ಆಜ್ಮಾನಾಂತ್ ಕೊಂಕಣಿ ಕವಿಗೋಷ್ಟಿ. ರೊಬರ್ಟ್ ಉದ್ಯಾವರ್ ಮ್ಹಯ್ನ್ಯಾಚೊ ಕವಿ
ಒಕ್ಟೋಬರ್ 21: ಹ್ಯಾಚ್ ಒಕ್ಟೋಬರ್ ಎಕ್ವೀಸ್ ತಾರಿಕೆರ್ ’ಕವಿತಾ’ ತರ್ಫೆನ್ ಆಜ್ಮಾನಾಂತ್ ಕೊಂಕಣಿ ಕವಿಗೋಷ್ಟಿ ಬೋವ್ ಯಶಸ್ವೆನ್ ಚಲ್ಲಿ. ಕವಿ ಮೆಲ್ವಿನ್ ರೊಡ್ರಿಗಸಾನ್ ಚಲವ್ನ್ ವೆಲ್ಲ್ಯಾ ಹೆ ಕವಿಗೋಷ್ಟಿಂತ್ ರೊಬರ್ಟ್ ಉದ್ಯಾವರ್ ಮ್ಹಯ್ನ್ಯಾಚೊ ಕವಿ ಜಾವ್ನ್ ವಿಂಚುನ್ ಆಯ್ಲೊ. ಕುವೈಟ್ ಥಾವ್ನ್ ಕವಿ ವಲ್ಲಿ ಕ್ವಾಡ್ರಸ್ ಹ್ಯಾ ಸಂದರ್ಭಿಂ ಹಾಜರ್ ಆಸ್ಲ್ಲೊ.
’ಕವಿತಾ’ ಟ್ರಸ್ಟಾನ್ ಯೆದೊಳ್ಚ್ಯಾ ಸಂಪ್ರದಾಯಾ ಭಾಯ್ರ್ ವಚೊನ್ ಪಯ್ಲೆ ಪಾವ್ಟಿಂ ದುಬಾಯ್ ಶೆರಾ ಭಾಯ್ರ್ ಆಜ್ಮಾನಾಂತ್ ಕವಿ ಆರ್ಥರ್ ಪಿರೇರಾಚ್ಯಾ ಘರಾ ಚಲವ್ನ್ ವೆಲ್ಲಿ ಕವಿಗೋಷ್ಟಿ ಹಾಜರ್ ಆಸ್ಲ್ಲ್ಯಾಂಚಿಂ ಕಾಳ್ಜಾಂ ಮನಾಂ ದಾಧೊಸ್ ಕರುಂಕ್ ಪಾವ್ಲಿ. ಯೆವ್ಕಾರಾಚಿಂ ಉತ್ರಾಂ ಉಲಯಿಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾನ್ "ಆಧುನಿಕರಣ್ ತಶೆಂ ಕಂಪ್ಯೂಟರೀಕರಣಾಚ್ಯಾ ಆಯ್ಚ್ಯಾ ಕಾಳಾರ್ ಸಂಸಾರಾಚ್ಯಾ ಖಂಯ್ಚ್ಯಾಯ್ ಕೊನ್ಶಾಚೊ ಸಂಪರ್ಕ್ ಕರುಂಕ್ ಆಜ್ ಸಲೀಸ್ ಜಾಲಾಂ. ಹ್ಯಾವರ್ವಿಂ ದುಡು ಆನಿ ವೇಳ್ ಉರ್ತಾ ಖರೊ. ಪುಣ್ ಕುಟ್ಮಾಜಿವಿತ್ ಆನಿ ಸಾಮಾಜಿಕ್ ಜಿವಿತ್ ಮನ್ಶಾನ್ ಹೊಗ್ಡಾವ್ನ್ ಘೆತ್ಲಾಂ. ಮನೀಸ್ ಬೋವ್ ಎಕ್ಸುರೊ ಜಾಲಾ. ತಾಣೆ ಉಲಂವ್ಚೆಂ ಬಂಧ್ ಕೆಲಾಂ. ಇತ್ಲೆಂ ಬಂಧ್ ಕೆಲಾಂಕಿ ತಾಕಾ ಭಾಸ್ಚ್ ನಾಕಾ ಜಾಲ್ಯಾ ಯಾ ನಾ ಜಾಲ್ಯಾ" ಅಶೆಂ ಸಾಂಗ್ಲೆಂ.
ಮುಕಾರ್ಸುನ್ ಉಲಯಿಲ್ಲ್ಯಾ ತಾಣೆ "ಅಸಲೊ ಮನೀಸ್ ಕೆದಳಾ ಭಸ್ಮೊನ್ ವಚತ್ ಸಾಂಗೊಂಕ್ ಸಾಧ್ಯ್ ನಾ. ಮತಿಚೆ ಮೊಡ್ಕೆ ಭಿತರ್ ತಾಣೆ ಫಿಛಾರ್ ಕೆಲ್ಲಿಂ ವೇದನಾಂ ಭಾಯ್ರ್ ಸೊಡುಂಕ್ ಕವಿತಾ ಏಕ್ ಉತ್ತೀಮ್ ಸಾಧನ್. ಅಸಲ್ಯಾಂಕ್ ಕವಿತಾ, ವೊಕತ್ ಕಶೆಂ ಕಾಮ್ ಕರುಂಕ್ ಸಕ್ತಾ" ಅಶೆಂ ತಾಣೆ ಪೊಯೆಟ್ರಿ ಥೆರಪಿ ವಿಜ್ಞಾನಾವಿಶಿಂ ವೆವೆಗ್ಳಿಂ ಉದಾರಣಾಂ ದೀವ್ನ್ ಸಾಂಗ್ಲೆಂ.
ಉಪ್ರಾಂತ್ ಚಲ್ಲ್ಲಿ ಕವಿಗೋಷ್ಟಿ ತಾಣೆಂಚ್ ಚಲವ್ನ್ ವೆಲಿ. ಆರ್ಥರ್ ಪಿರೇರಾನ್ ಆಪ್ಲೆಚ್ ಆವಯ್ವಿಶಿಂ ಕವಿತಾ ವಾಚುನ್, ಥಂಯ್ಸರ್ ಹಾಜರ್ ಆಸ್ಲ್ಲೆ ಆಪ್ಣಾಚೆ ಆವಯ್ಕ್ ಸರ್ವಾಹುಜ್ರಿಂ ಮಾನ್ ದಿಲೊ. ಉಪ್ರಾಂತ್ ದಿನೇಶ್ ಕೊರೆಯಾ, ರೆಮ್ಸಿ ಫೆರ್ನಾಂಡಿಸ್, ವಾಯ್ಲೆಟ್ ಪಿರೇರಾ, ದಿನೇಶ್ ಕೊರೆಯಾ, ಆಂಡ್ರ್ಯು ಎಲ್. ಡಿ’ಕುನ್ಹಾ, ಸ್ಟೆನ್ರೊ ಆಜೆಕಾರ್, ಆಂತೊನ್ ಮೆಂಡೊನ್ಸಾ, ರೊಬರ್ಟ್ ಉದ್ಯಾವರ್, ಸುನೀಲ್ ಕೋಟ, ಅಶೋಕ್ ಡಾಯಸ್, ವಲ್ಲಿ ಕ್ವಾಡ್ರಸ್, ಹೇಮಾಚಾರ್ಯ ತಶೆಂ ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ವಾಚ್ಲ್ಯೊ.
ಮ್ಹಯ್ನ್ಯಾಚೊ ಕವಿ ಜಾವ್ನ್ ವಿಂಚುನ್ ಆಯಿಲ್ಲ್ಯಾ ರೊಬರ್ಟ್ ಉದ್ಯಾವರಾಕ್, ಶ್ರೀಮತಿ ಸೆಲಿನ್ ಪಿರೇರಾನ್ ಇನಾಮ್ ದಿಲೆಂ. ಆಂಡ್ರ್ಯು ಡಿ’ಕುನ್ಹಾನ್ ವಿಂಚವ್ಣೆಚಿ ವಿಧಿ ಚಲವ್ನ್ ವೆಲಿ.
ಸುರ್ವೆರ್ ಕವಿ ವಲ್ಲಿ ಕ್ವಾಡ್ರಸಾನ್ ಆಯ್ಲೆವಾರ್ ಮೊಕ್ಳೀಕ್ ಜಾಲ್ಲ್ಯಾ ಆಶಾವಾದಿ ಪ್ರಕಾಶನಾಚ್ಯಾ ಪುಸ್ತಕಾಚಿ ಪ್ರತಿ ’ಮೊತಿಯಾಂ ಆನಿ ತಾರಾಂ’ ದುಬಾಯ್ಚ್ಯಾ ಕವಿಂಕ್ - ದಿನೇಶ್ ಕೊರೆಯಾ, ರೊಬರ್ಟ್ ಉದ್ಯಾವರ್ ಆನಿ ಆರ್ಥರ್ ಪಿರೇರಾ - ಹಾಂಕಾಂ ವಾಂಟ್ಲಿ.
ಹ್ಯಾಚ್ ಸಂದರ್ಭಾರ್ ಕರ್ನಾಟಕ ರಾಜ್ಯೋತ್ಸವ ಸಂದರ್ಭಾರ್ ’ಹೊರನಾಡು ಕನ್ನಡಿಗಾಂಕ್’ ಆಸ್ಚ್ಯಾ ಪ್ರಶಸ್ತೆಂ ಪಯ್ಕಿ ಸಾಹಿತ್ಯಾಖಾತೀರ್ (ಕನ್ನಡ ತಶೆಂ ಕೊಂಕಣಿ) ಆಸ್ಚಿ ಪ್ರಶಸ್ತಿ ಜೊಡುಂಕ್ ವೆಚ್ಯಾ ಆರ್ಥರ್ ಪಿರೇರಾಕ್ ಸರ್ವಾಂನಿ ಉಲ್ಲಾಸ್ ಪಾಟಯ್ಲೆ.
-ಕವಿತಾ ಭಾತ್ಮಿ
