ಟ್ರೆಸ್ಸಿ ಟೀಚರ್

ಟ್ರೆಸ್ಸಿ ಟೀಚರ್

"ಸೈತಾನ್ ಟೀಚರ್ ಆಯ್ಲಿ!" ಪಾಂಚ್ವ್ಯಾ ಕ್ಲಾಸಿಂತ್ಲೆ ಭುರ್ಗೆ ಎಕಾಮೆಕಾ ಉಲಯಿತ್, ಹಾಸತ್, ಪಯ್ಶಿಲ್ಯಾನ್ ಯೆಂವ್ಚಾ ಟ್ರೆಸ್ಸಿ ಟೀಚರಿಕ್ ಪಳೆಲಾಗ್ಲೆ.

"ಚಲ್ತಾ ಪಳೆರೆ ತಿ, ಹಸ್ತಿಚೆಂ ಪೀಲ್ ಚಲ್‌ಲ್ಲ್ಯಾಬರಿ. ತಿಚೆಂ ಮುಸ್ಕಾರ್ ಪಳೆ ಕಾಳೆಂ ಕಾಳೆಂ ಜಾಲಾಂ!" ಕೊಣ್‌ಗಿ ಎಕ್ಲೊ ಭುರ್ಗೊ ವೊಂಟಾಂ ಭಿತರ್‌ಚ್ ಮ್ಹಣಾಲೊ.

"ಶ್ಶ್... ಶ್ಶ್... ತಿಕೆಸೆ ಲೋವ್ ಉಲಯ್‌ರೆ ಜೊರ್ಜಿ. ಆಯ್ಕಾತ್ ಜಾಲ್ಯಾರ್ ದವರ್ಚಿ ನಾ". ದುಸ್ರೊ ಭುರ್ಗೊ ಹಾಳ್ವಾಯೆನ್ ಮ್ಹಣಾಲೊ.

ಇತ್ಲ್ಯಾರ್ ಭಾರಾಧಿಕ್ ಮೆಟಾಂ ಕಾಡಿತ್ ಟ್ರೆಸ್ಸಿ ಟೀಚರ್ ಇಸ್ಕೊಲಾಚಿಂ ಮೆಟಾಂ ಚಡ್ತಾನಾ, ಕಾಪಾಡ್ ಪಾಂಯಾ ಪೊಂದಾಕ್ ಪಡೊನ್ ಎಕಾಚ್ಛಣೆ ಲೊಟ್‌ಲ್ಲ್ಯಾಬರಿ ಜಾವ್ನ್ ವೊಮ್ತಿಚ್ ಪಡ್ತಾನಾ ಹಾತಾಂತ್ಲೆ ಬೂಕ್ ತೆವ್ಶಿನ್ ಹೆವ್ಶಿನ್ ಉಸಾಳ್ತಾನಾ ಭುರ್ಗಿಂ ಸಗ್ಳಿಂ ಎಕಾಚ್ಛಾಣೆಂ ಜೊರಾನ್ ಹಾಸ್ಲಿಂ.

"ಬರೆಂ ಜಾಯ್ಚಾಯ್, ಹಾತ್ ಮೊಡ್ಲ್ಯಾರ್ ಪುರೊ. ಆಮ್ಕಾಂ ಮಾರ್ತಾ ಪಳೆ" ಕೊಣ್‌ಗೀ ಭುರ್ಗೊ ಪುಸ್ಪುಸ್ತಾನಾ, ಭೊಂವ್ತಣಿಚೆ ಭುರ್ಗೆ ಜೊರಾನ್ ಹಾಸ್ಲೆ. ಟ್ರೆಸ್ಸಿ ಟೀಚರಿಚ್ಯಾ ಕಾನಾಂತ್ ಹಿಂ ಉತ್ರಾಂ ಕಠಿಣಾಯೆನ್ ಆಪ್ಟಾಲಿಂ.

"ಹರಾಮಾಚ್ಯಾ ಪುತಾ... ತುಜಿ ಪಾಟ್ ನೀಟ್ ಕರ್ತಾಂ!" ತಿಣೆಂ ದಾಂತ್ ಖಿರ್ಲಿಲೆ. ದೊಳ್ಯಾಂತ್ಲ್ಯಾನ್ ಉಜ್ಯಾಚಿಂ ಕೆಂಡಾಂ ವೊಂಕೊನ್ ತಿ ಕಷ್ಟಾಂನಿ ಉಭಿ ರಾವ್ಲಿ. ತಸೆಂ ಚಾರಾಂಯ್ ಕುಶಿಂನಿ ಪಳೆಲಾಗ್ಲಿ. ಶಿಂಪ್‌ಲ್ಲೆ ಬೂಕ್ ವಿಂಚುನ್ ದಿಂವ್ಕ್ ಏಕ್ಲೊಯ್ ಮುಖಾರ್ ಸರಾನಾ. ಚಿಂತ್‌ಲ್ಲ್ಯಾಬರಿ ತಿಚೊ ರಾಗ್ ಗಡ್ ಮಿರ್ವೊನ್ ವೆಚ್ಯಾ ಸ್ಥಿತಿಯೆರ್ ಪಾವ್ಲೊ.

"ಜೊರ್ಜಿ!" ಹಾಂಕ್ರೆಲಿ ಟ್ರೆಸ್ಸಿ ಟೀಚರ್, ಬಾಗ್ಲಾಚ್ಯಾ ಆಡೊಸಾಕ್ ರಾವೊನ್ ತಿಳ್ಚ್ಯಾ ಜೊರ್ಜಿಕ್ ಪಳೆವ್ನ್. ಜೊರ್ಜಿ ಕಾಂಪಾತ್ತ್ ಆಯ್ಲೊ "ಬೂಕ್ ವಿಂಚುನ್ ದೀಜಾಯ್ ಮ್ಹಳ್ಳೆಂ ತುಕಾ ಕಳಾನಾಂಯೆರೆ ರೆಡ್ಯಾ?" ತಿಚ್ಯಾ ಖರ್ಕಸ್ ಉತ್ರಾಂ ಸಾಂಗಾತಾ ತೀನ್-ಚಾರ್ ನಿಷ್ಟುರ್ ಥಾಪ್ಡಾಂ ಜೊರ್ಜಿಚ್ಯಾ ಕಾನ್ಪಾಟ್ಯಾಚೆರ್ ಬಸ್ಲಿಂ. ತಾಚ್ಯಾ ಮಟ್ವ್ಯಾ ಕೆಸಾಂಕ್ ಧರ್ನ್ ಬುಡ್ಡಿತಾನಾ ಪಾಟಿರ್ ಚಾರ್ ಧುಮ್ಕೆ ಬಸಯ್ಲೆಂ.

"ವಿಂಚ್ ವೆಗಿಂ ದುಕ್ರಾ! ತುಮ್ಕಾಂ ಆತಾಂ ಸಳ್ಗಿ ದಿಲ್ಯಾರ್ ಮಾಗಿರ್ ವ್ಹೊಡ್ ಜಾತಾನಾ ಕಿತೆಂ ಸಗ್ಳೆಂ ಕರುಂಕ್ ಪಾವ್ಶಾತ್" ತಿ ಘುಂರ್ಕೆಲಿ. ಜೊರ್ಜಿ ಮಾತ್ರ್ ಮಾರಾಂಚ್ಯಾ ಕಾರಾನ್ ರಡಾನಾಸ್ತಾಂ ತಿಕಾಚ್ ದೊಳೆ ವಾಟಾರ್ನ್ ಪಳೆಂವ್ಕ್ ಪಡ್ಲೊ.

ಆತಾಂ ಟೀಚರ್ ಕ್ರೋಧಾನ್ ಪಿಶಿ ಜಾಂವ್ಚಿ ಮಾತ್ರ್ ಉರ್ಲಿ. ಯೆದೊಸೊ ಪಿಲ್ಕಾಟೊ, ರೆಡೊ, ದುಕೊರ್, ಬೊಯ್ಲ್ ಆಪ್ಣಾಚೆಂ ಉತಾರ್ ಆಯ್ಕಾನಾ ಮ್ಹಳ್ಯಾರ್? ತಾಚ್ಯಾ ತರ್ನ್ಯಾ ಬಾವ್ಳ್ಯಾಂಕ್ ಧರ್ನ್ ತಿಣೆಂ ಜೊರಾನ್ ವೊಡ್ಲೆಂ "ಆಯ್ಕಾನಾಂಯ್ವೆರೆ ಮ್ಹಜೆಂ ಉತಾರ್?" ನಾರ್ಲಾಕ್ ನಾರ್ಲ್ ಆಪ್ಟಾಂವ್ಚ್ಯಾಬರಿ ತಿಣೆ ಲಾಗ್ಶಿಲ್ಯಾ ಕುಂದ್ಯಾಕ್ ಜೊರ್ಜಿಚಿ ತಕ್ಲಿ ಬಳಾನ್ ಆಪ್ಟಿಲಿ.

"ಮಾಂಯ್!" ಜೊರ್ಜಿ ಆತಾಂ ದುಖಿನ್ ಪಿಂರ್ಗಾಲೊ.

"ಆತಾಂ ಮಾಂಯ್ ಮ್ಹಣ್ತಾಯ್ವೆ..... ತುಜಿ ಮಾಂಯ್ ಮೊರ್ನ್ ವೊಚೊಂಕ್!" ಅಸೆಂ ಗಾಳಿಂಚೊ ಶಿಂವೊರ್ ಜೊರ್ಜಿಚೆರ್ ಆನಿ ತಾಚ್ಯಾ ಆವಯ್ಚೆರ್ ವೊತ್ತಾನಾ ದುಸ್ರಿ ಟೀಚರ್ ಮಧೆಂ ಆಯ್ಲಿ. ಜೊರ್ಜಿ ರಡೊನ್ ಇಸ್ಕಾಲಾ ಭಾಯ್ರ್ ಗೆಲ್ಲಿ ಖಬಾರ್ ಕೊಣಾಯ್ಚ್ಯಾ ದೊಳ್ಯಾಂಕ್ ಗೆಲಿನಾ.

ಇಸ್ಕೊಲ್ ಸುರು ಜಾಲೆಂ. ಕಾಳ್ಯಾ ಫೊಳ್ಯಾರ್ ಚುನ್ಯಾಚೆ ಗೀಟ್ ವೋಡ್ನ್ ಭುರ್ಗ್ಯಾಂಕ್ ಲೆಕಾಂ ದಿತಾನಾ ಟ್ರೆಸ್ಸಿ ಟೀಚರಿಚ್ಯಾ ಮತಿಂತ್ ಸಮಾಧಾನ್ ನಾ ಜಾಲೆಂ. ಸಮಾಧಾನ್ ಆಸ್ತೆಲೆಂ ಜಾಲ್ಯಾರೀ ಕಸೆಂ?

***

ಮಧ್ಯಮ್ ವರ್ಗಾಚ್ಯಾ ಕುಟ್ಮಾಂತ್ ಟ್ರೆಸ್ಸಿ ಜಲ್ಮಾಲ್ಲೆಂ. ಬಾಪಯ್ ಜಾಕು, ರುಕಾಚ್ಯಾ ಕಾಮಾಚೊ ಮೆಸ್ತ್. ಆವಯ್, ಫುಲಾಂ ರಾಂದ್ವಯೆಚೊ ವ್ಯಾಪಾರ್ ಕರ್ತಾಲಿ. ಟ್ರೆಸ್ಸಿಚೆಂ ಕಷ್ಟಾಂನಿ ಮೆಟ್ರಿಕ್ ಶಿಕೊನ್ ಜಾಲೆಂ ಆನಿ ತೆದಾಳಾ ತಾಕಾ ಭಾರಾ ವರ್ಸಾಂ ಕಾಜಾರಾಚಿ ಪ್ರಾಯ್. ತೆದಾಳಾ ಹಾತಾಕ್ ಏಕ್ ಆನಿ ಪಾಂಯಾಂಕ್ ಏಕ್ ಮ್ಹಳ್ಳ್ಯಾಬರಿ ತಾಚ್ಯಾ ಸೊಭಾಯೆಕ್ ಪಳೆವ್ನ್ ನೊವ್ರೆ ಮುಖಾರ್ ಆಯ್ಲೆ. ಪುಣ್ ತಾಣಿಂ ವಿಚಾರ್ಲಿ ದೋತ್ ಖಂಯ್ ಥಾವ್ನ್ ಹಾಡ್ತೊಲೊ ಜಾಕು ಮೆಸ್ತ್? ಸುರ್ ಆನಿ ಸೊರ್‍ಯಾಕ್‌ಚ್ ಕುಲಿಂತ್ ಮೆಳ್‌ಲ್ಲ್ಯಾ ಪಾಗಾಂತ್ ಅರ್ಧೊ ಮುಕ್ಕಾಲ್ ವಾಂಟೊ ಉದಾಕ್ ಜಾವ್ನ್ ವೆತಾಲೊ ಜಾಲ್ಲ್ಯಾನ್ "ಧರ್ಮಾಕ್ ವ್ಹೊರ್ತಾತ್ ಜಾಲ್ಯಾರ್ ವ್ಹರೊಂದಿತ್!" ಮ್ಹಳ್ಳಿಂ ಚಿಂತ್ನಾಂ ತೊ ಅಟಯ್ತಾನಾ.....

ಮೆಟ್ರಿಕ್ ಜಾಲ್ಲೆಂ ಟ್ರೆಸ್ಸಿ ಏಕ್ ವರ್ಸ್ ಘರಾ ಬಸ್ಲೆಂ "ಆನಿ ಅಸೆಂಚ್ ಘರಾ ಬಸೊನ್ ಉವೊ ಮಾರ್ಚ್ಯೊವೆ? ಕಾಜಾರ್ ಸದ್ದ್ಯಾಕ್ ಜಾಂವ್ಚ್ಯಾ ಬರಿ ದಿಸಾನಾ. ಮಾರ್ಲಿ ಶೆಂಡಿ.... ಟೀಚರ್ ಜಾಲ್ಯಾರ್ ಕಿತೆಂ? ಟ್ರೆಸ್ಸಿನ್ ಚಿಂತ್ಲೆಂ ಆನಿ ದೊನ್ ವರ್ಸಾಂ ಭಿತರ್ ಟ್ರೆಸ್ಸಿ ಟೀಚರ್ ಜಾಲೆಂ.

ಟ್ರೆಸ್ಸಿಚೆಂ ಕಾಮ್ ಭೋವ್ ಸುಲಭ್ ವೇಳ್ ಪಾಶಾರ್ ಕರುಂಕ್ ಟೀಚರ್ ಜಾಲ್ಲ್ಯಾ ತಾಕಾ ಬರೊ ವೇಳ್ ಪಾಶಾರ್ ಕರುಂಕ್ ಮೆಳ್ಳೊ. ಲಾಗ್ಶಿಲ್ಯಾ ಹೊಟೆಲಾ ಥಾವ್ನ್ ಚಾ-ಕಾಫಿ ಹಾಡೊವ್ನ್, ಭುರ್ಗ್ಯಾಂಕ್ ವಾಚುಂಕ್-ಬರಂವ್ಕ್ ದೀವ್ನ್ ಕುಡಾಂತ್ ಪಟ್ಟಾಂಗಾಂ ಮಾರ್ಚಿಂಯ್ ತಾಚ್ಯಾ ದಿಸಾಚೊ ಏಕ್ ದಂಧೊ ಜಾಲೊ. ವರ್ಸಾಂ ಏಕಾವಯ್ರ್ ಏಕ್ ಅಶಿಂ ಧಾ ಉತರ್ಲಿಂ. ಹ್ಯಾ ಧಾ ವರ್ಸಾಂ ಮಧೆಂ ತಾಚೆಲಾಗಿಂ ಕಾಜಾರ್ ಜಾತಾಂ ಮ್ಹಣ್ ದೋಗ್ ಮೆಸ್ತ್ರಿ ಮಾತ್ರ್ ಮುಖಾರ್ ಸರ್ಲೆ. ಪುಣ್ ತೆ ಕಾಜಾರ್ ಜಾಲೆನಾಂತ್. ಲೊಕಾಚೆ ದೊಳೆ ವೊಳ್ತಾ ಮ್ಹಣಾಸರ್ ತಾಂಚಿ ಸಳಾವಳ್ ಚಲೊನ್ ಮಾಗಿರ್ ಬುರ್ಸ್ಯೊ ಮಾನ್ ಕಾಡ್ಚ್ಯೊ ಖಬ್ರೊ ಗಪ್‍ಚಿಪ್ ಜಾತಾನ್ ತೆ ತೆಂ ಇಸ್ಕೊಲ್ ಸೊಡುನ್ ಖಬ್ರೆವಿಣೆ ನಿಸರ್ಲೆ.

ಟ್ರೆಸ್ಸಿ ನಿರಾಶೆಚ್ಯಾ ಖಂದ್ಕಾಕ್ ಶೆವ್ಟಾಲೆಂ ಆನಿ ಕಿತ್ಲೊ ತೇಂಪ್ ರಾಂವ್ಚೆ? ಆತಾಂ ತೆಂ ಮುಕ್ಕಾಲ್ ಮ್ಹಾತಾರೆಬರಿಂ ದಿಸ್ತಾ. ಟೀಚರ್ ಮ್ಹಳ್ಯಾರ್ ಗಾಂವಾರ್ ಸೈರಿಕೆಚ್ಯಾ ಮಾರ್ಕೆಟಿಂತ್ ದೆಡ್ಕೆಚೆಂ ಮೊಲ್ ನಾ. ಶೆವ್ಟಿಂ ದೊಗಾಂ ಭುರ್ಗ್ಯಾಂಚೊ ಬಾಪಯ್, ಎಕಾ ವಿಧುರ್ ನೊವ್ರ್ಯಾಲಾಗಿಂ ತೆಂ ಕಾಜಾರ್ ಜಾಲೆಂ.

ಸೊರ್‍ಯಾ ಆನಿ ಸಟ್ಟ್ಯಾಚೊ ಗುಲಾಮ್ ಜಾಲ್ಲ್ಯಾ ತಾಚೆಲಾಗಿಂ ಟ್ರೆಸ್ಸಿಕ್ ಸುಖಾಚೆ ದೀಸ್ ಮೆಳಾನಾ ಜಾಲೆ. ಸಮಾಧಾನೆ ಬದ್ಲಾಕ್ ಸದಾಂಯ್ ಖಂತ್, ದೂಖ್, ನಿರಾಸ್ ಆನಿ ಝಗ್ಡೆಂ ಘೊವಾ ಬಾಯ್ಲೆ ಮಧೆಂ ಚುಕಾನಾ ಜಾಲೆಂ. ಹಾಂಚ್ಯಾ ಮಧೆಂ ಅನಾಥ್ ಭುರ್ಗಿ ಕಷ್ಟಾತಾನಾ ಪಳೆಂವ್ಕ್ ನ್ಹಜೊ ಜಾವ್ನ್ ತಾಂಚ್ಯಾ ಮೆಲ್ಲ್ಯಾ ಆವಯ್ಚ್ಯಾ ಆವಯ್ನ್ ತಾಂಕಾಂ ಆಪ್ಲ್ಯಾ ಘರಾ ವ್ಹೊರ್ನ್ ದವರ್ಲೆಂ.

ಆತಾಂ ಟ್ರೆಸ್ಸಿನ್ ಆಪ್ಣಾ ಥಂಯ್ ಫೆಂಡೆಂವ್ಚೊ ರಾಗ್ ಕೊಣಾಚೆರ್ ಕಾಡ್ಚೊ? ದೆಕುನ್ ಮತಿಚಿ ಬೆಜಾರಾಯ್ ಪಯ್ಸ್ ಕರುಂಕ್ ಕಾಜಾರ್ ಜಾವ್ನ್ ಎಕಾಚ್ ವರ್ಸಾನ್ ಪರ್ತುನ್ ಟೀಚರ್ ಜಾಲೆಂ. ಥಂಯೀ ತಾಕಾ ಸಮಾಧಾನ್ ನಾ. ದೀಸ್ ವೆತಾಂ ವೆತಾಂ ನಿಷ್ಟುರಾಯ್ ಚಡೊನ್ ಯೇವ್ನ್ ಕ್ಲಾಸಿಂತ್ಲ್ಯಾ ಭುರ್ಗ್ಯಾಂಕ್ ಕಠೋರಾಯೆನ್ ಮಾರುಂಕ್ ಆನಿ ದಣ್ಸುಂಕ್ ಆಯ್ತೆಂ ಜಾಲೆಂ. ತಾಚ್ಯಾ ಮಾರಾಂಚ್ಯಾ ದುಖಿನ್ ಮನ್ ದೀವ್ನ್ ಶಿಕ್ಚೆಯಿ ಬಡ್ಡಾ ಜಾತಾನಾ, ಬಡ್ಡಾ ಆನಿಕೀ ಬುದ್ದು ಜಾಲೆ.

"ಜಾಯ್ ಜಾಲ್ಯಾರ್ ಶಿಕೊಂದಿತ್, ನಾತ್ಲ್ಯಾರ್ ಶೆಣಾಚಿ ಭಾಟಿ ವ್ಹಾವೊಂದಿತ್" ಚಿಂತಾಲೆಂ ತೆಂ.  

"ಆಪ್ಣಾಕ್ ಕಾಂಯ್ ದೆವಾನ್ ಭುರ್ಗಿಂ ದಿಲ್ಯಾಂತ್ವೆ?" ಥೊಡೆ ಪಾವ್ಟಿಂ ಆಪ್ಣಾಕ್ ಭುರ್ಗಿಂ ನಾಂತ್ ಮ್ಹಣ್ ತೆಂ ಕರ್ಗಾತಾಲೆಂ.

ಶೆವ್ಟಿಂ ದೆವಾನ್ ತಾಚೆಂ ಮಾಗ್ಣೆಂ ಆಯ್ಕಾಲೆಂ ಜಾಯ್ಜಾಯ್. ಟ್ರೆಸ್ಸಿ ಚಾಳಿಸ್ ವರ್ಸಾಂಚ್ಯಾ ಪ್ರಾಯೆರ್ ಎಕಾ ಚೆರ್ಕ್ಯಾ ಭುರ್ಗ್ಯಾಚಿ ಆವಯ್ ಜಾಲೆಂ. ಉತರ್ ಪ್ರಾಯೆರ್ ಚೆರ್ಕೊ ಜಲ್ಮಾಲ್ಯಾನ್‌ಗಿ ಯಾ ತಾಚಿಚ್ ಸೊಭಾಯ್ ಚೆರ್ಕ್ಯಾಕ್ ಆಯಿಲ್ಲಿಗಿ, ಚೆರ್ಕೊ ಮಾತ್ರ್ ಸೊಭಿತ್-ಸುಂದರ್ ಗೊರೊ ಗೊರೊ ಜಾವ್ನ್ ಪಳೆತೆಲ್ಯಾಂಕ್ ಪರ್ತುನ್ ಪಳೆಯಾಂಸೆಂ ದಿಸ್ತಾಲೊ. ಪಾಂಚ್ ವರ್ಸಾಂನಿ ತಾಕಾ ಆಪ್ಣೆಂ ಶಿಕೊಂವ್ಚೆ ಇಸ್ಕೊಲ್ ಸೊಡ್ನ್ ಮಾದ್ರಿಂಗೆರ್ ಶಿಕೊಂಕ್ ಘಾಲೊ.

ಚೆರ್ಕೊ ಸಿರಿಲ್ ಪಳೆಂವ್ಕ್ ಕಿತ್ಲೊ ಸುಂದರ್ ತಿತ್ಲೊಚ್ ಶಿಕೊಂಕ್ ಒಡ್ಡ ಮ್ಹಣ್ ಥಂಯ್ಚ್ಯಾ ಟೀಚರಿಚಿಂ ದುರಾಂ ಯೆತಾಲಿಂ.

***

ಜ್ಯಾ ದಿಸಾ ಜೊರ್ಜಿಕ್ ಅನಾವಶ್ಯ್ ಮಾರ್ನ್ ಟ್ರೆಸ್ಸಿಟೀಚರ್ ಕದೆಲಾರ್ ಬಸ್‌ಲ್ಲ್ಯಾಕಡೆಂ ಖದ್ವಳ್ತಾಲಿ. ತ್ಯಾ ದಿಸಾ ಆನಿ ತ್ಯಾಚ್ ವೆಳಾರ್ ಭುರ್ಗೊ ಸಿರಿಲ್ ಬೂಕಾಂಚೆಂ ಪೊತೆಂ ಕಾಣ್ಘೆವ್ನ್ ರಡಾತ್ ತಿಚೆ ಸರ್ಶಿಂ ಆಯ್ಲೊ.

"ಕಿತೆಂ ಜಾಲೆಂ ಪುತಾ?" ಪುತ್ ರಡೊನ್ ಆಯಿಲ್ಲೊ ಪಳೆವ್ನ್ ಹಾಂಕ್ರೆಲಿ ಟ್ರೆಸ್ಸಿ ಟೀಚರ್.

"ಟೀಚರಿನ್ ಇಂಗ್ಲಿಷ್ ಯೆನಾತ್‌ಲ್ಲ್ಯಾಕ್ ಮಾರ್‍ಲೆಂ!" ಆಪ್ಣಾಕ್ ಮಾರ್‌ಲ್ಲ್ಯಾ ಟೀಚರಿಚಿಂ ದೂರಾಂ ಸಾಂಗೊನ್ ಸಿರಿಲ್ ದರಬಸ್ತ್ ರಡ್ಲೊ. ತಾಚೆಂ ತಾಂಬ್ಶೆಂ ಮುಖಮಳ್ ಬಿಂಡಾಬರಿ ತಾಂಬ್ಡೆಂ ಜಾಲ್ಲೆಂ ಮಾತ್ಯಾಚೆ ಕೇಸ್ ಹುಂಬಾಳ್‌ಲ್ಲೆ. ಧಣಾಚೊ ನಿತಳ್ ಜಿಬ್ಬೊ ಮ್ಹೆಳ್‌ಲ್ಲೊ ರೊತಾಚೆ ಮಾರ್ ಖಾವ್ನ್ ಹಾತ್ ಸುಜ್‌ಲ್ಲೆ ಕಾನಾಕ್ ಚಿಮ್ಟೊ ಕಾಡ್‌ಲ್ಲ್ಯಾನ್ ಆತ್ತಾಂ ಮಾಗಿರ್ ರಗಾತ್ ವೊಂಕ್ತಾಸೊ ತಾಂಬ್ಡೊ ಜಾಲ್ಲೊ. ಎಕಾ ಉತ್ರಾನ್ ಸಾಂಗ್ಚೆಂ ಜಾಲ್ಯಾರ್ ಸುಂದರ್ ಸಿರಿಲ್ ವಿದ್ರೂಪ್ ದಿಸ್ತಾಲೊ.

"ತುಜ್ಯಾ ಚರಬೆ! ತುಜ್ಯಾ ಹಾತಾಂಕ್ ಆರ್ ಮಾರುಂಕ್" ಟ್ರೆಸ್ಸಿ ಟೀಚರ್ ಆತಾಂ ನಿಷ್ಟುರಾಯೆನ್ ಸಿರಿಲಾಕ್ ಮಾರ್‌ಲ್ಲ್ಯಾ ಟೀಚರಿಕ್ ಶಿರಾಪ್ ಘಾಲಿಲಾಗ್ಲಿ.  
"ತುಕಾ ಹಾಂವ್ ಆತಾಂ ಬೂದ್ ಶಿಕಯ್ನಾ ತರ್..." ತಿಣೆಂ ದಾಂತ್ ಖಿರ್ಲಿಲೆ ತಸೆಂ ರಡ್ಚ್ಯಾ ಪುತಾಕ್ ಘೆವ್ನ್ ಭಾಯ್ರ್ ಸರ್‍ಲಿ. ವೊರಾಂ ಸಾಡೆ ಧಾ ಇಕ್ರಾ ಜಾತಾಲಿಂ ಜಾಲ್ಲ್ಯಾನ್ ವೊತಾಚ್ಯಾ ದಾವೆನ್ ಧರ್ಣಿ ಥಾವ್ನ್ ಉಜ್ಯಾ ಧಾವ್ ಭಾಯ್ರ್ ಸರ್ತಾಲಿ. ಇಸ್ಕೊಲಾಚ್ಯೆ ಗೇಟಿ ಭಾಯ್ರ್ ಸರ್‍ತಾನಾಂಚ್ ವಿಚಿತ್ರ್ ದೀಷ್ಟ್ ತಿಣೆಂ ಪಯ್ಶಿಲ್ಯಾ ಮಾರ್ಗಾರ್ ಪಳೆಲಿ. ತಿಣೆಂ ಮಾರ್‌ಲ್ಲ್ಯಾ ಜೊರ್ಜಿಕ್ ವೊಡಿತ್ತ್ ಜೊರ್ಜಿಚಿ ಆವಯ್ ತಿಚ್ಯಾ ಇಸ್ಕೊಲಾಕ್ ಯೆತಾಲಿ.

ವಾದಾಳಾಂ ತಿಚ್ಯಾ ತಕ್ಲೆಂತ್ ಘಂವ್ಲಿಂ. ಸರಾರಾಂ ತಿ ವೊಡಾ ರುಕಾಚ್ಯಾ ಮುಳಾಂತ್ಲ್ಯಾನ್ ಆಂಗ್ಡಿಂಚ್ಯಾ ಆಡೊಸಾಕ್ ಲಿಪೊನ್ ದುಸ್ರ್ಯಾ ಮಾರ್ಗಾರ್ ಪಾವ್ಲಿ.

"ಏ ಪಿಶ್ಯಾ, ಖಂಯ್ ತುಂ ವೆತಾಯ್? ಕೊಣಾಕ್ ತುಂ ಸೊಧ್ತಾಯ್?" ವಿಚಿತ್ರ್ ತಾಳೊ ತಿಕಾ ಆಯ್ಕಾಲ್ಲ್ಯಾಬರಿ ಜಾಲೊ. "ತುಜಿ ಝಡ್ತಿ ಪಯ್ಲಿ ಕರ್‍ಚಿ ಸೊಡ್ನ್ ಹೆರಾಂಚಿ ಝಡ್ತಿ ಕರುಂಕ್ ಭಾಯ್ರ್ ಸರ್‍ಲಾಂಯ್ಗಿ? ಆಯ್ಚ್ಯಾಚ್ ದಿಸಾ ನಿರಾಪ್ರಾಧಿ ಭುರ್ಗ್ಯಾಕ್ ನಿಷ್ಟುರಾಯೆಕ್ ಮಾರ್‌ಲ್ಲ್ಯಾ ವಾಗಿಣಿ. ತುಂ ತುಜ್ಯಾ ಭುರ್ಗ್ಯಾಕ್ ಮಾರ್‌ಲ್ಲ್ಯಾಚಿ ನೀತ್ ಕರುಂಕ್ ವೆತಾಯ್? ಅಬ್ಳೆ ತುಜಿ ನೀತ್ ಕರುಂಕ್ ಆತಾಂ ತಿ ಆವಯ್ ಆಯ್ಲ್ಯಾ! ಕಿತ್ಯಾಕ್ ಲಿಪ್ತಾಯ್? ಕಿತ್ಯಾಕ್ ಚುಕೊನ್ ಧಾಂವ್ತಾಯ್?"

ಸಿರಿಲಾಚೆಂ ಇಸ್ಕೊಲ್ ಲಾಗಿಂ ಪಾವ್ಲೆಂ. ಗೆಟಿ ಲಾಗಿಂ ಕೊಣಿ ಪಳೆನಾಂತ್ ಮ್ಹಳ್ಳೆಂ ಕಳ್ತಚ್ ತಿಣೆಂ ಪುತಾಚ್ಯಾ ತೊಂಡಾಕ್ ಏಕ್ ಉಮೊ ದಿಲೊ. "ವೊಚ್ ಪುತಾ" ಮ್ಹಣಾಲಿ ಟ್ರೆಸ್ಸಿ ಟೀಚರ್ "ಆತಾಂ ಟೀಚರ್ ಮಾರ್‍ಚಿ ನಾ. ಬರೊ ಕರ್‍ನ್ ಶಿಕ್". ಸಿರಿಲಾಚಿ ಪಾಟ್ ಇಸ್ಕೊಲಾಚ್ಯಾ ವೊಣ್ದಿಂನಿ ಧಾಂಪ್ಲ್ಯಾ ಉಪ್ರಾಂತ್ ಥರ್ಥರ್‍ಯಾಂ ಕಾಂಪ್ಚಿ ಟ್ರೆಸ್ಸಿ ಟೀಚರ್ ಹಳೂ ಭಿತರ್‍ಲ್ಯಾ ವಾಟೆನ್ ಇಗರ್ಜೆಕ್ ಗೆಲಿ ಆನಿ ಸರ್ಪಡೊನ್ ವಿಳಾಪ್ ಕರ್‍ತಾನಾ ಬಾರಾ ವೊರಾಂಚ್ಯಾ ಮಧ್ಲ್ಯಾ ದಿಸಾ ಕೊಣೆಂ ಪಳೆಂವ್ಕ್ ನಾತ್‌ಲ್ಲೆಂ.

ತಿ ಪಾಟಿಂ ಯೆತಾನಾ ಜೊರ್ಜಿಚಿ ಆವಯ್ ಗಾಳಿ ಸೊಂವೊನ್ ಗೆಲ್ಲಿ ಖಂಯ್. ಹೆರಾಂ ಟೀಚರಿಂನಿ ತಿಕಾ ಸಮಾಧಾನ್ ಕರುನ್ ಪಾಟಿಂ ಧಾಡ್‌ಲ್ಲಿ. ಟ್ರೆಸ್ಸಿ ಟೀಚರಿಕ್ ಉಲೊಂವ್ಕ್ ಉತ್ರಾಂ ಸುಟ್ಲಿಂ ನಾಂತ್. ಸರ್ವ್ ಟೀಚರ್‍ಯೊ ದೊನ್ಫಾರಾಂಚ್ಯಾ ಜೆವ್ಣಾಕ್ ಯೆತಾನಾ ತಿಣೆಂ ಜೊರ್ಜಿಕ್ ಭಿತರ್ ಆಪಯ್ಲೊ. ಭಿತರ್‍ಲ್ಯಾ ಕುಡಾಂತ್ ತಾಕಾ ಆಪೊವ್ನ್ ವ್ಹೊರ್‍ನ್ ತಾಚ್ಯಾ ತಕ್ಲೆಚೆಂ ದೊಂಕುಟ್ ಪಳೆತಾನಾ ತಿಚ್ಯಾ ದೊಳ್ಯಾಂತ್ಲ್ಯಾನ್ ಝರಿ ದೆಂವ್ಲ್ಯೊ. ತಾಚ್ಯಾ ಉಪ್ರಾಂತ್ ಜೊರ್ಜಿಚೆಂ ತೊಂಡ್ ಉಭಾರ್‍ನ್ ಆಪ್ಲ್ಯಾ ಪುತಾಚೊ ಉಮೊ ಘೆತ್‌ಲ್ಲ್ಯಾಬರಿಚ್ ತಾಚ್ಯಾ ಗಾಲಾಚೊಯ್ ಉಮೊ ಘೆವ್ನ್ ತಾಕಾ ಧಾಡ್ಲೊ.

ಜೊರ್ಜಿಕ್ ಮಿಸ್ತೆರ್ ಕಳೊಂಕ್‌ಚ್ ನಾ. ಟ್ರೆಸ್ಸಿ ಟೀಚರಿನ್ ತ್ಯಾ ಉಪ್ರಾಂತ್ ಕೊಣಾಕೀ ಮಾರ್‌ಲ್ಲೆಂ ನಾ. 

____________________________________________________________________

Play the video

Watch on YouTube