To Konn

Ontoskorn/koxedd'd mholl'llem nat‌l'lo monis ani khoddpi fator hanchemodhem kosolochch forok na. Monis chintunk sokta, vichar korunk sokta, borem-vaitt mapunk sokta. Punn oplo svarth, obles‌ponnachem chintap soddlear matr. Aichea spordhatmok kallar horek monis oploch dangro marta, opunn unchlo mhonnun ruzu korunk heranchi khellkullam korta. Durbhag‌ponnan hantum koviy yotextt mapan bhoron geleat ani oplo svabhiman soit addovo ghalun konnakonnachem uxttem lemvunk rakon asat, lembeun asat ani hankam vellakallar uxttem ghalun poschey asat. Osolea xennantlea kiddeanthaun konnem-i kitem opekxa koruyeta? zoxem sar‌yantlo rentto soit oplestokim chinta; somsar opnnathaun‌ch nitoll zata toxem hanga tanchech kaide ani tanchinch kanunam mhonntoch atm'‌gourovache monis monechch zaun urtat. Kaim osoli kovita tea hoddbea chintpacheank nagddem kortat.

Ma|protap naik mhaka thoddea karonnank lagun bhovo lagsilo; bhasecho gineani, gundd chintpi, voicharik, tatvik niallacheo tacheo kovita kaim vektitvak nirmit korche tosoleo, titlochch sado ani movall vektitvacho. Chimttibhor zannvayecho voso gheun dangro marteleamni hachethaun xikazoi jem visrun gel'lem sangap ’bhor‌l'lo kollso olkandana’. Hi kovita kaim samajik sthorachem matr nhoi, somajintlea pokoll, razoki-i, hijddem vektitvachim pallam-mullam ustunchem kam' bhovo opurbhayen kortana zaitim mukhottim opxinch zhoddunk dhortana dolleam somor ubhim zamvchim kosolim mholl'llem polleunko ani parkunk tukach soddtam.

To Konn

Kednam to’ri

Hanga aylo

Amchya lokachi

Seva ko’runk laglo

Tednam

To konn?

Ho pro’sn

Amche mukhar

Ubo ravlo.

Konn mho’nnta:

Tachya angar

Mo’n’xa rupan

Lipla devchar

Shittuk ravat

Taka mathyar

Gheum nakat

Tumchi shenddi

Hatant dilyar

Tumchi shenpddi-i

Kapun vhelyar

Nak katrun

Bhonvchem po’ddo’t.

Konn sangta:

To drohi

Amche mo’dhem

Futt ghalpi

Doshi ko’rpi

Amchya angnnant Fugddi

Tanchya angnnant Dekhnni

Nachtam gaytam

Kednam to’ri

Amchya pottar

Khontt marpi.

Konn suskarta:

Taka zo’shi

Jib suttli

Amchi fituri

Svarthi tuturi

Tannem futto’yli

Peje vangdda

Peje vattli

Hiskaun gheun

Jinn amchi

O’llnni keli.

Konn husketa:

Tannem amche

Ko’po’tti po’dd’de

Fallun fafsun

Svarthi kollsule

Dhaddaun futtoun

Atam amkam

Kele nagdde

Kele lo’ngdde.

Konn pinrgo’ta:

To amchoch

Pun kityak

Mho’nn konn zanna

Ami uddo’ylo’lye

Manachye go’riyek

Bhikechye davlyek

To sanpo’ddo’nam

Ami dilo’lem

Tokhnnayechem davem

Ttikechem zallem

Chidd’ddun mudd’ddun

Amchya tonddar

Shevttun marun

Aplich vatt

Dho’runveta.

Konn shiddkayta:

To zayt

Amchya kallar

Amchya ganvant

Udeun yevpi

Rushi muni

Pro’vadi vaparki

Vatter tachie

Ghalun kantte

Zaunchenant

Tumi zannte.

Shetantlyam alunddamno

Merer ravun

Tacher tumi

Galli shinvo’rachim

Tumchi mo’stram

Soddit ravle.

Kallkachya puzryamno

Apali pakhellun

Ttopo’nn nanvam vaprun

Tacher kany

Fato’r marun

Many desache

many bhunyeche

Tumi rako’nndarzato’le?

Tumchya meghastrak

Tachem vayuo’str

Tumchya o’gnio’strak

Tachem jo’lastr

Tumchya so’rpastrak

Tachem go’ruddastr

Tumchya so’rvo’strank

Tachem mavnastr

So’rvant bo’llishtt

Hem tumkam

Azunso’m zo’lemnam?

Tumchi zolli

Tumchit tolli

In’kar ko’rpi

Kityak zata

Tumcho vo’iri?

Tumche vichar

Tumche achar

Khoddun kaddpi

Ko’so zata

Tumch odveshi?

Shekddyam pasun

Tumchem hench

Cho’lo’t aylam

Khursar maro’p

Fashi divo’p

Vik ghalo’p

Dho’mki divo’p

Bo’hishkar ghalo’p

Sariyer laso’p

Jiv kaddo’p

Uprant tumi

Rogtant buddlo’le

Papache hat

Kulyank pushit

Hanso’t mho’nno’p:

Halim tachem mure

Cho’dduch zal’lem

Atmo’ro’ksho’nnak lagun

Taka ami

Itle vegim

Kaddchoch poddlo!

- Pratap Naik, S.J, Gõy [Febrer, 2018]

Pratap Naik, S.J: Bhasecho gineani, gundd chintpi, voicharik, tatvik niallacheo tacheo kovita kaim vektitvak nirmit korche tosoleo, titlochch sado ani movall vektitvacho. Gõycha sam|sttifons konkonni somstho hangasor zaitim vorsam seva dil'lo ho prostut ponnjichea jejvis ghorant vosti korun asa tor‌yi, konkonni bhasek hannim diun ayil'li denngi bhovo vorti toxench konnem-i obhiman pavunk zai tosoli.