ಪರತ್ ಆಯ್ಲ್ಯಾರೇ ದಿವಾಳಿ

ಪರತ್ ಆಯ್ಲ್ಯಾರೇ ದಿವಾಳಿ

ಪೆಟಯ್ ದಿವೆ ಪೆಟಯ್ ವಾತಿ

ವ್ಹಾಜಯ್ ಘಾಂಟಿ, ಬಡಯ್ ಥಾಲಿ

ಉಬಾರ್ ತೊರ್ಣಾಂ, ಮಾರ್ ಗರ್ನಾಳಿ

ಪರತ್ ಆಯ್ಲ್ಯಾರೇ ದೀವಾಳಿ

ಜಳೊಂ ದಿವೆ - ತಾಂಚೊ ಪ್ರಕಾಸ್

ಧಾಂವ್ಡಾಂವ್ ಅಜ್ಞಾನ್, ದುರ್ಗುಣ್, ನಿರಾಸ್,

ಚಡೊಂ ಸುಗುಣ್, ಸುಮನ್, ಸುಜ್ಞಾನ್

ಲೊಕಾ ಮಧೆಂ ಜಿಣ್ಯೆಚಿ ಆಸ್

ಪ್ರಜಳ್ ದಿವ್ಯಾಂಚ್ಯಾ ಉಜ್ವಾಡಾಕ್

ಪೊಳೊಂ ಜಾತಿ-ದ್ವೇಷಾ ಕಾಳೊಕ್

ಹಿಂದು, ಕ್ರಿಸ್ತಾಂವ್, ಮುಸ್ಲಿಮಾಂ ಥಂಯ್

ವಾಡೊಂ ಭಾವ್-ಬಂಧ್-ಪಣಾ ವೊಳೊಕ್

ಜಳೊಂವ್, ದಿವ್ಯಾಂ ಪ್ರಕಾಸ್ ಜಳೊಂವ್

ಹಿಂಸಾ, ಅನ್ಯಾಯ್, ಅನೀತ್, ಆಕಾಂತ್

ಹುಲ್ಪಾವ್ನ್ ಹಗೆಂ ರಾಗ್ ದುಸ್ಮಾನ್ಕಾಯ್

ಅರ್ನುನ್ ಬಾಂಧುಂ ಮೊಗಾಚೆ ಬಾಂಧ್

ದೀವಾಳಿನ್ ನೀಜ್ ಉಜ್ವಾಡ್ ಹಾಡ್ಲಾ

ದಿವೊ ಗಾಜಂವ್ ಆಪ್ಲೊ ಸಂದೇಶ್

ಎಕ್ವಟ್, ಮಾಯಾಮೊಗಾಂತ್ ವಾಡೊಂ

ಭಾರತ್ ಆಮ್ಚೊ ಮೊಗಾಚೊ ದೇಶ್

- ಕಾವ್ಯದಾಸ್