[The poet is a liar who]

"The poet is a liar who always speaks the truth. (Jean Cocteau)" ನಾಮ್ಣೆಚ್ಯಾ ಫ್ರೆಂಚ್ ಕವಿಚಿಂ ಉತ್ರಾಂ ಹಿಂ. ಪುಣ್ ಜೆದ್ನಾಂ ಕವಿ ಸತ್‌ಚ್ ಉಲಯ್ತಾ, ತೆಂ ಸಮಾಜಿಕ್ ಚಿಂತ್ಪಾಕ್ ಅಡ್ಹೂಕ್ ಲಾಗ್ತಾ, ಪುಣ್ ಸತ್ ತೆಂ ಸತ್‌ಚ್ ಆನಿ ಎಕಾ ಪ್ರಾಮಾಣಿಕ್ ಕವಿಚಿ ಜವಾಭ್ದಾರಿ‌ಯೀ ತಿಚ್ಚ್; ಸತ್ ಉಲಂವ್ಚಿ.

ಆಮ್ಚ್ಯಾ ದೀಸ್ಪಡ್ತೆ ಜಿಣ್ಯೆಂತ್ ಆಮಿ ಕಿತ್ಲೆ ಪಾವ್ಟಿಂ ಆಮ್ಕಾಂಚ್ ಡೋಂಗ್ ಕರುನ್ ಜಿಯೆತಾಂವ್ ಮ್ಹಳ್ಳೆಂ ಅಮ್ಕಾಂಚ್ ಖಬರ್ ನಾ. ಸ್ವಾತಂತ್ರೋತ್ಸವ್ ದಿಸಾಚಿ ಪರ್ಭಿಂ ಆಮಿ ಎಕಾಮೆಕಾ ಪಾಟಯ್ತಾಂವ್ ಪುಣ್ ಆಮ್ಕಾಂಚ್ ಅಮಿ ವಿಚಾರ್ಯಾಂ, ಆಮ್ಕಾಂ ತಾಚೊ ಮಹತ್ವ್ ಕಳಿತ್ ಆಸಾ? ಫೆಸ್ತಾಂ-ಪರ್ಬೆಂಚೊ ಉಲ್ಲಾಸ್ ಆಮಿ ವಾಟ್ಸಾಪ್-ಫೇಸ್‌ಬುಕಾಚೆರ್ ದಿತಾಂವ್, ಪುಣ್ ಆಮ್ಕಾಂ ತಾಂಚೊ ಮಹತ್ವ್ ಕಳಿತ್ ಆಸಾ? ತರ್ ಹ್ಯಾ ಎಕೆಕಾ ದಿಸಾಚೆಂ ನೀಬ್ ಘೆವ್ನ್ ಪರಭಿಂ ಪಾಟವ್ನ್ ಬಾಕಿಚ್ಯಾ ಹೆರ್ ದಿಸಾಂನಿ ಆಮಿ ಸದಾಂಚೆಪರಿಂ ’ಬದ್ಲಾನಾತ್‌ಲ್ಲೆಂ ಚಿಂತಪ್’ ದವರ್ನ್ ಕಿತೆಂ ಫಾಯ್ದೊ? ಹೆಂಚ್ ಚಿಂತಪ್ ಬಾಯ್ ಉರ್ಜಿತಾ ಅಪ್ಲ್ಯಾ ಕವಿತೆಂತ್ ಅಪುರ್ಭಾಯೆನ್ ವಿಚಾರ್ತಾ.

ಬಾಯ್ ಉರ್ಜಿತಾಕ್ ಹಾಂವ್ ಥೊಡೆಚ್ ತೆಂಪಾಥಾವ್ನ್ ವಳ್ಕತಾಂ, ತಿಚಿ ಕವಿತಾ ಪ್ರತಿಭಾ, ಹೆರಾಂಚೆಂ ಸಾಹಿತ್ ವಾಚ್ತೆಲ್ಯಾ ವರ್ಗಾಚ್ಯಾ ಹಿಚೆಂ ಚಿಂತಪ್ ಮ್ಹಾಕಾ ಖಾಯ್ಸ್, ಪುಣ್ ತಿಚ್ಯಾ ಕವಿತೆಂತ್ಲೆಂ ಸತ್ ಮ್ಹಾಕಾ ಖೂಬ್ ಆಂವಡ್ತಾ. ’ಕವಿತಾ ಮ್ಹಳ್ಯಾರ್ ಉತ್ರಾಂಚಿ ರಾಸ್ ವಾ ಪ್ರಾಸಾಂನಿ ಸಜಯಿಲ್ಲ್ಯೊ ಪೊಕೊಳ್ ವಳಿ ನ್ಹಯ್’ ಹೆಂ ತಿಚ್ಯಾ ಕವಿತೆಂನಿ ಹಾಂವೆಂ ಪಾರ್ಕಿಲಾಂ ದೆಕುನ್ ಹಿಚ್ಯೊ ಕವಿತಾ ಪರತ್ ಪರತ್ ವಾಚುಂಕ್ ಮನ್ ಕರ್ತಾತ್.

ದೇಶ್‌ಪ್ರೇಮ್ ಎಕಾ ದಿಸಾಚೆಂ

ಪರ್ತುನ್ ಯೆತ್ಲೊ ಪಂದ್ರಾ ಆಗಸ್ಟ್

ದೇಶ್‌ಪ್ರೇಮ್ ಚಂವ್ರತಲೆಂ

ಎಕಾ ದಿಸಾಕ್ ತಿರಂಗ್ಯಾನಿ

ಮಾಂಡ್ ಬಾಜಾರಾಂತಲೆ ಭರ್ತಲೆ

ಪರ್ತುನ್ ವಾಜ್ತಲೆಂ ರಾಶ್ಟ್ರಗಾನ್

ದೇಶ್‌ಪ್ರೇಮ್ ಭರ್ತಲೆಂ ಕಾಳ್ಜಾಂತ್

ತಿರಂಗಿ ಬಾವ್ಟೆ ಘೆವ್ನ್ ಹಾತಾನ್

ದೇಶ್‌ಮೊಗಿ ಭೊಂವ್ತಲೆ ಅೊರ್ರಾನ್

ಪರ್ತುನ್ ಭರ್ತಲೆ ಮೊಬಾಯ್ಲ್

ದೇಶ್‌ಭಕ್ತೆಚ್ಯಾ ಸಂದೆಶಾನಿ

ಪರ್ತುನ್ ಭೊವ್ತಲೆ ದೇಶ್‌ಭಕ್ತ್

ಧವೆಫುಲ್ಲ್ ವೆಶಾನಿ

ದೇಶ್‌ಭಕ್ತೆಚೆಂ ನಾಟಕ್ ಹೆಂ

ಎಕಾ ದಿಸಾಕ್ ನಟ್ಟಲೆಂ

ದುಸ್ರೆ ದಿಸಾ ಮುಖವ್ಟೆ

ಸಾಪ್ ಗಳೂನ್ ಪಡ್ಟಲೆ

ಸ್ವತಂತ್ರ್ ಜಾವ್ಚೊ ದೆಶ್ ಮ್ಹಣ್

ಹಾಂಸತ್ ತಾಣಿ ದಿಲೆ ಪ್ರಾಣ್

ದೆಸಾಕ್ ಒಂಪ್ಲಿ ಜೀಣ್ ತಾಣಿ

ವಿಸ್ರೂನ್ ಗೆಲೆ ಸಗ್ಳೆ ಜಾಣ್

ದೆಸ್ ರಾಖ್ಣೆಚೊ ಸೊಪೂತ್

ಘೆತ್ಲೊ ತಾಣಿ ಎಕ್ಮತಾನ್

ಸೀಮೆಚೆರ್ ಗೆಲೊ ತೊ ಭಾರ್ತೀಯ್

ನ್ಹಯ್ ಹಿಂದು ನ್ಹಯ್ ಮುಸ್ಲಮಾನ್

ಆಜ್ ಪಾವ್ನ್ ಭಾರತ್ ಭೂಂಯೆಂಚೆರ್

ತಾಂಡವ್ ಬಲಾತ್ಕಾರ್, ಭ್ರಶ್ಟಾಚಾರಾಚೊ

ಮ್ಹಾರ್ಗಾಯ್, ಗರೀಬಿ, ಜಾತೀಯ್ವಾದ್ ವಾಡ್ಲಾ

ಕಹರ್ ಚಡ್ಲಾ ಗುನ್ಯಾಂವಕಾರಾಂಚೊ

ಕೊಯ್ರಾಚ್ಯೊ ರಾಶಿ ಪಡ್ಲ್ಯಾತ್

ಶಿಕ್ಷಣ್ ವೆವಸ್ತಾ ಇಬಾಡ್ಲ್ಯಾತ್

ಜಾಗ್ರೂಕತಾಯೆನ್ ಫುಡೆಂ ಸರೂಂಯಾ

ಕಾಯ್ ಉದ್ರಗತೀಕ್ ಫಾಟ್ ಕರೂಯಾ?

ಕಾಲ್ ಜೀವ್ ತಾಣಿ ದಿಲ್ಲೊ

ಮೆಳ್ಚಿ ಮ್ಹಣ್ ಸ್ವತಂತ್ರತಾಯ್

ಪ್ರಾಣಾಂಚೊ ಕರೂನ್ ತ್ಯಾಗ್

ಹೊ ಅಸ್ಲೊ ದೆಸ್ ಉಬಾರೂಂಕ್ ಕಾಯ್?

ಬಾವ್ಟೆ ಘೆವ್ನ್ ಮೀರೊವ್ಚೆ ಪರಸ್

ಸಾನ್ನ್ ಘೆವ್ನ್ ವಾವುರಚೆಂ

ಧುಳ್ಕಟಿಲ್ಲೆಂ ದೆಸಾ ಭಾವಿಶ್ಯ್

ಮೆಳುನ್ ಆಮಿ ಸಾವ್ರಚೆಂ

ಕೊಣಾಕ್ ಆತಾಂ ಉರ್ಲ್ಯಾ ಯಾದ್

ಹುತಾತ್ಮ್ಯಾಂಚ್ಯಾ ತ್ಯಾಗಾಚಿ

ಕೊಣಾಕ್ ಆಸಾ ಖಂತ್

ತಾಣಿ ಭೊಗಿಲ್ಲ್ಯಾ ಭೊಗಾಂಚಿ

ಎಕಾ ದಿಸಾಕ್ ಸಗ್ಳೆ ಲಾಯ್ತಲೆ

ಮುಖವ್ಟೊ ದೆಶ್ ಭಕ್ತಾಚೊ

ಕೊಣಾಕ್ ಆಸಾ ಮಾನ್ ಖರೊ

ತಾಣಿ ಗಳಯ್ಲ್ಲ್ಯಾ ರಗ್ತಾಚೊ

ಪಂದ್ರಾ ತಾರ್ಖೆಕ್ ಚಾಂಟೆ ಪಾವ್ಲಾ

ಭಗತ್ ಸಿಂಗ್ ಆನಿ ಗಾಂಧಿ ದಿಸ್ತಲೆ

ದುಸ್ರೆ ದಿಸಾ ದೇಶ್‌ಪ್ರೇಮ್

ಕಾಳ್ಜಾಂತ್ ಒಗ್ಗಿ ನ್ಹೀದ್ತಲೆಂ

ದುಸ್ರೆ ದಿಸಾ ದೇಶ್‌ಪ್ರೇಮ್

ಕಾಳ್ಜಾಂತ್ ಒಗ್ಗಿ ನ್ಹೀದ್ತಲೆಂ

ಕವ್ಳ್ಯೊ, ತಿಸ್ತ್ಯೊ, ವಾದ್ರ್ಯೊ ಜಾವ್ನ್

ಖಾಚಿ ಕೊನ್ಶಾನಿ ಪಡ್ಟಲೆಂ

- ಉರ್ಜಿತಾ ಭೊಬೆ: [ಅಗೊಸ್ತ್ 2018]

ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್’ ಪರ್ಗಟ್ ಜಾಲಾ. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ.