ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 12
ಭಿಂಯಾನ್ ಆನಿಂ ಖಂತಿನ್ ಮೆಲ್ವಿನಾನ್ ಜೆಸ್ಸಿಚ್ಯಾ ಬಾವ್ಳ್ಯಾಕ್ ಧರ್ನ್ ವಿಚಾರ್ಲೆಂ - "ಜೆಸ್ಸಿ, ಸಾಂಗ್, ಖಂಯ್ಚ್ಯಾ ಸಂಗ್ತಿಂತ್ ಮ್ಹಜಿಂ ಸ್ವಪಾಣ್ ಫಟ್ ಜಾಲಾಂ? ಹಾಂವ್ ತಾಕಾ ಘಾತ್ ಕರಿನಾ, ಹಾಂವ್ ತುಕಾ ಪರ್ತುನ್ ಜಾಲ್ಯಾರಿ ಪ್ರಮಾಣಾ ಖಾಲ್....
ಮಧೆಂಚ್ ತೆಂ ಸುಸ್ಕಾರ್ಲೆಂ - "ನಾ ಮೆಲ್ವಿನ್. ತುಜೆರ್ ಮ್ಹಾಕಾ ಸಂಪೂರ್ಣ್ ಭರ್ವಸೊ ಆಸಾ. ಆನಿಂ ಮುಖಾರ್ಯಿ ಆಸ್ತೊಲೊಚ್..... ತುಂ ತಶೆಂ ಉಲೈನಾಕಾ"
"ತರ್ ಕಿತೆಂ? ರೊಫಿನ್ಭಾಯ್ ಆಯಿಲ್ಲ್ಯಾನ್ ತುಕಾ ಕಿತೆಂ ಜಾಲೆಂ?" ಉದ್ವೇಗಾನ್ ಸವಾಲ್ ಕೆಲೆಂ ಮೆಲ್ವಿನಾನ್.
"ಮೆಲ್ವಿನ್, ಮ್ಹಾಕಾ ಹೆರಿಲಾಗಿಂ ಕಾಜಾರಾಚೆಂ ಪ್ರಯತ್ನ್ ಚಲ್ತಾ. ತುಂ.......ತುಂ ಮ್ಹಾಕಾ ಸಾಂಡಿನಾಕಾ" ಜೆಸ್ಸಿನ್ ಥಟ್ಟ್ ಕರ್ನ್ ತಕ್ಲಿ ಬಾಗಾಯ್ಲಿ.
ಮೆಲ್ವಿನಾಚೆಂ ಕಾಳಿಜ್ ಕಲ್ಲ್ ಜಾಲೆಂ. ಕಸಲೆಂ ಆಕಸ್ಮಿಕ್ ಅನ್ವಾರ್! ಕಾಲ್ ವ್ಹಡ್ಲಿಮಾಂಯ್ ಸರ್ಲ್ಯಾ ಆನಿಂ ಆಜ್........ಬಿರಾಂತೆನ್ ಆನಿಂ ಆಕ್ಲಾಸಾನ್ ಮೆಲ್ವಿನಾಚೆಂ ಸಿಂತಿದ್ ಪಿಶೆಂ ಜಾಲೆಂ. ದುಸ್ರ್ಯಾ ಕ್ಷಣಾ ತೊ ಕ್ರೋಧಾನ್ ಕಡ್ಕಡ್ಲೊ ಆನಿಂ ಉಟ್ಲೊ. "ಜೆಸ್ಸಿ.....ಹೆರಿಲಾಗಿಂ ಕಾಜಾರಾಕ್ ಒಪ್ಪಿಗಿ ದಿಲ್ಯಾಯ್ಗಿ ತುವೆಂ?"
ಮುರ್ಖಾಚೆಂ ಸವಾಲ್ ಜಾವ್ನಾಸ್ಲ್ಲೆಂ ಮೆಲ್ವಿನಾಚೆಂ. ಕಾಳಿಜ್ಚ್ ಪುಟ್ಲ್ಲ್ಯಾ ಜಿನ್ಸಾರ್ ರಡೊನ್ ಉಲೈಲೆಂ ಜೆಸ್ಸಿ - "ಓ....ತುಂ ಮ್ಹಾಕಾ ಪಾತ್ಯೆನಾಂಯ್ಗಿ ? ತುಕಾಯ್ ಮ್ಹಜೊ ದುಬಾವ್ ಆಯ್ಲೊಗಿ ಮೆಲ್ವಿನ್....?"
ಮೆಲ್ವಿನಾಕ್ ಆಪ್ಣೆಂ ತಶೆಂ ಮ್ಹಳ್ಳೆಲಿ ಚೂಕ್ ಮ್ಹಣ್ ಕಳ್ಳೆಂ. ಭಾರಾಧಿಕ್ ತಾಳ್ಯಾನ್ ತೊ ಮ್ಹಣಾಲೊ - "ನಾ ಜೆಸ್ಸಿ, ತುಂ ತುಜ್ಯಾ ಮೊಗಾಂತ್ ಥಿರ್ ಆಸಾ ಸರ್ ಸಂಸಾರ್ಚ್ ಮ್ಹಜೆರ್ ವಿರೋಧ್ ರಾವ್ಲ್ಯಾರೀ ಹಾಂವ್ ಝುಜ್ತಾಲೊಂ. ಹ್ಯಾ ಪ್ರಯತ್ನಾಂತ್ ಮ್ಹಜೊ ಪ್ರಾಣ್ ಗೆಲ್ಯಾರಿ ವ್ಹಡ್ ನಹಿಂ... ಯೆ, ಜೆಸ್ಸಿ....."
"ಖಂಯ್ ಮೆಲ್ವಿನ್?" ವಿಜ್ಮಿತ್ ಜಾವ್ನ್ ಉಲೈಲೆಂ ತೆಂ.
"ತುಜ್ಯಾ ಘರಾ....."
"ಆಮ್ಗೆರ್...! ಕಿತ್ಯಾಕ್?" ಘಡ್ಘಡೊನ್ ತೆಂ ಮ್ಹಣಾಲೆಂ.
"ವ್ಹಯ್ ತುಮ್ಗೆರ್ಚ್". ಜೆಸ್ಸಿಚ್ಯಾ ದೊಳ್ಯಾಂಕ್ಚ್ ದೀಷ್ಟ್ ಲಾವ್ನ್ ಉಲೈಲೊ ಮೆಲ್ವಿನ್, "ತುಜ್ಯಾ ಮಾಂಯ್ಲಾಗಿಂ ಉಲೊಂವ್ಕ್ ಆನಿಂ ರೊಫಿನ್ಬಾಯೆಲಾಗಿಂ ಉಲೊಂವ್ಕ್. ತಾಂಕಾಂ ಸಾಂಗೊಂಕ್ ಜೆಸ್ಸಿ, ಹಾಂವ್ ತುಜೊ ಮೋಗ್ ಕರ್ತಾಂ ಮ್ಹಣ್. ಹಾಂವೆಂ ತುಜೊ ಮೋಗ್ ಕೆಲ್ಲೊ, ತುಕಾ ದುಸ್ರ್ಯಾಚಿ ಪತಿಣ್ ಜಾವ್ನ್ ಪಳೆಂವ್ಚ್ಯಾಖಾತಿರ್ ನಹಿಂ ಮ್ಹಣ್ ತಾಂಕಾಂ ಕಳೊಂವ್ಕ್. ಆನಿಂ ತಾಂಕಾಂ ಹೆಂಚ್ ನಿಮಾಣೆಂ ಉತಾರ್ ತಿಳ್ಸುಂಕ್ ಕಿ, ಮ್ಹಜ್ಯಾ ಶರೀರಾಂತ್ಲೊ ಪ್ರಾಣ್ ವೆತಾ ಮ್ಹಣಾಸರ್ ತುಕಾ ಹಾಂವ್ ಸಾಂಡ್ಚೊಂನಾ ಮ್ಹಣ್"
"ಮೆಲ್ವಿನ್....ನಾಕಾ ಮೆಲ್ವಿನ್...." ಜೆಸ್ಸಿ ಭಿಂಯಾನ್ ಕಾಂಪ್ತಾಲೆಂ, "ತುಂ ಉಚಾಂಬಳ್ ಜಾವ್ನ್ ಹ್ಯಾ ವೆಳಾರ್ ಆಮ್ಗೆರ್ ಯೆಶಿ ಜಾಲ್ಯಾರ್ ಕಾಮ್ ಪಾಡ್ ಜಾತೆಲೆಂ"
"ತರ್ ಹಾಂವೆಂ ಕಿತೆಂ ಕರುಂಕ್ ಜಾಯ್ ಜೆಸ್ಸಿ? ದೊಳೆ ದಾಂಪುನ್ ವೊಗೊಚ್ ರಾವೊಂಕ್ ಜಾಯ್ಗಿ? ವ್ಹಡಿಲಾಂಚ್ಯಾ ಸ್ವಾರ್ಥಾಕ್ ತುಂ ಏಕ್ ಸಾರ್ಯಾಚಿ ಬಲಿ ಜಾಂವ್ಚೆಂ ಪಳೆವ್ನ್ಯಿ ಅಸಹಾಯಕಾಬರಿ ತೊಂಡ್ ಬಂಧ್ ದವರಿಜಾಯ್ ಮ್ಹಣ್ತಾಯ್ಗಿ ತುಂ?"
ದೋನ್ ಕ್ಷಣಾಂ ವೊಗೆಂಚ್ ರಾವೊನ್ ಜೆಸ್ಸಿ ಮ್ಹಣಾಲೆಂ "ಹಾಂವ್ ಜಾಣಾಂ ಮೆಲ್ವಿನ್ ತುಜ್ಯಾ ಮತಿಂತ್ ಕಿತೆಂ ಬೊಗ್ತಾ ತೆಂ. ಮ್ಹಾಕಾಯಿ ದುಃಖ್ ಆನಿಂ ಕಠಿಣ್ ಭಿರಾಂತ್ ದಿಸ್ತಾ. ತುಂ ಹಾಂವೆಂ ಸಾಂಗ್ಚೆಂ ಆಯ್ಕಾತಾಯ್ಗಿ?"
"ಕಿತೆಂ ತೆಂ ಜೆಸ್ಸಿ?" ನಿರುತ್ಸಾಹನ್ ಉಲೈಲೊ ಮೆಲ್ವಿನ್.
"ಕಾಲ್, ತುಂ ಘರಾ ವಚೊನ್ ಏಕ್ ಘಂಟ್ಯಾ ಉಪ್ರಾಂತ್ ರೊಫಿನ್ಬಾಯ್ ಆನಿಂ ರಿಜಾ ಆಮ್ಗೆರ್ ಪಾವ್ಲಿಂ. ಉಪ್ರಾಂತ್ ರಾತಿಂ ಮೊರ್ನಾಚಿ ಖಬಾರ್ ಉಲೈತಾನಾ, ತುಂ ತೆರೆಜ್ ಆಂಟಿಚೊ ಪಿಲ್ಯಾದ್ ನ್ಹಂಯ್ ಮ್ಹಣ್ ಕಳ್ಳೆಂ. ಆಮ್ಚ್ಯೊ ಫಟಿ ಸಕ್ಕಡ್ ಕಳ್ಳ್ಯೊ ಸಕ್ಡಾಂಕ್. ಪುಣ್ ತ್ಯಾ ದುಃಖಾಚ್ಯಾ ಸಂದರ್ಭಾರ್ ಮ್ಹಜೊ ವಿಚಾರ್ ಕೊಣೆಂಯಿ ಕೆಲೊನಾ....."
"ಉಪ್ರಾಂತ್......ಸಾಂಗ್...."
"ಆಜ್ ಸಕಾಳಿಂ ಆಮಿಂ ಚಿಂತಿನಾತ್ಲ್ಲೆಂ ನೀಜ್ ಜಾಲೆಂ. ರೊಫಿನ್ಭಾಯೆನ್ ಆಮಿಂ ಘರ್ ಸೊಡ್ನ್ ಕಾರ್ಕಳ್ ಯೇಂವ್ಕ್ ವತ್ತಾಯ್ ಕೆಲಿ. ತ್ಯಾ ಶಿವಾಯ್, ತಾಣಿಂ ಹ್ಯಾ ಆದಿಂಚ್ ಕರ್ನ್ ದವರ್ಲ್ಲ್ಯಾ ಮಾಂಡಾವಳಿ ಪರ್ಮಾಣೆಂ ಹೆರಿಲಾಗಿಂ ಮ್ಹಜೆಂ ಕಾಜಾರ್ ಕರ್ಚಿ ಖಬಾರ್ ಆಯ್ಲಿ"
"ಹ್ಯಾ ಆದಿಂಚ್......!" ಹಾಂಕ್ರೆಲೊ ಮೆಲ್ವಿನ್.
"ವ್ಹಯ್ ಮೆಲ್ವಿನ್. ರೊಫಿನ್ಭಾಯೆನ್ ದೋನ್ ವರ್ಸಾಂ ಆದಿಂ ಥಾವ್ನ್ಂಚ್ ಮ್ಹಾಕಾ ಸುನ್ ಕರ್ಚಿ ಆಲೋಚನ್ ಕೆಲ್ಯಾ. ಹೆಂ ಹಾಂವ್ ನೆಣಾಸ್ಲ್ಲಿಂ. ತಾಂಗೆರ್ ಮ್ಹಾಕಾ, ನ್ಹಂಯ್ ಎಕಾ ಬೋರ್ಡರಾಚೆಂ ಬಗಾರ್ ಸುನೆಚೆಂ ಸ್ಥಾನ್ ಎದೊಳ್ಚ್ ಆಸ್ಲ್ಲೆಂ"
ಮೆಲ್ವಿನ್ ನಿಶ್ಶಬ್ದ್ ರಾವ್ಲ್ಲೊ ಪಳೆವ್ನ್ ಜೆಸ್ಸಿನ್ಂಚ್ ಮುಖಾರ್ಸಿಲೆಂ - "ಹೆರಿಯಿ ಘರಾ ಆಯ್ಲಾ. ತೊ ಪೊರ್ವಾಂ ಆಮ್ಗೆರ್ ಯೆತೊಲೊ.
"ಹೆರಿಕ್ ತುಜೆಲಾಗಿಂ ಕಾಜಾರ್ ಜಾಂವ್ಚಿ ಖುಶಿ ಆಸಾಗಿ ಜೆಸ್ಸಿ?" ತಡ್ವುಂಕ್ ತಾಂಕಾನಾಸ್ತಾಂ ಮೆಲ್ವಿನಾನ್ ವಿಚಾರ್ಲೆಂ.
"ಹಾಂವ್ ನೆಣಾ. ಆವಯ್ಚ್ಯಾ ವತ್ತಾಯೆಕ್ ಒಪ್ವೊಂಕ್ ಪುರೊ ಹೆರಿ" ಇತ್ಲೆಂ ಮ್ಹಣ್ತಾನಾ ಜೆಸ್ಸಿಚೊ ತಾಳೊ ಕಾಂಪ್ಲೊ.
ಮೆಲ್ವಿನ್ ವೊಗೊಚ್ ರಾವೊನ್ ಚಿಂತುಂಕ್ ಪಡ್ಲೊ. ಹೆಂ ಕಶೆಂಯ್ ಆಡಾಂವ್ಕ್ ಜಾಯ್. ಹೆರಿನ್ ಜೆಸ್ಸಿಕ್ ಒಪ್ವಾನಾಶೆಂ ಕರುಂಕ್ ಜಾಯ್. ನಾ ತರ್, ಆಪ್ಲೆ ಸ್ವಪಾಣ್, ಆಶಾ ಸಗ್ಳಿ ವ್ಯರ್ಥ್ ಜಾತೆಲಿ. ಜೆಸ್ಸಿ ಆಪ್ಣಾಕ್ ಸಾಸ್ಣಾಕ್ ಚುಕ್ತೆಲೆಂ. ಉಪ್ರಾಂತ್ ಜೆಸ್ಸಿವಿಣ್ ಆಪ್ಲೆಂ ಜೀವನ್ ಅಸಾಧ್ಯ್....
"ಮೆಲ್ವಿನ್, ಚಿಂತ್ತಾಯ್ ಕಿತೆಂ?"
"ಏಕ್ ಉಪಾಯ್ ಚಿಂತ್ತಾಂ ಜೆಸ್ಸಿ,. ವ್ಹಯ್, ಹಾಂವ್ ಹೆಂ ಖಂಡಿತ್ ಆಡಾಂವ್ಕ್ ಪಳೆತಾಂ. ತುಂ ಮ್ಹಾಕಾ ಪಾತ್ಯೆತಾಯ್ಮೂ?"
ಜೆಸ್ಸಿನ್ ಮೆಲ್ವಿನಾಚೊ ಹಾತ್ ಧರ್ನ್ ಮ್ಹಳೆಂ "ಮೆಲ್ವಿನ್,....ತುಕಾ ನ್ಹಂಯ್ ತರ್ ಹಾಂವೆಂ ಕೊಣಾಕ್ ಪಾತ್ಯೆಂವ್ಚೆಂ? ತುಂಚ್ ಮ್ಹಜೊ ಭರ್ವಸೊ ಆನಿಂ ಮ್ಹಜೆಂ ಸರ್ವಸ್ವ್ ಮೆಲ್ವಿನ್......ಹ್ಯಾ ಅನ್ವಾರಾಂತ್ಲೆಂ ಮ್ಹಾಕಾ ಬಚಾವ್ ಕರ್. ತುಜೆ ಬಗಾರ್ ಮ್ಹಾಕಾ ಕೊಣ್ಂಚ್ ನಾಕಾ. ಹಾಂವ್ ದುಸ್ರ್ಯಾ ಕೊಣಾಲಾಗಿಂಯಿ ಕಾಜಾರ್ ಜಾಂವ್ಚಿ ನಾಂ" ಹಾಳ್ವಾಯೆನ್ ರಡ್ಲೆಂ ಜೆಸ್ಸಿ.
ಜೆಸ್ಸಿಚ್ಯಾ ಭುಜಾಕ್ ಧರ್ನ್ ಉಟೈಲೆಂ ಮೆಲ್ವಿನಾನ್. "ಚಲ್ ಜೆಸ್ಸಿ, ಆಮಿಂ ಘರಾ ಚಲ್ಯಾಂ ಆತಾಂ. ಮ್ಹಜ್ಯಾ ಪ್ರಯತ್ನಾಂತ್ ದೇವ್ ಮ್ಹಾಕಾ ಕುಮಕ್ ಕರ್ತಾಲೊ"
ದೊಗಾಂಯ್ ಗರಾಲಾಗಿಂ ಪಾವ್ತಾನಾ ತೊ ಮ್ಹಣಾಲೊ - "ಜೆಸ್ಸಿ, ಹಾಂವ್ ಫಾಲ್ಯಾಂ ನ್ಹಂಯ್, ಪೊರ್ವಾಂ ಮೆಳ್ತಾಂ ತುಂ ಘರಾ ವಚ್...." ಆಶೆಂ ಸಾಂಗೊನ್ ತೊ ಘರ್ಚ್ಯಾ ವಾಟೆಕ್ ಲಾಗ್ಲೊ.
ಮೆಲ್ವಿನಾಚ್ಯಾ ಮತಿಂತ್ ಚಿಂತ್ನಾಂಚೊ ಭೊರೊ ಆಸ್ಲ್ಲೊ. ಆಪ್ಣೆಂ ಚಿಂತ್ಲ್ಲೆಂ ಜಾಯ್ತ್ಗಿ......ನಾ ಜಾಲ್ಯಾರ್? ಖಂಯ್ಚ್ಯಾಕಿ ಫಾಲ್ಯಾಂ ಸಕಾಳೀಂ ವಚೊನ್ ಗಿಬ್ಬಾಕ್ ಮೆಳೊಂಕ್ ಜಯ್. ತಾಕಾ ಘೆವ್ನ್ ಕಾರ್ಕಳ್ ವಚೊನ್, ಹೆರಿಲಾಗಿಂ ಸಗ್ಳಿ ಖಬಾರ್ ಸಾಂಗೊಂಕ್ಜಾಯ್. ವ್ಹಯ್, ಹಿಚ್ ಏಕ್ ವಾಟ್ ಸೊಂಪಿ. ದುಸ್ರೊ ಉಪಾಯ್ಚ್ ನಾ.
ಸಗ್ಳಿ ರಾತ್ ಉಜ್ಯಾರ್ ಸಾರ್ಲ್ಲ್ಯಾ ಬರಿ ಜಾಲಿ ಮೆಲ್ವಿನಾಕ್. ಅರ್ಧುಕುರ್ಯಾ ನಿದೆಂತ್ ಘಡಿಯೆಕ್ ಏಕ್ ಪಾವ್ಟಿಂ ತೊ ಜಾಗೊ ಜಾತಾಲೊ. ಬಿರಾಂಕುಳ್ ಸ್ವಪ್ಣಾಂ ತಾಣೆಂ ತ್ಯಾ ರಾತಿಂ ದೆಖ್ಲಿಂ....ಕಶಿಯ್ ತಿ ರಾತ್ ಪಾಶಾರ್ ಕರಿಜಾಯ್ ಜಾಲ್ಯಾರ್ ಮೆಲ್ವಿನಾಚೆ ಹಾಲ್ ಹವಾಲ್ ಜಾಲೆ.
ದುಸ್ರ್ಯಾ ಸಕಾಳಿಂ ಕಾಫಿ ಪಿಯೆತಾಚ್ ಆವಯ್ಲಾಗಿಂ ತೊ ಮ್ಹಣಾಲೊ - "ಮಾಂಯ್, ಆಜ್ ಹಾಂವ್ ಮ್ಹಜ್ಯಾ ಎಕ್ಲ್ಯಾ ಇಷ್ಟಗೆರ್ ವೆತಾಂ,. ದನ್ಪಾರಾಂ ಜೆವ್ಣಾಕ್ ಮ್ಹಾಕಾ ರಾಕಾನಾಕಾತ್. ಸಾಂಜೆ ಬಿತರ್ ಯೆತಾಂ"
ಆವಯ್ನ್ ಸದಾಂಬರಿ ಪುರ್ಪುರೊನ್ ಕಬ್ಲಾತ್ ದಿಲಿ. ತಕ್ಷಣ್ ತೊ ನ್ಹೆಸ್ಲೊ ಆನಿಂ ಲಾಲ್ಬಾಗ್ ಕುಶಿನ್ ಚಲೊಂಕ್ಲಾಗ್ಲೊ. ಸಾಡೆ-ಸಾತ್ ವೊರಾಂಚೆರ್ ಬೊಂದೆಲ್ ವೆಚೆಂ ಬಸ್ಸ್ ತಾಕಾ ಲಾಲ್ಭಾಗಾಂತ್ ಮೆಳ್ಳೆಂ ಆನಿಂ ತೊ ಬೊಂದೆಲ್ ಯೇವ್ನ್ ಪಾವ್ಲೊ.
ಪಯ್ಲ್ಯಾಚ್ ಪಾವ್ಟಿಂ ಗಿಬ್ಬಾಗೆರ್ ತೊ ವೆಚೊ ಜಾಲ್ಲ್ಯಾನ್, ತಾಚೆಂ ಘರ್ ಸೊದುನ್ ಕಾಡುಂಕ್ ಸಬಾರ್ ವೇಳ್ ಲಾಗ್ಲೊ ಮೆಲ್ವಿನಾಕ್. ಆಖ್ರೇಕ್ ಕೊಣೆ ಎಕ್ಲ್ಯಾನ್ ಗಿಬ್ಬಾಚ್ಯಾ ಘರ್ಚಿ ವಾಟ್ ತಾಕಾ ದಾಕೈಲಿ. ಮೆಲ್ವಿನ್ ಗಿಬ್ಬಾಚಾ ಘರಾ ಪಾವ್ತಾನಾ ತೊ ಹಿತ್ಲಾಂತ್ಲ್ಯಾ ಬಾಂಯ್ಚೆಂ ಉದಾಕ್ ವೊಡ್ತಾಲೊ. ಮೆಲ್ವಿನಾಕ್ ಪಳೆಲ್ಲೆಂಚ್ ತೊ - "ಹೋ......ಮೆಲ್ವಿನ್, ಯೆ, ಯೆ," ಮ್ಹಣ್ ಹಾಸ್ಯಾನ್ ಸ್ವಾಗತ್ ದೀಂವ್ಕ್ ಲಾಗ್ಲೊ.
ಮೆಲ್ವಿನ್ ಮುಖಾರ್ ಗೆಲೊನಾ., ರಾವ್ಲ್ಲ್ಯಾ ಕಡ್ಚೊ ಹಾಲ್ಲೊನಾ. ತಾಚೆ ಥಾವ್ನ್ ಜಾಪ್ ನಾತ್ಲ್ಲಿ ಪಳೆವ್ನ್ ಗಿಬ್ಬಾಚ್ ಮ್ಹಣಾಲೊ - "ಆರೇ, ಹಾಂಗಾ ಕಿತ್ಯಾ ರಾವ್ಲಾಯ್ ಹಾಬಾ ತುಂ? ಯೇಂವ್ಕ್ ಲಜ್ ದಿಸ್ತಾಗಿ? ಚಲ್, ಘರಾ ಯಾ...."
"ಮ್ಹಾಕಾ ಮಾಫ್ ಕರ್ ಗಿಬ್ಬಾ" ಮೆಲ್ವಿನಾಕ್ ಸಾಂಗ್ಲೆಂ. "ಹಾಂವ್ ತುಮ್ಗೆರ್ ರಾವೊಂಕ್ ಯೇಂವ್ಕ್ ನಾ. ಹರ್ಯೇಕ್ ಮಿನುಟ್ ಮ್ಹಾಕಾ ಮೊಲಾಧಿಕ್ ಜಾವ್ನಾಸಾ ಗಿಬ್ಬಾ"
"ತರ್ ಕಿತ್ಯಾಕ್ ಆಯಿಲ್ಲೊಯ್, ಹಾಂವ್ ಜೀವ್ ಆಸಾ ವ ಮೆಲಾಂ ಮ್ಹಣ್ ಪಳೆಂವ್ಕ್ ದಿಸ್ತಾ" ರಾಗಾನ್ ತಾಣೆಂ ವಿಚಾರ್ಲೆಂ. "ನ್ಹಂಯ್, ತುಂ ಉಲಯ್ತಾಯ್ ಕಿತೆಂ ಮ್ಹಾಕಾ ಸಮ್ಜಾನಾ. ಯೇವ್ನ್ ಜ್ಯಾಲಾಂತ್ಯಿ ಪಾವೊಂಕ್ ನಾ, ವೇಳ್ ಜಾಲೊ ಮ್ಹಣೊನ್ ಭಡ್ಬಡ್ತಾ"
"ಗಿಬ್ಬಾ, ತುಂ ಮ್ಹಾಕಾ ಸಮ್ಜಾನಾಂಯ್ ಗಿಬ್ಬಾ. ತುಕಾ ಸಗ್ಳಿ ಖಬಾರ್ ಹಾಂವ್ ಸಾಂಗ್ತಾಂ" ಪುರಾಸಾಣೆನ್ ತೊ ಉಲೈಲೊ, "ಗಿಬ್ಬಾ, ಪಯ್ಲೆಂ ಸಾಂಗ್, ತುಕಾ ಆಜ್ ಕಸಲೆಂಯ್ ಆರ್ಜೆಂಟ್ ಕಾಮ್ ಆಸಾಗಿ?"
"ಕಿತ್ಯಾಕ್?" ಆಜಾಪ್ಲೊಲೊ ಗಿಬ್ಬಾ.
"ತುಕಾ ಪುರ್ಸತ್ ಆಸಾ ಜಾಲ್ಯಾರ್ ಆತಾಂಚ್ ಭಾಯ್ರ್ ಸರ್. ಆಮಿಂ ಕಾರ್ಕಳಾಕ್ ವಚೊಂಕ್ ಜಾಯ್. ತುರ್ತ್ ಕರ್ ಗಿಬ್ಬಾ" ದರ್ವಡ್ಯಾನ್ ತೊ ಮ್ಹಣಾಲೊ.
’ಹುಂ ....ಕಾರ್ಕಳಾಕ್? ಕಿತೆಂ ಸಂಗತ್ ಮೆಲ್ವಿನ್? ಕಾಂಯ್ ಜೆಸ್ಸಿ..."
"ಆತಾಂ ಎಕೀ ಸವಾಲ್ ವಿಚಾರಿನಾಕಾ, ಪ್ಲೀಸ್." ಮೆಲ್ವಿನಾನ್ ಉಪ್ಕಾರ್ ಮಾಗ್ಲೊ. "ತುಕಾ ಸಗ್ಳೆ ಮಾಗಿರ್ ಸಾಂಗ್ತಾಂ"
"ಜಾಯ್ತ್, ತುಜಿ ಮರ್ಜಿ. ಪುಣ್ ವೆಚ್ಯಾ ಆದಿಂ, ಏಕ್ ಘಡಿ ಘರಾ ಬಸ್ಚಿ ದಯಾ ದಾಕಯ್ ಇಷ್ಟಾ.."
ಮೆಲ್ವಿನ್ ಗಿಬ್ಬಾ ಸಾಂಗಾತಾ ಸೊಪ್ಯಾಚಿಂ ಮೆಟಾಂ ಚಡ್ಲೊ. ತಾಕಾ ಕದೆಲಾರ್ ಬಸೊಂಕ್ ಸಾಂಗೊನ್ ಗಿಬ್ಬಾ ಬಿತರ್ ಗೆಲೊ. ಮೆಲ್ವಿನ್ ಬಸ್ಲ್ಲ್ಯಾಕಡೆ ಹುಳ್ವುಳ್ತಾಲೊ. ಹರ್ಯೇಕ್ ಮಿನುಟ್ ತಾಕಾ ಗರ್ಜೆಚೆಂ ಜಾವ್ನಾಸ್ಲ್ಲೆಂ. ವೆಗಿಂಚ್ ಕಾರ್ಕಳ್ ಪಾವೊನ್, ಹೆರಿಕ್ ಭೆಟ್ತಾ ಮ್ಹಣಾಸರ್ ಜೀವಾಂತ್ ಜೀವ್ ನಾತ್ಲ್ಲೊ ತಾಕಾ.
ಗಿಬ್ಬಾಚ್ಯಾ ಆವಯ್ನ್ ತಾಕಾ ಏಕ್ ಗ್ಲಾಸ್ ಕಾಫಿ ಹಾಡ್ನ್ ದಿಲಿ. ತಿಕಾ ಅರ್ಗಾಂ ದೀವ್ನ್ ತೊ ಕಾಫಿ ಪಿಯೆಲೊ. ತಿತ್ಲ್ಯಾರ್ ಗಿಬ್ಬಾಯಿ ನ್ಹೆಸೊನ್ ಭಾಯ್ರ್ ಆಯ್ಲೊ.
"ಚಲ್ಯಾಂ ಮೆಲ್ವಿನ್ ಹಾಂವ್ ತಯಾರ್ ಜಾಲೊಂ" ಮ್ಹಣಾಲೊ ತೊ.
ದೊಗೀ ಬಸ್ಸ್ ಸ್ಟೊಪಾಚ್ಯಾ ಕುಶಿನ್ ಚಲೊಂಕ್ಲಾಗ್ಲೆಂ. ವಾಟೆರ್ ಮೆಲ್ವಿನಾನ್, ಸಗ್ಳಿ ಖಬಾರ್ ಸಾಂಗ್ಲಿಂ. ಆಯ್ಕೊನ್ ಚುರ್ಚುರೊನ್ ಗಿಬ್ಬಾನ್ ಮ್ಹಳೆಂ - "ಮೊಗಾಚ್ಯಾ ಆರಂಭಾರ್ ಆಸಲೆಂ ವೀಘ್ನ್ ತುಮ್ಚೆರ್ ಯೆಂವ್ಚೆಂಗಿ ಮೆಲ್ವಿ? ಪುಣ್ ದೇವ್ ಆಸಾ. ತುಜೆ ವಯ್ಲೆಂ ಅನ್ವಾರ್ ತೊ ನಿವಾರ್ತಾಲೊ."
"ಗಿಬ್ಬಾ, ಜೆಸ್ಸಿ ಮ್ಹಾಕಾ ಚುಕಾತ್ ಜಾಲ್ಯಾರ್ ಹಾಂವೆಂ ವಾಂಚೆಂ ಕಶೆಂ? ಹಾಂವ್ ಮೊರ್ತೊಲೊಂ" ಮೆಲ್ವಿನ್ ರಡೊಂಕ್ ತಯಾರ್ ಜಾಲ್ಲೊ.
"ತಿತ್ಲಿ ನಿರಾಶಾ ದಾಕೈನಾಕಾ ಮೆಲ್ವಿ. ಜೀವನ್ ಮ್ಹಳ್ಯಾರ್ ತುವೆಂ ಚಿಂತ್ಲ್ಲ್ಯಾ ತಿತ್ಲೆಂ ಸಸಾರ್ ನ್ಹಂಯ್, ಆತಾಂ ಹೆರಿಕ್ ಮೆಳೊನ್, ಉಲೈಲ್ಯಾ ಬಗಾರ್ ನ್ಹಂಯ್ ನಾತ್ಲ್ಲೆಂ ಮತಿಂತ್ ಆಟೈನಾಕಾ. ಕಾರ್ಕಳಕ್ ಪಯ್ಲೆಂ ಪಾವ್ಯಾಂ, ಉಪ್ರಾಂತ್ಲಿಂ ಗಜಾಲ್ ಉಪ್ರಾಂತ್" ಸಮಧಾನ್ ಕೆಲೆಂ ಗಿಬ್ಬಾನ್.
ತಿತ್ಲ್ಯಾರ್ ಬಸ್ಸ್ ಆಯ್ಲೆಂ. ದೊಗಿ ಬಸ್ಸಾರ್ ಬಸೊನ್ ಹಂಪನ್ಕಟ್ಟಾ ಯೇವ್ನ್ ಪಾವ್ಲೆ. ನಶಿಬಾಕ್ ಕಾರ್ಕಳಾಕ್ ವೆಚೆಂ ಬಸ್ಸ್ಯಿ ತಯಾರ್ಚ್ ಮೆಳ್ಳೆಂ ತಾಂಕಾಂ. ಮೆಲ್ವಿನಾನ್ ಟಿಕೆಟಿ ಘೆತಾಚ್, ಬಸ್ಸಾರ್ ದೊಗಿ ಚಡೊನ್ ಬಸ್ಲೆ.
ಕಿತ್ಲೊ ಬೇಧ್ ಆಸ್ಲ್ಲೊ ಆಯ್ಚ್ಯಾ ಆನಿಂ ತ್ಯಾ ದಿಸಾಚ್ಯಾ ತಾಂಚ್ಯಾ ಕಾರ್ಕಳ್ಚ್ಯಾ ಪಯ್ಣಾಕ್. ತ್ಯಾ ವೆಳಾರ್ ಜೆಸ್ಸಿಕ್ ಕೆದಾಳಾ ಪಳೆಯಿನ್ ಮ್ಹಳ್ಳ್ಯಾ ಅತ್ರೆಗಾನ್ ತೊ ಭರ್ಲ್ಲೊ. ಪುಣ್ ಆಜ್.....ತ್ಯಾಚ್ ಜೆಸ್ಸಿಕ್ ಆಪ್ಣಾ ಥಾವ್ನ್ ಕೊಣೆಂಚ್ ಅಪಹರ್ಶಿನಾಶೆಂ ಕರ್ಚ್ಯಾ ಪ್ರಯತ್ನಾಕ್ ತೊ ಭಾಯ್ರ್ ಸರ್ಲ್ಲೊ. ಹೆರಿಲಾಗಿಂ, ಜೆಸ್ಸಿಚಿ ಭಿಕ್ ಮಾಗೊಂಕ್ ತೊ ವೆತಾಲೊ. ಹೆಂ ತಾಚ್ಯಾ ಜೀವನ್ಮರಣಾಚೆಂ ಸವಾಲ್ ಜಾವ್ನಾಸ್ಲ್ಲೆಂ. ವ್ಹಯ್, ದೊನೀ ದಿಸಾಂಕ್ ಕಠಿಣ್ ಬೇಧ್ ಆಸ್ಲ್ಲೊ. ಮನ್ಶಾನ್ ಚಿಂತ್ಲ್ಲ್ಯಾ ಬರಿ ಸಗ್ಳೆಂ ಜಾಂವ್ಚೆಂ ಜಾಲ್ಯಾರ್ ತ್ಯಾ ದೆವಾಚಿ ಆಜ್ ಗರ್ಜ್ಚ್ ಆಸ್ತಿನಾ ಕೊಣ್ಣಾ.
ಕಾರ್ಕಳ್ಲಾಗಿಂ ಪಾವ್ತಾನಾ ಮೆಲ್ವಿನಾಚಿ ಕೂಡ್ ಚಿಂತಿನಾತ್ಲ್ಲ್ಯಾ ಭಿಂಯಾನ್ ಕಾಂಪ್ತಾಲಿ. ಅಂಗಾರ್ ಶೆಳೊ ಘಾಮ್ ಸುಟ್ಲ್ಲೊ. ತಾಚ್ಯಾ ಮತಿಂತ್ ನಿರಾಶೆಚಿಂ ವಿವಿಧ್ ಚಿಂತ್ನಾಂ ಉಬ್ಜಾತಾಲಿಂ.
"ಕಾರ್ಕಳ್ ಆಯ್ಲೆಂ, ದೆವ್ಯಾಂ ಮೆಲ್ವಿನ್....... ಗಿಬ್ಬಾನ್ ಸಾಂಗ್ಲೆಂ.
ವೊರಾಂ ಚಡುಣೆಂ ಬಾರಾ ಜಾಲ್ಲಿಂ. ದೊಗಿ ರೊಫಿನ್ಬಾಯೆಗೆಲ್ಯಾ ಘರ್ಚ್ಯಾ ವಾಟೆಕ್ಲಾಗ್ಲೆ. ತಾಂಚೆಂ ಘರ್ ಲಾಗಿಂ ಪಾವ್ತಾನಾ ಮೆಲ್ವಿನಾಚೆ ಪಾಂಯ್ ಬಾರಿಕ್ ಕಾಂಪ್ತಾಲೆ. ಘರಾ ಬಹುಷಃ ಹೆರಿ ಆನಿಂ ಕಾಮಿಲಾಬ್ ಆಸ್ತೆಲೆ. ಪುಣ್ ಕಾಮಿಲಾಬಾಕ್, ಆಪುಣ್ ಕಾರ್ಕಳ್ ಆಯಿಲ್ಲೆಂ ಕಾರಣ್ ಕಿತೆಂ ಸಾಂಗ್ಚೆಂ? ಹೆರಿಕ್ ವೊರೆವಿಂಗಡ್ ಆಪವ್ನ್ ತಾಚೆಲಾಗಿಂ ಉಲೊಂವ್ಕ್ಜಾಯ್. ತೊ ಕಿತೆಂ ಮ್ಹಣಾತ್? ಜೆಸ್ಸಿ ಲಾಗಿಂಚ್ ಕಾಜಾರ್ ಜಾತಾ ಮ್ಹಣಾತ್ ಜಾಲ್ಯಾರ್ ......ಸರ್ವ್ ನಾಶ್ ಜಾತೆಲೆಂ. ದಾಕ್ತೆರ್ಗಿ ಶಿಕ್ಲ್ಲೊ ಮನಿಸ್ ತೊ. ತಾಚೆಲಾಗಿಂ ಖಂಯ್ಚ್ಯಾ ರಿತಿನ್ ಸಂಭಾಷಣ್ ಪ್ರಾರಂಭ್ ಕರ್ಚೆಂ? ಸ್ವಭಾವಾನ್ ರಾಗಿಷ್ಟ್ ವ ಶಿಕ್ಪಾಚ್ಯಾ ಗರ್ವಾನ್ ಭರ್ಲ್ಲೊ ಆಸಾತ್ ತರ್, ಕಿತೆಂ ವಾಟ್? ಮೆಲ್ವಿನಾಚ್ಯಾ ಚಿಂತ್ನಾಂಕ್ ಅಂತ್ಯ್ಚ್ ನಾತ್ಲ್ಲೆಂ. ಉಜ್ಯಾರ್ ಲಾಸ್ಲ್ಲ್ಯಾಬರಿ ತಾಪ್ಲ್ಲಿ ತಾಚಿ ತಕ್ಲಿ.
ರೊಫಿನ್ಬಾಯೆಚೆಂ ಘರ್ ಆಯ್ಲೆಂ. ಪಯ್ಸ್ ಥಾವ್ನ್ಂಚ್, ಸೊಪ್ಯಾವಯ್ಲ್ಯಾ ಈಜಿಚೇರಾರ್ ಬಸೊನ್ ವರ್ತಮಾನ್ ಪತ್ರ್ ವಾಚ್ಚ್ಯಾ ವ್ಯಕ್ತಿಚೆರ್ ತಾಂಚಿ ದೀಷ್ಟ್ ಪಡ್ಲಿ. ಲಾಗಿಂ ಪಾವ್ತಾನಾ ತಾಚೆಂ ರುಪ್ಣೆಂ ಸ್ವಷ್ಟ್ ದಿಸ್ಲೆಂ. ವಾಡ್ಕುಳ್ಯಾ ಮುಖಚೊ ಸುಂದರ್ ತರ್ನಾಟೊ ತೊ. ಕುಡಿಂತ್ ಪುಗೊನ್ ಸುಂದರ್ ದಿಸ್ತಾಲೊ. ಮುಖಮಳಾರ್ ಶಿಕ್ಪಾಕ್ ಸಹಜ್ಲ್ಲಿ ಗಂಭೀರಾಯ್. ಬಹುಶಃ ತೊಚ್ ಹೆರಿ ಆಸ್ತೊಲೊ - ಚಿಂತ್ಲೆಂ ದೊಗಾಂಯ್ನ್. ತಾಂಕಾಂ ಪಳೆಲ್ಲೆಂಚ್ ತೊ ಉಟೊನ್ ಉಭೊ ರಾವ್ಲೊ. ತಾಚಿ ಲಾಂಬಾಯ್ ಲಾಗಿಂ ಲಾಗಿಂ ಸ ಫುಟಿ ಆಸ್ಲ್ಲಿ.
"ಯೆಯಾ, ಬಸ...." ತಾಣೆಂ ಹಾಸ್ಯಾನ್ ತಾಂಕಾಂ ಸ್ವಾಗತ್ ದಿಲೊ.
ತಾಚ್ಯಾ ತ್ಯಾ ಖಾಲ್ತ್ಯಾ ಉಲವ್ಣ್ಯಾಕ್ ಆನಿಂ ನಡ್ತ್ಯಾಕ್ ಅಜ್ಯಾಪ್ ಜಾಲೆ ದೊಗಿ. ತಶೆಂ ಲಜೆ - ಭಿಂಯಾನ್ ಘರ್ಚಿಂ ಮೆಟಾಂ ವಯ್ರ್ ಚಡ್ಲೆ.
"ಪ್ರಭು ನಾಂಗಿ?" ವಿಚಾರ್ಲೆಂ ಗಿಬ್ಬಾನ್.
"ನಾ, ಪಪ್ಪಾಕ್ ಸೊದುನ್ ಆಯ್ಲ್ಯಾತ್ಗಿ ತುಮಿಂ? ತೊ ಆಜ್ ಸಕಾಳಿಂಚ್ ಬೆಳ್ಮಾಣ್ ಗೆಲಾ. ಸಾಂಜೆ ಬಿತರ್ ಯೇಂವ್ಕ್ ಪುರೊ. ತುಮ್ಚಿಂ ವಳೊಕ್ ಜಾಣಾ ಜಾವ್ಯೆತ್ಗಿ ಹಾಂವೆಂ?" ವಿಚಾರ್ಲೆಂ ಹೆರಿನ್.
ದೊಗಾಂಯ್ನಿಂ ಆಪ್ಲಿಂ ನಾಂವಾಂ ಸಾಂಗ್ಲಿಂ. ಹೆರಿನ್ ಆಪ್ಲೆಂ ನಾಂವ್ ತಿಳ್ಸುನ್ ತಾಂಕಾಂ ಶೇಕ್ ಹ್ಯಾಂಡ್ ದೀವ್ನ್ ಮ್ಹಳೆಂ - "ಮಾಮ್ಮಾ ಆನಿಂ ಭಯ್ಣ್ ಕರ್ನ್ ಪೋಯ್ರ್ಚ್ ಕೊಡೀಯಾಳಾಕ್ ಗೆಲ್ಯಾಂತ್"
"ಹಾಂವೆಂ ತಾಂಕಾಂ ಪಳೆಲಾಂ" ಮೆಲ್ವಿನಾನ್ ಸಾಂಗ್ಲೆಂ.
ಅಜ್ಯಾಪ್ ಜಾವ್ನ್ ಹೆರಿ ಮ್ಹಣಾಲೊ "ಹಾಂ, ತುಂ ಮ್ಹಜ್ಯಾ ಮಾಮ್ಮಿಕ್ ವಳ್ಕಾತಾಯ್ಗಿ?" ತಾಣಿಂ ಆದ್ಲ್ಯಾ ಪಾವ್ಟಿಂ ಕಾರ್ಕಳ್ ಫೆಸ್ತಾಕ್ ತಾಂಗೆರ್ ಆಯಿಲ್ಲಿಂ ಖಬಾರ್ ಸಾಂಗ್ಲಿ. ಹೆರಿ ಸಂತೊಸಾನ್ ಹಾಸ್ಲೊ." ಘುಡ್, ತರ್ ಆಜ್ ಮ್ಹಾಕಾಯಿ ದೋಗ್ ಫ್ರೆಂಡ್ ಮೆಳ್ಲ್ಲ್ಯಾಕ್ ಹಾಂವ್ ಸಂತೊಸ್ ಪಾವ್ತಾಂ. ಆಮ್ಚ್ಯಾ ಘರ್ಚ್ಯಾಂಕ್ ಪಯ್ಲೆಂಚ್ ವಳ್ಕಾತಾತ್ ತುಮಿ"
"ಆಮ್ಕಾಂಯ್ ತುಕಾ ಪಳೆಂವ್ಕ್ ಅಧಿಕ್ ಆನಂದ್ ಭೊಗ್ತಾ" ಗಿಬ್ಬಾ ಮ್ಹಣಾಲೊ.
ಪಪ್ಪಾಲಾಗಿ ಗರ್ಜೆನ್ ಆಯಿಲ್ಲ್ಯಾತ್ಗಿ ತುಮಿ? ತೊ ನಾತ್ಲ್ಲ್ಯಾನ್ ಮ್ಹಸ್ತ್ ತೊಂದ್ರೆ ಜಾಲೆ. ವ್ಹಡ್ ನ್ಹಂಯ್, ಆಜ್ ರಾವೊನ್ ಫಾಲ್ಯಾಂ ವಚ್ಯೆತ್ ತುಮಿ. ಕಸೊಯ್ ಸಾಂಜೆರ್ ಯೆತೊಲೊ ಪಪ್ಪಾ" ಹೆರಿನ್ ಸಾಂಗ್ಲೆ.
"ತುಜ್ಯಾ ಪಪ್ಪಾಲಾಗಿಂ ನ್ಹಂಯ್.....ಆಮಿಂ ತುಜೆಚ್ ಲಾಗಿಂ ಎಕಾ ಗರ್ಜೆನ್ ಆಯಿಲ್ಲ್ಯಾಂವ್" ಗಿಬ್ಬಾನ್ ಜಾಪ್ ದಿಲಿ.
"ಮ್ಹಜೆಲಾಗಿಂ!" ಕಠಿಣ್ ವಿಜ್ಮಿತ್ಕಾಯ್ ಬೊಗ್ಲಿ ಹೆರಿಕ್. "ತರ್, ರಾವಾ. ಪುರಾಸಾಣೆನ್ ಆನಿಂ ಭುಕೆನ್ ಆಯಿಲ್ಲ್ಯಾ ತುಮ್ಕಾಂ ಜೆವ್ಲ್ಯಾ ಬಗಾರ್ ಉಲೊಂವ್ಕ್ ಹಾಂವ್ ಸೊಡ್ಚೊಂನಾ. ಉಪ್ರಾಂತ್ ಮ್ಹಜೆ ಥಾವ್ನ್ ಕಸಲಿಯ್ ಸಹಾಯ್ ತುಮ್ಕಾಂ ಮ್ಹಜೆ ಥಾವ್ನ್ ಜಾಂವ್ಚಿ ಆಸ್ಲ್ಯಾರ್ ಜರೂರ್ ಹಾಂವ್ ಕರ್ತೊಲೊ. ಚಲಾ, ಜೆವ್ಯಾಂ"
ಹೆರಿಚಾ ಬಲಾತ್ಕಾರಾಕ್ ತಾಣಿ ಜೆವ್ಚೆಂಚ್ ಪಡ್ಲೆಂ. ಜೆವ್ತಾನಾ ಗಿಬ್ಬಾ ಆನಿಂ ಹೆರಿ ಜಾಯ್ತೆ ಹೆರ್ ರಾಟಾವಳ್ ಆನಿಂ ಗಾಂವ್ಚ್ಯೊ ಖಬ್ರೊ ಉಲೈತಾಲೆ. ಮೆಲ್ವಿನ್ ಮಾತ್ರ್ ಚಿಂತೇಸ್ತ್ ಆಸ್ಚೊ ಪಳೆವ್ನ್ ಹೆರಿನ್ ಮ್ಹಳೆಂ - "ಮ್ಹಜೊ ಮಿತ್ರ್ ಮೆಲ್ವಿನ್ ಕಿತ್ಯಾಕ್ ಉಲೈನಾ ಹಾಬಾ? ದಾಕ್ಷೆಣ್ಗಿ...?"
"ನಾ.....ಬಿಲ್ಕುಲ್ ನಾ" ಹಾಸ್ಲೊ ಮೆಲ್ವಿನ್. ಹೆರಿಚ್ಯಾ ಉಗ್ತ್ಯಾ ಆನಿಂ ದಾದೊಶಿ ಮನಾಕ್ ತಾಚೆಂ ಕಾಳಿಜ್ ಕ್ರತಜ್ಞತಾ ಅರ್ಪಿತಾಲೆಂ. ಹೆರಿ ಖಂಡಿತ್ ಆಪ್ಲೆಂ ಮಾಗ್ಣೆ ತಿರಸ್ಕಾರ್ ಕರ್ಚೊನಾ ಮ್ಹಣ್ ಧೈರ್ ಭೊಗ್ತಾಲೆಂ ತಾಕಾ. ಅಖ್ರೇಕ್ ತಾಂಚೆಂ ಜೆವಾಣ್ ಸಂಪ್ಲೆಂ.
"ಸಿಗ್ರೆಟ್ ವೊಡ್ತಾತ್ಗಿ?" ಹೆರಿನ್ ಕ್ಯಾಪ್ಸ್ ಬನ್ನ್ ಪ್ಯಾಕ್ ತಾಂಕಾಂ ದೀವ್ನ್ ಮ್ಹಳೆಂ - ಮ್ಹಾಕಾ ಚಡ್ ಸವಯ್ ನಾ. ಗಾಂವಾಕ್ ಆಯ್ಲ್ಯಾ ಉಪ್ರಾಂತ್ಚ್ ಆರಂಭ್ ಕೆಲ್ಯಾ"
ದೊಗಾಂಯ್ನಿ ಸಿಗ್ರೆಟ್ ಕಾಡ್ನ್ ಪೆಟೈಲಿ. ಹೆರಿಯಿ ಧುಂವೊರ್ ವೊಂಕೊನ್ ಮ್ಹಣಾಲೊ "ಪಳೆಯಾಂ, ಆತಾಂ ಸಾಂಗಾ, ಕಸಲಿ ತುಮ್ಚಿಂ ಗರ್ಜ್? ಮ್ಹಜಿ ಚಡಿತ್ ಜಾಣ್ವಾಯ್ ಮೆಡಿಕಲ್ ಸಾಯಾನ್ಸಾಚಿ. ತುಮಿ ಸಾಯನ್ಸ್ ಸ್ಟೂಡೆಂತ್ ದಿಸ್ತಾ" ಹಾಸ್ಲೊ ತೊ.
"ತುವೆಂ ದಯಾ ಕರ್ನ್ ಏಕ್ ಉಪ್ಕಾರ್ ಕರಿಜಾಯ್" ಗಿಬ್ಬಾ ಉಲೈಲೊ, "ಮ್ಹಜೆಖಾತಿರ್ ನ್ಹಂಯ್ ಹೆರಿ, ಮ್ಹಜ್ಯಾ ಹ್ಯಾ ಮಿತ್ರಾಖಾತಿರ್. ಹೆಂ ತಾಚ್ಯಾ ಜೀವನ್ಮರಣಾಚೆಂ ಸವಾಲ್ ಜಾವ್ನಾಸಾ"
"ಅರೇ, ತಸಲೊ ಉಪ್ಕಾರ್ ಮ್ಹಜೆ ಥಾವ್ನ್ ಖಂಯ್ಚೊ ಜಾಂವ್ಚೊ?" ಶೆರ್ಮೆವ್ನ್ ಹೆರಿನ್ ಸಾಂಗ್ಲೆಂ, "ತುಮಿಂ ಸುಡಾಳ್ ಉಲಯಾ. ಸಾಂಗ್, ಮೆಲ್ವಿನ್ ಹಾಂವೆಂ ಕಿತೆಂ ಕರಿಜಾಯ್ ಮ್ಹಣ್ತಾಯ್ ತುಂ?"
"ಹೆರಿ...." ಕ್ಷೀಣ್ ತಾಳ್ಯಾನ್ ಮೆಲ್ವಿನಾನ್ ಮ್ಹಳೆಂ, "ಹಾಂವ್ ಏಕ್ ಸವಾಲ್ ವಿಚಾರ್ತಾಂ. ಶಿಣ್ ಕರ್ಚೊನಾಂಯ್ಮೂ?"
"ಉಲಣ್ಯಾಂತ್ ಶಿಣ್ ಕರ್ಚೊ ಅಶೀರ್ ಮನಾಚ್ಯಾ ಮನ್ಶಾಂನಿ. ಮ್ಹಾಕಾ ತಸಲಿ ಸವಯ್ ನಾ. ಸಾಂಗ್, ತುವೆಂ ಕಿತೆಂಯ್ ಉಲವ್ಯೆತ್ ಮ್ಹಜೆಲಾಗಿಂ" ಧೈರ್ ದಿಲೆಂ ಹೆರಿನ್.
"ಹೆರಿ...." ಥಟ್ಟ್ ಕರ್ನ್ ತೊ ಮ್ಹಣಾಲೊ, "ತುಕಾ ಶಿಕಾರಿ ಕರ್ಚೆಂ ಪಿಶೆಂ ಆಸಾ ಮ್ಹಣ್ ಚೀಂತ್. ತರೀ, ಮೊಗಾನ್ ಗಾಯನ್ ಕರ್ಚ್ಯಾ ಎಕಾ ಸುಕ್ಣ್ಯಾಚ್ಯಾ ಜೊಡ್ಯಾಕ್ ಜಿವೆಶಿ ಮಾರುಂಕ್ ತುಕಾ ಹಾತ್ ಯೇತ್ಗಿ?"
ಹೆರಿಕ್ ಎಕಾಚ್ಚಾಣೆ ಜಾಪ್ ದೀಂವ್ಕ್ ಜಾಲಿನಾ. ತಾಚ್ಯಾ ಕಪಾಲಾರ್ ಮಿರಿಯೊ ಉದೆಲ್ಯೊ. ಗಂಭೀರ್ ಜಾಲ್ಲ್ಯಾ ಮುಖಮಳಾಚೆರ್ ಪರ್ತುನ್ ಹಾಸೊ ಹಾಡ್ನ್ ತೊ ಮ್ಹಣಾಲೊ. "ನಾ.....ನಾ ಮೆಲ್ವಿನ್. ಪುಣ್ ತುಂವೆಂ ಹೆಂ ಸವಾಲ್ ಕರುಂಕ್ ಕಾರಣ್?"
ಮೆಲ್ವಿನಾಕ್ ಎಕಾಚ್ಫರಾ ಜಾಪ್ ದೀಂವ್ಕ್ ಜಾಲಿನಾ. ಸಬಾರ್ ವೇಳ್ ಜಿಬೆಲಾಗಿಂ ಝಗಡ್ಲೊ ತೊ. ಅನಿಕೀ ಘಳಾಯ್ ಕೆಲ್ಯಾರ್ ಉಪ್ಕಾರ್ ನಾ ಮ್ಹಣ್, ಪ್ರಸ್ತಾಪ್ ಶೀದಾ ಮುಖಾರ್ ಹಾಡ್ನ್ ತೊ ಮ್ಹಣಾಲೊ. "ಹಾಂವ್, ಜೆಸ್ಸಿ ವಿಶ್ಯಾಂತ್ ಉಲಂವ್ಕ್ ಆಯಿಲ್ಲೊಂ"
"ಹಾಂ ಜೆಸ್ಸಿ.....ವಿಷ್ಯಾಂತ್!" ಮಧೆಂಚ್ ಹೆರಿ ಮ್ಹಣಾಲೊ, ತೆಂ ಕೊಡಿಯಾಳ್ ಗೆಲಾಂ. ತಾಚಿ ವ್ಹಡ್ಲಿಮಾಂಯ್ ಗಡೀಸ್ ಆಸಾ ಮ್ಹಣ್ ಉಟಾಉಟಿಂ ಧಾಂವ್ಲ್ಲೆಂ ತೆಂ. ಉಪ್ರಾಂತ್, ತಿ ಸರ್ಲಿ ಮ್ಹಣ್ ಆಮ್ಕಾಂ ಟೆಲಿಗ್ರಾಮ್ ಆಯ್ಲೆಂ. ತಕ್ಷಣ್ ಮಾಮ್ಮಿ ಆನಿಂ ರಿಜಾ ಕರ್ನ್ ತಿಚ್ಯಾ ಮೊರ್ನಾಕ್ ಹಾಜರ್ ಜಾಂವ್ಕ್ ಗೆಲ್ಯಾಂತ್"
"ಮೊರ್ನಾಖಾತಿರ್ಚ್ ನ್ಹಂಯ್, ಹೆರಿ..." ಗಿಬ್ಬಾ ಮಧೆಂ ಪಡ್ಲೊ. "ಜೆಸ್ಸಿಲಾಗಿಂ ತುಜೆಂ ಕಾಜಾರ್ ನಿಶ್ಚಯ್ ಕರುಂಕ್ ಗೆಲ್ಯಾ ತುಜಿ ಮಾಮ್ಮಿ"
"ಹಿ.....ಹಿ ಖಬಾರ್ ಕೊಣೆಂ ಸಾಂಗ್ಲಿಂ ತುಮ್ಕಾಂ? ಹಾಂವ್ ಹ್ಯಾ ವಿಷ್ಯಾಂತ್ ಕಾಂಯ್ಚ್ ನೆಣಾ. ಆರೇ, ಹಾಂವ್ ಕಿತೆಂ ಆಯ್ಕಾತಾಂ?" ಘಡ್ಬಡೊನ್ ಹೆರಿ ಉಲೈಲೊ.
ಮೆಲ್ವಿನ್ ಸವ್ಕಾಸ್ ಮ್ಹಣಾಲೊ - "ಹಾಂವ್ ಜೆಸ್ಸಿ ಥಾವ್ನ್ ಹಿ ಖಬಾರ್ ಜಾಣಾ ಜಾಲೊಂ ಹೆರಿ. ತುಜ್ಯಾ ಮಾಮ್ಮಿನ್ಂಚ್ ಕಾಜಾರಾಚೊ ಪ್ರಸ್ತಾಪ್ ಕಾಡ್ಲ್ಲೊ. ತುಂ ಹ್ಯಾ ವಿಷ್ಯಾಂತ್ ಕಾಂಯ್ಚ್ ನೆಣಾಂಯ್?"
"ಖರೆಂಚ್ ನಾ. ಮ್ಹಾಕಾ ಏಕೀ ಖಬಾರ್ ನಾ" ಹೆರಿಚೆಂ ತೊಂಡ್ಚ್ ಸಾಂಗ್ತಾಲೆಂ ತೊ ಸತ್ ಉಲೈತಾ ಮ್ಹಣ್. ಥೊಡೊ ವೇಳ್ ಚಿಂತುನ್, ಅಖ್ರೇಕ್ ಕಿತೆಂಗಿ ಸಮ್ಜಾಲ್ಲ್ಯಾಬರಿ ತಾಣೆಂ ಮುಖಾರ್ಸಿಲೆಂ - "ಓ.....ಆತಾಂ ಹಾಂವ್ ಜಾಣಾ ಜಾಲೊಂ ಮೆಲ್ವಿನ್. ತುಂ ಜೆಸ್ಸಿಚೊ....."
"ಹಾಂವ್ ಜೆಸ್ಸಿಚೊ ಮೋಗ್ ಕರ್ತಾಂ ಹೆರಿ" ಕಾಂಪ್ಚ್ಯಾ ಸ್ವರಾನ್ ಮೆಲ್ವಿನ್ ಸಾಂಗಾಲಾಗ್ಲೊ, "ತಾಚೆಬಗಾರ್ ಹಾಂವ್ ವಾಂಚ್ಚೊಂ ನಾ. ಜೆಸ್ಸಿಯಿ ಮ್ಹಾಕಾ ಸೊಡ್ನ್ ದುಸ್ರ್ಯಾ ಲಾಗಿಂ ಕಾಜಾರ್ ಜಾಂವ್ಚೆಂ ನಾ. ಹಾಂವ್ ದಯಾಕರ್ನ್ ತುಜೆಲಾಗಿಂ ವಿಚಾರ್ತಾ...ತುಂ ಆಮ್ಚ್ಯಾ ಮಧೆಂ ಯೆನಾಕಾ...."
ಹೆರಿ ಥಾವ್ನ್ ಜಾಪ್ ನಾತ್ಲ್ಲಿ. ಜೋರಾನ್ ಚ್ಯಾರ್ ಸಿಗ್ರೆಟಿಚೆಂ ಧಮ್ಮ್ ತಾಣೆಂ ಘೆತ್ಲೆಂ ಆನಿಂ ಚಿಂತುಂಕ್ ಪಡ್ಲೊ. ಮೆಲ್ವಿನಾಚ್ಯಾ ದೊಳಾಂತ್ಲ್ಯಾನ್ ದುಃಖಾಂ ದೆಂವ್ತಾಲಿಂ.
"ಹೆರಿ, ಹಾಂವೆಂ ಮ್ಹಜೆಖಾತಿರ್ ಎದೊಳ್ ಕೊಣಾಲಾಗಿಂಚ್ ಉಪ್ಕಾರ್ ಮಾಗೊಂಕ್ ನಾ. ಹಾಂವ್ ಜೆಸ್ಸಿಖಾತಿರ್ ತುಜೆಲಾಗಿಂ ಹಿ ವಿನಂತಿ ಕರುಂಕ್ ಆಯ್ಲಾಂ. ಹಾಂವ್ ಕೊಣಾ ಮುಖಾರ್ಚ್ ಖಾಲ್ತೊ ಜಾಂವ್ಕ್ ನಾ. ಪುಣ್ ಆಜ್.....ಆಜ್ ತುಜೆ ಪಾಂಯ್ ಧರ್ನ್ ತರೀ ವಿಚಾರ್ತಾಂ, ಆಮ್ಚ್ಯಾ ದೊಗಾಂಚ್ಯಾ ಜೀವನಾಚೊ ಭಂಗ್ ಕರಿನಾಕಾ ಹೆರಿ"
"ಮೆಲ್ವಿನ್...." ಹೆರಿಚ್ಯಾ ತಾಳ್ಯಾಂತ್ ಬಿರ್ಮತ್ ಭರ್ಲೆಲಿ, "ಹಾಂವ್ ಜಾಣಾ ಮೆಲ್ವಿನ್, ಮೋಗ್ ಮ್ಹಳ್ಯಾರ್ ಕಿತೆಂಗಿ ಮ್ಹಣ್, ಹಾಂವ್ ಖರೆಂಚ್ ಸಾಂಗ್ತಾಂ, ಜೆಸ್ಸಿ ತಸಲ್ಯಾ ಆದರ್ಶ್ ಸ್ತ್ರೀ - ರತ್ನಾಕ್ ಪಳೆತಾನಾ, ಹಾಂವೆಂ ಚಿಂತ್ಲ್ಲೆಂ ತಾಕಾಚ್ ಮ್ಹಜಿ ಪತಿಣ್ ಕರ್ನ್ ಘೆತೊಲೊಂ ಮ್ಹಣ್. ತಾಚೆ ಗೂಣ್, ರೂಪ್ ಮ್ಹಜ್ಯಾ ಕಾಳ್ಜಾಂತ್ ರೊಂಬ್ಲ್ಲೆಂ ಮೆಲ್ವಿನ್. ಜೆಸ್ಸಿಲಾಗಿಂಚ್ ಕಾಜಾರ್ ಜಾತಾಂ ಮ್ಹಣ್ ಹಾಂವೆಂ ನಿಚೆವ್ ಕೆಲ್ಲೊ. ತರೀ ಹಿ ಗಜಾಲ್ ಎದೊಳ್ ಹಾಂವೆಂ ಗುಪ್ತ್ ದವರ್ಲ್ಲಿ. ಮ್ಹಜ್ಯಾ ಪಪ್ಪಾ ಆನಿಂ ಮಾಮ್ಮಿಕ್ಯಿ ಕಳೊಂವ್ಕ್ ನಾ"
ತಾಣೆಂ ಉಲೊವ್ಣೆ ರಾವೈಲೆಂ. ಮೆಲ್ವಿನ್ ಆನಿಂ ಗಿಬ್ಬಾ, ತೊ ಮುಖಾರ್ ಕಿತೆಂ ಸಾಂಗ್ತಾಗಿ ಮ್ಹಣ್ ರಾಕೊನ್ ರಾವ್ಲೆ ಅತುರಾಯೆನ್.
"ಹಾಂ....ಆತಾಂ ಮ್ಹಾಕಾ ಕಳ್ತಾ. ತುಮ್ಚಿಂ ಮೋಗ್ ಕರ್ಣಾರಾಂಚಿಂ ಭೊಗ್ಣಾಂ ಕಸಲಿಂ ತಿಂ.....ಹಾಂವೆ ಜೆಸ್ಸಿಕ್ ಆಶೆವ್ನ್ ಫಾಯ್ದೊ ನಾ ನಹಿಂಗಿ, ಮೆಲ್ವಿನ್?" ಹಾಸ್ಲೊ ಹೆರಿ. "ಫಾಲ್ಯಾಂ ಸಕಾಳಿಂ ಬಲತ್ಕಾರಾನ್ ಮ್ಹಜೆಂ ಕಾಜಾರ್ ತಾಚೆಲಾಗಿಂ ಜಾಲ್ಯಾರ್ಯಿ ಆಮ್ಕಾಂ ಸುಖ್ ಮೆಳ್ಚೆಂ ನಾ. ತುಜಿ ಸ್ಥಿತಿಯಿ ಪಿಡ್ಡ್ಯಾರ್ ಜಾತೆಲಿ. ಹಾಂವೆಂ, ಜೆಸ್ಸಿಚಿಂ ಚಿಂತ್ನಾಂ ಆತಾಂಚ್ ಸೊಡ್ಲಿ. ನಿತಳ್ ಮೋಗ್ ಕರ್ಣಾರಾಂ ಮಧೆಂ ಹಾಂವ್ ವೀಘ್ನ್ ಹಾಡಿನ್ಗಿ? ಹಾಂವ್ ಅಧಿಕ್ ಸಂತೊಸ್ ಭೊಗ್ತಾಂ, ಜೆಸ್ಸಿ ತಸಲೆಂ ಮಾಣಿಕ್ ತುಕಾ ಲಾಭ್ಲ್ಲ್ಯಾಕ್. ತುಕಾ ಧನ್ಯವಾದ್ ಮೆಲ್ವಿನ್.."
ಸಂತೊಸಾಚಿಂ ದುಃಖಾಂ ಮೆಲ್ವಿನಾಚ್ಯಾ ದೊಳ್ಯಾಂತ್ಲ್ಯಾನ್ ವ್ಹಾಳ್ಳಿಂ. ಹೆರಿಚೊ ಖಂಯ್ಚ್ಯಾ ರಿತಿರ್ ಉಪ್ಕಾರ್ ಬಾವುಡ್ಚೊ ತೊ ನೆಣಾ ಜಾಲೊ. ಉದ್ವೇಗಾನ್ ಹೆರಿಚೊ ಹಾತ್ ತಾಣೆಂ ದಾಂಬುನ್ ಧರ್ಲೊ.ಉತ್ರಾಂ ತಾಚ್ಯಾ ಜಿಬೆಂತ್ಲ್ಯಾನ್ ಸುಟೊಂಕ್ ನಾಂತ್. ಹೆರಿ ತಾಚಿ ಸ್ಥಿತಿ ಪಳೆವ್ನ್ ಆಮ್ರುಕೊ ಹಾಸ್ಲೊ.
"ಪಿಶ್ಯಾ.....ಮ್ಹಾಕಾ ವರ್ತೊ ಮ್ಹಣ್ ಲೆಕಿನಾಕಾ. ಎದೆಶ್ಯಾ ಚಿಲ್ಲರ್ ಸಂಗ್ತಿಂಕ್ ಕಿತ್ಲೊ ತುಂ ಭಿಯೆಲ್ಲೊಯ್! ಆತಾಂ ಹಾಂವೆಂ ಕಿತೆಂ ಕರ್ಚೆಂ ಮ್ಹಣ್ತಾಯ್ ತುಂ, ಫಾಲ್ಯಾಂಚ್ ಕೊಡಿಯಾಳ್ ಯೇವ್ನ್ ಮಾಗ್ಗಿಬಾಯೆಕಡೆ ’ಹಾಂವ್ ಜೆಸ್ಸಿಲಾಗಿಂ ಕಾಜಾರ್ ಜಾಯ್ನಾ’ ಮ್ಹಣ್ ಸಾಂಗಾಜಾಯ್ಮೂ? ಜರೂರ್, ಹಾಂವ್ ಫಾಲ್ಯಾಂಚ್ ಕೊಡಿಯಾಲ್ ಯೆತಾಂ"
"ತುಜ್ಯಾ ಉಪ್ಕಾರಾಕ್, ಕಸೊ ಪ್ರತ್ಯುಪ್ಕಾರ್ ಬಾವುಡ್ಚೊ ಹಾಂವ್ ನೆಣಾ...." ಕ್ರತಜ್ಞತೆನ್ ಮೆಲ್ವಿನಾನ್ ಮ್ಹಳೆಂ. "ಮ್ಹಜಿ ತಕ್ಲಿ ಕಿತ್ಲಿ ಹಾಳೂ ಜಾಲಿ! ತುಜೆತಸಲೆ ಮನಿಸ್ ನ್ಹಂಯ್ ಆಂಜ್....."
"ಶ್ಶೂ.....ನ್ಹಂಯ್ ನಾತ್ಲೆಂ ಸ್ಥಾನ್ ಮ್ಹಾಕಾ ದೀನಾಕಾ. ಹ್ಯಾ ಸಂಸಾರಾಂತ್ಲ್ಯಾ ಹಜಾರ್ ಜೀವಿಂ ಮಧೆಂ ಹಾಂವ್ಯಿ ಏಖ್ ಕಿರ್ಕೊಳ್ ಮನಿಸ್. ಬರೆಂ, ತುಮಿಂ ಆಜ್ ರಾವಾ, ಫಾಲ್ಯಾಂ ಸಾಂಗಾತಾ ಕೊಡಿಯಾಳ್ ಚಲ್ಯಾಂ" ಹೆರಿನ್ ಮ್ಹಳೆಂ.
"ಮಾಫ್ ಕರ್ ಹೆರಿ...." ಗಿಬ್ಬಾ ಮ್ಹಣಾಲೊ "ಅಮಿಂ ಯೆತಾನಾ ಘರಾ ಸೈತ್ ಸಾಂಗೊನ್ ಯೇಂವ್ಕ್ ನಾಂವ್. ಘರ್ಚಿ ಘಾಬಾರೊಂಕ್ ಆಸಾತ್...."
"ತರ್ ಕೆದಾಳಾ ಸಾಂಜೆರ್ ವೆತಾತ್ಗಿ?"
"ನಾ.....ಆತಾಂಚ್ ಭಾಯ್ರ್ ಸರ್ಲ್ಯಾರ್ ವೆಳಾರ್ ಘರ್ ಪಾವ್ಯೆತ್." ಮೆಲ್ವಿನಾನ್ ಮ್ಹಳೆಂ.
"ಹುಂ, ತೆಂಯ್ ಜಾಯ್ನಾ, ಹೆಂಯ್ ಜಾಯ್ನಾ, ಬರೆಂ ಹಾಂವ್ ತರ್ ಬಸ್ಸ್ಸ್ಟೆಂಡಾ ವರೇಗ್ ಪಾಂವ್ಕ್ ಯೆತಾಂ, ತುಮ್ಕಾಂ" ಆಶೆಂ ಸಾಂಗೊನ್ ನ್ಹೆಸೊಂಕ್ ಬಿತರ್ ಗೆಲೊ. ಗಿಬ್ಬಾ ಆನಿಂ ಮೆಲ್ವಿನ್ ಎಕಾಮೆಕಾಕ್ ಪಳೆವ್ನ್ ಸಮಾಧಾನೆಚೊ ಶ್ವಾಸ್ ಸೊಡುಂಕ್ಲಾಗ್ಲೆ.
ದೋನ್ ಮಿನುಟಾಂ ಬಿತರ್ ಪರ್ತುನ್ ಭಾಯ್ರ್ ಆಯ್ಲೊ ಹೆರಿ. ತೆಗೀ ಸೊಪ್ಯಾಚಿಂ ಮೆಟಾಂ ದೆಂವೊನ್ ಘರಾಭಾಯ್ರ್ ಪಡ್ಲೆ. ರಸ್ತ್ಯಾರ್ ಚಲ್ತಾನಾ ಹೆರಿ ಮ್ಹಣಾಲೊ - "ಮೆಲ್ವಿನ್ ಮತಿಂತ್ ಕಾಂಯ್ ಚಿಂತ್ತಾ ಕರಿನಾಕಾ. ತುಜಿಂ ಸಗ್ಳಿಂ ಕಾಮಾಂ ಶಾಬಿತಾಯೆನ್ ಚಲ್ತೆಲಿಂ. ಹಾಂವ್ ತುಜೆಲಾಗಿಂ ಏಕ್ ಸವಾಲ್ ವಿಚಾರ್ತಾಂ, ಬೆಜಾರ್ ಜಾಂವೊನಾಂಯ್ಮೂ?"
"ಬಿಲ್ಕುಲ್ ನಾ. ತುವೆಂ ಕಿತೆಂಯ್ ವಿಚಾರ್ಯೆತ್.."ಮೆಲ್ವಿನ್ ಮ್ಹಣಾಲೊ.
"ದುಸ್ರೆಂ ಕಾಂಯ್ ನಹಿಂ. ತುಜಿ ಆನಿಂ ಜೆಸ್ಸಿಚಿ ಖಬಾರ್ ಮಾಗ್ಗಿಬಾಯೆಜ್ ಜಾಂವ್, ತುಜ್ಯಾ ಆವಯ್-ಬಾಪುಯ್ಕ್ ಜಾಂವ್ ಕಳಿತ್ ಆಸಾಗಿ?"
"ನಾ.....ಕೊಣೀ ನೆಣಾಂತ್..."
"ತಶೆಂ ಜಾಂವ್ಕ್ ನಜೊ ಆಸ್ಲ್ಲೆಂ. ಅವಯ್-ಬಾಪಾಯ್ಚ್ಯಾ ನದ್ರೆ ಥಾವ್ನ್ ಆಮಿಂ ಕಸಲಿಚ್ ಸಂಗತ್ ಲಿಪೊಂವ್ಕ್ ನಜೊ. ತಶೆಂ ಲಿಪೈಲ್ಯಾರ್ ಆಮಿಂ ತಾಂಕಾಂ ಅಕ್ಮಾನ್ ಕೆಲ್ಲ್ಯಾ ಬರಿ ಜಾತಾ. ಕಿತ್ಯಾಕ್ ಭುರ್ಗ್ಯಾಂಚ್ಯಾ ಬರ್ಯಾ ಫಾಲ್ಯಾಂತ್ ವ್ಹಡಿಲಾಂಚೊ ಪಾತ್ರ್ ಮಹತ್ವಾಚೊ. ತುಮಿಂ ಮ್ಹಾಕಾ ಮಾಫ್ ಕರಾ - ಹಾಂವ್ ಆಶೆಂ ಉಲೈತಾಂ ಮ್ಹಣ್. ಕೀ ಮ್ಹಜ್ಯಾ ವಿಷ್ಯಾಂತ್ ಸಾಂಗ್ಚೆಂ ಜಾಲ್ಯಾರ್ ಹಾಂವ್ ಕಸಲಿಚ್ ಆಲೋಚನ್ ತಾಂಚ್ಯಾ ಹುಕ್ಮೆ ಶಿವಾಯ್ ಕಾರ್ಯರುಪಾಕ್ ಹಾಡಿನಾ" ಹೆರಿನ್ ಸಾಂಗ್ಚೆಂ ಸತ್ಚ್ ಆಸ್ಲ್ಲೆಂ. ಕಿತ್ಲೊ ಶಿಕ್ಪಿಗಿ ತೊ, ತಿತ್ಲೆಂಚ್ ಖಾಲ್ತೆಪಣ್ ತಾಚೆ ಥಂಯ್ ಆಸ್ಲ್ಲೆಂ.
ಥೊಡ್ಯಾ ವೆಳಾನ್ ಗಿಬ್ಬಾ ಮ್ಹಣಾಲೊ, "ಹೆರಿ ಹಾಂವೆಂ ಸಾಂಗ್ಚೆಂ...ತುಂ ಚೂಕ್ ಲೆಕಿನಾಂಯ್ ಜಾಲ್ಯಾರ್.....ಥೊಡ್ಯಾ ಪಾವ್ಟಿಂ ಆಸಲಿ ಸಂಗತ್ ವ್ಹಡಿಲಾಂಕ್ ಕಳೈಲ್ಲ್ಯಾನ್ ಬಾಧಕ್ ಘಡ್ಚೆಂಯಿ ಆಸ್ತಾ. ಮೊಗಾಚಿ ಖಬಾರ್ ಮ್ಹಳ್ಯಾರ್ ಜಾಯ್ತಿಂ ವ್ಹಡಿಲಾಂ ಚಿಡ್ತಾತ್. ಭುರ್ಗಿಂ ಮೊಗಾರ್ ಪಡೊನ್ ಕಾಜಾರ್ ಜಾಂವ್ಕ್ ಆಡಾಯ್ಲೆಲಿಂ ಘಟನಾಂಯಿ ಸಬಾರ್ ಆಸಾತ್. ಆಶೆಂ ಭುರ್ಗ್ಯಾಂಚೆಂ ಜೀವನ್ ತಾಣಿಂ ಪಿಡ್ಡ್ಯಾರ್ ಕೆಲ್ಲೆಂ ನಾಂಗಿ"
"ವ್ಹಯ್......ತುವೆಂ ಮ್ಹಣ್ಚೆಂ ಸಮಾ" ತಕ್ಲಿ ಹಾಲವ್ನ್ ಹೆರಿ ಸಾಂಗಾಲಾಗ್ಲೊ, "ವ್ಹಡಿಲಾಂ ವರ್ವಿಂ ಭುರ್ಗ್ಯಾಂಚೆಂ ಜೀವನ್ ಪಿಡ್ಡ್ಯಾರ್ ಜಾಂವ್ಚೆಂ ಆಪ್ರೂಬ್ ಕಾಂಯ್ ನ್ಹಂಯ್. ಚಡ್ ಕರ್ನ್ ಆಮ್ಚ್ಯಾಚ್ ಗಾಂವಾಂತ್, ಆಶೀರ್ ಸಮ್ಜೊಣಿಚಿಂ ಆವಯ್ - ಬಾಪುಯ್ ಆಪ್ಲೊ ಪೂತ್ ವ ಧುವ್ ಕೊಣಾಚ್ಯಾ ಮೊಗಾರ್ ಪಡ್ಲ್ಲೆಂ ಪಳೆವ್ನ್ ತಾಂಕಾ ತಿತ್ಲ್ಯೊ ಅಡ್ಡ್ಯೊ ಆನಿಂ ವಿಘ್ನಾಂ ಹಾಡ್ನ್ ಮೊಗಾಚೊ ಅಮರ್ ಬಾಂಧ್ ತುಟೊಂವ್ಕ್ ಪ್ರಯತ್ನ್ ಕರ್ತಾತ್. ನಿಮಾಣೆಂ ಚಲ್ಯಾ -ಆನಿಂ ಚಲಿಯೆಚೊ ಫುಡಾರ್ ಭಂಗ್ ಜಾತಾ. ವ್ಹಯ್, ಮೆಲ್ವಿನ್, ಆಮ್ಚ್ಯಾ ವ್ಹಡಿಲಾಂಥಂಯ್ ಮೋಗ್ ಮ್ಹಳ್ಳ್ಯಾ ವಿಷಯಾಚೆರ್ ಬರಿ ಅಭಿಪ್ರಾಯ್ ಹಾಡಂವ್ಚಿ ಸುಲಭಾಯೆಚೆಂ ಕಾಮ್ ನ್ಹಂಯ್. ಮನ್ಶಾಕ್ ಶಿಕಾಪ್ ನಾ ತರೀ ಸತಾಚೊ ಉಜ್ವಾಡ್ ಪಳೆಂವ್ಕ್ ದೊಳೆ ಆಸಾಜಾಯ್. ತ್ಯಾ ಬಗಾರ್ ಸಂಯ್ಭಿಕ್ ಮನ್ಜಾತ್ಪಣ್ ಪಯ್ಸ್ ಸರಾನಾ"
ಉಲೈತಾನಾ ಹೆರಿಚೆಂ ತೊಂಡ್ ಉದ್ವೇಗಾನ್ ತಾಂಬ್ಡೆಂ ಜಾಲ್ಲೆಂ. ಮೆಲ್ವಿನ್ ಆನಿಂ ಗಿಬ್ಬಾ "ತುಕಾ ಮ್ಹಸ್ತ್ ಥ್ಯಾಂಕ್ಸ್ ಹೆರಿ. ಹ್ಯಾ ತುಜ್ಯಾ ಮಹಾಕರ್ನೆಕ್ ಕ್ರತಜ್ಞತಚ್ಯಾ ಉತ್ರಾಂ ಬಗಾರ್ ದುಸ್ರೆಂ ಕಸಲೆಂಚ್ ದೀಂವ್ಕ್ ಹಾಂವ್ ಸಕಾನಾ"
"ಹ..ಹ..ಹ ಮ್ಹಾಕಾ ತುಜಿ ಆನಿಂ ಗಿಬ್ಬಾಚಿ ಕಾಣಿಕ್ ಎದೊಳ್ಚ್ ಪಾವ್ಲ್ಯಾ" ಹಾಸೊನ್ ಹೆರಿನ್ ಸಾಂಗ್ಲೆಂ. "ಜರ್ತರ್ ತುಮಿಂ ಮತಿಂತ್ ಆನಿಕೀ ಚಿಂತ್ತಾತ್ ಹಾಂವೆಂ ವ್ಹಡ್ಲೊ ಉಪ್ಕಾರ್ ಕೆಲಾ ಮ್ಹಣೊನ್, ತುಮ್ಚಿಂ ಮತ್ ಪಿರ್ವಾಂವ್ಚಿ ಸಾಮಾರ್ಥಿ ಮ್ಹಾಕಾ ನಾ. ಪುಣ್, ತುಮಿಂ ನೆಣಾಂತ್ ತುಮಿಂ ಏಕ್ ವರ್ತೆಂ ಇನಾಮ್ ಮ್ಹಾಕಾ ದಿಲಾಂ ಮ್ಹಣ್.."
"ಇನಾಮ್.....ಕಸಲೆಂ ತೆಂ.....?" ದೊಗಾಂಯ್ಚಿ ಅಜಾಪೊನ್ ವಿಚಾರ್ಲೆಂ.
"ಮೊಲ್ ಬಾಂದುಂಕ್ ಸಕಾನಾಸ್ಚಿ ಇಷ್ಟಾಗತ್...." ದೊಗಾಂಕೀ ಶೇಕ್ಹ್ಯಾಂಡ್ ದೀವ್ನ್ ಹೆರಿನ್ ಮ್ಹಳೆಂ, "ಮೆಲ್ವಿನ್, ತುಂ ತುಜ್ಯಾ ಕಾಮಾರ್ ಆಯ್ಲೊಯ್ ತರೀ ಕಷ್ಟಾಂವಿಣೆ ಮ್ಹಾಕಾ ದೋಗ್ ಈಷ್ಟ್ ಮೆಳ್ಳೆ"
ಗಿಬ್ಬಾಕ್ ಆನಿಂ ಮೆಲ್ವಿನಾಕ್ ಉಲಂವ್ಕ್ ಜೀಬ್ ಸುಟ್ಲಿನಾ. ತಾಂಚಿಂ ಭೊಗ್ಣಾಂ ಜಾಣಾ ಜಾಲ್ಲ್ಯಾಬರಿ ಹೆರಿಚ್ ಉಲೈಲೊ. "ಹಿ ಆಮ್ಚಿಂ ಇಷ್ಟಾಗತ್ ಕೆದಾಳಾಚ್ ಆಖೇರ್ ಜಾಂವ್ಚಿನಕಾ. ಬರೆಂ, ವಚಾ ತುಮಿಂ. ಫಾಲ್ಯಾಂ ಕೊಡಿಯಾಳಾಂತ್ ಮೆಳ್ಯಾಂ"
ಬಸ್ಸ್ ಸುಟ್ತಾ ಮ್ಹಣಾಸರ್ ರಾಕೊನ್, ಹೆರಿ ಪಾಟಿಂ ಚಲ್ಲೊ. ಮೆಲ್ವಿನ್ ಆನಿಂ ಗಿಬ್ಬಾ ಹಾಳ್ವಾಯೆಚಿ ಮತ್ ಘೆವ್ನ್ ಕೊಡಿಯಾಳ್ ಪಾಟಿಂ ಆಯ್ಲೆ. ಬಸ್ಸ್ ಹಂಪನ್ಕಟ್ಟಾ ಪಾವ್ತಾನಾ ಸಾಂಜೆಚಿಂ ಸ ವೊರಾಂ ಜಾಲ್ಲಿಂ. ಗಿಬ್ಬಾಕ್ ಘರಾ ವಚೊಂಕ್ ಸಾಂಗೊನ್ ಮೆಲ್ವಿನ್ ಆಪ್ಲ್ಯಾ ಘರಾ ಪರ್ತಾಲೊ. ಸಾಂಜೆರ್ ತೊ ಖಂಯ್ಚ್ ಭಾಯ್ರ್ ವಚೊಂಕ್ ನ.
ದುಸ್ರೊ ದೀಸ್ ತಾಚ್ಯಾ ವಾಂಟ್ಯಾಕ್ ಉಜ್ಯಾರ್ ಸಾರ್ಲ್ಯಾಬರಿ ದಿಸ್ತಾಲೊ. ತಾಚೆಂ ಕಾಳಿಜ್ ಭಿಂಯಾನ್ ಕಂಗಾಲ್ ಜಾಲ್ಲೆಂ. ಕಿತ್ಲೆಂ ಧೈರ್ ಘೆತ್ಲ್ಯಾರಿ ಜೀವಾಂತ್ ಸಮಾಧಾನ್ ನಾತ್ಲ್ಲೆಂ. ಸಾಂಜೆಚಿಂ ಚ್ಯಾರ್ ವೊರಾಂ ಜಾತಾನಾ ತಾಚೊ ಉದ್ವೇಗ್ ಚಡೊನ್ ಆಯ್ಲೊ. ಆತಾಂ, ಜೆಸ್ಸಿಗೆರ್ ವಚಾಜಾಯ್. ಮಾಗ್ಗಿಬಾಯೆಲಾಗಿಂ ಸಗ್ಳಿ ಸಂಗತ್ ಉಗ್ಡಾಪಿ ಕರುಂಕ್ ಜಾಯ್. ತಿ ಕಿತೆಂ ಮ್ಹಣಾತ್? ತಿಚ್ಯಾ ಜಾಪಿಚೆರ್ ಆಫ್ಲೆಂ ಜೀವನ್ ಹೊಂದ್ವೊನ್ ಆಸಾ.
ರೊಫಿನ್ಬಾಯ್ ಕಿತೆಂ ಸಾಂಗಿತ್? ಹೆರಿಲಾಗಿಂ ಜೆಸ್ಸಿಚೆಂ ಕಾಜಾರ್ ಕರ್ಚ್ಯಾ ಆಟ್ಟಾಣ್ಯಾರ್ ತಿ ಆಸಾ. ಉಟಾಉಟಿಂ ಸೈರಿಕ್ ಘಟ್ ಕರುಂಕ್ ಆಯ್ಲ್ಯಾ ತಿ.....ಆಪ್ಲಿಂ ಉತ್ರಾಂ ಆಯ್ಕೊನ್ ಕಿತೆಂ ಕರಿತ್? ಮಾಗ್ಗಿಬಾಯ್ ಆನಿಂ ರೊಫಿನ್ಬಾಯ್ ಖಂಡಿತ್ ಉಚಾಂಬಳ್ ಜಾತೆಲಿಂ. ವ್ಹಯ್ ತಾಂಚ್ಯಾ ವಿರೋಧ್ ಮಹಾಝುಜ್ ಆಪ್ಣೆಂ ಮಾಂಡುಂಕ್ ಆಸಾ. ತಾಂಚ್ಯಾ ವಿರೋಧಾಚೆರ್ ಆಪ್ಣೆ ಜಿಕಾಜಾಯ್ ಜೀಕ್ ಸಾಧ್ಯ್ಗಿ ಎಕಾವೆಳಾರ್ ಸಲ್ವೊಣಿ ಮೆಳ್ಳ್ಯಾರ್...?
ಆಪುಣ್ ಸಲ್ವಾಲ್ಯಾರ್ ಮುಖಾರ್ ಕಿತೆಂ ಜಾಯ್ತ್ ತೆಂ ಮೆಲ್ವಿನಾಚ್ಯಾ ಕಲ್ಪನಾ ಭಾಯ್ಲೆಂ ಸವಾಲ್ ಜಾವ್ನಾಸ್ಲ್ಲೆಂ ಕಾಳೊಕಾಂತ್ ಏಕ್ಚ್ ಕೀರ್ಣ್ ತಾಕಾ ದಿಸ್ತಾಲೆಂ ಆನಿಂ ತೆಂಚ್ ಜಾವ್ನಾಸ್ಲ್ಲೆಂ ಹೆರಿ....ಹೆರಿ ಎದೊಳ್ ಜೆಸ್ಸಿಗೆರ್ ಪಾವ್ಲಾಗಿ? ಹೆರಿ ಆಪ್ಲ್ಯಾ ಪಾಡ್ತಿಂತ್ ಆಸ್ತೊಲೊ ಮ್ಹಣ್ ಭರ್ವಸೊ ಆಸ್ಲ್ಲೊ ಮೆಲ್ವಿನಾಕ್.
ಸಗ್ಳೆಂ ಧೈರ್ ಎಕ್ಟಾಂಯ್ ಕರ್ನ್ ತೊ ಜೆಸ್ಸಿಗೆರ್ ಗೆಲೊ. ಅನಿರೀಕ್ಶಿತ್ ಜಾವ್ನಾಸ್ಲ್ಲೆಂ ತಾಚೆಂ ಯೆಣೆಂ. ಮಾಗ್ಗಿಬಾಯ್ ಆನಿಂ ರೊಫಿನ್ಬಾಯ್ ಭಾಯ್ರ್ ಸೊಪ್ಯಾರ್ ಬಸೊನ್ ಆಸ್ಲ್ಲಿಂ. ಮೆಲ್ವಿನಾಕ್ ಪಳೆತಚ್ ತಾಂಚೆಂ ಉಲವ್ಣೆಂ ಬಂಧ್ ಜಾಲ್ಲೆಂ. ಮೆಲ್ವಿನ್ ತಾಂಕಂ ಪಳೆವ್ನ್ ಬಾರೀಕ್ ಹಾಸ್ಲೊ. ಪುಣ್ ತಾಂಚ್ಯಾ ಪ್ರತಿ - ಹಾಸ್ಯಾಂತ್ ಮೊಗಾಚಿ ಛಾಯಾ ನಾತ್ಲ್ಲಿ. ತಿಂ ಮೆಲ್ವಿನಾಲಾಗಿಂ ಉಲೈಲಿಂನಾಂತ್.
ತೊ ಸೊಪ್ಯಾ ವಯ್ಲ್ಯಾ ಕದೆಲಾರ್ ಬಸ್ಲೊ. ಥೊಡಿಂ ಮಿನುಟಾಂ ಪಾಶಾರ್ ಜಾಲಿಂ. ಮೆಲ್ವಿನಾಚೆಂ ಕಾಳಿಜ್ ಧಡ್ದಡ್ತಾಲೆಂ. ಆಖ್ರೇಕ್ ತಿ ಶಾಂತಿ ಸೊಸುಂಕ್ ತಾಂಕಾನಾಸ್ತಾಂ ತೊ ಪುಸ್ಪುಸ್ಲೊ. "ಮಾವ್ಶೆ........ತುಂ ಕಿತೆಂ ಹುಶಾರ್ ನಾಂಯ್ಗಿ ಕಿತೆಂ?"
ಮಾಗ್ಗಿಬಾಯೆನ್ ಜಾಪ್ ದಿಲಿನಾ, ಬದ್ಲಾಕ್ ದೀಷ್ಟ್ ತಿರ್ಕಾಸ್ ಜೊಕ್ಲಿ. ಆತಾಂ ರೊಫಿನ್ಬಾಯ್ ಉಲೈಲಿ - "ಮೆಲ್ವಿನ್, ತುಕಾ ತ್ಯಾ ದಿಸಾ ಕಾರ್ಕಳ್ ಯೇವ್ನ್ ಫಟಿ ಮಾರ್ಚಿ ಕಿತೆಂ ಗರ್ಜ್ ಆಸ್ಲ್ಲಿ?"
ಮೆಲ್ವಿನಾಚ್ಯಾ ತಾಳ್ಯಾಂತ್ ಲಾಸೊಂಕ್ ಸುರು ಜಾಲೆಂ. ತಾಣೆಂ ಖಾಲಿ ಥಿಂಪಿ ಗಿಳ್ಳಿ ಮಾತ್ರ್.
"ಚೆಡ್ವಾಂ ಮ್ಹಳ್ಳಿ ಸಸಾರ್ಗಾಯ್ ಘೆವ್ನ್ ತುವೆಂ ಇತ್ಲಿಂ ಕಾರ್ಭಾರಾಂ ಕರುಂಕ್ ನಜೊ ಆಸ್ಲ್ಲಿಂ ಪುತಾ" ಭಾರಾಧಿಕ್ ತಾಳ್ಯಾನ್ ರೊಫಿನ್ಬಾಯೆನ್ ಮುಖಾರ್ಸಿಲೆಂ, "ವ್ಹಯ್ ಮಾಗ್ಗಿಬಾಯ್ ಸಾಂಗ್ತಾಂ, ತುವೆಂ ತಾಂಕಾಂ ಮ್ಹಸ್ತ್ ಉಪ್ಕಾರ್ ಕೆಲ್ಯಾಯ್ ಮ್ಹಣ್. ಪುಣ್ ತ್ಯಾ ಕಾರಣಾಕ್ ಲಾಗೊನ್ ತುವೆಂ ಫಟಿ ಮಾರ್ನ್ ಆಮ್ಗೆರ್ ಯೆಂವ್ಚಿ ಗರ್ಜ್ ನಾತ್ಲ್ಲಿ. ತುಂ ಸತ್ಚ್ ಉಲೈಲ್ಲೊಯ್ ತರ್, ಹಾಂವ್ ತುಕಾ ಘರಾಂತ್ ಪ್ರವೇಶ್ ಇನ್ಕಾರ್ ಕರ್ತಿಂಗಿ? ತೆರೆಜ್ಬಾಯೆಚೊ ಪಿಲ್ಯಾದ್ ಮ್ಹಣ್ ಭಾನಾಯ್ಲೆಂಯ್ ತುವೆಂ"
ಮೆಲ್ವಿನಾನ್ ಜಾಪ್ ಕಾಡ್ಲಿನಾ.
"ಪಳೆ, ಗರ್ಜೆಕ್ ತರೀ ಆಮಿಂ ಫಟಿ ಮಾರುಂಕ್ ನಜೊ ಮೆಲ್ವಿನ್" ತಿಚ್ ಮ್ಹಣಾಲಿ, "ತುವೆಂ ನೆಣಾರ್ಪಾಣಾನ್ ಆಶೆಂ ಕೆಲಾಂಯ್ ಜಾವ್ಯೆತ್. ಹಾಂವ್ ರಾಗಾನ್ ಉಲೈಲಿಂ ಮ್ಹಣ್ ಶಿಣ್ ಕರಿನಾಕಾ. ಪುಣ್, ನಾತ್ಲ್ಲೊ ಸಂಬಂಧ್ ಘೆವ್ನ್ ಎಕಾ ಚೆಡ್ವಾ ಸಾಂಗಾಂತಾ, ತೆಂಯ್ ಫಾಲ್ಯಾಂ ಸಕಾಳಿಂ ಕಾಜಾರ್ ಜಾಂವ್ಕ್ ಆಸ್ಚ್ಯಾ ಚಲಿಯೆ ಸಾಂಗಾತಾ ಭಂವ್ಚೆಂ ಮ್ಹಳ್ಯಾರ್ ಕಿತೆಂ ಗಜಾಲ್ ಹಿ! ಪಳೆಲ್ಲೊ ಲೋಕ್ ತುಕಾ ಉಲಂವ್ಚೊ ನಾ. ಪುಣ್ ತ್ಯಾ ಚೆಡ್ವಾಚೊ ಪುಡಾರ್ಚ್ ಭಸ್ಮೊನ್ ವಚಾತ್. ಗರ್ಜೆಕ್ ಚೆಡ್ವಾಲಾಗಿಂ ಉಲಂವ್ಕ್ ನಜೊ
ಮ್ಹಣಾನಾ ಹಾಂವ್. ಲೆಕಿನ್, ತುಂ ಮಾತ್ರ್ ಫೆಸ್ತಾಚೆಂ ನೀಬ್ ಘೆವ್ನ್ ಜೆಸ್ಸಿಕ್ ಪಳೆಂವ್ಕ್ ಕಾರ್ಕಳ್ ಆಯ್ಲೊಯ್. ಫಟ್ಕಿರ್ಯಾನ್, ಜೆಸ್ಸಿನ್ಯಿ ಫಟಿಚ್ ಸಾಂಗ್ಲ್ಯೊ ಮ್ಹಾಕಾ. ತುಜ್ಯಾ ಬರ್ಯಾಕ್ಚ್ ಸಾಂಗ್ತಾಂ ಮೆಲ್ವಿ, ಆನಿಂ ಮುಖಾರ್ ಆಶೆಂ ಕರಿನಾಕಾತ್"
ಮೆಲ್ವಿನಾಚಿ ತಕ್ಲಿ ಗರಾಮ್ ಜಾಲ್ಲಿ. ತರೀ ತಾಣೆ ಗರ್ವಾನ್ ಸಬ್ದ್ ಕಾಡ್ಲೊ ನಾ. ಆತಾಂ ಮಾಗ್ಗಿಬಾಯ್ ಉಲಂವ್ಕ್ಲಾಗ್ಲಿ.
"ಮೆಲ್ವಿ........ಜಾಲ್ಲೆಂ ಜಾವ್ನ್ ಗೆಲೆಂ. ಮ್ಹಾಕಾ ತುಜೆರ್ ಕಾಂಯ್ ಬೆಜಾರಾಯ್ ನಾ. ತುವೆಂ ಮ್ಹಸ್ತ್ ಉಪ್ಕಾರ್ ಆಮ್ಕಾಂ ಕೆಲ್ಯಾಯ್. ತುವೆಂ ಫಟಿ ಮಾರ್ಲ್ಲ್ಯಾಕ್ ಮಾತ್ರ್ ಮ್ಹಜೆಂ ಮನ್ ದುಃಖ್ಲೆಂ. ಆತಾಂ ಕಾಂಯ್ ಬಾಧಕ್ ಜಾಂವ್ಕ್ ನಾ ಮ್ಹಣ್ಯಾಂ. ದುಸ್ರಿ ಆವಯ್ ಜಾಲ್ಲಿ ತರ್, ಜೆಸ್ಸಿಚೆರ್ ದುಬಾವ್ ಮಾಂಡ್ತಿ. ಪುಣ್ ಮ್ಹಾಕಾ, ಹಾಂವ್ ತುಜೆರ್ ವ ತಾಚೆರ್ ಕಾಂಯ್ಚ್ ಸಂಶಯ್ ನಾ. ತ್ಯಾ ಪರಿಂ ರೊಫೀನ್ಬಾಯೆನ್ಯಿ ತುಮ್ಕಾಂ ದೊಗಾಂಕೀ ಭೊಗ್ಶಿಲಾಂ. ಜೆಸ್ಸಿ ಆನಿಂ ತುಂ ಸಾಂಗಾತಾ ಇಗರ್ಜೆಕ್ ಗೆಲ್ಲಿ ಖಬಾರ್ ರೊಫಿನ್ಬಾಯೆನ್ ಸಾಂಗ್ತಾನಾ ಹಾಂವ್ ಬಿಂಯೆಲ್ಲಿಂ ಸಗ್ಳಿಂ. ತರೀ, ಹಾಂವ್ ಆಶೀರ್ ಸಮ್ಜೊಣೆಚಿಂ ನ್ಹಂಯ್. ತಶಿಚ್ ರೊಫಿನ್ಬಾಯ್ಯಿ. ವ್ಹಡ್ ಮನಾನ್ ತಿಣೆಂ ಜೆಸ್ಸಿಕ್ ಸುನ್ ಕರ್ನ್ ಘೆಂವ್ಚಿ ಆಶಾ ಉಚಾರ್ಲ್ಯಾ........ತಿಕಾ ಜೆಸ್ಸಿಚೆರ್ ಕಾಂಯ್ಚ್ ದುಬಾವ್ ನಾ..."
ಮೆಲ್ವಿನಾಕ್ ತೊಣ್ಕ್ಯಾನ್ ಮಾರ್ಲ್ಲ್ಯಬರಿ ಜಾಲೆಂ. ಅಂಗಾಂತ್ಲ್ಯಾನ್ ಶೆಳೊ ಘಾಮ್ ಸುಟ್ಲೊ. ತಕ್ಲಿ ಗಿರ್ಗಿರೊಂಕ್ಲಾಗ್ಲಿ. ಎಕಾಚ್ಚಾಣೆಂ, ಸುಟೊಂಕ್ ಆಯ್ಕಾನಾತ್ಲ್ಲ್ಯಾ ಜಿಬೆಲಾಗಿಂ ಬಲತ್ಕಾರಾನ್ ಝಗ್ಡೊನ್ ತೊ ಉಲೈಲೊ - "ಮಾವ್ಶೆ...ಹೆಂ ಸಾಧ್ಯ್ ನಾ"
ತಿ ದೊಗಾಂಯ್ ಹಾಂಕ್ರೆಲಿಂ. ಏಕ್ಚ್ ಪಾವ್ಟಿಂ ಉಲೈಲಿಂ ದೊಗಾಂಯ್......"ಕಿತೆಂ! ಖಂಯ್ಚೆಂ ಸಾಧ್ಯ್ ನಾ?
"ಹಾಂವ್ ಸ್ವಷ್ಟ್ ಸಾಂಗ್ತಾಂ ಕಿ, ಜೆಸ್ಸಿಚೆಂ ಕಾಜಾರ್ ಹೆರಿಲಾಗಿಂ ಜಾಂವ್ಕ್ ನಜೊ ಮ್ಹಣ್" ಬೋಬ್ ಮಾರ್ಲಿ ಮೆಲ್ವಿನಾನ್.
"ಕಿತೆಂ ಮ್ಹಣಾಂಯ್?" ಗೊರೊಜ್ ಘಾಲಿ ರೊಫಿನ್ಬಾಯೆನ್.
ವ್ಹಾಳ್ಚಿಂ ದುಃಖಾಂ ಪುಸುನ್ ಕಾಂಪ್ಚ್ಯಾ ತಾಳ್ಯಾನ್ ಮೆಲ್ವಿನಾನ್ ಮ್ಹಳೆಂ - "ಮಾವ್ಶೇ...... ದೊಗಾಂಯ್ ಆಯ್ಕಾ. ಮ್ಹಜಿಂ ಉತ್ರಾಂ ದೊಗಾಂಯ್ ಬರಿ ಕರ್ನ್ ಸಮ್ಜೊನ್ ಘೆಯಾ. ಸಗ್ಳೆಂ ಹಾಂವ್ ತುಮ್ಕಾಂ ಸಾಂಗ್ತಾಂ - ಜೆಸ್ಸಿನ್ ಆನಿಂ ಹಾಂವೆಂ ಎಕಾಮೆಕಾಕ್ ಕಾಜಾರಾಚೆಂ ಉತಾರ್ ದಿಲಾಂ. ಜೆಸ್ಸಿ ಹೆರ್ ಕೊಣಾಲಾಗಿಂಚ್ ಕಾಜಾರ್ ಜಾಂವ್ಚೆಂನಾ. ಆಮಿಂ ಎಕಾಮೆಕಾಚೊ ಮೋಗ್ ಕರ್ತಾಂಚ್......"
"ದೆವಾ.." ಆಶೆಂ ಮ್ಹಣೊನ್ ತೊ ಘಳ್ಗಳಿತ್ತ್ ರಡ್ಲೊ.
(ಆನಿಂ ತಾಕಾ ಜಾಪ್ ಕಿತೆಂ ಮೆಳ್ಳಿ? ಝುಜ್ ವ ಸಮಾಧಾನೆಚಿಂ ಉತಾಂ? ಫುಲಾಂ ವ ಫಾತೊರ್? ಆಶಾ ವ ನಿರಾಶಾ? ಏಕ್ಚ್ ಉತಾರ್, ಏಕ್ಚ್ಜಾಪ್....ಎಕಾಚ್ ಸಬ್ದಾಕ್ ಮಾಗ್ಗಿಬಾಯೆಚ್ಯಾ ತೊಂಡಾಂತುನ್ ಭಾಯ್ರ್ ಸರ್ತಾನಾ.....ಯೆಂವ್ಚೊ ಅಂಕೊ ಖಂಡಿತ್ ಚುಕಾನಾಕಾತ್.)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
