ಕವಿತಾकविताPoem

Tinterant Pintur: Pintur - 1

Vixoi: Bhuk ani Sodhnam (9 Kovita)

ತಿಂತೆರಾಂತ್ ಪಿಂತುರ್ : ಪಿಂತುರ್ - 1

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

ವಿಶಯ್: ಭುಕ್ ಆನಿ ಸೊಧ್ನಾಂ

ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ

ಸಂಸಾರಾಂತ್ ವೆವೆಗ್ಳ್ಯಾ ರಿತಿಚೆ ದಿವಸಾಂಚೆಂ ಆಚರಣ್ ಚಲ್ತಾ, ಆವಯಾಂಚೊ ದೀಸ್, ಬಾಪಾಯ್ಚೊ ದೀಸ್, ಮೋಗ್ ಕರ್ಣಾರಾಂಚೊ ದೀಸ್, ಪಿಡೆಸ್ತಾಂಚೊ ದೀಸ್, ಕಾಮೆಲ್ಯಾಂಚೊ ದೀಸ್, ಧುಂವ್ರಾಪಾನಾಚೊ ದೀಸ್, ಏಡ್ಸ್ ದೀಸ್ ಇತ್ಯಾದಿ, ಇತ್ಯಾದಿ. ಹಾಂಚೊ ಮಹತ್ವ್ ಕಸಲೊ?

ಸಂಸಾರಿಂ ರಾಟಾವಳೆಮಧೆಂ ಆಮಿಂ ವೆಗಿಂ ಥಕ್ತಾಂವ್, ಆಮಿಂ ವೆಗಿಂ ಪಿಕ್ತಾಂವ್ ದೆಕುನ್ ಆಮ್ಕಾಂ ಚಿಂತುಂಕ್ ಜಾಯ್ನಾ, ಚಿಂತಿಶೆಂ ಕರಿಜಾಯ್ ಆಸ್‌ಲ್ಲೆ ಘಾಡ್ ನಿದೆಂತ್ ಘೊರೆತಾತ್ ಆನಿ ಹೆರ್ ತೆಚ್ಚ್ ಕಾಜುಲೆ, ಪಿಸೊಳಿಂ, ಚಲಿ, ಚಲೊ, ಮೋಗ್, ದೇವ್-ಅತ್ಮೊ ಸಾಲ್ವಾಸಾಂವಾಚಾ ಭಂವ್ತೊಣಿಂಚ್ ಭಂವೊನ್ ಆಸಾತ್. ಹಾಂಚಾ ಘರ್ಚಾ ಕುಶಿನ್ಂಚ್ ಬೊಂಬ್ ಫುಟೊನ್ ರಗ್ತಾಚ್ಯೊ ವ್ಹಾಳ್ ಜಾಯ್ತ್ ತರ್‌ಯ್ ತಾಂಕಾ ತೆಂ ದಿಸ್ಚೆಂನಾ.

ಆತಾಂ ಹ್ಯಾ ದಿಸಾಂಚೆಂ ಆಚರಣ್ ಕೆಲೆಂ ಮ್ಹಣ್ತಚ್ ಕಾಂಯ್ ಸಂಸಾರ್ ಖಿಣಾನ್ ಬದಲ್ತಾ ಮ್ಹಣ್ ಭಿಲ್ಕುಲ್ ನ್ಹಯ್. ಜಶೆಂ ಪಿಡೆಸ್ತಾಂಚೊ ದಿವಸ್ ಆಚರಣ್ ಕರ್ತಚ್ ಸಂಸಾರಾಂತ್ಲೆ ಸರ್ವ್ ಪಿಡೇಸ್ತ್ ಜೆಜುನ್ ಲಾಜಾರಸಾಕ್ ಉಟಯಿಲ್ಲೆಪರಿಂ ಬರೆ ಜಾವ್ನ್ ಉಟ್ತಾತ್ ಮ್ಹಣ್ ನ್ಹಯ್, ಆವಯಾಂಚೊ ದಿವಸ್ ಆಚರಣ್ ಕರ್ತಚ್ ವಾಟೆರ್ ಪಡ್‌ಲ್ಲಿಂ ಆವಯಾಂ ಪಾಟಿಂ ಘರಾ ಪಾವ್ತಾತ್ ಮ್ಹಣ್ ನ್ಹಯ್, ಏಡ್ಸ್ ದಿವಸ್ ಆಚರಣ್ ಕರ್ತಚ್ ಸಂಸಾರಾಂತ್ ಜಿತ್ಲಿಂ ಏಡ್ಸ್ ಪಿಡೆಸ್ತಾಂ ಆಸಾತ್ ತಿಂ ಸಗ್ಳಿಂ ಬರಿಂ ಜಾತಾತ್ ಮ್ಹಣ್ ನ್ಹಯ್. ಅಸಲೆಂ ಅಣ್ವೆಂ ಚಿಂತಾಪ್ ಕೊಣ್‌ಯ್ ಚಿಂತಾತ್ ತರ್ ಮ್ಹಜೆಪ್ರಕಾರ್ ತಿಂ ಪಿಸಾಂಟಾಂಚ್ ಸಯ್.

ಸಮಾಜೆಚೊ ಆರ್ಸೊ ಧರ್ಚೊ ಕೊಣೆ? ಬರವ್ಪ್ಯಾಂನಿ, ಚಿಂತ್ಪ್ಯಾಂನಿ. ತರ್ ಹೆಚ್ಚ್ ಬರವ್ಪಿ ಆಜ್‌ಕಾಲ್ ಕುರ್‍ವೊನ್ ಬೊಸ್ಲ್ಯಾರ್, ರೊಂವಾಣೆಚ್ಯಾ ಕೊಂಬಿಯೆಕ್ ಕುಂಕುಡ್ಸೊ ಲಾಗ್‌ಲ್ಲೆಪರಿಂ ತಾಂಚಾ ಮತಿಕ್ ಲಾಗ್‌ಲ್ಲ್ಯಾ ಚಿಂತ್ಪಾಚಾ ಆಳ್ಸಾಯೆಕ್ ಕೊಣೆಂ ಜಾಗಂವ್ಚೆಂ? ತಾಂಕಾಂಯ್ ತರ್ ಫಕತ್ತ್ ಕೊಣಾಕ್ ಧುಂಪಂವ್ಚೆಂ ಕೊಣಾಚೊ ತಾರಿಫೊ ಕರ್ಚೆಂ, ಕೊಣಾಚೊ ಖೆಬ್ಡಾಯೊ ಕರ್ಚೆಂ ಸೊಡ್ಲ್ಯಾರ್ ಹೆರ್ ಸಂಗ್ತ್ಯಾಂಚೆರ್ ತಾಂಚಿ ಮಾತ್ ವರ್ಚಿಂ ವಿಧಾನಾಂ ತರ್‌ಯ್ ಕಸಲಿಂ?

’ಭುಕ್ ಆನಿ ಸೊಧ್ನಾಂ’ ಅಸಲೊಚ್ ಏಕ್ ಪ್ರಯೋಗ್, ಹಾಂತುಂ ಕೊಣ್, ಕಿತ್ಲೆಶಿಂ, ಕಸಲಿಂ ಕವಿತಾ ಬರಯ್ತಾತ್ ಮ್ಹಳ್ಳೆಂ ಯಾ ಹಿಂ ಕವಿತಾ ವಾಚುನ್ ಸಂಸಾರಾಚಿ ಭುಕ್ ವೆತಾ ಮ್ಹಣ್ ಚಿಂತ್ಚೆಂ ಉಣೆಂ ಚಿಂತಾಪ್ ಆಮ್ಚಾ ಮತಿಕ್ ಯೆಂವ್ಚೆಂಚ್ ನಾಕಾ. ಹೆಂ ಚಿಂತಾಪ್ ಯೆಂವ್ಚಾನಿ ಅಪುಣ್ ಜಾವ್ನ್ ಪಯ್ಲೆಂ ಕಿತೆಂ ಕರುಂಕ್ ಸಕನ್ ಮ್ಹಣ್ ಪರ್ಗಟ್ಲ್ಯಾರ್ ಭೋವ್ ಬರೆಂ. ಕವಿಚಿ ನದರ್ ವಯ್ಲೆಭಾರ್ ಮಾತ್ರ್ ಆಸಾನಾಯೆ, ಬಗಾರ್ ತಿ ಭೋವ್ ಗುಂಡಾಯೆನ್ ವೆಚಿ ಗರ್ಜ್. ಮ್ಹಜಾ ಚಿಂತ್ಪಾಪ್ರಕಾರ್ ಹ್ಯಾ ಮಯ್ನ್ಯಾಚೊ ಕವಿ ’ಎಚ್ಚೆಮ್’ ಹಾಂತುಂ ಜಿಕ್ಲಾ. ತಾಚಿ ನದ್ರೆನ್ ಉಚಾರ್ಚೆಪರಿಂ ಹೆಂ ಪಿಂತುರ್ ಪ್ರಸ್ತುತ್ ಸಮಾಜೆಚೆರ್ ಅರ್ಸೊ ಧರ್ತಾ. ಸಂಸಾರಾಂತ್ ಆಸ್ಚಿ ಆಮಿಂ ಸರ್ವಾಂ ಭುಕಿಂ, ಕೊಣಾಕ್ ನಾಂವಾಚಿ ಭುಕ್, ಕೊಣಾಕ್ ಮಾನಾಚಿ ಭುಕ್, ಕೊಣಾಕ್ ದುಡ್ವಾಚಿ ಭುಕ್, ಕೊಣಾಕ್ ಚೆಡ್ವಾಂಚಿ ಭುಕ್, ಕೊಣಾಕ್ ಆಸ್ತ್-ಬದ್ಕಾಚಿ ಭುಕ್, ಕೊಣಾಕ್ ಪದ್ವೆಚಿ ಭುಕ್, ಕೊಣಾಕ್ ಪೊಟಾಚಿ ಭುಕ್. ಉಲ್ಲಾಸ್ ತುಕಾ ’ಎಚ್ಚೆಮ್’.

ಪಿಂತುರಾಚಾ ನಾಂವಾಚೆರ್‌ಚ್ ಕವಿತಾ ಬರಯ್ಜಾಯ್ ಮ್ಹಣ್ ನಾ, ಪಿಂತುರ್ ಏಕ್ ಸಾಂಕೇತಿಕ್ ಪ್ರೇರಣ್ ಮಾತ್ರ್ ಶಿವಾಯ್, ಹ್ಯಾ ಪಿಂತುರಾಂತ್ ದಿಸ್ಚ್ಯಾ ಸಂಗ್ತ್ಯಾಂಚೆಂಚ್ ಉಲ್ಲೇಕ್ ಕರಿಜಾಯ್ ಮ್ಹಣ್‌ಯ್ ನಾ. ದಾಖ್ಲೊ - ಅನಿಲ್ ಪೆರ್ನಾಲ್ ಹಾಚೆಂ ’ಆಶಾವಾದಿ’ ಕವಿತಾ. ಕವಿಕ್ ಹ್ಯಾ ಪಿಂತುರಾಂತ್ ದಿಸ್ಚೆಪರಿಂ ’ಖಚ್ರ್ಯಾಂತ್ಲೆಂ ಉಸ್ತುಂವ್ಚೆಂ’ ಏಕ್ ಪಿಂಜ್ಕರ್ ವಸ್ತುರ್ ನೆಸ್‌ಲ್ಲೆಂ ಲ್ಹಾನ್ ಭುರ್ಗೆಂ ಎಕಾ ಆಶಾವಾದಿಪರಿಂ ದಿಸ್ತಾ ಆನಿ ನಿಜಾಯ್ಕೀ ಹೆಂ ಏಕ್ ಉತ್ತಿಮ್ ಕವಿತಾ ಜಾವ್ನ್ ರುತಾಂ ಜಾತಾ.

ಆಮ್ಚಾ ಉಲ್ಯಾಕ್ ಪಾಳೊ ದೀವ್ನ್ ಆಮ್ಕಾಂ ಧಾಡ್‌ಲ್ಲ್ಯಾ ಕವಿತಾಂ ಪಯ್ಕಿ ವಿಂಚ್ಣಾರ್ ಕವಿತಾಂಕ್ ಮಾತ್ರ್ ಹಾಂಗಾಸರ್ ಪರ್ಗಟ್ ಕೆಲ್ಯಾಂತ್, ಹಾಂಚಾ ಕವಿಂಕ್ ಉಲ್ಲಾಸ್. ತಶೆಂಚ್ ’ಮಯ್ನ್ಯಾಚೊ ಕವಿ’ ಜಾವ್ನ್ ವಿಂಚೊನ್ ಆಯಿಲ್ಲ್ಯಾ ’ಎಚ್ಚೆಮ್’ ಹಾಕಾ, ತಶೆಂಚ್ ಭಾಗ್ ಘೆತ್‌ಲ್ಲ್ಯಾ ಸರ್ವ್ ಕವಿಂಕ್ ಅಭಿನಂದನ್ ಪಾಟಯ್ತಾಸ್ತಾನಾ ಮುಖಾರ್ ತಾಂಚೆಥಾವ್ನ್ ಅನಿಕ್‌ಯ್ ಉಂಚ್ಲ್ಯೊ ಕವಿತಾ ವ್ಹಾಳೊಂದಿ ಮ್ಹಣ್ ಆಶೆತಾಂವ್.

[ವಾಂಟೆಲಿ ಜಾಲ್ಲಿಂ]

1. ಎಚ್ಚೆಮ್ ಪೆರ್ನಾಲ್/ಮುಂಬಯ್

2. ಸಿರಿಲ್ ವಾಸ್, ಬೆಂಗ್ಳುರ್

3. ಆಸ್ಟಿನ್ ಡಿ’ಸೊಜ್ ಪ್ರಭು ನಂತೂರ್/ಅಮೆರಿಕಾ

4. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್

5. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್

6. ರೋನಿ ಸುವಾರಿಸ್, ಕೆನಡಾ

7. ಜೊಮೆಲ್ ಬೊಂದೆಲ್/ಕುವೇಯ್ಟ್

8 . ಅನಿಲ್ ಪೆರ್ನಾಲ್, ಮಸ್ಕತ್

9 . ವಲ್ಲಿ ಕ್ವಾಡ್ರಸ್ ಅಜೆಕಾರ್/ಕುವೇಯ್ಟ್

Voikunttantolo Vepar [Moinachem Kovita] HM Pernal

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

HM Pernal/Mumbai [Moineacho Kovi]

Konna adamvchea zange bhukek
par‍teniym' zalim xita khonnam
bevarisancha xerant vaddon ranam
chir‍mutton gelim duda thonam

Konna evecha kati bhukek
udkant khir‍lon mittakhonnam
ugtea naleak kator‍no pottam
vallon gelim pimprim kir‍nnam.

Som'‌ya tuza voikunttant, bhuk oxi
konnak xitachi - konnak masachi
potta bhukek vikun vetat rogtam
xita chorob jirvonk ghastat masam.

2. Bhuk Ani Sodhnam

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Cyril Vas, Bangalore

bhuk mollear kitem?
konn zanna zap
pott uron ritem
pett'ta angar tap
nhoi tum nhoi hamv
ami nennamv bhuk
utram amchim momv
bogtamv amim suk
bhuke vixeant kounam
likhnni korit sovalam
ani taka inamam
kitem amchim noulam
amkam asa duddu
duddvak asa sokot
zoddunk ani moddunk
piddek asa vokat
khanna khatir jinnyent
sodhnam keleant ami?
poddla bhurgo konnyent
kitli krur bhumi
bhukek karonn konn?
vanttinatolim ami
nhoi‌gi osmanoponn?
pois sora tumi!
khann dourunk zago
na gresta mezar
khann nastam vogo
dubllo zala bezar
rostear, gol'lent, kochreant
sodtat bauddim bhurgim
monxa hogea mosrant
pautit bhukheun sorgim
bhuk ani tan
thoddeank jinnibhor
moread ani man
hogddaun pott bhor!
uddoinakat nott nannim
naka vostur pornem
dia kallza dennim
movall monim tornem
soda tumkam melltelem
sanglam somea jezun
udar mon balltelem
dilear na mezun
mell'llam amkam sodtana
dil'lem somean bor‍ya
mellom dublleank magtana
diveam monan khor‍ya

3. Bhuk Ani Sodhnam

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Austin Prabhu, Nanthur

Kalliz mhojem koddtta
mon mhojem voddtta
ti kochreachi ras polletana
mhoji tan sorta,
mhojem pott bhorta
tantlem vinchun khatasotana
mhaka na mam-i
mhaka na bab
konn'nch nant bhavo-bhoinni
mhaka na ghor
mhaka na mandri
rostoch mhojea jiunachi raunni
ti plasttikachi gonninch
mhojem gresot khozan
nirontor pattir vhaumvchem vozan
hamv sodhtam, sodhtam
mellta mhojea hatank
te fumrgel'le unddea kuddke matr
pamyank toptat komvchi
thoddeo khali haddam raxi
bandunk mellta pornea vostra chindi
kochrea ras‌cho mhojem sorg
auy-bapoi naschem khorg
konnak hamvem vaitt kel'lem deva?
tum amcho rochnnar
tum amcho datar
mhakayi khoro monis kor bapa!

4.Bhuk Ani Sodhnam

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Violet J Pereira, UAE

kalliz koddlem pintur hem choitana
ek ball gonni khandear ghalon rautana
bhomvtonnim kochro, asam konnak husko
hem nentte choita, mellat‌gi kaim usnnem
palvonk tea pottacho uzo
bhuke mukhantr tea ballak lascho
rochtana tuvem kitea rochlai axem?
grestak sorv, dublleak kaim na koxem?
hea nentteachi chuk tori kitem
gonni khandear ghalon sodhta tori kitem
khoim asat tachi zolm'‌dataram
motint mhojea hozar chintnam lharam
devan thoddeank dilam dharall
thoddeanchi jinnim zalea korall
diuna vosti korunk purtem ek tholl
hem sorv rochnarachea rochnecho khell
monxea jinnyent bhukecho tanddou
kitleo kuddi zaleo nirjivo
nentte hem ball, kochream bhomvar ubem
zannangi tem kitem borem ani kitem khottem
zolmal'lea chukik bhogta koxtt khorem
pott bhorunk sodam ustita sarem

5.Tum Tor‌yi Bhirmot Pav

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Priya Sequeira, Ferar/Kuwait

Ye surea, polle tea pap bamvddak
tondda tim bauleant, ong tem korpalam

loz man baddeak dileari
gresta tim ves pangurtat;
moladhik vosturamni.
man moreadek jivo dimvchi
dublli tim man dampunk axetat;
ghanncha bannxir‍yamni

monis zal'leank na aschem tem monxaponn
surea tum tori dakoi
las tujea tikxnn kirnnamni
tea ghatki yemkulleank
thamboi tujea movall kirnnamni
tea dubllea daktteank

6.Bhuk Ani Sodhnam

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Rony Suares, Canada

hai hai bhuken martam hamv hak
na mhojea pottak ghoddiechem sukh
polletat axen dolle kosrea raxik
punn zhollkana kamyichch bhukechea doxink

zaina somia mhojean sosunk hi bhuk
na boll hatamni bhukechem magonk bhik
doya dakoi mutt‌bhor xitak
bogsi kaim osa tor patak

dektana ya bhomvarinchea vhodd monxeank
voddta mon kaim tori magonk
punn‌na tanchea mukhamollar moipasachi vollok
chintana nopomych zata bhukechi zhollok

bhukel'leank diunk dista tanka duk
desvatt korn uddoitana kaim bhogana chuk
sot ye punn lagana tanka adduk
dekun mellta tanka dharall desvatton uddvonk

di somea di dharall hea grestank
pottam bhorpur bhorn vibhaddunk
vibhaddolelem thoddem yeun ya kosreak poddonk
oni tantle thoddem mhojea pottak pavonk

7.Konn upaxi anim konn pottari?

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Jomel Bondel, Kuwait

Ek dis bava hamv sanjechem
bhomvddek bair sor‌l'lom
lagsar ek vichitr ghotton polleun
soglloch xermeono gelom
tem polleun jivo mhozo kamponk laglo
tondd vollaun bezo mhozo taponk laglo
tumim-i tori hem aikaxeat
khonddit churchure bogteleat.
Ek lhan bhurgem
khochrea ddobbeantole khann vinchun
bhuk thambvonk aitem zatana
pois ubho as‌l'lo ek petto
bhurgeachea jeunnak lall golloitalo.
Poili unddi tonddak dourchem fuddem
tantlem thoddem sunneaki diun
bhurgem hason choltech raulem
hem pollomvche dhurbag
mhoje dolle ugte korunk lagle.
hem pollemvche subhag
otbeachi bhuk tasunk laglem
potta bhuk thambcheak thoddim barant nachtat
punn kuddi bhukeche pottari tanka molak ghetat.
Tedna tanchea khorxeunnen zal'li chuk,
khochrea ddobbeantole khann vinchun khata
ghor uromvchim thoddim tambddea diveacha gol'leamni bhomvtat
punn ghor kosllamvoche onglapi hanka sodhun yetat
ata tuminch sanga, hea somsrant
konn upaxi anim konn pottari?

8.Ashawadi

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Anil Pernal, Muscat

Bhromidechea palvant lipleant
bhovixeachim svopnnam mhojim
akasar pamvchim
sur‍yak vengchim
chondrak dekhchim

zatit kednam sot nennam
bhor‍voso songinchch asa
humedichi vat kallzant zhollta

humedichi vat zholltapor‍yant
bhor‍voseacho ujvadd astolo
anim hea ujvaddant
bhovixeachi vatt sodhtolom.

humed anim bhor‍vaxeachea mellint
atm'-vixvasachem ball zolmatelem
kromenn sv-patyennechem nat zatelem
sor‍vo kuttamb songim mellon
mhaka voir paitelem
hea kuttmachea sohkaran
ek dis....
hamv zorur
bhromidecho palomv ubhoitolom
akasar pautolom
sur‍yacher ravon
chondrak dekhtolom...!!!!

9.Kitem Ustitai?

$Placeholder: the original page gave this picture no description, and none has been written yet. It came from daaiz\daaiz\kavitha\tp\tp1.asp.$

Valley Quadros, Kuwait

Kiteak ustitai
kitem sodhtai
hea kostollant
hea suddkaddant
kuslelea ghanner‍ya
somsaracha chikolamodhem
tem kitem sodhtai
kiteak ustitai
Pott bhorunk
pott bhor‍leleamni
denkh kaddon
usttea hatan
chimvon lemvon
uddyil'lea kalcha porcha
bellxel'lea
khannak tum
kiteak sodhtai
Ho man zago
som'manitancho
tum man sambhall
pinjkor vostrant
man tuzo
rokddoch ubhtolo
ballxem tum, tuza
lavaris ballxak
hangach uddoun
tuka dhamvonk poddtelem
kiteak ustitai
Konne uddyil'leo
konne poddyil'leo
pottleo gudd'ddaun
kalche disacha
rongall fintank
oxem-i mostun
kitem sodhtai
devan kaim
tujem noxib
hantum purlam?