ಕಟಪಾಡಿಂತ್ ಭೋವ್ ದಾಧೊಸ್ಕಾಯೆಚೊ ಕೊಂಕಣಿ ಸಂಭ್ರಮ್
ಆಮ್ಚೆಲಾಗಿಂ ದುಡು ಆಸಾ ತರ್ ಆಮಿ ವಸ್ತು/ಸಾಹೆತಾಂ ಘೆವ್ಯೆತ್; ಜಶೆಂ ಗಾಡಿ, ಬಂಗ್ಲೊ, ನ್ಹೆಸೊಂಕ್ ವಸ್ತುರ್, ಭಾಂಗಾರ್ ಶೃಂಗಾರ್..... ಹ್ಯೊ ಸರ್ವ್ ಭವ್ತಿಕ್ ವಸ್ತು ವಾ ಸಾಹೆತಾಂ ದಿಸ್ಪೊಡ್ತ್ಯಾ ಜಿವಿತಾಂತ್ ಎಕಾ ನಾ ಎಕಾ ರಿತಿರ್ ಉಪ್ಕಾರಾಕ್ ಪಡ್ಚ್ಯೊ . ಪುಣ್ ಕೊಣೆಂಯ್ ದುಡ್ವಾಂತ್ ಗಿನ್ಯಾನ್, ಸಂತೊಸ್, ಶಾಂತಿ-ಸಮಧಾನ್ ಘೆತ್ಲಾಂ ವಾ ಘೆಂವ್ಕ್ ಸಾಧ್ಯ್?. ದೆಕುನ್ ದುಡು ಆಮ್ಕಾಂ ವ್ಹಖ್ತಾಂ ಮಾತ್ರ್ ಘೆಂವ್ಕ್ ಮಜತ್ ದಿತಾ ಶಿವಾಯ್ ಭಲಾಯ್ಕಿ ನ್ಹಯ್. ಪುಸ್ತಕಾಂ ಘೆಂವ್ಕ್ ಮಜತ್ ದಿತಾ ಪುಣ್ ಗಿನ್ಯಾನ್ ನ್ಹಯ್. ಸೆಪ್ಟೆಂಬರ್ 6 ತಾರಿಕೆರ್ ಕಟಪಾಡಿಂತ್ ನಾಮ್ನೆಚಿ ಬರವ್ಪಿಣ್ ಬಾಯ್ ಕ್ಯಾಥರಿನ್ ರೊಡ್ರಿಗಸಾಚ್ಯಾ ’ಜೋನ್ಸ್ ಆರ್ಕ್’ ಘರಾಂಗ್ಣಾಂತ್ ತಿಚೆಂ ನಾಗರಿ ಲಿಪಿಂತ್ ಲಿಪ್ಯಂತರಣ್ ಕೆಲ್ಲೆಂ, ತಿಚ್ಯಾ 50 ಕಥೆಚೆಂ ಪುಸ್ತಕ್ ’ಕ್ಯಾಥರಿನ್ ರೊಡ್ರಿಗಸಾಚ್ಯೊ ಕಥಾ’ ಲೊಕಾರ್ಪಣ್ ಕಾರ್ಯೆಂ ಆಸಾ ಕೆಲ್ಲೆಂ. ಕಟಪಾಡಿ ಫಿರ್ಗಜೆಚಿಂ, ಪ್ರತ್ಯೇಕ್ ಜಾವ್ನ್ ಕ್ಯಾಥರಿನ್ ಬಾಯೆಚಿಂ ಲಾಗ್ಶಿಲಿಂ ಜಾಯ್ತಿಂ ಹ್ಯಾ ಕಾರ್ಯಾಂತ್ ಹಾಜರ್ ಆಸ್ಲಿಂ.
ಸಮಾಜೆಂತ್ ಅಶೆಂ ಜಾಯ್ತಿಂ ಕಾರ್ಯಿಂ ಆಯೋಜಿತ್ ಜಾತಾತ್. ಆಮಿಂ ಸಯ್ತ್ ಅಸಲ್ಯಾ ಕಾರ್ಯಾಂನಿ ಮೆತೆರ್ ಜಾತಾಂವ್ ವಾ ವೆತಾಂವ್, ಪುಣ್ ಸರ್ವ್ ಕಾರ್ಯಾಂನಿ ಆಮ್ಕಾಂ ’ತೃಪ್ತಿ’ ಲಾಭಾಜಯ್ ಮ್ಹಣ್ ನಾ. ಪುಣ್ ಥೊಡಿಂ ಅಸಲಿಂ ಕಾರ್ಯಿಂ, ಆಮ್ಚ್ಯಾ ಮತಿಂತ್ ಲಾಂಬ್ ಕಾಳ್ ಪರ್ಯಾಂತ್, ಎಕಾ ನಾ ಎಕಾ ಕಾರಣಾಕ್ ಲಾಗೊನ್ ಯಾದಿಂತ್ ಉರ್ತಾತ್. ತ್ಯಾ ಪಯ್ಕಿಂತ್ ಹೆಂ ಕಾರ್ಯೆಂ ಏಕ್ ಮ್ಹಣ್ ಸಾಂಗೊಂಕ್ ಮ್ಹಾಕಾ ಭೋವ್ ಚಡ್ ದಾಧೊಸ್ಕಾಯ್ ಭೊಗ್ತಾ. ಹಾಚಿಂ ಕಾರಣಾಂ ಫಕತ್ ಏಕ್-ದೋನ್ ನ್ಹಯ್, ಜಾಯ್ತಿಂ ಆಸಾತ್. ತ್ಯಾ ಜಾಯ್ತ್ಯಾ ಕಾರಣಾಂ ಪಯ್ಕಿಂತ್ ಥೊಡಿಂ ತರ್‌ಯೀ ಮಹತ್ವಾಚಿಂ ಕಾರಣಾಂ ಹಾಂಗಾಸರ್ ಉಲ್ಲೇಕ್ ಕರ್ಚಿ ಗರ್ಜ್ ಮ್ಹಣ್ ಮ್ಹಾಕಾ ಭಗ್ತಾ.
ಕ್ಯಾಥರಿನ್ ರೊಡ್ರಿಗಸ್ ವೃತ್ತೆನ್ ಶಿಕ್ಷಕಿ, ದೆಕುನ್ ಸಾಹಿತ್ಯ್ ತಿಕಾ ಲಾಗ್ಶಿಲೆಂ. ಪುಣ್ ತಿಣೆಂ ಸಾಹಿತ್ಯಾಂತ್ (ಜಾಂವ್ ಕಥಾರುಪಾರ್, ನಾಟಕಾರುಪಾರ್ ವಾ ಕವಿತಾರುಪಾರ್) ನಾಂವ್ ವೆಲ್ಲೆಂಚ್ ತುಳು ಭಾಸೆಂತ್. ತಿಣೆಂ ಕನ್ನಡ ಭಾಸೆಂತ್ ಸಯ್ತ್ ನಾಂವ್ ವೆಲಾಂ ಆನಿ ಕನ್ನಡ ಸಾಹಿತ್ಯ್ ಉಡುಪಿ ಜಿಲ್ಲೊ ಹಿಕಾ ವರ್ತ್ಯಾ ಮಾನಾನ್ ಲೆಕ್ತಾ. ತೆಚ್‌ಪರಿಂ ತಿಣೆಂ ಕೊಂಕಣಿಂತ್ ಸಯ್ತ್ ಜಾಯ್ತೆಂ ಯೋಗ್‌ದಾನ್ ದಿಲಾಂ. ಚಡ್ತಾವ್ ನೆಮಾಳ್ಯಾಂನಿ ತಿಣೆಂ ಅಪ್ಲ್ಯೊ ಕಥಾ ಧಾಡ್ಲ್ಯಾತ್ ಆನಿ ಜಾಯ್ತಿಂ ಸಾಹಿತ್ಯಿಕ್ ಇನಾಮಾಂ ತಿಕಾ ಲಾಭ್ಲ್ಯಾಂತ್. ಪುಣ್ ಹಾಂಗಾಸರ್ ಮಹತ್ವಾಚೆಂ ಮ್ಹಳ್ಯಾರ್, 6 ಸೆಪ್ಟೆಂಬರಾಚ್ಯಾ ಕಾರ್ಯಾಂತ್ ಹಾಜರ್ ಜಾಲ್ಲಿಂ ಚಡ್ತಾವಾಂ ಕೊಂಕಣಿ, ತಶೆಂಚ್ ಕನ್ನಡ ಆನಿ ತುಳು ಭಾಶಿಕ್ ಲೊಕ್. ಹಿಚೆಂ ಪುಸ್ತಕ್ ಲೊಕಾರ್ಪಣ್ ಕೆಲ್ಲೊ ಸಯ್ತ್ ತುಳುವೆಂತ್ಲೊ ನಾಮ್ನೆಚೊ ಸಾಹಿತಿ ಮುದ್ದು ಮೂಡುಬೆಳ್ಳೆ. ಕಾರ್ಯಾಚಿ ಸವಿಸ್ತಾರ್ ವರ್ದಿ/ಭಾತ್ಮಿ ಆಮಿ ಎದೊಳ್‌ಚ್ ಪರ್ಗಟ್ ಕೆಲ್ಯಾ, ಹಿ ವರ್ದಿ ನ್ಹಯ್, ಥೊಡಿಂ ಭಗ್ಣಾಂ.
ಹ್ಯಾ ಕಾರ್ಯಾಂತ್ ತೀನ್-ಚ್ಯಾರ್ ಪ್ರಮುಕ್ ಉಲವ್ಪಾಂ ಆಸ್ಲಿಂ: ಸುರ್ವಾತೆರ್ ಆಂಡ್ರ್ಯೂ ಎಲ್. ಡಿಕುನ್ಹಾನ್ ’ಕೆ.ಬಿ,ಎಸ್ (ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್)’ ವಿಶಿಂ ಉಲವ್ನ್, ಆಮ್ಚೆಂ ಕೊಂಕಣಿ ಚಿಂತಪ್ ವಿಸ್ತಾರ್ ಜಾಂವ್ಚೆ ದಿಶೆನ್ ದಿವೊ ಪೆಟಯ್ಲೊ. ದುಸ್ರೆಂ ವಲ್ಲಿ ಕ್ವಾಡ್ರಸಾನ್ ’ಶಂಕರಪುರ ಆನಿ ಕಟಪಾಡಿ’ ಗಾಂವಾಸವೆಂ ಅಪ್ಲೊ ಭಾಂದ್ ಕಸಲೊ ಮ್ಹಳ್ಳೆವಿಶಿಂ ಮಾಹೆತ್ ದಿವುನ್, ಕೊಂಕಣಿ ಭಾಸೆಚ್ಯಾ ಮೊಗಾರ್ ಪಡೊಂಕ್ ಕಾರಣ್ ಜಾಲ್ಲೊ ಗಾಂವ್ ’ಪಾಂಗ್ಳಾ’ ಮ್ಹಣೊನ್, ಕೊಂಕಣಿಂತ್ಲ್ಯಾ ಗ್ರಾಮೀಣ್ ಪರಿಸರಾಚ್ಯೊ ಕಥಾ ವಿಶ್ಯಾಂತ್ ಉಲವ್ನ್ ಕ್ಯಾಥರಿನ್ ರೊಡ್ರಿಗಸಾಚ್ಯಾ ಆನಿ ಕೆವಿನ್ ಡಿಮೆಲ್ಲೊಚ್ಯಾ ಕಥೆಂಚೆರ್ ನಿಯಾಳ್ ದಿಲೊ.
ತಿಸ್ರೆಂ ಮುದ್ದು ಮೂಡುಬೆಳ್ಳೆಚೆಂ ಉಲವ್ಪ್; ಕೊಂಕಣಿ ಅಪ್ಲಿ ಆವಯ್‌ಭಾಸ್ ನ್ಹಯ್ ತರ್‌ಯೀ, ಆವಯ್‌ಭಾಸೆಪರಿಂಚ್ ಕಾಳ್ಜಾಕ್ ಲಾಗ್ಶಿಲಿ ಮ್ಹಣಾಲೊ. ಪುಣ್ ಸರ್ವಾಂಚ್ಯಾ ಕಾಳ್ಜಾಕ್ ಲಾಗ್ಚಿಂ ಉತ್ರಾಂ ಉಲಯಿಲ್ಲಿ ಬಾಯ್ ಕ್ಯಾಥರಿನ್ ರೊಡ್ರಿಗಸ್. ಅಪ್ಲಿ ಲಾಂಬ್ ಕಾಳಾಥಾವ್ನ್ ಮತಿಂತ್ ಆಸ್ಚಿ ಏಕ್ ಆಶಾ ಆಜ್ ಜ್ಯಾರಿ ಜಾಲಿ ಮ್ಹಣೊನ್ ಅಪ್ಲೆಂ ಕಾಳಿಜ್ ಉಗ್ತೆಂ ಕರುನ್ ತಿಣೆಂ ಬರಯಿಲ್ಲ್ಯಾ ಕಾಂಯ್ ಥೊಡ್ಯಾ ಕಥೆಂಚ್ಯಾಕೀ ವೆಗ್ಳೆಂ ಉಲವ್ಪ್ ತಿಣೆಂ ಕೆಲೆಂ. ತಿಚಿಂ ಉತ್ರಾಂ ಆಯ್ಕೊನ್ ಜಾಯ್ತ್ಯಾಂನಿ ಅಪ್ಲೆ ದೊಳೆ ಭಿಜಯ್ಲೆ; ತಿಚಿಂ ಭಾವುಕ್ ಪುಣ್ ದಾಧೊಸ್ಕಾಯೆಚಿಂ ಉತ್ರಾಂ ಆಯ್ಕೊನ್ ಖರೆಂಚ್ ಭಗ್ಲೆಂ - ಅಸಲೆ ಅನ್ಭೋಗ್ ಹರ್ಯೆಕಾ ದಿಸಾ ಯೆನಾಂತ್.
ಬಾಯ್ ಸಲೊಮಿ ಡಿಸೊಜಾ ಮೊಗಾರ್ನಾಡ್ ಏಕ್ ವಯ್ಚಾರಿಕ್ ಚಿಂತ್ಪಾಚಿ ಕವಿ ಮ್ಹಣ್ ತಿಚಿಂ ಕವಿತಾಂ ವಾಚ್ತಾನಾಂಚ್ ಸಮ್ಜತಾ, ದೆಕುನ್ ತಿಚಿ ಒಳೊಕ್ ನಾಸ್ತಾಂ ಸಯ್ತ್ ತಿಚೆಂ ಪುಸ್ತಕ್ ಸಂಪಾದನ್ ಕರ್ನ್ ಪರ್ಗಟುಂಕ್ ಥೊಡ್ಯಾ ವರ್ಸಾಂ-ಧಿಂ ತಿಕಾ ಸಂಪರ್ಕ್ ಕರ್ತಾನಾ ತಿಕಾಯ್ ಅಜ್ಯಾಪ್. ಒಳೊಕ್-ಪಾಳೊಕ್ ನಾಸ್ಚೊ, ಖಂಚ್ಯಾಗೀ ಗಾಂವಾಂತ್ ’ಪಯ್ಣಾರಿ’ ಜಾವ್ನ್ ಆಸ್ಚೊ ಮ್ಹಜೆತಸಲೊ ಪರ್ಕಿ ತಿಕಾ ಸಂಪರ್ಕ್ ಕರ್ತಾನಾ ಸಹಜ್ ರಿತಿನ್ ತಿಚ್ಯಾ ಮತಿಂತ್ ಸಯ್ತ್ ಸಭಾರ್ ದುಭಾವಿಂ ಸವಾಲಾಂ ಯೆಂವ್ಚಿಂ ಸಹಜ್. ಪುಣ್ ಮ್ಹಜ್ಯಾ ಚಿಂತ್ಪಾಕ್ ಪಾಟಿಂಬೊ ದೀವ್ನ್ ಹೆಂ ಪುಸ್ತಕ್ ಯೇಶೆಂ ಕರ್ಚ್ಯಾಂಕ್ ಆಂಡ್ರ್ಯೂಚೊ ಭಳ್ವಂತ್ ಹಾತ್ ಆಸಾ. ಪುಣ್ ತೊ ಅಪ್ಲೆಂ ವ್ಹಡ್‌ಪಣ್ ಗಾಜಂವ್ಚೊ ನ್ಹಯ್, ದೆಕುನ್ ಹ್ಯಾ ಪುಸ್ತಕಾಚಿ ಸಗ್ಳಿ ಕ್ರೆಡಿಟ್ ಮ್ಹಾಕಾ ದಿಲಿ ತಿ ಖರೆಂಪಣಿಂ ಸಲೋಮಿಚಿ ಜಾವ್ನಾಸ್ಲಿ. ತಿಚ್ಯಾ ಪುಸ್ತಕಾಕ್ ’ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೆಂ ಉತ್ತೀಮ್ ಪುಸ್ತಕ್ ಪುರಸ್ಕಾರ್’ ಸಯ್ತ್ ಲಾಭ್ಲೊ. ಮ್ಹಾಕಾಯ್ ತಿಣೆಂ ಗವ್ರವಾನ್ ಆಪೊವ್ಣೆಂ ದಿಲ್ಲೆಂ, ಪುಣ್ ಮ್ಹಜ್ಯಾಕೀ ಚಡಿತ್ ಹ್ಯಾ ಗವ್ರವಾಕ್ ಫಾವೊ ಜಾಲ್ಲೊ ಆಂಡ್ರ್ಯೂ ದೆಕುನ್, ಆಂಡ್ರ್ಯೂ ಹ್ಯಾ ಕಾರ್ಯಾಂತ್ ಹಾಜರ್ ಜಾಂವ್ಕ್ ಸಕ್ಲೊ. ಆಸೊಂ, ತಿ ಗಜಾಲ್ ಪರ್ನಿ.
6 ಸೆಪ್ಟೆಂಬರ್ ಕಾರ್ಯಾಂತ್ ಸಲೋಮಿನ್ ಕೊಂಕಣಿ ಕವಿಗೊಷ್ಟಿ ಎಕಾ ವೆಗ್ಳ್ಯಾಚ್ ರಿತಿನ್ ಚಲಯ್ಲಿ. ಎಕೆಕಾ ಕವಿಚೆಂ ಕವಿತಾ ಸಾದರ್ಪಣ್ ಜಾತಚ್, ಲೊಕಾಕ್ ಕೊಂಕಣಿ ಕವಿತಾ ಆನಿ ಕವಿಂಚಿ ಒಳೊಕ್ ದಿಂವ್ಚೊ ಕ್ವಿಜ್ ಚಲಯ್ಲೊ. ಹ್ಯಾ ಕ್ವಿಜಾಕ್ ಲಾಗುನ್ ಸರ್ವ್ ಪ್ರೇಕ್ಷಕಾಂಚಿ ಹುಮೆದ್ ದೊಡ್ತಿ ಜಾಲ್ಲಿ ಅನ್ಯೇಕ್ ದಾಧೊಸ್ಕಾಯೆಚಿ ಗಜಾಲ್.
ನಾನು ಮರೋಲ್ ಅಪ್ಲ್ಯಾಚ್ ಖಾಸ್ ಶೈಲೆರ್ ಮಾನ್-ಸನ್ಮಾನ್ ಕಾರ್ಯೆಂ ಚಲವ್ನ್ ವ್ಹೆಲೆಂ. ಆಮಿ ಎಕ್ಲ್ಯಾಕ್ ದುಡು-ಭಾಂಗಾರ್ ದೀವ್ನ್ ಸನ್ಮಾನ್ ಕರಿಜಾಯ್ ಮ್ಹಣ್ ನಾ. ದೋನ್ ಬರಿಂ ಉತ್ರಾಂ ಪರ್ಗಟ್ ರಿತಿನ್ ಉಲಯ್ಲ್ಯಾರ್ ಸಯ್ತ್ ತೊ ಸನ್ಮಾನ್. ಆನಿ ನಾನುನ್ ತೆಂ ಕಾಮ್ ಭೋವ್ ಅಪುರ್ಭಾಯೆನ್ ಕೆಲೆಂ. ಸಸ್ಪೆನ್ಸ್ ಮ್ಹಳ್ಯಾರ್ ಹ್ಯಾ ತೆಗಾಂಯ್ಕ್‌ಯೀ ’ಸನ್ಮಾನ್ ಆಸಾ’ ಮ್ಹಣ್ ಖಬರ್ ನಾತ್ಲಿ. ತೆಂ ಕಾಮ್ ಭೋವ್ ಅರ್ಥಾಭರಿತ್ ರಿತಿನ್ ನಾನುನ್ ಚಲವ್ನ್ ವೆಲೆಂ.
ಪುಣ್ ಆಮ್ಕಾಂ ಹಾಲಂವ್ಕ್ ಕಾರಣ್ ಜಾಲ್ಲಿಂ ಉತ್ರಾಂ ಎಕಾ ಕನ್ನಡ ಅಧ್ಯಾಪಕಾನ್ ಕ್ಯಾಥರಿನ್ ಬಾಯೆವಿಶಿಂ ಉಲಯಿಲ್ಲಿಂ ಉತ್ರಾಂ. ತಿಂ ಫಕತ್ ಉತ್ರಾಂ ನ್ಹಯ್, ತ್ಯಾ ಉತ್ರಾಂನಿ ತಾಚೆಂ ಚಿಂತಪ್ ಕಿತ್ಲ್ಯಾ ಗುಂಡಾಯೆಚೆಂ ಆನಿ ಗವ್ರವ್‌ಯುಕ್ತ್ ಜಾವ್ನಾಸ್ಲೆಂ ಮ್ಹಳ್ಳೆಂ ಗಮ್ತಾಲೆಂ. ತೆದ್ನಾಂ ಮ್ಹಾಕಾ ಭಗ್ಲೆಂ; ’ಅಸಲೆಂ ಚಿಂತಪ್ ಕೊಂಕಣಿಂತ್ ಕಿತ್ಯಾಕ್ ಉದೆವ್ನ್ ಯೆನಾ?’. ಆಮಿಂ ಎಕಾಮೆಕಾಚ್ಯೊ ಚುಕಿ ಸೊಧ್ಚಾಂತ್ ಅವ್ವಲ್, ಕೊಣೆಂಚ್ ಆಮ್ಕಾಂ ಹ್ಯಾ ಕಲೆಂತ್ ಪಾಟಿಂ ಘಾಲುಂಕ್ ಸಾಧ್ಯ್ ನಾ. ಒಲಂಪಿಕಾಂತ್ ಹಾಕಾಯ್ ಮೆಡಲ್ ಆಸ್ತೆಂ ತರ್ ತೆಂ ಖಂಡಿತ್ ಆಮ್ಕಾಂ ಮೆಳ್ತೆಂ. ಪುಣ್ ಹೆರಾಂಚೆಂ ಬರೆಂಪಣ್ ಒಳ್ಖೊಂಚೆಂ ಚಿಂತಪ್ ಆಮ್ಚ್ಯಾ ಮತಿಂತ್ ಕಿತ್ಯಾಕ್ ಉದೆವ್ನ್ ಯೆನಾ? ಹೆಂ ಸವಾಲ್ ಆಮಿ ಆಮ್ಕಾಂ ಕರ್ಚೆಂ ಆನಿ ಜಾಪಿ ಸೊಧ್ಚಿ ಗರ್ಜ್ ಆಸಾ. ಹೆರಾಂಕ್ ಸೊಡ್ಯಾಂ, ಆಮಿ ಸ್ವತಾ ಹೆರಾಂಚೆಂ ಬರೆಂಪಣ್ ಕಿತ್ಲೆಂ ಒಳ್ಖತಾಂವ್? ಕೆದ್ನಾಂಯ್ ಹೆರಾಂಚ್ಯಾ ಬರೆಪಣಾವಿಶಿಂ ದೋನ್ ಬರಿಂ ಉತ್ರಾಂ ಉಲಯ್ತಾಂವ್? ಹೆರಾಂಚ್ಯೊ ಚುಕಿ ಸೊಧ್ಚೆಂ ಅಸ್ಕತ್ಯಾಂಚೆಂ ಕಾಮ್, ಪುಣ್ ಹೆರಾಂಚೆಂ ಬರೆಂಪಣ್ ಪಾರ್ಕುಂಚೆಂ ಭಳ್ವಂತಾಚಿಂ ಲಕ್ಷಣಾಂ. ಆತಾಂ ಆಮಿ ಆಮ್ಕಾಂ ವಿಚಾರುಂಕ್ ಆಸಾ ’ಆಮಿ ಅಸ್ಕತ್ ವಾ ಭಳ್ವಂತ್?’
