ಕೊಂಕ್ಣಿ ಕಾರ್ಭಾರಿ - ಹೆನ್ರಿ ಡಿಸೋಜ್
(2007 ಇಸ್ವೆಂತ್ ವಾಯ್ಲೆಟ್ ಜೆ. ಪಿರೇರಾನ್ ದಾಯ್ಜ್.ಕೊಮ್-ಕ್ ಘೆತ್ಲಲೆಂ ಸಂದರ್ಶನ್)
ಜನನ್: 1943 ಇಸ್ವೆಚ್ಯಾ ಮಾರ್ಚ್ 4 ತಾರಿಕೆರ್
ಜಲ್ಮಲ್ಲೊ ಗಾಂವ್: ಬಸ್ರಿಕಟ್ಟೆ (ಚಿಕ್ಮಗ್ಳುರ್)
ಆವಯ್-ಬಾಪಾಯ್ಚೆಂ ನಾಂವ್: ದೆ| ಫ್ಲೋರಿನ್ ಡಿಸೊಜ್ ಆನಿ ದೆ| ಜೊಸೆಫ್ ಡಿಸೊಜ್
ಶಿಕಾಪ್: ಚೊವ್ತಿ ಕ್ಲಾಸ್ ಪರ್ಯಾಂತ್ ಸೈಂಟ್ ಜೋಸೆಫ್ಸ್ ಇಸ್ಕೊಲ್ (ಚಿಕ್ಮಗ್ಳುರ್), ಉಪ್ರಾಂತ್ ಬೆಂದುರಾಂತ್.
ಕೊಲೆಜ್: ಸಾಂ. ಲುವಿಸ್ ಕೊಲೆಜ್ ಮಂಗ್ಳುರ್
ಎಲ್.ಎಲ್.ಬಿ. 1964 ಇಸ್ವೆಂತ್ ಬೊಂಬೊಂಯ್ತ್
ಕಾಜಾರ್: 1978 ಇಸ್ವೆಂತ್ ಲೀಸಾಸವೆಂ ಕಾಜಾರ್ ಆನಿ 1985 ಇಸ್ವೆಂತ್ ಏಕ್ ಚೆಡು ಭುರ್ಗೆಂ ಜಲ್ಮಾಲೆಂ.
ಹ್ಯಾ ಸಂಸಾರಾಂತ್ ಚಡ್ ಸಕ್ತೆವಂತ್, ಭಳ್ವಂತ್ ಕಿತೆಂ ಮ್ಹಳ್ಳೆಂ ಸವಾಲ್ ಕೊಣೆಂಯ್ ಕೆಲೆಂ ತರ್ ತಾಚಿ ಜವಾಬ್ ಸಾಂಗ್ಚಿ ತರ್ ಕೊಣ್ ಮ್ಹಣ್ತಲೊ ’ಹಸ್ತಿಚೆ ತ್ರಾಣ್’, ಆನಿ ಕೊಣ್ ಮ್ಹಣ್ತಲೊ ’ಅಣು ಬೋಂಬ್’, ಅನಿ ಕೊಣ್ ಮ್ಹಣಾತ್ ’ದುಡು’ ವಾ ಹೆರ್. ಪುಣ್ ಹಕೀಗತೆಂತ್ ಹ್ಯಾ ಸಂಸಾರಾಂತ್ ಚಡ್ ಸಕ್ತೆಚೆಂ ಜಾವ್ನಾಸಾ ’ಮೋಗ್’. ಹಾಚ್ಯಾಕೀ ಭಳಿಶ್ಟ್ ಸಕತ್ ಹ್ಯಾ ಸಂಸ್ರಾಂತ್ ಕಸ್ಲಿಚ್ ನಾ ಆಮ್ಚಾ ಕೊಂಕ್ಣೆಂತ್ ಅಸಲೆ ಥೊಡೆ ಕಲಾಕಾರ್ ಆಸಾತ್ - ತಾಂಚಿ ಪರಿಚಯ್ ಸುರು ಜಾತಾ ಮೊಗಾಂತ್ ಆನಿ ಸಂಪ್ತಾಯ್ ಮೊಗಾಂತ್ಚ್. ಕೊಂಕ್ಣಿ ಸಾಹಿತ್ಯಾಂತ್ ಹಾಂವೆ ಹೊಚ್ ಮೋಗ್ ಮಾಲ್ಘಡ್ಯಾ ಎ.ಟಿ.ಲೋಬೊ ಥಂಯ್ ಪಳೆಲ್ಲೊ. ವಿ.ಜೆ.ಪಿ.ಸಲ್ಡಾಞಾ ಥಂಯ್ ಪಳೆಲ್ಲೊ. ಚಾ.ಫ್ರಾ.ಥಂಯ್ ಪಳೆಲ್ಲೊ - ಪುಣ್ ಆಜ್ ತಾಂಚೊ ನಿಯಾಳ್ ಕರುನ್ ಫಾಯ್ದೊ ನಾ ಕಿತ್ಯಾಕ್ ತೆ ಹ್ಯಾ ಸಂಸಾರಾಂತ್ ನಾಂತ್. ಆಸ್ಚಾಂ ಪಯ್ಕಿಂತ್ ಎಕ್ಲ್ಯಾಚೊ ಉಲ್ಲೇಕ್ ಕರಿಜಾಯ್ಚ್ ಜಾವ್ನಾಸಾ ಜೆರಿ ಕುಲ್ಶೇಕರ್. ಕೊಂಕ್ಣಿ ಕಲಾಕಾರಾಂನಿ ಹ್ಯಾ ಸಂಸಾರಾಂತ್ ಧನ್ ದಿರ್ವೆಂ, ಆಸ್ತ್ ಬದಿಕ್ ಪುಂಜಾಂವ್ಚಾ ಬದ್ಲಾಕ್ ಹೊಗ್ಡಾಯ್ಲಾಂ. ಅಸಲ್ಯಾಂನಿ ಹ್ಯಾ ಸಂಸಾರಾಂತ್ ಕಿತೇಂಯ್ ಜೊಡ್ಲಾಂ ತರ್ ತೊ ಜಾವ್ನಾಸಾ ’ಮೋಗ್’. ಅಸಲೊಚ್ ಏಕ್ ಮೊಗಾ ಮಾಯ್ಪಾಸಾಚೊ ಕಲಾಕಾರ್ ಆಮ್ಚೆ ಮಧೆಂ ಆಸಾ, ಜಾಕಾ ಹಾಂವ್ ಮುಖಾಮುಖಿ ಭೆಟೊಂಕ್ ನಾ ತರ್ಯೀ ತಾಚೆವಿಶಿಂ, ಲ್ಹಾನ್ಪಣಾರ್ ಥಾವ್ನ್ ಆಯ್ಕೊನ್ ಆಯ್ಲಾಂ, ತಾಚಿಂ ಪದಾಂ ಆಯ್ಕೊನ್ ವ್ಹಡ್ ಜಾಲ್ಲ್ಯಾ ಮ್ಹಜೆಸವೆಂ ಇತ್ಲ್ಯಾ ಮೊವಾಳಾಯೆನ್ ಆನಿ ಖಾಲ್ತೆಪಣಾನ್ ಮಾಂಧ್ತಾ, ಕೊಂಕ್ಣಿ ಲೋಕ್ ಹಾಕಾ ’ಸಂಗೀತ್ ಸಾಮ್ರಾಟ್’, ’ಕಲಾರತ್ನ’ ಮ್ಹಣ್ ವಳ್ಕತಾ. ಆನಿ ತೊ ಜಾವ್ನಾಸಾ ಮಾನೆಸ್ತ್ ಹೆನ್ರಿ ಡಿ’ಸೋಜ್ ಹಾಚಿಂ ಪದಾಂ ಮಲಯಾಳಂ ಭಾಸೆಕ್ ನ್ಹಂಯ್, ತಮಿಳ್ ಆನಿ ಶ್ರೀಲಂಕಾಚ್ಯಾ ಸಿಲೋನಿ ಭಾಸೆಕ್ಯೀ ಅನುವಾದಿತ್ ಜಾವ್ನ್ ತೆಚ್ ತಾಳ್ಯಾಂತ್ ಗಾಯ್ತಾತ್. ಭೋವ್ಶಾ ಹೆಂ ಭಾಗ್ ಎದೊಳ್ ಖಂಚ್ಯಾಯ್ ಕೊಂಕ್ಣಿ ಗಾವ್ಪ್ಯಾಕ್ ಲಾಭ್ಲ್ಲೆಂ ನಾ. ಥೊಡ್ಯಾ ಗೊಂಯ್ಕಾರಾಂನಿ ಯೇ ಯೇ ಕಾತ್ರಿನಾ ಪದಾಕ್ ರೀಮಿಕ್ಸ್ ಕರ್ನ್ ಆತಾಂಯ್ ಖೆಳವ್ನ್ ಗಾಯ್ತಾತ್. ಆಯ್ಲೆವಾರ್ ದುಭಾಯ್ ಆಯ್ಲೆಲ್ಯಾ ವೆಳಾರ್ ತಾಚೆಸವೆಂ ಹೆಂ ಸಂವಾದ್ ಘೆಂವ್ಚಾಕ್ ಮಧ್ಯಾನೆ ರಾತಿಂ ಪರ್ಯಾಂತ್ ರಾಕೊನ್ ರಾವ್ಲ್ಲ್ಯಾ ಬಾಯ್ ವಾಯ್ಲೆಟ್ ಪಿರೇರಾ ಆನಿ ತಿಚೊ ಪತಿ ಜೊಸ್ಸಿ ಪಿರೇರಾಚ್ಯಾ ಕಾಳ್ಜಾಂತ್ ಆಸ್ಚಾ ಕೊಂಕ್ಣಿ ಮೊಗಾಚಿ ವಾಖಣ್ಣಿ ಕರುಂಕ್ ಫಕತ್ತ್ ಉತ್ರಾಂ ಪಾಂವ್ಚಿಂನಾಂತ್. ಕೊಂಕ್ಣಿ ವಾವ್ರಾಕ್ ದೆಂವ್ಚ್ಯಾಂಕ್ ಖಡ್ಪಾಪರಿಂ ಕಾಳಿಜ್ ಆಸ್ಚೆಂ ಭೋವ್ ಗರ್ಜೆಚೆಂ - ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಾ ಸಮಾಜೆಂತ್ ಕರ್ಚೆ ನಾತ್ಲ್ಯಾರ್ಯೀ, ಕರ್ತೆಲ್ಯಾಂಕ್ ನಾನಾ ರಿತಿರ್ ಖೊಡಿ ಕಾಡ್ನ್, ತಾಂಚ್ಯಾ ಸಂತಾನ್ ಕುಟ್ಮಾಕ್ ನಾಲಿಸಾಯ್ ಕರ್ಚೆ ’ಭಡ್ವೆ’ ಯಥೇಶ್ಟ್ ಆಸಾತ್. ಅಸಲ್ಯಾಂಚಾ ಖಾಂದ್ಯಾರ್ ಬಂದೂಕ್ ದವರ್ನ್ ಸೊಭಾಯ್ ಪಳೆಂವ್ಚೆಂ ಆಮ್ಚೆ ಮಹಾನ್ ’ಸುಪುತ್ರ್’ಯೀ ಆಸಾತ್. ವಾಯ್ಲೆಟ್ ಬಾಯೆಕ್ ಹಾವೆಂ ಮ್ಹಜ್ಯಾ ಖಾಸ್ ಭಯ್ಣಿಚೊ ದರ್ಜೊ ದಿಲಾ - ತಿಚೆ ಥಂಯ್ ಆಸ್ಚಾ ಕೊಂಕ್ಣಿ ಮೊಗಾಕ್ ಪಳೆವ್ನ್. ತಿಣೆ ಪಾಟ್ಲ್ಯಾ ವರ್ಸಾ ದಾಯ್ಜಾಕ್ ದಿಲ್ಲೊ ಪಾಟಿಂಬೊ ವರ್ತೊ. ತಿಕಾ ದಾಯ್ಜ್ ಪಂಗ್ಡಾ ತರ್ಫೆನ್ ಉಪ್ಕಾರಿ ಮನಾನ್ ದೇವ್ ಬರೆಂ ಕರುಂ ಮ್ಹಣ್ತಾಂ.
ಸ: ಕೊಂಕ್ಣಿ ಸಂಗೀತ್ ಶೆತಾಂತ್ ತುಮಿಂ ಇತ್ಲಿಂ ಕಾರ್ಭಾರಾಂ ಕೆಲ್ಯಾಂತ್ ಆಸ್ತಾಂ, ತುಮ್ಕಾಂ ಕೊಂಕ್ಣೆ ಥಂಯ್ ಅಭಿರುಚ್ ಕಶಿ ಉಭ್ಜಾಲಿ ಮ್ಹಳ್ಳೆಂ ಸಾಂಗ್ಯೆತ್ಗಿ?
ಜಾ: ಕೊಂಕ್ಣೆಂತ್ ಹಾಂವ್ ಪಯ್ಲೆ ಲೇಖನಾಂ, ಕಾಣ್ಯೊ, ಬರವ್ನ್ ’ಪಯ್ಣಾರಿ’ಕ್ ಧಾಡ್ತಾಲೊಂ. ಬೆಂದುರ್ ಆಸ್ತಾನಾ ಹಾಂವೆ ತೀನ್ ನಾಟಕ್ ಬರಯಿಲ್ಲೆ. ತೆ ಜಾವ್ನಾಸಾತ್ ಸೊಭಿತ್ ಸಂಸಾರ್, ಆತಾಂಚೊ ಸಂಸಾರ್, ಘರ್ ರಾಣಿ ಆನಿ ತೆ ಖೆಳವ್ನ್ ದಾಕಯ್ಲೆ. ಕೊಲೆಜ್ ಕರ್ತಾನಾ ಪಯ್ಣಾರಿಚೆ ವಾಂಟಪ್ ಕರ್ತಾಲೊಂ. ಆಶೆಂ ಪದಾಂ ಬರಂವ್ಚೆಂ ಪಿಶೆಂ ಆಸ್ಲ್ಲೆ. ಕೊಲೆಜ್ ಸಂಪ್ಲ್ಯಾ ನಂತರ್ ಬೊಂಬಯ್ ಯೇವ್ನ್ ಎಕಾ ಇಂಗ್ಲೀಶ್ ಸಂಗೀತ್ ಪಂಗ್ಡಾಕ್ ಭರ್ತಿ ಜಾಲೊ ಆನಿಂ ಪದಾಂ ಗಾಂವ್ಕ್ ಸುರು ಕೆಲಿ.
ಸ: ಸಾಹಿತಿಕ್ ಸುರ್ವಾತ್ ಕೆಲ್ಲ್ಯಾ ತುಮ್ಕಾಂ ಸಂಗೀತಾಂತ್ಚ್ ಉರೊಂಕ್ ಖಂಯ್ ಥಾವ್ನ್ ಸ್ಪೂರ್ತಿ ಮೆಳ್ಳಿ?
ಜಾ: ಏಕ್ ದೀಸ್ ಮ್ಹಜಾ ಇಷ್ಟಾಕ್ ಆಲ್ ಇಂಡಿಯಾಂತ್ ಕಾರ್ಯೆಂ ಮೆಳ್ಳೆ, ತೆಂ ರೆಕಾರ್ಡಿಂಗ್ ಕರ್ತಾನಾ ಏಕ್ ಪದ್ ಉಣೆಂ ಪಡ್ಲೆಂ. ತ್ಯಾ ಘಡ್ಯೆ ತಾಣಿಂ ಮ್ಹಜ್ಯಾ ಇಷ್ಟಾಕ್ ಸಾಂಗ್ಲೆಂ ತುಂವೆಂ ಆನಿ ಏಕ್ ಪದ್ ಆಮ್ಕಾಂ ಆಜ್ ರಾತಿಂ ಭಿತರ್ ದೀಜಾಯ್ ಮ್ಹಣ್. ತೆದ್ನಾಂ ಮ್ಹಜೊ ಇಷ್ಟ್ ಮ್ಹಣಾಲೊ ಮ್ಹಜ್ಯಾನ್ ತಿತ್ಲೆ ವೆಗ್ಗಿಂ ಪದ್ ಘಡುನ್ ದೀಂವ್ಕ್ ಜಾಯ್ನಾ ಮ್ಹಣ್. ತಿತ್ಲ್ಯಾರ್ ಹಾಂವೆ ತಾಕಾ ಸಾಂಗ್ಲೆಂ ಹಾಂವ್ ಪದ್ ಬರಂವ್ನ್ ತುಕಾ ದಿತಾಂ ಮ್ಹಣ್, ಆನಿಂ ತೊ ಒಪ್ಲೊ. ತೆದ್ನಾಂ ’ಸಾಂಗ್ಚೆ ಕಿತೆಂ ಹಾಯ್ ಹಾಯ್ ಬೊಂಬಯ್ ಶ್ಹೆರಾಚೆಂ......’ ಮ್ಹಳ್ಳೆಂ ಪದ್ ಹಾಂವೆಂ ಬರವ್ನ್ ಎಕಾ ರಾತಿ ಭಿತರ್ ಮ್ಹಜಾ ಇಷ್ಟಾಕ್ ದಿಲೆಂ. ತೆಂ ಪದ್ ಉಪ್ರಾಂತ್ ಮೊಸ್ತ್ ಲೊಕಾಮೊಗಾಳ್ ಜಾಲೆಂ. ತ್ಯಾ ನಂತರ್ ಮ್ಹಾಕಾ ಆನ್ಯೇಕ್ ಕಾರ್ಯಾಕ್ ಸಂಗೀತ್ ನಿರ್ದೇಶನಾಚೊ (ಆವ್ಕಾಸ್ ಮೆಳ್ಳೊ. ತ್ಯಾ ನಂತರ್ ಮ್ಹಜೆಂಚ್ ಏಕ್ ಕಾರ್ಯಕ್ರಮ್ ಆಸ್ಲ್ಲೆಂ. ಸ್ವಪಾಣ್ ಫಾಂತ್ಯಾಚೆ ಹಾಂವೆಂ ರಂಗ್ಮಂಚಾರ್ ಗಾಯ್ಲೆಂ. ಥಂಯ್ ಥಾವ್ನ್ ಮ್ಹಾಕಾ ಸಂಗೀತಾಚೆರ್ ಉರ್ಭಾ ಚಡ್ಲಿ. ಮ್ಹಜಿ ಪದಾಂ ಆಯ್ಕೊನ್ ಮ್ಹಾಕಾ ಚ್ಯಾರ್ಯೀ ಕುಶಿಂ ಥಾವ್ನ್ ಆಪವ್ಣೆಂ ಆಯ್ಲೆಂ.
ಸ: ತುಮ್ಚ್ಯಾ ಜಿಣ್ಯೆಂತ್ ಕೊಂಕ್ಣಿ ಖಾತಿರ್ ಕಾಂಯ್ ಕಷ್ಟ್ ಭಗ್ಲ್ಲೆ ಆಸಾತ್?
ಜಾ: ಕೊಂಕ್ಣೆಂತ್ ಕಾಂಯ್ ಕಷ್ಟ್ ಮ್ಹಣ್ ಭಗ್ಲ್ಲೆ ನಾಂತ್. ಪುಣ್ ಹಾಂವ್ ಕಾಮ್ ಕರ್ನ್ ಆಸ್ಲ್ಲ್ಯಾನ್ ಮ್ಹಾಕಾ ಕೊಂಕ್ಣೆಖಾತಿರ್ಚ್ ತಿತ್ಲೊ ವೇಳ್ ಖರ್ಚುಂಕ್ ಜಾಂವ್ಕ್ನಾ, ಜಾಲ್ಯಾರೀ ಮ್ಹಾಕಾ ಭೊವ್ಚ್ ಬರೆಂಪಣ್ ಲಾಭ್ಲಾಂ. ಮ್ಹಾಕಾ ಸಗ್ಳ್ಯಾ ಲೊಕಾ ಥಾವ್ನ್ ಬರೊ ಪಾಟಿಂಬೊ ಮೆಳ್ಳಾ. HMV ನ್ ಮ್ಹಾಕಾ ಆಪವ್ಣೆಂ ದಿಲ್ಲೆಂ ಆನಿ ಮ್ಹಜಿ ಪದಾಂ ತಾಣಿಂ ಪಯ್ಲೆ ಪಾವ್ಟಿಂ ರೆಕಾರ್ಡ್ ಕೆಲ್ಲಿಂ. ಆಶೆಂ ಮ್ಹಾಕಾ ಕೊಂಕ್ಣಿ ಲೊಕಾಂ ಥಾವ್ನ್ ಮಾತ್ರ್ ನ್ಹಂಯ್ ಆಸ್ತಾ ಹೆರಾಂ ಥಾವ್ನ್ಯೀ ಭರ್ಪೂರ್ ಸಹಕಾರ್ ಮೆಳ್ಳಾ.
ಸ: ಕೊಂಕ್ಣೆಂತ್ ತುಮ್ಚಿ ಮಾತ್ರ್ ಪದಾಂ ಚ್ಯಾರ್ ಭಾಸಾಂನಿ ಮ್ಹಣ್ಜೆ; ಗೊಂಯ್ಚಿ ಕೊಂಕಣಿ, ಸಿನ್ನಾಳಿ, ತಮಿಳ್ ಆನಿ ತೆಲುಗು ಭಾಶೆಂತ್ ಗಾಯ್ಲ್ಯಾಂತ್/ಗಾವ್ನ್ ಆಸಾತ್. ಹ್ಯಾ ವಿಶಿಂ ತುಮ್ಕಾಂ ಕಿತೆಂ ಭಗ್ತಾ?
ಜಾ: ಮ್ಹಾಕಾ ವರ್ತೊ ಆಭಿಮಾನ್ ಭಗ್ತಾ ಕಿತ್ಯಾಕ್ ಕೊಣಾಯ್ಚಿಂಯೀ ಪದಾಂ ಹೆರ್ ಭಾಸೆಂನಿ ಗಾಯ್ಲಿಂ ತರ್ ತಾಚೆ ತಿತ್ಲೊ ಗೌರವ್ ಆನಿ ಅಭಿಮಾನ್ ದುಸ್ರೆಂ ಕಿತೆಂಚ್ ನಾ. ಹಾವೆಂ ಸಂಗೀತ್ ರಚ್ತಾನಾ ವಾ ಪದಾಂ ಘಡ್ತಾನಾ ತೆಂ ಬಾಳ್ವೊಂಚೆಬರಿಂ ತಾಳೆ ಘಾಲ್ಯಾತ್. ಮ್ಹಜ್ಯಾ ಮತಿಂತ್ ಭಗ್ತಾಲೆಂಗೀ ಬರೆಂ ಸಂಗೀತ್ ಆನಿಂ ಬರೆ ತಾಳೆ ಸದಾಂಚ್ ಬಾಳ್ವತಾತ್. ಆಶೆಂ ಹಾಂವೆ ಸದಾಂಚ್ ಮ್ಹಜ್ಯಾ ಪದಾಂಕ್ ಸಂಗೀತ್ ಜಾಂವ್, ತಾಳೆ ಜಾಂವ್ ಲೊಕಾಮೊಗಾಳ್ ಜಾಂವ್ಚೆಪರಿಂ ಘಾಲ್ಯಾತ್, ಆನಿ ಆಜ್ ಹ್ಯಾ ಕಾರಾಣಾನ್ ಮ್ಹಜಿ ಪದಾಂ ಹೆರ್ ಭಾಸಾಂನಿ ಗಾಯ್ತಾತ್.
ಸ: ತುಮಿ ಏಕ್ ಫಾಮಾದ್ ಗಾವ್ಪಿ. ತುಮ್ಕಾ ಗಾಯನ್ ಕರ್ಚೆಂ ದೆಣೆಂ ಖಂಯ್ ತುಮಿಂ ಕಶೆಂ ಉರ್ಜಿತ್ ಕೆಲೆಂ?
ಜಾ: ಮ್ಹಜ್ಯಾ ಕುಟ್ಮಾ ಥಾವ್ನ್ ಮ್ಹಾಕಾ ಗಾಂವ್ಚೆ ದೆಣೆಂ ಮೆಳ್ಲ್ಲೆ ಮ್ಹಣ್ಯೆತ್. ಆಮ್ಚೊ ಬಾಬ್ ಆಮ್ಕಾ ಲ್ಹಾನ್ ಆಸ್ತಾನಾಂಚ್ ಪದಾಂ ಗಾಂವ್ಕ್ ಶಿಕೈತಾಲೊ. ಆನಿ ಮ್ಹಜೊ ವ್ಹಡ್ ಭಾವಾಚೊ ತಾಳೊ ಎಕ್ದಮ್ ಬರೊ ಆಸ್ಲ್ಲೊ, ಭಾವಾಕ್ ತಶೆಂಂಚ್ ಮ್ಹಜಾ ಭಯ್ಣಿಂಕ್ ಗಾಯಾನಾಚೆಂ ಬರೆಂ ದೆಣೆಂ ಆಸ್ಲ್ಲೆ. ತಾಂಕಾಂ ಆನಿಂ ತಾಂಚಾ ತಾಳ್ಯಾಕ್ ಭುಲ್ಲ್ಲ್ಯಾ ಮ್ಹಾಕಾಯ್ ಗಾಂವ್ಚಿ ಉರ್ಭಾ ಉಭ್ಜಾಲಿ, ಆನಿ ಹಾಂವೆಂ ಗಾಂವ್ಕ್ ಸುರು ಕೆಲೆಂ.
ಸ: ತುಮಿಂ ಸಭಾರ್ ಸಂಗೀತ್ಗಾರಾಂಕ್, ಗಾವ್ಪ್ಯಾಂಕ್, ಬರಯ್ಣಾರಾಂಕ್ ಭೆಟ್ಲ್ಯಾತ್ ಆಸ್ತಾಂ, ತುಮ್ಕಾಂ ವಿಶೇಸ್ ರಿತಿನ್ ಪಸಂದ್ ಜಾಲ್ಲೆ ಕಲಾಕಾರ್/ಸಾಹಿತಿ ಕೊಣೀ ಆಸಾತ್ಗೀ?
ಜಾ: ಮ್ಹಾಕಾ ಹರ್ಯೇಕ್ ಸಂಗೀತ್ಗಾರ್, ಗಾವ್ಪಿ, ಬರಯ್ಣಾರ್ ಪಸಂದೆಚೆ. ತಾಂಚೆಲಾಗಿ ಏಕ್ ನಾ ಎಕಾ ಥರಾಚೆ ವಿಶೇಸ್ ದೆಣಿಂ ಆಸಾತ್. ಮ್ಹಜ್ಯಾ ಸಾಂಗಾತಾ ಮೆಲ್ವಿನ್ ಪೆರಿಸ್, ರೊನಿ ಡಿಕುನ್ಹಾ ಆನಿ ಸಭಾರ್ ಜಣಾಂನಿ ಗಾಯ್ಲಾಂ. ರಂಗ್ಮಂಚಾರ್ ತಶೆಂಚ್ ಸಿ.ಡಿ ಕರ್ತಾನಾ ಸಭಾರಾಂನಿ ಗಾಯ್ಲಾಂ. ಆನಿ ಹೇಮಂತ್ ಕುಮಾರಾನ್ ಸ್ವಪಾಣ್ ಫಾಂತ್ಯಾಚೆ ಹೆಚ್.ಎಮ್.ವಿ.ಚೆರ್ ರೆಕಾರ್ಡ್ ಕೆಲ್ಲೆ.
ಸ: ತುಮ್ಚ್ಯಾ ಜಿಣ್ಯೆಚಿ ಮಹಾತ್ವಾಕಾಂಕ್ಷಾ ಕಸಲಿ?
ಜಾ: ಕೊಂಕ್ಣಿ ಪದಾಂ ಲೊಕಾಂನಿ ಆಯ್ಕಾಲ್ಯಾರ್ ತಿಚ್ ಮ್ಹಜಿ ದಾಧೊಸ್ಕಾಯ್ ಮ್ಹಣ್ ಹಾಂವ್ ಚಿಂತಾಂ. ಸಂಗೀತ್ ಸಂಸಾರಾಂತ್ ಕಿತೆಂ ಜೊಡುಂಕ್ ಹಾಂವೆಂ ಚಿಂತ್ಲ್ಲೆಂ ತೆಂ ಸರ್ವ್ ಮ್ಹಾಕಾ ಲಾಭ್ಲಾಂ. ಲೊಕಾನ್ ಮ್ಹಜೊ ತಾಳೊ ಪಸಂದ್ ಕೆಲಾ, ಆಜೀಕ್ ಚಾಳಿಸ್ ವರ್ಸಾಂ ಪಯ್ಲೆಂ ಮ್ಹಜೊ ತಾಳೊ ಕಸೊ ಅಸ್ಲ್ಲೊಗೀ ಆಜ್ಯೀ ತಸೊಚ್ ಆಸಾ ಮ್ಹಣ್ ಲೊಕಾ ಥಾವ್ನ್ ಆಯ್ಕೊಂಕ್ ಮೆಳ್ತಾ. ಹಿಚ್ ವ್ಹಡ್ ಸಂತೊಸಾಚಿ ಗಜಾಲ್.
ಸ: ತುಮ್ಕಾಂ ತುಮ್ಚಾ ಕುಟ್ಮಾ ಥಾವ್ನ್ ಸಂಗೀತಾಕ್ ಸಹಕಾರ್ ಮೆಳ್ಳಾಗೀ ವಾ ದುರ್ಸೊಣೆಂ ಮೆಳ್ಳಾಂ?
ಜಾ: ಮ್ಹಾಕಾ ಕುಟ್ಮಾ ಥಾವ್ನ್ ಬರೊ ಸಹಕಾರ್ ತಶೆಂಚ್ ಉತೇಜನ್ ಮೆಳ್ಳಾಂ. ಮ್ಹಾಕಾ ಕೆದಿಂಕ್ಚ್ ಸಂಗೀತಾ ಖಾತಿರ್ ಕುಟ್ಮಾ ಥಾವ್ನ್ ದುರ್ಸೊಣೆಂ ಮೆಳ್ಲ್ಲೆಂ ನಾ. ಮ್ಹಜಿ ಬಾಯ್ಲ್ ಲೀನಾ (ಆತಾಂ ದೆವಾದೀನ್ ಜಾವ್ನ್ ಪಾಂಚ್ ವರ್ಸಾಂ ಜಾಲಿ) ತಶೆಂಚ್ ತಾಚ್ಯಾ ಕುಟ್ಮಾ ಥಾವ್ನ್ ಭರ್ಪೂರ್ ಸಹಕಾರ್ ಆನಿ ಪಾಟಿಂಬೊ ಮೆಳ್ಳಾ. ಮ್ಹಜಿ ಭಯ್ಣ್ ಫಾಮಾದ್ ಕೊಂಕ್ಣಿ ಕಾಣ್ಯೆಗಾರ್ ಜೆರಿ ಕುಲ್ಶೇಕರಾ ಚಿ ಪತಿಣ್ ಆನಿ ತಿಚೆಥಾವ್ನ್ ತಶೆಂಚ್ ತಿಚ್ಯಾ ಕುಟ್ಮಾಥಾವ್ನ್ಯೀ ಮ್ಹಾಕಾ ಅಜೂನ್ ಉತ್ತೇಜನ್ ಆನಿ ಪಾಟಿಂಬೊ ಮೆಳೊನ್ ಆಸಾ.
ಸ: ತುಮ್ಚಾ ಸಂಗೀತ್ ಸಂಸಾರಾ ವಿಶ್ಯಾಂತ್ ಇಲ್ಲೆಂ ಜಾಣಾಂ ಜಾವ್ಯೆತ್ಗೀ?
ಜಾ: ಜರೂರ್, ಪಾಟ್ಲ್ಯಾ ಚಾಳಿಸ್ ವರ್ಸಾಂನಿ ಹಾಂವೆ ಎದೊಳ್ ಮ್ಹಣಾಸರ್ ದೋನ್ ಹಜಾರ್ ಪದಾಂ ಘಡ್ಲ್ಯಾಂತ್, ತಾಂತುಂ ಆಟ್ಶಾಂ ವಯ್ರ್ ಪದಾ ಆಲ್ ಇಂಡಿಯಾ ರೆಡಿಯೊರ್ ರೆಕಾರ್ಡ್ ಜಾಲ್ಯಾಂತ್. ಬೊಂಬಯ್ ಟಿವಿರ್ (ಮ್ಹಜೆಂ ಆನಿ ಅಪರ್ಣಾ ಮಾಯೆಕರ್) ಸಂಗೀತಾಚಿ ಕಾರ್ಯಕ್ರಮ್ ಪ್ರಸಾರ್ ಜಾಲಾ. ಕಾಜಾರಾ ಉಪ್ರಾಂತ್ ಹ್ಯಾ ಫಿಲ್ಮಾಕ್ ಮ್ಹಜಿ ತೀನ್ ಪದಾಂ ರೆಕಾರ್ಡ್ ಜಾಲ್ಯಾಂತ್, ತಶೆಂಚ್ ವಿಲ್ಫಿ ರೆಬಿಂಬಸಾಚಿಂ ಚ್ಯಾರ್ ಪದಾಂ ರೆಕಾರ್ಡ್ ಜಾಲ್ಯಾಂತ್. ’ಉಡ್ತಾ ತೊ ಬುಡ್ತಾ’ ತ್ಯಾ ಫಿಲ್ಮಾಕ್ ಪದಾಂ ಗಾಯ್ಲ್ಯಾಂತ್. ದೊನ್ಶಿಂ ಸಂಗೀತ್ ಕಾರ್ಯಿಂ ಸಾದರ್ ಜಾಲ್ಯಾಂತ್. ದುಭಾಯ್, ಅಬುಧಾಬಿ, ದೊಹಾ ಖಟಾರ್, ಬಾಹ್ರೆನ್, ಮಸ್ಕತ್, ಕುವೈಟ್ ಆಸಲ್ಯಾ ಅಂತರಾಷ್ಟೀಯ್ ರಂಗಮಂಚಾರ್ ಸಂಗೀತ್ ಸಾಂಜೊ ಸಾದರ್ ಕೆಲ್ಯಾತ್. ಬೊಂಬಯ್, ಮಂಗ್ಳುರ್, ಬೆಂಗ್ಳುರ್, ಮೈಸೂರಾಂತ್ ಸಂಗೀತ್ ಸಾಂಜ್ ಸಾದರ್ ಕೆಲ್ಯಾರ್.
ಸ: ಕೊಂಕ್ಣಿ ವೆಬ್ಸಾಯ್ಟಿಂ ವಿಶಿಂ ತುಮ್ಚಿ ಅಭಿಪ್ರಾಯ್ ಕಿತೆಂ? ಹಿಂ ಕೊಂಕ್ಣೆಚ್ಯಾ ವ್ಹಾಡಾವಳೆಕ್ ಉಪ್ಕಾರ್ತಿತ್ಗೀ?
ಜಾ: ಕೊಂಕ್ಣಿ ವೆಬ್ಸಾಯ್ಟಾಂ ವರ್ವಿಂ ಆಜ್ಕಾಲ್ ಏಕ್ ಕ್ರಾಂತಿಚ್ ಜಾಲ್ಯಾ. ಕೊಂಕ್ಣಿ ವೆಬ್ಸಾಯ್ಟಾಂ ಕೊಂಕ್ಣೆಚ್ಯಾ ವ್ಹಾಡಾವಳೆಕ್ ಖಂಡಿತ್ ಉಪ್ಕಾರ್ತಾತ್. ವ್ಹಾಡಾವಳ್ ಮ್ಹಳ್ಯಾರ್ ಇತ್ಲಿ ಜಾಲ್ಯಾಗೀ ಕೊಂಕ್ಣೆಚಿ ಉದರ್ಗತ್ ಘರಾಂ ಘರಾಂನಿ ಪಾವ್ಲ್ಯಾ ಮ್ಹಣ್ಯೆತ್. ಹಿ ದೊನೀ ಭಾಸಾಂನಿ ಮ್ಹಣ್ಜೆ ಇಂಗ್ಲೀಶ್ ಆನಿ ಕನ್ನಡಾಂತ್ ಆಸ್ಲ್ಲ್ಯಾನ್ ಆತಾಂಚ್ಯಾ ಭುರ್ಗ್ಯಾಂಕ್ ಜಾಣಾಂ ಜಾಂವ್ಕ್ ಸಲೀಸ್ ಜಾತಾ. ಆಶೆಂ ಕೊಂಕ್ಣಿ ವೆಬ್ಸಾಯ್ಟಾಂ ಆಧ್ಲ್ಯಾ ತಶೆಂಚ್ ಆತಾಂಚ್ಯಾ ಪಿಳ್ಗಿಕ್ ಉಪ್ಕಾರಾಕ್ ಪಡ್ಲ್ಯಾಂತ್ ಆನಿಕ್ಯೀ ಪಡ್ತೆಲಿ.
ಸ: ದಾಯ್ಜಾ.ಕೊಮಾಕ್ ತುಮಿ ಬೆಟ್ ದಿತಾತ್ಗೀ? ದಾಯ್ಜಾವಿಶಿಂ ತುಮ್ಚಿ ಅಭಿಪ್ರಾಯ್ ಕಿತೆಂ?
ಜಾ: ವ್ಹಯ್, ದಾಯ್ಜ್ ಏಕ್ ಕೊಂಕ್ಣೆಕ್ಚ್ ಸಮರ್ಪುನ್ ದಿಲ್ಲಿ ವೆಬ್ಸಾಯ್ಟ್ ಜಾವ್ನಾಸಾ. ಆನಿ ಆತಾಂ ಹಿ ವೆಬ್ಸಾಯ್ಟ್ ಭರಾನ್ ವ್ಹಾಡೊನ್ ಆಸಾ. ಕೊಂಕ್ಣೆಂತ್ ಅಭಿರುಚ್ ಆಸ್ಲ್ಲ್ಯಾಂಕ್ ಹಿ ಸಾಯ್ಟ್ ಭೊವ್ಚ್ ಉಪ್ಕಾರಾಕ್ ಪಡ್ತಾ ಆನಿ ಸಂಸಾರ್ಭರ್ ಶಿಂಪಡ್ಲ್ಯಾ ಸರ್ವ್ ಕೊಂಕ್ಣಿ ಲೊಕಾಕ್ ಕೊಂಕ್ಣಿ ಸಾಹಿತ್ಯ್ ವಾಂಟ್ಚೆಂ ಕಾಮ್ ದಾಯ್ಜ್ ಕರ್ನ್ ಆಸಾ. ಹೆಂ ಅಪುಟ್ ಕೊಂಕ್ಣೆಂತ್ ಪ್ರಸಾರ್ ಜಾತಾ ಜಾಲ್ಲ್ಯಾನ್ ಆಮಿಂ ಕಶೆಂ ಗಾಂವಾಂತ್ ಕೊಂಕ್ಣಿ ಪತ್ರಾಂನಿ ವಾಚ್ತೆಲ್ಯಾಂಕ್ ತೆಂ ಅಂತರಾಷ್ಟ್ರೀಯ್ ಮಟ್ಟಾರ್ ವಾಚುಂಕ್ ಮೆಳ್ತಾ. ಹೆಂ ದಾಯ್ಜಾ ವರ್ವಿ ಸಾಧ್ಯ್ ಜಾಲಾಂ.
ಸ: ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ಕೊಂಕ್ಣಿ ಪತ್ರಾಂ ಸಂಸಾರ್ಭರ್ ವಚಾನಾಂತ್ ತರೀ ದಾಯ್ಜ್.ಕೊಮಾನ್ ಆಮ್ಕಾ ಕೊಂಕ್ಣಿ ವಾಚುಂಕ್ ಹೊ ಏಕ್ ಆವ್ಕಾಸ್ ಕರ್ನ್ ದಿಲಾ. ಆಮಿಂ ಕೊಂಕ್ಣಿ ಆಮ್ಚ್ಯಾ ಘರಾಂನಿ ಆಮ್ಚ್ಯಾ ಭುರ್ಗ್ಯಾಂಕ್ ಶಿಕವ್ಯಾಂ. ದಾಯ್ಜಾ ಥಾವ್ನ್ ಆಮ್ಕಾಂ ಜಾಯ್ ತಿತ್ಲೆಂ ವಾಚುಂಕ್ ಮೆಳ್ತಾ. ಕಾಣ್ಯೊ, ಕವನಾಂ, ಲೇಕನಾಂ, ತಶೆಂಚ್ ಹೆರ್ ಜಾಯ್ತ್ಯೊ ಸಂಗ್ತಿಂ ಆಮ್ಕಾಂ ದಾಯ್ಜಾಧ್ವಾರಿಂ ವಾಚುಂಕ್ ಮೆಳ್ತಾತ್. ತ್ಯೊ ವಾಚುನ್ ಕೊಂಕ್ಣಿ ಜಿವಾಳ್ ದವರಾ.
ಸ: ದೇವ್ ಬರೆಂ ಕರುಂ ಹೆನ್ರಿಯಾಬ್ ತುಮ್ಕಾಂ. ತುಮ್ಚೊ ಆಮೊಲಿಕ್ ವೇಳ್ ಆಮ್ಚೆ ಸಾಂಗಾತಾ ಸಂದರ್ಶಾನಾಕ್ ಖರ್ಚಿಲ್ಲ್ಯಾಕ್? ತುಮ್ಕಾಂ ದಾಯ್ಜ್ ತರ್ಫೆನ್ ಸರ್ವ್ ಬರೆಂ ಮಾಗ್ತಾಂ?
ಜಾ: ತುಕಾಯೀ ದೇವ್ ಬರೆಂ ಕರುಂ ವಾಯ್ಲೆಟ್. ಇತ್ಲ್ಯಾ ಮೊಗಾನ್ ಮ್ಹಜೆ ಸಂದರ್ಶನ್ ಘೆಂವ್ಕ್ ಆಯಿಲ್ಲ್ಯಾಕ್. ಹಾಂವ್ ತುಕಾ ತಶೆಂಚ್ ವಲ್ಲಿಕ್ ಆನಿ ಸರ್ವ್ ದಾಯ್ಜ್ ವಾವ್ರಾಡ್ಯಾಂಕ್ ಬರೆಂ ಮಾಗ್ತಾಂ. ಆಶೆಂಚ್ ಅನಿಕ್ಯೀ ದಾಯ್ಜಾಚಿ ವಾಡಾವಳ್ ಜಾಂವ್ದಿ ಮ್ಹಣ್ ಮಾಗ್ತಾಂ.
