ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 11
ಮೆಲ್ವಿನ್ ಖಂತೀಷ್ಟ್ ಜಾಲ್ಲೊ ಗಿಬ್ಬಾಕ್ ದಿಸೊಂಕ್ ವೇಳ್ ಗೆಲೊನಾ. ಮೆಲ್ವಿನಾಕ್ ತಾಚ್ಯಾ ಇತ್ಲ್ಯಾರ್ ಚಿಂತುಂಕ್ ಸೊಡ್ನ್, ತೊ ಸಿಗ್ರೇಟ್ ಪೆಟೊವ್ನ್ ವ್ಹೊಡ್ತಾಲೊ. ತಾಚ್ಯಾ ಮತಿಂತ್ಯಿ ರಿಜಾಚಿಂಚ್ ಚಿಂತ್ನಾಂ ಘುಂವ್ತಾಲಿಂ.
ರಿಜಾಕ್ ಪಳೆಲ್ಲೆಂ ತಾಣೆಂ ತೆಂಚ್ ಪಯ್ಲೆಂ ಪಾವ್ಟಿಂ. ಮೆಲ್ವಿನಾ ಮುಖಾಂತ್ರ್ ನಹಿಂ ತರ್, ಕಾರ್ಕಳಾಕ್ ಕೆದಾಳಾಚ್ ತೊ ಪಾವ್ತೊನಾ. ಆನಿಂ ರಿಜಾಕ್ ಪಳೆಲ್ಲ್ಯಾ ಉಪ್ರಾಂತ್....ತಾಚೆಂ ಮನ್ ಧಂಡಳೊನ್ ಗೆಲ್ಲೆಂ. ’ಚೆಡ್ವಾಂಚಿ ಸಳಾವಳ್ಚ್ ನಾಕಾ’ ಆಶೆಂ ತಾಣೆಂ ನಿಚೆವ್ ಕೆಲ್ಲೊ ಥೊಡ್ಯಾ ತೆಂಪಾ ಆದಿಂ. ತಶೆಂ ತಾಣೆಂ ನಿಚೆವ್ ಕರುಂಕ್ ಕಾರಣ್ಯಿ ಆಸ್ಲ್ಲೆಂ. ಲ್ಹಾನ್ ಆಸ್ತಾಂ, ತಾಣೆಂ ಎಕ್ಲ್ಯಾಚೊ ಮೋಗ್ ಕೆಲ್ಲೊ. ತಾಚ್ಯಾ ಶೆಜಾರಾ ರಾಂವ್ಚೆಂ ಚೆಡುಂ ತೆಂ. ಚಡುಣೆಂ ತಾಚ್ಯಾಚ್ ಪ್ರಾಯೆಚೆಂ. ಪುಣ್ ಲ್ಹಾನ್ಪಣಿಂಚೊ ಮೋಗ್........ಸ್ಥಿರ್ ನಹಿಂ ಮ್ಹಣ್ ಗಿಬ್ಬಾಚ್ ನಹಿಂ, ಸಕ್ಕಡ್ಯಿ ನೆಣಾಂತ್ ಆಸ್ತೆಲೆ. ಕಿತ್ಯಾಕ್ ಎಕ್ಲೊ ಭುರ್ಗೊ, ನೆಣ್ತೊ ಆಸ್ಲ್ಲೊ ಜಾಣ್ತೊ ಜಾತಾನಾ, ಬರೆಂ ವಾಯ್ಟ್ ಸಮ್ಜೊಂಕ್ ಸಕ್ತಾನಾ, ಸ್ವಾಭಾವಿಕ್ ರಗ್ತಾ ಮಾಸಾಚಿ ಕೂಡ್ ವಿರೋಧ್ ಪಕ್ಶೆಚ್ಯಾ ವ್ಯಕ್ತಿಕ್ ಆಶೆತಾ. ಜಾಯ್ತೆ ಚಿಂತ್ತಾತ್ ಹೊಚ್ ಮೋಗ್ ಮ್ಹಣ್. ಪುಣ್ ಹ್ಯಾ ವೆಳಾರ್ ಚಡಾವತ್ ಶಾರೀರಿಕ್ ಚಿಂತ್ನಾಕ್ ಆಶೆತಾ ಸೊಡ್ನ್, ಕರೊ ಮೋಗ್ ಥಂಯ್ಸರ್ ಉಬ್ಜಾನಾ. ಪ್ರಾಯ್ ವೆತಾನಾ ಮನ್ಶಾಚಿಂ ಚಿಂತ್ನಾಂ ಬದಲ್ತಾತ್, ತೆದಾಳಾ ಕಾಳ್ಜಾಚಿಂ ಭೊಗ್ಣಾಂ ಆನಿಂ ಉಮಾಳೆ , ಸಂಯ್ಭಿಕ್ ವೊಡ್ನೆಚ್ಯಾಕೀ ಬಳಿಷ್ಟ್ ಆಸ್ತಾತ್. ತಸಲೊ ಮೋಗ್ ಚಡ್ ಕರ್ನ್ ಬಾಳ್ವಾತಾ.
ಗಿಬ್ಬಾನ್ ಮೋಗ್ ಕೆಲ್ಲ್ಯಾ ಚೆಡ್ವಾಕ್ ತಾಚ್ಯಾ ಅವಯ್ - ಬಾಪಾಯ್ನ್ ಸೈರಿಕ್ ಪಳೆಲ್ಲಿ ತ್ಯಾ ಚೆಡ್ವಾಚಿ ಚೂಕ್ ನಹಿಂ. ವ್ಹಡಿಲಾಂಚೊ ಕಾಯ್ದೊ ತೊ....ಧುವ್ ಪ್ರಾಯೆಕ್ ಪಾವ್ತಾನಾ, ತಾಂಚಿ ಜವಬ್ದಾರಿ ತಾಣಿ ಸಾಂಬಾಳ್ಳಿ. ಪುಣ್ ಗಿಬ್ಬಾ ಮಾತ್ರ್ ಸಂಸಾರಾಕ್ಚ್ ಕಾಂಟಾಳೊಂಕ್ ಲಾಗ್ಲ್ಲೊ. ’ಚೆಡ್ವಾಂ ಘಾತ್ಕಿ, ಪಾತ್ಕಿ......ಚೆಡ್ವಾಂಕ್ ಭುಲವ್ನ್, ನಾಚೊವ್ನ್ ಉಪ್ರಾಂತ್ ಲಾತ್ ದಿಂವ್ಚಿಂ ಸಂಸಾರಾಂತ್ಲಿ ದೆಂವ್ಚಾರಾಂ. ಕೊಣಾಕ್ ಪಾತ್ಯೆಲ್ಯಾರಿ ಚೆಡ್ವಾಂಕ್ ಪಾತ್ಯೆಂವ್ಕ್ ನಜೊ....’ ಅಶೆಂ ವೀಕ್ ವೊಂಕ್ತಾಲೊ ಗಿಬ್ಬಾ. ಕಿತ್ಯಾಕ್ ತೊ ನೆಣಾ ಜಾಲ್ಲೊ ಸಂಸಾರ್ ಕಿತೆಂ ಮ್ಹಣ್......ಆಪ್ಲ್ಯಾ ವ್ಹಡಿಲಾಂ ವಿರೋಧ್ ತ್ಯಾ ಚೆಡ್ವಾಕ್ ಝುಜೊಂಕ್ ವಾಟ್ಚ್ ನಾತ್ಲ್ಲಿ ಮ್ಹಳ್ಳೆಂ ಸತ್ ತೊ ವಿಸರ್ಲೊ.
’ಹಾಂವೆಂ ಕೆಲ್ಲೊ ನಿಚೆವ್....ಖಂಯ್ ಉರ್ಲೊ?’ ಗಿಬ್ಬಾ ಆಪ್ಲೆಸ್ತಕಿಂ ಚಿಂತುನ್ ಹಾಸ್ತಾಲೊ. ರಿಜಾಕ್ ದೆಖ್ಲೆಂ.....ತಕ್ಷಣ್ ತಾಚೆಂ ಸಿಂತಿದ್ಚ್ ಬದ್ಲ್ಲೆಂ. ದೋನ್ ಪಾವ್ಟಿಂ ಉಲೈತಾನಾ, ಎಕಾಮೆಕಾಚಿ ಅಭಿರುಚ್ ಆನಿಂ ಸೈಂಭ್ ಜಾಣಾ ಜಾತಾನಾ ರಿಜಾ ಆನಿಂ ಗಿಬ್ಬಾಚಿಂ ಮನಾಂ, ಲಾಗಿಂ ಲಾಗಿಂ ಆಯಿಲ್ಲಿಂ. ಉಪ್ರಾಂತ್, ಘುಮ್ಟ್ಯಾಕ್ ಪಳೆಂವ್ಕ್ ತೊ ಗುಡೊ ಚಡ್ಲ್ಲ್ಯಾ ಸಂದರ್ಭಾರ್ ತಾಣಿ ಎಕಾಮೆಕಾಕ್ ಭಾಸ್ ದಿಲ್ಲಿ.......ಕಿತ್ಲ್ಯಾ ವೆಗಿಂ ಹೆಂ ಘಡ್ಲೆಂ....ನಿಯಾಳ್ನ್ ವಿಜ್ಮಿತ್ ಜಾತಾಲೊ ಗಿಬ್ಬಾ. ಖೊಮ್ಸಾಚ್ಯಾ ಬೊಲ್ಸಾಂತ್. ರಿಜಾನ್ ದಿಲ್ಲಿ ತಾಚಿ ತಸ್ವೀರ್ ತಾಣೆಂ ದವರ್ಲ್ಲಿ. ಆನಿಂ ತಿ ಭಾಯ್ಲ್ಯಾನ್ಂಚ್ ವ್ಹಳೂ ಪೊಶೆತಾನಾ, ವಿವಿಧ್ ಭೊಗ್ಣಾಂ ಉಬ್ಜಾಲಿಂ ತಾಚೆ ಥಂಯ್ ತೊ ಕಿತೆಂಗಿ ಮೆಲ್ವಿನಾಕ್ ಸಾಂಗೊಂಕ್ ತೊಂಡ್ ಕಾಡ್ತಾಲೊ. ತ್ಯಾಚ್ ವೆಳಾರ್ ಮೆಲ್ವಿನಾಚೆಂ ದುಃಖೇಸ್ತ್ ತೊಂಡ್ ತಾಕಾ ದಿಸ್ಲೆಂ.
"ಮೆಲ್ವಿನ್......ಹೆಂ ಕಿತೆಂ.....!" ಮೆಲ್ವಿನಾಕ್ ಕುಟ್ಟುನ್ ತಾಣೆಂ ವಿಚಾರ್ಲೆಂ.
"ಹಾಂ....ಕಾಂಯ್ ನಾ ಗಿಬ್ಬಾ..." ವೆಗಿಂ ವೆಗಿಂ ವೆಗಿಂ ಮೆಲ್ವಿನಾಕ್ ದುಃಖಾಂ ಪುಸ್ಲಿ.
"ಓ......ತುಂ ಜೆಸ್ಸಿಕ್ ನಿಯಾಳ್ತಾಯ್ ದಿಸ್ತಾ.....ಬಿಯೆನಾಕಾ ಇಷ್ಟಾ. ಥೊಡ್ಯಾ ತೆಂಪಾಚ್ಯಾ ವೆಗ್ಳಾಚಾರಾ ಉಪ್ರಾಂತ್ಲ್ಯಾ ಮಿಲಾನಾಂತ್ ಅಧಿಕ್ ಮಝಾ ಆಸಾ..." ಗಿಬ್ಬಾನ್ ಸಾಂಗ್ಲೆಂ.
"ಆಶೆಂಚ್ ಜೆಸ್ಸಿಕ್ ನಿಯಾಳುಂಕ್ ಆಯ್ಲೆಂ ಗಿಬ್ಬಾ," ಮೆಲ್ವಿನ್ ಮ್ಹಣಾಲೊ, "ತಿ ಖಬಾರ್ ಆಸೊಂದಿ. ಫೆಸ್ತ್ ಕಶೆಂ ಜಾಲೆಂ?"
"ವಂಡರ್ಫುಲ್ ಮೆಲ್ವಿನ್. ತುಜ್ಯಾ ದಯೆನ್ ನಹಿಂ ತರ್, ಅಸಲೆಂ ಅಪ್ರೂಪ್ ಭಾಗ್ ಮೆಳ್ತೆಂನಾ ಮ್ಹಾಕಾ. "ಧುಂವೊರ್ ವೊಂಕೊನ್ ತೊ ಉಲೈಲೊ.
"ರಿಜಾ ಕಶೆಂ ದಿಸ್ತಾ?" ಸವಾಲ್ ಮೆಲ್ವಿನಾಚೆಂ.
ಗಿಬ್ಬಾ ತಾಂಬ್ಡೊ ಜಾಲೊ. "ಕಶೆಂ ದಿಸ್ತಾ ಮ್ಹಳ್ಯಾರ್? ಆಸ್ಲ್ಲ್ಯಾ ಬರಿಚ್..."
"ತೆಂ ಹಾಂವೀ ಜಾಣಾಂ. ರಿಜಾಚೊ ತುಂ..."
"ಕಿತೆಂ ಮ್ಹಣಾಂಯ್?"
"ಹಾಂವ್ ಚಿಂತ್ತಾಂ ತುಮಿಂ ಎಕಾಮೆಕಾಚೊ ಮೋಗ್ ಕರ್ತಾತ್ ಮ್ಹಣ್"
"ನಾ ....ಖಂಡಿತ್ ನಾ"
"ಮ್ಹಾಕಾ ಫಟಂವ್ಕ್ ಪ್ರಯತ್ನ್ ಕರಿನಾಕಾ ಗಿಬ್ಬಾ, " ಹಾಸ್ಲೊ ಮೆಲ್ವಿನ್, "ಕಾಲ್ ಸಾಂಜೆರ್ ತುವೆಂ ರಿಜಾಲಾಗಿಂ ಉಲೈಲಿಂ ಸರ್ವ್ ಉತ್ರಾಂ ಜೆಸ್ಸಿನ್ ಮ್ಹಾಕಾ ಸಾಂಗ್ಲ್ಯಾತ್. ರಿಜಾ ಜೆಸ್ಸಿಲಾಗಿಂ ಮ್ಹಣ್ತಾಲೆಂ ಖಂಯ್ - ’ತುವೆಂ ಸರ್ಕಾಸಾಂತ್ ’ಬಪೂನಾಚೊ’ ಪಾತ್ರ್ ಘೆತ್ಲ್ಯಾರ್ ಬರೊ ಆಸ್ಲ್ಲೊ; ಮ್ಹಣ್"
"ಅರೇ, ತೆಂ ಇತ್ಲೆಂ ಚಾಡಿಯಾಳೆಂ ತರ್!" ಗಿಬ್ಬಾನ್ ಸಾಂಗ್ಲೆಂ, "ಹಾಂವ್ ಸ್ವಪ್ಣಾಂತ್ಯಿ ಸಮ್ಜೊಂಕ್ನಾ ಜೆಸ್ಸಿಲಾಗಿಂ ತೆಂ ಹಾಂವೆಂ ಉಲೈಲಿಂ ಉತ್ರಾಂ ಸಾಂಗಿತ್ ಮ್ಹಣ್"
"ಪಾತ್ಯೆಣೆಚ್ಯಾ ಇಷ್ಟಾಂ ಮಧೆಂ ಘುಟ್ ಬರೊ ನಹಿಂ, ಗಿಬ್ಬಾ" ಉಲೈಲೊ ಮೆಲ್ವಿನ್, "ಹಾಂ ಜಾಲ್ಲೆಂ ತೆಂ ಜಾಲೆಂ. ರಿಜಾಕ್ ಮಾತ್ರ್ ಕೆದಾಳಾಚ್ ಸಾಂಡಿನಾಕಾ. ಬರೆಂ ಭುರ್ಗೆಂ ತೆಂ"
"ತುಂ ಜೆಸ್ಸಿಕ್ ಕೆದಾಳಾಚ್ ಸಾಂಡುಂಕ್ ತಯಾರ್ ಆಸಾಯ್ಗಿ?" ಗಿಬ್ಬಾನ್ ವಿಚಾರ್ಲೆಂ.
ತಾಚ್ಯಾಚ್ ದೊಳ್ಯಾಂಕ್ ದೀಷ್ಟ್ ಲಾವ್ನ್ ಸವ್ಕಾಸ್ ಮೆಲ್ವಿನಾನ್ ಜಾಪ್ ದಿಲಿ. "ಪರ್ವಾನಾ ...ಮೊಗಾಚೊ ರೂಕ್ ತುಜ್ಯಾ ಕಾಳ್ಜಾಂತ್ ಪಾಲೆವ್ನ್ ಫಳಾಂ ದೀಂವ್ಕ್ ಲಾಗ್ಲಾ..."
ಲಾಂಬಾಯೆಚೆಂ ಪಯ್ಣ್ ಕರ್ನ್ ಧಾ ವೊರಾಂ ಜಾತಾನಾ ಬಸ್ಸ್ ಹಂಪನ್ಕಟ್ಟಾ ಪಾವ್ಲೆಂ. ಪುರಾಸಾಣೆಚ್ಯಾ ತಾಂಕಾಂ ದೊಗಾಂಕೀ ವಿಶೆವಾಚಿ ಗರ್ಜ್ ಆಸ್ಲ್ಲಿ. ಆದೇವ್ಸ್ ಮಾಗೊನ್ ದೊಗೀ ಆಪಾಪ್ಲ್ಯಾ ಘರಾ ಚಲ್ಲೆ.
ಜಿಲ್ಲಿಬಾಯ್ ಘರಾಚ್ ಆಸ್ಲ್ಲಿ. ತಿಚ್ಯಾ ಹಜಾರ್ ಸವಾಲಾಂಕ್ ಮಟ್ವ್ಯೊ ಜಾಪಿ ದಿತಾಚ್ ಮೆಲ್ವಿನ್ ನ್ಹಾಂವ್ಕ್ ಗೆಲೊ. ನ್ಹಾವ್ನ್, ಪೆಜೆ ಜೆವಾಣ್ ಜೆವ್ಲೊ. ಉಪ್ರಾಂತ್ ಸೊಪ್ಯಾರ್ ಆಸ್ಲ್ಲ್ಯಾ ಇಜೀಚೆರಾರ್ ಬಸ್ಲೊ.
"ಖಂಯ್ ರಾವ್ಲ್ಲ್ಯಾತ್ರೆ ಕಾರ್ಕಳ್?" ವಿಚಾರ್ಲೆಂ ಜಿಲ್ಲಿಬಾಯೆನ್.
"ಮಾಟ್ವಾಂತ್ಚ್ ನಿದೊಂಕ್ ಥೊಡೀ ಸುವಾತ್ ಕೆಲಿ ಮಾಂಯ್. ಹಿಂವಾನ್ ತಡ್ವುಂಕ್ ಜಾಲೆಂನಾ"
"ಶೆಳ್ ಜಾಯ್ನಾತ್ಲ್ಲಿ ವ್ಹಡ್. ಕಾರ್ಕಳ್ಚೆಂ ಫೆಸ್ತ್ ಕಶೆಂ ಜಾಲೆಂ?"
"ಭಾರಿ ಗೊವ್ಜಿ. ತಿ ಸಾಂಗೊನ್ ತುದಿ ಕರ್ಚಿ ನ್ಹಂಯ್......" ಆಳ್ಸಾಯೆನ್ ಮೆಲ್ವಿನಾನ್ ಮ್ಹಳೆಂ.
"ಹಾಂವೀ ಲ್ಹಾನ್ಪಣಿಂಚೆರ್ ದೋನ್ ಪಾವ್ಟಿಂ ಕಾರ್ಕಳ್ ಫೆಸ್ತಾಕ್ ಪಾವ್ಲ್ಲಿ" ತೊ ಆದ್ಲೊ ಉಗ್ಡಾಸ್ ಕಾಡ್ತಾಲಿ, "ಪುಣ್..ತಿ ಆದ್ಲಿ ದೇವ್ -ಭಕ್ತ್, ತೊ ವಿಶ್ವಾಸ್ ಆತಾಂಚ್ಯಾ ಪಿಳ್ಗೆಕ್ ಖಂಯ್ ಆಸಾ?"
"ಎಟೊಮಿಕ್ ಏಜ್ ಮಾಂಯ್" ಹಾಸೊನ್ ಮೆಲ್ವಿನಾನ್ ಸಾಂಗ್ಲೆಂ.
"ತೆಂ ಸಗ್ಳೆಂ ಇಂಗ್ಲಿಷ್ ಶಿಕ್ಪಾನ್ ತುಮ್ಚಿ ತಕ್ಲಿ ಪಿರ್ವಾಯ್ಲ್ಯಾ ಖರಿ" ತಿ ಸಾಂಗಾಲಾಗ್ಲಿ.
"ಹಾಂವ್ ಥೊಡಿ ನೀದ್ ಕಾಡ್ತಾಂ. ಪುರಾಸಾಣ್ ಜಾಲ್ಯಾ ಮಾಂಯ್" ಆಶೆಂ ಸಾಂಗೊನ್ ತೊ ನಿದೊಂಕ್ ಗೆಲೊ. ತಾಚೆ ದೊಳೆ ವೊಳ್ತಾಲೆ. ವೆಗ್ಗಿಂಚ್ ತಾಕಾ ನೀದ್ ಪಡ್ಲಿ. ತಶೆಂ ನಿದೆಂತ್ಲೊ ಜೆವ್ಣಾಚ್ಯಾ ವೆಳಾರ್ ತೊ ಉಟ್ಲೊ.
ದನ್ಪರಾಂ ಪರ್ತ್ಯಾನ್ ಆಡ್ ಪಡ್ಲೆಲ್ಯಾ ಮೆಲ್ವಿನಾಕ್ ಸಾಂಜೆರ್ ಚ್ಯಾರಾಂಕ್ ಜಾಗ್ ಜಾಲಿ. ತೊ ನ್ಹೆಸೊನ್ ಶೀದಾ ಮಾಗ್ಗಿಬಾಯೆಗೆರ್ ಗೆಲೊ.
ತಾಕಾ ಪಳೆತಾಚ್ ಹಾಸೊನ್ ವಿಚಾರ್ಲೆಂ ಮಾಗ್ಗಿಬಾಯೆನ್ "ಓ......ಯೆ, ಯೆ ಪುತಾ. ಕೆದಾಳಾ ಆಯಿಲ್ಲೊಯ್?"
"ಹಾಂವ್ ಸಕಾಳಿಂ ಆಯಿಲ್ಲೊಂ ಮಾವ್ಶೆ" ಮೆಲ್ವಿನಾನ್ ಜಾಪ್ ದಿಲಿ.
"ಫೆಸ್ತ್ ಗೊವ್ಜಿಗಿ?" ವ್ಹಡ್ಲಿಮಾಂಯ್ನ್ ವಿಚಾರ್ಲೆಂ.
"ಕಾರ್ಕಳ್ಗಾರಾಂಕ್ ತುಮ್ಕಾಂಚ್ ಗೊತ್ತು ಆಸೊಂಕ್ಜಾಯ್. ಮ್ಹಜ್ಯಾ ಮಟ್ಟಾಕ್ ಬರೆಂಚ್ ಜಾಲೆಂ.
"ಜೆಸ್ಸಿ ಮೆಳ್ಲ್ಲೆಂಗಿ ಪುತಾ?" ಮಾಗ್ಗಿಬಾಯೆನ್ ಸವಾಲ್ ಕೆಲೆಂ.
"ವ್ಹಯ್.....ಸಾಂತೆಂತ್ ಮೆಳ್ಲ್ಲೆಂ" ಇತ್ಲೆಂ ಸಾಂಗ್ತಾನಾ ಮೆಲ್ವಿನಾಚೆಂ ಕಾಳಿಜ್ ಧಡ್ದಡ್ತಾಲೆಂ. ಕಿತ್ಯಾಕ್ ತರೀ ಆಶೆಂ ಫಟ್ ಮಾರುಂಕ್ ಜಾಯ್? ರೊಫಿನ್ಬಾಯೆನ್ ವೆಗಿಂಚ್ ಜೆಸ್ಸಿಗೆರ್ ಯೆತಾಂ ಮ್ಹಳ್ಳೆಂ. ತೆದಾಳಾ ಸಗ್ಳಿ ಖಬಾರ್ ಉಗ್ಡಾಪಿ ಜಾತೆಲಿ. ಆಪುಣ್ ತೆರೆಜ್ಬಾಯೆಚೊ ಪಿಲ್ಯಾದ್ ನಹಿಂ ಮ್ಹಣ್ ತಿಕಾ ಕಳ್ತೆಲೆಂ. ಆನಿಂ ತೆಗಾಂಯ್ ಫಟ್ಕಿರಿ ಜಾತೆಲಿಂ. ಆಶೆಂ ಫಟಿ ಮಾರ್ಚ್ಯಾ ಬದ್ಲಾಕ್ ಪಯ್ಲೆಂ ಥಾವ್ನ್ಂಚ್ ಸತ್ ಸಾಂಗ್ಲ್ಲೆಂ ಜಾಲ್ಯಾರ್ ಕಾಂಯ್ಚ್ ರಗ್ಳೆ ನಾತ್ಲ್ಲೆ. ಪುಣ್ ಸತ್ ಸಾಂಗ್ಲ್ಲೆಂ ತರ್, ರೊಫೀನ್ ಬಾಯೆಗೆರ್ ರಾವೊಂಕ್ ಪ್ರವೇಶ್ ಮೆಳ್ತೊಗಿ? ರಾತಿಂ ತ್ಯಾ ಆಂಗ್ ಹಿಂವ್ಳಾಂವ್ಚ್ಯಾ ವಾರ್ಯಾಕ್ ಇಗರ್ಜೆ ಮಾಟ್ವಾಂತ್ ನಿದ್ಚೆಂ ಪಡ್ತೆಂ.
"ಜೆಸ್ಸಿ ಬರೆಂ ಆಸಾ ಮಾವ್ಶೆ" ಥೊಡ್ಯಾ ವೆಳಾನ್ ತೊ ಮ್ಹಣಾಲೊ. "ತೆಂ ಆಮ್ಕಾಂ ರೊಫೀನ್ಬಾಯೆಗೆರ್ ಆಪೊವ್ನ್ ವ್ಹರ್ನ್ ಗೆಲ್ಲೆಂ. ರೊಫಿನ್ಬಾಯ್, ಹೆರಿ ಆನಿಂ ತೆಂ ಕರ್ನ್ ಸಾಂಗಾತಾ ಎಪ್ರಿಲಾ ಇತ್ಲ್ಯಾಕ್ ಮಂಗ್ಳೂರ್ ಯೆತಾತ್ ಖಂಯ್"
"ಹಾಂ.......ಹೆರಿ! ಹೆರಿ ಆಯ್ಲಾಗಿ? ವಿಜ್ಮಿತ್ ಜಾವ್ನ್ ತಿಣೆಂ ಸವಾಲ್ ಕೆಲೆಂ.
"ನಾ ಮಾವ್ಶೆ, ಹೆರಿ ತಾಚಿ ಪರೀಕ್ಶಾ ಜಾವ್ನ್ ಎಪ್ರಿಲಾಂತ್ ಗಾಂವಾಕ್ ಯೇಂವ್ಕ್ ಪುರೊ"
"ಯೇಂವ್ದಿ ಹಾಬಾ..... ಪರೀಕ್ಶೆಂತ್ ಪಾಸ್ ಜಾಲ್ಯಾರ್ ಪುರೊ ಚೆರ್ಕೊ. ಅಪುರ್ಬಾಯೆಚೊ ಭುರ್ಗೊ ತೊ " ಸವ್ಕಾಸ್ ತಿ ಮ್ಹಣಾಲಿ.
ಮೆಲ್ವಿನ್ ಘರಾ ವಚೊಂಕ್ ಉಟ್ಲೊ. "ಹಾಂವ್ ತರ್ ವೆತಾಂ ಮಾವ್ಶೆ. ಫಾಲ್ಯಾಂ ಪೊರ್ವಾಂ ಇತ್ಲ್ಯಾಕ್ ಯೆತಾಂ." ಮ್ಹಣೊನ್ ತೊ ಚಲ್ಲೊ.
ದೀಸ್ ತುರ್ತಾನ್ ಧಾಂವ್ತಾಲೆ. ಫೆಬ್ರವರಿ ಮಹಿನೊ ಸರೊನ್ ಮಾರ್ಚ್ ಲಾಗ್ತಾನಾ ಮೆಲ್ವಿನ್ ದೀಸ್ ಆನಿಂ ರಾತ್ ಪರೀಕ್ಶೆಚಿ ತಯಾರಾಯ್ ಕರ್ತಾಲೊ. ’ಬರೆ ಮಾರ್ಕ್ಸ್ ಜೊಡಿಜಾಯ್’ ಏಕ್ಚ್ ಉದ್ದೇಶ್ ಆಸ್ಲ್ಲೊ ತಾಚ್ಯಾ ಮತಿಂತ್.
ತಾಣೆಂ ದೀಸ್ ರಾತ್ ಶಿಕ್ಚೆಂ ಪಳೆವ್ನ್ ಬೆಜಾರ್ ಜಾತಾಲೆಂ ಆವಯ್ಕ್. "ಹೆಂ ಕಿತೆಂ ರೆ ಪುತಾ. ಏಕ್ ಘಡಿ ಬೂಕ್ ಸಕ್ಲಾ ದವ್ರುಂಕ್ ಜಾಯ್ನಾ ತುಕಾ" ತಿ ಉಲೈತಾಲಿ, "ವರ್ಸ್ ಭರ್ ಬುಕಾಂಚಿ ಖಂತ್ ನಾತ್ಲ್ಲಿ ತುಕಾ. ಆತಾಂ ಪಾವ್ಸ್ ಪಡ್ತಾನಾ ಸತ್ರಿ ಧರ್ಚೊ ವ್ಯಾಪಾರ್ ತುಜೊ"
"ತುಕಾ ಕಿತೆಂ ಕಳ್ತಾ ಮಾಂಯ್? ಪರೀಕ್ಶೆಚ್ಯಾ ವೆಳಾರ್ ಶಿಕ್ಲ್ಲೆಂ ಮತಿಂತ್ ಉರ್ತಾ. ವರ್ಸ್ಭರ್ ಶಿಕ್ಲ್ಲೆಂ ಗುಡ್ಯಾಕ್ ಚಡ್ತಾ" ಬೆಷ್ಟೆಂಚ್ ತೊ ಸಾಂಗಾಲಾಗ್ಲೊ.
"ತುಂಚ್ ಜಾಣಾಂಯ್. ತುಜ್ಯಾ ತಿತ್ಲಿಂ ಹಾಂವ್ ಶಿಕ್ಲ್ಯಾಂವೆ? ಧರ್, ಏಕ್ ಗ್ಲಾಸ್ ಚ್ಹಾ ಪಿಯೆ. ಶಿಕ್ತಾನಾ ಚ್ಹಾ ಭಾರಿ ಬರಿ...."
"ತುಂ ಏಕ್.......ಶಿಕೊಂಕ್ಯಿ ಸೊಡಿನಾಂಯ್. ಚ್ಹಾ, ಕಾಫಿ, ಮ್ಹಣ್ ಘಡಿಯೆಕ್ ಏಕ್ ಪಾವ್ಟಿಂ ಹಾಡ್ನ್ ದೀವ್ನ್ ಮ್ಹಜೆಂ ಪೊಟ್ ಪಾಡ್ ಕರ್ತಾಯ್" ತಶೆಂ ಮ್ಹಣೊನ್ ತರೀ ವೆ-ವೆಗಿ ಆವಯ್ನ್ ಹಾಡ್ಲೆಲ್ಯಾ ಚ್ಹಾ ಗ್ಲಾಸಾಕ್ ಹಾತ್ ದಿತಾಲೊ ಮೆಲ್ವಿನ್. ಜಿಲ್ಲಿಬಾಯೆಕ್ ಮತಿಂತ್ಚ್ ಹಾಸೊ ಯೆತಾಲೊ. ತಿಚೆಂ ಏಕ್ಚ್ ಮಾಗ್ಣೆ ಜಾವ್ನಾಸ್ಲ್ಲೆಂ ಪೂತ್ ಬರ್ಯಾ ಥರಾನ್ ಪಾಸ್ ಜಾಂವ್ದಿ ಮ್ಹಣ್.
"ತ್ಯಾ ವಾಟೆನ್ ಸಿಂತಿಯಿ ದೀಸ್ ರಾತ್ ವದ್ದಾಡ್ತಾಲೆಂ. ಶಿಕ್ಪಾಂತ್ ತೆಂ ಹುಶಾರ್ಚ್ ಆಸ್ಲ್ಲೆಂ. ತರೀ ವರ್ಸ್ ಭರ್ ಮಝಾ ಮಾರ್ಲ್ಲ್ಯಾಚೊ ಫಳ್ ಆತಾಂ ಪರೀಕ್ಶೆಚ್ಯಾ ವೆಳಾರ್ ಕೊಡುಚ್ ಜಾಲ್ಲೊ. ಹ್ಯಾ ಬಿತರ್ ತಾಚೊ ಆನಿಂ ಮೆಲ್ವಿನಾಚೊ ಸಂಬಂಧ್ ತಿತ್ಲ್ಯಾರ್ಚ್ ಆಸ್ಲ್ಲೊ.
ಕಾರ್ಕಳ್ ಥಾವ್ನ್ ಪಾಟಿಂ ಯೆಂವ್ಚ್ಯಾ ವೆಳಾರ್ ಜೆಸ್ಸಿನ್ ಮೆಲ್ವಿನಾಕ್ ಸಾಂಗ್ಲ್ಲೆಂ - ಸಿಂತಿಚ್ಯಾ ವಿಷ್ಯಾಂತ್ ಚಡಿತ್ ವಿಚಾರ್ ಕರುಂಕ್ ವೊಚಾನಾಕಾ ಮ್ಹಣ್. ತಾಣೆಂ ಕೆಲ್ಲೆಂ ತೆಂ ಆಕ್ರಮ್ ಜಾವ್ನ್ ಗೆಲ್ಲೆಂ. ಆತಾಂ ತ್ಯಾ ಸಂಗ್ತಿಕ್ ಶಾಶ್ವಿತ್ ಪಡ್ದೊ ಧಾಂಪ್ಚೊಚ್ ಬರೊ ಮ್ಹಣ್ ಜೆಸ್ಸಿನ್ ತಾಕಾ ಸೂಚನ್ ದಿಲ್ಲೆಂ.
ಪುಣ್ ಮೆಲ್ವಿನ್ ಸಿಂತಿಲಾಗಿಂ ವಿಚಾರ್ಚ್ಯಾ ಬಗಾರ್ ರಾಂವ್ಚೊನಾ ಮ್ಹಣ್ ಆಸ್ಲ್ಲೊ. ತಶೆಂ, ಸಬಾರ್ ದಿಸಾಂ ಉಪ್ರಾಂತ್ ಸಿಂತಿ ತಾಕಾ ಎಕ್ಸುರೆಂ ವಾಟೆರ್ ಮೆಳ್ಲ್ಲ್ಯಾ ಸಂದರ್ಭಾರ್, ಸಿಂತಿಕ್ ತಾಣೆಂ ರಾವಯ್ಲೆಂ. ಸಿಂತಿಕ್ ಮೆಲ್ವಿನಾಕ್ ಪಳೆವ್ನ್ ಕಾವ್ಜೆಣಿಂಚ್ ಬೊಗ್ಲಿ. ತೆಂ ಸುಕೊ ಹಾಸೊ ಹಾಸ್ಲೆಂ.
"ಸಿಂತಿ.....ಕಿತೆಂ ಆಪ್ರೂಪ್ ದರ್ಶನ್ ತುಜೆಂ? ಭಾರಿ ದಿಸಾಂನಿ ಪಳೆಂವ್ಕ್ ಮೆಳ್ಳೆಂಯ್!" ವೊಪಾರ್ಯಾಂನಿ ತೊ ಉಲೈಲೊ.
"ಮ್ಹಾಕಾ ವೇಳ್ಚ್ ನಾ ಮೆಲ್ವಿನ್. ಘರಾ ಮ್ಹಸ್ತ್ ಕಾಮ್ ಆಸಾ" ಆಶೆಂ ಸಾಂಗೊನ್ ತೆಂ ವ್ಹಳೂ ನಿಸ್ರೊಂಕ್ ಪಳೆತಾಲೆಂ.
"ಕಾರ್ಕಳ್ಚೆಂ ಫೆಸ್ತ್ ಕಶೆಂ ಜಾಲೆಂ? ಗೊವ್ಜಿಗಿ?"
"ಬರೆಂಚ್ ಜಾಲೆಂ....ಹಾಂವ್ ವೆತಾಂ ಮೆಲ್ವಿನ್...." ಸಿಂತಿ ದರ್ವಡ್ಲೆಂ.
"ಕಾರ್ಕಳಾಕ್ ಆಯಿಲ್ಲೊ ತುಜೊ ಇರಾದೊ ಸಂಪ್ಲೊನಾ ಸಿಂತಿ. ತುಜೆ ಟಿಕೆಟಿಚೆ ಪಯ್ಶೆ ವ್ಯರ್ಥ್ಚ್ ಜಾಲೆ"
"ಮ್ಹಳ್ಯಾರ್?" ಗಾಗೆವ್ನ್ ಮ್ಹಣಾಲೆಂ ತೆಂ.
"ದಯಾಕರ್ನ್ ಮ್ಹಜಿ ತಿ ತಸ್ವೀರ್ ಪಾಟಿಂ ದೀ ಸಿಂತಿ. ತುಕಾ ಜಾಲ್ಯಾರ್ ಮ್ಹಜಿ ಬರಿ ದುಸ್ರಿ ತಸ್ವೀರ್ ದಿತಾಂ" ಹಾಸೊನ್ಂಚ್ ಉಲೈಲೊ ಮೆಲ್ವಿನ್.
"ಮ್ಹಾಕಾ ತುಜಿ ಬಿರ್ಮೊತ್ ದಿಸ್ತಾ. ಜೆಸ್ಸಿ ತುಜ್ಯಾ ಸಾಂಗ್ಣೆಂತ್ ಬಿಲ್ಕುಲ್ ಪಾತ್ಯೆಲೆಂನಾ. ಆಮ್ಕಾಂ ವೆಗ್ಳಾಚಾರ್ ಹಾಡುಂಕ್ ತುವೆಂ ಕೆಲ್ಲೆಂ ಪ್ರಯತ್ನ್ ನಿರ್ಫಳ್ ಜಾಲೆಂ ಸಿಂತಿ. ಆನಿಂ ಮುಖಾರ್ ದಯಾಕರ್ನ್ ಆಸಲಿಂ ಬುರ್ಶಿಂ ಕಾಮಾಂ ಕರಿನಾಕಾ" ಖಡಾಖಡ್ ಉಲೈಲೊ ತೊ.
ಸಿಂತಿಚೆಂ ತೊಂಡ್ ಅಕ್ಮಾನಾನ್ ಚಿವಾಳ್ಳೆಂ. ಉಲಂವ್ಕ್ ಜೀಬ್ಯಿ ಸುಟ್ಲಿನಾ ತಾಕಾ. ತಶೆಂ ಧರ್ಣಿಕ್ ದೀಷ್ಟ್ ಲಾವ್ನ್ ತೆಂ ನಿಯಾಳ್ತಾನಾ, ತಾಚ್ಯಾ ಪಾಟಿಕ್ ಪಳೆವ್ನ್ ಹಾಸ್ಲ್ಲೊ ಮೆಲ್ವಿನ್. ತಾಚ್ಯಾ ಉಪ್ರಾಂತ್ ಸಿಂತಿ ಆನಿಂ ತಾಚೆಂ ದರ್ಶನ್ ಜಾಲ್ಲ್ಯಾ ವೆಳಾರ್ ಜಾಲ್ಲೆಂ ಸಂಭಾಷಣ್ ಉಣೆಂಚ್, ಕ್ಷೀಣ್ ಏಕ್ ಹಾಸೊ ಸಿಂತಿ ಹಾಸ್ತಾಲೆಂ. ಮೆಲ್ವಿನ್ಯಿ ಚಡಿತ್ ಸಿಂತಿಲಾಗಿಂ ಉಲೈನಾತ್ಲ್ಲೊ.
ಮೆಲ್ವಿನಾಚಿ ಪರೀಕ್ಶಾ ಆರಂಭ್ ಜಾಲ್ಲಿ. ನಿಮಾಣ್ಯಾ ವೆಳಾರ್ ತರಿ ಬರೆ ಕಷ್ಟ್ ಕಾಡ್ಲ್ಲ್ಯಾನ್ ಪರೀಕ್ಶೆಂತ್ ಬರ್ಯೊಚ್ ಜಾಪಿ ದಿಲ್ಯೊ ತಾಣೆಂ. ಮೆಲ್ವಿನಾಕ್ ಪರೀಕ್ಶಾ ಲಾಗಿಂ ಪಾವ್ಲಿ ಮ್ಹಣ್ ಕಳ್ಳೆಲ್ಯಾ ಲಾಗಾಯ್ತ್ ಜೆಸ್ಸಿನ್ ತಾಕಾ ಕಾಗಾದ್ಚ್ ಬರಂವ್ಕ್ ನಾತ್ಲ್ಲೆಂ, ಆಪ್ಣಾಚ್ಯಾ ಚಿಂತ್ನಾಂನಿ ತೊ ಲಿಸಾಂವಾಕ್ ಗಮನ್ ವರಿನಾ ಜಾಯ್ತ್ ಮ್ಹಳ್ಳ್ಯಾ ಇರಾದ್ಯಾನ್.
ನಿಮಾಣ್ಯಾ ದಿಸಾಚಿ ಪರೀಕ್ಶಾ ಜಾತಚ್ ಗಿಬ್ಬಾ ಆನಿಂ ಮೆಲ್ವಿನ್ ಕ್ಲಾಸಿಚ್ಯಾ ಭಾಯ್ರ್ ಪಡ್ಲೆ. ಕೊಲೆಜಿಚ್ಯಾ ಲೈಬ್ರರಿಂತ್ ಜೆಸ್ಸಿಚೆಂ ಕಾಗದ್ ಮೆಲ್ವಿನಾಕ್ ರಾಕೊನ್ ಆಸ್ಲ್ಲೆಂ. ದರ್ವಡ್ಯಾನ್ ಮೆಲ್ವಿನಾನ್ ತೆಂ ಉಗಡ್ಲೆಂ ಆನಿಂ ವಾಚುಂಕ್ ಪ್ರಾರಂಭ್ ಕೆಲೆಂ -
"ಮೊಗಾಚ್ಯಾ ಮೆಲ್ವಿನ್,
ತುಜ್ಯಾ ಅಧಿಕ್ ಪ್ರಿತಿಚ್ಯಾ ಜೆಸ್ಸಿನ್ ಬರಂವ್ಚೆಂ ಕಾಗದ್. ಸಬಾರ್ ದೀಸ್ ಥಾವ್ನ್ ಹಾಂವೆಂ ತುಕಾ ಕಾಗಾದ್ ಬರಂವ್ಕ್ ನಾ ಮ್ಹಣ್ ರಾಗಾರ್ ಜಾಯ್ನಾಕಾ. ಹೆಂ ಕಾಗದ್ ತುಕಾ ಮೆಳ್ತಾನಾ ತುಜಿ ಪರೀಕ್ಶಾ ಸಂಪ್ಲ್ಯಾ ಮ್ಹಣ್ ಚಿಂತ್ತಾಂ. ಆನಿಂ ಪರೀಕ್ಶೆಂತ್ ಬರ್ಯಾ ಥರಾನ್ ತುಂ ಪಾಸ್ ಜಾತೊಲೊಯ್ ಮ್ಹಣ್ ಭರ್ವಸೊ ಆಸಾ ಮ್ಹಾಕಾ.
ಡಿಯರ್, ಕಾರ್ಕಳ್ ತುಮಿಂ ಆಯಿಲ್ಲ್ಯಾ ವಿಶ್ಯಾಂತ್ ಹಾಂವೆಂ ಫಟಿ ಸಾಂಗೊಂಕ್ ನಜೊ ಆಸ್ಲ್ಲ್ಯೊ ಮ್ಹಣ್ ತುವೆಂ ಬರೈಲಾಂಯ್. ವ್ಹಯ್, ತ್ಯಾ ಬಗಾರ್ ದುಸ್ರಿ ವಾಟ್ ಮ್ಹಾಕಾ ನಾತ್ಲ್ಲಿ. ಪಯ್ಶಿಲ್ಯಾ ಗಾವಾಂತ್ ಯಾತ್ರಿಕಾಬರಿ ಇಗರ್ಜೆಚ್ಯಾ ಮಾಟ್ವಾಂತ್ ವಸ್ತಿ ಕರಿಶೆಂ ಕರುಂಕ್ ಮ್ಹಜೆಂ ಕಾಳಿಜ್ ದುಃಖ್ಲೆಂ ಮೆಲ್ವಿನ್. ಹಾಂವೆಂ ಫಟ್ ಮಾರ್ಲ್ಲಿ ನಹಿಂ ತರ್, ತುಜ್ಯಾ ಸಂಗಿ ಪಂಚ್ವೀಸ್ ವೊರಾಂ ಆಸ್ಚೆಂ ಭಾಗ್ ಮ್ಹಾಕಾ ಮೆಳ್ತೆಂಗಿ? ಹಾಂವ್ ಜಾಣಾ, ಹಿ ಫಟ್ ವೆಗಿಂಚ್ ಉಜ್ವಾಡಾಕ್ ಯೆತೆಲಿ. ಯೆಂವ್ಚ್ಯಾ ಮಹಿನ್ಯಾಂತ್ ಹೆರಿ ಗಾಂವಾಕ್ ಯೆತೊಲೊ. ರೊಫಿನ್ಬಾಯ್ ಆನಿಂ ತಾಚ್ಯಾ ಸಾಂಗಾತಾ ಹಾಂವ್ ಕೊಡಿಯಾಳ್ ಯೆತಾನಾ ಆಮ್ಚ್ಯೊ ಫಟಿ ಸಗ್ಳ್ಯೊ ಕಳ್ತೆಲ್ಯೊ. ತರೀ ತುಂ ಕಾಂಯ್ ಖಂತ್ ಕರಿನಾಕಾ. ಹಾಂವ್ ಕಶೆಂಯಿ ಪ್ರಯತ್ನ್ ಕರ್ನ್ ತಾಂಕಾಂ ಸಮಾಧಾನ್ ಕರ್ತಾಂ.
ತುಕಾ ಕ್ಲಾಸಿಕ್ ರಜಾ ಜಾಲ್ಲ್ಯಾನ್ ಮ್ಹಾಕಾ ಆನಿಂ ಕಾಗ್ದಾಂ ಬರಂವ್ಕ್ ಉಪಾಯ್ನಾ. ದೆಕುನ್ ಥೊಡೆ ದೀಸ್ ತುಂ ಮ್ಹಾಕಾ ಮಾಫ್ ಕರ್. ಸದಾಂನಿತ್ ತುಜ್ಯಾಚ್ ಉಗ್ಡಾಸಾನ್ ಹಾಂವ್ ಮ್ಹಜೊ ವೇಳ್ ಸರ್ತಾಂ. ರಿಜಾನ್ ಗಿಬ್ಬಾಕ್ ದೋನ್ ತೀನ್ ಕಾಗ್ದಾಂ ಬರೈಲ್ಲಿಂ ತಾಂಕಾಂ ಜಾಪಿ ಗಿಬ್ಬಾನ್ ದಿಲ್ಯಾತ್ ಮ್ಹಣ್ ತೆಂ ಸಾಂಗ್ತಾಲೆಂ. ಗಿಬ್ಬಾಕ್ ರೆಕಾದ್ ಪಾಟೈಲ್ಯಾತ್.
ರಿಜಾನ್ ತುಕಾ ರೆಕಾದ್ ಪಾಟೈಲ್ಯಾತ್. ಚಡಿತ್ ಬರಂವ್ಕ್ ಮ್ಹಾಕಾ ಕಾಂಯ್ಚ್ ಸುಸ್ತಾನಾ. ಮ್ಹಜೊ ಉಗ್ಡಾಸ್ ಸದಾಂಚ್ ದವರ್. ತುಂ ಪಾಸ್ ಜಾಂವ್ಕ್ ದೆವಾಲಾಗಿಂ ಮಾಗ್ತಾಂ.
ತುಜ್ಯಾ ಮೊಗಾಂತ್ ಸದಾಂ ಥಿರ್ ರಾಂವ್ಚೆಂ,
ಜೆಸ್ಸಿ,
"ಗಿಬ್ಬಾ....ಸತ್ತ್ ಸಾಂಗ್.....ತುಕಾ ರಿಜಾಚಿಂ ಕಾಗ್ದಾಂ ಆಯಿಲ್ಲಿಂಗಿನಾ?" ಮೆಲ್ವಿನಾನ್ ರಾಗಾನ್ ವಿಚಾರ್ಲೆಂ. ಗಿಬ್ಬಾಚೆಂ ತೊಂಡ್ ಸಾವ್ಳೆಲೆಂ. ದುಸ್ರ್ಯಾ ಘಡಿಯೆ ಗಾಗೆವ್ನ್ ತೊ ಮ್ಹಣಾಲೊ.
"ವ್ಹಯ್....ಪುಣ್.." ತಾಚಿಂ ಉತ್ರಾಂ ಆಖೇರ್ ಕರುಂಕ್ ಸೊಡ್ಲೆಂನಾ ಮೆಲ್ವಿನಾನ್.
"ಮ್ಹಾಕಾ ಜೆಸ್ಸಿನ್ ಬರೈಲಾಂ ಗಿಬ್ಬಾ. ಪುಣ್ ಮ್ಹಜೆ ಥಂಯ್ ವಿಶ್ವಾಸ್ ತುಕಾ ನಾತ್ಲ್ಲೊ ನಹಿಂಗಿ? ಸಾಂಗ್ ತುಂ, ಖಂಯ್ಚ್ಯಾ ಸಂಗ್ತಿಂತ್ ಹಾಂವೆ ತುಜ್ಯೆ ಥಂಯ್ ಬೇದ್ ದಾಕೈಲಾ? ಮ್ಹಜಿ ಕಸಲಿಯಿ ಘುಟಾಚಿ ಖಬಾರ್ ತುಜೆ ಥಾವ್ನ್ ಲಿಪೈಲ್ಯಾಗಿ?"
ಗಿಬ್ಬಾಕ್ ಜಾಪ್ ದೀಂವ್ಕ್ ಜಾಲೆಂನಾ. ತಾಚೆಂ ಚಿವಳ್ಳೆಲೆಂ ಮುಖ್ ಪಳೆತಾನಾ, ಮೆಲ್ವಿನಾಕ್ ಬೆಜಾರ್ ಜಾಲೆಂ - ಆಪುಣ್ ತಶೆಂ ಕಿತ್ಯಾಕ್ ಉಲೈಲೊಂಗಿ ಮ್ಹಣ್. ಕಡೇಕ್ ಗಿಬ್ಬಾ ಧರ್ಣಿಕ್ ದೀಷ್ಟ್ ಜೊಕುನ್ ಮ್ಹಣಾಲೊ, ಮೆಲ್ವಿನ್, ತುಕಾ ಸಾಂಗಾನಾತ್ಲ್ಲಿ ಮ್ಹಜಿ ಚೂಕ್ ವ್ಹಯ್. ಪುಣ್ ಸಂಗೊಂಕ್ ಮ್ಹಾಕಾ ಲಜ್ ದಿಸ್ಲಿ".
ಹಾಸ್ಲೊ ಮೆಲ್ವಿನ್. ಗಿಬ್ಬಾಚ್ಯಾ ಭುಜಾಕ್ ಹಳೂ ಥಾಪುಡ್ನ್ ತಾಣೆಂ ಸಾಂಗ್ಲೆಂ. - "ಇತ್ಲೊ ಘಾಬರ್ಲೊಯ್ ಕಿತ್ಯಾಕ್ ತುಂ? ಹಾಂವೆಂ ಭೆಷ್ಟೆಂ ತರೀ ತಶೆಂ ಮ್ಹಳೆಂ. ಮೊಗಾರ್ ಪಡ್ಲೆಲ್ಯಾಂಕ್ ಲಜ್ ಕಸಲ್ಯಾಚಿ ಗಿಬ್ಬಾ? ತೆಂ ಮೊರೊಂದಿ, ಪುನೆಗೆಲ್ಲ್ಯಾ ತುಕಾ ಕಾಗ್ದಾಂ ತರಿ ಖಂಯ್ಚ್ಯಾ ವಿಳಾಸಾಕ್ ಆಯಿಲ್ಲಿಂ?"
"ಘರ್ಚ್ಯಾಚ್ ವಿಳಾಸಾಕ್" ಗಿಬ್ಬಾನ್ ಜಾಪ್ ದಿಲಿ.
"ಹಾಂ, ಘರ್ಚ್ಯಾ ಕಳೊಂಕ್ನಾಂಗಿ?" ಮೆಲ್ವಿನ್ ವಿಜ್ಮಿತ್ ಜಾಲೊ.
ಗಿಬ್ಬಾನ್ ಹಾಸೊನ್ ಜಾಪ್ ದಿಲಿ. "ಮಾಂಯ್ - ಬಾಬ್ ಇಸ್ಕೊಲಾಕ್ಚ್ ವಚೊಂಕ್ನಾಂತ್ ತರ್ ಕಾಗ್ದಾಂ ವಾಚ್ತೆಲಿಂ ಕಶಿಂ"
"ಜಾಂವ್ದಿ, ಆಮ್ಚಿಂ ಭವಿಷ್ಯಾಚಿಂ ಕಲ್ಪನಾಂ ಸೊಡ್ನ್ ಮೆಲ್ವಿನ್ ಉಲೈಲೊ. "ಯಾ ಗಿಬ್ಬಾ, ಚಲ್ಯಾಂ ಆಮಿಂ"
ವಾಟೆರ್ ವೆತಾನಾ ಗಿಬ್ಬಾ ಮ್ಹಣಾಲೊ - "ಆದ್ಲ್ಯಾ ದಸೆಂಬ್ರಾಚ್ಯಾ ರಜೆಂತ್ ಆಮ್ಗೆರ್ ಯೆತಾಂ ಮ್ಹಣ್ ಫಟಯ್ಲೆಂಯ್. ಹ್ಯಾ ಪಾವ್ಟಿಂ.."
"ಜರೂರ್ ಯೆತಾಂ ಹಾಂವ್. ಪುಣ್ ಪಯ್ಲಿ ಸರ್ತಿ ತುಜಿ."
"ಖಂಡಿತ್ ಯೆತಾಂ. ಜೆಸ್ಸಿವಿಣೆಂ ಎಕ್ಸುರೊ ಆಸ್ಚ್ಯಾ ತುಕಾ ಸಾಂಗಾತಾಚಿ ಗರ್ಜ್ ಆಸಾ ನಹಿಂಗಿ?"
ಶೇಡಿಗುಡ್ಯಾರ್ ದೊಗೀ ವಿಂಗಡ್ಲೆಂ. ಏಕ್ ಕೊಲೆಜಿಚೆಂ ವರ್ಸ್ ಸಂಪ್ಲ್ಲೆಂ. ಮೆಲ್ವಿನಾಚ್ಯಾ ಮತಿಂತ್ ಸಗ್ಳ್ಯಾ ವರ್ಸಾಚಿಂ ಚಿಂತ್ನಾಂ ಯೆತಾಲಿಂ. ಥೊಡೊ ವೇಳ್ ಭರ್ವಶ್ಯಾನ್, ಅನ್ಯೇಕ್ ಘಡಿಯೆ ಕಾರಣ್ ನಾತ್ಲ್ಲ್ಯಾ ಭಿಯಾನ್ ತಾಚ್ಯಾ ಮತಿಂತ್ ನಾನಾಂತೆ ಆಟೆವಿಟೆ ಜಾತಾಲೆ.
ದೀಸ್ ಪಾಶಾರ್ ಜಾಲೆ. ರಜೆಚೆ ದೀಸ್ ತೆ ಮೆಲ್ವಿನಾಚ್ಯಾ ವಾಂಟ್ಯಾಕ್ ಉಬ್ಗೊಣೆಚೆಚ್ ಜಾಲ್ಲೆ. ಆನಿಂ ಥೊಡ್ಯಾ ದಿಸಾಂಬಿತರ್ ಜೆಸ್ಸಿ ಯೆತೆಲೆಂ. ತೊ ಜೆಸ್ಸಿಚ್ಯಾ ಯೆಣ್ಯಾಕ್ ಆತ್ರೆಗಾನ್ ಆಸ್ಲ್ಲೊ.
ಸಿಂತಿ ರಜಾ ಮೆಳ್ಲ್ಲಿಚ್ ಭೊಂವ್ಡೆರ್ ಘಾಟಾಕ್ ಗೆಲ್ಲೆಂ. ತಾಚೊ ಮಾವ್ಳೊ ಘಾಟಾರ್ ಕಾಫಿಯೆ ತೊಟಾಚೊ ಧನಿಕ್ ಜಾವ್ನಾಸಾಲ್ಲೊ. ಸಿಂತಿ ಘರಾಂತ್ ನಾತ್ಲ್ಲೆಂ ಮೆಲ್ವಿನಾಕ್ಯಿ ಬರೆಂಚ್ ಜಾಲೆಂ.
ಜೆಸ್ಸಿಚ್ಯಾ ಯೆಣ್ಯಾಕ್ ರಾಕೊನ್ ಆಸ್ಲ್ಲ್ಯಾ ಮೆಲ್ವಿನಾಕ್ ಚಿಂತಿನಾಸ್ತಾಂ ವೆಗಿಂಚ್ ತಾಕಾ ಪಳೆಂವ್ಕ್ ಮೆಳ್ಳೆಂ. ಮಾರ್ಚ್ ಅಖ್ರೇಕ್ ಜೆಸ್ಸಿಚಿ ವ್ಹಡ್ಲಿಮಾಂಯ್ ಮಾಂದ್ರೆಕ್ ಲಾಗ್ಲ್ಲಿ. ಖಾಣಾ- ಜೆವ್ಣಾಚಿ ರೂಚ್ ಬಂಧ್ ಜಾಲ್ಲಿ. ಕಡೇಕ್ ತಿಚಿ ಜೀಬ್ ಪಡೊನ್ ಕುಡಿಚ್ಯೊ ಶಿರೊ - ಶಿರೊ ಅಚಲ್ ಜಾವ್ನ್ ಯೆತಾನಾ, ದಾಕ್ತೆರಾಂನಿ ತಿಚಿ ವಾಂಚ್ಚಿ ಆಶಾ ಸಾಂಡ್ಲಿ. ಮಾಗ್ಗಿಬಾಯೆಚ್ಯಾ ಹಿಶಾರ್ಯಾ ಖಾಲ್ ಮೆಲ್ವಿನಾನ್ ಜೆಸ್ಸಿಕ್ ಉಟಾಉಟಿಂ ಟೆಲಿಗ್ರಾಮ್ ಧಾಡ್ಲೆಂ. ಪುಣ್ ತೆಂ ಘರಾ ಯೇವ್ನ್ ಪಾವ್ತಾನಾ, ವ್ಹಡ್ಲಿಮಾಂಯ್ಚೊ ಅತ್ಮೊ ದೆವಾಧೀನ್ ಜಾಲ್ಲೊ.
ಏಕ್ ಜೀವ್ ನಪಂಯ್ಚ್ ಜಾಲ್ಲೊ. ಭೋವ್ ಥೊಡೊ ತೇಂಪ್ ತಿ ಮಾಂದ್ರೆರ್ ಕಷ್ಟಾಲ್ಲಿ. ಭಾಗಿ ಮೊರ್ನ್ ತಿಕಾ ಮೆಳ್ಲ್ಲೆಂ. ಪುಣ್ ತಿಚ್ಯಾ ಮರಣಾನ್ ಜೆಸ್ಸಿ ಆನಿಂ ಮಾಗ್ಗಿಬಾಯೆಚ್ಯಾ ಜೀವನಾರ್ ಕಾಳೊಕ್ ಪಡ್ಲ್ಲೊ. ಮಾಗ್ಗಿಬಾಯ್ ಪಯ್ಲಿಚ್ ಪಿಡೇಸ್ತ್, ಜೆಸ್ಸಿ ಘರಾ ನಾ. ಎದೊಳ್ ಮ್ಹಣಾಸರ್ ವ್ಹಡ್ಲಿಮಾಂಯ್ ಆಸ್ತಾನಾ ತಕ್ಕಮಟ್ಟಾಕ್ ಧಾದೊಸ್ಕಾತೆನ್ ಚಲ್ಚೆಂ ಜೀವನ್ ತಾಂಚೆಂ. ಆನಿಂ ಮುಖಾರ್..... ಖಂತ್ ತಾಂಕಾಂಚ್ ನಹಿಂ, ಬಗಾರ್ ಮೆಲ್ವಿನಾಕ್ಯಿ ಉಬ್ಜಾಲ್ಲಿ.
ಮೊರ್ನಾಚ್ಯಾ ಕುಶಿನ್, ಬಸೊನ್ ರಡ್ಚ್ಯಾ ತಾಂಕಾಂ ದೊಗಾಂಕ್ ಪಳೆಂವ್ಕ್ ಜಾಲೆಂನಾ ಮೆಲ್ವಿನಾಕ್. ತೊ ಭಾಯ್ರ್ ಜ್ಯಾಲಾಂತ್ ವಚೊನ್ ಉಬೊ ರಾವ್ಲೊ. ಶೆಜ್ಸಾಮಾರಾಚೊ ಲೋಕ್ ಕುಡ್ಸಾಲ್ಲೊ. ಮೊರ್ನಾಚಿ ಜವಬ್ದಾರಿ ಮೆಲ್ವಿನಾಚ್ಯಾಚ್ ಮಾತ್ಯಾರ್ ಪಡ್ಲ್ಲಿ. ತ್ಯಾ ದೀಸ್ ಬಾಡ್ಯಾಚೆಂ ಸೈಕಲ್ ಘೆವ್ನ್ ತೊ ಹೆಣೆ ತೆಣೆ ಧಾಂವ್ಲ್ಲ್ಯಾಕ್ ಲೆಕ್ಚ್ ನಾ. ಜೆಸ್ಸಿಕ್ ಭುಜಾವಣೆಚೊ ಏಕ್ ಸಬ್ದ್ ಸಾಂಗೊಂಕ್ ಸಂದರ್ಭ್ ತಾಕಾ ಮೆಳ್ಳೊನಾ.
ಸಾಂಜೆರ್ ವ್ಹಡ್ಲಿಮಾಂಯ್ಚೆಂ ಮೊರ್ನ್ ನಿಕೆಪಿಲೆಂ. ಜಾಯ್ತೊ ಲೋಕ್ ಹಾಜರ್ ಆಸ್ಲ್ಲೊ. ಮೆಲ್ವಿನಾನ್ ಮೊರ್ನಾಕ್ ಖಾಂದ್ ಮಾರ್ಲ್ಲೊ - ಜೆಸ್ಸಿಕ್ ಥಂಯ್ ದೆಖ್ಲ್ಲೆಂ - ತಾಚೆ ದೊಳೆ ಸುಜೊನ್ ತಾಂಬ್ಡೆ ಜಾಲ್ಲೆ. ಮುಖಮಳಾರ್ ಆಸ್ಲ್ಲಿಂ ಚಿಂತ್ನಾಂ ಬಿರಾಂತೆಚಿಂ. ತೆಂ ರಡ್ತಾನಾ ಮೆಲ್ವಿನಾಚೆಂ ಕಾಳಿಜ್ಯಿ ಕೊಸಾಳ್ಳೆಲೆಂ.
ಮೊರ್ನ್ ಮಾತಿಯೆಕ್ ಪಾಯ್ತಚ್ ತೊ ಜೆಸ್ಸಿಗೆರ್ ಆಯಿಲ್ಲೊ. ಭುಜಾವಣ್ ದೀಂವ್ಕ್ ಆಯಿಲ್ಲೊ ಲೋಕ್ ಎಕೆಕ್ಲೊಚ್ ನಿಕಾಳ್ಳೊ. ನಿಮಾಣೆಂ ತೊ ಎಕ್ಲೊ ಮಾತ್ರ್ ಉರ್ಲ್ಲೊ. ತಾಂಕಾಂ ದೊಗಾಂಕ್ ಕಿತೆಂ ಮ್ಹಣ್ ಭುಜೈತಾಲೊ ತೊ? ತರೀ ಕಷ್ಟಾಂನಿ ಜೆಸ್ಸಿಚ್ಯಾ ಆವಯ್ಕ್ ಪಳೆವ್ನ್ ತಾಣೆಂ ಸಾಂಗ್ಲೆಂ - "ಮಾವ್ಶೆಂ, ರಡಾನಾಕಾ. ಸರ್ಲ್ಲೊ ಜೀವ್ ಆಮಿಂ ರಡ್ಲ್ಯಾರ್ ಕಾಂಯ್ ಪಾಟಿಂ ಯೇನಾ" ಪುಣ್ ಹಿಂ ಉತ್ರಾಂ ಸಾಂಗ್ತಾನಾ ತಾಕಾಚ್ ರಡೊಂಕ್ ಆಯಿಲ್ಲೆಂ.
"ಪುತಾ, ಆನಿಂ ಆಮ್ಕಾಂ ಕೋಣ್ ಆಧಾರ್?" ತಿ ಭುರ್ಗ್ಯಾಂಪರಿ ರಡ್ತಾಲಿ.
"ಪುಣ್ ದೆವಾಕ್ ತಿಚೊ ಅತ್ಮೊ ಜಾಯ್ ಆಸ್ಲ್ಲೊ ಮಾವ್ಶೆ. ವೆಚ್ಯಾ ಜಿವಾಕ್ ಆಡಾಂವ್ಕ್ ಮನಿಸ್ ಸಕ್ತಾವೆ? ಜಲ್ಮಾಲ್ಲ್ಯಾ ಹರ್ಯೇಕಾ ಮನ್ಶಾಕ್ ಮರಣ್ ಚುಕ್ಲ್ಲೆಂ ನಾ. ಆಮಿಂ ಖಂತ್ ಕರ್ನ್ ಕಾಂಯ್ಚ್ ಪ್ರಯೋಜನ್ ನಾ"
ಸಬಾರ್ ವೇಳ್ ಆಸೊಚ್ ಬಸ್ಲೊ ತೊ ತಾಂಕಾಂ ಭುಜಾವಣ್ ದೀವ್ನ್. ನಿಮಾಣೆಂ ಮಾಗ್ಗಿಬಾಯ್ ಬಿತರ್ ವಚೊನ್ ಹಾಂತುಳ್ಣಾರ್ ಆಡ್ ಪಡ್ಲಿ. ಜೆಸ್ಸಿಲಾಗಿಂ ಉಲೊಂವ್ಕ್ ಮೆಲ್ವಿನಾಕ್ ಏಕ್ ಸಂದರ್ಭ್ ಮೆಳ್ಳೊ.
"ಜೆಸ್ಸಿ...." ಮೊವಾಳಾಯೆನ್ ತಾಣೆಂ ಉಲೊ ಕೆಲೆಂ.
"ಮೆಲ್ವಿನ್ ತುಕಾ ಮ್ಹಸ್ತ್ ವಾಂವ್ಟ್ ಜಾಲ್ಯಾ ಆಜ್. ವಚ್ ತುಂ, ಘರಾ ವಚೊನ್ ವಿಶ್ರಾಂತ್ ಘೆ. ಹಾಂವ್ ತುಕಾ ಫಾಲ್ಯಾಂ ಮೆಳ್ತಾಂ"
"ಖಂತ್ ಕರಿನಾಕಾ ಜೆಸ್ಸಿ. ರಡೊನ್ ಜೀವ್ ಪಿಡ್ಡ್ಯಾರ್ ಕರಿನಾಕಾ.." ಆಶೆಂ ನಿಮಾಣೆಂ ಸಾಂಗೊನ್ ತೊ ಘರಾ ಚಲ್ಲೊ.
ಜೆಸ್ಸಿಕ್ ಖಂತ್ ಕರಿನಾಕಾ ಮ್ಹಣ್ ಭುಜವ್ನ್ ಗೆಲ್ಲ್ಯಾ ಮೆಲ್ವಿನಾಕ್, ಖಂತಿನ್ ರಾತಿ ಸಬಾರ್ ವೇಳ್ ಪರ್ಯಾಂತ್ ನೀದ್ಚ್ ಪಡೊಂಕ್ ನಾ. ’ಮುಖಾರ್ ಕಿತೆಂ ವಾಟ್? ಆವಯ್ಕ್ ಸೊಡ್ನ್ ಜೆಸ್ಸಿಕ್ ಕಾರ್ಕಳ್ ರಾವೊಂಕ್ ಜಾಯ್ನಾ. ತೆಂ ಕೊಡಿಯಾಳ್ ಯೇತ್ಗಿ? ಆಯ್ಲೆಂ ತರ್, ತಾಕಾ ಹಾಂಗಾಸರ್ ಕಾಮ್ ಮೆಳಾತ್ಗಿ? ಎಕಾ ವೆಳಾರ್ ಮಾಗ್ಗಿಬಾಯ್ ಕಾರ್ಕಳಾಕ್ ವಚಾತ್ ಜಾಲ್ಯಾರ್.....ಜೆಸ್ಸಿಚೊ ಸಾಂಗಾಂತ್ ಆಪ್ಣಾಕ್ ಚುಕ್ತಾಲೊ. ಹಾ, ದೆವಾ....ಜೆಸ್ಸಿವಿಣೆಂ ಹಾಂವೆಂ ಕಶೆಂ ಜಿಯೆಂವ್ಚೆಂ?’ ಮೆಲ್ವಿನಾಕ್ ರಡೊಂಕ್ ಆಯ್ಲೆಂ. ಕಿತೆಂ ಕಿತೆಂ ಚಿಂತ್ಲ್ಯಾರಿ ನಿರಾಸಾಚ್ ತಾಕಾ ದಿಸ್ತಾಲಿ. ಮುಖಾರ್ ಸರೊಂಕ್ ವಾಟ್ಚ್ ನಾತ್ಲ್ಲಿ ತಾಕಾ. ಮೆಲ್ವಿನಾಕ್ ತಕ್ಲೆ ಪೊಡಾಪಡ್ ಪ್ರಾರಂಭ್ ಜಾಲಿ. ನಿಮಾಣೆಂ ಕೆದಾಳಾ ದೊಳೊ ಆಡ್ ಜಾಲೊ ತೊ ನೆಣಾ. ಪುಣ್ ಸಕಾಳಿಂ ಬೋವ್ ವೇಳ್ ಕರ್ನ್ ತಾಕಾ ಜಾಗ್ ಜಾತಾನಾ, ತಾಚ್ಯಾ ಜೀವಾಂತ್ ಮರ್ಕ್ ಸಂಕಡ್ಶೆಂ ಬೊಗ್ತಾಲೆಂ. ದೊಳೆ ಲಾಸ್ತಾಲೆ.
"ಮೆಲ್ವಿ, ಅನಿಕೀ ಉಟೊಂಕ್ ನಾಂಯ್ವೆ ಆಳ್ಸಾಯ್ ಸುಟೊಂಕ್ ನಾ ತುಜಿ. ವೊರಾಂ ಆಟ್ ಜಾಲಿಂ. ಚೆಡ್ಯಾಕ್ ಕುಂಭಕರ್ಣಾಚಿ ನೀದ್ ಲಾಗ್ಲ್ಯಾ. " ಆವಯ್ನ್ ಪುರ್ಪುರ್ಚೆಂ ತಾಕಾ ಆಯ್ಕಾಲೆಂ. ತುಕಾ ಜಾಪ್ ದೀನಾಸ್ತಾಂ ತೊ ವೊಗೊಚ್ ರಾವ್ಲೊ.
"ಆರೇ, ಚೆಡ್ಯಾಕ್ ಜಾಲಾಂ ಕಿತೆಂ, ಹಾಬಾ ತುಜ್ಯಾ ಚರ್ಬೆ" ಆಶೆಂ ಉಲೈತ್ತ್ ತಿ ಮೆಲ್ವಿನಾಚ್ಯಾ ಕುಡಾಕ್ ಆಯ್ಲಿ. ಪುತಾಚೆಂ ತೊಂಡ್ ಪಳೆತಾನಾ ತಿ ಆಕಾಂತಾನ್ ವೊಗಿ ಜಾಲಿ.
"ಕಿತೆಂ ಹುಶಾರ್ ನಾಂಯ್ರೆ ಪುತಾ?" ಆಶೆಂ ಮ್ಹಣೊನ್ ಪುತಾಚ್ಯಾ ಕಪಾಲಾರ್ ತಿಣೆಂ ಹಾತ್ ದವರ್ಲೊ. ತಕ್ಷಣ್ ಹಾಳ್ವಾಯೆಚೊ ಉದ್ಗಾರ್ ಸೊಡ್ನ್ ತಿ ಮ್ಹಣಾಲಿ - "ತಾಪ್ ಆಸಾಮೂ! ನಿದೆ ಪುತಾ. ಹಾಂವ್ ಕಷಾಯ್ ಕರ್ನ್ ಹಾಡ್ತಾಂ"
ವೆಗಿಂ ವೆಗಿಂ ತಿಣೆಂ ಕಸಲ್ಯಾಗಿ ಆಲ್ಯಾಪಾಲ್ಯಾಚೊ ಕಷಾಯ್ ತಯಾರ್ಸಿಲೊ. ಮೆಲ್ವಿನ್ ಕಷಾಯ್ ಪಿಯೆತಾನಾ ತಿ ಸಾಂಗಾಲಾಗ್ಲಿ - ಸಕಾಳಿಂ ತುವೆಂ ಜೆಂವ್ಚೆ ನಾಕಾ. ಹಾಂವ್ ತುಕಾ ಆರೂಟ್ ಕಡೊವ್ನ್ ದಿತಾ. ತುಂ ಆಜ್ ಹಾಂತುಳ್ಣಾ ವಯ್ಲೊ ಉಟಾನಾಕಾ. ಹಿ ಕಾಲ್ಚಿ ಪುರಾಸಾಣ್ ನಹಿಂ, ಏಕ್ ಘಡಿ ಕಾಲ್ ತುಂ ಘರಾಂತ್ ಆಸ್ಲ್ಲೊಯ್ವೆ? ಮೊರ್ನಾಚಿ ತಯಾರಾಯ್ ಕರುಂಕ್ ತುಂ ಕಸೊ ಪಾವ್ಲೊಯ್ ದೇವ್ ಜಾಣಾಂ. ಆದಿಂ ಥಾವ್ನ್ ತುಕಾ ವಳ್ಕಿಚಿಂವೆ ತಿಂ?"
"ವಳೊಕ್ ನಾ, ಮ್ಹಣ್ ಎಕಾಮೆಕಾಚ್ಯಾ ಗರ್ಜಾ - ಆಕಾಂತಾಂಕ್ ಪಾಂವ್ಚೆಂ ನಾಕಾಗಿ ಮಾಂಯ್? ತಿಂ ಉರ್ವಾ ಯೇವ್ನ್ ಥೊಡೆಚ್ ಮಹಿನೆ ಜಾಲೆ. ದಾದ್ಲೊ ನಾತ್ಲ್ಲ್ಯಾ ತಾಂಚ್ಯಾ ಘರಾ, ಗರ್ಜೆಕ್ ಕೊಣೆಂ ತರೀ ಪಾವೊಂಕ್ ಜಾಯ್ ನಹಿಂಗಿ?"
"ತುಂ ಗೆಲ್ಲ್ಯಾಂತ್ ಚೂಕ್ ಮ್ಹಣಾನಾಂರೆ ಪುತಾ, ಹಾಂವ್. ಪುಣ್ ಆಶೆಂಚ್ ತುಂ ಪುರಾಸಾಣ್ ಕರ್ನ್ ಕಾಣ್ಘೆವ್ನ್, ನಿದ್ಶಿ ಜಾಲ್ಯಾರ್ ಫಾಲ್ಯಾಂ ಸಕಾಳಿಂ ತುಕಾ ಪಳೈಜಾಯ್ ಆನಿಂ ಚಾಕ್ರಿ ಕರಿಜಾಯ್ ಹಾಂವೆಂ ನಹಿಂವೆ?"
ಮೆಲ್ವಿನಾನ್ ಹಾಸೊನ್ ಮ್ಹಳೆಂ, "ಸಕ್ಕಡ್ ಆವಯಾಂಕ್ ಭುರ್ಗ್ಯಾಂಚಿ ಚಾಕ್ರಿ ಕರ್ಚೆಂ ಭಾಗ್ ಮೆಳಾನಾ ಮಾಂಯ್. ತುಕಾ ತೆಂ ಭಾಗ್ ದೆವಾನ್ ಫಾವೊ ಕೆಲ್ಲ್ಯಾಕ್, ತಾಕಾ ಅರ್ಗಾಂ ದಿ"
"ಪುರೊ ಕಾನೂನಾಂ. ಆತಾಂ ವೊಗೊಚ್ ನಿದೆ" ಆಶೆಂ ಮ್ಹಣೊನ್ ತಿ ಚಲ್ಲಿ.
ಜಿಬೆಕ್ ರೂಚ್ ನಾತ್ಲ್ಲಿ ತರೀ, ದನ್ಪಾರಾಂ ಥೊಡೆಂ ಜೆವ್ಲೊ ಮೆಲ್ವಿನ್. ಆವಯ್ಚ್ಯಾ ಕಷಾಯಾಚ್ಯಾ ಬಳಾನ್ಗಿ, ವ ಘೆತ್ಲ್ಲ್ಯಾ ವಿಶೆವಾಚ್ಯಾ ಫಳಾನ್ಗಿ ಸಾಂಜ್ ಜಾತಾನಾ ತಾಚೊ ತಾಪ್ ಪರಿಪುರ್ಣ್ ರಾವ್ಲ್ಲೊ. ಜೆಸ್ಸಿನ್ ತಾಕಾ ಸಾಂಜೆರ್ ಮೆಳ್ತಾ ಮ್ಹಳ್ಳೆಂ. ಖಂಯ್, ತೊಚ್ ನೆಣಾಸ್ಲೊ. ತಾ ಮ್ಹಳ್ಳ್ಯಾ ದುಬಾವಾನ್ ತೊ ವ್ಹಳೂ ನೆಸ್ಲೊ. ಚಿಂತ್ಲ್ಲ್ಯಾಬರಿ ಮೆಲ್ವಿನಾಕ್ ಪಳೆಲ್ಲೆಂಚ್ ದೆಂಕ್ಣೊ ಮಾರ್ನ್ ತಿಣೆ ವಿಚಾರ್ಲೆಂ "ಖಂಯ್ ವೆತಾಯ್ರೆ ತುಂ?"
"ಚಿಕ್ಕೆ ಭಂವೊನ್ ಯೆತಾಂ ಮಾಂಯ್. ನಿದೊನ್ ಪಿಶ್ಯಾಬರಿ ಜಾಲೆಂ"
"ತಾಪಾಚೊ ಭುರ್ಗೊ ತುಂ. ಭಂವ್ಡಿರೆಂ ಮೆಲ್ವಿ ತುಕಾ? ಬಾಪುಯ್ ತುಜೊ ಕಿತೆಂ ಸಾಂಗೊನ್ ಗೆಲಾ ಜಾಣಾಂಯ್ವೆ ’ಹಾಂತುಳ್ಣಾ ವಯ್ಲೆಂ ಉಟೊಂಕ್ ಸೊಡ್ನಾಕಾ’ ಮ್ಹಣ್. ವಾರ್ಯಾಕ್ ಪಿಡಾ ಚಡ್ ಕರ್ನ್ ಘೆತಾಯ್ಗಿ?"
"ಮಾಂಯ್, ಮ್ಹಜ್ಯಾ ತಕ್ಲೆರ್ ಹಾತ್ ದವರ್ನ್ ಪಳೆ - ತಾಪ್ ನಾಂಚ್. ಹಿ ಪಿಡಾ ನಹಿಂ ಮಾಂಯ್, ಬರೆಂ ಪುರಾಸಾಣ್.." ಆಶೆಂ ಆವಯ್ಕ್ ಸಾಂಗೊನ್ ತೊ ಘರಾ ಭಾಯ್ರ್ ಪಡ್ಲೊ.
ಜೆಸ್ಸಿಚೆಂ ಘರ್ ಉತರ್ತಾನಾ ತಾಚಿ ಝಳಕ್ ದಿಸ್ಲಿನಾ ತಾಕಾ. ಮೆಲ್ವಿನಾಕ್ ಕಿತೆಂ ಕರ್ಚೆಂ ಕಳ್ಳೆಂನಾ. ತಶೆಂಚ್ ತೊ ಮುಖಾರ್ಸುನ್ ಗೆಲೊ ಆನಿಂ ಬತ್ತೇರಿಲಗಿಂ ಯೇವ್ನ್ ಪಾವ್ಲೊ. ಸರ್ಶಿಲ್ಯಾ ಎಕಾ ಖಡ್ಪಾರ್ ಬಸೊನ್ ನ್ಹಂಯ್ಚ್ಯಾ ತಡಿರ್ ಖೆಳ್ಚಿಂ ತಿಂ ಲಾರಾಂ ಪಳೆತಾಲೊ. ತಾಚ್ಯಾ ಮತಿಂತ್ಲಿ ಬೆಜಾರಾಯ್ ಆನಿಕೀ ಪಯ್ಸ್ ಸರೊಂಕ್ ನಾತ್ಲ್ಲಿ. ಥೊಡ್ಯಾ ವೆಳಾ ಉಪ್ರಾಂತ್ ಪಾಟ್ಲ್ಯಾನ್ ಥಾವ್ನ್ "ಮೆಲ್ವಿನ್.." ಮ್ಹಳ್ಳೊ ತಾಳೊ ಆಯ್ಕಾಲೊ. ಜೆಸ್ಸಿಚೊ ತೊ ತಾಳೊ ತಾಕಾ ಕಳ್ಳೊ. ಪುಣ್ ತ್ಯಾ ತಾಳ್ಯಾಂತ್ ಆಸ್ಲ್ಲೆಂ ಆಪಾರ್ ದುಃಖ್ ಸಮ್ಜೊನ್ ಎಕಾಚ್ಚಾಣೆಂ ಘುಂವ್ಲೊ ಮೆಲ್ವಿನ್. ಜೆಸ್ಸಿ ರಡ್ತಾಲೆಂ
"ಜೆಸ್ಸಿ...." ಗಾಗೆವ್ನ್ ತೊ ಉಲೈಲೊ.
"ಬತ್ತೇರಿಚೆರ್ ಬಸ್ಯಾಂ ಮೆಲ್ವಿನ್. ಯೆ.." ತೆಂ ಮುಖಾರ್ ಗೆಲೆಂ. ಬೊಂಬ್ಯಾಬರಿ ಮೆಲ್ವಿನ್ ತಾಚೊ ಪಾಟ್ಲಾವ್ ಕರ್ನ್ ಗೆಲೊ.
"ಜೆಸ್ಸಿ ರಡ್ತಾಯ್ ಕಿತ್ಯಾಕ್?" ತಾಣೆಂ ವಿಚಾರ್ಲೆಂ.
"ಹಾಂವ್ ರಡೊಂಕ್ಚ್ ಹ್ಯಾ ಸಂಸಾರಾಂತ್ ಜಲ್ಮಲ್ಲ್ಯಾಂ" ನಿರಾಶಿಚೆಂ ಸಬ್ದ್ ತಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಪಡ್ಲೆ. ಮೆಲ್ವಿನಾಚ್ಯಾ ಕಾನ್ಸುಲಾಕ್ ವ್ಹಾಜೆಲ್ಲ್ಯಾಬರಿ ಜಾಲೆಂ. ದುಸ್ರ್ಯಾ ಘಡಿಯೆ ಕಳ್ವಳೊನ್ ತೊ ಮ್ಹಣಾಲೊ "ಜೆಸ್ಸಿ, ವ್ಹಡ್ಲಿಮಾಂಯ್ ಸರ್ಲಿ ದೆಕುನ್..."
"ತಿ ಸರ್ಲಿ ತಿ ಖರಿ. ತಿಚ್ಯಾ ಖಾತಿರ್ ಚಡಿತ್ ಹಾಂವ್ ರಡಾನಾ.ಪುಣ್..."
ವಿಜ್ಮಿತ್ ಜಾವ್ನ್ ಮೆಲ್ವಿನ್ ಮ್ಹಣಾಲೊ, "ಪುಣ್ ....ಪುಣ್ ಕಿತ್ಯಾಕ್? ತುಜೆಥಂಯ್ ಕಿತೆಂ ವಾಯ್ಟ್ ಘಡ್ಲೆಂ..?"
ಜೆಸ್ಸಿನ್ ಜಾಪ್ ದಿಲಿನಾ. ತೆಂ ಸುಸ್ಕಾರೊನ್ ರಡ್ಲೆಂ. ಮೆಲ್ವಿನಾಕ್ ಮಿಸ್ತೆರ್ ಕಠಿಣ್ ಜಾಲೊ. ತಾಚೆಂ ಕಾಳಿಜ್ ಕಾಂಪ್ಲೆಂ. ಆಪ್ಣಾ ಥಾವ್ನ್ ಜೆಸ್ಸಿಕ್ ಕಾಂಯ್ ತರೀ ವಾಯ್ಟ್ ಘಡ್ಲಾಂ? ನಹಿಂ ತರ್ ತೆಂ ಹ್ಯಾ ಪರಿಂ ರಡ್ತಾ ಕಿತ್ಯಾಕ್?
"ಜೆಸ್ಸಿ, ತುಜೆಂ ರಡ್ಣೆಂ ಮ್ಹಾಕಾ ಸಮ್ಜಾನಾ" ಬಾರಾಧಿಕ್ ತಾಳ್ಯಾನ್ ತೊ ಉಲೈಲೊ. ತಾಚ್ಯಾ ಗಳ್ಯಾಚೊ ಶಿರೊ ಪುಗೊನ್ ಆಯಿಲ್ಲ್ಯಾನ್ ತಾಳೊ ಸುಟ್ಲೊನಾ. ವದ್ದಾಡೊನ್ ತಾಣೆಂ ಮುಖಾರ್ಸಿಲೆಂ. "ಹಾಂವೆಂ ತುಕಾ ಕಾಂಯ್ ದುಕೈಲಾಂಗಿ ಜೆಸ್ಸಿ?"
ದುಃಖಾಂ ಭರ್ಲ್ಲಿ ದೀಷ್ಟ್ ಮೆಲ್ವಿನಾಚೆರ್ ಫಾಂಕ್ಲಿ ಜೆಸ್ಸಿನ್. "ನಾ....ನಾ ಮೆಲ್ವಿನ್, ತುವೆಂ ಮ್ಹಾಕಾ ಕಾಂಯ್ಚ್ ದುಕೊಂವ್ಕ್ ನಾಂಯ್. ಹಾಂವೆಂ ಜಲ್ಮೊಂಕ್ಚ್ ನಜೊ ಆಸ್ಲ್ಲೆಂ. ಹಾಂವ್ ಪಾತ್ಕಿ.....ಪಾತ್ಕಿ......."
ಆತಾಂ ನಿಜಾಕೀ ಮೆಲ್ವಿನಾಕ್ ತೊಣ್ಕ್ಯಾನ್ ಮಾರ್ಲ್ಲ್ಯಾಬರಿ ಬೊಗ್ಲೆಂ. ತಾಚೆಂ ಸಿಂತಿದ್ ಸಂಪೂರ್ಣ್ ಘುಂವ್ಲೆಂ. ತೆಂ ಆಶೆಂ ಉಲೊಂವ್ಕ್ ಕಾರಣ್? ಆಪ್ಶೆಂಚ್ ತಾಚ್ಯಾ ದೊಳ್ಯಾಂತ್ಲ್ಯಾನ್ ದುಃಖಾಂ ಪಾಜಾರ್ಲಿಂ. ತಕ್ಶಣ್ ತೊ ಉಟ್ಲೊ. "ಜೆಸ್ಸಿ, ಹಿಂ ಉತ್ರಾಂ ತುಂ ಕಿತ್ಯಾಕ್ ಸಾಂಗ್ತಾಯ್ ಹಾಂವ್ ನೆಣಾ. ಪುಣ್ ಹೆಂಚ್ ಸಾಂಗ್ಚ್ಯಾ ಖಾತಿರ್ ತುವೆಂ ಮ್ಹಾಕಾ ಆಜ್ ಆಪಯಿಲ್ಲೆಂಯ್ ದಿಸ್ತಾ. ಬರೆಂ ಹಾಂವ್ ತರ್ ಚಲ್ತಾಂ..." ದೋನ್ ಮೆಟಾಂ ಕಾಡ್ಲಿಂ ತಾಣೆಂ ಮುಖಾರ್ ವಚೊಂಕ್.
"ಮೆಲ್ವಿನ್ ರಾವ್...." ಕಾಳಿಜ್ಚ್ ವಯ್ರ್ ಆಯಿಲ್ಲ್ಯಾಬರಿ ಉಲೈಲೆಂ ಜೆಸ್ಸಿ. ಮೆಲ್ವಿನಾಕ್ ವೆಚೆಂಗಿ, ರಾಂವ್ಚೆಂ ತೆಂ ಕಳ್ಳೆಂನಾ.."
"ಮ್ಹಜೆರ್ ರಾಗ್ ಆಯ್ಲೊಗಿ ಮೆಲ್ವಿನ್? ಮ್ಹಾಕಾ ಪಳೆ..." ಜೆಸ್ಸಿಚ್ ಉಲೈಲೆಂ.
ಮೆಲ್ವಿನಾನ್ ನಾಕ್ ಪಿಳ್ಳೆಂ. ಜೆಸ್ಸಿಕ್ ಪಾಟ್ ಕರ್ನ್ಂಚ್ ತೊ ಮ್ಹಣಾಲೊ - "ತುವೆಂ ರಡ್ಚೆಂ ಜಾಲ್ಯಾರ್ ಹಾಂವ್ ತುಜೆಲಾಗಿಂ ಉಲೈನಾ, ತುಕಾ ಪಳೆನಾ ಜೆಸ್ಸಿ.."
ಸಬಾರ್ ವೆಳಾ ಉಪ್ರಾಂತ್ ತಾಚಿ ಜಾಪ್ ಆಯ್ಲಿ "ನಾ ಹಾಂವ್ ರಡಾನಾ..... ಪಳೆ ಮೆಲ್ವಿನ್, ಹಾಂವ್ ಆತಾಂ ಹಾಸ್ತಾಂ"
ಮೆಲ್ವಿನ್ ಘುಂವ್ಲೊ. ಬಲತ್ಕಾರಾಚ್ಯೊ ಹಾಸೊ ಜೆಸ್ಸಿಚ್ಯಾ ತೊಂಡಾರ್ ಆಸ್ಚೊ ತಾಣೆಂ ಪಳೆಲೆಂ.
"ಜೆಸ್ಸಿ, ತುಕಾ ಆಜ್ ಜಾಲಾಂ ಜಾಲ್ಯಾರೀ ಕಿತೆಂ?" ತಡ್ವುಂಕ್ ಸಕಾನಾಸ್ತಾಂ ವಿಚಾರ್ಲೆಂ ಮೆಲ್ವಿನಾನ್.
ಆಪ್ಲಿಂ ಭೊಗ್ಣಾಂ ಲಿಪೊವ್ನ್ ತೆಂ ಮ್ಹಣಾಲೆಂ "ಮ್ಹಾಕಾ ಕಾಂಯ್ ಜಾಂವ್ಕ್ ನಾ, ತುಜೆಲಾಗಿಂ ಥೊಡೆ ಉಲಂವ್ಕ್ ಆಸಾ. ಬಸ್....." ಮೆಲ್ವಿನ್ ತಾಚ್ಯಾ ಕುಶಿನ್ ಬಸ್ಲೊ.
"ತುಂ ಘಾಬಾರ್ಲಾಯ್ ಹಾಂವ್ ಜಾಣಾಂ. "ಜೆಸ್ಸಿನ್ ಮುಖಾರ್ಸಿಲೆಂ" ಪುಣ್ ತುಂ ನೆಣಾಂಯ್ ಹಾಂವ್ ಕಿತ್ಲಿಂ ನಿರ್ಭಾಗಿ ಮ್ಹಣ್...." ತಾಣೆಂ ರಡೊಂಕ್ ಪ್ರಾರಂಭ್ ಕೆಲೆಂ.
"ತು ರಡ್ಶಿ ಜಾಲ್ಯಾರ್..." ಮೆಲ್ವಿನ್ ಉಟ್ಲೊ.
ವೆವೆಗಿಂ ತುವಾಲ್ಯಾನ್ ದುಃಖಾಂ ಪುಸುನ್ ತೆಂ ಮ್ಹಣಾಲೆಂ -"ನಾ, ಬಿಲ್ಕುಲ್ ಹಾಂವ್ ರಡಾನಾ ಮೆಲ್ವಿನ್. ಹಾಂವ್ ಜಾಣಾ ಮ್ಹಜ್ಯಾ ರಡ್ಣ್ಯಾನ್ ತುಕಾ ದುಃಖ್ ಭಗ್ತಾ ಮ್ಹಣ್. ಹಾಂವ್ ಬಿಲ್ಕುಲ್ ರಡಾಶಿನಾ. ಆನಿಂ ತುಂಯ್ ರಡಾನಾಕಾ."
"ಕಿತೆಂ ಘಡ್ಲೆಂ ತೆಂ ಸುಡಾಳ್ ಸಾಂಗ್ ಜೆಸ್ಸಿ. ಮ್ಹಾಕಾ ಕಳ್ವಳ್ಯಾಂಕ್ ಕಿತ್ಯಾಕ್ ಕಾರಣ್ ದಿತಾಯ್?" ಮೆಲ್ವಿನಾನ್ ವಿಚಾರ್ಲೆಂ.
"ಮೆಲ್ವಿನ್ ಆಯ್ಕ್, ಆಜ್ ಆತಾಂ ಹಾಂವ್ ಹಾಸ್ಲ್ಲೊ ಹಾಸೊ ಮ್ಹಜ್ಯಾ ಜಿಣಿಯೆಂತ್ಲೊ ನಿಮಾಣೊ ಜಾವ್ಯೆತ್. ಮ್ಹಜ್ಯಾ ನಶಿಬಾಂತ್ ದುಃಖ್ಚ್ ಮ್ಹಾಕಾ ಭೊಗೆಲಾಂ. ಸಾಂಗ್ತಾ... ಕಾಲ್ ಸಾಂಜೆರ್ಚ್ ರೊಫಿನ್ಬಾಯ್ ಆನಿಂ ರಿಜಾ ಆಮ್ಗೆರ್ ಯೇವ್ನ್ ಪಾವ್ಲ್ಯಾಂತ್."
"ಓ....ರೊಫಿನ್ಬಾಯ್? ತುವೆಂ ಮಾರ್ಲ್ಲ್ಯೊ ಫಟಿ ಮ್ಹಣ್ ತಿಕಾ ಕಳ್ಳೆಂ ಆಸ್ತೆಲೆಂ. ದೆಕುನ್ಂಚ್ಗಿ ರಡ್ತಾಲೆಂಯ್?"
"ಫಟ್..... ತಿ ಏಕ್ಚ್ ನಹಿಂ ಮೆಲ್ವಿನ್. ಆಮ್ಚೆಂ ಜೀವನ್ಂಚ್ ಫಟ್ ಜಾಂವ್ಕ್ ಪಾವ್ಲಾಂ. ತ್ಯಾ ದಿಸಾ ಕಾರ್ಕಳ್ ತುವೆಂ ಮ್ಹಾಕಾ ಸಾಂಗ್ಲ್ಲೆಂ ಸ್ವಪಾಣ್ ಏಕ್ ಫಟ್ ಜಾಂವ್ಕ್ ಪಾವ್ಲಾಂ. ಹಾಂವ್.....ಹಾಂವ್.... ಮೊರ್ತಾ ಮೆಲ್ವಿನ್" ತಾಣೆಂ ಹಾತಾಂನಿ ಆಪ್ಲೆಂ ಮುಖಮಳ್ ಲಿಪೈಲೆಂ.
[ಆನಿಂ ತ್ಯಾ ಸಾಂಜೆಚ್ಯಾ ವೆಳಾರ್ ಜೆಸ್ಸಿ ಹಾಡ್ನ್ ಆಯಿಲ್ಲೆಂ ಏಕ್ ಕಠೋರ್ ವರ್ದಿ. ವಿಧಿಚೊ ಕ್ರ್ಯೂರ್ ಹಾತ್ ತಾಂಚ್ಯಾ ಜಿಣಿಯೆಂತ್ ಆಸೊ ಖೆಳಾತ್ ಮ್ಹಣ್ ದೊಗಾಂಯ್ ನೆಣಾಸ್ಲ್ಲಿಂ. ನಿರಾಶಾ, ವಿಳಾಪ್ ಆನಿಂ ಕರ್ಕರೆಂ...ಹೆಂಚ್ ತಾಂಚ್ಯಾ ನಶಿಬಾಂತ್ ಬರೈಲ್ಲೆಂಗಿ? ಯೆಂವ್ಚ್ಯಾ ಅಂಕ್ಯಾಂತ್ ತುಮ್ಚ್ಯಾ ಅತುರಾಯೆಕ್ ಫಾವೊ ತ್ಯೊ ಜಾಪಿ ಮೆಳ್ತೆಲ್ಯೊ]
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
