ಕಾರ್ಕಳಾಂತ್ ದಾಯ್ಜ್-ಮಿತ್ರ್ ಸಾಹಿತಿಕ್ ಶಿಭಿರ್
ದಾಯ್ಜ್ ಡಾಟ್ ಕೊಮ್ ಆನಿ ಮಿತ್ರ್ ಹಫ್ತ್ಯಾಳೆಂ ಹಾಣಿಂ ಕಾರ್ಕಳ್ ವಾರಾಡ್ಯಾಚಾ ಹಂತಾಚೆಂ ಎಕಾ ದಿಸಾಚೆಂ ಸಾಹಿತಿಕ್ ಶಿಭಿರ್ ಹೆಚ್ಚ್ ಮಾಯ್ ಮಯ್ನ್ಯಾಚಾ 20 ತಾರಿಕೆರ್, ಕಾರ್ಕಳ್ ಕ್ರೈಸ್ಟ್ ಕಿಂಗ್ ಇಗರ್ಜೆಚಾ ಸಭಾಸಾಲಾಂತ್ ಮಾಂಡುನ್ ಹಾಡ್ಲೆಂ. ಸಕಾಳಿಂ ಸಾಡೆ ನೋವ್ ವೊರಾಂಕ್ ಸುರು ಜಾಲ್ಲ್ಯಾ ಹ್ಯಾ ಶಿಭಿರಾಚೆಂ ಉಗ್ತಾವಣ್ ಕರುಂಕ್ ಕಾರ್ಕಳ್ ಫಿರ್ಗಜೆಚೊ ವಿಗಾರ್ ಬಾಪ್ ಮಾ|ಗೋಮ್ಸ್ ಹಾಜರ್ ಆಸ್ಲ್ಲೊ, ತಾಚೆಸವೆಂ ಕೊಂಕ್ಣೆಚೆ ಫಾಮಾದ್ ಸಾಹಿತಿ ಎಡ್ವಿನ್ ಜೆ.ಎಫ್.ಡಿ’ಸೋಜ್, ಡೋಲ್ಫಿ ಕಾಸ್ಸಿಯಾ, ದಾಯ್ಜ್ ಸಂಪಾದಕ್ ವಲ್ಲಿ ಕ್ವಾಡ್ರಸ್ ಆನಿ ಮಿತ್ರ್ ಸಂಪಾದಕ್ ಎಲ್ಯೆರ್ ತಾಕೊಡೆ ವೆದಿಚೆರ್ ಆಸ್ಲ್ಲೆ. ಕಾರ್ಯಾಚೆಂ ಉಗ್ತಾವಣ್ ಕರ್ತಚ್ಚ್ ಬಾಪ್ ಗೋಮ್ಸ್ ಹಾಣಿಂ ಫಿರ್ಗಜೆಂನಿ ಆಸ್ಚಾ ಯುವ ತಾಲೆಂತಾಕ್ ಉತ್ತೇಜನ್ ದಿಂವ್ಚಿ ಆಯ್ಚಾ ಕಾಳಾರ್ ಭೋವ್ ಗರ್ಜ್ ಆಸಾ ಮ್ಹಳ್ಳೆಂ ಸಮ್ಜೊನ್ ಹಿಂ ಪಾವ್ಲಾಂ ಕಾಡುಂಕ್ ಮುಕಾರ್ ಸರ್ಲ್ಲ್ಯಾ ’ದಾಯ್ಜ್-ಮಿತ್ರ್’ ಪಂಗ್ಡಾಕ್ ಉಲ್ಲಾಸ್ ಪಾಟಯ್ಲೆ ಆನಿ ವ್ಹಡಾ ಸಂಖ್ಯಾನ್ ಹಾಜರ್ ಆಸ್ಲ್ಲ್ಯಾ ಶಿಭಿರಾರ್ಥಿಂಕ್ ಉಲ್ಲಾಸ್ ಪಾಟವ್ನ್, ಹ್ಯಾ ಶಿಭಿರಾಚೊ ಭರ್ಪೂರ್ ಫಾಯ್ದೊ ಜೊಡುಂಕ್ ಉಲೊ ದಿಲೊ.
ಶಿಭಿರಾಚಾ ಪಯ್ಲ್ಯಾ ಭಾಗಾಂತ್ ’ಕೊಂಕ್ಣಿ ವಾವ್ರ್’ ಮ್ಹಳ್ಳ್ಯಾಚೆರ್ ಸವಿಸ್ತಾರ್ ವಿವರ್ ದೀಂವ್ಕ್ ಪ್ರಮುಕ್ ಉಲವ್ಪಿ ಜಾವ್ನ್ ಹಾಜರ್ ಆಸ್ಲ್ಲೊ ಪತ್ರಿಕೋಧ್ಯಮಿ, ಸಾಹಿತಿ ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾ ಹಾಣೆಂ ಆಯ್ಚಾ ಕಾಳಾರ್ ಕೊಂಕ್ಣಿ ವಾವ್ರ್ ಮುಖಾರುನ್ ವರುಂಕ್ ಕೊಣಾಚಿ ಗರ್ಜ್ ಆಸಾ ಮ್ಹಳ್ಳೆವಿಶಿಂ ಸವಿಸ್ತಾರ್ ವಿವರ್ ದಿಲೊ. ತ್ಯಾ ಉಪ್ರಾಂತ್ ಗಲ್ಫಾಂತ್ ಕೊಂಕ್ಣಿ ವಾವ್ರ್ ಕಸೊ ಜಾತಾ ಮ್ಹಳ್ಳೆವಿಶಿಂ ಮಾನೆಸ್ತ್ ಜೆರಿ ಡಿ’ಮೆಲ್ಲೊ ಬೆಂದುರ್ ಹಾಚೆಂ ಸವಿಸ್ತಾರ್ ಉಲವ್ಪ್ ಜಾತೆಚ್ಚ್, ಮಾನೆಸ್ತಿಣ್ ಗ್ಲೇಡಿಸ್ ರೇಗೊ ಹಿಣೆಂ ಕೊಂಕ್ಣಿ ವಾವ್ರಾವಿಶಿಂ ಅಪ್ಲೊ ಅನ್ಭೋಗ್ ವಾಂಟುನ್ ಘೆತ್ಲೊ ಆನಿ ಅಖ್ರೇಕ್ ಮಾನೆಸ್ತ್ ವಲ್ಲಿ ಕ್ವಾಡ್ರಸಾನ್ ಫಿರ್ಗಜೆಹಂತಾರ್ ಕೊಂಕ್ಣಿ ವಾವ್ರ್ ಕಸೊ ಕರ್ಯೆತ್ ಮ್ಹಳ್ಳೆವಿಶಿಂ ವಿವರ್ ದೀವ್ನ್, ಹರ್ಯೆಕಾ ಯುವಜಣಾನ್ ಆಪಾಪ್ಲ್ಯಾ ಫಿರ್ಗಜೆಂತ್ ಅಸಲೊ ಕೊಂಕ್ಣಿ ವಾವ್ರ್ ಸುರು ಕರುಂಕ್ ಉಲೊ ದಿಲೊ. ಉಪ್ರಾಂತ್ ಶಿಭಿರಾರ್ಥಿಂನಿ ಉಲವ್ಪ್ಯಾಂಸವೆಂ ಭಾಸಾಭಾಸ್ ಚಲಯ್ಲಿ.
(ವಲ್ಲಿ ಕ್ವಾಡ್ರಸ್, ಎಡ್ವಿನ್ ಜೆ.ಎಫ್.ಡಿ’ಸೋಜ್, ಮಾ|ಬಾ|ಗೋಮ್ಸ್, ಡೊಲ್ಫಿ ಕಾಸ್ಸಿಯಾ, ಎಲ್ಯೆರ್ ತಾಕೊಡೆ)
(ವಿತೊರಿ, ಕಾರ್ಕಳ್)
ಶಿಭಿರಾಚಾ ದುಸ್ರ್ಯಾ ಭಾಗಾಂತ್ ’ಕೊಂಕ್ಣಿ ಮಟ್ವ್ಯೊ ಕಾಣ್ಯೊ’ ಮ್ಹಳ್ಳೆವಿಶಿಂ ಮಾನೆಸ್ತ್ ಎಡ್ವಿನ್ ಜೆ.ಎಫ್.ಡಿ’ಸೋಜ್ ಆನಿ ಮಾನೆಸ್ತ್ ಕೆವಿನ್ ಡಿ’ಮೆಲ್ಲೊ ಹಾಣಿಂ ಸವಿಸ್ತಾರ್ ರಿತಿನ್ ಆಪಾಪ್ಲೆ ವಿಚಾರ್ ಉಚಾರ್ಲೆ. ಎಡ್ವಿನ್ ಜೆ.ಎಫ್.ಡಿ’ಸೋಜ್ ಹಾಣೆಂ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಕಶ್ಯೊ ಬರಂವ್ಚ್ಯೊ ಮ್ಹಳ್ಳೆವಿಶಿಂ ಉಲಯ್ಲೊ. ಉಪ್ರಾಂತ್ ಶಿಭಿರಾರ್ಥಿಂನಿ ಉಲವ್ಪ್ಯಾಂಲಾಗಿಂ ಭಾಸಾಭಾಸ್ ಕೆಲಿ.
ದನ್ಪಾರಾಂಚೆಂ ಜೆವ್ಣಾಚೆಂ ಕಾರ್ಯೆಂ ಜಾತೆಚ್ಚ್, ಶಿಭಿರಾಚೆಂ ಕಾರ್ಯೆಂ ಮಾಂಡುನ್ ಹಾಡ್ಲ್ಲೊ ಸುತಾರಿ ವಿತೊರಿ ಕಾರ್ಕಳ್ ಹಾಣೆಂ ಕೊಂಕ್ಣಿ ಕ್ವಿಜ್ ಚಲವ್ನ್ ವೆಲೊ ತಶೆಂಚ್ ಜಿಕ್ಪ್ಯಾಂಕ್ ಇನಾಮಾಂ ಜಾವ್ನ್ ’ಆಶಾವಾದಿ ಪ್ರಕಾಶನ್’ ಹಾಂಚೊ ’ಸತಾಂ ಆನಿ ಖತಾಂ’ ಬೂಕ್ ದಿಲೆ.
(ವಲ್ಲಿ ಕ್ವಾಡ್ರಸ್, ಡೊಲ್ಫಿ ಕಾಸ್ಸಿಯಾ, ಜೆರಿ ಡಿ’ಮೆಲ್ಲೊ, ಗ್ಲೇಡಿಸ್ ರೇಗೊ)
(ಎಡ್ವಿನ್ ಜೆ.ಎಫ್.ಡಿ’ಸೋಜ್, ಕೆವಿನ್ ಡಿ’ಮೆಲ್ಲೊ)
ಉಪ್ರಾಂತ್ ಸುರು ಚಲ್ಲ್ಲ್ಯಾ ವೆದಿಚಾ ಕಾರ್ಯಾಕ್ ಮುಖೆಲ್ ಸಯ್ರೆ ಜಾವ್ನ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಶ್ ಮಾನೆಸ್ತ್ ಎರಿಕ್ ಒಜೆರಿಯೊ, ಮಾ|ಬಾ|ವಲೇರಿಯನ್ ಫೆರ್ನಾಂಡಿಸ್, ಮಾನೆಸ್ತ್ ಎಡ್ವಿನ್ ಜೆ.ಎಫ್.ಡಿ’ಸೋಜ್, ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾ, ಮಾನೆಸ್ತಿಣ್ ಗ್ಲೇಡಿಸ್ ರೇಗೊ ಆನಿ ಕಾರ್ಯಾಚೊ ಅಧ್ಯಕ್ಶ್ ಜಾವ್ನ್ ಮಾ|ಬಾ|ರಿಚಾರ್ಡ್ ರೇಗೊ (ರೆಗಾಮ್ ತಾಕೊಡೆ) ಹಾಜರ್ ಆಸ್ಲ್ಲಿಂ.
ಕಾರ್ಯಾಚಾ ಸುರ್ವಾತೆರ್ ದಾಯ್ಜ್ ದೋನ್ ವರ್ಸಾಂ ಸಂಪವ್ನ್ ತಿಸ್ರ್ಯಾ ವರ್ಸಾಕ್ ಪಾಂಯ್ ತೆಂಕ್ಚಾ ವಗ್ತಾಂ, ’ದಾಯ್ಜ್ ಡಾಟ್ ಕೊಮ್’ ವಿಶಿಂ ಸವಿಸ್ತಾರ್ ರಿತಿಚಿ ಮಾಹೆತ್ ಆಟಾಪ್ಚೆಂ ಲೇಖನ್ ಮಾನೆಸ್ತ್ ಮೆಲ್ವಿನ್ ಕ್ಯಾಸ್ತಲಿನೊ ಪೆರ್ನಾಲ್ ಹಾಣೆಂ ಪ್ರಸ್ತುತ್ ಕೆಲೆಂ.
(ಶಿಭಿರಾರ್ಥಿಂ)
(ಶಿಭಿರಾರ್ಥಿಂ)
(ಶಿಭಿರಾರ್ಥಿಂ)
(ಕ್ಲೆಮೆಂಟ್ ತಾಕೋಡೆ, ಮೆಲ್ವಿನ್ ಪೆರ್ನಾಲ್, ಐವಿ ಪೆರ್ನಾಲ್, ಸುನಿಲ್ ಫೆರ್ನಾಂಡಿಸ್, ರಿಚಾರ್ಡ್ ಕವ್ತಾರ್, ಪಿಯುಸ್ ಜೇಮ್ಸ್ ಕರುಗಳ್ನಡೆ, ವಾಯ್ಲೆಟ್ ಪಿರೇರಾ, ಜಿಯೋ ಆಗ್ರಾರ್)
ಉಪ್ರಾಂತ್ ಆಶಾವಾದಿ ಪ್ರಕಾಶನಾಚಾ ಪಾಂಚ್ ನವ್ಯಾ ಬುಕಾಂಚಿ ಮಟ್ವಿ ವಳೊಕ್, ಮಾನೆಸ್ತ್ ಸುನಿಲ್ ಫೆರ್ನಾಂಡಿಸ್ ಕೋಟ ಹಾಣೆಂ ಕರುನ್ ದಿತೆಚ್ಚ್ ಹ್ಯಾ ಬುಕಾಂಚೆಂ ಉಗ್ತಾವಣ್ ಕಾರ್ಯೆಂ ಚಲ್ಲೆಂ.
’ಪಾಟಿಂ ಗಾಂವಾಕ್’ (ವಲ್ಲಿ ಕ್ವಾಡ್ರಸಾಚಿ ಸವಿ ಕಾದಂಬರಿ - ಕೊಂಕ್ಣೆಂತ್ಲಿ ಪಯ್ಲಿ ಇ-ಕಾದಂಬರಿ) (ಉಗ್ತಾವ್ಪಿ: ಡೊಲ್ಫಿ ಕಾಸ್ಸಿಯಾ)
’ಬಾಮುಣಾಚೆಂ ಚೆಡುಂ’ (ಎಚ್ಚೆಮಾಚೊ ತಿಸ್ರೊ ಕವಿತಾಜಮೊ)(ಉಗ್ತಾವ್ಪಿ: ಎರಿಕ್ ಒಜೇರಿಯೊ)
’ದರ್ಭಾರಾಂತ್ಲಿ ಫಿಂರ್ಗೊಣ್’ (ವಲ್ಲಿ ಕ್ವಾಡ್ರಸಾಚೊ ತಿಸ್ರೊ ಕವಿತಾಜಮೊ)(ಉಗ್ತಾವ್ಪಿ: ಎಡ್ವಿನ್ ಜೆ.ಎಫ್.ಡಿ’ಸೋಜ್)
’ದರ್ಯಾಕ್ ಉದಾಕ್’ (ಕವಿತಾಪಾಠ್ ಭಾಗ್-2) (ಕೊಂಕ್ಣಿ ಕವಿತಾ ಅಧ್ಯಯನ್ ಲೇಕನಾಂ - ಉಗ್ತಾವ್ಪಿಣ್: ಗ್ಲೇಡಿಸ್ ರೇಗೊ)
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (ಶೆಂಭೊರ್ ಕವಿಂಚಾ ಶೆಂಬೊರ್ ಕವಿತಾಂಚೊ ಜಮೊ)(ಉಗ್ತಾವ್ಪಿ: ಮಾ|ಬಾ|ವಲೇರಿಯನ್ ಫೆರ್ನಾಂಡಿಸ್)
ಹೆಚ್ಚ್ ಸಂದರ್ಭಾರ್ ಕೊಂಕ್ಣೆಂತ್ಲೊ ಪಯ್ಲೊ ಸಂಪೂರ್ಣ್ ಇ-ಬೂಕ್ ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಹಾಚೆಂ ಉಗ್ತಾವಣ್ ಮಾನೆಸ್ತ್ ಜೆರಿ ಡಿ’ಮೆಲ್ಲೊ ಹಾಣೆಂ ಕೆಲೆಂ. (ಪಿಡಿಎಫ್ ಫಾರ್ಮೇಟಿರ್ ಆಸ್ಚೊ ಹೊ ಬೂಕ್ ಕೊಣೆಂಯ್ ಅಂತರ್ಜಾಳಿ ಥಾವ್ನ್ ಅಪ್ಲ್ಯಾ ಕಂಪ್ಯೂಟರಾಕ್ ಡಾವ್ನ್ಲೋಡ್ ಕರ್ನ್ ವಾಚ್ಯೆತಾ)
(ಬೂಕ್ ಉಗ್ತಾವಣ್: ವಲ್ಲಿ ಕ್ವಾಡ್ರಸ್, ಮಾ|ಬಾ|ವಲ್ಲಿ ಫೆರ್ನಾಂದ್, ಗ್ಲೇಡಿಸ್ ರೇಗೊ, ಎರಿಕ್ ಒಝೆರಿಯೊ, ಡೊಲ್ಫಿ ಕಾಸ್ಸಿಯಾ, ಎಡ್ವಿನ್ ಜೆ.ಎಫ್.ಡಿ’ಸೋಜ್, ಜೆರಿ ಡಿ’ಮೆಲ್ಲೊ, ವಿತೊರಿ ಕಾರ್ಕಳ್)
(ಜಿಯೋ ಆಗ್ರಾರ್)
ಬುಕಾಂಚಾ ಉಗ್ತಾವಣಾ ಉಪ್ರಾಂತ್ ಮಾಂಯ್ಗಾಂವ್ ಸಾಂಡುನ್ ವೆಗಿಂಚ್ ಕೆನಡಾ ವಚೊಂಕ್ ಆಸ್ಚಾ ಫಾಮಾದ್ ಕೊಂಕ್ಣಿ ವಾವ್ರಾಡಿ, ಗಾವ್ಪಿ, ಅಂಕಣ್ಕಾರ್, ಕವಿ ಮಾನೆಸ್ತ್ ಜೆರಿ ಡಿ’ಮೆಲ್ಲೊ ಹಾಕಾ ’ದಾಯ್ಜ್-ಮಿತ್ರ್’ ತರ್ಫೆನ್ ಮಾನೆಸ್ತ್ ಎರಿಕ್ ಒಜೆರಿಯೊ ಹಾಣೆಂ ಶಾಲ್ ಪಾಂಗ್ರುನ್, ಫುಲಾಂ-ಫಳಾಂ ಆನಿ ಮಾನ್ಪತ್ರ್ ದೀವ್ನ್ ಸನ್ಮಾನ್ ಕೆಲೊ. ಮಾನೆಸ್ತ್ ಜೆರಿ ಡಿ’ಮೆಲ್ಲೊ ಆಪ್ಲ್ಯಾ ಉಲವ್ಪಾಂತ್ ಅಪುಣ್ ಕೊಂಕ್ಣೆಚೊ ವಾವ್ರ್ ಮುಖಾರುನ್ ವರ್ಚಿ ಉರ್ಭಾ-ಹುಮೆದ್ ಘೆವ್ನ್ ಕೆನಡಾ ವೆತಾಂ ದೆಖುನ್ ಕೊಂಕ್ಣೆಥಾವ್ನ್ ಕೆದಿಂಚ್ ಪಯ್ಸ್ ಆಸ್ಚೊಂನಾ ಮ್ಹಳ್ಳೊ ಸಂದೇಶ್ ದಿಲೊ. ಮಾನ್ ಕೆಲ್ಲೊ ಮಾನೆಸ್ತ್ ಎರಿಕ್ ಒಝೆರಿಯೊ ಉಲವ್ನ್ ಕೊಂಕ್ಣೆಕ್ ಆಜ್ ಅಸಲ್ಯಾ ವಾವ್ರಾಚಿ ಖೂಬ್ ಗರ್ಜ್ ಆಸಾ ಮ್ಹಣಾಲೊ ಆನಿ ಜೆರಿ ಡಿ’ಮೆಲ್ಲೊಚಾ ವಾವ್ರಾವಿಶಿಂ ತಾಣೆಂ ಶಾಭಾಸ್ಕಿ ಪಾಟಯ್ಲಿ. ಹ್ಯಾ ವೆದಿಚಾ ಕಾರ್ಯಾಚೆಂ ಸುರಾತ್ಪಣ್ ಘೆತ್ಲ್ಲೆಂ ಫಾಮಾದ್ ಉಲವ್ಪಿ ಮಾನೆಸ್ತ್ ಜಿಯೋ ಆಗ್ರಾರ್ ಹಾಣೆಂ.
(ವಲ್ಲಿ ಕ್ವಾಡ್ರಸ್, ಮಾ|ಬಾ|ವಲ್ಲಿ ಫೆರ್ನಾಂದ್, ಗ್ಲ್ಯಾಡಿಸ್ ರೇಗೊ, ಎರಿಕ್ ಒಝೆರಿಯೊ, ಡೊಲ್ಫಿ ಕಾಸ್ಸಿಯಾ, ಎಡ್ವಿನ್ ಜೆ.ಎಫ್.ಡಿ’ಸೋಜ್ ಆನಿ ಮಾನ್ ಘೆಂವ್ಚೊ ಜೆರಿ ಡಿ’ಮೆಲ್ಲೊ)
(ಉಭಿಂ ಆಸ್ಚಿಂ ಸನ್ಮಾನಿತಾಂ ಬರವ್ಪಿಂ: ಮೆಲ್ಕ ಮಿಯಾರ್, ಅವಿನಾ ಮಿಯಾರ್, ವಿತೊರಿ ಕಾರ್ಕಾಳ್, ಕೆವಿನ್ ಡಿ’ಮೆಲ್ಲೊ, ಜೋರ್ಜ್ ಕ್ಯಾಸ್ತಲಿನೊ, ಮಾ|ಬಾ|ರೊನಾಲ್ಡ್ ಡಿ’ಸೋಜ್, ಸ್ಟೀಫನ್ ಪಿಂಟೊ, ವಿಲ್ಮಾ ತೌರೊ (ಸ್ಟೇನ್ರೊ ಚಿ ಪತಿಣ್ ಆನಿ ಸ್ವೀಜಲ್ (ಧುವ್))
ಉಪ್ರಾಂತ್ಲ್ಯಾ ಕಾರ್ಯಾಂತ್ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005’ ಹಾಂತುಂ ಇನಾಮಾಂ ಜೊಡ್ಲ್ಲ್ಯಾಂಕ್ 30,000.00 ರುಪ್ಯಾಂಚಿಂ ಇನಾಮಾಂ ದಿಲಿಂ ಮಾ|ಬಾ|ರೊನಾಲ್ಡ್ ಪ್ರಕಾಶ್ ಡಿ’ಸೋಜ್ ಹಾಣಿಂ. ಜಿಕ್ಪ್ಯಾಂಚಿಂ ನಾಂವಾಂ;
ಮಟ್ವಿ ಕಾಣಿ ವಿಭಾಗ್
ಪಯ್ಲೆಂ (ರು.5000.00) ಇನಾಮ್: ಎಚ್ಚೆಮ್ [ಕಾಣಿ: ನಶಿಬಾಚಿ ರಾತ್]
ದುಸ್ರೆಂ (ರು.3000.00) ಇನಾಮ್: ಡಾ|ಎಡ್ವರ್ಡ್ ನಜ್ರೆತ್ [ಕಾಣಿ: ಜುಬ್ಲೆವ್]
ತಿಸ್ರೆಂ (ರು.2000.00) ಇನಾಮ್: ಕೆವಿನ್ ಡಿ’ಮೆಲ್ಲೊ [ಕಾಣಿ: ಅನ್ವೇಷಣ್]
ಕವಿತಾ ವಿಭಾಗ್
ಪಯ್ಲೆಂ (ರು.5000.00) ಇನಾಮ್: ಎಚ್ಚೆಮ್ [ಕವಿತಾ: ಮಾತ್ಯೆಚೆಂ ರುದಾನ್]
ದುಸ್ರೆಂ (ರು.3000.00) ಇನಾಮ್: ಮೆಲ್ವಿನ್ ಪಿಂಟೊ ನೀರುಡೆ [ಕವಿತಾ: ದುಕಾಳ್ ಗಿತಾಂ ಆನಿ..]
ತಿಸ್ರೆಂ (ರು.2000.00) ಇನಾಮ್: ವಿಲ್ಸನ್ ಕಟೀಲ್ [ಕವಿತಾ: ಏಕ್ ಕವಿತಾ ಅಶಿ]
ಲೇಖನಾಂ ವಿಭಾಗ್
ಪಯ್ಲೆಂ (ರು.5000.00) (ರೆಗ್ರೊ ಪಾಳುಂಕ್ ನಾತ್ಲ್ಲ್ಯಾನ್ ರದ್ದ್ ಕೆಲಾಂ)
ದುಸ್ರೆಂ (ರು.3000.00) ಇನಾಮ್: ಡಾ|ಎಡ್ವರ್ಡ್ ನಜ್ರೆತ್
ತಿಸ್ರೆಂ (ರು.2000.00) ಇನಾಮ್: ಸ್ಟೀಫನ್ ಕ್ವಾಡ್ರಸ್, ಪೆರ್ಮುದೆ
ಹೆಚ್ಚ್ ಸಂದರ್ಭಾರ್ ಕಾರ್ಕಳ್ ವಾರಾಡ್ಯಾಂತ್ಲ್ಯಾ ಬರವ್ಪ್ಯಾಂಕ್ ದಾಯ್ಜ್ ತರ್ಫೆನ್, ಕಾರ್ಯಾಚೊ ಅಧ್ಯಕ್ಷ್ ಮಾ|ಬಾ|ರಿಚಾರ್ಡ್ ರೇಗೊ ಹಾಣಿಂ ಸನ್ಮಾನ್ ಕೆಲೊ. ಸನ್ಮಾತಾಂ;
ಕೆವಿನ್ ಡಿ’ಮೆಲ್ಲೊ ಕಾರ್ಕಳ್, ಜೋರ್ಜ್ ಕ್ಯಾಸ್ತಲಿನೊ ನಕ್ರೆ, ಸ್ಟೀಫನ್ ಪಿಂಟೊ ಕುಂಟಲ್ಪಾಡಿ, ಸ್ಟೇನ್ರೊ ಅಜೆಕಾರ್, ವಿತೊರಿ ಕಾರ್ಕಳ್, ಮಾ|ಬಾ|ರೊನಾಲ್ಡ್ ಪ್ರಕಾಶ್ ಡಿ’ಸೋಜ್ ಅಜೆಕಾರ್, ಅವಿನಾ ಮಿಯಾರ್ ಆನಿ ಮೆಲ್ಕ ಮಿಯಾರ್.
ಉಪ್ರಾಂತ್ ಅಧ್ಯಕ್ಶಾಚಾ ಭಾಶಣಾಂತ್ ರೆಗಾಮ್ ತಾಕೊಡೆನ್ ಕೊಂಕ್ಣೆಂತ್ ಇ-ಬೂಕ್ ಕೊಂಕ್ಣಿ ಸಾಹಿತ್ಯಾಕ್ ಕಸಲಿ ದೇಣ್ಗಿ ದೀಂವ್ಕ್ ಸಕತ್ ಮ್ಹಳ್ಳೆವಿಶಿಂ ಅಪ್ಲೆ ವಿಚಾರ್ ವೆಕ್ತ್ ಕರಿಲಾಗ್ಲೊ.
ವಿತೊರಿ ಕಾರ್ಕಳ್ ಹಾಣೆಂ ಉಪ್ಕಾರ್ ಆಟವ್ಣೆಚೆಂ ಕಾರ್ಯೆಂ ಚಲವ್ನ್ ವೆಲೆಂ. ಅಜೆಕಾರ್, ಕಾರ್ಕಳ್, ಅತ್ತೂರ್, ಹಿರ್ಗಾನ್, ನಕ್ರೆ, ಕಣಜಾರ್, ಪಾರಪ್ಪಾಡಿ, ಮಿಯಾರ್ ಆನಿ ನೆಲ್ಲಿಕಾರ್ ಫಿರ್ಗಜೆಥಾವ್ನ್ ಆಯಿಲ್ಲ್ಯಾ 54 ಶಿಭಿರಾರ್ಥಿಂನಿ ಹ್ಯಾ ಶಿಬಿರಾಚೊ ಭರ್ಪೂರ್ ಫಾಯ್ದೊ ಜೊಡ್ಲೊ.
(ಅವಿನಾ ಮಿಯಾರ್ - ಮಯ್ನ್ಯಾಚಿ ಕವಯತ್ರಿ)
ಉಪ್ರಾಂತ್ ಮಾಂಡ್-ಸೊಭಾಣ್ ಹಾಂಚೆಂ ಧಾವೆಂ ಕವಿತಾ-ಸೊಭಾಣ್ ಕವಿ ವಲ್ಲಿ ಕ್ವಾಡ್ರಸಾನ್ ಚಲವ್ನ್ ವೆಲೆಂ ಲಗ್ಬಗ್ ಸತ್ತರ್ ಕವಿತಾ ರಸಿಕಾಂನಿ ಚಡುಣೆಂ ವೀಸ್ ಕವಿಂಚಾ ಕವಿತಾಂಕ್ ಆಯ್ಕೊನ್ ಭರ್ಪೂರ್ ಆನಂದ್ ಜೊಡ್ಲೊ. ಅವಿನಾ ಮಿಯಾರ್ ಮಯ್ನ್ಯಾಚಿ ಕವಯತ್ರಿ ಜಾವ್ನ್ ವಿಂಚೊನ್ ಆಯ್ಲಿ ಆನಿ 500 ರುಪ್ಯಾಂಚೆಂ ಇನಾಮ್ ಜೊಡುಂಕ್ ಪಾವ್ಲಿ.
ಸಕಾಳಿಂ ಸಾಡೆ ನೋವ್ ವೊರಾಂಕ್ ಸುರು ಜಾಲ್ಲೆಂ ಕಾರ್ಯೆಂ ಸಾಂಜೆರ್ ಸಾಡೆ ಪಾಂಚ್ ವೊರಾಂಕ್ ಸಂಪ್ಲೆಂ.
ವರ್ದಿ - ದಾಯ್ಜ್ ಬಾತ್ಮಿ, ಮಂಗ್ಳುರ್
