Agumbechi Ghumvddi
Horyeka disa amche bhomvtonnim zaitim ghodditam, ghottonam ghoddon astat ani amim tim sodanchim mholl'lle nodren guman korinamv. Punn kothakar samany chintpacho nhoi, him ghodditam tachea motint eka na eka ritin dhosunk lagtat ani chintpacho lott obhivyoktek vatt korun dita mhonncheak hi kotha govai dita.
Konkonnint vibhin'n mottveo kotha boromvchant stri-kothakaramni soit namv velam. Kannada lipichea sahiteant Irene Pinto (Sharat), Shalini Valencia, Gladys Rego, Eulalia Alvares, Lilly Miranda, Ctherine Rodrigues ani her thoddim hantum promuk. Punn pattlea vis-ponchvis vorsamni J.L. Manjarapalke, Monica Dsa Mathias, Dr.Zita Lobo, ani Lavi Ganjimatt promuk namvam. Punn heo kotha fokot nemalleanchea panamni va pustokamni matr chhapon ascheo nhoi. Heo kotha ddijittol madhyomacher pavonk zai, hea kothenchi tank sorv mero utron konkonni lokak sodhun vochonk zai mholl'llea iradean ’Agumbechi Ghumvddi’ namvachem a-pustok (Ashawadi Prakashan-achem ottravem audio-pustok) toyar zaun asa. Veginch bai lovi gonjimotthocheo ekaprak ek vibhin'n chintpacheo mottveo kotha tumchelagim yetoleo. Atam hea kothek vachun/aikon anond bhogunk tuka ulo ditam.
Agumbechi Ghumvddi
Rashmi kal sokalli thaun na kom-i...,
hi khobar sogllea gamvar varyabori vhallon asl'li.
Rashmi aplea dhuve songim suryonogorantlea eka protixtthit leouttant svotHchea ghorant rautali. Suryonogoro vhoddli pentt nhoi tori holl'lliy nhoi ason ek vaddon yemvchi pentt mhonnyet. Don moilanchea aspasant protixtthit videa somsthe, igorz, markett, ponchait kochheri, oni her gorjecheo sorv vyoustha ason rajy rosteachea boglen'nch leoutt asl'lem.
Rashmicho poti novin dubayant kamar ason tachi zodd bori asl'li. Toxem mhonnon tanchi eklich dhuv notaxachi boravi zata poreant hem kuttam' bhailea gavantch asl'lem. Rashmiy thoimsor vaur kortali. Notaxachea muklea xikpababtin mongllurant xikap mukarsunche borem mhonn zaiteani dil'lea solohapormannem, notaxak mongllurantlea borya eka kolejik bhorti kel'lem.
Rashmi bharich sobhit stri. Vis vorsanchea choliechi auy tori tich khud ottra vorsam prayechea choliebori distali. Poixani kaim unnem natl'lem tori sadhi oni konnailagim borem korn uloun bhorson vechi stri. Toxem mhonnon konni yeteam veteank aplea ghorant sollgi dimvchea kastachiy nhoi. Tosolea kodden Rashmi asl'lea borich nopomych zal'lo vixoi gamvkarank misteracho zal'lo matr nhoi astam eka nomuneachea bhiranteki karonn zal'lo.
Atam bholaikent aslolea vyoktink oxench opohoronn korn ongank kaddn viktat kom-i
sobhit choliank striyank jihadi opohoronn kortat kom-i
Ti chikkexe tosoleach kostachi mhonncheabori distali..., kaim konnai sangata....
Oxem lok toklek ek nomun uloitalo. Notaxa bhirmot sogllem pisantur zal'lem. Novin korona vorvim ontoraxttri-i viman yan prarombh zainatleleurvim osolea poristhiteri gamvak yeunko sadhy zainastana od'daddtalo. Tachi manosik sthitiy notaxachea vornim kaim vibhin'n natl'li.
Novinacho bhavo prokax xivomoggant polis ilakheant es.Pi. Hud'dear aslelean, tachea voxilayen hye keji vixeant choddit asokt ghetl'li. Polis chintinatlelea vellar vicharonnakhatir ghorant yetale astam, dukhest notaxan ghor soddn konnai soireanger vochon ramvcheaboriy natl'lem. Toxem zaun tachi eklich mauxi mhonnje Rashmichi bhoinn rekha yeun notaxasovem ravol'li.
Don disanchea nirontor sodhne uprant Rashmichi nirjivo kudd agumbechea ranant eka
paje fatrachea iddeant melll'li. Angbhor hollod oni kunkumacho lep kaddl'lo.
Kopolak gond saroyil'lo, gollea bhomvtim gonddeancho har asl'lo. Oni kuddiche bhomvtonni katorlele limbe asl'le. Tokle voilean katorl'lo kuvallo oni foddl'lo narl asl'lo. Sorxin'nch itteanim kel'lea randnint nimvl'lo gobor asl'lo. Rashmiche hat pam-i bandl'le sthiter asl'le oni gollo kapl'lo.
Polisamni kuddichem posttmorttom' koroilem. Vorde pormanne loingik oteachar zal'levixim kitench khunnam natl'lim. Polisamni hye dixen apli tonki vividh ayamani mukarunk toyarai choloili. Punn varyavegan fotto oni khobro vividh samajik madhyomani vhallonk lagleo. Vamacharak striyechi boli matallear madhyomamni khobar ghazoili. Hannim tancher oni tannim hancher bott zoklem. Gamvar tornattea stri-choliam thoim oniki bhirant choddli. Hi marekar kheast amchea gamvaki yeun pauligai oxem sobharamni okant ucharlo. Hyevixim sarki tonki zaunko zai oni amchea gamvchea stri-choliank surokxa labhozoi gram' ponchait odhyokxan madhyoma mukar ot'tai keli.
Zaitea disank tonki lambli tori aropi xirkon poddle nant. Novinak gamvak yeunkoch zalemna. Polisanchea tonke pattlean vochonk notaxak sady natl'lem. Nimannem mel'lem melem..., tachea noxibant tosolench moronn boroyil'lem konn'nna mhonn chintun novinan kez pattim kaddunk nirdhar kelo. Polis ilakheachi vifolota, ghollayeurvim bezar pavon kez pattim kaddli oxem madhyomani porot ghantt vhazoili.
Vell kosoleach hellkevinnem dhamvtalo...! Rashmichea mornnauprant sat mohine utral'le. Kez pattim kaddlea uprant notaxa aplea mouxeger raulem. Tem oniki manosik sthimitar yeunko natl'lem. Bhirankull ekantponn taka dhostalem. Ucharn sangonk konn'nch tachelagim natlolim. Kolez asl'li tor sanganteamsongim bhorson punni tacho vell paxar zato. Punn koleji dhamplelean ho aukasyi taka na zal'lo.
To dis sonvar. Notaxa donparanchem jevann tirsun sittouttar boson asl'lem. Donparanchem thoddo vell add podd mhonn mouxen ot'tai keleari magir ratik nid poddana mholl'llem nib diun tem boson'nch vell paxar kortalem. Titlear prokax aplea khasgi karar yeun ghora mukar thamblo. Bapleak polleun eka ghoddyek ojeap zalem tori dusre ghoddye notaxa ubhem zalem. Tachea dolleani dukham futtlim.
Roddanaka prokaxan tachi patt dhapuddli.
Tem hem uloun zatoch prokax apnnem ayil'lo ud'dex sangilaglo.
Hamvem tin disonchi roza kaddlea astam, notaxa koxem-i ghorach asta nhoim toxem taka mhoje borabor xivomoggo apoun vhoream mhonn ailom.
Notaxan poilean bapleasongim vochonk nokarlem tori, mouxechea ot'tayek tem bhair sorlem.
Vatter zaitem ulounnem prokax oni notaxa modhem zalem tori tem ozun ontormukhi asa tem prokaxachea gumanak vochanastana raulemna. Tanchem kar agumbechi ghatti choddtalem. Agumbek chintana notaxachea angant xirxiro dhamvl'lo onbhog zatalo.
Agumbechea tea oxir ghumvdder prokaxachem kar thambtana ekachchhannem notaxa okantlem. ’hea nirzon suvater kiteak kar thamblem...?’ soval notaxachea motipodd'dear utthlem.
Tuka ho zago ugddas asa...?
vhoi onkol, mam'michea kuddichi vollok dhorunk mhaka polisamni hanga apoun haddl'lem.
Prokaxachea sovalak dukhest zovab dili notaxan.
Chol amim porot ek pauttim thoimsor vochon yeveam..., mhojea vhonien dhormak konnaichea hatim oso jivo dimvcho oni amim kez pattim kaddchi mhaka somadhan na.
Naka onkol mhaka bhirant dista. Oni thoddeach vellan sureo buddtolo. Otanch itlo kallok asa hangasor notaxa kaujelem.
Kaim bhiezai mhonn na notaxa, hamv asam ne. Oniki chodd bhyem dista tor polle hangasor mhojelagim rivolvor asa... Prokaxan dhoir diun notaxak karauylem sokoil demvoilem.
Ore tujea pamyamni hildd vhanno asat. Heo vhanno ghaln tuka hea ranant devonk zamvchemna. Hamv tuka mhojelagim ddikkent pleatt vhanno asat teo ditam
notaxan pamyancheo vhanno nikllaizai tor prokax ek zoddi vhanno gheun notaxa mukar ubho zalo.
Ghe heo ghal tujeoch vhanno mhonn chintam...
Ham....,nhoi.... Onkol heo mhojeo vhanno nhoim...! notaxa kalubulem zalem.
Tujeoch puta, tutton poddloleo hangach boleant mhaka vhoniechi kudd melll'lea disach melll'leo. Hamvem teo tuka zai poddtit mhonn chamgaralagim ximvoileo
ham vhoi onkol tea disa polisam songim yetana ghaln ayil'lim pattim yetastana rukachea kutyek dantton tuttleo mhonnon hangach soddn gel'lim notaxan ugddas kelo.
Punn tea disa ghora pattim veta poreanti tujea pamyank vhanno asl'leo havem polleleat.
Tor bohuxH heo vhanno mam'michea pamyank asl'leo zaizoi. Mhojem oni mam'michem vhannanchem soiz ekch zal'lean amim vhanno bodlun ghalteleamv.
Na..., mam'micheo vhanno thoinch sokoil poddon asl'leo
Mukar utram nastana notaxa vogem zalem.
Ghoddl'lem kitem tem sarkem sang prokaxan notaxak porot karar bosoilem.
Onkol, mam'mik dubai astananch tichea bosalagim ofer asl'lem. Hem ddaddak kollitnatl'lem punn Mhaka kollit asl'lem. Ddaddalagim koxem sangchem mhonn somzanastana hamv koxttatalim. Mhoji baravi zatoch hamvench gamvant xikap mukarsitam mhonn ot'tai kel'li. Kiteak xikpa khatir hamv gamvak gelear mam'mi mhojesongim gamvank yeteli oni ticho ho okrom' sombondh tutt'tolo mhonn hamvem lekl'lem. Punn amim ghor kanngel'lem suryonogoro leouttch tichea bosachem mhonn hangasor ailea uprantch kollit zalem. Hea modhem soittanchea vohivattakhatir gamvank ayil'lo ticho bos lokddouna vorvim gamvant urlo oni tachem kuttam' dubayant. Hennem ddeaddiy dubayantch urlel'lean hankam dogamyki ho bhangrallo aukas labhlo. Lokddouna vorvim hamv ghorantch asleari kitench man moread nastam tim kuddachem bagil dhamptana mhaka kuddint uzo pett'talo. Toddvanastana tea disa hamv sorv ddaddak sangtam mhonn dogam-i mukar golatto kel'leak tannim mhojer hol'lo kelo. Ek auy mhonn lekinastana tinnem mhaka....,tum-i zai tor konnaiki gheun ye hamv tuka addoina pun mhojea vattek add yenaka mhonntana mhaka ticher kantthallo ailo. Oxench mukarun gelear him mhaka logadd kaddtit oni mhojea ddeaddiki soddiximnant mholl'llem spoxtt zatana, hamvem mhaka zai zal'lea dogam vyoktisongim mellon mam'mik bhexttaunko chintlem. Amcho irado fokot tiche thoim bhyem utthomvcho asl'lo soddlear, tika logadd kaddcho natl'lo. Punn urddaurddi zatana foramoxen mam'micho gollo kapon gelo. Bhiel'lea omim chukon ghemvche khatir khonchagi eka tti.Vi.Siriyolant pollel'leabori vamacharacho nattok ghoddlo
Mam'michi khuni zal'li khoim...?
Ghorachch...!
Magir hanga mhonnasor konnem haddlem!?
Hamvem oni tea dogamni
Te dog poun oni prothvi vhoimu...?
Punn onkol tuka hem koxem kollit zalem...?
Moboil ttresingar mhaka tuvem agumbek bhett dil'li kollitzali. Vhoni nopomych zal'lea adlea disa poun oni prothvi suryonogorak ayil'le zal'lean prothvichem mobail teach vellar agumbechem lokexon dakaitalem. Toxem dubhavon agumbecher sodhnam choloitana vhoniechi kudd mell'lli. Poun oni prothvik jeor korn vichartana atam tuvem sangl'li soglli kanni tannim mhaka sangli. Kudd matyek pamvchea poilem hi kez pot'to zalea tori, jivo gela to gela, tea khatir jivont aschea mhojea putamni oni tuvem kiteak aplo fuddar hogddaizai, mhojea bavan kiteak moread hogddaun ghezai mhollea jigoneasen hamvem ilakheak kez oskot korunk takit dili. Oni asl'lo vixoi novinak kolloun kez pattim kaddunk kolloilem
Tor sorv kollit aslearyi az tuvem mhaka hangasor apoun haddn porot kiteak mhozo vichar keloi?
tum tujea motintlim bhognnam oni opradhi chintap konnailagim vanttun gheunko zainastana korgatai tem tuka polletoch kollit zatalem. Tujea tonddant thaun to vixoi bair kaddn motichea tollmolleantlem tuka hallu korizai mhonnchea iradean az tuka hamvem hanga haddlem.
Onkol amkam xikxa zateligi...? mhaka xikxa zaleari tondre nant, pap poun oni prothvik sodd...!
zoilachim sorollam chintun notaxa sogllench gollon gel'lem.
Agumbechea ghattyek zaiteo fumvddeo asat puta..., ghumvdder thaun pattim pollelear vorodd yetat..., dekun kedinkch pattim pollemvchemnaka...!
Prokaxan kar sttartt kelem. Boglechea sittir bosun Rashmin dolle dhample.
Comments
No comments yet. Be the first to say what you thought of it.
Leave a comment