Tressy Teacher

"Soitan ttichor aili!" panchvea klasintle bhurge ekameka uloyit, hasot, poixilean yemvcha Tressy ttichorik pollelagle.

"Cholta pollere ti, hostichem pil chol‌l'leabori. Tichem muskar polle kallem kallem zalam!" konn‌gi eklo bhurgo vonttam bhitor‌ch mhonnalo.

"Sshh... Sshh... Tikese lovo uloi‌re George-. Aikat zalear dourchi na". Dusro bhurgo hallvayen mhonnalo.

Itlear bharadhik mettam kaddit Tressy ttichor iskolachim mettam choddtana, kapadd pamya pondak poddon ekachchhonne lott‌l'leabori zaun vomtich poddtana hatantle buk teuxin heuxin usalltana bhurgim sogllim ekachchhannem zoran haslim.

"Borem zaichai, hat moddlear puro. Amkam marta polle" konn‌gi bhurgo puspustana, bhomvtonniche bhurge zoran hasle. Tressy ttichorichea kanant him utram kotthinnayen apttalim.

"Horamachea puta... Tuji patt nitt kortam!" tinnem dant khirlile. Dolleantlean ujeachim kenddam vonkon ti koxttamni ubhi rauli. Tosem charam-i kuximni pollelagli. Ximp‌l'le buk vinchun divonko ekloi mukhar sorana. Chint‌l'leabori ticho rag godd mirvon vechea sthitier paulo.

"George-!" hankreli Tressy ttichor, baglachea addosak ravon tillchea George-k polleun. George- kampat't ailo "buk vinchun dizai mholl'llem tuka kollanamyere reddea?" tichea khorkos utram sangata tin-char nixttur thapddam George-chea kanpatteacher boslim. Tachea mottvea kesank dhorn budd'dditana pattir char dhumke bosoilem.

"vinch vegim dukra! tumkam atam sollgi dilear magir vhodd zatana kitem sogllem korunk pauxat" ti ghumrkeli. George- matr maranchea karan roddanastam tikach dolle vattarn polleunko poddlo.

Atam ttichor krodhan pixi zamvchi matr urli. Yedoso pilkatto, reddo, dukor, boil apnnachem utar aikana mhollear? tachea tornea baulleank dhorn tinnem zoran voddlem "aikanamyvere mhojem utar?" narlak narl apttamvcheabori tinne lagxilea kundeak George-chi tokli bollan apttili.

"mam-i!" George- atam dukhin pimrgalo.

"Atam mam-i mhonntaive..... Tuji mam-i morn vochonk!" osem gallincho ximvor George-cher ani tachea auycher vot'tana dusri ttichor modhem aili. George- roddon iskala bhair gel'li khobar konnaichea dolleank gelina.

Iskol suru zalem. Kallea follear chuneache gitt voddn bhurgeank lekam ditana Tressy ttichorichea motint somadhan na zalem. Somadhan astelem zaleari kosem?

tteacher

***

Modhyom' vorgachea kuttmant Tressy zolmal'lem. Bapoi zaku, rukachea kamacho mest. Auy, fulam randvoyecho veapar kortali. Tressychem koxttamni mettrik xikon zalem ani tedalla taka bhara vorsam kazarachi prai. Tedalla hatak ek ani pamyank ek mholl'lleabori tachea sobhayek polleun noure mukhar aile. Punn tannim vicharli dot khoim thaun haddtolo zaku mest? sur ani sor‍yak‌ch kulint mell‌l'lea pagant ordho mukkal vantto udak zaun vetalo zal'lean "dhormak vhortat zalear vhorondit!" mholl'llim chintnam to ottoitana.....

Mettrik zal'lem Tressy ek vors ghora boslem "ani osench ghora boson uvo marcheove? kazar sod'deak zamvchea bori disana. Marli xenddi.... Ttichor zalear kitem? Tressyn chintlem ani don vorsam bhitor Tressy ttichor zalem.

Tressychem kam' bhovo sulobh vell paxar korunk ttichor zal'lea taka boro vell paxar korunk mell'llo. Lagxilea hottela thaun cha-kafi haddoun, bhurgeank vachunk-borounko diun kuddant pott'ttangam marchim-i tachea disacho ek dondho zalo. Vorsam ekauyr ek oxim dha utorlim. Hea dha vorsam modhem tachelagim kazar zatam mhonn dog mestri matr mukhar sorle. Punn te kazar zalenant. Lokache dolle vollta mhonnasor tanchi sollaull cholon magir burseo man kaddcheo khobro gop‍chip zatan te tem iskol soddun khobrevinne nisorle.

Tressy niraxechea khondkak xeuttalem ani kitlo temp ramvche? atam tem mukkal mhatareborim dista. Ttichor mhollear gamvar soirikechea markettint deddkechem mol na. Xeuttim dogam bhurgeancho bapoi, eka vidhur nourealagim tem kazar zalem.

Sor‍ya ani sott'tteacho gulam' zal'lea tachelagim Tressyk sukhache dis mellana zale. Somadhane bodlak sodam-i khont, dukh, niras ani zhogddem ghova baile modhem chukana zalem. Hanchea modhem onath bhurgi koxttatana polleunko nhozo zaun tanchea mel'lea auychea auyn tankam aplea ghora vhorn dourlem.

Atam Tressyn apnna thoim fenddemvcho rag konnacher kaddcho? dekun motichi bezarai pois korunk kazar zaun ekach vorsan portun ttichor zalem. Thomyi taka somadhan na. Dis vetam vetam nixtturai choddon yeun klasintlea bhurgeank kotthorayen marunk ani donnsunk aitem zalem. Tachea maranchea dukhin mon diun xikcheyi bodd'dda zatana, bodd'dda aniki bud'du zale.

"zai zalear xikondit, natlear xennachi bhatti vhavondit" chintalem tem.  

"apnnak kaim devan bhurgim dileantve?" thodde pauttim apnnak bhurgim nant mhonn tem korgatalem.

Xeuttim devan tachem magnnem aikalem zaizai. Tressy challis vorsanchea prayer eka cherkea bhurgeachi auy zalem. Utor prayer cherko zolmalean‌gi ya tachich sobhai cherkeak ayil'ligi, cherko matr sobhit-sundor goro goro zaun polleteleank portun polleyamsem distalo. Panch vorsamni taka apnnem xikomvche iskol soddn madringer xikonk ghalo.

Cherko siril polleunko kitlo sundor titloch xikonk odd'ddo mhonn thoinchea ttichorichim duram yetalim.

***

Jea disa George-k onauxy marn Tressyttichor kodelar bos‌l'leakoddem khodvolltali. Tea disa ani teach vellar bhurgo siril bukanchem potem kanngheun roddat tiche sorxim ailo.

"kitem zalem puta?" put roddon ayil'lo polleun hankreli Tressy ttichor.

"ttichorin inglix yenat‌l'leak mar‍lem!" apnnak mar‌l'lea ttichorichim duram sangon siril dorobost roddlo. Tachem tambxem mukhomoll binddabori tambddem zal'lem mateache kes humball‌l'le. Dhonnacho nitoll jibbo mhell‌l'lo rotache mar khaun hat suz‌l'le kanak chimtto kadd‌l'lean at'tam magir rogat vonktaso tambddo zal'lo. Eka utran sangchem zalear sundor siril vidrup distalo.

"tujea chorobe! tujea hatank ar marunk" Tressy ttichor atam nixtturayen sirilak mar‌l'lea ttichorik xirap ghalilagli.  

"Tuka hamv atam bud xikoina tor..." tinnem dant khirlile tosem roddchea putak gheun bhair sor‍li. Voram sadde dha ikra zatalim zal'lean votachea daven dhornni thaun ujea dhavo bhair sortali. Iskolachye getti bhair sor‍tananch vichitr dixtt tinnem poixilea margar polleli. Tinnem mar‌l'lea George-k voddit't George-chi auy tichea iskolak yetali.

Vadallam tichea toklent ghomvlim. Soraram ti vodda rukachea mullantlean angddinchea addosak lipon dusrea margar pauli.

"E pixea, khoim tum vetai? konnak tum sodhtai?" vichitr tallo tika aikal'leabori zalo. "tuji zhoddti poili kor‍chi soddn heranchi zhoddti korunk bhair sor‍lamygi? aicheach disa nirapradhi bhurgeak nixtturayek mar‌l'lea vaginni. Tum tujea bhurgeak mar‌l'leachi nit korunk vetai? oblle tuji nit korunk atam ti auy ailea! kiteak liptai? kiteak chukon dhamvtai?"

Sirilachem iskol lagim paulem. Getti lagim konni pollenant mholl'llem kolltoch tinnem putachea tonddak ek umo dilo. "voch puta" mhonnali Tressy ttichor "atam ttichor mar‍chi na. Boro kor‍n xik". Sirilachi patt iskolachea vonndimni dhamplea uprant thorthor‍yam kampchi Tressy ttichor hollu bhitor‍lea vatten igorjek geli ani sorpoddon villap kor‍tana bara voranchea modhlea disa konnem polleunko nat‌l'lem.

Ti pattim yetana George-chi auy galli somvon gel'li khoim. Heram ttichorimni tika somadhan korun pattim dhadd‌l'li. Tressy ttichorik ulounko utram suttlim nant. Sorv ttichor‍yo donfaranchea jeunnak yetana tinnem George-k bhitor apoilo. Bhitor‍lea kuddant taka apoun vhor‍n tachea toklechem donkutt polletana tichea dolleantlean zhori demvleo. Tachea uprant George-chem tondd ubhar‍n aplea putacho umo ghet‌l'leaborich tachea galachoi umo gheun taka dhaddlo.

George-k mister kollonk‌ch na. Tressy ttichorin tea uprant konnaki mar‌l'lem na. 

__________________________________________________________

Watch on YouTube