ಸಂಪಾದಕೀಯ್संपादकीयEditorial

Sompadoki-i - 18: Vinchounnent Chukanaka

Daaiz

Valley Quadros

Editorial December 2005

"somsarant dolleank borem dischem vinchinaka, kallzak borem dischem vinch"

Vinchounnent Chukanaka

de17

Voros : 2005

Moino : December

"Somsarant dolleank borem dischem vinchinaka, kallzak borem dischem vinch"

Devan eka sobdhan sogllem rochlem tor sobdhak kitlem trann ani man nhoi‌gi?

Amcha ghorak konn‌y yetat tor tankam khaunko kitem dilam, pieunko kitem dilam, bosounko kitem dilam mholl'llem jitlem promuk nhoi jitlem ulounko kitem dilam mholl'llem, kiteak khel'lem, piel'lem sogllem nas zaun vechetosolem, punn ek borem utar sodanch uddasak dourchem.

Jezucha ekach utran tachi auy mori monxakullachi auy zaunko pauli, mhollear monxacho sombondh doivik zaun bodol'lo. Monis matr oplo nirontor sombond lusiferasovem dourn asa tor‌y eka utrapattlean aschem trann konnem-i negar korcheporinch na ya kel'leporinch na.

Zannte sangtat "utar" eka kitthallaporim mhonn, zoxem ek borem kitthall randnnir jit xizounko upkarak poddta tench khottem kitthall ekleachem ghor bhosmunk sokta. Toxem mhonnon devan rochtana kitem-i borem ya vaitt mholl'llem rochunk na, hem borem ya vaitt monxan opaplea svarthakhatir, apaplea motlobhakhatir kel'lo ya korcho prokar zaunasa.

Sobd/utar ani korni ek‌gi? amcha jinnyent zaitepauttim amim sangtamv ’tuka devo borem korum’. Ekadhavella toxem sang‌l'lean konnaichem-i borem zal'lem tor bhouxa monis chintun hem utar sangto konn'nna nhoi‌gi? ’tuka devo borem korum’ mhonnchaki ’mhaka devo borem korum’ mhonnto zauyet nhoi‌gi?

Kitem-i asom! ulounnem ani korni vivingodd mholl'llem amim patyetamv dekun'nch polletelim sorvam chintunk vochanant, vach‌l'lim sorvam somzonk vochanant, uloyil'lim sorvam korunk vochanant. Nhoi tor hea somsarant grest-dubllo, bhuko-dadhos, unch-kill, vhoddlo-lhan mholl'llo prokar udetoch‌na nhoi‌gi?

Monis zolmathaun'nch surati, ani eka hontar ho surat‌y vajbich soi! kiteak surat nat‌l'lo tor monis minot kortona, faleanchem chintona, faleank urounko nialltona. Tor‌y ek ghoddibhor monxacha surat‌ponnacher nihall korcho tor - monis kiteak surat korta?

Ek auy oplea bhurgeamni upaxim poddanaye mhonnon chodd vamvtt kiteak kaddta? ek bapui aplea bail bhurgeamni faleam kosttam-sonkosttar poddanaye mhonnon kiteak vamvtt kaddta? ek bhavo oplea bhoinnicho fuddar boro zaizoi mhonn kiteak amvddeta?

Sorv vajbi surat. Kiteak mhollear tamcha hea suratanimtim matr tanchan punzaun dourunk sadhy zata. Utor prayer bhouxa hem punzamvchem kam' titlem solis nhoi. Dekun hor‍yek monis opaplea jinnyent punzamvcha sondorbhar jitlem punzaunko sokta titloch to utor prayer tript zaunko pauta. Mhollear monis oplea jinnyecha xevottak pautoch zor‌tor nihall korit oplea jinnyent opnnan kitem sadhon kelem?

Tor taka tannem punzayil'leacho uddas kaddtana tacha dollea-kallza-monak bhogta. Zo konn loukik songtink mhonnje ast-bodik, bhangar-singar punzaita to aplea dolleank-motik somodhan bhogta, punn zo konn heranchem boremponn'nch oplem boremponn mhonn chintun punzaita to kallzant somodhan bhogta.

Kiteak mhollear amkam sorvank eka disa tea eka disak fudd korunk astelem jea disa amim kel'lea sadhanancher tripti bhogizai xivai churchure nhoi. Tea dekun amim kitlem zoddlam, ya kitlem hogddailam mholl'llem promuk nhoi, bogar oplea koxedd'dak opunn kitlom khal zaun tem kelam tem promukh zaunasa.

Dekun somsarant dolleank borem dischem vinchinaka, kallzak borem dischem vinch tum kallzant kedink‌ch niraxi zamvchonam-i.

- Valley Quadros

Borovpi

Valley Quadros

1984 isve thaun sahityik vaur korun asa. Kothakar, Kovi, Kadomborikar, Vimrxok, Sompadok, Prokaxok toxench Torzonn/Lipyontoronnacho vaur korun asa. Kannik (1988-1991), Daaiz.com (2003-2013), Poinnari.com (2015 thaun), Konkonn‌gar Prokaxon (2020-2024), Ashawadi Prakashan (2000 thaun) sompadok zaunasa. Kannada, Nagari toxench Romi lipimni boroita.

Pustoka rupacheo kadombori; Songhrox (1991), Tum Mhojem (1988), Pattim Gamvak (2002).

Mottvea kannianchim pustokam; Ashawadi (2001), Khillo (2003), Kongal ani Tachi Kukkehll'lli (2005), Sotam ani Khotam (2005), Bondh (2017), Sankou (2020, Nagrint) Mayanogori (2022), WFH ani her kotha (2024), Kovitechim pustokam Chear Mukham (2002), Kott‌putlli (2003), Dorbharantoli Pimrgonn (2005), Bozar (2017), Bhitrolo Kovi (2021).

Kovita odhyoinachim pustokam; Kovitapatth (2005), Doreak Udok (2006), Kallok Natlo Gamv (2007), Mugdonatolim Gitam (2017), Sukti Bhorti (2019). Kovitapatth mholl'llim kovitencher odhyoinachim 50 voir kamasallam choloileant.

Sompadokiyanchim pustokam; Mollbauyolim Sopnnam (2005), Mukhamukhi (2017), Poddsad (201)

Kovita sonklonachim pustokam; Motiam ani Taram (2005), Tinterant Pinturam (2006), Utrant Sutram (2006), Moila Fator (2020).

Kotha sonklonanchim pustokam; Visavea Xekddeacheo Kannio (2006), Sureo Udeta (2019), Sureo Udela (2024), Kotha odhyoinachim pustokam; Kothavihan (2025), Kothapatth (2025), Chol Don Chondrank (2025), Sallkachea Sirivontacheo Kotha (2025), Kothon (2026). Kothapatth mottvea kanniancher 50 voir kamasallam toxench vebinaram choloileant.

Bharti-i sorkarachea somsokriti vibhag (CCRT) thaun (The Cultural Aspects of Sidhdhis in Karnataka) sonxodhonank Senior Fellowship (2019-2021) labhlam. Divo Sahityik Pursokar (2003), Karnataka Konknni Sahity Okaddemichim ut'tim' pustokam (2005, 2006, 2018), Mothais Kuttmacho Kovita Trust-acho Pursokar (2019), Vishwa Konknni Kendrochea Vimala V. Pai. Founddeshan-acho Pursokar, Sandesh Pursokar (Konknni Sahity, 2023), Daiji Dubai Sahityik Pursokar (2023), Goa Konknni Okaddemi thaun Madhav Manjunath Konknni Seva Pursokar (2023) labhleat.

All 90 pages by this writer