಲೊ ತಾಳೊ. ದುಸ್ರ್ಯಾ ಘಡಿಯೆ, ಮೆಟಾಂ ಚಡೊನ್ ಸೊಪ್ಯಾರ್ ಆಯ್ಲೆಂ ಜೆಸ್ಸಿ. ತಾಚ್ಯಾ ಪಾಟಾಪಾಟ್ ರಿಜಾಯಿ ವಯ್ರ್ ಸರ್ಲೆಂ. ತೆಂ ಮೆಲ್ವಿನಾಕ್ ಪಳೆವ್ನ್ ಅಮ್ರುಕೆ ಹಾಸ್ಲೆಂ. ಜೆಸ್ಸಿಚ್ಯಾ ದೊಳ್ಯಾಂನಿ ಮೊತಿಯಾಂಸಾರ್ಕಿಂ ದೊಣ್ ಥೆಂಬೆ ದುಃಖಾಂ ಭಾಯ್ರ್ ತಿಳ್ತಾಲಿಂ.
"ಪುತಾ.....ಮ್ಹಜ್ಯಾ ಜೆಸ್ಸಿ" ಮಾಗ್ಗಿಬಾಯೆನ್ ದುವೆಕ್ ವೇಂಗ್ ಮಾರ್ಲಿ. ಆಪ್ಲ್ಯಾ ಪಿಲಾಕ್ ಘೊಣಿಚ್ಯಾ ತೊಂಡಾಂತ್ಲೆಂ ಬಚಾವ್ ಕರುಂಕ್ ಪೆಚಾಡ್ಚ್ಯಾ ಕೊಂಬಿಯೆಬರಿ ತಿ ದಿಸ್ತಾಲಿ.
"ಮಾಂಯ್.." ಜೆಸ್ಸಿಚೊ ದುಃಖೇಸ್ತ್ ತರೀ ಸ್ವಷ್ಟ್ ತಾಳೊ ಆತಾಂ ಆಯ್ಕಾಲೊ, "ಆತಾಂ ಹಾಂವೆಂ ಸಗ್ಳಿ ಸಂಗತ್, ತುಮ್ಕಾಂ ಉಗ್ಡಾಪಿ ಕರ್ಚಿ ಪಡ್ತಾ ಮಾಂಯ್. ಹಾಂವ್ ಮೆಲ್ವಿನಾಲಾಗಿಂಚ್ ಕಾಜಾರ್ ಜಾತೆಲಿಂ. ತುಮಿಂ ಬೆಷ್ಟೆಂಚ್ ತುಮ್ಚೆಂ ಪ್ರಯತ್ನ್ ಚಲೈನಾಕಾತ್"
"ಹಾ........ತುಜ್ಯಾ ಧೈರಾ..!" ಪುಸ್ಪುಸ್ಲಿ ಮಾಗ್ಗಿಬಾಯ್, "ನಾ......ಹೆಂ ಬಿಲ್ಕುಲ್ ಜಾಯ್ಶೆಂನಾ. ತುಕಾ ತ್ಯಾ ಅಣ್ವ್ಯಾಲಾಗಿಂ ಕಾಜಾರ್ ಜಾಂವ್ಕ್ ಹಾಂವ್ ಬಿಲ್ಕುಲ್ ಸೊಡ್ಚಿಂನಾ. ಜೆಸ್ಸಿ, ತುವೆಂ ಗುಪಿತ್ತ್ ಮ್ಹಾಕಾ ವಿಕ್ರಿತ್ ಕೆಲೆಂಯ್ಗಿ ಪುತಾ? ಆವಯ್ ಮ್ಹಳ್ಳೊ ಮೋಗ್ ತುಜ್ಯಾ ಕಾಳ್ಜಾಂತ್ ಆಸ್ಲ್ಲೊ ತರ್, ಹ್ಯಾ ಪರಿಂ ತುಂ ಕರ್ತೆಂನಾಂಯ್. ಆಯ್ಕ್ ಪುತಾ, ಹಾಂವೆಂ ಬರೊ ಫುಡಾರ್ ತುಕಾ ಸೊದುನ್ ದವರ್ಲಾಂ"
"ತೊ ಫುಡಾರ್ ಮ್ಹಾಕಾ ನಾಕಾ ಮಾಂಯ್" ಸುಸ್ಕಾರ್ಲೆಂ ಜೆಸ್ಸಿ, "ಮ್ಹಜೊ ಫುಡಾರ್ ಹಾಂವೆಚ್ ಸೊಧ್ಲಾಂ. ತುಂ.......ತುಂ ಮ್ಹಜ್ಯಾ ಜೀವನಾಚೆರ್, ವೀಘ್ನ್ ಹಾಡ್ನಾಕಾ ಮಾಂಯ್. ತುಜೆಂ ಖಂಯ್ಚೆಯಿ ಉತಾರ್ ಹಾಂವೆಂ ಎದೊಳ್ ನಿರಾಕರ್ಸುಂಕ್ ನಾ. ಆನಿಂ, ದುಸ್ರೆಂ ಕಿತೆಂಯ್ ಸಾಂಗ್, ಹಾಂವ್ ತೆಂ ಪಾಳ್ತಾಂ. ಪುಣ್ ಮ್ಹಾಕಾ ತುಂ ಮೆಲ್ವಿನಾಲಾಗಿಂ ಕಾಜಾರ್ ಜಾಂವ್ಕ್ ಆಡ್ಕಳ್ ಕರ್ನಾಕಾ"
"ಪಿಶ್ಯಾಂಬರಿ ಕಿತೆಂ ಉಲೈತಾಯ್ ಜೆಸ್ಸಿ?" ಕಳ್ವಳೊನ್ ಉಲೈಲಿ ರೊಫಿನ್ಬಾಯ್. "ದಾಕ್ತೆರ್ ಜಾವ್ನಾಸ್ಚೊ ಮ್ಹಜೊ ಪೂತ್ ಹೆರಿ, ಎದ್ಯೊ ವ್ಹಡ್ಲ್ಯೊ ಹಜಾರಾಂನಿ ದೋತ್ ಹಾಡ್ಚ್ಯೊ ಸೈರಿಕೊ ಸೊಡ್ನ್, ತುಜೆಲಾಗಿಂ ದೊತಿವಿಣೆಂ ಕಾಜಾರ್ ಜಾಂವ್ಕ್ ಭಾಯ್ರ್ ಸರ್ಲಾ. ಹೆಂ ತುಕಾ ಕೊಡು ಲಾಗ್ತಾಗಿ ಜೆಸ್ಸಿ?"
"ಮ್ಹಾಕಾ ದಾಕ್ತೆರ್ ನೊವ್ರ್ಯಾಚ್ಯಾ ಗೊಡ್ಸಾಣೆಚ್ಯಾಕೀ, ಮೊಗಾಚೆಂ ಉತಾರ್ ವ್ಹಡ್ ಮಾವ್ಶೇ" ಜೆಸ್ಸಿ ಮ್ಹಣಾಲೆಂ. "ತುವೆಂ ಕಿತೆಂಯ್ ಸಾಂಗ್ಲ್ಯಾರಿ ಹಾಂವ್ ಮೊಗಾಕ್ ಘಾತ್ ಕರ್ಚಿಂನಾ. ತುಮಿ ಮ್ಹಾಕಾ, ಮ್ಹಜ್ಯಾ ವಾಟೆಕ್ ಸೊಡಾ" ರಡಾತ್ತ್ ತೆಂ ಬಿತರ್ ಗೆಲೆಂ.
"ವ್ಹಯ್..... ಖಂಡಿತ್ ಜಾವ್ನ್ ಹಾಣೆಂ ಜೆಸ್ಸಿಕ್ ಪಿಶ್ಯಾರ್ ಘಾಲಾಂ" ಬೋಬ್ ಮಾರ್ನ್ ರಡ್ಲಿ ಮಾಗ್ಗಿಬಾಯ್, "ನಹಿಂ ತರ್, ತೆಂ ಆಶೆಂ ’ಮೋಗ್, ಮೋಗ್’ ಮ್ಹಣ್ ಉಲಂವ್ಚೆಂ ಚೆಡುಂ ನ್ಹಂಯ್. ಹ್ಯಾ ಚೆಡ್ವಾನ್ ಮ್ಹಜೆಂ ನಿಸ್ಸಂತಾನ್ ಕೆಲೆಂ" ತಿ ಹಾತ್ ಹರ್ದ್ಯಾಕ್ ಮಾರ್ನ್ ಬೋಬ್ ಮಾರ್ತಾಲಿ. ಪುಣ್ ತಿ ತಶೆಂ ಕರ್ತಾನಾ, ಕ್ಷಣಾನ್ಕ್ಷಣಾನ್, ಮೆಲ್ವಿನಾಚ್ಯಾ ಕಾಳ್ಜಾಕ್ ಬಲಿ ಮಾರ್ಲ್ಲ್ಯಾಬರಿ ತಾಕಾ ಭೊಗ್ತಾಲೆಂ.
ದೋನ್ ಮಿನುಟಾಂ ಪಾಶಾರ್ ಜಾಲಿಂ. ರಿಜಾ ಥಟ್ಟ್ ಕರ್ನ್, "ಧಾಕ್ಟ್ಯಾಬ್ ಆಯ್ಲೊ...." ಮ್ಹಣಾಲೆಂ. ತಕ್ಷಣ್ ಸಕ್ಡಾಂಚೆ ದೊಳೆ ಭಾಯ್ಲ್ಯಾ ವಾಟೆನ್ ಘುಂವ್ಲೆಂ. ಹೆರಿ ಪುರಾಸಾಣೆಚಿಂ ಮೆಟಾಂ ಕಾಡ್ನ್ ವಯ್ರ್ ಆಯ್ಲೊ.
"ಹೆರಿ......" ರೊಫಿನ್ಬಾಯ್ ಸಂತೊಸಾನ್ ಮ್ಹಣಾಲಿ.
"ಪುತಾ, ಬರ್ಯಾ ವೆಳಾರ್ ಪಾವ್ಲೊಯ್ ತುಂ," ಮಾಗ್ಗಿಬಾಯೆನ್ ಕುಡ್ಶಿಲೆಂ, "ಹಾಂಗಾಸರ್, ಸಗ್ಳಿ ಸಂಗತ್ ಬಿಗಾಡ್ಲ್ಯಾ ಪುತಾ. ಮ್ಹಜ್ಯಾ ಧುವೆಕ್ ಪಾಡ್ ಕರ್ಚ್ಯಾ ಇರಾದ್ಯಾನ್ ಹ್ಯಾ ಚೆಡ್ಯಾನ್ ತಾಕಾ ನಾಡ್ಲಾಂ ಪುತಾ. ಹಾಚ್ಯಾ ಪಾಸಾಂತ್ಲೆಂ ಜೆಸ್ಸಿಕ್ ಬಚಾವ್ ಕರುಂಕ್ ತುಂಚ್ ಸಕ್ತಾಯ್ ಹೆರಿ. ಕಶೆಂ ಪುಣಿ ಹ್ಯಾ ಅನ್ವಾರಾಂತ್ಲೆಂ ಆಮ್ಕಾಂ ನಿವಾರ್"
"ಕಿತೆಂ ಜಾಲಾಂ ಮಾವ್ಶೆ? ಹಾಂವ್ ಖಂಯ್ಚಿಚ್ ಸಂಗತ್ ನೆಣಾಂ. ತುವೆಂ ಉಲೈಲ್ಲಿಂ ಉತ್ರಾಂ ಮ್ಹಾಕಾ ಸಮ್ಜಾನಾಂತ್" ಹೆರಿನ್ ಮ್ಹಳೆಂ.
"ಕಿತೆಂ ಸಮ್ಜೊಂಚೆಂ ಪುತಾ?" ರೊಫೀನ್ಭಾಯ್ ಉಲೈಲಿ, "ಹ್ಯಾ ಚೆಡ್ಯಾನ್ ತಾಕಾ ಭುಲ್ ಘಾಲ್ನ್ ಪಿಶ್ಯಾರ್ ಘಾಲಾಂ. ಆನಿಂ ಜೆಸ್ಸಿ ಹಾಚ್ಯಾ ಪಾಸಾಂತ್ ಸಾಂಪ್ಡೊನ್ ’ಮೋಗ್, ಮೋಗ್ ಮ್ಹಣ್ ಉಲೈತಾ"
"ಮಾಮ್ಮೀ.........." ಹಳ್ತಾಚೊ ದೆಂಕ್ಣೊ ಮಾರ್ಲೊ ಹೆರಿನ್. ತಾಚಿ ಕೂಡ್ ರಾಗಾನ್ ಕಾಂಪ್ತಾಲಿ. "ಜೆಸ್ಸಿ ಆನಿಂ ಮೆಲ್ವಿನ್ ರಾಗಾನ್ ಕಾಂಪ್ತಾಲಿ. "ಜೆಸ್ಸಿ ಆನಿಂ ಮೆಲ್ವಿನ್ ಎಕಾಮೆಕಾಚೊ ಮೋಗ್ ಕರ್ತಾತ್ ತೆಂ ಹಾಂವ್ ಜಾಣಾ. ದೆಕುನ್ ತುವೆಂ ಸಾಂಗ್ಚೆಂ ಮೆಲ್ವಿನಾನ್ ಜೆಸ್ಸಿಕ್ ಪಿಶ್ಯಾರ್ ಘಾಲಾಂ ಮ್ಹಣ್ಗಿ?"
"ಶಹಭಾಸ್..... ಬರೊ ಉಲೈಲೊಯ್ ಮ್ಹಜ್ಯಾ ಪುತಾ" ರೊಫಿನ್ಬಾಯೆನ್ ನಾಕಾರ್ ಬೊಟ್ ದವರ್ನ್ ಮ್ಹಳೆಂ, "ಕಳ್ಳೆಂ ಮ್ಹಾಕಾ...... ಹಾಣೆಂ ಕಾರ್ಕಳ್ ವಚೊನ್ ತುಜೆ ಕಾನ್ ಬರೆಂ ಕರ್ನ್ ಫುಂಕ್ಲ್ಯಾತ್ ತೆಂ ಖಂಡಿತ್".
ಲಾಂಬ್ ವೇಳ್ ಥಾವ್ನ್ ತಾಂಚೆಂ ಖತ್ಕತೆಂ ಉಲವ್ಣೆಂ ಮೌನ್ ಜಾವ್ನ್ ಆಯ್ಕೊಂಚ್ಯಾ ಮೆಲ್ವಿನಾನ್ ಮ್ಹಳೆಂ - "ಮಾವ್ಶೆ........ ಹಾಂವೆಂ ಕೊಣಾಯ್ಚೆ ಕಾನ್ ಫುಂಕುಂಕ್ನಾಂತ್. ಸತ್ ಗಜಾಲ್ ಮಾತ್ರ್ ತಿಳ್ಸಿಲ್ಯಾ"
"ಸತ್ ಉಲಂವ್ಚೊ ಸಾಂತ್ ತುಂ!" ಕೆಂವ್ಚಾಲಿ ರೊಫೀನ್ಬಾಯ್, "ತುಕಾ ಪಳೆಲ್ಲ್ಯಾ ಪಯ್ಲ್ಯಾ ಘಡಿಯೆಥಾವ್ನ್ ಎದೊಳ್ ಪರ್ಯಾಂತ್ ತುವೆಂ ಉಲೈಲ್ಲಿ ಹರ್ಯೇಕ್ ಫಟ್ ಆನಿಂ ಕೆಲ್ಲೆಂ ಸರ್ವ್ ಅಕ್ರಮ್ ಹಾಂವ್ ಜಾಣಾ. ಫಟ್ಕಿರ್ಯಾ ಜಿಬೆನ್ ಸತ್ ಮ್ಹಣ್ ಸಾಂಗಾನಾಕಾ"
"ತಾಣೆಂ ಉಲೈಲ್ಲೆಂ ಸತ್ಚ್ ಮ್ಹಣ್ ಹಾಂವ್ ಸಾಂಗ್ತಾಂ ಮಾಮ್ಮೀ" ಹೆರಿ ಮುಖಾರ್ ಆಯ್ಲೊ, "ಆನಿಂ ಹೆಂ ತುಕಾ ಆತಾಂಚ್ ತಿಳ್ಸಿತಾಂ. ಹಾಂವ್ ಸಾಂಗೊಂಕ್ ಆಯಿಲ್ಲೊಂ ಕೀ, ಜೆಸ್ಸಿಲಾಗಿಂ ಹಾಂವ್ ಕಾಜಾರ್ ಜಾಯ್ನಾ ಮ್ಹಣ್"
ಸಂತೊಸಾಚಿಂ ದುಃಖಾಂ ಮೆಲ್ವಿನಾಚ್ಯಾ ದೊಳ್ಯಾಂತ್ಲ್ಯಾನ್ ಪಾಚಾರ್ಲಿಂ. ಹರ್ದ್ಯಾವಯ್ಲೆಂ ವೊಜೆಂ ಅರ್ಧೆಂ ಹಳೂ ಜಾಲ್ಲ್ಯಾಬರಿ ಭೊಗ್ಲೆಂ ತಾಕಾ. ಪುಣ್ ತ್ಯಾಚ್ ಕ್ಷಣಾ ಘಡ್ಲ್ಲಿ ಸಂಗತ್ ದುಸ್ರಿಚ್ ಜಾವ್ನಾಸ್ಲ್ಲಿ.
"ಹೆರಿ...." ಮಾಗ್ಗಿಬಾಯ್ ಬೋಬ್ ಮಾರುಂಕ್ಲಾಗ್ಲಿ, ಮ್ಹಾಕಾ ತುಂ ವಿಕ್ರೀತ್ ಕರಿನಾಕಾ, ಹೆರಿ. ಪಳೆ, ಏಕ್ ಪಿಡೇಸ್ತ್ ಸ್ತ್ರೀ ಹಾಂವ್ ತುಜೆಲಾಗಿಂ ಭಿಕ್ ಮಾಗ್ತಾಂ. ಮ್ಹಜ್ಯಾ ಜೆಸ್ಸಿಕ್, ತುಂ ಸ್ವೀಕರ್ಸಿ"
ಮೆಲ್ವಿನಾನ್ಯಿ ಹೆರಿಲಾಗಿಂ ಭಿಕ್ ಮಾಗ್ಲ್ಲಿ ಜೆಸ್ಸಿಚಿ. ಆತಾಂ ಮಾಗ್ಗಿಬಾಯ್ಯಿ ಸ್ವೀಕಾರ್ ಕರುಂಕ್. ಮೆಲ್ವಿನಾಚೆಂ ಉತಾರ್ ಹೆರಿನ್ ಮಾಂದ್ಲ್ಲೆಂ. ಆನಿಂ ಆತಾಂ ಮಾಗ್ಗಿಬಾಯೆಚೆಂ ಉತಾರ್ ತೊ ಬಿಲ್ಕುಲ್ ಆಯ್ಕೊಂಚೊನಾ ಮ್ಹಣ್ ಮೆಲ್ವಿನಾಕ್ ಭರ್ವಸೊ ಆಸ್ಲ್ಲೊ.
"ಮಾವ್ಶೇ..." ತಾಳೊ ನಿಧಾನ್ ಕರ್ನ್ ಹೆರಿನ್ ಮ್ಹಳೆಂ, "ತುಂ ಹಾಂವೆಂ ಸಾಂಗ್ಚೆಂ ಪಯ್ಲೆಂ ಆಯ್ಕ್. ಜೆಸ್ಸಿ, ಮೆಲ್ವಿನಾಚೊ ಮೋಗ್ ಕರ್ತಾ ಆಸ್ತಾನಾ, ಹಾಂವ್ ತಾಚೆಲಾಗಿಂ ಕಾಜಾರ್ ಜಾಯ್ನ್ ಜಾಲ್ಯಾರ್ ತಾಚೆಂ ಜೀವನ್ ಪಿಡ್ಡ್ಯಾರ್ ಜಾತೆಲೆಂ. ತಾಂಚ್ಯಾ ಮೊಗಾಂತ್ ಹಾಂವ್ ವಾಟೆ ವಯ್ಲೊ ಕಾಂಟೊ ಜಾವ್ನ್ ರಾವಾಸೊನಾ. ಮ್ಹಜ್ಯಾನ್ ಹೆಂ ಸಾಧ್ಯ್ ನಾ"
"ಪುತಾ, ಚಿಂತುನ್ ಪಳೆ" ರಡ್ಲಿ ಮಾಗ್ಗಿಬಾಯ್, "ಮ್ಹಜೊ ಘರ್ಕಾರ್ ಅಂತರ್ಲ್ಯಾ ಉಪ್ರಾಂತ್ ಹ್ಯಾ ಎಕಾ ಕಿಟಾಕ್ ಘೆವ್ನ್, ಮ್ಹಾತಾರ್ಯಾ ಆವಯ್ ಸಂಗಿಂ, ಕಷ್ಟಾ ದುಃಖಾಂಕ್ ಹಾಂವೆಂ ವೊಜೆಂ ಮಾರ್ಲ್ಲೆಂ ಕಿತ್ಯಾಕ್ ಪುತಾ? ಲ್ಹಾನ್ಪಣಿಂ ಥಾವ್ನ್ ತೆಂ ಪಿಡೇಸ್ತ್ ಆಸ್ಲ್ಲೆಂ. ತಾಚಿ ಭಲಾಯ್ಕಿ, ಪಾಟಿಂ ಜೊಡ್ಚ್ಯಾ ಖಾತಿರ್ ಹಾಂವೆಂ ಘಾಮ್ ನ್ಹಂಯ್, ರಗಾತ್ ವಿಕ್ರಾಯಿಲ್ಲೆಂ ಹೆರಿ. ತ್ಯಾ ತಾಚ್ಯಾ ಚಾಕ್ರೆಂತ್ ಪಳೆ, ಮ್ಹಜ್ಯಾ ಅಂಗಾಂತ್ಲೆಂ ಮಾಸ್ ಜಿರೊನ್, ಕಾತ್ ಮಾತ್ರ್ ಉರ್ಲ್ಯಾ. ಭಿರಾಂಕುಳ್ ಪಿಡೆನ್ ದೀಸ್ರಾತ್ ಹಾಂವ್ ಕಷ್ಟಾತಾಂ ಆನಿಂ ಹಿ ಪಿಡಾ, ದಿಸಾಚ್ಯಾ ಹರ್ಯೇಕ್ ಘಡಿಯೆ ಮ್ಹಾಕಾ ದಣ್ಸಿತಾ. ಇತ್ಲಿ ಹಾವೆಂ ತಾಚಿ ಚಾಕ್ರಿ ಆನಿಂ ಮೋಗ್ ಕರ್ನ್ ವಾಡೈಲ್ಲ್ಯಾಕ್ ಆಜ್ ಜೆಸ್ಸಿಚೆಂ ಬರೆಂ ಫಾಲೆಂ ಮ್ಹಜ್ಯಾ ದೊಳ್ಯಾಂ ಹುಜ್ರಿಂ ಲಿಪೊನ್ ವೊಚಾಜಾಯ್ಗಿ? ಕೊಂಬಿ ಆಪ್ಲಿ ಪಿಲಾಂ ವಾಗೈತಾ ಘೊಣಿಚ್ಯಾ ಹಾತಾಂತ್ ದೀಂವ್ಕ್ಗಿ ಹೆರಿ?"
"ಮೆಲ್ವಿನ್ ಬರೊ ಭುರ್ಗೊ ಮಾವ್ಶೇ. ತಾಕಾ ತುಂ ಘೊಣಿಕ್ ಸರಿ ಕರಿನಾಕಾ. ತಾಚ್ಯಾ ಸಾಂಗಾಂತಾ ಜೆಸ್ಸಿಚೆಂ ಜೀವನ್ ಸುಖಾಭರಿತ್ ಜಾತೆಲೆಂ.
"ತಾಚಿ ಖಬಾರ್ ಮ್ಹಜೆಲಾಗಿಂ ತುಂ ಉಲೈನಾಕಾ" ಮಾಗ್ಗಿಬಾಯೆನ್ ಪರಾತ್ಲೆಂ, "ಪುತಾ ಏಕ್ ಪಾವ್ಟಿಂ ಸಾಂಗ್.....ಏಕ್ಚ್ ಭಾಸ್ ದೀ ಕಿ, ಆಪುಣ್ ಜೆಸ್ಸಿಲಾಗಿಂ ಕಾಜಾರ್ ಜಾತಾಂ ಮ್ಹಣ್"
"ನಾ ಬಿಲ್ಕುಲ್ ತೆಂ ಸಾಧ್ಯ್ ನಾ ಮಾವ್ಶೇ" ತಿತ್ಲ್ಯಾಚ್ ಸ್ವಷ್ಟ್ ತಾಳ್ಯಾನ್ ಹೆರಿನ್ ಸಾಂಗ್ಲೆಂ.
"ಹೆರಿ....." ಮಾಗ್ಗಿಬಾಯ್ ಉಬಿ ರಾವ್ಲಿ, "ತುಂ ತರ್ ಮ್ಹಜೆಂ ಉತಾರ್ ಇನ್ಕಾರ್ ಕರ್ತಾಯ್. ತುಜ್ಯಾ ಆವಯ್ನ್ ಆನಿಂ ಹಾಂವೆಂ ಹ್ಯಾ ಆದಿಂಚ್ ತುಮ್ಕಾಂ ಕಾಜಾರಾಂತ್ ಎಕ್ವೊಟಾಯ್ಜಾಯ್ ಮ್ಹಣೊನ್ ಕೆಲ್ಲ್ಯಾ ನಿಚೆವಾಕ್ ಆನಿಂ ದಿಲ್ಲ್ಯಾ ಉತ್ರಾಕ್ ತುಂ ಆಡ್ಕಳ್ ಹಾಡ್ತಾಯ್. ಜಾಂವ್ದಿ ಪುತಾ, ತುಜಿ ಖುಶಿ ಜಾಂವ್. ಆನಿಂ ಹಾಂವೆಂ ವಾಂಚೊನ್ ಪ್ರಯೋಜನ್ ನಾ" ತಿ ಎಕಾಚ್ಚಾಣೆಂ ಜಾಲಾಂತ್ ಆಸ್ಲ್ಲ್ಯಾ ಬಾಂಯ್ಚ್ಯಾ ಕುಶಿಂ ಧಾಂವ್ಲಿ. ಉಟಾಉಟಿಂ ಘಡ್ಬಡೊನ್ ಸಕ್ಡಾಂಯ್ ತಿಚ್ಯಾ ಪಾಟ್ಲ್ಯಾನ್ ಧಾಂವ್ಲಿಂ. ತಕ್ಷಣ್ ಹೆರಿನ್ ತಿಕಾ ಬಾಂಯ್ಲಾಗಿಂಚ್ ಧರ್ಲೆಂ ಆನಿಂ ವೋಡ್ನ್ ಪಾಟಿಂ ಹಾಡ್ಲೆ. ನ್ಹಂಯ್ ತರ್, ತಿಚಿ ಕಾಣಿ ತಿತ್ಲ್ಯಾರ್ಚ್ ಸಂಪ್ತಿ ಆಸ್ಲ್ಲಿ. ಜೆಸ್ಸಿ ಸಗ್ಳೆಂ ಗಳೊನ್ ಆವೈಕ್ ಪೊಟ್ಲುನ್ ಧರ್ನ್ ಸುಸ್ಕಾರ್ನ್ ರಡೊಂಕ್ ಲಾಗ್ಲೆಂ.
ತ್ಯಾ ವಗ್ತಾ, ಮೆಲ್ವಿನಾಚಿ ಮನಃಸ್ಥಿತಿ ವರ್ಣುನ್ ತುದಿ ಕರ್ಚಿ ನ್ಹಂಯ್. ಹ್ಯಾ ಸರ್ವ್ ಘಡಿತಾಂಕ್ ಕಾರಣ್ ಆಪುಣ್ - ಮ್ಹಳ್ಳೆಂ ನಿಯಾಳ್ತಾನಾ ತಾಚೆಂ ಕಾಳಿಜ್ ಕೊಸಾಳ್ಳೆಂ. ಅಪ್ರಾಧ್ಯಾಚಿಂ ಭೊಗ್ಣಾಂ ತಾಚ್ಯಾ ತೊಂಡಾರ್ ಉದೆಲಿಂ. ಪಿಸಾಂತುರ್ ಜಾಲ್ಲ್ಯಾಬರಿ ಭೊಗ್ಲೆಂ ತಾಕಾ. ಉಟೊನ್ ತೊಯ್ ಬಾಂಯ್ಲಾಗಿಂ ಧಾಂವೊಕ್ ಚಿಂತ್ತಾಲೊ ತರೀ, ಪಾಂಯ್ ತಾಚೆ ರೂಕ್ ಜಾಲ್ಲೆ. ಆನಿ ತೊ ತಸೊಚ್ ಬೊಂಬ್ಯಾಬರಿ ಬಸೊನ್ ಆಸ್ಲ್ಲೊ.
"ಮಾವ್ಶೇ......ಹೆಂ ತುಂ ಕಿತೆಂ ಕರ್ತಾಯ್?" ಹೆರಿನ್ ಕಳ್ವಳೊನ್ ವಿಚಾರ್ಲೆಂ.
"ಹಾಂವ್ ಕಾಂಯ್ ಕರಿನಾ. ತುಂ ಮ್ಹಾಕಾ ಸೊಡ್. ಹಾಂವ್ ಬಾಂಯ್ತ್ ಉಡೊನ್ ಮ್ಹಜೊ ಪ್ರಾಣ್ ಕಾಡ್ನ್ ಕಾಣ್ಘೆತೆಲಿಂಚ್...." ತಿ ಹೆರಿಚ್ಯಾ ಹಾತಾಂ ಥಾವ್ನ್ ಸುಟೊಂಕ್ ಉಡ್ಡಾತಾಲಿ.
"ಆಶೆಂ ತುವೆಂ ಕರ್ಚೆಂ ಸಾರ್ಕೆಂ ನ್ಹಂಯ್. ಜೀವ್ಘಾತ್ ಕರುಂಕ್ ತುಕಾ ಆಯಿಲ್ಲೆ ಕಷ್ಟ್ ತರೀ ಕಿತೆಂ?" ಹೆರಿನ್ ಸವಾಲ್ ಕೆಲೆಂ.
"ನಾ.......ಹಾಂವ್ ವಾಂಚಾನಾ. ಮ್ಹಜಿ ಆವೈಯಿ ಅಂತರ್ಲಿ, ಆನಿಂ ತಿಚ್ಯಾ ಸಾಂಗಾತಾ ಹಾಂವೀ ಚಲ್ತಾಂ. ನಾಕಾ ದೆವಾ ಮ್ಹಜ್ಯಾ ದೊಳ್ಯಾಂ ಮುಖಾರ್ ಹ್ಯಾ ಚೆಡ್ವಾನ್ ತಾಚ್ಯಾ ಸಾಂಗಾಂತಾ ಪಡೊನ್ ಪಾಡ್ ಜಾಂವ್ಚೆಂನಾಕಾ. ಹಾಂವೆಂ ದೊಳೆ ದಾಂಪ್ಲ್ಯಾ ಉಪ್ರಾಂತ್ ಕಿತೆಂಯ್ ಜಾಂವ್ದಿ. ಸೊಡ್ ಮ್ಹಾಕಾ...." ಮಾಗ್ಗಿಬಾಯ್ ಬೋಬ್ ಮಾರುಂಕ್ಲಾಗ್ಲಿ.
ತಿಚೆಂ ಹರ್ಯೇಕ್ ಉತಾರ್ ಆಯ್ಕಾತಾನಾ ಆಪ್ಲೆಂ ಕಾಳಿಜ್ ಪಿಟೊ ಪಿಟೊ ಜಾಲ್ಲ್ಯಾಬರಿ ಭೊಗ್ತಾಲೆ ಮೆಲ್ವಿನಾಕ್. ತ್ಯಾ ದುಃಖಾಚೊ ಅವೇಗ್ ಸೊಸುಂಕ್ ತಾಂಕಾನಾಸ್ತಾಂ ತಾಣೆಂ ದೊಳ್ಯಾಂಕ್ ಹಾತ್ ಆಡ್ ಧರ್ಲೊ ಆನಿಂ ಕಸ್ಕಸೊನ್ ರಡ್ಲೊ.
"ಮಾವ್ಶೇ.....ಹಾಂವ್ ಯೇವ್ನ್ ಸಗ್ಳೆಂ ಕಾಮ್ ಪಾಡ್ ಜಾಲೆಂ. ಹಾಂವೆಂ ಹಾಂಗಾ ಯೇಂವ್ಕ್ಚ್ ನಜೊ ಆಸ್ಲ್ಲೆಂ." ಉಲಂವ್ಚ್ಯಾ ಹೆರಿಚೊ ತಾಳೊ ಕಾಂಪ್ತಾಲೊ.
"ತುಂ ಯೇವ್ನ್ ಕಾಂಯ್ ವಾಯ್ಟ್ ಜಾಂವ್ಕ್ನಾ. ಬಗಾರ್ ತ್ಯಾ ಫಟ್ಕಿರ್ಯಾಚ್ಯಾ ಸಾಂಗ್ಣೆಕ್ ತುಂ ಭುಲ್ಲ್ಲ್ಯಾನ್ ಅಸಲಿ ಪರಿಸ್ಥಿತಿ ಆಯ್ಲ್ಯಾ" ರಾಗಾನ್ ಮ್ಹಣಾಲಿ ರೊಫಿನ್ಬಾಯ್.
"ತರ್ ಹಾಂವೆಂ ಕಿತೆಂ ಕರಿಜಾಯ್ ಮ್ಹಣ್ತಾಯ್ ತುಂ ಮಾಮ್ಮೀ?" ಅಸಹಾಯ್ ಭರ್ಲೆಲ್ಯಾ ತಾಳ್ಯಾನ್ ತಾಣೆಂ ಪರಾತ್ಲೆಂ .
"ಜೆಸ್ಸಿಚೊ ಹಾತ್ ಸ್ವೀಕರ್ಸುನ್ ಹೆಂ ಅನ್ವಾರ್ ನಿವಾರ್ ಪುತಾ. ಏಕ್ ಪಾವ್ಟಿಂ ಆಪಯ್ ಮ್ಹಾಕಾ ಮಾಂಯ್ ಮ್ಹಣೊನ್...." ಮಾಗ್ಗಿಬಾಯೆನ್ ಗೊಮ್ಟಿ ಆಡ್ ಘಾಲಿ.
"ಮಾವ್ಶೇ......" ಹೆರಿಚಿಂ ಉತ್ರಾಂ ಅರ್ಧ್ಯಾರ್ ರಾವ್ಲಿಂ. ತ್ಯಾಚ್ ಕ್ಷಣಾ ಮೆಲ್ವಿನಾಕ್ ಆಪ್ಲೆಂ ಕಾಳಿಜ್ಯಿ ರಾವ್ಲ್ಲ್ಯಾಬರಿ ಅನ್ಭೋಗ್ ಜಾಲೊ.
"ಮಾವ್ಶಿ ನ್ಹಂಯ್, ಬಗಾರ್ ಮಾಂಯ್ ಮ್ಹಣ್. ತುಂ ಜೆಸ್ಸಿಕ್ ಇನ್ಕಾರ್ ಕರ್ತಾಯ್ ಜಾಲ್ಯಾರ್..."
’ಮಾಂಯ್..." ಬಿರಾಂಕುಳ್ ಬೊಬಾಟ್ ಮಾರ್ಲಿ ಹೆರಿನ್, ಮೆಲ್ವಿನಾಚ್ಯಾ ಕುಶಿನ್ ತೊಂಡ್ ಘುಂವ್ಡಾವ್ನ್ ತಾಚೆಂ ಮುಖ್ ಅಪ್ರಾಧ್ಯಾಚೆಂ ಜಾಲ್ಲೆಂ.
ಆನಿಂ ನಿಮಾಣೆಂ.......ನಿಮಾಣೆಂ ಮೆಲ್ವಿನ್ ಸಲ್ವಾಲೊ. ಮೆಳಾಬ್ಚ್ ಕೊಸ್ಳೊನ್ ತಕ್ಲೆರ್ ಪಡ್ಲ್ಲೆಂ ತರೀ, ತೊ ಘಾಬರ್ತೊನಾ. ಪುಣ್ ಹೆರಿಚಿಂ ತಿಂ ಉತ್ರಾಂ ಆಯ್ಕಾತಾನಾ, ತಾಚೆಂ ಕಾಳಿಜ್ ಶಿಂದ್ಲ್ಲ್ಯಾಬರಿ ಜಾಲೆಂ. ಆನಿಂ ತ್ಯಾ ಸಂಗಿಂ, ಪಾಲ್ವಾಲಿ ತಾಚ್ಯಾ ಜಿಣಿಯೆಂತ್ಲಿ ಏಕ್ಚ್ ಏಕ್ ಆಶಾ. ಖರ್ಯಾ ಕಾಳ್ಜಾನ್ ಜೆಸ್ಸಿಚೊ ತಾಣೆಂ ಕರ್ಚೊ ಮೋಗ್ ಆಜ್ ಚ್ಯಾರ್ ಕುಶಿಂಕ್ ದಿಕ್ಕಾಪಾಲ್ ಜಾವ್ನ್ ಧಂಡಳ್ಳೊ ವ್ಹಯ್, ಸಂಸಾರಾಂತ್ ತಾಕಾ ದುಸ್ರೆಂ ಕಾಂಯ್ಚ್ ನಾಕಾ ಆಸ್ಲ್ಲೆಂ. ಸುಖಾಂತ್ ಆನಿಂ ದುಃಖಾಂತ್ ತುಜ್ಯಾ ಆಪುಣ್ ವಾಂಟೆಲಿ ಜಾತಾಂ ಮ್ಹಣ್ ಭಾಸಾಯಿಲ್ಲೆಂ ಜೆಸ್ಸಿ ತಾಕಾ ಚುಕ್ಲೆಂ. ನ್ಹಂಯ್, ಎಕಾ ಕ್ಷಣಾಕ್....ಬಗಾರ್ ಸಾಸ್ಣಾಕ್. ಆಫ್ಲ್ಯಾ ಜಿವಾಚ್ಯಾಕಿ ವರ್ತೊ ಮೋಗ್ ಕರ್ನ್ ಆಸ್ಚೆಂ ತೆಂಚ್ ಜೆಸ್ಸಿ ಆಜ್ ತಾಕಾ ನಾ ಜಾಲೆಂ. ಏಕ್ಚ್ ಉತಾರ್......ಆನಿಂ ತ್ಯಾ ಎಕಾ ಉತ್ರಾನ್ ತಾಚಿ ಆಶಾ ಕಾಳಿಜ್ ಭೆಸಾಂ ಕೆಲೆಂ. ಎಕಾಚ್ ಸಬ್ದಾನ್ ತಾಕಾ ವಿಕ್ರೀತ್ ಕೆಲೆಂ. .
ಎಕಾಚ್ಚಾಣೆ ತೊ ಉಟ್ಲೊ ಆನಿಂ ಭಾಯ್ರ್ ಚಲ್ಲೊ. ತಾಚೆಂ ಮನ್ ಆನಿಂ ಧ್ಯಾನ್ ತಾಚೆ ಲಾಗಿಂ ನಾತ್ಲ್ಲ್. ತರೀ, ಕಾಂಪ್ಚೆಂ ಪಾಂಯ್ ಘೆವ್ನ್, ವೊಡಿತ್ತ್ ತೊ ಮುಖಾರ್ ಸರ್ಲೊ. ದೊಳ್ಯಾಂತ್ ದುಃಖಾಂ ಭರ್ಲ್ಲ್ಯಾನ್, ದಾಂಟ್ಟೊನ್ ಪಡೊನ್ ರಸ್ತ್ಯಾಕ್ ತೊ ಪಾವ್ಲೊ. ತ್ಯಾ ಸಾಂಜೆಚ್ಯಾ ಮಸ್ಕ್ ಉಜ್ವಾಡಾಂತ್ ತಾಕಾ ಸಂಸಾರ್ಚ್ ದಿಸ್ಲೊನಾ. ವೆಚೆಂ ಖಂಯ್ ಆನಿಂ ಕರ್ಚೆಂ ಕಿತೆಂ? ತಾಚಿ ಜ್ಞಾನ್ ಸಕ್ತ್ಚ್ ತಾಣೆಂ ಹೊಗ್ಡಾಯಿಲ್ಲಿ.
ಆನಿಂ ಖಂಯ್ ಪುಣಿ ವೊಚಾಜಾಯ್........ಕಾಳಿಜ್ ಖಾಲಿ ಜಾತಾ ಪರ್ಯಾಂತ್ ರಡಾಜಾಯ್......ನಿಮಾಣಿಂ ದುಃಖಾಂ ವ್ಹಾಳ್ತಾ ಪರ್ಯಾಂತ್ ರಡಾಜಾಯ್.....ಮೆಲ್ವಿನ್ ಚಲ್ಲೊ ಆನಿಂ ಶೀದಾ ಸುಲ್ತಾನ್ ಬತ್ತೇರಿಲಾಗಿಂ ಯೇವ್ನ್ ಪಾವ್ಲೊ. ಫುಡೆಂ......? ಭವಿಷ್ಯಾಚೆಂ ಸ್ವಪಾಣ್ ಭಂಗ್ ಜಾಲ್ಲ್ಯಾ ತಾಣೆಂ ಮುಖ್ಲೆಂ ಕಿತೆಂ ಚಿಂತುಂಕ್ ಆಸ್ಲ್ಲೆ? ಏಕ್ಚ್ ದಾಯ್ಜ್ ಜೆಸ್ಸಿಕ್ ಹೊಗ್ಡಾವ್ನ್ ಘೆತ್ಲ್ಲ್ಯಾ ಮೆಲ್ವಿನಾನ್ ಕಸಲೊ ವಿಚಾರ್ ಆತಾಂ ಕರುಂಕ್ ಆಸ್ಲ್ಲೊ? ತಾಣೆಂ ಚಿಂತ್ಲ್ಲೆಂ ಸ್ವಪಾಣ್ ನಿರ್ಭಾಗ್ಯಾಚೆಂ ಜಾವ್ನಾಸ್ಲ್ಲೆಂ. ನಿರ್ಭಾಗ್ಯಾಚೆಂ ಸ್ವಪಾಣ್.....
ಆನಿಂ ಆತಾಂ ತಾಚ್ಯಾ ದುಃಖಾಂತ್ ವಾಂಟೆಲಿ ಜಾತಾಂ ಮ್ಹಣ್ಚ್ಯಾಬರಿ ಸುರ್ಯಾಚೊ ಅಂತಿಮ್ ಪ್ರಕಾಸ್ಯಿ ಭುಮಿ ವಯ್ಲೊ ಮಾಜ್ವಾಲೊ. ಕಾಳೊಕ್ ಶಿಂಪಡ್ಲೊ ತರೀ, ಸಂಸಾರಾಕ್ ತಿಳುಂಕ್ ನೆಕೆತ್ರಾಂಕ್ಯಿ ಧೈರ್ ಆಯ್ಲೆಂನಾ. ಆನಿಂ ತೊ ಚಂದ್ರೆಮ್ ನೆಕೆತ್ರಾಂಕ್ ಹಜಾರ್ ಗಾಳಿ ದೀವ್ನ್, ಎಕ್ಸುರೊ ಭುಮಿಕ್ ತೊಂಡ್ ದಾಕೈತಾನಾ ತಾಕಾ ಹಿಣ್ಸುಂಚ್ಯಾಬರಿ ಕಾಳ್ಯಾ ಮೊಡಾನ್ ತಾಕಾ ಆಪೈಲೆಂ.
ಸಕ್ಲಾ ನ್ಹಂಯ್ ಸ್ತಬ್ದ್ ಆಸ್ಲ್ಲಿ - ಕಿತೆಂಗಿ ಆಜ್ ಘಡ್ಲಾಂ ಕೊಣ್ಣಾ ಮ್ಹಳ್ಳ್ಯಾ ವಿಚಾರಾರ್. ತ್ಯಾ ಹುಳ್ವುಳ್ಚ್ಯಾ ಸದಾಂಚ್ಯಾ ಲಾರಾಂಚಿ ಉದಾಸೀನ್ ಪಳೆವ್ನ್ ಮಾಸ್ಳಿಯಿ ಆಳ್ಸಾಯೆಚ್ಯೊ ಜಾಂಬಾಯೊ ಕಾಡ್ತಾಲ್ಯೊ. ಸಂಸಾರಾರ್ ಕಿತೆಂಗಿ ನವಾಲ್ ಜಾಲಾಂ ಮ್ಹಣ್ ಗರ್ಜಾತಾಲೊ ದರ್ಯೊ- ತಾಚ್ಯಾ ಭೊಬೆಕ್ ಕೋಣ್ ಕಾನ್ ದೀನಾತ್ಲ್ಯಾರಿ. ಆನಿಂ ಸದಾಂ ವ್ಹಾಳ್ಚ್ಯಾ ತ್ಯಾ ಥಂಡ್ ವಾರ್ಯಾನ್ಯಿ ವಿಶೆವ್ ಘೆತ್ಲ್ಲೊ - ಜಾಯ್ತ್ಯಾ ತೆಂಪಾ ಉಪ್ರಾಂತ್ ಧನಿಯಾನ್ ದಿಲ್ಲ್ಯಾ ರಜೆಕ್ ಸಂತೊಸ್ ಪಾವ್ಲ್ಲ್ಯಾ ಚಾಕ್ರಾಬರಿ.
’ಜೆಸ್ಸಿ, ಪಳೆ ಹಾಂವೆಂ ದೆಖ್ಲಾಂ ಏಕ್ ಸ್ವಪಾಣ್. ಫಾಲ್ಯಾಂ ಹೆಂ ಸ್ವಪಾಣ್ ನೀಜ್ ಜಾತೆಲೆಂ"
"ತಶೆಂಚ್ ಜಾಂವ್ದಿ ಮೆಲ್ವಿನ್. ತುಜೆಂ ಸ್ವಪಾಣ್ ನೀಜ್ ಜಾತೆಲೆಂ.....’
ತೆಂ ಸಂಭಾಷಣ್ ಥೊಡ್ಯಾಚ್ ದಿಸಾಂ ಆದ್ಲೆಂ ಜಾವ್ನಾಸ್ಲ್ಲೆಂ. ಆನಿಂ ಆತಾಂ ಕಠೋರ್ ವಿಧಿ ತಾಕಾ ಹೆಡಾವ್ನ್ ಮ್ಹಣ್ತಾಲಿ ’ಪಿಶ್ಯಾ, ತುಜೆಂ ನಿರ್ಭಾಗ್ಯಾಚೆಂ ಸ್ವಪಾಣ್...’
ಕಾರಣ್ ಕೊಣ್ ಜಾವ್ನಾಸ್ಲ್ಲೆಂ ಹಾಕಾ? ರೊಫಿನ್ಬಾಯ್? ಮಾಗ್ಗಿಬಾಯ್? ಹೆರಿ? ನಾ. ತಿಂ ನ್ಹಂಯ್, ಹೆರಿನ್ ತಾಕಾ ಕಡೇ ಮ್ಹಣಾಸರ್ ಸಾಂಡುಂಕ್ ನಾತ್ಲ್ಲೆಂ. ಆನಿಂ ಮಾಗ್ಗಿಬಾಯೆನ್ ಆನಿಂ ರೊಫೀನ್ಬಾಯೆನ್ ಜೆಸ್ಸಿಚೊ ಫುಡಾರ್ ಪಯ್ಲೊಚ್ ನಿರ್ಣಯ್ಸಿಲ್ಲೊ - ಮೆಲ್ವಿನಾನ್ ಜೆಸ್ಸಿಕ್ ಪಳೆಂವ್ಚ್ಯಾ ಆದಿಂಚ್...
’ತುಂ.....ತುಂಚ್ ಕಾರಣ್ ಹ್ಯಾ ಸರ್ವಾಂಕ್. ತುವೆಂ ನಿರ್ಭಾಗ್ಯಾನ್ ಜೆಸ್ಸಿಚೊ ಮೋಗ್ ಕಿತ್ಯಾಕ್ ಕೆಲೊಯ್? ಮುಖ್ಲೆಂ ತುವೆಂ ಆದಿಂಚ್ ಕಿತ್ಯಾಕ್ ಚಿಂತುನ್ ಪಳೆಂವ್ಕ್ ನಾಂಯ್? ಹೆಡಾಯ್ತಾಲೆಂ ತಾಚೆಂ ಅಂತಸ್ಕರ್ನ್.
"ಪುಣ್....ಹಾಂವೆಂ ಜೆಸ್ಸಿಕ್ ಘಾತ್ ಕರುಂಕ್ ನಾ. ಹಾಂವೆಂ ತಾಕಾ ಸಾಂಡುಂಕ್ ನಾ" ತೊ ರಡ್ಲೊ, ಆಪ್ಲಿ ತಕ್ಲಿ ಹಾತಾಂನಿ ಲಿಪವ್ನ್.
ಎಕಾ ದಿಸಾ ತೊ ಹ್ಯಾಚ್ ಸುಲ್ತಾನ್ ಬತ್ತೇರಿಚ್ಯಾ ವಯ್ರ್ ಬಸೊನ್ ಆಸ್ಲ್ಲೊ. ದರ್ಯಾಂತ್ ಸುರ್ಯೊ ಬುಡ್ಚೆಂ ದ್ರಶ್ಯ್ ತೆಂ. ತಾಚ್ಯಾ ಕುಶಿನ್ ಜೆಸ್ಸಿ ಬಸೊನ್ ಆಸ್ಲ್ಲೆಂ ಆನಿಂ ಮೆಲ್ವಿನಾನ್ ಹಾಸೊನ್ ಮ್ಹಳೆಂ. ’ಜೆಸ್ಸಿ, ಸುರ್ಯೊ ಬುಡ್ಲೊ.....ಆನಿಂ ತಾಚಿ ತಾಂಬ್ಸಾಣ್ ತುಜ್ಯಾ ಪೊಲ್ಯಾಂಚೆರ್ ಸೊಡ್ನ್ ಗೆಲಾ’
ಆನಿಂ ತಾಚ್ಯಾ ಜೀವನಾಂತ್ಲೊ ಸುರ್ಯೊ ಬುಡ್ಚೆಂ ದ್ರಶ್ಯ್ ತೆಂ. ತಾಚ್ಯಾ ಕುಶಿನ್ ಜೆಸ್ಸಿ ಬಸೊನ್ ಆಸ್ಲ್ಲೆಂ ಆನಿಂ ಮೆಲ್ವಿನಾನ್ ಹಾಸೊನ್ ಮ್ಹಳೆಂ: ’ಜೆಸ್ಸಿ, ಸುರ್ಯೊ ಬುಡ್ಲೊ......ಆನಿಂ ತಾಚಿ ತಾಂಬ್ಸಾಣ್ ತುಜ್ಯಾ ಪೊಲ್ಯಾಂಚೆರ್ ಸೊಡ್ನ್ ಗೆಲಾ’
ಆನಿಂ ತಾಚ್ಯಾ ಜೀವನಾಂತ್ಲೊ ಸುರ್ಯೊ ಆಜ್ ಬುಡೊನ್ ಗೆಲ್ಲೊ. ಪುಣ್ ಬುಡ್ತಾನಾ ಥಾಂಬಾನಾತ್ಲ್ಲೊ ಘಾಯ್ ಆನಿಂ ಕಾಳ್ಸಾಣ್ ಸೊಡ್ನ್ ಗೆಲ್ಲೊ.
ಹಿ ನ್ಹಂಯ್.....ಹಿಚ್ ನ್ಹಂಯ್ ಉತ್ರೊನ್ ಜೆಸ್ಸಿ ಆನಿಂ ತೊ ದರ್ಯಾ ತಡಿಕ್ ಗೆಲ್ಲಿಂ. ಜೆಸ್ಸಿಚ್ಯಾ ಮನಾಂತ್ ಸಂತೊಸಾಚಿಂ ಭೊಗ್ಣಾಂ ಆಸ್ಲ್ಲಿಂ ಆನಿಂ ಮೆಲ್ವಿನಾಚ್ಯಾ ಕಾಳ್ಜಾಂತ್ ಭಿಂಯಾಚೆ ಧಡ್ದಡೆ ನಾಚ್ತಾಲೆ. ಉಪ್ರಾಂತ್ ತಂಡ್ರಬೈಲ್ ಇಗರ್ಜೆಮುಖಾರ್ ಆಪ್ಲೊ ಮೋಗ್ ತಾಣೆಂ ಉಚಾರ್ಲ್ಲೊ. ಆನಿಂ ಆಶೆನ್ ರಾಕ್ತೆಲ್ಯಾ ತಾಕಾ ಜೆಸ್ಸಿಚ್ಯಾ ಎಕಾಚ್ ಸಬ್ದಾನ್ ಸ್ವರ್ಗ್ಚ್ ದಾಕೈಲ್ಲೊ. ಥಂಯ್ಚ್ ತಾಣಿಂ ಎಕಾಮೆಕಾಕ್ ಉತಾರ್ ದಿಲ್ಲೆಂ. ಮೊರಾಸರ್ ವಿಂಗಡ್ಚಿಂ ನಾಂವ್ ಮ್ಹಣೊನ್. ಆತಾಂ ಸುರ್ಯಾಚ್ಯಾ ನಿರ್ಗಮನಾ ವರ್ವಿಂ ಫಾಡ್ಲಾ ಕುಶಿ ಥಾವ್ನ್ ವ್ಹಾಳೊನ್ ದಾಟ್ಸಾಲ್ಲೊ ಕಾಳೊಕ್ ತಾಚ್ಯಾ ಅಂಧ್ಕಾರಾಚ್ಯಾ ಜೀವನಾಕ್ ಬುನ್ಯಾದ್ ಜಾವ್ನ್ ರಾವ್ಲ್ಲೊ. ’ಆಪ್ಣೆ ಆನಿಂ ವಾಂಚ್ಲ್ಲ್ಯಾಂತ್ ಉದ್ದೇಶ್ ಆಸಾಗಿ?’
"ಮೆಲ್ವಿನ್...." ಎಕಾಚ್ಚಾಣೆ ತೊ ಉಡೊನ್ ಪಡ್ಲೊ. ದುಃಖಾಚಿ ಜಿವಿ ಛಾಯಾ ಜಾವ್ನ್ ರಾವ್ಲ್ಲೆಂ ಜೆಸ್ಸಿ. ತ್ಯಾ ಕಾಳೊಕಾಂತ್ಯ್ಯಿ ಚ್ಯಾರ್ ದೊಳೆ ಎಕೆಮೆಕಾಕ್ ದೆಖ್ತಾನಾ, ಕಾಳ್ಜಾಂತ್ ಭೊಗ್ಚೆಂ ತೆಂ ದುಃಖ್ ದೊಗಾಂಯ್ಚಿ ತಡ್ವುಂಕ್ ಜಾಲೆಂನಾ.
"ಜೆಸ್ಸಿ....ತುಂ ಹಾಂಗಾ ಕಿತ್ಯಾಕ್ ಆಯ್ಲೆಂಯ್?" ಕಷ್ಟಾಂನಿ ತಾಣೆ ವಿಚಾರ್ಲೆಂ.
ತೆಂ ತಶೆಂಚ್ ಉಬೆಂ ರಾವ್ಲ್ಲೆಂ ಮೆಲ್ವಿನಾಕ್ಚ್ ಪಳೆವ್ನ್,. ಸಬಾರ್ ತೆಂಪಾ ಉಪ್ರಾಂತ್ ಆಪ್ಲ್ಯಾ ಮೊಗಾಚಾಕ್ ಪಳೆಂವ್ಚ್ಯಾಬರಿ ದಿಸ್ತಾಲಿ ತಾಣೆ ರಾವ್ಲ್ಲಿ ಸ್ಥಿತಿ. ಜೆಸ್ಸಿಕ್ ಉಲಂವ್ಕ್ ಜಾಲೆಂನಾ.
"ಬಸ್.......ಬಸ್...ಜೆಸ್ಸಿ" ತೊ ಕುಡ್ಕ್ಯಾ ಉತ್ರಾಂನಿ ಮ್ಹಣಾಲೊ.
ಜೆಸ್ಸಿ ತಾಚ್ಯಾ ಕುಶಿನ್ ಹಾಳ್ವಾಯೆನ್ ಬಸ್ಲೆಂ. "ಮೆಲ್ವಿನ್.... ತುಂ ಹಾಂಗಾಸರ್ ಕಿತ್ಯಾಕ್ ಬಸ್ಲಾಯ್?" ಲಾಂಬ್ ವೆಳಾ ಉಪ್ರಾಂತ್ ಜೆಸ್ಸಿ ಉಲೈಲೆಂ.
"ತುಂ ಕಿತ್ಯಾಕ್ ಹಾಂಗಾ ಆಯ್ಲೆಂಯ್?"
"ತುಂ ಹಾಂಗಾ ಅಸ್ತಲೊಯ್ ಮ್ಹಣ್ ಹಾಂವ್ ಜಾಣಾ ಆಸ್ಲ್ಲಿಂ ಮೆಲ್ವಿನ್......ಹುಂ.......ಆಯ್ಚಿ ಆಮ್ಚಿ ನಿಮಾಣಿ ರಾತ್. ಮ್ಹಾಕಾ ಮಾಫ್ ಕರ್ತಾಯ್ಗಿ ಮೆಲ್ವಿನ್?"
ಮೆಲ್ವಿನಾಚೆಂ ಕಾಳಿಜ್ ಶಿಂದ್ಲ್ಲ್ಯಾಬರಿ ಜಾಲೆಂ - "ಜೆಸ್ಸಿ, ತುವೆಂ ಕಾಂಯ್ ಚೂಕ್ ಕರುಂಕ್ ನಾಂಯ್..." ತೊ ಗಾತೆಲೊ.
"ಮೆಲ್ವಿನ್, ತುಜ್ಯಾ ಜೀವನಾಂತ್ ಸಾವ್ಳೆಬರಿ ಉದೆಲ್ಲಿಂ ಹಾಂವ್, ತ್ಯಾಚ್ಪರಿ ನಪೈಂಚ್ ಜಾಲ್ಯಾಂ. ಹಾಂವ್ ಜಾಣಾಮ್ ಹ್ಯಾ ಘಡಿಯೆ ತುಕಾ ಕಿತೆಂ ಭೊಗ್ತಾಗಿ ಮ್ಹಣ್...." ತೆಂ ರಡೊಂಕ್ ಲಾಗ್ಲೆಂ.
"ಜೆಸ್ಸಿ ಹಾಂಗಾ ಆಯ್ಕ್...." ಪಯ್ಸ್ ದಿಗಂತಾಕ್ ಪಳೆವ್ನ್ ಮೆಲ್ವಿನ್ ಮ್ಹಣಾಲೊ. "ಶಾಂತ್ ಆಸ್ಲ್ಲ್ಯಾ ತುಜ್ಯಾ ಜೀವನಾಂತ್ ನಿರ್ಭಾಗಿ ಹಾಂವ್, ಅವಲಕ್ಷಣಾಚೆಂ ಮುಖ್ ಘೆವ್ನ್ ಪ್ರವೇಶ್ ಜಾಲ್ಲೊಂ. ಪಳೆ, ಹಾಂವ್ ಜರ್, ತುಜ್ಯಾ ಜಿಣಿಯೆಂತ್ ಉದೆಂವ್ಕ್ನಾತ್ಲ್ಲೊಂ, ಆಜ್ ಆಶೆಂ ಘಡ್ತೆಂನಾ, ಆನಿಂ ತುಕಾ ಹೆಂ ಭೊಗುಂಕ್ ಮೆಳ್ತೆಂನಾ. ಮ್ಹಾಕಾ ಭೊಗ್ಶಿತಾಯ್ಗಿ ಜೆಸ್ಸಿ?" ಆನಿಂ ತಾಣೆಂ ಹಾತ್ ಜೊಡ್ಲೆ.
"ಮೆಲ್ವಿನ್......" ಕರುಣಾಯೆಚ್ಯಾ ತಾಳ್ಯಾನ್ ತೆಂ ಮ್ಹಣಾಲೆಂ, "ನಾ, ಮೆಲ್ವಿನ್, ತುಂ ಆಶೆಂ ಉಲೈಶಿ ಮ್ಹಾಕಾ ಕಠಿಣ್ ದುಃಖ್ ಭೊಗ್ತಾ. ತುವೆಂ ಮ್ಹಾಕಾ ಘಾತ್ ಕರುಂಕ್ ನಾಂಯ್. ದಿಸಾಚ್ಯಾ ಹರ್ಯೇಕಾ ಘಡಿಯೆ, ತುವೆಂ ಮ್ಹಜೊ ಮೋಗ್ ಕೆಲಾಯ್. ಪುಣ್ ತುಜ್ಯಾ ಮೊಗಾಕ್ ಹಾಂವೆಂ ತುಕಾ ಆಜ್ ದುಃಖ್ ಪಾಟಿಂ ದಿಲೆಂ. ಹ್ಯಾ ಅಪ್ರಾಧಾಕ್ ತುಜಿ ಕ್ಷಮಾ ಮ್ಹಾಕಾ ದಿ ಮೆಲ್ವಿನ್. ಹಾಂವ್ ಪಾತ್ಕಿ.....ತುಕಾ ದಿಲ್ಲೆಂ ಉತಾರ್ ಪಾಳುಂಕ್ ಮ್ಹಾಕಾ ಜಾಲೆಂನಾ" ತೆಂ ರಡೊಂಕ್ ಲಾಗ್ಲೆಂ.
ದೋನ್ ಮಿನುಟಾಂ ಪಾಶಾರ್ ಜಾಲಿಂ. ತ್ಯಾ ದರ್ಯಾಚ್ಯಾ ಗರ್ಜೊಣೆ ಶಿವಾಯ್ ವಿಸ್ತಾರ್ಲೆಲ್ಯಾ ಕಾಳೊಕಾಂತ್ ತಾಣಿ ಸುಸ್ಕಾರ್ಚೊ ಅವಾಜ್ ಮಾತ್ರ್ ಆಯ್ಕಾತಾಲೊ. "ಆಮಿಂ ಚಿಂತಿನಾತ್ಲೆಂ ನಿಮಾಣೆಂ ಘಡ್ಲೆಂ ಮೆಲ್ವಿನ್. ತುಜೆಂ ಜೀವನ್ ಹಾಂವೆಂ ಪಿಡ್ಡ್ಯಾರ್ ಕೆಲೆಂ. ಸರ್ವ್ ತುಜಿ ಆಶಾ ಹಾಂವೆಂ ಮಸ್ತುನ್ ಉಡೈಲಿ.
ಮೆಲ್ವಿನಾನ್ ಹಳೂ ಜೆಸ್ಸಿಚೊ ಹಾತ್ ಧರ್ಲೊ. ತಾಚಿಂ ದುಃಖಾಂ ಆಫ್ಲ್ಯಾ ಹಾತಾಂನಿ ಪುಸುನ್ ತೊ ಮ್ಹಣಾಲೊ - "ತಶೆಂ ಮ್ಹಣಾನಾಕಾ ಜೆಸ್ಸಿ. ತುವೆಂ ಮ್ಹಜಿ ಆಶಾ ಮಸ್ತುಂಕ್ ನಾಂಯ್, ಕಿತ್ಯಾಕ್ ಸ್ವಪ್ಣಾಂತ್ ಹಾಂವೆಂ ರಾವ್ಳೇರ್ ಆಶೆಲ್ಲೆಂ. ತುವೆಂ ಮ್ಹಜೆಂ ಜೀವನ್ ಪಾಡ್ ಕರುಂಕ್ ನಾಂಯ್, ಕಿತ್ಯಾಕ್ ಮ್ಹಜ್ಯಾ ನಶಿಬಾಂತ್ ಹೆಂ ಮ್ಹಾಕಾ ಭೊಗೆಲ್ಲೆಂ. ತುವೆಂ ಮ್ಹಜೊ ಕೆಲ್ಲ್ಯಾ ನಿಸ್ವಾರ್ಥಿ ಮೊಗಾಕ್ ಹಾಂವೆಂ ತುಕಾ ಕಾಂಯ್ ಪಾಟಿಂ ದೀಂವ್ಕ್ ನಾ. ಆವ್ಚಿತ್ತ್ ಆದ್ರುಷ್ಟಾನ್ ಆಮ್ಕಾಂ ನಾಗೈಲೆಂ. ಜೆಸ್ಸಿ ಹಾಂವ್ ಸಾಂಗ್ತಾಂ ತೆಂ ಆಯ್ಕಾತಾಯ್ಗಿ?"
ಜೆಸ್ಸಿನ್ ಜಾಪ್ ದಿಲಿ. ತ್ಯಾ ಶಾಂತ್ ವಾತಾವರಣಾಂತ್ ತಾಣೆಂ ರಡ್ಚೊ ಆವಾಜ್ ಮಾತ್ರ್ ಆಯ್ಕಾತಾಲೊ.
"ಪಳೆ ಜೆಸ್ಸಿ....." ಕುಡ್ಕ್ಯಾ ಉತ್ರಾಂನಿ ಮೆಲ್ವಿನಾನ್ ಮುಖಾರ್ಸಿಲೆಂ, "ಮ್ಹಜಿ ತುಂ ಕಾಂಯ್ ಖಂತ್ ಕರಿನಾಕಾ. ಮ್ಹಜೆಂ ಫುಟ್ಕರ್ ನಶಿಬ್ ಆನಿಂ ಫಾಪ್ಸಾಲ್ಲೆಂ ಕಾಳಿಜ್ ಸಾರ್ಕೆಂ ಕರುಂಕ್ ಕೊಣಾಕ್ಚ್ ಸಾಧ್ಯ್ ನಾ. ಪುಣ್ ತುಂ....... ತುಂ ಥೊಡ್ಯಾಚ್ ತೆಂಪಾನ್ ಹೆರಿಚಿ ಪತಿಣ್ ಜಾಂವ್ಕ್ ಆಸಾಯ್. ತ್ಯಾ ಸುಖಾಚ್ಯಾ ರಾಜಾಂತ್ ತುವೆಂ ಮ್ಹಜೊ ಉಗ್ಡಾಸ್ ಬಿಲ್ಕುಲ್ ಕಾಡುಂಕ್ ನಜೊ. ಹೆರಿ ಸಾಂಗಾತಾ ತುಜೆಂ ಜೀವನ್ ಸುಖಾನ್ ತುವೆಂ ಸಾರುಂಕ್ ಜಾಯ್. ಚಡ್ ಹಾಂವ್ ತುಕಾ ಸಾಂಗಾನಾ. ಮ್ಹಜೆಂ ಅಂತಿಮ್ ಮಾಗ್ಣೆಂ ತುಂ ಮಾಂದುನ್ ಘೆತಾಯ್ಗಿ ಜೆಸ್ಸಿ?"
ಜೆಸ್ಸಿಕ್ ತಿಂ ಉತ್ರಾಂ ಕಳ್ವಳ್ಯಾಂಚಿಂ ಜಾಂವ್ಕ್ ಪಾವ್ಲಿಂ. ತಾಕಾ, ಮೆಲ್ವಿನಾಕ್ ಕಸಲಿ ಜಾಪ್ ದಿಂವ್ಚಿ ಕಳ್ಳಿನಾ. ಮೆಲ್ವಿನ್ ಆಸೊಯಿ ಆಫ್ಣಾಚೆರ್ ನಾ ಪಾತ್ಯೆಣಿ ಕಿತ್ಯಾಕ್ ದವರ್ತಾ ತೆಂ ತಾಕಾ ಸಮ್ಜಾಲೆಂನಾ. ಜ್ಯಾ ದೀಸ್, ತಂಡ್ರ ಬೈಲ್ ಇಗರ್ಜೆ ಮುಖಾರ್ ಮೆಲ್ವಿನಾಕ್ ತಾಣೆಂ ಉತಾರ್ ದಿಲ್ಲೆಂ - ತ್ಯಾಚ್ ದಿಸಾ ಜೀವನಾಂತ್ಲೆಂ ಏಕ್ ಭಾಸಾವ್ಣೆಂ ತಾಣೆಂ ಘೆತ್ಲ್ಲೆಂ. ತ್ಯಾ ಖರ್ಯಾ ಕಾಳ್ಜಾಚ್ಯಾ ಉಲ್ಯಾಕ್ ಅರ್ಥ್ ಆಸ್ಲ್ಲೊ. ನೆಂಟ್ಯಾ ಕಾಳ್ಜಾಚ್ಯಾ ತ್ಯಾ ಭಾಸಾವ್ಣ್ಯಾಂತ್, ಕಿತ್ಲೆಚ್ ಕಷ್ಟ್ ಆಯ್ಲ್ಯಾರೀ ಆಪ್ಲೆಂ ಉತಾರ್ ಮೊಡ್ಚಿನಾ ಮ್ಹಳ್ಳೊ ನಿಚೆವ್ ಆಸ್ಲ್ಲೊ.
"ಮೆಲ್ವಿನ್......" ತೆಂ ಘಳ್ಘಳಿತ್ತ್ ರಡ್ಲೆಂ, " ತುಕಾ.......ತುಕಾ ಮ್ಹಜೊ ಮೋಗ್ ನಾಂಗಿ?"
"ತುಂ ಕಿತೆಂ ಮ್ಹಣ್ತಾಯ್ ಜೆಸ್ಸಿ? ಹಾಂವೆಂ ಮ್ಹಜ್ಯಾ ಕಾಳ್ಜಾಂತ್ಲೊ ಸಗ್ಳೊ ಮೋಗ್ ತುಕಾ ಸಮರ್ಪಿಲಾ. ಆನಿಂ ಜಾಲ್ಯಾರೀ ಮೊರ್ತಾಂ ವರೇಗ್ ತುಜೆಂಚ್ ರುಪ್ಣೆಂ ಮ್ಹಜ್ಯಾ ಕಾಳ್ಜಾಂತ್ ದವರ್ತಾಂ ಆನಿಂ ತುಜೊಚ್ ಮೋಗ್ ಕರ್ತಾಂ" ಕಾಂಪ್ಚ್ಯಾ ತಾಳ್ಯಾನ್ ತಾಣೆಂ ಜಾಪ್ ದಿಲಿ.
"ತಶೆಂ ಜಾಲ್ಯಾರ್ ತುಂ ಹ್ಯಾ ಪರಿಂ ಕಿತ್ಯಾಕ್ ಉಲೈತಾಯ್? ಹಾಂವೆಂ ತುಕಾ ದಿಲ್ಲೆಂ ಭಾಸಾವ್ಣೆಂ ತುಕಾ ಉಗ್ಡಾಸ್ನಾಂಗಿ?"
"ಆಸಾ.....ಆಸಾ ಜೆಸ್ಸಿ. ತರೀ ತುವೆಂ ಹೆರಿ ಲಾಗಿಂ ಕಾಜಾರ್ ಜಾಂವ್ಚೆಚ್ ಪಡ್ಲಾಂ. ತುಕಾ ದೇವ್ ಆಧಾರ್ಸುನ್ ವರ್ತಾಲೊ ಜೆಸ್ಸಿ. ತುಜೆಂ ಜೀವನ್ ಸುಖಿ ಜಾತೆಲೆಂ"
"ಮೆಲ್ವಿನ್.." ಥಟ್ಟ್ ಕರ್ನ್ ಮ್ಹಣಾಲೆಂ ತೆಂ. "ಹಾಂವ್ ಬಿಲ್ಕುಲ್ ಕಾಜಾರ್ ಜಾಯ್ನಾ"
"ಕಾಜರ್ ಜಾಯ್ನಾಂಯ್...? ತಶೆಂ ಮ್ಹಳ್ಯಾರ್....!"
"ಹಾಂವೆಂ ಮಾದ್ರಿಂತ್ ವೆಚಿ ಆಲೋಚನ್ ಕೆಲ್ಯಾ....." ತಾಣೆಂ ಸ್ವಷ್ಟ್ ಸಾಂಗ್ಲೆಂ.
ಮೆಲ್ವಿನ್ ವಿಜ್ಮಿತ್ ಜಾಲೊ. ತ್ಯಾ ಘಡಿಯೆ, ಕಿತೆಂ ಸಾಂಗ್ಚೆಂ ತಾಕಾ ಕಳ್ಳೆಂನಾ. ಜೆಸ್ಸಿಕ್ಚ್ ದುಃಖಿ ದಿಷ್ಟಿನ್ ತಾಣೆಂ ಪಳೆಲೆಂ. ತೊ ಕಿತೆಂಗಿ ಸಾಂಗೊಂಕ್ ಸೊಧ್ತಾಲೊ, ತರೀ ಜೀಬ್ ಘುಂವ್ಲಿನಾ. ಜೆಸ್ಸಿಯಿ ಸಬಾರ್ ವೇಳ್ ವೊಗೆಂಚ್ ರಾವ್ಲೆಂ.
"ಹಾಂವೆ ಮಾದ್ರಿಂಚ್ಯಾ ಭೆಸಾಂತ್ ರಿಗೊನ್, ಏಕ್ ಬರಿ ಮಾದ್ರ್ ಜಾಂವ್ಕ್ ಚಿಂತ್ಲಾಂ. ಆನಿಂ.......ಮ್ಹಜ್ಯಾ ಮುಖ್ಲ್ಯಾ ಜಿಣಿಯೆಂತ್ಯಿ ಹಾಂವ್ ತುಕಾ ವಿಸರ್ಚಿಂನಾ. ಮ್ಹಜ್ಯಾ ಜಿಣಿಯೆಚ್ಯಾ ಹರ್ಯೇಕಾ ಘಡಿಯೆ, ಮ್ಹಜ್ಯಾ ಮಾಗ್ಣ್ಯಾಂತ್ ತುಜೊ ಹಾಂವ್ ಉಗ್ಡಾಸ್ ದವರ್ತೆಲಿಂ" ರಡೊನ್ ತೆಂ ಮ್ಹಣಾಲೆಂ.
ಮೆಲ್ವಿನ್ಯಿ ರಡ್ಲೊ ಶಿವಾಯ್ ಉಲೈಲೊ ನಾ.
"ಮೆಲ್ವಿನ್ ಉಲೈನಾಂಯ್ ಕಿತ್ಯಾಕ್? ಹಾಂವೆಂ ಮಾದ್ರ್ ಜಾಂವ್ಚಿ ತುಕಾ ಖುಶಿನಾಂಗಿ?"
"ಜೆಸ್ಸಿ, ತುಕಾ ಹಾಂವೆಂ ಸಾಂಗ್ಚೆಂ ಕಿತೆಂ?" ಸಬಾರ್ ವೆಳಾ ಉಪ್ರಾಂತ್ ಕಳ್ವಳೊನ್ ತೊ ಮ್ಹಣಾಲೊ. "ತುವೆಂ ಹಿ ಆಲೋಚನ್ ಕೆಲಿಯ್ ತರೀ ಕಿತ್ಯಾಕ್?"
"ತುಕಾ ದಿಲ್ಲೆಂ ಬಾಸಾವ್ಣೆಂ ಥಿರ್ ಕರುಂಕ್ ಮೆಲ್ವಿನ್. ದುಸ್ರ್ಯಾಲಾಗಿಂ ಬಿಲ್ಕುಲ್ ಹಾಂವ್ ಕಾಜಾರ್ ಜಾಂವ್ಚಿನಾ ಮ್ಹಳ್ಳೊ ನಿಚೆವ್ ರಾಕೊಂಕ್. ಮೆಲ್ವಿನ್........ ಮ್ಹಾಕಾ ಮಾದ್ರಿಂತ್ ವಚೊಂಕ್ ರಜಾ ದಿ"
"ರಜಾ.....ರಜಾಗಿ ಜೆಸ್ಸಿ? ಮ್ಹಜ್ಯಾ ದೊಳ್ಯಾಂ ಭಾಯ್ರ್ ತುಂ ವಚೊಂಕ್?"
"ನಾ......ನಾ ಮೆಲ್ವಿನ್. ತುಜ್ಯಾ ದೊಳ್ಯಾಂ ಮುಖಾರ್ ಜರ್ ಹಾಂವ್ ಆಸಾನ್, ಹಾಂವೆಂ ಮ್ಹಜೊ ನಿಚೆವ್ ಮೊಡ್ಚೊ ಪಡ್ತೆಲೆಂ. ಹಾಂವೆ ಹೆರಿಲಾಗಿಂ ಕಾಜಾರ್ ಜಾಂವ್ಕ್ ಪಡ್ತೆಲೆಂ. ಹೆಂ ಮ್ಹಜ್ಯಾನ್ ಸಾಧ್ಯ್ ನಾ. ತುಂ ಮ್ಹಜೆ ಖಾತಿರ್ ಮಾಗ್ ಮೆಲ್ವಿನ್, ಹಾಂವೆಂ ಏಕ್ ಬರಿ ಜೀಣ್ ಜಿಯೆಶೆಂ, ಆನಿಂ ಏಕ್ ಉರ್ಬೆವಂತ್ ಮಾದ್ರ್ ಜಾಂವ್ಕ್...."
"ಜೆಸ್ಸಿ, ಹಾಂವ್ ಮಾಗ್ತಾಂ..." ಕಷ್ಟಾಂನಿ ಇತ್ಲಿಂಚ್ ಉತ್ರಾಂ ಮೆಲ್ವಿನ್ ಉಲೈಲೊ.
ನೆಕೆತ್ರಾಂ ಆತಾಂ ಬಾರೀಕ್ ಉಜ್ವಾಡಾನ್ ಮಿಣ್ಮಿಣ್ತಾಲಿಂ. ಜೆಸ್ಸಿಚೆ ವೋಂಟ್ ಕಾಂಪ್ತಾಲೆ. "ಎಕಾಚ್ ಎಕಾ ಘಡಿಯೆ ಪುಣಿ ತುವೆಂ ಮ್ಹಾಕಾ ದುಃಖೊಂವ್ಕ್ ನಾತ್ಲ್ಲೆಂಯ್. ಹಾಂವೆಂ ಸಾಂಗ್ಲ್ಲೆಂ ಸರ್ವ್ ತುಂ ಕರ್ತಾಲೊಯ್. ಆನಿಂ ನಿಮಾಣೆಂ ಹಾಂವ್ ತುಜೆಲಾಗಿಂ ಏಕ್ ವಿಚಾರ್ತಾಂ...................ಆಯ್ಕಾತಾಯ್ಗಿ ಮೆಲ್ವಿನ್?"
ಮೆಲ್ವಿನಾನ್ ತಕ್ಲಿ ಹಾಲೈಲಿ.
"ಜೀವನಾಂತ್ ತುವೆಂ ನಿರಾಶಿ ಜಾಂವ್ಕ್ ನಜೊ ಮೆಲ್ವಿನ್. ಮನ್ಶಾಚೆಂ ಜೀವನ್ ಮ್ಹಳ್ಳೆಂ ಕಷ್ಟಾಂ-ದುಃಖಾಚೆಂ ಏಕ್ ಪಯ್ಣ್. ಮ್ಹಜ್ಯಾ ಖಂತಿನ್ ತುವೆಂ ಕರ್ಗೊಂಕ್ ನಜೊ ವ ಜೀವ್ಘಾತಾಕ್ ಪ್ರಯತ್ನ್ ಕರುಂಕ್ ನಜೊ..."
ತಾಣೆಂ ಜಾಪ್ ಕಾಡ್ಲಿನಾ.
"ವೇಳ್ ಪಾಶಾರ್ ಜಾತಾನಾ, ತುಜೆಂ ದುಃಖ್ ಥಾಂಬ್ತೆಲೆಂ. ವೇಳ್ ಮ್ಹಳ್ಳ್ಯಾ ಸಂಗ್ತಿಕ್, ಕಸಲೆಂಯ್ ದುಃಖ್ ಥಾಂಬೊಂವ್ಚಿ ಸಕತ್ ಆಸಾ. ತುಂ ತುಜೆಂ ಶಿಕಾಪ್ ಬರೆಂ ಕರ್ನ್ ಶಿಕ್........ ಬರ್ಯಾ ಜೊಡಿಕ್ ಪಾವ್. ಉಪ್ರಾಂತ್ ತುಜೆ ತಸಲ್ಯಾ ಶಿಕ್ಪಿ, ಸುಂದರ್, ಗುಣೇಸ್ತ್ ಚಲಿಯೆಲಾಗಿಂ ಕಾಜಾರ್ ಜಾವ್ನ್ ...." ಜೆಸ್ಸಿಚಿಂ ನಿಮಾಣಿಂ ಉತ್ರಾಂ ಅಸ್ವಷ್ಟ್ ಜಾವ್ನ್ ಭಾಯ್ರ್ ಸರ್ಲಿಂ. ತಾಚೊ ತಾಳೊ ಕಾಂಪ್ಲೊ ಆನಿಂ ಮೆಲ್ವಿನಾಚೆಂ ಕಾಳಿಜ್ ಕಡ್ಲೆಂ.
"ವ್ಹಯ್ ಮೆಲ್ವಿನ್......ತ್ಯಾ ಚಲಿಯೆಸಂಗಿಂ ತುಜೆಂ ಜೀವನ್ ಸುಖಾಚೆಂ ಜಾಂವ್ಕ್ ಪಾವ್ತೆಲೆಂ. ಆನಿಂ ಹಾಂವ್ ಮ್ಹಜ್ಯಾ ಮಾಗ್ಣ್ಯಾಂತ್ ಸದಾಂಚ್ ತುಮ್ಚೊ ಉಗ್ಡಾಸ್ ದವರ್ತೆಲಿಂ" ಘಳ್ಘಳಿತ್ತ್ ರಡ್ಲೆಂ ತೆಂ.
ಮೆಲ್ವಿನಾನ್ ತಾಚೆ ಕೇಸ್ ಪೊಶೆಲೆ. "ಪಿಶ್ಯಾ ಚೆಡ್ವಾ, ತುಂ ಆಶೆಂ ಕಿತ್ಯಾಕ್ ಉಲೈತಾಯ್ ಜೆಸ್ಸಿ? ಖರೆಂಚ್ ಹಾಂವ್ ತುಕಾ ಸಾಂಗ್ತಾಂ ಮೊಳ್ಬಾ ವಯ್ಲ್ಯಾ ನೆಕೆತ್ರಾಂಚಿ ಸಾಕ್ಸ್ ಘೆವ್ನ್.......ಹಾಂವ್ ಸಗ್ಳೆಂ ಮ್ಹಜೆಂ ಜೀವನ್ ಅಂಕ್ವಾರ್ಪಣಾನ್ ಸಾರ್ತಾಲೊಂ. ತುಂ ನಾತ್ಲ್ಲೆಂ ಜೀವನ್, ಮ್ಹಜೆಂಯಿ ನ್ಹಂಯ್ ಜೆಸ್ಸಿ. ತುಜೆಂ ಸ್ಥಾನ್ ಲಾಖಾಂತ್ಲ್ಯಾ ಎಕಾ ಚೆಡ್ವಾನ್ಯಿ ಭರ್ತಿ ಕರ್ಚ್ಯಾ ಬರಿ ನಾ ಮ್ಹಜ್ಯಾ ಜಿಣಿಯೆಂತ್"
"ಮೆಲ್ವಿನ್.." ಬೊಟ್ ಚಾಬೊನ್ ಉದ್ಗಾರ್ ಸೊಡ್ಲೊ ಜೆಸ್ಸಿನ್.
"ವ್ಹಯ್ ಜೆಸ್ಸಿ.... ತುಂ ಮ್ಹಜೆಥಾವ್ನ್ ಪಯ್ಸ್ ಸರ್ಲ್ಯಾರಿ, ತುಜೊ ಉಗ್ಡಾಸ್ ಸದಾಂಚ್ ಮ್ಹಜ್ಯಾ ಕಾಳ್ಜಾಂತ್ ಆಸ್ತೊಲೊ" ತ್ಯಾ ಎಕಾ ಕ್ಷಣಾ, ಬಾಂದುನ್ ದವರ್ಲ್ಲೆಂ ಮೆಲ್ವಿನಾಚೆಂ ದುಃಖ್ ಕಾಟ್ ತುಟೊನ್ ವೆಚ್ಯಾ ವ್ಹಾಳಾಬರಿ ವ್ಹಾಳ್ಳೆಂ.
"ಮೆಲ್ವಿನ್ ತುಂ ರಡ್ತಾಯ್..?"
"ನಾ......ಆನಿಂ ರಡಾನಾ ಜೆಸ್ಸಿ. ಫುಟ್ಲ್ಲ್ಯಾ ಹ್ಯಾ ಕಾಳ್ಜಾಂತ್ ಉರ್ಲ್ಲಿಂ ನಿಮಾಣಿಂ ದುಃಖಾಂ ವ್ಹಾಳೊವ್ನ್ ಅಖೇರ್ ಕರ್ತಾಂ. ಉಪ್ರಾಂತ್ ಹಾಂವ್ ರಡಾನಾ.....?"
"ಮೆಲ್ವಿನ್, ಮ್ಹಜೆಖಾತಿರ್ ತುಂ ರಡಾನಾಕಾ. ದೆವಾನ್ ಖಂಡಿತ್ ಜಾವ್ನ್ ತುಜ್ಯಾ ನಶಿಬಾಂತ್ ಬರೆಂ ಚೆಡುಂ ಫಾವೊ ಕೆಲಾಂ..... ರಡಾನಾಕಾ"
"ನಾ....ಮ್ಹಜೆ ಕಾಳಿಜ್ ಪಿಟೊ ಜಾಲಾಂ ಜೆಸ್ಸಿ, ಆನಿಂ ರಡಾನಾ ಹಾಂವ್"
ಮಿನುಟಾಂ ಪಾಶಾರ್ ಜಾಲಿಂ....... ಸಬಾರ್ ವೆಳಾ ಉಪ್ರಾಂತ್ ತಿಂ ಉಟ್ಲಿಂ, ಸುಲ್ತಾನ್ ಬತ್ತೇರಿ ಥಾವ್ನ್ ಉರ್ವಾ ಮಾರ್ಕೆಟಿ ಮ್ಹಣಾಸರ್ ತಿ ವಾಟ್, ನಿಶ್ಶಬ್ದ್ ಜಾವ್ನ್ ದೊಗಾಂಯ್ ಚಲ್ಲಿಂ. ಪಾಟ್ಲ್ಯಾನ್ ಉಬೆಂ ಆಸ್ಚ್ಯಾ ತ್ಯಾ ಕೊಟ್ಯಾಕ್, ನ್ಹಂಯ್ಕ್ ಆನಿಂ ದರ್ಯಾಕ್ ಆದೇವ್ಸ್ ಮಾಗೊನ್, ನಿಮಾಣ್ಯಾ ಪಾವ್ಟಿಂ ಸಾಂಗಾತಾ ರಸ್ತೊ ತಿಂ ಚಲೊಂಕ್ ಲಾಗ್ಲಿಂ.
"ಮೆಲ್ವಿನ್, ಆದೇವ್ಸ್ ತುಕಾ.."
ಗಳ್ಯಾಚೊ ಶಿರೊ ಶಿರೊ ಪುಗೊನ್ ಆಯ್ಲ್ಯೊ ಮೆಲ್ವಿನಾಕ್. ದೊಳೆ ಬಿಜ್ಲೆ ಆನಿಂ ಕಾಳಿಜ್ ರಡ್ಲೆಂ.
"ಜೆಸ್ಸಿ.......ವೇಂಗ್ ಮಾರ್ಲಿ ಮೆಲ್ವಿನಾನ್ ಜೆಸ್ಸಿಕ್. "ಮ್ಹಾಕಾ ವಿಸಾರ್ನಾಕಾ ಜೆಸ್ಸಿ. ಅನ್ಯೇಕಾ ಸಂಸಾರಾಂತ್ ಮೆಳ್ಯಾಂ" ತೊ ತಾಚ್ಯಾ ವೆಂಗೆ ಥಾವ್ನ್ ಸುಟ್ಲೊ.
"ಮ್ಹಜೆ ಖಾತಿರ್ ಮಾಗ್ ಮೆಲ್ವಿನ್...."
ಆನಿಂ ತಾಣೆಂ ನಿಮಾಣ್ಯಾ ಪಾವ್ಟಿಂ ಪಳೆಲೆಂ ಜೆಸ್ಸಿಕ್......ಜ್ಯಾ ಜೆಸ್ಸಿಕ್ ಸ ಮಹಿನ್ಯಾಂ ಆದಿಂ ಲೇಡಿಹಿಲ್ಲ್ ಬಸ್ಸ್ ಸ್ಟೆಂಡಾಂತ್ ಪಯ್ಲ್ಯಾ ಪಾವ್ಟಿಂ ತಾಣೆಂ ಪಳೆಲ್ಲೆಂ.
"ಮ್ಹಾಕಾ ಕೆದಿಂಚ್ ವಿಸಾರ್ನಾಕಾ ಜೆಸ್ಸಿ....... ತುಜೆಖಾತಿರ್ ಮಾಗ್ತಾಂ" ತಾಚೆಂ ಕಾಳಿಜ್ ಬೋಬ್ ಮಾರುಂಕ್ಲಾಗ್ಲೆಂ. ದುಸ್ರ್ಯಾ ಕ್ಷಣಾ, ತೊ ಜೆಸ್ಸಿಕ್ ಪಾಟ್ ಕರ್ನ್ ಚಲ್ಲೊ - ವ್ಹಾಳ್ಚಿಂ ದುಃಖಾಂ ವ್ಹಾಳೊಂಕ್ ಸೊಡ್ನ್.
(ಮೆಲ್ವಿನ್ ಆನಿಂ ಜೆಸ್ಸಿಚ್ಯಾ ಜಿಣಿಯೆಂತ್ಲೊ ಏಕ್ ಅವಸ್ವರ್ ಸಮಾಪ್ತ್ ಜಾಲ್ಲೊ. ಸಂಸಾರ್ಚ್ ಸಾಂಡುನ್ ಮಾದ್ರಿಂತ್ ರಿಗೊಂಕ್ ಆಲೋಚನ್ ಕೆಲ್ಲಿ ಜೆಸ್ಸಿನ್. ಪುಣ್......ಸರ್ವ್ ಹೊಗ್ಡಾಯಿಲ್ಲ್ಲ್ಯಾ ಮೆಲ್ವಿನಾನ್ ಕಿತೆಂ ಕೆಲೆಂ? ಕಾಳ್ಕ್ಯಾ ರಾತಿಂ ತೊ ದಾಂಟ್ಟೊನ್ ಪಡೊನ್ ಮೆಟಾಂ ಚಮ್ಕಾತಾನಾ, ತಾಚ್ಯಾ ಮತಿಂತ್ ಕಿತೆಂ ನಿರ್ಧಾರ್ ಆಯ್ಲೊ? ಜೀವ್ಘಾತ್? ಪೊಳಾಪೊಳ್...? ಹ್ಯಾ ಕುತುಹಲಾಚ್ಯಾ ಸವಾಲಾಂಕ್ ಜಾಪಿ ಫುಡ್ಲ್ಯಾ ಅಂಕ್ಯಾಂನಿ ತುಮಿಂಚ್ ವಾಚುನ್ ಸಮ್ಜಾಜಾಯ್).
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
